Read Aramaic Peshita 1 Kings 2 Bible Online

1 Kings 2 - Aramaic Peshita bible

1 Kings 2

¹ܘܲܩܪܲܒ̣ܘ ܝܵܘܡܵܘ̈ܗܝ ܕܕ݂ܵܘܝܼܕ݂ ܠܲܡܡܵܬ̣. ܘܦܲܩܸܕ݂ ܠܲܫܠܹܝܡܘܿܢ ܒܪܹܗ: ܘܐܸܡܲܪ ܠܹܗ.

²ܐܸܢܵܐ ܐܵܙܹ̇ܠ ܐ̄ܢܵܐ ܒܐܘܼܪܚܵܐ ܕܟ݂ܠܵܗ̇ ܐܲܪܥܵܐ: ܐܸܬ̣ܚܲܝܲܠ ܘܲܗ̤ܘܝܼ ܓܲܒ̣ܪܵܐ.

³ܘܛܲܪ ܢܛܘܼܪ̈ܵܬܹܗ ܕܡܵܪܝܵܐ ܐܲܠܵܗܵܟ݂: ܘܗܲܠܸܟ݂ ܒܐܘܼܪ̈ܚܵܬܹܗ: ܘܛܲܪ ܩܝܵܡܵܘ̈ܗܝ ܘܦܘܼܩܕܵܢܵܘ̈ܗܝ ܘܕ݂ܝܼܢܵܘ̈ܗܝ ܘܣܵܗ̈ܕ̇ܘܵܬܹܗ: ܐܲܝܟ݂ ܕܲܟ݂ܬ̣ܝܼܒ̣ ܒܢܵܡܘܿܣܵܐ ܕܡܘܼܫܹܐ: ܡܸܛܠ ܕܬܲܨܠܲܚ ܒܟ݂ܠ ܕܬܸܥܒܸ̇ܕ݂: ܘܠܲܐܝܟܵܐ ܕܬܹܐܙܲܠ ܬܲܟ݂ܫܲܪ.

⁴ܡܸܛܠ ܕܲܢܩܝܼܡ ܡܵܪܝܵܐ ܦܸܬ̣ܓ̣ܵܡܵܘ̈ܗܝ ܕܐܸܡܲܪ ܥܠܲܝ: ܕܐܸܢ ܢܸܛܪܘܼܢ ܒܢܲܝ̈ܟ ܐܘܼܪ̈ܚܵܬ̣ܗܘܿܢ: ܠܲܡܗܲܠܵܟ݂ܘܼ ܩܕ݂ܵܡܲܝ ܒܩܘܼܫܬܵܐ: ܡ̣ܢ ܟܠܹܗ ܠܸܒ̇ܗܘܿܢ ܘܡ̣ܢ ܟܠܵܗ̇ ܢܲܦ̮ܫܗܘܿܢ: ܠܡܹܐܡܲܪ: ܠܵܐ ܢܸܥܢܲܕ݂ ܠܵܟ݂ ܓܲܒ̣ܪܵܐ ܕܝܵܬܹܒ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ.

⁵ܘܗܵܫܵܐ ܐܲܢ̄ܬ̇ ܝܵܕܲܥ ܐܲܢ̄ܬ̇ ܡܸܕܸ̇ܡ ܕܲܥܒܲܕ݂ ܠܝܼ ܝܘܿܐܵܒ̣ ܒܲܪ ܨܘܿܪܝܼܵܐ: ܘܡܸܕܸ̇ܡ ܕܲܥܒܲܕ݂ ܠܲܬ̣ܪܹܝܢ ܪ̈ܲܒܲܝ ܚܲܝܠܵـ̈ـܘܵܬ̣ܵܐ ܕܝܼܣܪܵܝܹܠ: ܠܐܲܒ̣ܢܹܝܪ ܒܲܪ ܢܹܝܪ ܘܲܠܥܲܡܣܵܐ ܒܲܪ ܝܵܬ̣ܵܪ: ܕܲܩܛܲܠ̣ ܐܸܢܘܿܢ: ܘܲܚ̣ܫܲܒ̣ ܐܸܢܘܿܢ ܐܲܝܟ݂ ܕܒܲܩܪܵܒ̣ܵܐ: ܘܐܸܫܲܕ݂ ܕܸܡܗܘܿܢ ܒܣܲܝܦܵܐ ܕܲܒ̣ܚܲܨܵܘ̈ܗܝ: ܘܕ݂ܵܫ̣ ܒܲܡܣܵܢܹ̈ܐ ܕܪܸ̈ܓ̣ܠܵܘܗܝ.

⁶ܘܲܥܒܸܕ݂ ܠܹܗ ܐܲܝܟ݂ ܚܲܟ̇ܝܼܡܘܼܬ̣ܵܟ݂: ܘܠܵܐ ܬܲܚܸܬ̣ ܣܲܝܒ̇ܘܼܬܹܗ ܒܲܫܠܵܡܵܐ ܠܲܫܝܘܿܠ.

⁷ܘܥܲܡ ܒ̈ܢܲܝ ܒܲܪܙܸܠܝܼ ܓܸܠܥܵܕ݂ܵܝܵܐ ܥܒܸܕ݂ ܛܲܝܒ̇ܘܼܬ̣ܵܐ. ܘܢܸܗܘܘܿܢ ܡ̣ܢ ܐܵܟ݂ܠܲܝ̈ ܦܵܬ̣ܘܿܪܵܟ݂. ܡܸܛܠ ܕܗܸܢܘܿܢ ܫܲܡܫܘܼܢܝ ܒܟ݂ܠܡܸܕܸ̇ܡ: ܟܲܕ݂ ܥܸܪܩܹ̇ܬ̣ ܡ̣ܢ ܩܕ݂ܵܡ ܐܲܒ̣ܫܵܠܘܿܡ ܐܲܚܘܼܟ݂.

⁸ܘܗܵܐ ܫܲܡܥܝܼ ܒܲܪ ܓܹܐܪܵܐ ܥܲܡܵܟ݂: ܡ̣ܢ ܫܲܒ̣ܛܵܐ ܕܒܸܢܝܵܡܹܝܢ ܡ̣ܢ ܒܹܝܬ̣ ܚܘܿܪܝܼܡ ܘܗ̤ܘ ܨܲܚܝܲܢܝ ܨܘܿܚ̈ܝܵܬ̣ܵܐ ܡܲܪܝܼܪ̈ܵܬ̣ܵܐ: ܒܝܵܘܡܵܐ ܕܐܸܙܲܠ̄ܬ̣ ܠܡܲܚܢܝܼܡ. ܘܗ̤ܘ ܢܚܸܬ̣ ܠܐܘܼܪܥܝ ܠܝܘܿܪܕ̇ܢܵܢ. ܘܝܼܡܝܼܬ̣ ܠܹܗ ܒܡܵܪܝܵܐ ܐܲܠܵܗܵܐ ܘܐܸܡ̇ܪܹܬ̣ ܠܹܗ: ܕܐܸܢܵܐ ܠܵܐ ܐܸܩܛܠܵܟ݂ ܒܚܲܪܒܵܐ.

⁹ܗܵܫܵܐ ܠܵܐ ܬܙܲܟܹ̇ܝܘܗܝ: ܕܓܲܒ̣ܪܵܐ ܐܲܢ̄ܬ̇ ܚܲܟ̇ܝܼܡܵܐ ܘܕܲܥ ܡܸܕܸ̇ܡ ܕܬܸܥܒܸ̇ܕ݂ ܠܹܗ. ܘܐܲܗܦܸܟ݂ ܣܲܟ݂ܠܘܼܬܹܗ ܥܲܠ ܪܹܫܹܗ: ܘܐܲܚܸܬ̣ ܣܲܝܒ̇ܘܼܬܹܗ ܒܲܕ݂ܡܵܐ ܠܲܫܝܘܿܠ.

¹⁰ܘܲܫܟܸܒ̣ ܕܵܘܝܼܕ݂ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂.

¹¹ܘܝܵܘ̈ܡܵܬ̣ܵܐ ܕܐܲܡ̣ܠܸܟ݂ ܕܵܘܝܼܕ݂ ܥܲܠ ܝܼܣܪܵܝܹܠ ܐܲܪܒ̇ܥܝܼܢ ܫܢ̈ܝܼܢ: ܒܚܸܒ̣ܪܘܿܢ ܐܲܡ̣ܠܸܟ݂ ܫܒܲܥ ܫܢ̈ܝܼܢ: ܘܒ̣ܐܘܿܪܸܫܠܸܡ ܐܲܡ̣ܠܸܟ݂ ܬܠܵܬ̣ܝܼܢ ܘܲܬ̣ܠܵܬ̣ ܫܢ̈ܝܼܢ.

¹²ܘܲܫܠܹܝܡܘܿܢ ܝܼܬܸܒ̣ ܥܲܠ ܟܘܼܪܣܝܹܗ ܕܕ݂ܵܘܝܼܕ݂ ܐܲܒ̣ܘܼܗܝ. ܘܬܸܩܢܲܬ̤ ܡܲܠܟ̇ܘܼܬܹܗ ܛܵܒ̣.

¹³ܘܐܸܬ̣ܵܐ ܐܲܕ݂ܘܿܢܝܼܵܐ ܒܲܪ ܚܲܓܝܼܬ̣ ܠܘܵܬ̣ ܒܲܪܬ̣ ܫܒܲܥ ܐܸܡܹܗ ܕܲܫܠܹܝܡܘܿܢ: ܘܐܵܡܪܵܐ ܠܹܗ: ܫܠܵܡ ܡܹܐܬ̣ܝܵܟ݂: ܘܐܸܡܲܪ ܫܠܵܡ.

¹⁴ܘܐܸܡܲܪ ܠܵܗ̇: ܡܸܠܬ̣ܵܐ ܐܝܼܬ̣ ܠܝܼ ܕܐܸܡܲܪ ܠܹܟ݂ܝ ܐܵܡܪܵܐ ܠܹܗ ܐܸܡܲܪ.

¹⁵ܐܵܡܲܪ ܠܵܗ̇: ܐܲܢ̄ܬ̇ ܝܵܕܥܵܐ ܐܲܢ̄ܬ̇ܝ ܕܠܝܼ ܙܵܕ݂ܩܵܐ ܗ̄ܘ̣ܵܬ̣ ܡܲܠܟ̇ܘܼܬ̣ܵܐ: ܘܲܥܠܲܝ ܣܵܡ̣ܘ ܟܠܹܗ ܝܼܣܪܵܝܹܠ ܐܲܦܲܝ̈ܗܘܿܢ ܕܐܗܘܸܐ ܠܗܘܿܢ ܡܲܠܟܵܐ. ܘܲܐܹܬ̣ܢܲܣܒܲܬ̤ ܡܲܠܟ̇ܘܼܬ̣ܵܐ ܡܹܢܝ: ܘܲܗܘ̤ܵܬ̣ ܕܐܵܚ: ܡܸܛܠ ܕܡ̣ܢ ܡܵܪܝܵܐ ܗܘ̤ܵܬ̣ ܠܹܗ.

¹⁶ܘܗܵܫܵܐ ܫܸܐܠ̱ܬ̣ܵܐ ܚܕ݂ܵܐ ܫܵܐܹ̇ܠ ܐ̄ܢܵܐ ܠܹܟ݂ܝ: ܠܵܐ ܬܲܗܦ̄ܟ݂ܝܼܢ ܐܲܦܲܝ̈. ܘܐܵܡܪܵܐ ܠܹܗ ܐܸܡܲܪ.

¹⁷ܐܵܡܲܪ ܠܵܗ̇: ܐܸܡܲܪܝ ܠܡܲܠܟܵܐ ܫܠܹܝܡܘܿܢ ܕܠܵܐ ܢܲܗܦܲܟ݂ ܐܲܦܲܝ̈ܟ̇ܝ: ܘܢܸܬܸ̇ܠ ܠܝܼ ܠܐܒ̣ܝܼܫܵܓ̣ ܫܝܼܠܘܿܡܵܝܬܵܐ ܐܲܢ̄ܬ̇ܬ̣ܵܐ.

¹⁸ܘܐܸܡܪܲܬ̤ ܒܲܪܬ̣ ܫܒܲܥ: ܫܲܦܝܼܪ: ܐܸܢܵܐ ܐܹܡܲܪ ܥܠܲܝܟ ܠܡܲܠܟܵܐ.

¹⁹ܘܥܸܠܲܬ̤ ܒܲܪܬ̣ ܫܒܲܥ ܠܘܵܬ̣ ܡܲܠܟܵܐ ܫܠܹܝܡܘܿܢ ܕܬܹܐܡܲܪ ܠܹܗ ܥܲܠ ܐܲܕ݂ܘܿܢܝܼܵܐ. ܘܩܵܡ̣ ܡܲܠܟܵܐ ܠܐܘܼܪܥܵܗ̇ ܘܲܣܓܸܕ݂ ܠܵܗ̇: ܘܝܼܬܸܒ̣ ܥܲܠ ܟܘܼܪܣܝܹܗ. ܘܐܲܪܡܝܼܘ ܟܘܼܪܣܝܵܐ ܠܐܸܡܹܗ ܕܡܲܠܟܵܐ: ܘܝܼܬ̣ܒܲܬ̤ ܡ̣ܢ ܝܲܡܝܼܢܹܗ.

²⁰ܘܐܸܡܲܪܬ̤: ܫܸܐ̱ܠܬ̣ܵܐ ܚܕ݂ܵܐ ܙܥܘܿܪܬܵܐ ܫܵܐܠܵܐ ܐ̄ܢܵܐ ܡܸܢܵܟ݂: ܠܵܐ ܬܲܗܦܲܟ݂ ܐܲܦܲܝ̈ ܘܐܸܡܲܪ ܠܵܗ̇ ܡܲܠܟܵܐ: ܫܐܲܠܝ ܐܹܡܝ: ܡܸܛܠ ܕܠܵܐ ܡܲܗܦܸܟ݂ ܐ̄ܢܵܐ ܐܲܦܲܝ̈ܟ̇ܝ.

²¹ܘܐܸܡܪܲܬ̤: ܬܸܬ̣̱ܝܼܗܸܒ̣ ܐܲܒ̣ܝܼܫܵܓ̣ ܫܝܼܠܘܿܡܵܝܬܵܐ ܠܐܲܕ݂ܘܿܢܝܼܵܐ ܐܲܚܘܼܟ݂ ܐܲܢ̄ܬ̇ܬ̣ܵܐ.

²²ܘܲܥ̣ܢܵܐ ܡܲܠܟܵܐ ܫܠܹܝܡܘܿܢ ܘܐܸܡܲܪ ܠܐܸܡܹܗ: ܠܡܵܢܵܐ ܫܐܸܠܬ̇ܝ ܠܹܗ ܐܲܒ̣ܝܼܫܵܓ̣ ܫܝܼܠܘܿܡܵܝܬܵܐ ܠܐܲܕ݂ܘܿܢܝܼܵܐ: ܐܸܠܵܐ ܫܐܲܠܝ ܠܹܗ ܡܲܠܟ̇ܘܼܬ̣ܵܐ. ܡܸܛܠ ܕܗ̤ܘܝܘܼ ܐܵܚܝ ܕܩܲܫܝܼܫ ܡܹܢܝ: ܘܠܹܗ ܐܲܒ̣ܝܼܬܲܪ ܟܵܗܢܵܐ: ܘܝܘܿܐܵܒ̣ ܒܲܪ ܨܘܿܪܝܼܵܐ.

²³ܘܝܼܡܵܐ ܡܲܠܟܵܐ ܫܠܹܝܡܘܿܢ ܒܡܵܪܝܵܐ ܘܐܸܡܲܪ: ܗܵܟܲܢܵܐ ܢܸܥܒܸ̇ܕ݂ ܠܝܼ ܐܲܠܵܗܵܐ ܘܗܵܟܲܢܵܐ ܢܵܘܣܸܦ ܠܝܼ: ܐܸܢ ܠܵܐ ܒܢܲܦ̮ܫܹܗ ܡܲܠܸܠ̣ ܐܲܕ݂ܘܿܢܝܼܵܐ ܦܸܬ̣ܓ̣ܵܡܵܐ ܗܵܢܵܐ.

²⁴ܘܗܵܫܵܐ ܚܲܝ ܗ̄ܘ̣ ܡܵܪܝܵܐ ܕܐܲܬ̣ܩܢܲܢܝ ܘܐܵܘܬ̇ܒܲܢܝ ܥܲܠ ܟܘܼܪܣܝܹܗ ܕܕ݂ܵܘܝܼܕ݂ ܐܵܒ̣ܝ: ܘܲܥ̣ܒܲܕ݂ ܠܝܼ ܒܲܝܬܵܐ ܐܲܝܟ݂ ܕܐܸܡܲܪ ܐܸܠܵܐ ܝܵܘܡܵܢܵܐ ܢܸܬ̣ܩ̱ܛܸܠ ܐܲܕ݂ܘܿܢܝܼܵܐ.

²⁵ܘܫܲܕܲܪ ܡܲܠܟܵܐ ܫܠܹܝܡܘܿܢ ܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܲܦܓܲܥ̣ ܒܹܗ ܘܩܲܛܠܹܗ.

²⁶ܘܠܲܐܒ̣ܝܬܲܪ ܟܵܗܢܵܐ ܐܸܡܲܪ ܠܹܗ ܡܲܠܟܵܐ: ܠܲܥܢܵܬ̣ܘܿܬ̣ ܙܸܠ ܠܵܟ݂ ܠܚܲܩܠܵܟ݂: ܡܸܛܠ ܕܓܲܒ̣ܪܵܐ ܐܲܢ̄ܬ̇ ܚܲܝܵܒ̣ ܡܵܘܬܵܐ. ܘܝܵܘܡܵܢܵܐ ܠܵܐ ܐܸܩܛܠܵܟ݂: ܡܸܛܠ ܕܲܫܩܲܠܬ̇ ܐܪܘܿܢܹܗ ܕܡܵܪܝܵܐ ܩܕ݂ܵܡ ܕܵܘܝܼܕ݂ ܐܵܒ̣ܝ: ܘܐܸܨܛܲܥܲܪܬ̇ ܒܟ݂ܠ ܐܲܬܲܪ ܕܐܸܨܛܲܥܲܪ ܒܹܗ ܐܵܒ̣ܝ.

²⁷ܘܐܲܦܩܹܗ ܫܠܹܝܡܘܿܢ ܠܐܲܒ̣ܝܼܬܲܪ ܕܠܵܐ ܢܸܗܘܹܐ ܟܵܗܢܵܐ ܠܡܵܪܝܵܐ: ܕܢܸܫܬܲܡܠܸܐ ܦܸܬ̣ܓ̣ܵܡܸܗ ܕܡܵܪܝܵܐ ܕܡܲܠܸܠ̣ ܥܲܠ ܒܹܝܬ̣ ܥܹܠܝܼ ܒܫܝܼܠܘܿ.

²⁸ܘܛܸܒܵܐ ܡܲܛܝܼ ܠܝܘܿܐܵܒ̣ ܕܐܸܬ̣ܩܛܸܠ ܐܲܕ݂ܘܿܢܝܼܵܐ: ܡܸܛܠ ܕܝܘܿܐܵܒ̣ ܨܠܸܐ ܗ̄ܘ̣ܵܐ ܒܵܬܲܪ ܐܲܕ݂ܘܿܢܝܼܵܐ. ܘܒ̣ܵܬܲܪ ܫܠܹܝܡܘܿܢ ܠܵܐ ܨܠܵܐ ܘܲܥܪܲܩ̣ ܝܘܿܐܵܒ̣ ܠܡܲܫܟ̇ܢܹܗ ܕܡܵܪܝܵܐ: ܘܐܸܚܲܕ݂ ܓܵܘܣܵܐ ܒܩܲܪ̈ܢܵܬܹܗ ܕܡܲܕ݂ܒ̇ܚܵܐ.

²⁹ܘܚܵܘܝܼܘ ܠܡܲܠܟܵܐ ܫܠܹܝܡܘܿܢ ܕܲܥܪܲܩ̣ ܝܘܿܐܵܒ̣ ܠܡܲܫܟ̇ܢܹܗ ܕܡܵܪܝܵܐ: ܘܐܸܚܲܕ݂ ܓܵܘܣܵܐ ܒܩܲܪ̈ܢܵܬܹܗ ܕܡܲܕ݂ܒ̇ܚܵܐ. ܘܫܲܕܲܪ ܡܲܠܟܵܐ ܫܠܹܝܡܘܿܢ ܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܐܸܡܲܪ ܠܹܗ: ܙܸܠ ܦܓܲܥ ܒܹܗ.

³⁰ܘܥܲܠ̣ ܒܢܵܝܵܐ ܠܡܲܫܟ̇ܢܹܗ ܕܡܵܪܝܵܐ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܲܠܟܵܐ: ܦܘܿܩ. ܘܐܸܡܲܪ ܠܵܐ ܢܵܦܹ̇ܩ ܐ̄ܢܵܐ: ܗܵܪܟܵܐ ܡܵܐܹ̇ܬ̣ ܐ̄ܢܵܐ. ܘܦܲܢܝܼ ܒܢܵܝܵܐ ܦܸܬ̣ܓ̣ܵܡܵܐ ܠܡܲܠܟܵܐ: ܘܐܸܡܲܪ: ܗܵܟܲܢܵܐ ܡܲܠܸܠ̣ ܝܘܿܐܵܒ̣: ܘܗܵܟܲܢܵܐ ܥܢܵܢܝ.

³¹ܘܐܸܡܲܪ ܡܲܠܟܵܐ: ܥܒܸܕ݂ ܠܹܗ ܐܲܝܟ݂ ܡܸܕܸ̇ܡ ܕܐܸܡܲܪ: ܘܲܦܓ̣ܥ ܒܹܗ ܘܲܩܛܘܿܠܲܝܗܝ: ܘܐܲܥܒܲܪ ܕܡܵܐ ܙܲܟܝܵܐ ܕܐܸܫܲܕ݂ ܝܘܿܐܵܒ̣ ܡܹܢܝ ܘܡ̣ܢ ܒܹܝܬ̣ ܐܵܒ̣ܝ.

³²ܘܢܲܗܦܸܟ݂ ܡܵܪܝܵܐ ܕܡܹܗ ܒܪܹܫܹܗ: ܕܲܦܓܲܥ̣ ܒܲܬ̣ܪܹܝܢ ܓܲܒ̣ܪ̈ܝܼܢ ܕܙܲܕ̇ܝܼܩܝܼܢ ܘܛܵܒ̣ܝܼܢ ܡܸܢܹܗ: ܘܩܲܛܸܠ ܐܸܢܘܿܢ ܒܚܲܪܒܵܐ: ܘܐܵܒ̣ܝ ܕܵܘܝܼܕ݂ ܠܵܐ ܝܼܕܲܥ̣: ܠܐܲܒ̣ܢܹܝܪ ܒܲܪ ܢܹܝܪ ܪܲܒ̇ ܚܲܝܠܵܐ ܕܝܼܣܪܵܝܹܠ: ܘܲܠܥܲܡܣܵܐ ܒܲܪ ܝܵܬ̣ܵܪ ܪܲܒ̇ ܚܲܝܠܵܐ ܕܲܝܗܘܼܕ݂ܵܐ.

³³ܘܢܸܗܦܘܿܟ݂ ܕܡܸܗܘܿܢ ܒܪܹܫܹܗ ܕܝܘܿܐܵܒ̣: ܘܲܒ̣ܪܹܫܵܐ ܕܙܲܪܥܹܗ ܠܥܵܠܲܡ. ܘܲܠܕ݂ܵܘܝܼܕ݂: ܘܲܠܙܲܪܥܹܗ: ܘܲܠܒܲܝܬܹ̇ܗ: ܘܲܠܟ݂ܘܼܪܣܝܹܗ: ܢܸܗܘܹܐ ܫܠܵܡܵܐ ܠܥܵܠܲܡ ܡ̣ܢ ܩܕ݂ܵܡ ܡܵܪܝܵܐ.

³⁴ܘܲܣܠܸܩ̣ ܒܢܵܝܵܐ ܒܲܪ ܝܘܿܝܵܕ݂ܵܥ: ܘܲܦܓܲܥ ܒܹܗ ܘܩܲܛܠܹܗ. ܘܐܸܬ̣ܩܒܲܪ ܒܩܲܒ̣ܪܹܗ ܒܡܲܕ݂ܒ̇ܪܵܐ.

³⁵ܘܐܲܩܝܼܡ ܡܲܠܟܵܐ ܫܠܹܝܡܘܿܢ ܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ ܚܠܵܦܵܘܗܝ: ܥܲܠ ܚܲܝܠܵܐ. ܘܲܠܨܵܕ݂ܘܿܩ ܟܵܗܢܵܐ ܐܲܩܝܼܡ ܡܲܠܟܵܐ ܚܠܵܦ ܐܲܒ̣ܝܼܬܲܪ.

³⁶ܘܫܲܕܲܪ ܡܲܠܟܵܐ ܩ̣ܪܵܐ ܠܫܲܡܥܝܼ ܘܐܸܡܲܪ ܠܹܗ: ܒܢܝܼ ܠܵܟ݂ ܒܲܝܬܵܐ ܒܐܘܿܪܸܫܠܸܡ: ܘܬܸܒ̣ ܬܲܡܵܢ. ܘܠܵܐ ܬܸܦܘܿܩ ܡ̣ܢ ܬܲܡܵܢ ܠܟ݂ܵܐ ܘܲܠܟ݂ܵܐ.

³⁷ܘܲܒ̣ܝܵܘܡܵܐ ܕܢܵܦܹ̇ܩ ܐܲܢ̄ܬ̇ ܘܥܵܒܲܪ ܐܲܢ̄ܬ̇ ܢܲܚܠܵܐ ܕܩܸܕ݂ܪܘܿܢ: ܕܲܥ ܡܸܕܲܥ ܕܲܡܡܵܬ̣ ܬܡܘܼܬ̣: ܘܲܕ݂ܡܵܟ݂ ܢܸܗܘܹܐ ܒܪܹܫܵܟ݂.

³⁸ܘܐܸܡܲܪ ܫܲܡܥܝܼ ܠܡܲܠܟܵܐ: ܫܲܦܝܼܪ ܦܸܬ̣ܓ̣ܵܡܵܐ ܕܐܸܡܲܪܬ̇ ܡܵܪܝ ܡܲܠܟܵܐ: ܗܵܟܲܢܵܐ ܢܸܥܒܸ̇ܕ݂ ܥܲܒ̣ܕܵܟ݂ ܘܝܼܬܸܒ̣ ܫܲܡܥܝܼ ܒܐܘܿܪܸܫܠܸܡ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ.

³⁹ܘܡ̣ܢ ܒܵܬܲܪ ܬܠܵܬ̣ ܫܢ̈ܝܢ: ܥܪܲܩ̣ܘ ܬܪܹܝܢ ܥܲܒ̣ܕܵܘ̈ܗܝ ܕܫܲܡܥܝܼ: ܠܘܵܬ̣ ܐܲܟ݂ܝܼܫ ܒܲܪ ܡܲܥܟܵܐ ܡܲܠܟܵܐ ܕܓ̣ܵܬ̣ ܘܚܵܘܝܼܘ ܠܫܲܡܥܝܼ: ܘܐܸܡܲܪܘ ܠܹܗ: ܗܵܐ ܥܲܒ̣ܕܲܝ̈ܟ ܒܓ̣ܵܬ̣.

⁴⁰ܘܩܵܡ̣ ܫܲܡܥܝܼ ܐܲܪܡܝܼ ܥܲܠ ܚܡܵܪܹܗ: ܘܐܸܙܲܠ̣ ܠܓ̣ܵܬ̣ ܠܘܵܬ̣ ܐܲܟ݂ܝܼܫ ܠܡܸܒ̣ܥܵܐ ܠܥܲܒ̣ܕܵܘ̈ܗܝ. ܘܐܸܙܲܠ̣ ܫܲܡܥܝܼ ܘܐܲܝܬܝܼ ܠܥܲܒ̣ܕܵܘ̈ܗܝ ܡ̣ܢ ܓܵܬ̣.

⁴¹ܘܚܵܘܝܼܘ ܠܡܲܠܟܵܐ ܫܠܹܝܡܘܿܢ ܕܐܸܙܲܠ̣ ܫܲܡܥܝܼ ܡ̣ܢ ܐܘܿܪܸܫܠܸܡ ܠܓ̣ܵܬ̣ ܘܲܗܦܲܟ݂.

⁴²ܘܫܲܕܲܪ ܡܲܠܟܵܐ ܩ̣ܪܵܐ ܠܫܲܡܥܝܼ: ܘܐܸܡܲܪ ܠܹܗ: ܠܵܐ ܐܘܿܡܝܼܬ̣ܵܟ݂ ܒܡܵܪܝܵܐ: ܘܣܲܗܕܹܬ̣ ܒܵܟ݂ ܘܐܸܡܪܹܬ̣: ܕܲܒ̣ܝܵܘܡܵܐ ܕܬܸܦܘܿܩ ܡ̣ܢ ܐܘܿܪܸܫܠܸܡ ܘܬܸܥܒܲܪ ܢܲܚܠܵܐ ܕܩܸܕ݂ܪܘܿܢ: ܡܸܕܲܥ ܬܸܕܲܥ ܕܲܡܡܵܬ̣ ܬܡܘܼܬ̣: ܘܐܸܡܲܪܬ̇ ܫܲܦܝܼܪ ܦܸܬ̣ܓ̣ܵܡܵܐ: ܗܵܟܲܢܵܐ ܐܸܥܒܸܕ݂.

⁴³ܡܸܛܠ ܡܵܢܵܐ ܠܵܐ ܢܛܲܪܬ̇ ܡܵܘܡܵܬܹܗ ܕܡܵܪܝܵܐ ܘܩܘܼܩܕܵܢܵܐ ܕܦܲܩܕ̇ܬܵܟ݂.

⁴⁴ܘܐܸܡܲܪ ܡܲܠܟܵܐ ܠܫܲܡܥܝܼ: ܐܲܢ̄ܬ̇ ܝܵܕܲܥ ܐܲܢ̄ܬ̇ ܟܠܵܗ̇ ܒܝܼܫܬܵܐ ܕܝܵܕܲܥ ܠܸܒܵܟ݂: ܕܲܥܒܲܕ̇ܬ̇ ܠܕ݂ܵܘܝܼܕ݂ ܐܵܒ̣ܝ: ܘܐܲܗܦܸܟ݂ ܡܵܪܝܵܐ ܒܝܼܫܬܵܟ݂ ܒܪܹܫܵܟ݂.

⁴⁵ܘܡܲܠܟܵܐ ܫܠܹܝܡܘܿܢ ܢܸܗܘܹܐ ܒܪܝܼܟ݂: ܘܟ݂ܘܼܪܣܝܹܗ ܕܕ݂ܵܘܝܼܕ݂ ܢܸܗܘܹܐ ܡܲܬ̣ܩܲܢ ܩܕ݂ܵܡ ܡܵܪܝܵܐ ܥܕܲܡܵܐ ܠܥܵܠܲܡ.

⁴⁶ܘܲܦܩܲܕ݂ ܡܲܠܟܵܐ ܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܲܢܦܲܩ̣ ܦܓܲܥ̣ ܒܹܗ ܘܡܝܼܬ̣.