Read Aramaic Peshita 1 Kings 18 Bible Online

1 Kings 18 - Aramaic Peshita bible

1 Kings 18

¹ܘܲܗܘ̤ܵܐ ܠܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ ܗܵܢܘܿܢ: ܘܦܸܬ̣ܓ̣ܵܡܹܗ ܕܡܵܪܝܵܐ ܗܘ̤ܵܐ ܥܲܠ ܐܹܠܝܼܵܐ: ܒܫܲܢ̄ܬܵܐ ܬܠܝܼܬ̣ܵܝܬܵܐ: ܠܡܹܐܡܲܪ: ܙܸܠ ܐܸܬ̣ܚܲܙܚ ܠܐܵܚܵܒ̣: ܘܐܸܬܸ̇ܠ ܡܸܛܪܵܐ ܥܲܠ ܐܲܦܲܝ̈ ܐܲܪܥܵܐ.

²ܘܐܸܙܲܠ ܐܹܠܝܼܵܐ ܠܡܸܬ̣ܚܙܵܝܘܼ ܠܐܵܚܵܒ̣. ܘܟܲܦܢܵܐ ܥܫܸܢ ܒܫܵܡܪܹܝܢ.

³ܘܲܩ̣ܪܵܐ ܐܵܚܵܒ̣ ܠܥܘܿܒܲܕ݂ܝܵܐ ܪܲܒ̇ ܒܲܝܬܹ̇ܗ. ܘܥܘܿܒܲܕ݂ܝܵܐ ܕܵܚܹ̇ܠ ܗ̄ܘ̣ܵܐ ܡ̣ܢ ܩܕ݂ܵܡ ܡܵܪܝܵܐ ܛܵܒ̣.

⁴ܘܟܲܕ݂ ܩܲܛܠܲܬ̤ ܐܝܼܙܒܸܠ ܠܲܢܒ̣ܝܼܵܘ̈ܗܝ ܕܐܲܠܵܗܵܐ: ܕܒܲܪ ܥܘܿܒܲܕ݂ܝܵܐ ܡܵܐܐ ܢܒ̣ܝܼܝܼ̈ܢ: ܘܛܵܫܝܼ ܐܸܢܘܿܢ ܚܲܡܫܝܼܢ ܚܲܡܫܝܼܢ ܓܲܒ̣ܪ̈ܝܼܢ ܒܲܡܥܲܪܬܵܐ: ܘܬܲܪܣܝܼ ܐܸܢܘܿܢ ܒܠܲܚܡܵܐ ܘܲܒ̣ܡܲـ̈ـܝܵܐ.

⁵ܘܐܸܡܲܪ ܐܵܚܵܒ̣ ܠܥܘܿܒܲܕ݂ܝܵܐ: ܙܸܠ ܗܲܠܸܟ݂ ܒܐܲܪܥܵܐ: ܥܲܠ ܟܠ ܡܲܒ̇ܘܼܥܲܝ ܡܲـ̈ـܝܵܐ: ܘܥܲܠ ܟܠܗܘܿܢ ܢܲܚ̈ܠܹܐ. ܛܵܟ݂ ܢܸܫܟܲܚ ܥܡܝܼܪܵܐ: ܘܢܲܚܸܐ ܪ̈ܲܟ݂ܫܵܐ ܘܟ݂ܘܼܕܲܢ̈ܘܵܬ̣ܵܐ: ܘܠܵܐ ܢܓܲܪܕܹ̇ܐ ܡ̣ܢ ܒܥܝܼܪܵܐ.

⁶ܘܲܦܠܲܓ̣ ܠܗܘܿܢ ܐܘܼܪܚܵܐ ܠܡܸܥܒܲܪ ܒܵܗ̇. ܐܵܚܵܒ̣ ܐܸܙܲܠ ܒܐܘܼܪܚܵܐ ܚܕ݂ܵܐ ܒܲܠܚܘܿܕ݂ܵܘܗܝ: ܘܥܘܿܒܲܕ݂ܝܵܐ ܐܸܙܲܠ̣ ܒܐܘܼܪܚܵܐ ܐ̄ܚܪܹܬ̣ܵܐ ܒܲܠܚܘܿܕ݂ܵܘܗܝ.

⁷ܘܲܗܘ̤ܵܐ ܥܘܿܒܲܕ݂ܝܵܐ ܒܐܘܼܪܚܵܐ ܘܗܵܐ ܐܹܠܝܼܵܐ ܐܲܪܥܹܗ: ܘܐܸܫܬܵܘܕ̇ܥܹܗ. ܘܲܢܦܲܠ̣ ܥܲܠ ܐܲܦܵܘ̈ܗܝ ܘܐܸܡܲܪ ܠܹܗ: ܐܲܢ̄ܬ̇ ܗ̄ܘ̣ ܡܵܪܝ ܐܹܠܝܼܵܐ.

⁸ܐܵܡܲܪ ܠܹܗ ܐܸܢܵܐ ܗ̄ܘ̣. ܘܐܸܡܲܪ ܠܹܗ: ܙܸܠ ܐܸܡܲܪ ܠܡܵܪܵܟ݂ ܕܗܵܐ ܐܹܠܝܼܵܐ.

⁹ܘܐܸܡܲܪ ܥܘܿܒܲܕ݂ܝܵܐ: ܡܵܢܵܐ ܚܛܹ̇ܝܬ̣: ܕܡܲܫܠܸܡ ܐܲܢ̄ܬ̇ ܠܹܗ ܠܥܲܒ̣ܕܵܟ݂ ܒܐܝܼܕܹܗ ܕܐܵܚܵܒ̣ ܠܡܸܩܛܠܲܢܝ.

¹⁰ܚܲܝ ܗ̄ܘ̣ ܡܵܪܝܵܐ ܐܲܠܵܗܵܟ݂: ܐܸܢ ܐܝܼܬ̣ ܥܲܡܵܐ ܐܵܘ ܡܲܠܟ̇ܘܼܬ̣ܵܐ: ܕܠܵܐ ܫܲܕܲܪ ܡܵܪܝ ܠܡܸܒ̣ܥܝܵܟ݂ ܬܲܡܵܢ. ܘܐܵܡ̇ܪܝܼܢ ܠܲܝܬ̇. ܘܐܵܘܡܝܼ ܠܡܲܠ̈ܟ̇ܘܵܬ̣ܵܐ ܘܲܠܥܲܡܡܹ̈ܐ ܕܐܸܢ ܠܵܐ ܐܸܫܟ̇ܚܘܼܟ݂.

¹¹ܘܗܵܫܵܐ ܐܵܡܲܪ ܐܲܢ̄ܬ̇ ܠܝܼ: ܙܸܠ ܐܸܡܲܪ ܠܡܵܪܵܟ݂ ܕܗܵܐ ܐܹܠܝܼܵܐ.

¹²ܘܥܲܕ݂ ܐܸܢܵܐ ܐܸܙܲܠ ܡ̣ܢ ܠܘܵܬ̣ܵܟ݂: ܪܘܼܚܹܗ ܕܡܵܪܝܵܐ ܬܸܫܩ̄ܠܵܟ݂: ܘܬܲܘܒ̇ܠܵܟ݂ ܠܐܲܝܟܵܐ ܕܠܵܐ ܐܸܕܲܥ. ܘܐܸܙܲܠ ܠܲܡܚܵܘܝܵܘ ܠܐܵܚܵܒ̣: ܘܠܵܐ ܢܸܫܟ̇ܚܵܟ݂ ܘܢܸܩܛܠܲܢܝ. ܘܥܲܒ̣ܕܵܟ݂ ܕܵܚܹ̇ܠ ܡ̣ܢ ܡܵܪܝܵܐ ܡ̣ܢ ܛܲܠܝܘܼܬܹܗ.

¹³ܘܠܵܐ ܚܵܘܝܼܬ̣ ܠܡܵܪܝ ܡܸܕܸ̇ܡ ܕܥܸܒ̣ܕܹ̇ܬ̣. ܟܲܕ݂ ܩܲܛܠܲܬ̤ ܐܝܼܙܒܸܠ ܠܲܢܒ̣ܝܵܘ̈ܗܝ ܕܐܲܠܵܗܵܐ: ܕܸܒ̣ܪܹܬ̣ ܡ̣ܢ ܢܒ̣ܝܼܵܘ̈ܗܝ ܕܡܵܪܝܵܐ ܡܵܐܐ ܓܲܒ̣ܪ̈ܝܼܢ: ܘܛܲܫܝܼܬ̣ ܐܸܢܘܿܢ ܚܲܡܫܝܼܢ ܓܲܒ̣ܪ̈ܝܼܢ ܒܲܡܥܲܪܬܵܐ: ܘܬܲܪܣܝܼܬ̇ ܐܸܢܘܿܢ ܒܠܲܚܡܵܐ ܘܲܒ̣ܡܲـ̈ـܝܵܐ.

¹⁴ܘܗܵܫܵܐ ܐܵܡܲܪ ܐܲܢ̄ܬ̇ ܠܝܼ: ܙܸܠ ܐܸܡܲܪ ܠܡܵܪܵܟ݂: ܕܗܵܐ ܐܹܠܝܼܵܐ: ܘܢܸܩܛܠܲܢܝ.

¹⁵ܘܐܸܡܲܪ ܐܹܠܝܼܵܐ: ܚܲܝ ܗ̄ܘ̣ ܡܵܪܝܵܐ ܚܲܝܠܬ̣ܵܢܵܐ ܕܩܵܡܹ̇ܬ̣ ܩܕ݂ܵܡܵܘܗܝ: ܐܸܠܵܐ ܝܵܘܡܵܢܵܐ ܐܸܬ̣ܚܙܸܐ ܠܹܗ.

¹⁶ܘܐܸܙܲܠ ܥܘܿܒܲܕ݂ܝܵܐ ܠܐܘܼܪܥܹܗ ܕܐܵܚܵܒ̣: ܘܚܵܘܼܝܹܗ ܠܐܵܚܵܒ̣. ܘܐܸܬ̣ܵܐ ܐܵܚܵܒ̣ ܠܐܘܼܪܥܹܗ ܕܐܹܠܝܼܵܐ.

¹⁷ܘܟܲܕ݂ ܚܙܵܝܗܝ ܐܵܚܵܒ̣ ܠܐܹܠܝܼܵܐ: ܐܸܡܲܪ ܠܹܗ: ܐܲܢ̄ܬ̇ ܗ̄ܘ̣ ܗܵܢܵܐ ܕܵܠܘܿܚܹܗ ܕܝܼܣܪܵܝܹܠ.

¹⁸ܐܵܡܲܪ ܠܹܗ ܐܹܠܝܼܵܐ: ܠܵܐ ܕܲܠܚܹ̇ܬ̣ ܐܸܢܵܐ ܠܝܼܣܪܵܝܹܠ. ܐܸܠܵܐ ܐܲܢ̄ܬ̇ ܘܒܹܝܬ̣ ܐܲܒ̣ܘܼܟ݂: ܕܲܫܒܲܩܬ̇ܘܿܢ ܦܘܼܩܕܵܢܵܘ̈ܗܝ ܕܡܵܪܝܵܐ: ܘܐܸܙܲܠܬ̇ܘܿܢ ܒܵܬܲܪ ܒܲܥܠܵܐ.

¹⁹ܘܗܵܫܵܐ ܫܲܕܲܪ ܟܲܢܸܫ ܠܝܼ ܠܟ݂ܠܹܗ ܝܼܣܪܵܝܹܠ ܠܛܘܼܪܵܐ ܕܟܲܪܡ̄ܠܵܐ: ܘܠܲܢܒ̣̈ܝܲܝ ܒܲܥܠܵܐ: ܐܲܪܒܲܥܡܵܐܐ ܘܚܲܡܫܝܼܢ ܘܠܲܢܒ̣̈ܝܲܝ ܕܸܚ̈ܠܵܬ̣ܵܐ ܐܲܪܒܲܥܡܵܐܐ ܘܚܲܡܫܝܼܢ: ܕܐܵܟ݂ܠܝܼܢ ܦܵܬ̣ܘܿܪܵܗ̇ ܕܐܝܼܙܒܸܠ.

²⁰ܘܫܲܕܲܪ ܐܵܚܵܒ̣ ܥܲܠ ܟܠܗܘܿܢ ܒܢܲܝ̈ ܝܼܣܪܵܝܹܠ: ܘܟܢܸܫ ܐܸܢܘܿܢ ܠܓܲܒ̣ܪܹ̈ܐ ܠܛܘܼܪܵܐ ܕܟܲܪܡ̄ܠܹܐ.

²¹ܘܲܩܪܸܒ̣ ܐܹܠܝܼܵܐ ܠܘܵܬ̣ ܟܠܹܗ ܥܲܡܵܐ: ܘܐܸܡܲܪ: ܥܕܲܡܵܐ ܠܐܸܡܲܬ̣ܝ ܦܠܝܼܓ̣ܝܼܢ ܐ̄ܢܬ̇ܘܿܢ ܠܬܲܪܬܹ̇ܝܢ ܦܵܠ̈ܓܘܵܢ. ܐܸܢ ܡܵܪܝܵܐ ܗ̄ܘ̣ ܐܲܠܵܗܵܐ: ܙܸܠܘ ܒܵܬ̣ܪܹܗ. ܘܐܸܢ ܒܲܥܠܵܐ ܗ̄ܘ̣: ܙܸܠܘ ܒܵܬ̣ܪܹܗ. ܘܠܵܐ ܝܲܗ̄ܒ̣ܘ ܠܹܗ ܥܲܡܵܐ ܦܸܬ̣ܓ̣ܵܡܵܐ.

²²ܘܐܸܡܲܪ ܐܹܠܝܼܵܐ: ܐܸܢܵܐ ܗ̄ܘ̣ ܒܲܠܚܘܿܕ݂ܝ ܐܸܫܬܲܚܪܹܬ̣ ܢܒ̣ܝܼܵܐ ܠܡܵܪܝܵܐ: ܘܲܢܒ̣ܝܲܝ̈ ܒܲܥܠܵܐ ܐܲܪܒܲܥܡܵܐܐ ܘܚܲܡܫܝܼܢ ܓܲܒ̣ܪ̈ܝܼܢ.

²³ܢܸܬ̇ܠܘܼܢ ܠܲܢ ܬܪܹܝܢ ܬܵܘܪ̈ܝܼܢ. ܘܢܸܓ̣ܒ̇ܘܿܢ ܠܗܘܿܢ ܚܲܕ݂ ܬܵܘܪܵܐ. ܘܲܢܦܲܫܚܘܼܢ ܘܲܢܣܝܼܡܘܼܢ ܥܲܠ ܩܲܝ̈ܣܹܐ. ܘܢܘܼܪܵܐ ܠܵܐ ܢܣܝܼܡܘܼܢ. ܘܐܸܢܵܐ ܐܸܥܒܸ̇ܕ݂ ܚܲܕ݂ ܬܵܘܪܵܐ: ܘܐܹܦܲܫܲܚ ܘܐܹܣܝܼܡ ܥܲܠ ܩܲܝ̈ܣܹܐ: ܘܢܘܼܪܵܐ ܠܵܐ ܐܹܣܝܼܡ.

²⁴ܘܲܩܪܵܘ ܒܫܸܡ ܐܲܠܵܗܲܝ̈ܟ̇ܘܿܢ. ܘܐܸܢܵܐ ܐܸܩܪܸܐ ܒܲܫܡܹܗ ܕܡܵܪܝܵܐ ܐܲܠܵܗܝ. ܘܐܲܝܢܵܐ ܐܲܠܵܗܵܐ ܕܥܵܢܹ̈ܐ ܒܢܘܼܪܵܐ: ܗܵܘ̇ ܗ̄ܘ̣ ܐܲܠܵܗܵܐ. ܘܲܥܢ̣ܵܘ ܟܠܹܗ ܥܲܡܵܐ: ܘܐܸܡܲܪܘ: ܫܲܦܝܼܪ ܐܸܡܲܪܬ̇.

²⁵ܘܐܸܡܲܪ ܐܹܠܝܼܵܐ ܠܲܢܒ̣ܝܲܝ̈ ܒܲܥܠܵܐ: ܓܒ̣ܵܘ ܠܟ݂ܘܿܢ ܚܲܕ݂ ܬܵܘܪܵܐ: ܘܲܥܒܸܕ݂ܘ ܩܲܕ݂ܡܵܝܑܬ̣: ܡܸܛܠ ܕܐܲܢ̄ܬ̇ܘܿܢ ܣܲܓ̇ܝܼܐܝܼܢ.

²⁶ܘܢܲܣܒ̇ܘܼܗܝ ܠܬ̣ܵܘܪܵܐ ܕܐܸܬ̣̱ܝܼܗܸܒ̣ ܠܗܘܿܢ ܘܥܲܒ̣ܕ̇ܘܼܗܝ. ܘܲܗܘ̤ܵܘ ܩܵܪܹܝܢ ܒܲܫܡܹܗ ܕܒܲܥܠܵܐ: ܡ̣ܢ ܨܲܦܪܵܐ ܘܲܥܕܲܡܵܐ ܠܛܲܗܪܵܐ: ܒܲܥܠܵܐ ܥܢܝܼܢ. ܘܠܲܝܬ̇ ܩܵܠ ܘܐܵܦܠܵܐ ܕܥܵܢܹ̇ܐ. ܘܐܸܬ̣ܟܲܬܲܫܘ ܥܲܠ ܡܲܕ݂ܒ̇ܚܵܐ ܕܲܥܒܲܕ݂ܘ.

²⁷ܘܟܲܕ݂ ܗܘ̤ܵܐ ܛܲܗܪܵܐ: ܡܓܚܸܟ݂ ܗ̄ܘ̣ܵܐ ܒܗܘܿܢ ܐܹܠܝܼܵܐ ܘܐܵܡܲܪ: ܩܪܵܘ ܒܩܵܠܵܐ ܪܵܡܵܐ: ܡܸܛܠ ܕܐܲܠܵܗܵܐ ܗ̄ܘ̣: ܕܲܠܡܵܐ ܪܸܢܝܵܐ ܐܝܼܬ̣ ܠܹܗ: ܐܵܘ ܕܲܠܡܵܐ ܨܒ̣ܘܼ ܣܵܥܲܪ: ܐܵܘ ܕܲܠܡܵܐ ܐܘܼܪܚܵܐ ܐܝܼܬ̣ ܠܹܗ: ܐܵܘ ܕܲܠܡܵܐ ܕܡܸܟ݂ ܗ̄ܘ̣ ܘܢܸܬ̇ܬ̇ܥܝܼܪ.

²⁸ܘܲܩܪܵܘ ܒܩܵܠܵܐ ܪܵܡܵܐ. ܘܐܸܬ̣ܟܲܬܲܫܘ ܐܲܝܟ݂ ܢܵܡܘܿܣܗܘܿܢ: ܒܚܲܪܒܵܐ ܘܲܒ̣ܪ̈ܘܼܡܚܹܐ: ܥܕܲܡܵܐ ܕܐܸܬ̣ܐ̱ܫܸܕ݂ ܕܸܡܗܘܿܢ ܥܠܲܝܗܘܿܢ.

²⁹ܘܟܲܕ݂ ܥܒܲܪ ܛܲܗܪܵܐ: ܗܘ̤ܵܘ ܡܸܬ̣ܢܲܒܹ̇ܝܢ ܥܕܲܡܵܐ ܠܙܲܒ̣ܢܵܐ ܕܣܵܠܹܩ ܩܘܼܪܒܵܢܵܐ. ܘܠܲܝܬ̇ ܩܵܠ: ܐܵܦܠܵܐ ܕܥܵܢܹ̇ܐ: ܐܵܦܠܵܐ ܕܨܵܐܹ̇ܬ̣. ܘܐܸܡܲܪ ܐܹܠܝܼܵܐ ܠܲܢܒ̣ܝܲܝ̈ ܕܸܚ̈ܠܵܬ̣ܵܐ: ܫܲܢܵܘ ܡ̣ܢ ܗܵܫܵܐ. ܘܐܵܦ ܐܹܢܵܐ ܐܸܥܒܸ̇ܕ݂ ܝܲܩܕܲܝ̈ ܫܲܠܡܹ̈ܐ. ܘܫܲܢܝܼܘ ܘܐܸܙܲܠ̣ܘ.

³⁰ܘܐܸܡܲܪ ܐܹܠܝܼܵܐ ܠܟ݂ܠܹܗ ܥܲܡܵܐ: ܩܪܘܿܒ̣ܘ ܠܘܵܬ̣ ܘܲܩܪܸܒ̣ܘ ܟܠܹܗ ܥܲܡܵܐ ܠܘܵܬܹܗ. ܘܬܲܪܣܝܼ ܡܲܕ݂ܒ̇ܚܹܗ ܕܡܵܪܝܵܐ: ܕܲܡܣܲܚܲܦ ܗ̄ܘ̣ܵܐ.

³¹ܘܲܢܣܲܒ̣ ܐܹܠܝܼܵܐ ܬܲܪܬܲܥܸܣܪܹ̈ܐ ܟܹܐܦ̈ܝܼܢ: ܐܲܝܟ݂ ܡܸܢܝܵܢܵܐ ܕܫܲܒ̣ܛܹ̈ܐ ܕܲܒ̣ܢܲܝ̈ ܝܲܥܩܘܿܒ̣: ܗܵܘ̇ ܕܲܗܘ̤ܵܐ ܥܠܵܘܗܝ ܦܸܬ̣ܓ̣ܵܡܹܗ ܕܡܵܪܝܵܐ ܘܐܸܡܲܪ ܠܹܗ: ܝܼܣܪܵܝܹܠ ܢܸܗܘܹܐ ܫܡܵܟ݂.

³²ܘܲܒ̣ܢܵܐ ܐܸܢܹܝܢ ܠܟܹܐܦܹ̈ܐ: ܡܲܕ݂ܒ̇ܚܵܐ ܒܲܫܡܹܗ ܕܡܵܪܝܵܐ. ܘܲܥܒܲܕ݂ ܚܹܐܪܝܼܬ̣ܵܐ ܐܲܝܟ݂ ܒܹܝܬ̣ ܣܲܐܬ̣̈ܝܼܢ ܕܙܲܪܥܵܐ: ܘܐܲܟ݂ܪ̱ܟܹܗ ܠܡܲܕ݂ܒ̇ܚܵܐ.

³³ܘܲܟ݂ܫܵܐ ܩܲܝܣܹ̈ܐ: ܘܦܲܫܚܹܗ ܠܬ̣ܵܘܪܵܐ: ܘܣܵܡܹܗ ܠܥܸܠ ܡ̣ܢ ܩܲܝܣܹ̈ܐ.

³⁴ܘܐܸܡܲܪ: ܡܠܵܘ ܐܲܪܒܲܥ ܩܘܼ̈ܠܝܼܢ ܡܲـ̈ـܝܵܐ: ܘܣܘܿܟ݂ܘ ܥܲܠ ܥܠܵܬ̣ܵܐ ܘܥܲܠ ܩܝܣܹ̈ܐ. ܘܐܸܡܲܪ ܬܢܵܘ: ܘܲܬ̣ܢܵܘ ܘܐܸܡܲܪ ܬܲܠܸܬ̣ܘ: ܘܬܲܠܸܬ̣ܘ.

³⁵ܘܗܲܠܸܟ݂ܘ ܡܲـ̈ـܝܵܐ ܚܕ݂ܵܪ̈ܵܘܗܝ ܕܡܲܕ݂ܒ̇ܚܵܐ: ܘܐܵܦ ܠܵܗ̇ ܠܚܹܐܪܝܼܬ̣ܵܐ ܡ̣ܠܵܐܘܼܗ̇ ܡܲـ̈ـܝܵܐ.

³⁶ܘܟܲܕ݂ ܣܠܸܩ ܩܘܼܪܒܵܢܵܐ: ܩܪܲܒ̣ ܐܹܠܝܼܵܐ ܢܒ̣ܝܼܵܐ ܘܐܸܡܲܪ: ܡܵܪܝܵܐ ܐܲܠܵܗܹܗ ܕܐܲܒ̣ܪܵܗܵܡ ܘܕ݂ܐܝܼܣܚܵܩ ܘܕ݂ܝܼܣܪܵܝܹܠ: ܝܵܘܡܵܢܵܐ ܢܸܬ̣̱ܝܼܕܲܥ ܕܐܲܢ̄ܬ̇ ܗ̄ܘ̣ ܐܲܠܵܗܵܐ ܒܝܼܣܪܵܝܹܠ: ܘܐܸܢܵܐ ܥܲܒ̣ܕܵܟ݂: ܘܲܒ̣ܦܸܬ̣ܓ̣ܵܡܵܟ݂ ܥܸܒ̣ܕܹ̇ܬ̣ ܟܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ.

³⁷ܥܢܲܝܢܝ ܡܵܪܝܵܐ: ܥܢܝܼܢܝ: ܘܢܸܕ̇ܥܘܼܢ ܟܠܹܗ ܥܲܡܵܐ ܗܵܢܵܐ: ܕܐܲܢ̄ܬ̇ ܗ̄ܘ̣ ܡܵܪܝܵܐ ܐܲܠܵܗܵܐ: ܘܐܲܢ̄ܬ̇ ܐܲܦܢܝܼܬ̇ ܠܸܒ̇ܗܘܿܢ ܗܦܝܼܟ݂ܵܐ.

³⁸ܘܢܸܦܠܲܬ̤ ܢܘܼܪܹܗ ܕܡܵܪܝܵܐ: ܘܐܸܟ݂ܠܲܬ̤ ܥܠܵܬ̣ܵܐ: ܘܩܲܝܣܹ̈ܐ: ܘܟܹܐܦܹ̈ܐ: ܘܥܲܦܪܵܐ ܘܡܲـ̈ـܝܵܐ ܕܲܒ̣ܚܹܐܪܝܼܬ̣ܵܐ ܠܸܚܟܲܬ̤.

³⁹ܘܲܚܙܵܘ ܟܠܹܗ ܥܲܡܵܐ: ܘܲܢܦܲܠ̣ܘ ܥܲܠ ܐܲܦܲܝ̈ܗܘܿܢ ܘܐܸܡܲܪܘ: ܡܵܪܝܵܐ ܗ̄ܘ̣ ܐܲܠܵܗܵܐ: ܡܵܪܝܵܐ ܗ̄ܘ̣ ܐܲܠܵܗܵܐ.

⁴⁰ܘܐܸܡܲܪ ܠܗܘܿܢ ܐܹܠܝܼܵܐ ܐܲܚܘܿܕ݂ܘ ܐܸܢܘܿܢ ܠܲܢܒ̣ܝܲܝ̈ ܒܲܥܠܵܐ: ܘܐ̄ܢܵܫ ܠܵܐ ܢܸܬ̣ܦܲܠܲܛ ܡܸܢܗܘܿܢ. ܘܐܸܚܲܕ݂ܘ ܐܸܢܘܿܢ. ܘܐܲܚܸܬ̣ ܐܸܢܘܿܢ ܐܹܠܝܼܵܐ ܠܢܲܚܠܵܐ ܕܩܝܼܫܘܿܢ: ܘܲܢܟܲܣ ܐܸܢܘܿܢ ܬܲܡܵܢ.

⁴¹ܘܐܸܡܲܪ ܐܹܠܝܼܵܐ ܠܐܵܚܵܒ̣: ܣܲܩ ܠܥܲܣ ܘܐܸܫܬܲܝ: ܡܸܛܠ ܕܩܵܠܵܐ ܕܲܪܓ̣ܘܼܫܝܵܐ ܕܡܸܛܪܵܐ.

⁴²ܘܲܣܠܸܩ ܐܵܚܵܒ̣ ܠܡܸܠܥܲܣ ܘܲܠܡܸܫܬܵܐ. ܘܐܹܠܝܼܵܐ ܣܠܸܩ ܠܪܹܫ ܟܲܪܡܠܵܐ: ܘܐܸܬ̣ܓ̇ܗܸܢ ܥܲܠ ܐܲܪܥܵܐ: ܘܣܵܡ̣ ܐܲܦܵܘ̈ܗܝ ܒܹܝܬ̣ ܒܘܼܪ̈ܟܵܘܗܝ.

⁴³ܘܐܸܡܲܪ ܠܬܲܠܡܝܼܕܹܗ: ܣܲܩ ܚܘܼܪ ܠܐܘܼܪܚܵܐ ܕܝܲܡܵܐ. ܘܲܣܠܸܩ: ܘܚܵܪ. ܘܐܸܡܲܪ ܠܲܝܬ̇ ܡܸܕܸ̇ܡ. ܘܐܸܡܲܪ ܠܹܗ ܗܦܘܿܟ݂ ܫܒܲܥ ܙܲܒ̣ܢ̈ܝܼܢ.

⁴⁴ܘܒܲܙܒܲܢ̄ܬܵܐ ܫܒ̣ܝܼܥܵܝܬܵܐ ܐܸܡܲܪ ܚܙܹ̇ܝܬ̣: ܘܗܵܐ ܥܢܵܢܵܐ ܙܥܘܿܪܬܵܐ ܐܲܝܟ݂ ܦܲܣܬ̣ܵܐ ܕܐܝܼܕ݂ܵܐ ܣܵܠܩܵܐ ܡ̣ܢ ܝܲܡܵܐ. ܘܐܸܡܲܪ ܠܹܗ: ܣܲܩ ܐܸܡܲܪ ܠܐܵܚܵܒ̣. ܪܟܲܒ̣ ܘܚܘܿܬ̣: ܥܲܕ݂ܠܵܐ ܢܸܟ݂ܠܸܝܟ݂ ܡܸܛܪܵܐ.

⁴⁵ܘܥܲܕ݂ ܗ̤ܘ ܡܸܬ̣ܦܢܸܐ ܠܟ݂ܵܐ ܘܲܠܟ݂ܵܐ: ܫܡܲܝܵܐ ܐܸܬ̣ܟ̇ܒܸܢܘ ܥܢܵܢܹ̈ܐ ܘܪܘܼܚܵܐ. ܘܲܗܘ̤ܵܐ ܡܸܛܪܵܐ ܪܲܒܵܐ. ܘܲܪܟܸܒ̣ ܐܵܚܵܒ̣ ܘܐܸܙܲܠ̣ ܠܐܝܼܙܲܪܥܹܝܠ.

⁴⁶ܘܐܝܼܕܹܗ ܕܡܵܪܝܵܐ ܗܘ̤ܵܬ̣ ܥܲܠ ܐܹܠܝܼܵܐ. ܘܐܸܣܲܪ ܚܲܨܵܘ̈ܗܝ: ܘܲܪܗܸܛ̣ ܩܕ݂ܵܡ ܐܵܚܵܒ̣: ܥܕܲܡܵܐ ܕܥܲܠ̣ ܠܐܝܼܙܲܪܥܹܝܠ.