Read Aramaic Peshita 1 Kings 5 Bible Online

1 Kings 5 - Aramaic Peshita bible

1 Kings 5

¹ܘܫܲܕܲܪ ܚܝܼܪܵܡ ܡܲܠܟܵܐ ܕܨܘܿܪ ܥܲܒ̣ܕܵܘ̈ܗܝ ܠܘܵܬ̣ ܫܠܹܝܡܘܿܢ: ܡܸܛܠ ܕܲܫ̣ܡܲܥ ܕܠܹܗ ܡܫܲܚ̣ܘ ܕܢܲܡܠܸܟ݂ ܚܠܵܦ ܐܲܒ̣ܘܼܗܝ: ܡܸܛܠ ܕܲܪܚܸܡ ܗ̄ܘ̣ܵܐ ܚܝܼܪܵܡ ܠܕ݂ܵܘܝܼܕ݂ ܟܠܗܘܿܢ ܝܵܘ̈ܡܵܬ̣ܵܐ.

²ܘܲܫܠܲܚ ܚܝܼܪܵܡ ܠܲܫܠܹܝܡܘܿܢ ܘܒܲܪܟܹܗ. ܘܲܫܠܲܚ ܫܠܹܝܡܘܿܢ ܠܚܝܼܪܵܡ ܘܐܸܡܲܪ.

³ܐܲܢ̄ܬ̇ ܝܵܕܲܥ ܐܲܢ̄ܬ̇ ܠܕ݂ܵܘܝܼܕ݂ ܐܵܒ̣ܝ: ܕܠܵܐ ܐܸܫܟܲܚ ܠܡܸܒ̣ܢܵܐ ܒܲܝܬܵܐ ܠܲܫܡܹܗ ܕܡܵܪܝܐ ܐܲܠܵܗܹܗ: ܡܸܛܠ ܩܪ̈ܵܒܹܐ ܣܲܓ̇ܝܼ̈ܐܹܐ ܕܚܲܕ݂ܪܘܼܗܝ: ܥܕܲܡܵܐ ܕܐܲܫܠܸܡ ܐܸܢܘܿܢ ܡܵܪܝܵܐ ܬܚܹܝܬ̣ ܦܲܣܬ̣ܵܐ ܕܪܸܓ̣ܠܹܗ.

⁴ܘܗܵܫܵܐ ܐܲܢܝܼܚ ܠܝܼ ܡܵܪܝܵܐ ܐܲܠܵܗܝ ܡ̣ܢ ܟܠܗܘܿܢ ܚܕ݂ܵܪ̈ܲܝ ܠܲܝܬ̇ ܣܵܛܵܢܵܐ ܐܵܦܠܵܐ ܦܓ̣ܥܵܐ ܒܝܼܫܵܐ.

⁵ܘܗܵܐ ܐܵܡܲܪ ܐ̄ܢܵܐ ܕܐܸܒ̣ܢܸܐ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܝ: ܐܲܝܟ݂ ܕܐܸܡܲܪ ܡܵܪܝܵܐ ܠܕ݂ܵܘܝܼܕ݂ ܐܵܒ̣ܝ ܕܲܒ̣ܪܵܟ݂ ܕܐܲܩܝܼܡܹ̇ܬ̣ ܚܠܵܦܲܝܟ ܥܲܠ ܟܘܼܪܣܝܵܟ݂: ܗ̤ܘ ܢܸܒ̣ܢܸܐ ܒܲܝܬܵܐ ܠܫܹܡܝ.

⁶ܘܗܵܫܵܐ ܦܩܘܿܕ݂: ܘܢܸܦܣܩܘܼܢ ܠܝܼ ܡ̣ܢ ܠܸܒ̣ܢܵܢ ܩܲܝܣܹ̈ܐ ܕܐܲܪܙܵܐ. ܘܥܲܒ̣ܕܲܝ̈ ܢܸܗܘܘܿܢ ܥܲܡ ܥܲܒ̣ܕܲܝ̈ܟ ܘܐܲܓ̣ܪܵܐ ܕܥܲܒ̣ܕܲܝ̈ܟ ܐܸܬܸ̇ܠ ܠܵܟ݂: ܟܠ ܡܸܕܸ̇ܡ ܕܐܵܡܲܪ ܐܲܢ̄ܬ̇. ܡܸܛܠ ܕܐܲܢ̄ܬ̇ ܝܵܕܲܥ ܐܲܢ̄ܬ̇: ܕܠܲܝܬ̇ ܒܲܢ ܐ̄ܢܵܫ ܕܝܵܕܲܥ ܠܡܸܦܣܲܩ ܩܲܝܣܹ̈ܐ ܐܲܝܟ݂ ܨܲܝܕ̇ܢܵܝܹ̈ܐ.

⁷ܘܟܲܕ݂ ܫ̣ܡܲܥ ܚܝܼܪܵܡ ܡܸܠܵܘ̈ܗܝ ܕܲܫܠܹܝܡܘܿܢ: ܚܕ݂ܝܼ ܛܵܒ̣: ܘܐܸܡܲܪ: ܒܪܝܼܟ݂ ܗ̄ܘ̣ ܡܵܪܝܵܐ ܝܵܘܡܵܢܵܐ: ܕܝܲܗ̄ܒ̣ ܠܕ݂ܵܘܝܼܕ݂ ܒܪܵܐ ܚܲܟ̇ܝܼܡܵܐ ܥܲܠ ܥܲܡܵܐ ܗܵܢܵܐ ܪܲܒܵܐ.

⁸ܘܲܫܠܲܚ ܚܝܼܪܵܡ ܠܲܫܠܹܝܡܘܿܢ: ܘܐܸܡܲܪ ܠܹܗ: ܫܸܡ̇ܥܹܬ̣ ܡܸܕܸ̇ܡ ܕܲܫܠܲܚܬ̇ ܠܝܼ. ܐܸܢܵܐ ܐܸܥܒܸ̇ܕ݂ ܟܠܹܗ ܨܸܒ̣ܝܵܢܵܟ݂: ܒܩܲܝܣܹ̈ܐ ܕܐܲܪ̈ܙܹܐ ܘܲܒ̣ܩܲܝܣܹ̈ܐ ܕܫܲܪ̈ܘܼܝܢܹܐ.

⁹ܥܲܒ̣̈ܕܲܝ ܢܸܚܬ̣ܘܼܢ ܡ̣ܢ ܠܸܒ̣ܢܵܢ ܠܝܲܡܵܐ: ܘܐܸܢܵܐ ܐܸܥܒܹ̇ܕ݂ ܐܸܢܘܿܢ ܛܵܘܦܵܐ ܒܝܲܡܵܐ: ܥܕܲܡܵܐ ܠܐܲܬ̣ܪܵܐ ܕܬܸܫܠܘܿܚ ܠܝܼ. ܘܐܲܪܡܸܐ ܐܸܢܘܿܢ ܬܲܡܵܢ. ܘܐܲܢ̄ܬ̇ ܬܸܣܒ̇ܘܿܠ ܐܸܢܘܿܢ ܡ̣̤ܢ ܬܲܡܵܢ ܘܬܸܥܒܸ̇ܕ݂ ܐܵܦ ܐܲܢ̄ܬ̇ ܨܸܒ̣ܝܵܢܝ: ܘܬܸܬܸ̇ܠ ܠܲܚܡܵܐ ܠܒܲܝܬܝ.

¹⁰ܘܲܗܘ̤ܵܐ ܚܝܼܪܵܡ ܝܵܗܹܒ̣ ܠܲܫܠܹܝܡܘܿܢ ܩܲܝܣܹ̈ܐ ܕܐܲܪ̈ܙܹܐ ܘܩܲܝܣܹ̈ܐ ܕܫܲܪ̈ܘܲܝܢܹܐ ܐܲܝܟ݂ ܕܲܨܒ̣ܵܐ.

¹¹ܘܲܫܠܹܝܡܘܿܢ ܝܲܗ̄ܒ̣ ܠܚܝܼܪܵܡ: ܥܸܣܪܝܼܢ ܐܲܠܦ̈ܝܼܢ ܟܘܿܪ̈ܝܼܢ ܕܚܸܛܹ̈ܐ ܡܹܐܟ݂ܘܼܠܬܵܐ ܠܒܲܝܬܹ̇ܗ: ܘܥܸܣܪܝܼܢ ܐܲܠܦ̈ܝܼܢ ܟܘܿܪ̈ܝܵܐ ܕܡܸܫܚܵܐ ܥܨܝܼܪܵܐ. ܗܵܟܲܢܵܐ ܝܵܗܹܒ̣ ܗ̄ܘ̣ܵܐ ܫܠܹܝܡܘܿܢ ܠܚܝܼܪܵܡ ܒܟ݂ܠ ܫܢܵܐ.

¹²ܘܡܵܪܝܵܐ ܝܲܗ̄ܒ̣ ܠܲܫܠܹܝܡܘܿܢ ܚܸܟ݂ܡ̱ܬ̣ܵܐ ܐܲܝܟ݂ ܕܐܸܡܲܪ ܠܹܗ. ܘܲܗܘ̤ܵܐ ܫܠܵܡܵܐ ܒܹܝܬ̣ ܚܝܼܪܵܡ ܠܒܹܝܬ̣ ܫܠܹܝܡܘܿܢ: ܟܠܗܘܿܢ ܝܵܘ̈ܡܵܬ̣ܵܐ: ܘܐܲܩܝܼܡܘ ܬܪ̈ܲܝܗܘܿܢ ܩܝܵܡܵܐ.

¹³ܘܐܲܣܸܩ ܡܲܠܟܵܐ ܫܠܹܝܡܘܿܢ ܡܲܕܲܐܬ̣ܵܐ ܡ̣ܢ ܟܠܹܗ ܝܼܣܪܵܝܹܠ ܘܲܗܘ̤ܵܬ̣ ܡܲܕܲܐܬ̣ܵܐ ܬܠܵܬ̣ܝܼܢ ܐܲܠܦ̈ܝܼܢ ܓܲܒ̣ܪ̈ܝܼܢ.

¹⁴ܘܫܲܕܲܪ ܐܸܢܘܿܢ ܠܠܸܒ̣ܢܵܢ: ܥܸܣܪܵܐ ܐܲܠܦ̈ܝܼܢ ܒܝܲܪܚܵܐ ܡܸܬ̣ܚܲܠܦܝܼܢ ܝܲܪܚܵܐ ܗܵܘܹ̇ܝܢ ܒܠܸܒ̣ܢܵܢ: ܘܲܬ̣ܪܹܝܢ ܝܲܪ̈ܚܝܼܢ ܒܒܲܝܬܹ̇ܗ. ܘܐܲܕ݂ܘܿܢܝܼܪܵܡ ܫܲܠܝܼܛ ܗ̄ܘ̣ܵܐ ܥܲܠ ܡܲܕܲܐܬ̣ܵܐ.

¹⁵ܘܲܗܘ̤ܵܘ ܠܲܫܠܹܝܡܘܿܢ ܫܲܒ̣ܥܝܼܢ ܐܲܠܦ̈ܝܼܢ ܩܘܿܦܝܹ̈ܐ: ܘܲܬ̣ܡܵܢܐܝܼܢ ܐܲܠܦ̈ܝܼܢ ܕܦܵܣܥܝܼܢ ܒܛܘܼܪܵܐ.

¹⁶ܣܛܲܪ ܡ̣ܢ ܪܵܘ̱ܪ̈ܒ̣ܵܢܹܐ ܕܩܵܝܡܝܼܢ ܠܲܫܠܹܝܡܘܿܢ ܥܲܠ ܥܒ̣ܵܕ݂ܵܐ: ܬܠܵܬ̣ܵܐ ܐܲܠܦ̈ܝܼܢ ܘܲܬ̣ܠܵܬ̣ܡܵܐܐ: ܕܲܡܫܲܠܛܝܼܢ ܥܲܠ ܥܲܡܵܐ ܕܥܵܒ̣ܕ̇ܝܼܢ ܥܒ̣ܵܕ݂ܵܐ.

¹⁷ܘܲܦܩܲܕ݂ ܡܲܠܟܵܐ: ܘܲܫܩܲܠܘ ܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ ܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܠܲܡܫܲܟ݂ܠܵܠܘܼܬܹܗ ܠܒܲܝܬܵܐ ܒܟܹܐܦܹ̈ܐ ܦܣ̈ܝܼܥܵܬ̣ܵܐ.

¹⁸ܘܲܦܣܲܥܘ ܒܲܢܵܝܹ̈ܐ ܕܲܫܠܹܝܡܘܿܢ ܘܒܲܢܵܝܹ̈ܐ ܕܚܝܼܪܵܡ: ܘܐܲܪ̈ܓ̇ܘܼܒ̣ܠܹܐ: ܘܬܲܩܸܢܘ ܟܹܐܦܹ̈ܐ ܘܩܲܝܣܹ̈ܐ ܠܒܸܢܝܵܢܵܐ ܕܒܲܝܬܵܐ.