Read Aramaic Peshita 1 Kings 20 Bible Online

1 Kings 20 - Aramaic Peshita bible

1 Kings 20

¹ܘܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ ܟܲܢܸܫ̣ ܟܠܹܗ ܚܲܝܠܹܗ: ܘܲܬ̣ܠܵܬ̣ܝܼܢ ܘܲܬ̣ܪܹܝܢ ܡܲܠܟ̇ܝܼ̈ܢ ܕܥܲܡܹܗ: ܘܪ̈ܲܟ݂ܫܵܐ ܘܡܲܪ̈ܟ̇ܒ̣ܵܬ̣ܵܐ. ܘܲܣܠܸܩ̣: ܘܲܫ̣ܪܵܐ ܥܲܠ ܫܵܡܪܹܝܢ: ܘܐܸܬ̣ܟܲܬܲܫ ܥܲܡܵܗ̇.

²ܘܫܲܕܲܪ ܐܝܼܙ̈ܓܲܕܹ̇ܐ ܠܘܵܬ̣ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ.

³ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܒܲܪ ܗܕ݂ܵܕ݂: ܟܸܣܦܵܟ݂ ܘܕܲܗܒܵܟ݂: ܕܝܼܠܝ ܗ̄ܘ̣. ܘܢܸܫܲܝ̈ܟ ܘܲܒ̣ܢܲܝ̈ܟ ܕܫܲܦܝܼܪܝܼܢ: ܕܝܼܠܝ ܐܸܢܘܿܢ.

⁴ܘܲܥܢ̣ܵܐ ܡܲܠܟܵܐ ܕܝܼܣܪܵܝܹܠ ܘܐܸܡܲܪ: ܐܲܝܟ݂ ܦܸܬ̣ܓ̣ܵܡܵܟ݂ ܡܵܪܝ ܡܲܠܟܵܐ: ܕܝܼܠܵܟ݂ ܐ̄ܢܵܐ ܘܟ݂ܠ ܕܐܝܼܬ̣ ܠܝܼ.

⁵ܘܲܥܦܲܟ݂ܘ ܐܝܼܙܓܲܕܹ̇ܐ ܘܐܸܡܲܪܘ: ܗܵܟܲܢܵܐ ܐܵܡܲܪ ܒܲܪ ܗܕ݂ܵܕ݂: ܕܫܸܠܚܹܬ̣ ܠܵܟ݂ ܒܩܲܕ݂ܡܵܝܬܵܐ: ܕܟܸܣܦܵܟ݂ ܘܕܲܗܒ̣ܵܟ݂ ܘܢܸܫܲܝ̈ܟ ܘܲܒ̣ܢܲܝ̈ܟ ܬܸܬܸ̇ܠ ܠܝܼ.

⁶ܡܚܵܪ ܠܗܵܢܵܐ ܥܕܵܢܵܐ: ܐܹܫܲܕܲܪ ܥܲܒ̣̈ܕܲܝ ܠܘܵܬ̣ܵܟ݂ ܘܢܸܒ̣ܨܘܿܢ ܒܵܬܲܝ̈ܟ ܘܒ̣ܵـ̈ـܬܹ̇ܐ ܕܥܲܒ̣ܕܲܝ̈ܟ. ܘܟ݂ܠ ܪܸܓ̇ܬ̣ܵܐ ܕܥܲܝܢܲܝ̈ܗܘܿܢ ܢܸܣܒ̣ܘܼܢ ܒܐܝܼܕܲܝ̈ܗܘܿܢ ܘܢܹܐܬ̣ܘܼܢ.

⁷ܘܲܩܪܵܐ ܡܲܠܟܵܐ ܕܝܼܣܪܵܝܹܠ ܠܟܠܗܘܿܢ ܣܵܒܹ̈ܐ ܕܐܲܪܥܵܐ: ܘܐܸܡܲܪ ܠܗܘܿܢ: ܕܲܥܘ ܘܲܚܙܵܘ ܕܒ̣ܝܼܫܬܵܐ ܗ̄ܘ̣ ܒܵܥܹ̇ܐ ܗܵܢܵܐ. ܕܲܫܠܲܚ̣ ܠܝܼ ܥܲܠ ܢܸܫܲܝ̈: ܘܥܲܠ ܒ̈ܢܲܝ: ܘܥܲܠ ܟܸܣܦܝ: ܘܥܲܠ ܕܲܗܒ̣ܝ ܘܠܵܐ ܟܠܹܝܬ̣ ܡܢܹܗ.

⁸ܘܐܸܡܲܪܘ ܠܹܗ ܟܠܗܘܿܢ ܣܵܒܹ̈ܐ ܘܟ݂ܠܹܗ ܥܲܡܵܐ: ܠܵܐ ܬܸܫܡܲܥ: ܘܠܵܐ ܬܸܬ̇ܛܦܝܼܣ.

⁹ܘܐܸܡܲܪ ܠܐܝܼܙܓܲـ̈ـܕܹ̇ܐ ܕܒܲܪ ܗܕ݂ܵܕ݂: ܐܸܡܲܪܘ ܠܡܵܪܝ ܡܲܠܟܵܐ: ܟܠ ܕܲܫܠܲܚܬ̇ ܠܥܲܒ̣ܕܵܟ݂ ܒܩܲܕܡܵܝܬܵܐ ܐܸܥܒܸ̇ܕ݂. ܘܦܸܬ̣ܓ̣ܵܡܵܐ ܗܵܢܵܐ ܠܵܐ ܡܸܫܟܲܚ ܐ̄ܢܵܐ ܕܐܸܥܒܸ̇ܕ݂. ܘܐܸܙܲܠ̣ܘ ܐܝܼܙܓܲـ̈ـܕܹ̇ܐ ܘܐܲܬ̣ܝܼܒ̣ܘܼܗܝ ܦܸܬ̣ܓ̣ܵܡܵܐ.

¹⁰ܘܲܫܠܲܚ̣ ܠܹܗ ܒܲܪ ܗܕ݂ܵܕ݂ ܘܐܸܡܲܪ: ܗܵܟܲܢܵܐ ܢܸܥܒ̇ܕ݂ܘܼܢ ܠܝܼ ܐܲܠܵܗܹ̈ܐ: ܘܗܵܟܲܢܵܐ ܢܵܘܣܦܘܼܢ ܠܝܼ: ܐܸܢ ܢܸܣܦܲܩ ܥܲܦܪܵܗ̇ ܕܫܵܡܪܹܝܢ ܫܘܼܥܠܵܐ ܫܘܼܥܠܵܐ ܠܥܲܡܵܐ ܕܥܲܡܝ.

¹¹ܘܲܥܢܵܐ ܡܲܠܟܵܐ ܕܝܼܣܪܵܝܹܠ ܘܐܸܡܲܪ: ܡܲܠܸܠ: ܠܵܐ ܢܸܫܬ̇ܟܲܚ ܡ̇ܢ ܕܐܵܣܲܪ ܐܲܝܟ݂ ܡ̇ܢ ܕܫܵܪܹܐ.

¹²ܘܟܲܕ݂ ܫ̣ܡܲܥ ܦܸܬ̣ܓ̣ܵܡܵܐ ܗܵܢܵܐ: ܘܗ̤ܘ ܫܵܬܹ̇ܐ ܗ̄ܘ̣ܵܐ: ܘܡܲܠ̈ܟܹ̇ܐ ܒܲܡܛܲܠ̈ܠܹܐ ܘܐܸܡܲܪ ܠܥܲܒ̣ܕܵܘ̈ܗܝ: ܣܝܼܡܘ ܡܣܵܡ ܥܲܠ ܩܪܝܼܬ̣ܵܐ.

¹³ܘܗܵܐ ܢܒ̣ܝܼܵܐ ܚܲܕ݂ ܩܪܸܒ̣ ܠܘܵܬ̣ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܚܵܙܹ̇ܐ ܐܲܢ̄ܬ̇ ܠܹܗ ܠܗܵܢܵܐ ܟܠܹܗ ܚܲܝܠܵܐ ܪܲܒܵܐ. ܗܵܐ ܡܲܫܠܸܡ ܐ̄ܢܵܐ ܠܹܗ ܒܐܝܼܕܲܝ̈ܟ ܝܵܘܡܵܢܵܐ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

¹⁴ܘܐܸܡܲܪ ܐܵܚܵܒ̣ ܒܡ̇ܢ. ܘܐܸܡܲܪ ܠܹܗ: ܒܲܥܠܲܝܡܹ̈ܐ ܘܲܒ̣ܪܵܘ̱ܪ̈ܒ̣ܵܢܹܐ ܕܲܡܕ݂ܝܼܢ̄ܬܵܐ ܘܐܸܡܲܪ ܠܹܗ: ܡܲܢܘܼ ܢܸܣܕ̇ܘܿܪ ܩܪܵܒ̣ܵܐ ܠܘܼܩܕܲܡ ܐܵܡܲܪ ܠܹܗ ܐܲܢ̄ܬ̇.

¹⁵ܘܲܡܢܵܐ ܠܲܥܠܲܝܡܹ̈ܐ ܘܲܠܪܵܘ̱ܪ̈ܒ̣ܵܢܹܐ ܕܲܡܕ݂ܝܼܢ̄ܬܵܐ: ܘܲܗܘ̤ܵܘ ܡܲܐܬܹ̇ܝܢ ܘܲܬ̣ܠܵܬ̣ܝܼܢ ܘܲܬ̣ܪܹܝܢ. ܘܒ̣ܵܬܲܪܗܘܿܢ ܡܢܵܐ ܠܟ݂ܠܹܗ ܥܲܡܵܐ ܘܲܠܟ݂ܠܗܘܿܢ ܒܢܲܝ̈ ܝܼܣܪܵܝܹܠ ܫܲܒ̣ܥܵܐ ܐܲܠܦ̈ܝܼܢ.

¹⁶ܘܲܢܦܲܩ̣ܘ ܒܛܲܗܪܵܐ. ܘܒܲܪ ܗܕ݂ܵܕ݂ܫܵܬܹ̇ܐ ܗ̄ܘ̣ܵܐ ܥܲܬܝܼܩܵܐ ܒܲܡܛܲܠ̈ܠܹܐ: ܗ̤ܘ ܘܡܲܠ̈ܟܹ̇ܐ ܬܠܵܬ̣ܝܼܢ ܘܲܬ̣ܪܹܝܢ ܕܐܸܬ̣ܵܘ ܠܲܡܥܲܕܵܪܘܼܬܹܗ.

¹⁷ܘܲܢܦܲܩܘ ܥܠܲܝܡܹ̈ܐ ܘܪܵܘ̱ܪ̈ܒ̣ܵܢܹܐ ܕܲܡܕ݂ܝܼܢ̄ܬܵܐ ܒܩܲܕ݂ܡܵܝܬܵܐ. ܘܫܲܕܲܪ ܒܲܪ ܗܕ݂ܵܕ݂. ܘܚܵܘܝܼܘܗܝ ܘܐܸܡܲܪܘ ܠܹܗ: ܗܵܐ ܓܲܒ̣ܪܹ̈ܐ ܢܦܲܩ̣ܘ ܡ̣ܢ ܫܵܡܪܹܝܢ.

¹⁸ܘܐܸܡܲܪ: ܐܸܢ ܠܲܫܠܵܡܵܐ ܢܦܩܘ: ܐܲܚܘܿܕ݂ܘ ܐܸܢܘܿܢ ܟܲܕ݂ ܚܲܝܝܼܢ. ܘܐܸܢ ܠܲܩܪܵܒ̣ܵܐ ܢܦܲܩ̣ܘ: ܟܲܕ݂ ܚܲܝܝܼܢ ܐܲܚܘܿܕ݂ܘ ܐܸܢܘܿܢ.

¹⁹ܘܗܵܠܹܝܢ ܢܦܲܩ̣ܘ ܡ̣ܢ ܡܕ݂ܝܼܢ̄ܬܵܐ: ܥܠܲܝܡܹ̈ܐ ܘܪܵܘ̱ܪ̈ܒ̣ܵܢܹܐ ܕܲܡܕ݂ܝܼܢ̄ܬܵܐ ܘܚܲܝܠܵܐ ܒܵܬܲܪܗܘܿܢ.

²⁰ܘܩܲܛܸܠ ܓܒܲܪ ܓܲܒ̣ܪܹܗ: ܘܲܥܪܲܩ̣ ܐܲܕ݂ܘܿܡ. ܘܲܪܕܲܦ ܐܸܢܘܿܢ ܝܼܣܪܵܝܹܠ. ܘܐܸܬ̣ܦܲܠܲܛ ܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ ܥܲܠ ܡܲܪ̈ܟ̇ܒ̣ܵܬ̣ܵܐ ܘܦܲܪ̈ܵܫܹܐ.

²¹ܘܲܢܦܲܩ̣ ܡܲܠܟܵܐ ܕܝܼܣܪܵܝܹܠ: ܘܲܚܪܲܒ̣ ܪ̈ܲܟ݂ܫܵܐ ܘܡܲܪ̈ܟ̇ܒ̣ܵܬ̣ܵܐ. ܘܲܡܚ̣ܵܐ ܒܐܲܕ݂ܘܿܡ ܡܚܘܿܬ̣ܵܐ ܪܲܒ̇ܬ̣ܵܐ ܕܛܵܒ̣.

²²ܘܗܵܐ ܢܒ̣ܝܼܵܐ ܕܐܲܠܵܗܵܐ ܩ̣ܪܲܒ̣ ܠܘܵܬ̣ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܘܐܸܡܲܪ ܠܹܗ: ܙܸܠ ܐܬ̣ܚܲܝܲܠ: ܘܕܲܥ ܘܲܚܙܝܼ ܡܸܕܸ̇ܡ ܕܥܵܒܹܕ݂ ܐܲܢ̄ܬ̇ ܡܸܛܠ ܕܲܠܗܸܦܟ̇ܬ̣ܵܗ̇ ܕܫܲܢ̄ܬܵܐ: ܡܲܠܟܵܐ ܕܐܲܕ݂ܘܿܡ ܣܵܠܹ̇ܩ ܥܠܲܝܟ.

²³ܘܥܲܒ̣ܕܵܘ̈ܗܝ ܕܡܲܠܟܵܐ ܕܐܲܕ݂ܘܿܡ ܐܵܡ̇ܪܝܼܢ ܠܹܗ: ܐܲܠܵܗܵܐ ܗ̄ܘ̣ ܕܛܘܼܪܹ̈ܐ ܐܲܠܵܗܗܘܿܢ: ܡܸܛܠ ܗܵܢܵܐ ܗ̄ܘ̣ ܙܟ݂ܵܐܘܼܢ. ܒܪܲܡ ܢܸܬ̣ܟܲܬܲܫ ܥܲܡܗܘܿܢ ܒܲܦܩܲܥܬ̣ܵܐ: ܐܸܠܵܐ ܢܸܙܟܸ̇ܐ ܐܸܢܘܿܢ.

²⁴ܘܦܸܬ̣ܓ̣ܵܡܵܐ ܗܵܢܵܐ ܥܒܸܕ݂: ܐܲܥܒܲܪ ܡܲܠ̈ܟܹ̇ܐ ܓܒܲܪ ܡ̣ܢ ܐܲܬ̣ܪܹܗ: ܘܐܲܩܝܼܡ ܫܲܠܝܼܛܵܢܹ̈ܐ ܚܠܵܦܲܝܗܘܿܢ.

²⁵ܘܐܲܢ̄ܬ̇ ܡܸܢܝܼ ܠܵܟ݂ ܚܲܝܠܵܐ ܐܲܝܟ݂ ܚܲܝܠܵܐ ܕܲܢܦܲܠ ܡܸܢܵܟ݂: ܪ̈ܲܟ݂ܫܵܐ ܐܲܝܟ݂ ܪ̈ܲܟ݂ܫܵܐ: ܘܪ̈ܲܟܵܒܹܐ ܐܲܝܟ݂ ܪ̈ܲܟܵܒܹܐ. ܘܢܸܬ̣ܟܲܬܲܫ ܥܲܡܗܘܿܢ ܒܲܦܩܲܥܬ̣ܵܐ: ܐܸܠܵܐ ܢܸܥܫܲܢ ܡܸܢܗܘܿܢ. ܘܲܫܡܲܥ ܠܩܵܠܗܘܿܢ: ܘܲܥܒܲܕ݂ ܗܵܟܲܢܵܐ.

²⁶ܘܲܗܘ̤ܵܐ ܠܗܸܦܟ̇ܬ̣ܵܐ ܕܫܲܢ̄ܬܵܐ: ܘܲܦܩܲܕ݂ ܒܲܪ ܗܕ݂ܵܕ݂ ܠܐܲܕ݂ܘܿܡ: ܘܲܣܠܸܩ ܐܵܦܵܩ ܠܡܸܬ̣ܟܲܬܵܫܘܼ ܥܲܡ ܝܼܣܪܵܝܹܠ.

²⁷ܘܲܒ̣ܢܲܝ̈ ܝܼܣܪܵܝܹܠ ܐܸܬ̣ܡ̱ܢܝܼܘ: ܘܐܸܣܬ̇ܕܲܕܘ ܘܩܵܡ̣ܘ ܠܘܼܩܒܲܠܗܘܿܢ: ܐܲܝܟ݂ ܬܪܹܝܢ ܓܙܵܪ̈ܝܼܢ ܕܨܸܦܪ̈ܵܝܹܐ ܕܥܸܙܹ̈ܐ: ܘܐܲܕ݂ܘܿܡܵܝܹ̈ܐ ܡܠܵܐܘܼܗ̇ ܠܐܲܪܥܵܐ.

²⁸ܘܲܩܪܸܒ̣ ܢܒ̣ܝܼܵܐ ܕܐܲܠܵܗܵܐ ܠܘܵܬ̣ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܕܐܸܡܲܪܘ ܐܲܕ݂ܘܿܡܵܝܹ̈ܐ ܕܐܲܠܵܗܵܐ ܗ̄ܘ̣ ܕܛܘܼܪܹ̈ܐ ܡܲܪܝܵܐ: ܘܠܵܐ ܗ̄ܘ̣ܵܐ ܐܲܠܵܗܵܐ ܕܥܘܼܡܩܹ̈ܐ: ܐܲܫ̱ܠܡܝܼܘܗܝ ܠܗܵܢܵܐ ܟܠܹܗ ܚܲܝܠܵܐ ܪܲܒܵܐ ܒܐܝܼܕܲܝ̈ܟ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

²⁹ܘܲܫܪܵܘ ܗܵܠܹܝܢ ܠܘܼܩܒܲܠ ܗܵܠܹܝܢ ܫܲܒ̣ܥܵܐ ܝܵܘ̈ܡܝܼܢ. ܘܲܗܘ̤ܵܐ ܒܝܵܘܡܵܐ ܫܒ̣ܝܼܥܵܝܵܐ: ܘܐܲܩܪܸܒ̣ܘ ܩܪܵܒ̣ܵܐ. ܘܩܲܛܸܠܘ ܒܢܲܝ̈ ܝܼܣܪܵܝܹܠ ܡ̣ܢ ܐܲܕ݂ܘܿܡ: ܡܵܐܐ ܐܲܠܦ̈ܝܼܢ ܓܲܒ̣ܪ̈ܝܼܢ ܪܸ̈ܓ̣ܠܵܝܹܐ ܒܝܵܘܡܵܐ ܚܲܕ݂.

³⁰ܘܲܥܪܲܩ̣ܘ ܕܐܸܫܬ̇ܚܲܪܘ ܠܐܵܦܵܩ ܡܕ݂ܝܼܢ̄ܬܵܐ ܘܲܢܦܲܠ̣ ܫܘܼܪܵܐ ܥܲܠ ܥܸܣܪܝܼܢ ܘܫܲܒ̣ܥܵܐ ܐܲܠܦܝܼܢ ܓܲܒ̣ܪ̈ܝܼܢ ܕܐܸܫܬ̇ܚܲܪܘ. ܘܒܲܪ ܗܕ݂ܵܕ݂ ܥܪܲܩ̣: ܘܥܲܠ ܒܓ̣ܵܘ ܩܪܝܼܬ̣ܵܐ: ܬܵܘܵܢ ܒܓ̣ܵܘ ܬܵܘܵܢ.

³¹ܘܲܩܪܸܒ̣ܘ ܥܲܒ̣ܕܵܘ̈ܗܝ: ܘܐܵܡ̇ܪܝܼܢ ܠܹܗ: ܗܵܐ ܫܡܲܥ̄ܢ ܕܡܲܠ̈ܟܹ̇ܐ ܕܝܼܣܪܵܝܹܠ: ܡܲܠ̈ܟܹ̇ܐ ܐܸܢܘܿܢ ܛܵܒܹ̈ܐ. ܢܸܐܣܘܿܪ ܣܲܩܹ̈ܐ ܒܪܹ̈ܫܲܝܢ: ܘܚܲܒ̣̈ܠܹܐ ܒܚܲܨܲܝ̈ܢ. ܘܢܸܦܘܿܩ ܠܘܵܬ̣ ܡܲܠܟܵܐ ܕܝܼܣܪܵܝܹܠ: ܛܵܟ݂ ܢܲܚܸܐ ܢܲܦ̮ܫܲܢ.

³²ܘܐܸܣܲܪܘ ܣܲܩܹ̈ܐ ܒܪܹ̈ܫܲܝܗܘܿܢ: ܘܚܲܒ̣̈ܠܹܐ ܒܚܲܨܲܝ̈ܗܘܿܢ. ܘܐܸܬ̣ܵܘ ܠܘܵܬ̣ ܡܲܠܟܵܐ ܕܝܼܣܪܵܝܹܠ: ܘܐܸܡܲܪܘ ܠܹܗ: ܥܲܒ̣ܕܵܟ݂ ܒܲܪ ܗܕ݂ܵܕ݂ ܐܵܡܲܪ: ܬܸܚܹܐ ܢܲܦ̮ܫܝ. ܘܐܸܡܲܪ: ܥܕܲܟܹ̇ܝܠ ܩܲܝܵܡ ܗ̄ܘ̣ ܐܵܚܝ ܗ̄ܘ̣.

³³ܘܓܲܒ̣ܪܵܐ ܢܵܚܫܵܐ ܗ̄ܘ̣ܵܐ ܒܲܪ ܗܕ݂ܵܕ݂ ܘܓܲܒ̣ܪ̈ܝܼܢ ܢܲܚܸܫܘ: ܘܐܸܣܬܵܪܗܲܒ̣ܘ ܘܦܲܠܛܘܼܗ̄ܝ ܡܸܢܹܗ. ܘܐܸܡܲܪܘ ܐܲܚܘܼܟ݂ ܒܲܪ ܗܕ݂ܵܕ݂: ܘܐܸܡܲܪ ܙܸܠܘ ܕܘܼܒ̣ܪܘܼܗܝ ܘܲܢܦܲܩ ܠܘܵܬܹܗ ܒܲܪ ܗܕ݂ܵܕ݂: ܘܐܵܘܬ̇ܒܹܗ ܥܲܡܹܗ ܒܩܵܪܘܿܟ݂ܵܐ.

³⁴ܘܐܸܡܲܪ ܠܹܗ: ܩܘܼܪ̈ܝܵܐ ܕܲܢܣܲܒ̣ ܐܵܒ̣ܝ ܡ̣ܢ ܐܲܒ̣ܘܼܟ݂: ܐܹܦܲܢܸܐ ܠܵܟ݂. ܘܫܘܼܩܵܐ ܐܸܥܒܸܕ݂ ܠܵܟ݂ ܒܕܲܪܡܣܘܿܩ: ܐܲܝܟ݂ ܕܲܥܒܲܕ݂ ܐܵܒ̣ܝ ܒܫܵܡ̇ܪܹܝܢ: ܘܐܸܢܵܐ ܒܲܩܝܵܡܵܐ ܐܹܫܲܕܪܵܟ݂. ܘܐܲܩܝܼܡ ܠܹܗ ܩܝܵܡܵܐ ܘܫܲܕ̇ܪܹܗ.

³⁵ܘܓܲܒ̣ܪܵܐ ܚܲܕ݂ ܡ̣ܢ ܒ̈ܢܲܝ ܢܒ̣ܝܹ̈ܐ ܐܸܡܲܪ ܠܚܲܒ̣ܪܹܗ. ܒܦܸܬ̣ܓ̣ܵܡܹܗ ܕܡܵܪܝܵܐ ܡܚܝܼܢܝ. ܘܠܵܐ ܨܒ̣ܵܐ ܓܲܒ̣ܪܵܐ ܕܢܸܡܚܹܝܘܗܝ.

³⁶ܐܵܡܲܪ ܠܹܗ: ܥܲܠ ܕܠܵܐ ܫ̣ܡܲܥܬ̇ ܒܩܵܠܹܗ ܕܡܵܪܝܵܐ ܐܲܠܵܗܵܟ݂: ܗܵܐ ܐܵܙܹ̇ܠ ܐܲܢ̄ܬ̇ ܡ̣ܢ ܠܘܵܬ̣ܝ: ܘܩܵܛܹ̇ܠ ܠܵܟ݂ ܐܲܪܝܼܵܐ. ܘܐܸܙܲܠ ܡ̣ܢ ܠܘܵܬܹܗ: ܘܐܸܫܟ̇ܚܹܗ ܐܲܪܝܵܐ: ܘܩܲܛܠܹܗ.

³⁷ܘܐܲܫܟܲܚ ܓܲܒ̣ܪܵܐ ܐ̄ܚܪܹܢܵܐ: ܘܐܸܡܲܪ ܠܹܗ ܡܚܝܼܢܝ ܘܲܡܚܵܝܗܝ ܓܲܒ̣ܪܵܐ ܗܵܘ̇: ܘܨܲܠܦܹܗ.

³⁸ܘܐܸܙܲܠ ܢܒ̣ܝܼܵܐ ܘܩܵܡ ܩܕ݂ܵܡ ܡܲܠܟܵܐ ܥܲܠ ܝܲܕ݂ ܐܘܼܪܚܵܐ: ܘܚܲܦܝܼ ܒܩܸܛܡܵܐ ܐܲܦܵܘ̈ܗܝ.

³⁹ܘܗܵܐ ܡܲܠܟܵܐ ܥܵܒܲܪ. ܘܗ̤ܘ ܡܲܙܥܸܩ ܩܕ݂ܵܡ ܡܲܠܟܵܐ: ܘܐܵܡܲܪ: ܥܲܒ̣ܕܵܟ݂ ܢܦܲܩ̣ ܒܓ̣ܵܘ ܩܪܵܒ̣ܵܐ: ܘܗܵܐ ܓܲܒ̣ܪܵܐ ܣܛ̣ܵܐ ܘܐܲܝܬ̇ܝܼ ܠܝܼ ܓܲܒ̣ܪܵܐ. ܘܐܸܡܲܪ ܠܝܼ ܛܲܪܲܝܗܝ ܠܓܲܒ̣ܪܵܐ ܗܵܢܵܐ. ܘܐܸܢ ܡܸܛܥܵܐ ܢܸܛܥܹܐ: ܬܸܗܘܹܐ ܢܲܦ̮ܫܵܟ݂ ܚܠܵܦ ܢܲܦ̮ܫܹܗ: ܐܵܘ ܟܲܟ̇ܪܵܐ ܕܟܸܣܦܵܐ ܬܸܬ̣ܩܘܿܠ.

⁴⁰ܘܥܲܒ̣ܕܵܟ݂ ܥܲܕ݂ ܡܸܬ̣ܦܢܹܐ ܠܟ݂ܵܐ ܘܲܠܟ݂ܵܐ ܘܗ̤ܘ ܠܲܝܬܵܘܗܝ: ܐܵܡܲܪ ܠܹܗ ܡܲܠܟܵܐ ܕܝܼܣܪܵܝܹܠ: ܗܵܟܲܢܵܐ ܗ̄ܘ̣: ܕܝܼܢܵܟ݂ ܐܲܢ̄ܬ̇ ܦܣܲܩܬ̇.

⁴¹ܘܐܸܣܬܲܪܗܲܒ̣ ܘܐܲܥܒܲܪ ܩܸܛܡܵܐ ܡ̣ܢ ܐܲܦܵܘ̈ܗܝ. ܘܐܸܫܬܵܘܕ̇ܥܹܗ ܡܲܠܟܵܐ ܕܝܼܣܪܵܝܹܠ ܕܡ̣ܢ ܢܒ̣ܝܹ̈ܐ ܗ̄ܘ̣.

⁴²ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܕܫܲܕܲܪܬ̇ ܠܓܲܒ̣ܪܵܐ ܚܲܪܡܵܐ ܡ̣ܢ ܐܝܼܕ݂ܵܐ: ܬܸܗܘܹܐ ܢܲܦܫܵܟ݂ ܚܠܵܦ ܢܲܦ̮ܫܹܗ: ܘܥܲܡܵܟ݂ ܚܠܵܦ ܥܲܡܹܗ.

⁴³ܘܐܸܙܲܠ̣ ܡܲܠܟܵܐ ܕܝܼܣܪܵܝܹܠ ܠܒܲܝܬܹ̇ܗ: ܟܲܕ݂ ܟܲܪܝܵܐ ܠܹܗ ܘܲܙܥܝܼܦ ܘܥܲܠ̣ ܠܫܵܡ̇ܪܹܝܢ.