Read Aramaic Peshita 1 Kings 6 Bible Online

1 Kings 6 - Aramaic Peshita bible

1 Kings 6

¹ܘܲܗܘ̤ܵܐ ܒܲܫܢܲܬ̣ ܐܲܪܒܲܥ ܡܵܐܐ ܘܲܬ̣ܡܵܢܐܝܼܢ ܫܢ̈ܝܼܢ: ܠܡܲܦܲܩܬܵܐ ܕܲܒ̣̈ܢܲܝ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܝܼܢ: ܒܫܲܢ̄ܬܵܐ ܪܒ̣ܝܼܥܵܝܬܵܐ ܒܝܲܪܚܵܐ ܐܝܼܵܪ ܕܗ̤ܘܝܘܼ ܝܲܪܚܵܐ ܬܸܢܝܵܢܵܐ: ܕܐܲܡ̣ܠܸܟ݂ ܫܠܹܝܡܘܿܢ ܥܲܠ ܝܼܣܪܵܝܹܠ: ܫܲܪܝܼ ܠܡܸܒ̣ܢܵܐ ܒܲܝܬܹ̇ܗ ܕܡܵܪܝܵܐ.

²ܘܒܲܝܬܵܐ ܕܲܒ̣ܢܵܐ ܫܠܹܝܡܘܿܢ ܠܡܵܪܝܵܐ: ܫܬ̇ܝܼܢ ܐܲܡ̈ܝܼܢ ܐܘܼܪܟܹ̇ܗ: ܘܥܸܣܪܝܼܢ ܐܲܡ̈ܝܼܢ ܦܬ̣ܵܝܹܗ: ܘܲܬ̣ܠܵܬ̣ܵܐ ܐܲܡ̈ܝܼܢ ܪܵܘܡܹܗ.

³ܘܐܸܣܛܘܵܐ ܕܲܩܕ݂ܵܡ ܬܲܪܥܵܐ ܕܒܲܝܬܵܐ: ܥܸܣܪܝܼܢ ܐܲܡ̈ܝܼܢ ܐܘܼܪܟܹ̇ܗ ܠܘܼܩܒܲܠ ܦܬ̣ܵܝܹܗ ܕܒܲܝܬܵܐ: ܘܲܥܣܲܪ ܐܲܡ̈ܝܼܢ ܦܬ̣ܵܝܹܗ ܠܘܼܩܒܲܠ ܐܘܼܪܟܹ̇ܗ ܕܒܲܝܬܵܐ.

⁴ܘܲܥܒܲܕ݂ ܠܒܲܝܬܵܐ ܟܵܘܹ̈ܐ ܫܲܛܝܼ̈ܦܵܬ̣ܵܐ ܘܐܲܛܝܼ̈ܡܵܬ̣ܵܐ.

⁵ܘܲܒ̣ܢܵܐ ܥܲܠ ܐܸܣܵܘ̈ܗܝ ܕܒܲܝܬܵܐ ܚܵܕ݂ܪ̈ܵܬ̣ܵܐ ܟܲܕ݂ ܚܵܕܲܪ. ܐܸܣܹ̈ܐ ܕܒܲܝܬܵܐ ܐܲܚܕܲܪ ܠܗܲܝܟ̇ܠܵܐ ܘܲܠܒܹܝܬ̣ ܚܘܼܣܵܝܵܐ.

⁶ܘܲܥ̣ܒܲܕ݂ ܚܵܕ݂ܪܬܵܐ ܬܲܚܬܲܝܬܵܐ ܚܲܡܸܫ ܐܲܡ̈ܝܼܢ ܦܬ̣ܵܝܵܗ̇: ܘܡܸܨܥܵܝܬܵܐ ܫܸܬ̣ ܐܲܡ̈ܝܼܢ ܦܬ̣ܵܝܵܗ̇: ܘܲܬ̣ܠܝܼܬ̣ܵܝܬܵܐ ܫܒܲܥ ܐܲܡ̈ܝܼܢ ܦܬ̣ܵܝܵܗ̇: ܡܸܛܠ ܕܲܓ̣ܕ݂ܵܢܦܹ̈ܐ ܥ̣ܒܲܕ݂ ܠܒܲܝܬܵܐ ܟܲܕ݂ ܚܵܕܲܪ ܡ̣ܢ ܠܒܲܪ: ܕܢܸܗܘܹܐ ܐܲܚܝܼܕ݂ ܐܸܣܹ̈ܐ ܒܐܸܣܹ̈ܐ.

⁷ܘܒܲܝܬܵܐ ܟܲܕ݂ ܡܸܬ̣ܒ̇ܢܹܐ: ܒܟܹܐܦܹ̈ܐ ܫܠܲܡ̱ܠ̈ܡܵܬ̣ܵܐ ܕܲܫܩܘܼܠܬܵܐ ܐܸܬ̣ܒ̇ܢܝܼ ܘܐܲܪܙܲܦܬ̣ܵܐ ܘܡܲܓܸܙܪܵܐ ܘܟ݂ܠ ܡܵܐܢ ܕܦܲܪܙܠܵܐ: ܠܵܐ ܐܸܫܬ̇ܡܲܥ ܒܒܲܝܬܵܐ ܟܲܕ݂ ܡܸܬ̣ܒ̇ܢܹܐ.

⁸ܘܬܲܪܥܵܐ ܕܚܵܕ݂ܲܪܬܵܐ ܡܸܨܥܵܝܬܵܐ: ܠܣܸܛܪܹܗ ܕܒܲܝܬܵܐ ܬܲܝ̱ܡܢܵܝܵܐ. ܘܲܒ̣ܩܲܛܲܪܩܛܵܐ ܣܵܠܩܝܼܢ ܠܡܸܨܥܵܝܬܵܐ: ܘܡ̣ܢ ܡܸܨܥܵܝܬܵܐ ܣܵܠܩܝܼܢ ܠܲܬ̣ܠܝܼܬ̣ܵܝܬܵܐ.

⁹ܘܲܒ̣ܢܵܝܗܝ ܠܒܲܝܬܵܐ ܘܫܲܠܡܹܗ: ܘܛܲܠܠܹܗ ܠܒܲܝܬܵܐ ܒܓ̣ܘܿܒܹ̈ܐ ܢܣܝܼܪܵܬ̣ܵܐ ܕܐܲܪܙܵܐ.

¹⁰ܘܲܒ̣ܢܵܐ ܚܵܕ݂ܪ̈ܵܬ̣ܵܐ ܥܲܠ ܟܠܹܗ ܒܲܝܬܵܐ: ܚܲܡܸܫ ܐܲܡ̈ܝܼܢ ܪܵܘܡܗܹܝܢ: ܘܐܵܘܚܕܹܗ ܠܒܲܝܬܵܐ ܒܩܲܝܣܹ̈ܐ ܕܐܲܪܙܵܐ.

¹¹ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܫܠܹܝܡܘܿܢ ܠܡܹܐܡܲܪ.

¹²ܒܲܝܬܵܐ ܗܵܢܵܐ ܕܲܒ̣ܢܲܝܬ̇: ܐܸܢ ܬܗܲܠܸܟ݂ ܒܲܩܝܵܡܲܝ̈: ܘܕ݂ܝܼܢܲܝ̈ ܬܸܛܲܪ: ܘܬܸܥܒܸ̇ܕ݂ ܟܠܗܘܿܢ ܦܘܼܩ̈ܕܵܢܲܝ: ܘܲܬ̣ܗܲܠܸܟ݂ ܒܗܘܿܢ: ܐܲܩܝܼܡ ܦܸܬ̣ܓ̣ܵܡܲܝ̈ ܥܲܡܵܟ݂ ܕܐܸܡ̇ܪܹܬ̣ ܠܕ݂ܵܘܝܼܕ݂ ܐܒ̣ܘܼܟ݂.

¹³ܘܐܸܫܪܹܐ ܒܓ̣ܵܘ ܒ̈ܢܲܝ ܝܼܣܪܵܝܹܠ: ܘܠܵܐ ܐܸܫܒ̇ܘܿܩ ܠܥܲܡܝ ܝܼܣܪܵܝܹܠ.

¹⁴ܘܲܒ̣ܢܵܝܗܝ ܫܠܹܝܡܘܿܢ ܠܒܲܝܬܵܐ ܘܫܲܟ݂ܠ̱ܠܹܗ.

¹⁵ܘܲܒ̣ܢ̣ܵܐ ܐܸܣܵܘ̈ܗܝ ܕܒܲܝܬܵܐ ܡ̣ܢ ܠܓ̣ܵܘ ܒܲܢܣܵܪܹ̈ܐ ܕܐܲܪܙܵܐ. ܡ̣ܢ ܫܲܬ̣̱ܐܣܵܘ̈ܗܝ ܘܲܥܕܲܡܵܐ ܠܲܫܡܵܘ̈ܗܝ: ܩܲܪܡܹܗ ܩܲܝܣܵܐ ܡ̣ܢ ܠܓ̣ܵܘ. ܘܩܵܡ̣ ܫܲܬ̣̱ܐܣܵܘ̈ܗܝ ܕܒܲܝܬܵܐ ܒܲܢܣܵܪܹ̈ܐ ܕܫܲܪ̈ܘܲܝܢܹܐ.

¹⁶ܘܲܒ̣ܢܵܐ ܫܠܹܝܡܘܿܢ ܥܸܣܪܝܼܢ ܐܲܡ̈ܝܼܢ ܡ̣ܢ ܫܦܘܿܠܵܘ̈ܗܝ ܕܒܲܝܬܵܐ ܒܲܢܣܵܪܹ̈ܐ ܕܐܲܪܙܹܐ: ܘܡ̣ܢ ܫܲܬ̣̱ܐܣܵܘ̈ܗܝ ܘܲܥܕܲܡܵܐ ܠܲܫܡܵܘ̈ܗܝ: ܘܲܒ̣ܢܵܝܗܝ ܡ̣ܢ ܠܓ̣ܵܘ ܠܲܩܕ݂ܘܿܫ ܩܘܼܕ݂ܫܹ̈ܐ.

¹⁷ܥܸܣܪܝܼܢ ܐܲܡ̈ܝܼܢ ܗܵܘܹ̇ܐ ܒܲܝܬܵܐ: ܗܲܝܟ̇ܠܵܐ ܗܵܘ̇ ܓܵܘܵܝܵܐ.

¹⁸ܘܐܲܪܙܵܐ ܩܪܝܼܡ ܗ̄ܘ̣ܵܐ ܒܲܝܬܵܐ: ܡ̣ܢ ܠܓ̣ܵܘ ܘܲܓ̣ܠܝܼܦ ܗ̄ܘ̣ܵܐ ܗܸܠܩܹ̈ܐ ܘܒ̣ܵܛܠܹ̈ܐ ܘܫܘܿܫܲܢܹ̈ܐ. ܘܟ݂ܠܹܗ: ܕܐܲܪܙܵܐ ܗ̄ܘ̣ܵܐ. ܘܟܹܐܦܵܐ ܠܵܐ ܡܸܬ̣ܚܲܙܝܵܐ ܗ̄ܘ̣ܵܬ̣ ܒܹܗ.

¹⁹ܘܒܹܝܬ̣ ܩܘܼܕ݂ܫܵܐ ܒܓ̣ܵܘ ܒܲܝܬܵܐ ܡ̣ܢ ܠܓ̣ܵܘ ܬܲܩܸܢ: ܠܲܡܩܵܡ ܬܲܡܵܢ ܩܹܒ̣ܘܿܬ̣ܵܐ ܕܲܩܝܵܡܹܗ ܕܡܵܪܝܵܐ.

²⁰ܘܲܩܕ݂ܵܡ ܒܹܝܬ̣ ܩܘܼܕ݂ܫܵܐ: ܐܲܡ̈ܝܼܢ ܐܘܼܪܟܹ̇ܗ: ܘܥܸܣܪܝܼܢ ܦܬ̣ܵܝܹܗ: ܘܥܸܣܪܝܼܢ ܐܲܡ̈ܝܼܢ ܪܵܘܡܹܗ ܘܩܲܪܡܹܗ ܕܲܗܒ̣ܵܐ ܣܢܝܼܢܵܐ. ܘܲܩ̣ܪܲܡ ܠܡܲܕ݂ܒ̇ܚܵܐ ܒܐܲܪܙܵܐ.

²¹ܘܩܪܡܹܗ ܫܠܹܝܡܘܿܢ ܠܒܲܝܬܵܐ ܡ̣ܢ ܠܓ̣ܵܘ ܒܕܲܗܒ̣ܵܐ ܣܢܝܼܢܵܐ. ܘܲܥܒܲܕ݂ ܦܪܘܼܣܬ̇ܕ݂ܵܐ ܩܕ݂ܵܡ ܒܹܝܬ̣ ܡܲܩܕ̇ܫܵܐ: ܘܩܲܪܡܹܗ ܕܲܗܒ̣ܵܐ.

²²ܘܲܠܟ݂ܠܹܗ ܒܲܝܬܵܐ ܩ̣ܪܲܡ ܕܲܗܒ̣ܵܐ: ܥܕܲܡܵܐ ܕܲܫܠܸܡ ܟܠܹܗ ܒܲܝܬܵܐ. ܘܟ݂ܠܹܗ ܡܲܕ݂ܒ̇ܚܵܐ ܕܒܹܝܬ̣ ܡܲܩܕ̇ܫܵܐ ܩܲܪܡܹܗ ܕܲܗܒ̣ܵܐ.

²³ܘܲܥ̣ܒܲܕ݂ ܒܹܝܬ̣ ܩܘܼܕ݂ܫܵܐ ܬܪܹܝܢ ܟܪ̈ܘܿܒ̣ܝܼܢ ܕܩܲܝܣܵܐ. ܡܫܘܼܚܬ̣ܵܐ ܥܣܲܪ ܐܲܡ̈ܝܼܢ ܐܘܼܪܟܹ̇ܗ: ܘܚܲܡܸܫ ܐܲܡ̈ܝܼܢ ܦܬ̣ܵܝܹܗ: ܕܲܟ݂ܪܘܿܒ̣ܵܐ ܚܲܕ݂.

²⁴ܘܚܲܡܸܫ ܐܲܡ̈ܝܼܢ ܟܸܢܦܹܗ ܕܲܟ݂ܪܘܿܒ̣ܵܐ ܚܲܕ݂: ܘܚܲܡܸܫ ܐܲܡ̈ܝܼܢ ܟܸܢܦܹܗ ܕܲܟ݂ܪܘܿܒ̣ܵܐ ܐ̄ܚܪܹܢܵܐ. ܘܲܥܣܲܪ ܐܲܡ̈ܝܼܢ ܡ̣ܢ ܪܸܫ ܓܸܦܵܘ̈ܗܝ ܘܲܥܕܲܡܵܐ ܠܪܹܫ ܓܸܦܵܘ̈ܗܝ.

²⁵ܘܲܥܣܲܪ ܐܲܡ̈ܝܼܢ ܟܪܘܿܒ̣ܵܐ ܐ̄ܚܪܹܢܵܐ: ܡܫܘܼܚܬܵܐ ܚܕ݂ܵܐ ܘܩܵܘܡܬ̣ܵܐ ܚܕ݂ܵܐ ܠܲܬ̣ܪ̈ܲܝܗܘܿܢ ܟܪ̈ܘܿܒܹܐ.

²⁶ܘܪܵܘܡܹܗ ܕܲܟ݂ܪܘܿܒ̣ܵܐ ܚܲܕ݂: ܥܣܲܪ ܐܲܡ̈ܝܼܢ. ܘܗܵܟܲܢܵܐ ܟܪܘܿܒ̣ܵܐ ܐ̄ܚܪܹܢܵܐ.

²⁷ܘܲܥ̣ܒܲܕ݂ ܟܪ̈ܘܿܒܹܐ ܒܓ̣ܵܘ ܒܲܝܬܵܐ ܓܵܘܵܝܵܐ: ܘܲܦ̣ܪܲܣ ܓܸܦܲܝ̈ܗܘܿܢ ܕܲܟ݂ܪ̈ܘܿܒܹܐ. ܘܕܸܒ̣ܩܲܬ̤ ܟܸܢܦܹܗ ܕܚܲܕ݂ ܒܐܸܣܬ̣ܵܐ: ܘܟܸܢܦܹܗ ܕܲܟ݂ܪܘܿܒ̣ܵܐ ܐ̄ܚܪܹܢܵܐ ܕܸܒ̣ܩܲܬ̤ ܒܐܸܣܬ̣ܵܐ ܐ̄ܚܪܹܬ̣ܵܐ. ܘܓܸܦܲܝ̈ܗܘܿܢ ܕܲܒ̣ܡܸܨܥܲܬ̣ ܒܲܝܬܵܐ ܢܲܩܝܼܦܝܼܢ ܚܲܕ݂ ܠܚܲܕ݂.

²⁸ܘܲܩ̣ܪܲܡ ܐܸܢܘܿܢ ܠܲܟ݂ܪ̈ܘܿܒܹܐ ܕܲܗܒ̣ܵܐ ܣܢܝܼܢܵܐ.

²⁹ܘܲܠܟ݂ܠܗܹܝܢ ܐܸܣܵܘ̈ܗܝ ܕܒܲܝܬܵܐ ܐܲܟ݂ܪܸܟ݂ ܗܸܠܩܹ̈ܐ. ܘܲܓ̣ܠܲܦ ܒܵܛ̈ܠܹܐ: ܘܲܟ݂ܪ̈ܘܿܒܹܐ: ܘܕܸܩ̈ܠܹܐ: ܘܫܘܿܫܲܢܹ̈ܐ: ܡ̣ܢ ܠܓ̣ܵܘ ܘܡ̣ܢ ܠܒܲܪ.

³⁰ܘܲܠܫܲܬ̣ܐ̱ܣܵܘ̈ܗܝ ܕܒܲܝܬܵܐ ܩܪܲܡ ܕܲܗܒ̣ܵܐ: ܡ̣ܢ ܠܓ̣ܵܘ ܘܡ̣ܢ ܠܒܲܪ.

³¹ܘܲܠܬܲܪܥܵܐ ܕܒܹܝܬ̣ ܡܲܩܕ̇ܫܵܐ: ܥ̣ܒܲܕ݂ ܬܪܥܵܐ ܕܩܲܝܣܵܐ ܕܲܡܫܘܼܚܬܵܐ: ܡܫܲܪܪܝܼܢ ܦܪ̈ܘܼܣܬ̇ܕ݂ܵܘܗܝ ܘܲܡܥܲܫܢܝܼܢ.

³²ܘܲܬ̣ܪܹܝܢ ܬܲܪ̈ܥܝܼܢ ܕܩܲܝܣܵܐ ܕܲܡܫܘܼܚܬ̣ܵܐ. ܘܲܓ̣ܠܲܦ ܥܠܲܝܗܘܿܢ ܓܠܵܦܹ̈ܐ: ܟܪ̈ܘܿܒܹܐ: ܘܒ̣ܵܛ̈ܠܹܐ: ܘܕܸܩ̈ܠܹܐ: ܘܫܘܿܫܲܢܹ̈ܐ. ܘܲܩ̣ܪܲܡ ܐܸܢܘܿܢ ܕܲܗܒ̣ܵܐ: ܘܐܲܣܓ̇ܝܼ ܥܲܠ ܟܪ̈ܘܿܒܹܐ ܘܥܲܠ ܕܸܩ̈ܠܹܐ ܕܲܗܒ̣ܵܐ.

³³ܘܗܵܟܲܢܵܐ ܥ̣ܒܲܕ݂ ܠܬܲܪܥܵܐ ܕܗܲܝܟ̇ܠܵܐ: ܦܪ̈ܘܼܣܬ̇ܕ݂ܵܘܗܝ ܕܩܲܝܣܵܐ ܕܲܡܫܘܼܚܬܵܐ: ܫܚܝܼ̈ܡܹܐ ܘܲܡܪܲܒ̇ܥܝܼܢ.

³⁴ܘܲܬ̣ܪܹܝܢ ܬܲܪ̈ܥܝܼܢ ܕܩܲܝܣܵܐ ܕܫܲܪ̈ܘܲܝܢܹܐ: ܬܪܹܝܢ ܣܸܛܪ̈ܵܘܗܝ ܕܚܲܕ݂ ܬܲܪܥܵܐ ܓܠܝܼܦܝܼܢ ܘܲܬ̣ܪܹܝܢ ܣܸܛܪܵܘܗܝ ܕܬܲܪܥܵܐ ܐ̄ܚܪܹܢܵܐ ܓܠܝܼܦܝܼܢ.

³⁵ܘܲܓ̣ܠܲܦ ܟܪ̈ܘܿܒܹܐ: ܘܒܲܛ̈ܠܹܐ: ܘܕܸܩ̈ܠܹܐ: ܘܫܘܿܫܲܢܹ̈ܐ. ܘܲܩܪܲܡ ܒܕܲܗܒ݂ܵܐ ܫܲܦܝܼܪ ܓܠܵܦܹ̈ܐ.

³⁶ܘܲܒ̣ܢܵܐ ܠܕ݂ܵܪܬܵܐ ܓܵܘܵܝܬܵܐ: ܬܠܵܬ̣ܵܐ ܣܚܵܦ̈ܝܼܢ ܕܲܦ̮ܣܝܼܠܬܵܐ: ܘܲܣܚܵܦܵܐ ܕܲܟ݂ܪ̈ܵܡܵܬ̣ܵܐ ܕܐܲܪܙܵܐ.

³⁷ܘܲܒ̣ܫܲܢ̄ܬܵܐ ܪܒ̣ܝܼܥܵܝܬܵܐ ܐܸܫܬܲܐܣܲܬ̣ ܒܲܝܬܹ̇ܗ ܕܡܵܪܝܵܐ ܒܐܝܼܪܲܚ ܐܝܼܵܪ.

³⁸ܘܒܲܫܢܲܬ̣ ܚܕܲܥܸܣܪܹ̈ܐ ܒܐܝܼܪܲܚ ܬܸܫܪܝܼ ܐ̄ܚܪܵܝ: ܘܗ̤ܘܝܘܼ ܝܲܪܚܵܐ ܬܡܝܼܢܵܝܵܐ: ܫܠܸܡ ܒܲܝܬܵܐ ܒܟ݂ܠܗܹܝܢ ܨܸܒ̣̈ܘܵܬܹܗ ܘܲܒ̣ܟ݂ܠܗܘܿܢ ܥܒ̣ܸܵܕ݂ܵܘ̈ܗܝ ܘܲܒ̣ܢܵܝܗܝ ܠܲܫܒܲܥ ܫܢ̈ܝܼܢ.