Read Aramaic Peshita 1 Kings 3 Bible Online

1 Kings 3 - Aramaic Peshita bible

1 Kings 3

¹ܘܡܲܠܟ̇ܘܼܬ̣ܵܐ ܬܸܩܢܲܬ̤ ܒܐܝܼܕܹܗ ܕܲܫܠܹܝܡܘܿܢ: ܘܲܗܘ̤ܵܐ ܫܠܹܝܡܘܿܢ ܚܲܬ̣ܢܵܐ ܠܦܸܪܥܘܿܢ ܡܲܠܟܵܐ ܕܡܸܨܪܹܝܢ ܘܲܢܣܲܒ̣ ܠܒܲܪܬܹܗ ܕܦܲܪܥܘܿܢ: ܘܐܲܥ̣ܠܵܗ̇ ܠܲܩܪܝܼܬܹܗ ܕܕ݂ܵܘܝܼܕ݂: ܥܲܕ݂ܠܵܐ ܢܫܲܠܸܡ ܠܡܸܒ̣ܢܵܐ ܒܲܝܬܹ̇ܗ: ܘܒܲܝܬܹ̇ܗ ܕܡܵܪܝܵܐ: ܘܫܘܼܪܵܐ ܕܐܘܿܪܸܫܠܸܡ ܟܲܕ݂ ܚܵܕ݂ܪܵܐ.

²ܒܲܠܚܘܿܕ݂ ܥܲܡܵܐ ܡܕܲܒ̇ܚܝܼܢ ܗ̄ܘ̣ܵܘ ܥܲܠ ܥܠܵـ̈ـܘܵܬ̣ܵܐ: ܡܸܛܠ ܕܲܥܕܲܟܸ̇ܝܠ ܠܵܐ ܐܸܬ̣ܒ̇ܢܝܼ ܗ̄ܘ̣ܵܐ ܒܲܝܬܵܐ ܠܲܫܡܹܗ ܕܡܵܪܝܵܐ: ܥܕܲܡܵܐ ܠܝܵܘ̈ܡܵܬ̣ܵܐ ܗܵܢܘܿܢ.

³ܘܲܪܚܸܡ ܫܠܹܝܡܘܿܢ ܠܡܵܪܝܵܐ: ܠܲܡܗܲܠܵܟ݂ܘܼ ܒܦܘܼܩܕܵܢܵܘ̈ܗܝ ܕܕ݂ܵܘܝܼܕ݂ ܐܲܒ̣ܘܼܗܝ: ܒܲܠܚܘܿܕ݂ ܥܲܠ ܥܠܵـ̈ـܘܵܬ̣ܵܐ ܡܕܲܒܲܚ ܗ̄ܘ̣ܵܐ: ܘܣܵܐܹ̇ܡ ܒܸܣܡܹ̈ܐ.

⁴ܘܐܸܙܲܠ̣ ܡܲܠܟܵܐ ܠܓܸܒ̣ܥܘܿܢ ܠܲܡܕܲܒܵܚܘܼ ܬܲܡܵܢ: ܡܸܛܠ ܕܗ̤ܝ ܗ̄ܝ̣ ܥܠܵܬ̣ܵܐ ܪܲܒ̇ܬ̣ܵܐ ܐܵܠܹܦ ܥ̈ܠܵܘܵܢ ܡܕܲܒܲܚ ܗ̄ܘ̣ܵܐ ܫܠܹܝܡܘܿܢ ܥܲܠ ܡܲܕ݂ܒ̇ܚܵܐ ܗܵܘ̇ ܕܲܒ̣ܓ̣ܒ̣ܥܘܿܢ.

⁵ܗܵܝܕܹ̇ܝܢ ܐܸܬ̣ܓ̇ܠܝܼ ܡܵܪܝܵܐ ܥܲܠ ܫܠܹܝܡܘܿܢ ܒܚܸܙܘܵܐ ܕܠܸܠܝܵܐ: ܘܐܸܡܲܪ ܠܹܗ ܐܲܠܵܗܵܐ: ܫܐܲܠ ܡܵܢܵܐ ܐܸܬܸ̇ܠ ܠܵܟ݂.

⁶ܘܐܸܡܲܪ ܫܠܹܝܡܘܿܢ: ܐܲܢ̄ܬ̇ ܥ̣ܒܲܕ̇ܬ̇ ܥܲܡ ܥܲܒ̣ܕܵܟ݂ ܕܵܘܝܼܕ݂ ܐܵܒ̣ܝ ܛܲܝܒ̇ܘܼܬ̣ܵܐ ܪܲܒ̇ܬ̣ܵܐ: ܐܲܝܟ݂ ܕܗܲܠܸܟ݂ ܩܕ݂ܵܡܲܝܟ ܒܩܘܼܫܬܵܐ ܘܲܒ̣ܗܲܝܡܵܢܘܼܬ̣ܵܐ: ܘܒܲܬ̣ܪܝܼܨܘܼܬ̣ܵܐ ܕܠܸܒܵܐ: ܗܲܠܸܟ݂ ܩܕ݂ܵܡܲܝܟ ܘܲܢܛܲܪܬ̇ ܠܹܗ ܗܵܕܹܐ ܛܲܝܒ̇ܘܼܬ̣ܵܐ ܪܲܒ̇ܬ̣ܵܐ: ܘܝܲܗ̄ܒ̣ܬ̇ ܠܹܗ ܒܪܵܐ. ܕܢܸܬܸ̇ܒ̣ ܥܲܠ ܟܘܼܪܣܝܹܗ ܐܲܝܟ݂ ܕܝܵܘܡܵܢܵܐ.

⁷ܘܗܵܫܵܐ ܡܵܪܝܵܐ ܐܲܠܵܗܵܐ: ܐܲܢ̄ܬ̇ ܐܲܡܠܸܟ݂ܬ̇ ܠܥܲܒ̣ܕܵܟ݂ ܚܠܵܦ ܕܵܘܝܼܕ݂ ܐܵܒ̣ܝ ܘܐܸܢܵܐ ܛܲܠܝܵܐ ܐ̄ܢܵܐ ܙܥܘܿܪܵܐ ܘܠܵܐ ܝܵܕܲܥ ܐ̄ܢܵܐ ܠܡܸܦܲܩ ܘܲܠܡܸܥܲܠ: ܒܓ̣ܵܘ ܥܲܡܵܟ݂ ܕܲܓ̣ܒܲܝܬ̇.

⁸ܥܲܡܵܐ ܣܲܓ̇ܝܼܵܐܐ ܕܠܵܐ ܡܸܬ̣ܡ̱ܢܸܐ: ܘܠܵܐ ܡܸܬ̣ܚܫܸܒ̣ ܡ̣ܢ ܣܘܿܓܹܐܗ.

⁹ܗܲܒ̣ ܠܥܲܒ̣ܕܵܟ݂ ܠܸܒܵܐ ܫܵܡܘܿܥܵܐ ܠܲܡܕ݂ܵܢ ܠܥܲܡܵܟ݂: ܘܲܠܡܸܣܬܲܟܵܠܘܼ ܒܹܝܬ̣ ܛܵܒ̣ܬ̣ܵܐ ܠܒ̣ܝܼܫܬܵܐ. ܡܲܢܘܼ ܓܹܝܪ ܡܸܫܟܲܚ ܠܲܡܕ݂ܵܢܹܗ ܠܥܲܡܵܟ݂ ܗܵܢܵܐ ܪܲܒܵܐ.

¹⁰ܘܲܫܦܲܪ ܦܸܬ̣ܓ̣ܵܡܵܐ ܗܵܢܵܐ ܩܕ݂ܵܡ ܡܵܪܝܵܐ: ܟܲܕ݂ ܫܐܸܠ̣ ܫܠܹܝܡܘܿܢ ܦܸܬ̣ܓ̣ܵܡܵܐ ܗܵܢܵܐ.

¹¹ܘܐܸܡܲܪ ܡܵܪܝܵܐ ܠܲܫܠܹܝܡܘܿܢ: ܚܠܵܦ ܕܲܫܐܸܠܬ̇ ܦܸܬ̣ܓ̣ܵܡܵܐ ܗܵܢܵܐ: ܘܠܵܐ ܫܲܐܸܠܬ̇ ܠܵܟ݂ ܥܘܼܬ̣ܪܵܐ: ܘܠܵܐ ܫܐܸܠܬ̇ ܠܵܟ݂ ܢܲܦ̮ـ̈ـܫܵܬ̣ܵܐ ܕܲܒ̣ܥܸܠܕ̇ܒ̣ܵܒܲܝ̈ܟ: ܘܠܵܐ ܫܐܸܠܬ̇ ܠܵܟ݂ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ: ܘܲܫܐܸܠܬ̇ ܠܵܟ݂ ܚܸܟ݂ܡ̱ܬ̣ܵܐ ܠܡܸܫܡܲܥ ܕܝܼܢܵܐ.

¹²ܗܵܐ ܥܒܲܕܹ̇ܬ̣ ܠܵܟ݂ ܐܲܝܟ݂ ܦܸܬ̣ܓ̣ܵܡܵܟ݂: ܗܵܐ ܝܼܗ̄ܒܹ̇ܬ̣ ܠܵܟ݂ ܠܸܒܵܐ ܚܲܟ̇ܝܼܡܵܐ ܘܣܲܟ̇ܘܼܠܬ̣ܵܢܵܐ: ܕܐܲܟ݂ܘܵܬ̣ܵܟ݂ ܠܵܐ ܗܘ̤ܵܐ ܩܕ݂ܵܡܲܝܟ: ܘܒ̣ܵܬ̣ܪܵܟ݂ ܠܵܐ ܢܩܘܼܡ ܐܲܟ݂ܘܵܬ̣ܵܟ݂.

¹³ܘܐܵܦ ܡܸܕܸ̇ܡ ܕܠܵܐ ܫܐܸܠܬ̣ ܝܼܗ̄ܒܹ̇ܬ̣ ܠܵܟ݂: ܐܵܦ ܥܘܼܬ̣ܪܵܐ: ܐܵܦ ܐܝܼܩܵܪܵܐ. ܕܠܵܐ ܗܘ̤ܵܐ ܐܲܟ݂ܘܵܬ̣ܵܟ݂: ܐ̄ܢܵܫ ܒܡܲܠ̈ܟܹ̇ܐ: ܟܠܗܘܿܢ ܝܵܘܡܲܝ̈ܟ.

¹⁴ܘܐܸܢ ܬܗܲܠܸܟ݂ ܒܐܘܼܪ̈ܚܵܬ̣ܝ ܠܡܸܛܲܪ ܩܝܵܡܲܝ̈ ܘܦܘܼܩ̈ܕܵܢܲܝ ܐܲܝܟ݂ ܕܗܲܠܸܟ݂ ܕܵܘܝܼܕ݂ ܐܲܒ̣ܘܼܟ݂: ܐܲܣܓܹ̇ܐ ܝܵܘ̈ܡܲܝܟ.

¹⁵ܘܐܸܬ̇ܬ̇ܥܝܼܪ ܫܠܹܝܡܘܿܢ: ܘܚܵܙܹ̇ܐ ܚܸܠܡܵܐ ܗ̄ܘ̣ ܘܐܸܬ̣ܵܐ ܫܠܹܝܡܘܿܢ ܠܐܘܿܪܸܫܠܸܡ: ܘܩܵܡ̣ ܩܕ݂ܵܡ ܐܵܪܘܿܢܵܐ ܕܲܩܝܵܡܹܗ ܕܡܵܪܝܵܐ: ܘܐܲܣܸܩ̣ ܥܠܵـ̈ـܘܵܬ̣ܵܐ: ܘܲܥܒܲܕ݂ ܫܲܠܡܹ̈ܐ. ܘܲܥܒܲܕ݂ ܡܲܫܬ̇ܝܵܐ ܠܟ݂ܠܗܘܿܢ ܥܲܒ̣ܕܵܘ̈ܗܝ.

¹⁶ܗܵܝܕܹ̇ܝܢ ܐܸܬܲܝ̈ ܬܲܪܬܹ̇ܝܢ ܢܸܫ̈ܝܼܢ ܙܵܢ̈ܝܵܬ̣ܵܐ ܠܲܡܕ݂ܵܢ ܩܕ݂ܵܡ ܡܲܠܟܵܐ ܫܠܹܝܡܘܿܢ.

¹⁷ܘܐܸܡܪܲܬ̤ ܐܲܢ̄ܬ̇ܬ̣ܵܐ ܚܕ݂ܵܐ ܡܸܢܗܹܝܢ: ܒܵܥ̇ܝܵܐ ܐ̄ܢܵܐ ܡܸܢܵܟ݂ ܡܵܪܝ: ܐܸܢܵܐ ܘܗܵܕܹܐ ܐܲܢ̄ܬ̇ܬ̣ܵܐ ܥܵܡ̇ܪܵܢ ܗ̄ܘܲܝܢ ܒܒܲܝܬܵܐ ܚܲܕ݂: ܘܝܼܠܕܹ̇ܬ̣ ܥܲܡܵܗ̇ ܒܒܲܝܬܵܐ.

¹⁸ܘܡ̣ܢ ܒܵܬܲܪ ܬܠܵܬ̣ܵܐ ܝܵܘ̈ܡܝܼܢ ܟܲܕ݂ ܝܼܠܕܹ̇ܬ̣: ܝܸܠܕܲܬ̤ ܐܵܦ ܗܵܕܹܐ ܐܲܢ̄ܬ̇ܬ̣ܵܐ ܘܲܚܢܲܢ ܚܢܲܢ ܐܲܟ݂ܚ̄ܕ݂ܵܐ: ܘܠܲܝܬ̇ ܐ̄ܢܵܫ ܢܘܼܟ݂ܪܵܝܵܐ ܥܲܡܲܢ: ܐܸܠܵܐ ܐܸܢ ܬܲܪܬܹ̇ܝܢ ܚܢܲܢ ܒܒܲܝܬܵܐ.

¹⁹ܘܡܝܼܬ̣ ܒܪܵܗ̇ ܕܗܵܕܹܐ ܐܲܢ̄ܬ̇ܬ̣ܵܐ ܒܠܸܠܝܵܐ: ܕܕܸܡܥܲܬ̤ ܥܠܵܘܗܝ.

²⁰ܘܩܵܡܲܬ̤ ܒܦܠܓܹ̇ܗ ܕܠܸܠܝܵܐ: ܘܢܸܣܒܲܬ̤ ܒܹܪܝ ܡ̣ܢ ܠܘܵܬ̣ܝ: ܘܐܲܡܬ̣ܵܟ݂ ܕܵܡ̇ܟܵܐ ܗ̄ܘ̣ܵܬ̣. ܘܐܲܪܡܝܵܬܹܗ ܒܥܘܼܒܵܗ̇. ܘܠܲܒ̣ܪܵܗ̇ ܡܝܼܬ̣ܵܐ ܐܲܪܡܝܲܬ̣ ܒܥܘܼܒ̇ܝ.

²¹ܘܩܵܡܹ̇ܬ̣ ܒܨܲܦܪܵܐ ܕܐܲܝܢܸܩ ܒܹܪܝ: ܘܚܵܙܝܵܐ ܐ̄ܢܵܐ ܡܝܼܬ̣ܵܐ ܗ̄ܘ̣. ܘܐܸܬ̣ܒܲܩܝܼܬ̣ ܒܹܗ ܒܨܲܦܪܵܐ: ܘܠܵܐ ܗܘ̤ܵܐ ܗܵܘ̇ ܒܹܪܝ ܕܝܸܠܕܹ̇ܬ̣.

²²ܘܐܸܡܪܲܬ̤ ܐܲܢ̄ܬ̇ܬ̣ܵܐ ܗܵܝ̇ ܐ̄ܚܪܹܬ̣ܵܐ: ܠܵܐ ܗ̄ܘ̣ܵܐ ܗܵܟܲܢܵܐ: ܒܹܪܝ ܗ̄ܘ̣ ܚܲܝܵܐ: ܘܲܒ̣ܪܹܟ݂ܝ ܗ̄ܘ̣ ܡܝܼܬ̣ܵܐ.

²³ܘܗܵܝ̇ ܐܵܡܪܵܐ: ܠܵܐ ܗ̄ܘ̣ܵܐ ܗܵܟܲܢܵܐ: ܒܪܹܟ݂ܝ ܗ̄ܘ̣ ܡܝܼܬ̣ܵܐ: ܘܒܹܪܝ ܗ̄ܘ̣ ܚܲܝܵܐ. ܘܢܵܨ̈ܝܵܢ ܗ̄ܘܲܝ̈ ܩܕ݂ܵܡ ܡܲܠܟܵܐ.

²⁴ܘܐܸܡܲܪ ܡܲܠܟܵܐ: ܐܲܝܬܵܘ ܠܝܼ ܣܲܝܦܵܐ ܘܐܲܝܬ̇ܝܼܘ ܣܲܝܦܵܐ ܩܕ݂ܵܡ ܡܲܠܟܵܐ.

²⁵ܘܐܸܡܲܪ ܡܲܠܟܵܐ: ܦܘܼܣܩܘܼܗܝ ܠܗܵܘ̇ ܛܲܠܝܵܐ ܕܚܲܝ ܠܲܬ̣ܪܹܝܢ: ܘܗܲܒ̣ܘ ܦܸܠܓܹܗ ܠܲܚܕ݂ܵܐ: ܘܦܸܠܓܹ̇ܗ ܠܲܚܕ݂ܵܐ.

²⁶ܘܐܸܡܪܲܬ̤ ܗܵܝ̇ ܐܲܢ̄ܬ̇ܬ̣ܵܐ ܕܲܒ̣ܪܵܗ̇ ܚܲܝ ܠܡܲܠܟܵܐ: ܡܸܛܠ ܕܐܸܬ̣ܗ̱ܦܸܟ݂ܘ ܪ̈ܲܚܡܹܝܗ̇ ܥܲܠ ܒܪܵܐ. ܒܵܥ̇ܝܵܐ ܐ̄ܢܵܐ ܡܸܢܵܟ݂ ܡܵܪܝ: ܗܲܒ̣ܘܗܝ ܠܵܗ̇ ܠܛܲܠܝܵܐ ܟܲܕ݂ ܚܲܝ: ܡܸܩܛܲܠ ܠܵܐ ܬܸܩܛܠܘܼܢܹܗ ܘܗܵܝ̇ ܐܵܡܪܵܐ: ܠܵܐ ܠܝܼ ܐܵܦܠܵܐ ܠܹܟ݂ܝ ܢܸܗܘܹܐ: ܦܘܼܣܩܘܼܗܝ.

²⁷ܥܢ̣ܵܐ ܡܲܠܟܵܐ ܘܐܸܡܲܪ: ܗܲܒ̣ܘܼܗܝ ܠܵܗ̇ ܠܛܲܠܝܵܐ ܟܲܕ݂ ܚܲܝ: ܘܡܸܩܛܲܠ ܠܵܐ ܬܸܩܛܠܘܼܢܹܗ. ܗܵܝ̇ ܗ̄ܝ̣ ܐܸܡܹܗ.

²⁸ܘܲܫܡܲܥܘ ܟܠܹܗ ܝܼܣܪܵܝܹܠ ܕܝܼܢܵܐ ܕܵܕ݂ܵܢ ܡܲܠܟܵܐ: ܘܲܕ݂ܚܸܠܘ ܡ̣ܢ ܩܕ݂ܵܡ ܡܲܠܟܵܐ. ܡܸܛܠ ܕܲܚܙܵܘ ܕܚܸܟ݂ܡ̱ܬ̣ܵܐ ܕܐܲܠܵܗܵܐ ܐܝܼܬ̣ ܒܹܗ ܠܡܸܥܒܲܕ݂ ܕܝܼܢܵܐ.