Read Aramaic Peshita 1 Kings 12 Bible Online

1 Kings 12 - Aramaic Peshita bible

1 Kings 12

¹ܘܐܸܙܲܠ̣ ܪܚܸܒ̣ܥܲܡ ܠܲܫܟܹܝܡ: ܡܸܛܲܠ ܕܠܲܫܟܹܝܡ ܐܸܬ̣ܵܘ ܟܠܹܗ ܝܼܣܪܵܝܹܠ ܠܡܲܡܠܵܟ݂ܘܼܬܹܗ.

²ܘܟܲܕ݂ ܫ̣ܡܲܥ ܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܘܗ̤ܘ ܥܕܲܟܹ̇ܝܠ ܒܡܸܨܪܹܝܢ ܗ̄ܘ̣ܵܐ: ܕܲܥܪܲܩ̣ ܡ̣ܢ ܩܕ݂ܵܡ ܡܲܠܟܵܐ ܫܠܹܝܡܘܿܢ: ܘܝܼܬܸܒ̣ ܝܘܿܪܲܒ̣ܥܲܡ ܒܡܸܨܪܹܝܢ.

³ܘܫܲܕܲܪܘ ܘܲܩܪܵܐܘܼܗܝ: ܘܐܸܬ̣ܵܐ ܝܘܿܪܲܒ̣ܥܲܡ ܘܟ݂ܠܹܗ ܥܲܡܵܐ ܕܝܼܣܪܵܝܹܠ. ܘܐܸܡܲܪܘ ܠܲܪܚܸܒ̣ܥܲܡ.

⁴ܐܲܒ̣ܘܼܟ݂ ܐܲܩܫܝܼ ܢܝܼܪܲܢ: ܐܲܢ̄ܬ̇ ܗܵܫܵܐ ܐܲܩܸܠ ܡ̣ܢ ܫܘܼܥܒܵܕܹܗ ܕܐܲܒ̣ܘܼܟ݂ ܩܲܫܝܵܐ: ܘܡ̣ܢ ܢܝܼܪܹܗ ܬܲܩܝܼܦܵܐ ܕܣܵܡ̣ ܥܠܲܝܢ ܘܢܸܦ̱ܠܚܵܟ݂.

⁵ܘܐܸܡܲܪ ܠܗܘܿܢ: ܙܸܠܘ. ܘܡܸܟܵܐ ܠܲܬ̣ܠܵܬ̣ܵܐ ܝܵܘ̈ܡܝܼܢ ܬܵܘ ܠܘܵܬ̣ܝ. ܘܐܸܙܲܠܘ ܟܠܹܗ ܥܲܡܵܐ.

⁶ܘܐܸܬ̣ܡܲܠܲܟ݂ ܡܲܠܟܵܐ ܪܚܸܒ̣ܥܲܡ ܒܣܵܒܹ̈ܐ ܕܩܵܝܡܝܼܢ ܗ̄ܘ̣ܵܘ ܩܕ݂ܵܡ ܐܲܒ̣ܘܼܗܝ ܟܲܕ݂ ܚܲܝ ܗ̄ܘ̣ܵܐ. ܘܐܸܡܲܪ ܠܗܘܿܢ: ܐܲܝܟܲܢܵܐ ܡܵܠܟ̇ܝܼܢ ܐ̄ܢܬ̇ܘܿܢ ܠܝܼ ܕܐܲܬ̣ܝܼܒ̣ܝܼܘܗܝ ܠܥܲܡܵܐ ܦܸܬ̣ܓ̣ܵܡܵܐ.

⁷ܘܐܸܡܲܪܘ ܠܹܗ: ܐܸܢ ܝܵܘܡܵܢܵܐ ܬܸܗܘܹܐ ܥܲܒ̣ܕܵܐ ܠܥܲܡܵܐ ܗܵܢܵܐ ܘܬܸܦܠܘܿܚ ܐܸܢܘܿܢ: ܘܬܸܥܢܸܐ ܐܸܢܘܿܢ: ܘܬܹܐܡܲܪ ܠܗܘܿܢ ܡܸܠ̈ܝܼܢ ܛܵܒ̣ܵـ̈ـܢ: ܢܸܗܘܘܿܢ ܠܵܟ݂ ܥܲܒ̣̈ܕܹ̇ܐ ܟܠܗܘܿܢ ܝܵܘ̈ܡܵܬ̣ܵܐ.

⁸ܘܲܫܒܲܩ ܡܸܠܟܵܐ ܕܣܵܒܹ̈ܐ ܕܡܲܠܟ̇ܘܼܗܝ: ܘܐܸܬ̣ܡܲܠܲܟ݂ ܒܲܛܠܵܝܹ̈ܐ ܕܲܪܒ̣ܵܘ ܥܲܡܹܗ: ܕܩܵܝ̇ܡܝܼܢ ܩܕ݂ܵܡܵܘܗܝ.

⁹ܘܐܸܡܲܪ ܠܗܘܿܢ: ܡܵܢܵܐ ܡܵܠܟ̇ܝܼܢ ܐ̄ܢܬ̇ܘܿܢ ܕܐܸܬܸ̇ܠ ܠܥܲܡܵܐ ܦܸܬ̣ܓ̣ܵܡܵܐ: ܕܐܵܡܪܝܼܢ ܠܝܼ ܕܐܲܩܸܠ ܡ̣ܢ ܢܝܼܪܵܐ ܕܣܵܡ̣ ܥܠܲܝܢ ܐܲܒ̣ܘܼܟ݂: ܘܢܸܦ̱ܠܚܵܟ݂.

¹⁰ܘܐܸܡܲܪܘ ܠܹܗ ܛܠܵܝܹ̈ܐ ܕܲܪܒ̣ܵܘ ܥܲܡܹܗ: ܗܵܟܲܢܵܐ ܐܸܡܲܪ ܠܥܲܡܵܐ: ܕܐܸܡܲܪ ܠܵܟ݂: ܕܐܲܒ̣ܘܼܟ݂ ܐܲܩܫܝܼ ܢܝܼܪܲܢ: ܐܲܢ̄ܬ̇ ܐܲܩܸܠ ܥܠܲܝܢ ܐܸܡܲܪ ܠܗܘܿܢ: ܚܸܨܪܝ ܥܲܒ̣ܝܵܐ ܗ̄ܝ̣ ܡ̣ܢ ܟܪܵܬܹܗ ܕܐܵܒ̣ܝ.

¹¹ܐܵܒ̣ܝܼ ܐܲܥܫܸܢ ܥܠܲܝܟ̇ܘܿܢ ܢܝܼܪܵܐ ܥܲܫܝܼܢܵܐ: ܐܸܢܵܐ ܐܵܘܣܸܦ ܥܲܠ ܢܝܼܪܟ݂ܘܿܢ. ܐܵܒ̣ܝ ܪܕ݂ܵܟ݂ܘܿܢ ܒܫܵܘ̈ܛܹܐ: ܘܐܸܢܵܐ ܐܸܪܕܸ̇ܝܼܟ݂ܘܿܢ ܒܡܵܪ̈ܲܓ̣ܢܹܐ.

¹²ܘܐܸܬ̣ܵܐ ܝܘܿܪܲܒ̣ܥܲܡ ܘܟ݂ܠܹܗ ܝܼܣܪܵܝܹܠ ܠܘܵܬ̣ ܪܚܸܒ̣ܥܲܡ ܒܝܵܘܡܵܐ ܬܠܝܼܬ̣ܵܝܵܐ: ܐܲܝܟܲܢܵܐ ܕܐܸܡܲܪ ܠܗܘܿܢ ܡܲܠܟܵܐ ܕܬ̣ܵܘ ܠܘܵܬ̣ܝ ܒܝܵܘܡܵܐ ܬܠܝܼܬ̣ܵܝܵܐ.

¹³ܘܲܥ̣ܢܵܐ ܡܲܠܟܵܐ ܠܥܲܡܵܐ ܩܲܫܝܵܐܝܼܬ̣: ܘܲܫܒܲܩ ܡܸܠܟܵܐ ܕܣܵܒܹ̈ܐ ܕܡܲܠܟ̇ܘܼܗܝ.

¹⁴ܘܐܸܡܲܪ ܠܗܘܿܢ ܐܲܝܟ݂ ܡܸܠܟܵܐ ܕܲܛܠܵܝܹ̈ܐ: ܐܵܒ̣ܝ ܐܲܥܫܸܢ ܢܝܼܪܟ݂ܘܿܢ: ܐܸܢܵܐ ܐܵܘܣܸܦ ܥܲܠ ܢܝܼܪܟ݂ܘܿܢ: ܐܵܒ̣ܝ ܪܕ݂ܵܟ݂ܘܿܢ ܒܫܵܘܛܹ̈ܐ: ܘܐܸܢܵܐ ܐܸܪܕܸ̇ܝܼܟ݂ܘܿܢ ܒܡܵܪ̈ܲܓ̣ܢܹܐ.

¹⁵ܘܠܵܐ ܫ̣ܡܲܥ ܡܲܠܟܵܐ ܡ̣ܢ ܥܲܡܵܐ: ܡܸܛܠ ܕܲܗܘ̤ܵܬ̣ ܡܓܲܪܝܵܢܘܼܬ̣ܵܐ ܡ̣ܢ ܩܕ݂ܵܡ ܡܵܪܝܵܐ: ܡܸܛܠ ܕܲܢܩܝܼܡ ܡܵܪܝܵܐ ܦܸܬ̣ܓ̣ܵܡܵܘ̈ܗܝ ܕܡܲܠܸܠ̣ ܒܐܝܼܕ݂ܵܐ ܕܥܲܒ̣ܕܹ̇ܗ ܐܲܚܝܼܵܐ ܢܒ̣ܝܼܵܐ ܫܝܼܠܘܿܢܵܝܵܐ: ܝܘܿܪܲܒ̣ܥܲܡ ܒܲܪ ܢܵܒ̣ܵܛ.

¹⁶ܘܲܚ̣ܙܵܐ ܟܠܹܗ ܝܼܣܪܵܝܹܠ ܕܠܵܐ ܫܵܡܲܥ ܠܗܘܿܢ ܡܲܠܟܵܐ: ܘܐܲܬ̣ܝܼܒ̣ܘ ܥܲܡܵܐ ܦܸܬ̣ܓ̣ܵܡܵܐ ܠܡܲܠܟܵܐ. ܘܐܸܡܲܪܘ ܠܹܗ: ܠܵܐ ܦܵܠܓܘܼܬ̣ܵܐ ܐܝܼܬ̣ ܠܲܢ ܥܲܡ ܕܵܘܝܼܕ݂: ܐܵܦܠܵܐ ܝܵܪܬ̇ܘܼܬ̣ܵܐ ܥܲܡ ܒܪܹܗ ܕܐܝܼܫܲܝ. ܠܡܲܫܟ̇ܢܲܝ̈ܟ ܝܼܣܪܵܝܹܠ. ܡܸܟܹ̇ܝܠ ܚܙܝܼ ܒܲܝܬܵܟ݂ ܕܵܘܝܼܕ݂. ܘܐܸܙܲܠ̣ܘ ܒܢܲܝ̈ ܝܼܣܪܵܝܹܠ ܟܠ ܐ̄ܢܵܫ ܠܲܩܪܝܼܬܹܗ.

¹⁷ܘܲܒ̣ܢܲܝ̈ ܝܼܣܪܵܝܹܠ ܝܵܬ̣ܒ̇ܝܼܢ ܒܩܘܼܪ̈ܝܼܗܘܿܢ. ܘܲܝܗܘܼܕ݂ܵܐ ܐܲܡ̣ܠܸܟ݂ ܥܠܲܝܗܘܿܢ ܠܲܪܚܹܒ̣ܥܲܡ ܒܲܪ ܫܠܹܝܡܘܿܢ.

¹⁸ܘܫܲܕܲܪ ܡܲܠܟܵܐ ܪܚܸܒ̣ܥܲܡ ܠܘܵܬ̣ ܟܠܹܗ ܝܼܣܪܵܝܹܠ: ܠܐܲܕ݂ܘܿܢܝܼܪܵܡ ܕܥܲܠ ܡܲܕܲܐܬ̣ܵܐ: ܘܪܲܓ̣ܡܘܼܗܝ ܟܠܗܘܿܢ ܕܒܹܝܬ̣ ܝܼܣܪܵܝܹܠ ܒܟܹܐܦܹ̈ܐ ܘܡܝܼܬ̣. ܘܡܲܠܟܵܐ ܪܚܸܒ̣ܥܲܡ ܐܸܬ̣ܥܲܫܲܢ ܕܢܸܣܲܩ ܒܡܲܪܟܲܒ̣ܬ̣ܵܐ: ܘܢܸܥܪܘܿܩ ܠܐܘܿܪܸܫܠܸܡ.

¹⁹ܘܲܡܪܲܕ݂ܘ ܕܒܹܝܬ̣ ܝܼܣܪܵܝܹܠ ܥܲܠ ܕܒܹܝܬ̣ ܕܵܘܝܼܕ݂: ܥܕܲܡܵܐ ܠܝܵܘܡܵܢܵܐ.

²⁰ܘܟܲܕ݂ ܫ̣ܡܲܥܘ ܟܠܹܗ ܝܼܣܪܵܝܹܠ: ܕܲܗܦܲܟ݂ ܝܘܿܪܲܒ̣ܥܲܡ: ܫܲܕܲܪ ܘܲܩܪܵܐܘܼܗܝ ܠܲܟ݂ܢܘܼܫܬܵܐ. ܘܐܲܡ̱ܠܟ݂ܘܼܗܝ ܥܲܠ ܟܠܹܗ ܝܼܣܪܵܝܹܠ. ܘܠܵܐ ܗ̄ܘ̣ܵܐ ܒܵܬܲܪ ܕܒܹܝܬ̣ ܕܵܘܝܼܕ݂: ܐܸܠܵܐ ܐܸܢ ܫܲܒ̣ܛܵܐ ܕܲܝܗܘܼܕ݂ܵܐ ܒܲܠܚܘܿܕܲܝܗܘܿܢ.

²¹ܘܐܸܬ̣ܵܐ ܪܚܸܒ̣ܥܲܡ ܠܐܘܿܪܸܫܠܸܡ: ܘܲܟ݂ܢܲܫܘ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܘܫܲܒ̣ܛܵܐ ܕܒܹܝܬ̣ ܒܸܢܝܵܡܹܝܢ: ܡܵܐܐ ܘܲܬ̣ܡܵܢܐܝܼܢ ܐܲܠܦ̈ܝܼܢ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ: ܠܡܸܬ̣ܟܲܬܵܫܘܼ ܥܲܡ ܕܒܹܝܬ̣ ܝܼܣܪܵܝܹܠ: ܠܡܲܗܦܵܟ݂ܘܼ ܡܲܠܟ̇ܘܼܬ̣ܵܐ ܠܲܪܚܸܒ̣ܥܲܡ ܒܲܪ ܫܠܹܝܡܘܿܢ.

²²ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܫܡܲܥܝܵܐ ܢܒ̣ܝܹܗ ܕܐܲܠܵܗܵܐ ܠܡܹܐܡܲܪ.

²³ܐܸܡܲܪ ܠܲܪܚܸܒ̣ܥܲܡ ܒܲܪ ܫܠܹܝܡܘܿܢ ܡܲܠܟܵܐ ܕܲܝܗܘܼܕ݂ܵܐ: ܘܲܠܟ݂ܠܹܗ ܒܹܝܬ̣ ܝܼܗܘܼܕ݂ܵܐ ܘܒܸܢܝܵܡܹܝܢ: ܘܲܠܫܲܪܟܹ̇ܗ ܕܥܲܡܵܐ ܠܡܹܐܡܲܪ.

²⁴ܗܵܟܲܢܵܐ ܐܵܡܲܪ ܡܵܪܝܵܐ: ܠܵܐ ܬܸܣܩܘܼܢ: ܘܠܵܐ ܬܸܬ̣ܟܲܬ̇ܫܘܼܢ ܥܲܡ ܐܲܚܲܝ̈ܟ̇ܘܿܢ ܒܢܲܝ̈ ܝܼܣܪܵܝܹܠ. ܗܦܘܿܟ݂ܘ ܐ̄ܢܵܫ ܠܒܲܝܬܹ̇ܗ: ܡܸܛܠ ܕܡ̣ܢ ܩܕ݂ܵܡܲܝ ܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ. ܘܲܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ: ܘܲܗܦܲܟ݂ܘ ܠܡܹܐܙܲܠ ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ.

²⁵ܘܲܒ̣ܢܵܐ ܝܘܿܪܲܒ̣ܥܲܡ ܠܲܫܟܹܝܡ ܕܲܒ̣ܛܘܼܪܵܐ ܕܐܲܦܪܹܝܡ: ܘܝܸܬܸܒ̣ ܒܵܗ̇. ܘܲܢܦܲܩ ܡ̣ܢ ܬܲܡܵܢ: ܘܲܒ̣ܢܵܐ ܠܲܦܢܘܼܐܹܝܠ.

²⁶ܘܐܸܡܲܪ ܝܘܿܪܲܒ̣ܥܲܡ ܒܠܸܒܹ̇ܗ: ܡܸܟܹ̇ܝܠ ܗܵܦ̇ܟܵܐ ܠܵܗ̇ ܡܲܠܟ̇ܘܼܬ̣ܵܐ ܠܒܹܝܬ̣ ܕܵܘܝܼܕ݂.

²⁷ܐܸܢ ܣܵܠܹܩ ܥܲܡܵܐ ܗܵܢܵܐ ܠܡܸܥܒܲܕ݂ ܕܸܒ̣ܚ̱ܬ̣ܵܐ ܒܒܲܝܬܹ̇ܗ ܕܡܵܪܝܵܐ ܒܐܘܿܪܸܫܠܸܡ: ܡܸܬ̣ܦܢܸܐ ܠܸܒܹ̇ܗ ܕܥܲܡܵܐ ܗܵܢܵܐ ܥܲܠ ܪܚܸܒ̣ܥܲܡ ܡܵܪܗܘܿܢ ܡܠܟܵܐ ܕܲܝܗܘܼܕ݂ܵܐ. ܘܩܵܛܠܝܼܢ ܠܝܼ: ܘܗܵܦܟ̇ܝܼܢ ܠܘܵܬ̣ ܪܚܸܒ̣ܥܲܡ ܡܲܠܟܵܐ ܕܲܝܗܘܼܕ݂ܵܐ.

²⁸ܘܐܸܬ̣ܡܲܠܲܟ݂ ܡܲܠܟܵܐ: ܘܲܥܒܲܕ݂ ܬܪܹܝܢ ܥܸܓ̣ܠܹ̈ܐ ܕܕܲܗܒ̣ܵܐ. ܘܐܸܡܲܪ ܠܟ݂ܠܹܗ ܝܼܣܪܵܝܹܠ: ܣܲܓ̇ܝܼ ܗ̄ܘ̣ ܠܟ݂ܘܿܢ ܠܡܸܣܲܩ ܠܐܘܿܪܸܫܠܸܡ. ܘܐܸܡܲܪ: ܗܵܐ ܐܲܠܵܗܲܝ̈ܟ ܝܼܣܪܵܝܹܠ: ܕܐܲܣܩܘܼܟ݂ ܡ̣ܢ ܐܲܪܥܵܐ ܕܡܸܨܪܹܝܢ.

²⁹ܘܣܵܡ ܚܲܕ݂ ܒܒܹܝܬ̣ ܐܹܝܠ: ܘܚܲܕ݂ ܣܵܡ̣ ܒܕ݂ܵܢ.

³⁰ܘܲܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ ܠܲܚܛܵܗܵܐ. ܘܐܸܙܲܠ̣ܘ ܥܲܡܵܐ ܩܕ݂ܵܡ ܚܲܕ݂ ܥܕܲܡܵܐ ܠܕ݂ܵܢ.

³¹ܘܲܥܒܲܕ݂ ܒܹܝܬ̣ ܥ̈ܠܵܘܵܬ̣ܵܐ. ܘܲܥܒܲܕ݂ ܟܘܼܡܪܹ̈ܐ ܡ̣ܢ ܥܲܡܵܐ: ܐܲܝܠܹܝܢ ܕܠܵܐ ܗ̄ܘ̣ܵܘ ܡ̣ܢ ܒܢܲܝ̈ ܠܹܘܝܼ.

³²ܘܲܥܒܲܕ݂ ܝܘܿܪܲܒ̣ܥܲܡ ܚܲܓܵܐ ܒܝܲܪܚܵܐ ܬܡܝܼܢܵܝܵܐ: ܒܟܸܣܐܵܐ ܒܹܗ ܒܝܲܪܚܵܐ: ܐܲܝܟ݂ ܚܲܓܵܐ ܕܒܲܝܗܘܼܕ݂ܵܐ. ܘܲܣܠܸܩ ܥܲܠ ܡܲܕ݂ܒ̇ܚܵܐ. ܘܗܵܟܲܢܵܐ ܥ̣ܒܲܕ݂ ܐܵܦ ܒܒܹܝܬ̣ ܐܹܝܠ: ܠܲܡܕܲܒܵܚܘܼ ܠܥܸܓ̣ܠܹ̈ܐ ܕܲܥ̣ܒܲܕ݂. ܘܐܲܩܝܼܡ ܒܒܹܝܬ̣ ܐܹܝܠ ܟܘܼܡܪܹ̈ܐ ܕܲܥـ̈ـܠܵܘܵܬ̣ܵܐ ܕܲܥܒܲܕ݂.

³³ܘܲܣܠܸܩ ܥܲܠ ܡܲܕ݂ܒ̇ܚܵܐ ܕܲܥܒܲܕ݂ ܒܒܹܝܬ̣ ܐܹܝܠ: ܒܟܸܣܐܵܐ ܒܹܗ ܒܝܲܪܚܵܐ ܬܡܝܼܢܵܝܵܐ: ܒܝܲܪܚܵܐ ܕܲܒ̣ܕ݂ܵܐ ܡ̣ܢ ܠܸܒܹ̇ܗ. ܘܲܥ̣ܒܲܕ݂ ܚܲܓܵܐ ܠܲܒ̣ܢܲܝ̈ ܝܼܣܪܵܝܹܠ. ܘܲܣܠܸܩ ܥܲܠ ܡܲܕ݂ܒ̇ܚܵܐ ܠܲܡܣܵܡ ܒܸܣܡܹ̈ܐ.