Read Aramaic Peshita 1 Kings 19 Bible Online

1 Kings 19 - Aramaic Peshita bible

1 Kings 19

¹ܘܚܵܘܝܼ ܐܵܚܵܒ̣ ܠܐܝܼܙܒܸܠ ܟܠ ܡܸܕܸ̇ܡ ܕܲܥܒܲܕ݂ ܐܹܠܝܼܵܐ: ܘܲܕ݂ܩܲܛܸܠ ܐܸܢܘܿܢ ܠܟ݂ܠܗܘܿܢ ܢܒ̣̈ܝܲܝ ܒܲܥܠܵܐ ܘܲܕ݂ܚܘܼܓ̣̈ܒܹ̇ܐ ܒܚܲܪܒܵܐ.

²ܘܫܸܠܚܲܬ̤ ܐܝܼܙܒܸܠ ܒܝܲܕ݂ ܡܲܠܲܐܟ݂ܵܐ ܠܐܹܠܝܼܵܐ ܘܐܸܡܪܲܬ̤: ܗܵܟܲܢܵܐ ܢܸܥܒ̇ܕ݂ܘܼܢ ܠܝܼ ܐܲܠܵܗܹ̈ܐ: ܘܗܵܟܲܢܵܐ ܢܵܘܣܦܘܼܢ ܠܝܼ: ܐܸܢ ܠܵܐ ܡܚܵܪ ܒܗܵܢܵܐ ܙܲܒ̣ܢܵܐ ܐܸܥܒ̇ܕ݂ܝܼܗ̇ ܠܢܲܦ̮ܫܵܟ݂ ܐܲܝܟ݂ ܢܲܦ̮ܫܵܐ ܕܚܲܕ݂ ܡܸܢܗܘܿܢ.

³ܘܲܕ݂ܚܸܠ̣ ܐܹܠܝܼܵܐ: ܘܩܵܡ̣ ܐܸܙܲܠ̣ ܕܲܢܦܲܠܸܛ ܢܲܦ̮ܫܹܗ. ܘܐܸܬ̣ܵܐ ܠܒܹܪ ܫܒܲܥ ܕܲܝܗܘܼܕ݂ܵܐ: ܘܲܫܒܲܩ ܬܲܡܵܢ ܬܲܠܡܝܼܕܹܗ.

⁴ܘܗ̤ܘ ܗܲܠܸܟ݂ ܒܡܲܕ݂ܒ̇ܪܵܐ ܡܲܪܕܹ̇ܐ ܝܵܘܡܵܐ ܚܲܕ݂. ܘܝܼܬܸܒ̣ ܬܚܹܝܬ̣ ܒܸܛܡ̱ܬ̣ܵܐ ܚܕ݂ܵܐ: ܘܲܫܐܸܠ̣ ܡܵܘܬܵܐ ܠܢܲܦ̮ܫܹܗ: ܘܐܸܡܲܪ: ܣܲܓ̇ܝܼ ܠܝܼ ܗܵܫܵܐ ܡܵܪܝܵܐ. ܣܲܒ̣ ܢܲܦ̮ܫܝ ܡܹܢܝ: ܡܸܛܠ ܕܠܵܐ ܗܘܹ̇ܝܬ̣ ܛܵܒ̣ ܐܸܢܵܐ ܡ̣ܢ ܐܲܒ̣ܵܗܲܝ̈.

⁵ܘܲܫܟܸܒ̣ ܘܲܛܒܲܥ ܬܚܹܝܬ̣ ܒܸܛܡ̱ܬ̣ܵܐ. ܘܗܵܐ ܡܲܠܲܐܟ݂ܵܐ ܩܪܸܒ̣ ܠܹܗ: ܘܐܸܡܲܪ ܠܹܗ: ܩܘܼܡ ܐܲܟ݂ܘܿܠ.

⁶ܘܐܸܬ̣ܦܢܝܼ ܘܲܚܙܵܐ ܐܸܣܕ݂ܵܘ̈ܗܝ: ܚܵܝܘܿܪܬܵܐ ܕܪܲܥܦܵܐ: ܘܩܘܼܩܬ̣ܵܐ ܕܡܲـ̈ـܝܵܐ. ܘܲܠܥܸܣ ܘܐܸܫܬ̇ܝܼ: ܘܲܗܦܲܟ݂ ܕܡܸܟ݂.

⁷ܘܲܗܦܲܟ݂ ܡܲܠܲܐܟܹܗ ܕܡܵܪܝܵܐ ܕܬܲܪܬܹ̇ܝܢ ܙܲܒ̣̈ܢܝܼܢ ܩܪܸܒ̣ ܠܹܗ: ܘܐܸܡܲܪ: ܩܘܼܡ ܐܲܟ݂ܘܿܠ ܘܐܸܫܬ̇ܝܼ: ܡܸܛܠ ܕܣܲܓ̇ܝܼܵܐܐ. ܗ̄ܝ̣ ܡܸܢܵܟ݂ ܐܘܼܪܚܵܐ.

⁸ܘܩܵܡ̣ ܐܸܟܲܠ ܘܐܸܫܬ̇ܝܼ: ܘܗܲܠܸܟ݂ ܒܚܲܝܠܵܐ ܕܡܹܐܟ݂ܘܼܠܬܵܐ ܗܵܝ̇: ܐܲܪܒ̇ܥܝܼܢ ܐܝܼܡܵܡ̈ܝܼܢ: ܘܐܲܪܒ̇ܥܝܼܢ ܠܲܝ̈ܠܵܘܵܢ: ܥܕܲܡܵܐ ܠܛܘܼܪܹܗ ܕܐܲܠܵܗܵܐ ܠܚܘܿܪܝܼܒ̣.

⁹ܘܥܲܠ ܠܬܲܡܵܢ ܠܡܥܲܪܬ̣ܵܐ: ܘܒ̣ܵܬ̣ ܬܲܡܵܢ. ܘܲܗܘ̤ܵܐ ܥܠܵܘܗܝ ܦܸܬ̣ܓ̣ܵܡܹܗ ܕܡܵܪܝܵܐ. ܘܐܸܡܲܪ ܠܹܗ: ܡܵܢܵܐ ܥܵܒܹ̇ܕ݂ ܐܲܢ̄ܬ̇ ܗܵܪܟܵܐ ܐܹܠܝܼܵܐ.

¹⁰ܘܐܸܡܲܪ: ܡܸܛܲܢ ܛܹܢܹ̇ܬ̣ ܠܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܕܲܫܒܲܩܘ ܩܝܵܡܵܟ݂ ܒ̈ܢܲܝ ܝܼܣܪܵܝܹܠ ܡܲܕ݂ܒ̇ܚܲܝ̈ܟ ܣܲܚܸܦܘ: ܘܲܢܒ̣ܝܼܲܝ̈ܟ ܩܲܛܸܠܘ ܒܚܲܪܒܵܐ. ܘܐܸܫܬܲܚܪܹܬ̣ ܐܸܢܵܐ ܒܲܠܚܘܿܕܲܝ: ܘܗܵܐ ܒܵܥܹ̇ܝܢ ܠܡܸܣܲܒ̣ ܠܢܲܦ̮ܫܝ.

¹¹ܘܐܸܡܲܪ ܠܹܗ: ܦܘܿܩ ܘܩܘܼܡ ܒܛܘܼܪܵܐ ܩܕ݂ܵܡ ܡܵܪܝܵܐ. ܘܗܵܐ ܡܵܪܝܵܐ ܥܵܒܲܪ. ܘܪܘܼܚܵܐ ܪܲܒܬ̣ܵܐ ܘܬܲܩܝܼܦܬܵܐ: ܡܦܲܪܩܵܐ ܛܘܼܪܹ̈ܐ ܘܲܡܬܲܒ̇ܪܵܐ ܫܘܿܥܹ̈ܐ ܩܕ݂ܵܡ ܡܵܪܝܵܐ. ܠܵܐ ܗ̄ܘ̣ܵܐ ܒܪܘܼܚܵܐ ܡܵܪܝܵܐ. ܘܒ̣ܵܬܲܪ ܪܘܼܚܵܐ ܙܵܘܥܵܐ: ܠܵܐ ܗ̄ܘ̣ܵܐ ܒܙܵܘܥܵܐ ܡܵܪܝܵܐ.

¹²ܘܒ̣ܵܬܲܪ ܙܵܘܥܵܐ ܢܘܼܪܵܐ: ܠܵܐ ܗ̄ܘ̣ܵܐ ܒܢܘܼܪܵܐ ܡܵܪܝܵܐ. ܘܒ̣ܵܬܲܪ ܢܘܼܪܵܐ ܩܵܠܵܐ ܕܡܲܡܠܠܵܐ ܪܲܟ̇ܝܟ݂ܵܐ.

¹³ܘܟܲܕ݂ ܫ̣ܡܲܥ ܐܹܠܝܼܵܐ: ܟܪܲܟ݂ ܐܲܦܵܘ̈ܗܝ ܒܡܲܥܦܪܹܗ. ܘܲܢܦܲܩ ܘܩܵܡ ܠܹܗ ܒܦܘܼܡܵܗ̇ ܕܲܡܥܲܪܬ̣ܵܐ. ܘܲܗܘ̤ܵܐ ܥܠܵܘܗܝ ܩܵܠܵܐ: ܘܐܸܡܲܪ ܠܹܗ: ܡܵܢܵܐ ܥܵܒܹ̇ܕ݂ ܐܲܢ̄ܬ̇ ܗܵܪܟܵܐ ܐܹܠܝܼܵܐ.

¹⁴ܘܐܸܡܲܪ: ܡܸܛܲܢ ܛܸܢܹ̇ܬ̣ ܠܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܕܲܫܒܲܩܘ ܩܝܵܡܵܟ݂ ܒ̈ܢܲܝ ܝܼܣܪܵܝܹܠ. ܡܲܕ݂ܒ̇ܚܲܝ̈ܟ ܣܲܚܸܦܘ: ܘܲܢܒ̣ܝܼܲܝ̈ܟ ܩܲܛܸܠ̣ܘ ܒܚܲܪܒܵܐ. ܘܐܫܬܲܚܪܹܬ̣ ܐܸܢܵܐ ܒܲܠܚܘܿܕܲܝ: ܘܗܵܐ ܒܵܥܹ̇ܝܢ ܠܡܸܣܲܒ̣ ܠܢܲܦ̮ܫܝ.

¹⁵ܘܐܸܡܲܪ ܠܹܗ ܡܵܪܝܵܐ: ܗܦܘܿܟ݂ ܙܸܠ ܠܐܘܼܪܚܵܟ݂ ܠܡܲܕ݂ܒ̇ܪܵܐ ܕܕܲܪܡܣܘܿܩ: ܘܙܸܠ ܡܫܘܿܚ ܠܲܝܙܵܐܹܝܠ: ܕܢܲܡܠܸܟ݂ ܥܲܠ ܐܲܕ݂ܘܿܡ.

¹⁶ܘܲܠܝܵܗܘܿ ܒܲܪ ܝܲܡܫܝܼ ܕܢܲܡܠܸܟ݂ ܥܲܠ ܝܼܣܪܵܝܹܠ: ܘܠܹܐܠܝܼܫܲܥ ܒܲܪ ܫܵܦܵܛ ܕܡ̣ܢ ܐܲܒ̣ܠ ܡܚܘܿܠܵܐ: ܡܫܘܿܚ ܕܢܸܗܘܹܐ ܢܒ̣ܝܼܵܐ ܚܠܵܦܲܝܟ.

¹⁷ܘܡ̇ܢ ܕܢܸܬ̣ܦܲܠܲܛ ܡ̣̤ ܚܲܪܒܵܐ ܕܲܚܙܵܐܹܝܠ: ܢܸܩܛܠܝܼܘܗܝ ܝܵܗܘ̇. ܘܡܢ ܕܢܸܬ̣ܦܲܠܲܛ ܡ̣ܢ ܚܲܪܒܵܐ. ܕܝܵܗܘ̇: ܢܸܩܛܠܝܼܘܗܝ ܐܹܠܝܼܫܲܥ.

¹⁸ܘܐܵܘܬܲܪ ܡ̣ܢ ܝܼܣܪܵܝܹܠ ܫܲܒ̣ܥܵܐ: ܐܲܠܦ̈ܝܼܢ: ܟܠ ܒܘܼܪܟܵܐ ܕܠܵܐ ܒܪܲܟ݂ ܠܒܲܥܠܵܐ: ܘܟ݂ܠ ܦܘܼܡ ܕܠܵܐ ܢܲܫܩܹܗ.

¹⁹ܘܐܸܙܲܠ ܡ̣ܢ ܬܲܡܵܢ: ܘܐܸܫܟܲܚ ܠܐܹܠܝܼܫܲܥ ܒܲܪ ܫܵܦܵܛ: ܕܕ݂ܵܒܲܪ ܗ̄ܘ̣ܵܐ ܦܲܕܵܢܵܐ: ܘܬܲܪܬܲܥܸܣܪܹܐ ܦܲܕܵܢܝܼ̈ܢ ܩܕ݂ܵܡܵܘܗܝ. ܘܗ̤ܘ ܚܲܕ݂ ܡ̣ܢ ܬܪܸܥܣܲܪ ܗ̄ܘ̣ܵܐ. ܘܲܥܒܲܪ ܐܹܠܝܼܵܐ ܥܠܵܘܗܝ: ܘܲܫܕ݂ܵܐ ܡܲܥܦܪܹܗ ܥܠܵܘܗܝ.

²⁰ܘܫܲܒ̣ܩܵܗ̇ ܠܦܲܕܵܢܵܐ ܕܬ̣ܵܘܪܹ̈ܐ: ܘܐܸܙܲܠ ܒܵܬܲܪ ܐܹܠܝܼܵܐ. ܘܐܸܡܲܪ ܠܹܗ: ܐܸܙܲܠ ܐܹܫܘܿܩ ܠܐܵܒ̣ܝ ܘܠܐܹܡܝ: ܘܐܹܬܹܐ ܒܵܬ̣ܪܵܟ݂ ܐܵܡܲܪ ܠܹܗ: ܗܦܘܿܟ݂ ܙܸܠ ܠܵܟ݂: ܡܵܢܵܐ ܓܹܝܪ ܥܸܒ̣ܕܹ̇ܬ̣ ܠܵܟ݂.

²¹ܘܲܗܦܲܟ݂ ܡ̣ܢ ܒܵܬ̣ܪܹܗ: ܘܢܲܣܒܵܗ̇ ܠܦܲܕܵܢܵܐ ܕܬ̣ܵܘܪܹ̈ܐ: ܘܕܲܒܲܚ ܐܸܢܘܿܢ: ܘܲܒ̣ܡܵܐܢܹ̈ܐ ܕܬ̣ܵܘܪܹ̈ܐ ܒܲܫܸܠ̣ ܒܸܣܪܵܐ. ܘܝܲܗ̄ܒ̣ ܠܥܲܡܵܐ ܘܐܸܟܲܠܘ. ܘܩܵܡ̣ ܐܸܙܲܠ ܒܵܬܲܪ ܐܹܠܝܼܵܐ: ܘܫܲܡܫܹܗ.