Read Aramaic Peshita 1 Kings 21 Bible Online

1 Kings 21 - Aramaic Peshita bible

1 Kings 21

¹ܘܲܗܘ̤ܵܐ ܡ̣ܢ ܒܵܬܲܪ ܦܸܬ̣ܓ̣ܵܡܹ̈ܐ ܗܵܠܹܝܢ: ܟܲܪܡܵܐ ܐܝܼܬ̣ ܗ̄ܘ̣ܵܐ ܠܢܵܒ̣ܘܿܬ̣ ܐܝܼܙܲܪ ܥܠܵܝܵܐ ܒܐܝܼܙܲܪܥܹܝܠ: ܥܲܠ ܓܹܢ̄ܒ̣ ܗܲܝܟ̇ܠܵܐ ܕܐܲܚܵܒ̣ ܡܲܠܟܵܐ ܕܫܵܡ̇ܪܹܝܢ.

²ܘܐܸܡܲܪ ܐܵܚܵܒ̣ ܠܢܵܒ̣ܘܿܬ̣: ܗܲܒ̣ܠܝܼ ܟܲܪܡܵܟ݂: ܘܢܸܗܘܹܐ ܠܝܼ ܠܓܲܢܲܬ̣ ܝܲܪܩܵܐ: ܡܸܛܠ ܕܗ̤ܘ ܩܲܪܝܼܒ̣ ܥܲܠ ܓܹܢ̄ܒ̣ ܒܲܝܬܝ. ܘܐܸܬܸ̇ܠ ܠܵܟ݂ ܟܲܪܡܵܐ ܚܠܵܦܵܘܗܝ ܕܛܵܒ̣ ܡܸܢܹܗ. ܐܵܘ ܐܸܢ ܫܲܦܝܼܪ ܒܥܲܝܢܲܝ̈ܟ: ܐܸܬܸ̇ܠ ܠܵܟ݂ ܟܸܣܦܵܐ ܕܡܵܘ̈ܗܝ.

³ܘܐܸܡܲܪ ܢܵܒ̣ܘܿܬ̣ ܠܐܵܚܵܒ̣: ܚܵܣ ܠܝܼ ܡ̣ܢ ܡܵܪܝܵܐ: ܕܐܸܬܸ̇ܠ ܠܵܟ݂ ܝܵܪܬ̇ܘܼܬ̣ܵܐ ܕܐܵܒ̣ܵܗܲܝ̈.

⁴ܘܐܸܙܲܠ ܐܵܚܵܒ̣ ܠܒܲܝܬܹ̇ܗ ܟܲܕ݂ ܟܲܪܝܵܐ ܠܹܗ ܘܲܙܥܝܼܦ: ܥܲܠ ܦܸܬ̣ܓ̣ܵܡܵܐ ܕܐܸܡܲܪ ܠܹܗ ܢܵܒ̣ܘܿܬ̣ ܐܝܼܙܲܪܥܠܵܝܵܐ. ܕܠܵܐ ܝܵܗܹ̇ܒ̣ ܐ̄ܢܵܐ ܠܵܟ݂ ܝܵܪܬ̇ܘܼܬ̣ܵܐ ܕܐܲܒ̣ܵܗܲܝ̈. ܘܲܫܟܸܒ̣ ܥܲܠ ܥܲܪܣܹܗ: ܘܐܲܦܢܝܼ ܐܲܦܵܘ̈ܗܝ: ܘܠܵܐ ܐܸܟܲܠ̣ ܠܲܚܡܵܐ.

⁵ܘܐܸܬܲܬ̤ ܠܘܵܬܹܗ ܐܝܼܙܒܸܠ ܐܲܢ̄ܬ̇ܬܹܗ: ܘܐܵܡ̇ܪܵܐ ܠܹܗ: ܡܵܢܵܘ ܟܲܪܝܵܐ ܠܵܗ̇ ܠܪܘܼܚܵܟ݂: ܘܠܵܐ ܨܵܒܹ̇ܐ ܐܲܢ̄ܬ̇ ܠܡܹܐܟܲܠ ܠܲܚܡܵܐ.

⁶ܐܵܡܲܪ ܠܵܗ̇: ܥܲܠ ܕܐܸܡ̇ܪܹܬ̣ ܠܢܵܒ̣ܘܿܬ̣ ܐܝܼܙܲܪܥܠܵܝܵܐ: ܗܲܒ̣ܠܝܼ ܟܲܪܡܵܟ݂ ܒܟܸܣܦܵܐ. ܘܐܸܢ ܨܵܒܹ̇ܐ ܐܲܢ̄ܬ̇: ܐܸܬܸ̇ܠ ܠܵܟ݂ ܟܲܪܡܵܐ ܚܠܵܘܗܝ ܕܛܵܒ̣ ܡܸܢܹܗ. ܘܐܸܡܲܪ ܠܝܼ ܠܵܐ ܝܵܗܹ̇ܒ̣ ܐ̄ܢܵܐ ܠܵܟ݂ ܟܲܪܡܝ.

⁷ܐܵܡܪܵܐ ܠܹܗ ܐܝܼܙܒܸܠ ܐܲܢ̄ܬ̇ܬܹܗ: ܐܲܢ̄ܬ̇ ܬܲܟ݂ܫܲܪ ܕܬܸܗܘܹܐ ܡܲܠܟܵܐ ܥܲܠ ܝܼܣܪܵܝܹܠ. ܩܘܼܡ ܐܲܟ݂ܘܿܠ ܠܲܚܡܵܐ: ܘܢܸܛܐܲܒ̣ ܠܵܟ݂. ܐܸܢܵܐ ܐܸܬܸ̇ܠ ܠܵܟ݂ ܟܲܪܡܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ.

⁸ܘܟܸܬ̣ܒܲܬ̤ ܐܸܓܲܪܬܵܐ ܒܲܫܡܹܗ ܕܐܵܚܵܒ̣: ܘܲܚܬܲܡܬ̣ܵܗ̇ ܒܥܲܙܩܬܹܗ. ܘܫܲܕ̇ܪܲܬ̤ ܐܸܓܲܪܬܵܐ ܠܣܵܒܹ̈ܐ ܘܲܠܚܹܐܪܹ̈ܐ ܕܝܵܬ̣ܒ̇ܝܼܢ ܒܲܩܪܝܼܬ̣ܵܐ ܥܲܡ ܢܵܒ̣ܘܿܬ̣.

⁹ܘܟܸܬ̣ܒܲܬ̤ ܒܐܸܓܲܪܬܵܐ: ܕܲܓ̣ܙܘܿܪܘ ܨܵܘܡܵܐ: ܘܐܵܘܬܸ̇ܒ̣ܘ ܠܢܵܒ̣ܘܿܬ̣ ܒܪܹܫ ܥܲܡܵܐ.

¹⁰ܘܐܲܝܬܵܘ ܬܪܹܝܢ ܓܲܒ̣ܪ̈ܝܼܢ ܒܢܲܝ̈ ܥܵܘܼܠܵܐ: ܘܐܵܘܬܸ̇ܒ̣ܘ ܠܩܘܼܒ̣ܠܹܗ. ܘܢܲܣ̱ܗܕ݂ܘܼܢ ܒܹܗ ܘܢܹܐܡܪܘܿܢ: ܕܨܲܚܝܼ ܢܵܒ̣ܘܿܬ̣ ܠܐܲܠܵܗܵܐ ܘܲܠܡܲܠܟܵܐ. ܘܐܲܦܩܘܼܗܝ ܘܪܘܼܓ̣ܡܘܼܗܝ. ܘܲܢܡܘܼܬ̣.

¹¹ܘܲܥܒܲܕ݂ܘ ܐ̄ܢܵܫܵܐ ܕܲܩܪܝܼܬܹܗ ܣܵܒܹ̈ܐ ܘܚܹܐܪܹ̈ܐ ܕܝܵܬ̣ܒ̇ܝܼܢ ܒܲܩܪܝܼܬ̣ܵܐ ܥܲܡ ܢܵܒ̣ܘܿܬ̣: ܐܲܝܟ݂ ܕܫܸܠܚܲܬ̤ ܠܗܘܿܢ ܐܝܼܙܒܸܠ: ܐܲܝܟ݂ ܕܲܟ݂ܬ̣ܝܼܒ̣ ܒܐܸܓܲܪܬܵܐ ܕܫܸܠܚܲܬ̤ ܠܗܘܿܢ.

¹²ܓܙܲܪܘ ܨܵܘܡܵܐ: ܘܐܵܘܬ̇ܒ̣ܘܼܗܝ ܠܢܵܒ̣ܘܿܬ̣ ܒܪܹܫ ܥܲܡܵܐ.

¹³ܘܐܲܝܬ̇ܝܼܘ ܬܪܹܝܢ ܓܲܒ̣ܪ̈ܝܼܢ ܒܢܲܝ̈ ܥܵܘܼܠܵܐ. ܘܐܵܘܬܸ̇ܒ̣ܘ ܠܩܘܼܒ̣ܠܹܗ. ܘܐܲܣܗܸܕ݂ܘ ܓܲܒ̣ܪܹ̈ܐ ܗܵܢܘܿܢ ܥܲܠ ܢܵܒ̣ܘܿܬ̣ ܘܐܸܡܲܪܘ: ܕܨܲܚܝܼ ܢܵܒ̣ܘܿܬ̣ ܠܐܲܠܵܗܵܐ ܘܲܠܡܲܠܟܵܐ. ܘܐܲܦܩܘܼܗܝ ܠܒܲܪ ܡ̣ܢ ܩܪܝܼܬ̣ܵܐ. ܘܪܲܓ̣ܡܘܼܗܝ ܒܟܹܐܦܹ̈ܐ: ܘܡܝܼܬ̣.

¹⁴ܘܲܫܠܲܚܘ ܠܐܝܼܙܒܸܠ ܕܐܸܬ̣ܪܓܸܡ ܢܵܒ̣ܘܿܬ̣ ܘܡܝܼܬ̣.

¹⁵ܘܟܲܕ݂ ܫܸܡܥܲܬ̤ ܐܝܼܙܒܸܠ ܕܡܝܼܬ̣ ܝܵܒ̣ܘܿܬ̣: ܐܸܡܪܲܬ̤ ܐܝܼܙܒܸܠ ܠܐܵܚܵܒ̣: ܩܘܼܡ ܝܼܪܲܬ̣ ܟܲܪܡܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ ܕܠܵܐ ܨܒ̣ܵܐ ܕܲܢܙܲܒ̇ܢܝܼܘܗܝ ܠܵܟ݂ ܒܟܸܣܦܵܐ. ܡܸܛܠ ܕܢܵܒ̣ܘܿܬ̣ ܡܝܼܬ̣ ܠܹܗ: ܘܠܵܐ ܗ̄ܘ̣ܵܐ ܚܲܝ.

¹⁶ܘܟܲܕ݂ ܫ̣ܡܲܥ ܐܵܚܵܒ̣ ܕܡܝܼܬ̣ ܢܵܒ̣ܘܿܬ̣: ܩܵܡ ܐܵܚܵܒ̣ ܠܡܸܚܲܬ̣ ܠܟܲܪܡܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ ܠܡܹܐܪܬܹ̇ܗ.

¹⁷ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܠܝܼܵܐ ܕܡ̣ܢ ܬܲܫܒ̇ܝܼ: ܠܡܹܐܡܲܪ.

¹⁸ܩܘܼܡ ܚܘܿܬ̣ ܠܐܘܼܪܥܹܗ ܕܐܵܚܵܒ̣ ܡܲܠܟܵܐ ܕܝܼܣܪܵܝܹܠ ܕܲܒ̣ܫܵܡܪܹܝܢ: ܗܵܐ ܒܟܲܪܡܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ ܕܲܢܚܸܬ̣ ܠܬܲܡܵܢ ܠܡܹܐܪܬܹ̇ܗ.

¹⁹ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܩܛܲܠܬ̇: ܘܗܵܐ ܝܼܕܬ̇ܬ. ܗܵܟܲܢܵܐ ܐܵܡܲܪ ܡܵܪܝܵܐ: ܒܕ݂ܘܼܟ̇ܬ̣ܵܐ ܕܠܲܥܘ ܟܲܠ̈ܒܹ̇ܐ ܕܡܹܗ ܕܢܵܒ̣ܘܿܬ̣: ܢܸܠܥܘܼܢ ܟܲܠ̈ܒܹ̇ܐ ܐܵܦ ܕܡܵܟ݂ ܕܝܼܠܵܟ݂.

²⁰ܐܵܡܲܪ ܠܹܗ ܐܵܚܵܒ̣ ܠܐܹܠܝܼܵܐ: ܐܸܫܟܲܚܬܵܢܝ ܒܥܸܠܕ̇ܒ̣ܵܒ̣ܝ ܐܵܡܲܪ ܠܹܗ ܐܸܫܟܲܚܬܵܟ݂: ܥܲܠ ܕܐܸܬ̣ܪܵܘܪܵܒ̣ܬ̇ ܠܡܸܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ.

²¹ܗܵܐ ܡܲܝܬܹ̇ܐ ܐ̄ܢܵܐ ܥܠܲܝܟ ܒܝܼܫܬܵܐ: ܘܐܹܒܲܥܲܪ ܒܵܬ̣ܪܵܟ݂: ܘܐܵܘܒܸ̇ܕ݂ ܠܐܵܚܵܒ̣ ܕܬ̣ܵܐܵܢ ܒܐܸܣܬ̣ܵܐ: ܘܕ݂ܵܐܣܲܪ ܘܫܵܪܹܐ ܒܝܼܣܪܵܝܹܠ.

²²ܘܐܸܥܒ̇ܕ݂ܝܼܘܗܝ ܠܒܲܝܬܵܟ݂ ܐܲܝܟ݂ ܒܹܝܬ̣ ܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܘܐܲܝܟ݂ ܒܹܝܬ̣ ܒܲܥܫܵܐ ܒܲܪ ܐܲܚܝܼܵܐ. ܥܲܠ ܪܘܼܓ̣ܙܵܐ ܕܐܲܪܓܸ̇ܙܬ̇ ܘܐܲܚܛܝܼܬ̇ ܠܝܼܣܪܵܝܹܠ.

²³ܘܐܵܦ ܠܐܝܼܙܒܸܠ ܐܵܡܲܪ ܡܵܪܝܵܐ: ܟܲܠ̈ܒܹ̇ܐ ܢܹܐܟ݂ܠܘܼܢܵܗ̇ ܠܐܝܼܙܒܸܠ ܒܝܵܪܬ̇ܘܼܬ̣ܵܐ ܕܐܝܼܙܲܪܥܹܝܠ.

²⁴ܕܲܢܡܘܼܬ̣ ܠܐܵܚܵܒ̣ ܒܲܩܪܝܼܬ̣ܵܐ: ܢܹܐܟ݂ܠܘܼܢ ܟܲܠ̈ܒܹ̇ܐ. ܘܕܲܢܡܘܼܬ̣ ܠܹܗ ܒܕܲܒ̣ܪܵܐ: ܬܹܐܟ݂ܘܿܠ ܦܵܪܲܚܬ̣ܵܐ ܕܲܫܡܲܝܵܐ.

²⁵ܘܒܲܠܚܘܿܕ݂ ܠܵܐ ܗܘ̤ܵܐ ܐܵܚܵܒ̣: ܕܐܸܬ̣ܚܲܫܲܒ̣ ܠܡܸܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܕܓܲܪܓܬܹܗ ܐܝܼܙܒܸܠ ܐܲܢ̄ܬ̇ܬܹܗ.

²⁶ܘܐܸܬ̣ܛܲܢܲܦ ܛܵܒ̣: ܘܐܸܙܲܠ ܒܵܬܲܪ ܦܬܲܟ݂ܪܹ̈ܐ: ܐܲܝܟ݂ ܕܲܥ̣ܒܲܕ݂ܘ ܐܵܡܘܿܪ̈ܵܝܹܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒ̈ܢܲܝ ܝܼܣܪܵܝܹܠ.

²⁷ܘܟܲܕ݂ ܫܡܲܥ ܐܵܚܵܒ̣ ܦܸܬ̣ܓ̣ܵܡܵܐ ܗܵܢܵܐ: ܨܲܪܝܼ ܠܒ̣ܘܼܫܵܘ̈ܗܝ: ܘܐܸܬ̣ܟܲܣܝܼ ܣܲܩܵܐ ܥܲܠ ܒܸܣܪܹܗ. ܘܨܵܡ: ܘܫܟ݂ܒ̣ ܒܣܲܩܵܐ: ܘܗܲܠܸܟ݂ ܚܸܦܝܵܝ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܠܝܼܵܐ ܕܡ̣ܢ ܬܲܫܒ̇ܝܼ ܠܡܹܐܡܲܪ.

²⁸ܚܙܲܝܬ̇ ܕܲܒ̣ܗܸܬ̣ ܐܵܚܵܒ̣ ܡ̣ܢ ܩܕ݂ܵܡܲܝ. ܚܠܵܦ ܕܲܒ̣ܗܸܬ̣ ܡ̣ܢ ܩܕ݂ܵܡܲܝ: ܠܵܐ ܐܲܝܬܹ̇ܐ ܒܝܼܫܬܵܐ ܒܝܵܘܡܵܘ̈ܗܝ. ܒܝܵܘ̈ܡܲܝ ܒܪܹܗ ܐܲܝܬܹ̇ܐ ܒܝܫܬܵܐ ܥܲܠ ܒܲܝܬܹ̇ܗ.