Read Aramaic Peshita 1 Kings 4 Bible Online

1 Kings 4 - Aramaic Peshita bible

1 Kings 4

¹ܘܲܗܘ̤ܵܐ ܫܠܹܝܡܘܿܢ ܡܲܠܟܵܐ ܥܲܠ ܟܠܹܗ ܝܼܣܪܵܝܹܠ.

²ܘܗܵܠܹܝܢ ܪܵܘ̱ܪ̈ܒ̣ܵܢܹܐ ܕܝܼܠܹܗ: ܥܲܙܲܪܝܵܐ ܒܲܪ ܨܵܕ݂ܘܿܩ ܟܵܗܢܵܐ.

³ܐܹܠܝܼܚܪܲܦ ܘܐܲܚܝܼܵܐ ܒ̈ܢܲܝ ܫܝܼܫܵܐ ܣܵܦܪܹ̈ܐ: ܘܝܘܿܫܵܦܵܛ ܒܲܪ ܐܲܚܝܼܠܘܿܕ݂ ܡܥܲܗܕ݂ܵܢܵܐ.

⁴ܘܲܒ̣ܢܵܝܵܐ ܒܲܪ ܝܘܿܝܵܕ݂ܵܥ ܥܲܠ ܚܲܝܠܵܐ: ܘܨܵܕ݂ܘܿܩ ܘܐܲܒ̣ܝܼܬܲܪ ܟܵܗ̈ܢܹܐ.

⁵ܘܥܲܙܲܪܝܵܐ ܒܲܪ ܢܵܬ̣ܵܢ ܥܲܠ ܩܲܝܘܼܡܹ̈ܐ: ܘܙܵܒ̣ܘܼܪ ܒܲܪ ܢܵܬ̣ܵܢ ܟܵܗܢܵܐ ܪܲܚܡܵܐ ܕܡܲܠܟܵܐ.

⁶ܘܐܲܒ̣ܝܼܥܫܵܪ ܪܲܒ̇ ܒܲܝܬܵܐ: ܘܐܲܕ݂ܘܿܢܝܼܪܵܡ ܒܲܪ ܥܲܒ̣ܕܵܐ ܥܲܠ ܡܲܕ̇ܐܬ̣ܵܐ.

⁷ܘܠܲܫܠܹܝܡܘܿܢ ܬܪܸܥܣܲܪ ܩܲܝܘܼ̈ܡܹܐ ܗܵܠܹܝܢ ܥܲܠ ܟܠܹܗ ܝܼܣܪܵܝܹܠ ܘܲܡܬܲܪܣܹܝܢ ܠܡܲܠܟܵܐ ܘܲܠܒܲܝܬܹ̇ܗ ܘܲܠܚܲܝܠܵܐ. ܝܲܪܚܵܐ ܒܫܲܢ̄ܬܵܐ ܐܵܚܹܕ݂ ܥܲܠ ܚܲܕ݂ ܠܲܡܬܲܪܣܵܝܘܼ.

⁸ܘܲܗܵܠܹܝܢ ܫܡܵܗܲܝ̈ܗܘܿܢ: ܒܲܪ ܚܘܿܪ ܒܛܘܼܪܵܐ ܕܐܲܦܪܹܝܡ.

⁹ܒܲܪ ܕܩܲܪ ܒܡܲܩܲܨ ܘܲܒ̣ܫܲܥ̱ܠܒ̣ܝܼܡ: ܘܲܒ̣ܒܹܝܬ̣ ܫܡܸܫ: ܘܒ̣ܐܝܼܠܘܿܢ ܕܒܹܝܬ̣ ܚܲܢܵܢ.

¹⁰ܒܲܪ ܚܲܣܲܕ݂ ܒܪܲܒ̇ܘܼܬ̣: ܕܝܼܠܹܗ ܣܵܟ݂ܘܼܬ̣ ܘܟ݂ܠܵܗ̇ ܐܲܪܥܵܐ ܕܚܵܦܵܪ.

¹¹ܒܲܪ ܐܲܒ̣ܝܼܥܵܕ݂ܵܒ̣ ܒܲܢܦܬ̇ܕ̇ܘܿܪ: ܛܵܦܲܬ̣ ܒܵܪܬ̣ ܫܠܹܝܡܘܿܢ ܗܘ̤ܵܬ̣ ܠܹܗ ܐܲܢ̄ܬ̇ܬ̣ܵܐ.

¹²ܒܲܥܢܵܐ ܒܲܪ ܐܲܚܠܘܿܕ݂ ܒܬܲܥܢܵܟ݂ ܘܲܒ̣ܡܲܓܕܘܿ: ܘܲܒ̣ܟ݂ܠ ܒܹܝܬ̣ ܝܵܫܵܢ ܕܥܲܠ ܓܹܢ̄ܒ̣ ܨܲܪܬܵܢ: ܡ̣ܢ ܬܚܹܝܬ̣ ܠܐܝܼܙܲܪܥܹܝܠ: ܡ̣ܢ ܒܹܝܬ̣ ܝܵܫܵܢ ܘܲܥܕܲܡܵܐ ܠܐܲܒܸܠ ܡܚܘܿܠܵܐ: ܘܲܥܕܲܡܵܐ ܠܥܸܒ̣ܪܵܐ ܕܲܢܩܸܡܥܲܡ.

¹³ܒܲܪ ܓܲܒܲܪ ܒܪܵܡܲܬ̣ ܓܸܠܥܵܕ݂: ܕܝܼܠܹܗ ܚܒܸܠ ܝܵܐܝܼܪ ܒܲܪ ܡܢܲܫܹܐ: ܕܝܼܠܹܗ ܚܒܸܠ ܐܲܪܓ̇ܘܿܒ̣ ܕܲܒ̣ܒܲܝܫܵܢ ܫܬ̇ܝܼܢ ܩܘܼܪ̈ܝܵܐ ܪܵܘ̱ܪ̈ܒ̣ܵܬ̣ܵܐ: ܕܐܝܼܬ̣ ܠܗܹܝܢ ܫܘܼܪܹ̈ܐ ܘܣܘܼܟ̇ܪܹ̈ܐ ܘܬܲܪ̈ܥܹܐ ܕܲܢܚܵܫܵܐ.

¹⁴ܐܲܚܝܼܢܵܕ݂ܵܒ̣ ܒܲܪ ܓܲܕ̇ܘܼ ܒܡܸ̇ܚܢܝܼܡ.

¹⁵ܐܲܚܝܼܡܥܨ ܒܢܲܦ̮ܬܵܠܝܼ: ܐܵܦ ܗ̤ܘ ܢܣܲܒ̣ ܠܒܸܣܡܲܬ̣ ܒܲܪܬܹܗ ܕܲܫܠܹܝܡܘܿܢ ܐܲܢ̄ܬ̇ܬ̣ܵܐ.

¹⁶ܒܲܥܢܵܐ ܒܲܪ ܚܘܿܫܝܼ ܒܐܵܫܹܝܪ ܘܲܒ̣ܥܵܠܘܼܬ̣.

¹⁷ܝܘܿܫܵܦܵܛ ܒܲܪ ܦܵܪܘܿܚ ܒܐܝܼܣܵܟ݂ܵܪ.

¹⁸ܫܲܡܥܝܼ ܒܲܪ ܐܲܠܵܐ ܒܒܸܢܝܵܡܹܝܢ.

¹⁹ܓܲܒܲܪ ܒܲܪ ܐܘܿܪܝܼ ܒܐܲܪܥܵܐ ܕܓܸܠܥܵܕ݂: ܐܲܪܥܵܐ ܕܣܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ: ܘܥܘܿܓ̣ ܡܲܠܟܵܐ ܕܒܲܝܫܵܢ: ܘܩܲܝܘܼܡܵܐ ܚܲܕ݂ ܕܒܲܐܪܥܵܐ.

²⁰ܘܲܝܗܘܼܕ݂ܐ ܘܝܼܣܪܵܝܹܠ: ܣܲܓ̇ܝܼܐܝܼܢ ܐܲܝܟ݂ ܚܵܠܵܐ ܕܥܲܠ ܣܦܲܬ̣ ܝܲܡܵܐ: ܣܘܿܓ̣ܵܐܐ: ܐܵܟ݂ܠܝܼܢ ܘܫܵܬܹܝܢ ܘܚܵܕ݂ܝܼܢ.

²¹ܘܲܫܠܹܝܡܘܿܢ ܫܲܠܝܼܛ ܗ̄ܘ̣̱ܵܐ ܒܟ݂ܠܗܹܝܢ ܡܲܠܟ̇ـ̈ـܘܵܬ̣ܵܐ: ܡ̣ܢ ܢܲܗܪܵܐ ܕܐܲܪܥܵܐ ܕܲܦܠܸܫ̈ܬܵܝܹܐ: ܘܲܥܕܲܡܵܐ ܠܲܬ̣ܚܘܼܡܵܐ ܕܡܸܨܪܹܝܢ ܘܲܡܩܲܪܒ̣ܝܼܢ ܩܘܼܪ̈ܒܵܢܹܐ: ܘܦܵܠܚܝܼܢ ܠܡܲܠܟܵܐ ܫܠܹܝܡܘܿܢ ܟܠ ܝܵܘ̈ܡܲܝ ܚܲܝܵܘ̈ܗܝ.

²²ܘܲܗܘ̤ܵܐ ܠܲܚܡܹܗ ܕܲܫܠܹܝܡܘܿܢ ܒܝܵܘܡܵܐ ܚܲܕ݂ ܬܠܵܬ̣ܝܼܢ ܟܘܿܪ̈ܝܼܢ ܣܡܝܼܕ݂ܵܐ: ܘܸܫܬ̇ܝܼܢ ܟܘܿܪ̈ܝܼܢ ܩܲܡܚܵܐ.

²³ܘܥܸܣܪܵܐ ܬܵܘܪ̈ܝܼܢ ܕܦܸܛܡܵܐ: ܘܥܸܣܪܝܼܢ ܬܵܘܪ̈ܝܼܢ ܕܪܸܥܝܵܐ: ܘܲܡܵܐܐ ܥܵـ̈ـܢܵܐ: ܣܛܲܪ ܡ̣ܢ ܐܲܝ̈ܠܹܐ: ܘܲܛܒܲـ̈ـܝܵܐ: ܘܝܲܚܡܘܼܪܹ̈ܐ: ܘܥܵܘܦܵܐ ܡܦܲܛܡܵܐ.

²⁴ܡܸܛܠ ܕܗ̤ܘ ܫܲܠܝܼܛ ܗ̄ܘ̣ܵܐ ܒܟ݂ܠ ܥܒ̣ܵܪ ܢܲܗܪܵܐ: ܡ̣ܢ ܬܲܚܦܝܼܣ ܘܲܥܕܲܡܵܐ ܠܥܵܐܙܵܐ: ܘܲܒ̣ܟ݂ܠܗܘܿܢ ܡܲܠ̈ܟܹ̇ܐ ܕܒܲܥܒ̣ܵܪ ܢܲܗܪܵܐ ܘܲܫܠܵܡܵܐ ܗܘ̤ܵܐ ܠܹܗ ܡ̣ܢ ܟܠܗܘܿܢ ܣܸܛܪ̈ܵܘܗܝ ܘܡ̣ܢ ܟܠܗܘܿܢ ܚܕ݂ܵܪ̈ܵܘܗܝ.

²⁵ܘܝܼܬܸܒ̣ ܝܼܗܘܼܕ݂ܵܐ ܘܝܼܣܪܵܝܹܠ ܒܫܸܠܝܵܐ: ܐ̄ܢܵܫ ܬܚܹܝܬ̣ ܓܘܼܦܢܵܘ̈ܗܝ: ܘܲܬ̣ܚܹܝܬ̣ ܬܹܐܢܵܘ̈ܗܝ: ܡ̣ܢ ܕܵܢ ܘܲܥܕܲܡܵܐ ܠܒܲܪ ܫܒܲܥ: ܟܠܗܘܿܢ ܝܵܘ̈ܡܵܬܹܗ ܕܲܫܠܹܝܡܘܿܢ.

²⁶ܘܲܗܘ̤ܵܘ ܠܲܫܠܹܝܡܘܿܢ: ܐܲܪܒ̇ܥܝܼܢ ܐܲܠܦ̈ܝܼܢ ܐܘܿܪ̈ܵܘܵܢ ܕܪ̈ܲܟ݂ܫܵܐ ܠܲܪܟ݂ܘܿܒܹܗ: ܘܲܬ̣ܪܸܥܣܲܪ ܐܲܠܦ̈ܝܼܢ ܦܲܪ̈ܵܫܝܼܢ.

²⁷ܘܲܡܬܲܪܣܹܝܢ ܩܲܝܘܼܡܹ̈ܐ ܗܵܠܹܝܢ ܠܡܲܠܟܵܐ ܫܠܹܝܡܘܿܢ. ܘܲܠܟ݂ܠ ܕܩܵܪܸܒ̣ ܠܦܵܬ̣ܘܿܪܹܗ ܕܡܲܠܟܵܐ ܫܠܹܝܡܘܿܢ: ܓܒܲܪ ܒܝܲܪܚܹܗ: ܘܠܵܐ ܡܒܲܨܪܝܼܢ ܡܸܕܸ̇ܡ.

²⁸ܘܲܣܥܵܪܹ̈ܐ ܘܬܸܒ̣ܢܵܐ ܠܪ̈ܲܟ݂ܫܵܐ ܘܲܠܣܘܼܣܵـ̈ـܘܵܬ̣ܵܐ: ܡܲܝܬܹ̇ܝܢ ܠܐܲܬ̣ܪܵܐ ܕܗܵܘܹ̇ܐ ܬܲܡܵܢ ܐ̄ܢܵܫ ܐܲܝܟ݂ ܙܸܕ݂ܩܹܗ.

²⁹ܘܝܲܗ̄ܒ̣ ܐܲܠܵܗܵܐ ܠܲܫܠܹܝܡܘܿܢ ܚܸܟ݂ܡ̱ܬ̣ܵܐ ܘܣܲܟ̇ܘܼܠܬ̣ܵܢܘܼܬ̣ܵܐ ܘܪܲܒ̇ܘܼܬ̣ ܠܸܒܵܐ: ܣܘܿܓ̣ܵܐܐ ܕܛܵܒ̣.

³⁰ܘܣܸܓܝܲܬ̤ ܚܸܟ݂ܡ̱ܬܹܗ ܕܲܫܠܹܝܡܘܿܢ ܡ̣ܢ ܚܸܟ݂ܡܲܬ̣ ܟܠ ܒ̈ܢܲܝ ܡܲܕ݂ܢ̱ܚܵܐ: ܘܡ̣ܢ ܚܸܟ݂ܡܲܬ̣ܗܘܿܢ ܕܡܸܨܪ̈ܵܝܹܐ.

³¹ܘܲܗܘ̤ܵܐ ܚܲܟ̇ܝܼܡ ܡ̣ܢ ܟܠ ܐ̄ܢܵܫ: ܡ̣ܢ ܐܵܬ̣ܵܢ ܡܲܕ݂ܢ̱ܚܵܝܵܐ: ܘܗܵܡܵܢ ܘܟܲܠܟܵܠ ܘܕܲܪܕܲܥ ܒ̈ܢܲܝ ܡܵܚܘܿܠ. ܘܲܗܘ̤ܵܐ ܫܡܹܗ ܒܟ݂ܠܗܘܿܢ ܥܲܡܡܹ̈ܐ: ܕܒܲܚܕ݂ܵܪ̈ܵܘܗܝ.

³²ܘܡܲܠܸܠ̣ ܬܠܵܬ̣ܵܐ ܐܲܠܦ̈ܝܼܢ ܡܲܬ̣̈ܠܝܼܢ. ܘܲܗ̤ܘܲܝ̈ ܬܸܫܒ̇ـ̈ـܚܵܬܹܗ ܐܵܠܹܦ ܘܚܲܡܸܫ.

³³ܘܡܲܠܸܠ̣ ܥܲܠ ܐܝܼܠܵܢܹ̈ܐ: ܡ̣ܢ ܐܲܪ̈ܙܹܐ ܕܠܸܒ̣ܢܵܢ: ܘܲܥܕܲܡܵܐ ܠܠܵܘܦܵܐ ܕܢܵܦܹ̇ܩ ܒܐܸܣܬ̣ܵܐ. ܘܡܲܠܸܠ. ܥܲܠ ܒܥܝܼܪܵܐ ܘܥܲܠ ܦܵܪܲܚܬ̣ܵܐ: ܘܥܲܠ ܪ̈ܲܚܫܵܐ ܘܥܲܠ ܢܘܼܢܹ̈ܐ.

³⁴ܘܐܵܬܹ̇ܝܢ ܡ̣ܢ ܟܠܗܘܿܢ ܥܲܡܡܹ̈ܐ ܠܡܸܫܡܲܥ ܚܸܟ݂ܡ̱ܬܹܗ ܕܲܫܠܹܝܡܘܿܢ: ܡܟ̤!!!! ܟܠܗܘܿܢ ܡܲܠ̈ܟܹ̇ܐ ܕܐܲܪܥܵܐ. ܘܲܡܩܲܒܸ̇ܠ ܗ̄ܘ̣ܵܐ ܩܘܼܪ̈ܒܵܢܹܐ: ܡ̣ܢ ܟܠܗܘܿܢ ܡܲܠ̈ܟܹ̇ܐ ܕܐܲܪܥܵܐ ܕܲܫܡܲܥܘ ܚܸܟ݂ܡ̱ܬܹܗ.