Read Aramaic Peshita 1 Kings 13 Bible Online

1 Kings 13 - Aramaic Peshita bible

1 Kings 13

¹ܘܗܵܐ ܢܒ̣ܝܼܵܐ ܕܐܲܠܵܗܵܐ ܐܸܬ̣ܵܐ ܡ̣ܢ ܝܼܗܘܼܕ݂ܵܐ: ܒܦܸܬ̣ܓ̣ܵܡܹܗ ܕܡܵܪܝܵܐ ܠܒܹܝܬ̣ ܐܹܝܠ. ܘܝܘܿܪܲܒ̣ܥܲܡ ܩܵܐܹ̇ܡ ܗ̄ܘ̣ܵܐ ܥܲܠ ܡܲܕ݂ܒ̇ܚܵܐ ܠܲܡܣܵܡ ܒܸܣܡܹ̈ܐ.

²ܘܲܩ̣ܪܵܐ ܥܲܠ ܡܲܕ݂ܒ̇ܚܵܐ ܦܸܬ̣ܓ̣ܵܡܹܗ ܕܡܵܪܝܵܐ ܘܐܸܡܲܪ: ܡܲܕ݂ܒ̇ܚܵܐ ܡܲܕ݂ܒ̇ܚܵܐ ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ. ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܒܪܵܐ ܡܸܬ̣̤ܝܼܠܸܕ݂ ܠܒܹܝܬ̣ ܕܵܘܝܼܕ݂: ܝܘܿܫܝܼܵܐ ܫܡܹܗ. ܘܲܢܕܲܒܲܚ ܥܠܲܝܟ ܟܘܼܡܪܹ̈ܐ ܕܲܥ̈ܠܵܘܵܬ̣ܵܐ ܕܣܵܝܡܝܼܢ ܥܠܲܝܟ ܒܸܣܡܹ̈ܐ. ܘܓܲܪ̈ܡܹܐ ܕܐ̄ܢܵܫܵܐ ܢܵܘܩܸܕ݂ ܥܠܲܝܟ.

³ܘܝܲܗ̄ܒ̣ ܒܝܵܘܡܵܐ ܗܵܘ̇ ܐܵܬ̤ܵܐ ܘܐܸܡܲܪ: ܗܵܕܹܐ ܐܵܬ̤ܵܐ ܕܡܵܪܝܵܐ ܫܲܕ̇ܪܲܢܝ. ܗܵܐ ܡܲܕ݂ܒ̇ܚܵܐ ܡܸܨܛ̄ܪܸܐ: ܘܡܸܬ̣ܐ̱ܫܸܕ݂ ܩܸܛܡܵܐ ܕܲܥܠܵܘܗܝ.

⁴ܘܟܲܕ݂ ܫ̣ܡܲܥ ܡܲܠܟܵܐ ܡܸܠܵܘ̈ܗܝ ܕܲܢܒ̣ܝܹܗ ܕܐܲܠܵܗܵܐ: ܕܲܩ̣ܪܵܐ ܥܲܠ ܡܲܕ݂ܒ̇ܚܵܐ ܕܲܒ̣ܒܹܝܬ̣ ܐܹܝܠ: ܐܵܘܫܸܛ ܡܲܠܟܵܐ ܐܝܼܕܹܗ ܡ̣ܢ ܡܲܕ݂ܒ̇ܚܵܐ: ܘܐܸܡܲܪ ܐܘܼܚܕܵܘܼܗܝ. ܘܝܼܒ̣ܫܲܬ̤ ܐܝܼܕܹܗ ܕܐܵܘܫܸܛ ܥܠܵܘܗܝ. ܘܠܵܐ ܐܸܫܟܲܚ ܕܢܲܗܦܟ݂ܝܼܗ̇ ܠܘܵܬ̣ܗ.

⁵ܘܡܲܕ݂ܒ̇ܚܵܐ ܐܸܨܛ̄ܪܝܼ: ܘܐܸܬ̣ܐܫܸܕ݂ ܩܸܛܡܵܐ ܕܲܥܠܵܘܗܝ: ܐܲܝܟ݂ ܐܵܬ̤ܵܐ ܕܝܲܗ̄ܒ̣ ܢܒ̣ܝܹܗ ܕܐܲܠܵܗܵܐ ܒܦܸܬ̣ܓ̣ܵܡܹܗ ܕܡܵܪܝܵܐ.

⁶ܘܲܥ̣ܢܵܐ ܡܲܠܟܵܐ ܘܐܸܡܲܪ ܠܲܢܒ̣ܝܹܗ ܕܐܲܠܵܗܵܐ: ܨܲܠܵܐ ܥܠܲܝ ܩܕ݂ܵܡ ܡܵܪܝܵܐ ܐܲܠܵܗܵܟ݂: ܘܲܒ̣ܥܝܼ ܥܠܲܝ ܕܬܸܗܦܘܿܟ݂ ܐܝܼܕ݂ܝ ܠܘܵܬ̣ܝ. ܘܨܱܲܠܝܼ ܢܒ̣ܝܹܗ ܕܐܲܠܵܗܵܐ ܩܕ݂ܵܡ ܡܵܪܝܵܐ. ܘܗܸܦܟܲܬ̤ ܐܝܼܕܹܗ ܕܡܲܠܟܵܐ ܠܘܵܬܹܗ: ܘܲܗܘ̤ܵܬ̣ ܐܲܝܟ݂ ܕܡ̣ܢ ܩܕ݂ܝܼܡ.

⁷ܘܐܸܡܲܪ ܡܲܠܟܵܐ ܠܲܢܒ̣ܝܹܗ ܕܐܲܠܵܗܵܐ: ܬܵܐ ܥܲܡܝ ܠܒܲܝܬܵܐ ܘܲܠܥܲܣ: ܘܐܸܬܸ̇ܠ ܠܵܟ݂ ܡܵܘܗܲܒ̣ܬ̣ܵܐ.

⁸ܘܐܸܡܲܪ ܠܹܗ ܢܒ̣ܝܹܗ ܕܐܲܠܵܗܵܐ: ܐܸܢ ܬܸܬܸ̇ܠ ܠܝܼ ܦܸܠܓܹ̇ܗ ܕܒܲܝܬܵܟ݂: ܠܵܐ ܐܸܥܘܿܠ ܥܲܡܵܟ݂ ܠܒܲܝܬܵܐ: ܘܠܵܐ ܐܲܟ݂ܘܿܠ ܠܲܚܡܵܐ: ܘܠܵܐ ܐܸܫܬܸ̇ܐ ܡܲـ̈ـܝܵܐ.

⁹ܡܸܛܠ ܕܗܵܟܲܢܵܐ ܦܲܩܕܲܢܝ ܒܦܸܬ̣ܓ̣ܵܡܵܐ ܡܵܪܝܵܐ ܘܐܸܡܲܪ ܠܝܼ: ܠܵܐ ܬܹܐܟ݂ܘܿܠ ܠܲܚܡܵܐ: ܘܠܵܐ ܬܸܫܬܹ̇ܐ ܡܲـ̈ـܝܵܐ: ܘܠܵܐ ܬܸܗܦܘܿܟ݂ ܒܐܘܼܪܚܵܐ ܕܐܸܬܲܝܬ̇ ܒܵܗ̇.

¹⁰ܘܐܸܙܲܠ ܠܹܗ ܒܐܘܼܪܚܵܐ ܐ̄ܚܪܹܬ̣ܵܐ: ܘܠܵܐ ܗܸܦܲܟ݂ ܒܐܘܼܪܚܵܐ ܕܐܸܬ̣ܵܐ ܒܵܗ̇: ܠܒܹܝܬ̣ ܐܹܝܠ.

¹¹ܘܲܢܒ̣ܝܼܵܐ ܚܲܕ݂ ܣܵܒ̣ܵܐ ܝܵܬܹܒ̣ ܗ̄ܘ̣ܵܐ ܒܒܹܝܬ̣ ܐܹܝܠ: ܘܐܸܬ̣ܵܘ ܒܢܵܘ̈ܗܝ ܘܐܸܫܬܲܥܝܼܘ ܠܹܗ ܟܠ ܥܒ̣ܵܕ݂ܵܐ ܕܲܥܒܲܕ݂ ܢܒ̣ܝܹܗ ܕܐܲܠܵܗܵܐ ܒܝܵܘܡܵܐ ܗܵܘ̇ ܒܒܹܝܬ̣ ܐܹܝܠ. ܘܦܸܬ̣ܓ̣ܵܡܵܐ ܕܐܸܡܲܪ ܠܡܲܠܟܵܐ: ܐܸܫܬܲܥܝܼܘ ܒܢܵܘ̈ܗܝ ܠܐܲܒ̣ܘܼܗܘܿܢ.

¹²ܘܐܸܡܲܪ ܠܗܘܿܢ ܐܲܒ̣ܘܼܗܘܿܢ: ܒܐܲܝܕܵܐ ܐܘܼܪܚܵܐ ܐܸܙܲܠ̣: ܘܚܵܘܝܼܘܗܝ ܒܢܵܘ̈ܗܝ ܐܘܼܪܚܵܐ ܕܐܸܙܲܠ̣ ܒܵܗ̇ ܢܒ̣ܝܹܗ ܕܐܲܠܵܗܵܐ ܕܐܸܬ̤ܵܐ ܡ̣ܢ ܝܼܗܘܼܕ݂ܵܐ.

¹³ܘܐܸܡܲܪ ܠܲܒ̣ܢܵܘ̈ܗܝ: ܐܲܪܡܵܘ ܠܝܼ ܥܲܠ ܚܡܵܪܵܐ. ܘܐܲܪܡ̣ܝܼܘ ܠܹܗ ܥܲܠ ܚܡܵܪܵܐ: ܘܲܪܟܸܒ̣ ܥܠܵܘܗܝ.

¹⁴ܘܐܸܙܲܠ̣ ܒܵܬܲܪ ܢܒ̣ܝܹܗ ܕܐܲܠܵܗܵܐ: ܘܐܸܫܟ̇ܚܹܗ ܟܲܕ݂ ܝܵܬܹܒ̣ ܬܚܹܝܬ̣ ܒܸܛܡ̱ܬ̣ܵܐ. ܘܐܸܡܲܪ ܠܹܗ: ܐܲܢ̄ܬ̇ ܗ̄ܘ̣ ܢܒ̣ܝܹܗ ܕܐܲܠܵܗܵܐ ܕܐܸܬܲܝܬ̇ ܡ̣ܢ ܝܼܗܘܼܕ݂ܵܐ. ܐܵܡܲܪ ܠܹܗ: ܐܸܢܵܐ ܗ̄ܘ̣.

¹⁵ܐܵܡܲܪ ܠܹܗ: ܬܵܐ ܥܲܡܝ ܠܒܲܝܬܵܐ: ܘܐܲܟ݂ܘܿܠ ܠܲܚܡܵܐ.

¹⁶ܘܐܸܡܲܪ ܠܹܗ: ܠܵܐ ܡܸܫܟܲܚ ܐ̄ܢܵܐ ܕܐܸܗܦܘܿܟ݂ ܥܲܡܵܟ݂: ܘܐܹܬܹܐ ܠܒܲܝܬܵܟ݂: ܘܠܵܐ ܐܹܟܘܿܠ ܥܲܡܵܟ݂ ܠܲܚܡܵܐ: ܘܠܵܐ ܐܸܫܬܹ̇ܐ ܡܲـ̈ـܝܵܐ ܒܐܲܬ̣ܪܵܐ ܗܵܢܵܐ.

¹⁷ܡܸܛܠ ܕܗܵܟܲܢܵܐ ܐܸܬ̣ܐ̱ܡܲܪ ܠܝܼ ܒܦܸܬ̣ܓ̣ܵܡܹܗ ܕܡܵܪܝܵܐ: ܠܵܐ ܬܹܐܟ݂ܘܿܠ ܬܲܡܵܢ ܠܲܚܡܵܐ: ܘܠܵܐ ܬܸܫܬܹ̇ܐ ܡܲـ̈ـܝܵܐ: ܘܠܵܐ ܬܸܗܦܘܿܟ݂ ܒܐܘܼܪܚܵܐ ܕܐܸܬܲܝܬ̇ ܒܵܗ̇.

¹⁸ܘܐܸܡܲܪ ܠܹܗ. ܐܵܦ ܐܸܢܵܐ ܢܒ̣ܝܼܵܐ ܐ̄ܢܵܐ ܐܲܟ݂ܘܵܬ̣ܵܟ݂: ܘܡܲܠܲܐܟ݂ܵܐ ܐܸܡܲܪ ܠܝܼ ܒܦܸܬ̣ܓ̣ܵܡܹܗ ܕܡܵܪܝܵܐ: ܕܐܲܗܦܟܲܝܗܝ ܥܲܡܵܟ݂ ܠܒܲܝܬܵܐ: ܢܹܐܟ݂ܘܿܠ ܠܲܚܡܵܐ ܘܢܸܫܬܸ̇ܐ ܡܲـ̈ـܝܵܐ. ܘܟܲܕܸ̇ܒ̣ ܒܹܗ.

¹⁹ܘܲܗܦܲܟ݂ ܥܲܡܹܗ: ܘܐܸܟܲܠ ܠܲܚܡܵܐ ܒܒܲܝܬܹ̇ܗ: ܘܐܸܫܬ̇ܝܼ ܡܲـ̈ـܝܵܐ.

²⁰ܘܟܲܕ݂ ܗܸܢܘܿܢ ܝܵܬ̣ܒ̇ܝܼܢ ܥܲܠ ܦܵܬ̣ܘܿܪܵܐ: ܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܢܒ̣ܝܼܵܐ ܕܐܲܗܦܟܹܗ.

²¹ܘܲܩ̣ܪܵܐ ܠܲܢܒ̣ܝܹܗ ܕܐܲܠܵܗܵܐ ܕܐܸܬ̣ܵܐ ܡܢ ܝܼܗܘܼܕ݂ܵܐ: ܘܗܵܟܲܢܵܐ ܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܕܡܲܪܡܲܪܬ̇ ܡܠܲܬ̣ ܦܘܼܡܹܗ ܕܡܵܪܝܵܐ: ܘܠܵܐ ܢܛܲܪܬ̇ ܦܘܼܩܕܵܢܵܐ ܕܦܲܩܕܵܟ݂ ܡܵܪܝܵܐ ܐܲܠܵܗܵܟ݂.

²²ܘܲܗܦܲܟ݂ܬ̇ ܘܐܸܟܲܠܬ̇ ܠܲܚܡܵܐ: ܘܐܸܫܬ̇ܝܬ̇ ܡܲـ̈ـܝܵܐ: ܒܐܲܬ̣ܪܵܐ ܕܐܸܡܲܪ ܠܵܟ݂ ܠܵܐ ܬܹܐܟ݂ܘܿܠ ܠܲܚܡܵܐ: ܘܠܵܐ ܬܸܫܬܹ̇ܐ ܡܲـ̈ـܝܵܐ. ܡܸܛܠ ܗܵܢܵܐ ܠܵܐ ܬܸܥܘܿܠ ܫܠܲܕܵܟ݂ ܠܩܲܒ̣ܪܵܐ ܕܐܲܒ̣ܵܗܲܝ̈ܟ.

²³ܘܡ̣ܢ ܒܵܬܲܪ ܕܐܸܟܲܠܘ ܠܲܚܡܵܐ: ܘܡ̣ܢ ܒܵܬܲܪ ܕܐܸܫܬ̇ܝܼܘ ܡܲـ̈ـܝܵܐ: ܐܲܪܡܝܼܘ ܠܹܗ ܥܲܠ ܚܡܵܪܵܐ ܠܲܢܒ̣ܝܹܗ ܕܐܲܠܵܗܵܐ.

²⁴ܘܲܗܦܲܟ݂ ܘܐܸܙܲܠ ܘܐܸܫܟ̇ܚܹܗ ܐܲܪܝܵܐ ܒܐܘܼܪܚܵܐ ܘܩܲܛܠܹܗ ܘܲܗܘ̤ܵܬ̣ ܫܠܲܕܹ̇ܗ ܪܲܡܝܵܐ ܒܐܘܼܪܚܵܐ: ܘܲܚܡܵܪܵܐ ܩܵܐܹ̇ܡ ܥܲܠ ܓܲܒܵܗ̇: ܘܐܲܪܝܵܐ ܩܵܐܹ̇ܡ ܥܲܠ ܓܹܢ̄ܒ̣ ܫܠܲܕܵܐ.

²⁵ܘܗܵܐ ܐ̄ܢܵܫܵܐ ܥܵܒ̣ܪܝܼܢ ܘܲܚܙܵܘ ܫܠܲܕܵܐ ܟܲܕ݂ ܪܲܡܝܵܐ ܒܐܘܼܪܚܵܐ: ܘܲܚܡܵܪܵܐ ܩܵܐܹ̇ܡ ܥܲܠ ܓܲܒܵܗ̇: ܘܐܲܪܝܵܐ ܩܵܐܹ̇ܡ ܥܲܠ ܓܹܢ̄ܒ̣ ܫܠܲܕܵܐ. ܘܐܸܬ̣ܵܘ ܘܐܸܡܲܪܘ ܒܲܩܪܝܼܬ̣ܵܐ ܕܲܢܒ̣ܝܼܵܐ ܣܵܒ̣ܵܐ ܝܵܬܹܒ̣ ܒܵܗ̇.

²⁶ܘܲܫܡܲܥ ܢܒ̣ܝܵܐ ܕܐܲܗܦܟܹܗ ܡ̣ܢ ܐܘܼܪܚܵܐ: ܘܐܸܡܲܪ ܢܒ̣ܝܹܗ ܗ̄ܘ̣ ܕܐܲܠܵܗܵܐ. ܥܲܠ ܕܫܲܚܠܸܦ ܡܸܠܲܬ̣ ܦܘܼܡܹܗ ܕܡܵܪܝܵܐ: ܝܲܗ̄ܒܹ̇ܗ ܡܵܪܝܵܐ ܠܐܲܪܝܵܐ: ܘܬܲܒ̣ܪܹܗ ܘܩܲܛܠܹܗ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܐܸܡܲܪ ܠܹܗ.

²⁷ܘܐܸܡܲܪ ܠܲܒ̣ܢܵܘ̈ܗܝ: ܐܲܪܡܵܘ ܠܝܼ ܥܲܠ ܚܡܵܪܵܐ. ܘܐܲܪܡܝܼܘ ܠܹܗ.

²⁸ܘܐܸܙܲܠ ܘܐܸܫܟܲܚ ܫܠܲܕܵܐ ܟܲܕ݂ ܪܲܡܝܵܐ ܒܐܘܼܪܚܵܐ: ܘܲܚܡܵܪܵܐ ܘܐܲܪܝܵܐ ܩܵܝ̇ܡܝܼܢ ܥܲܠ ܓܹܢ̄ܒ̣ ܫܠܲܕܵܐ. ܠܵܐ ܐܸܟܲܠ ܐܲܪܝܵܐ ܠܫܲܠܕܵܐ: ܘܠܵܐ ܬܒܲܪ ܠܲܚܡܵܪܵܐ.

²⁹ܘܲܫܩܲܠ ܢܒ̣ܝܼܵܐ ܠܲܫܠܲܕܵܐ ܕܲܢܒ̣ܝܼܵܐ ܕܐܲܠܵܗܵܐ: ܘܣܵܡܵܗ̇ ܥܲܠ ܚܡܵܪܵܐ: ܘܐܲܝܬ̇ܝܵܗ̇ ܠܲܩܪܝܼܬ̣ܵܐ ܕܗ̤ܘ ܗܵܘ̇ ܢܒ̣ܝܼܵܐ ܣܵܒ̣ܵܐ ܝܵܬܹܒ̣ ܒܵܗ̇: ܠܡܲܪܩܵܕ݂ܘܼ ܥܠܵܘܗܝ ܘܲܠܡܸܩܒ̇ܪܹܗ.

³⁰ܘܣܵܡ̣ ܫܠܲܕܹ̇ܗ ܒܩܲܒ̣ܪܵܐ: ܘܐܲܪܩܸܕ݂ ܥܠܵܘܗܝ. ܘܐܸܡܲܪ: ܘܵܝ ܐܵܚܝ: ܘܵܝ ܐܵܚܝ.

³¹ܘܡ̣ܢ ܒܵܬܲܪ ܕܩܲܒ̣ܪܘܼܗܝ: ܐܸܡܲܪ ܠܲܒ̣ܢܵܘ̈ܗܝ: ܡܵܐ ܕܡܝܼܬܹ̇ܬ̣: ܩܘܼܒ̣ܪܘܼܢܝ ܒܩܲܒ̣ܪܵܐ: ܕܲܢܒ̣ܝܹܗ ܕܐܲܠܵܗܵܐ ܩܒ̣ܝܼܪ ܒܹܗ. ܘܥܲܠ ܓܹܢ̄ܒ̣ ܓܲܪ̈ܡܵܘܗܝ ܣܝܼܡܘ ܓܲܪ̈ܡܲܝ.

³²ܡܸܛܠ ܕܡܗܘܵܐ ܢܸܗܘܹܐ ܦܸܬ̣ܓ̣ܵܡܵܐ ܕܲܩ̣ܪܵܐ ܒܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܡܲܕ݂ܒ̇ܚܵܐ ܕܒܹܝܬ̣ ܐܹܝܠ: ܘܥܲܠ ܟܠܗܘܿܢ ܒܵـ̈ـܬܹܐ ܕܲܥ̈ܠܵܘܵܬ̣ܵܐ ܕܲܒ̣ܟܲܪ̈ܟܹܐ ܕܫܵܡܪܹܝܢ.

³³ܘܒ̣ܵܬܲܪ ܦܸܬ̣ܓ̣ܵܡܵܐ ܗܵܢܵܐ: ܠܵܐ ܗܦܲܟ݂ ܝܘܿܪܲܒ̣ܥܲܡ ܡ̣ܢ ܐܘܼܪܚܹܗ ܒܝܼܫܬܵܐ. ܘܲܗܦܲܟ݂ ܬܘܼܒ̣ ܘܲܥܒܲܕ݂ ܡ̣ܢ ܥܲܡܵܐ ܟܘܼܡܪܹ̈ܐ ܕܲܥ̈ܠܵܘܵܬ̣ܵܐ. ܡ̇ܢ ܕܲܨܒ̣ܵܐ ܕܢܸܗܘܹܐ ܟܘܼܡܪܵܐ: ܩܲܪܸܒ̣ ܩܘܼܪܒܵܢܵܐ: ܘܲܗܘ̤ܵܐ ܟܘܼܡܪܵܐ ܠܲܥܠܵܬ̣ܵܐ.

³⁴ܘܲܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ ܠܲܚܛܵܗܵܐ ܠܒܹܝܬ̣ ܝܘܿܪܲܒ̣ܥܲܡ: ܠܡܸܥܩܲܪ ܘܲܠܡܵܘܒܵܕ݂ܘܼ ܡ̣ܢ ܐܲܦܲܝ̈ ܐܲܪܥܵܐ.