Read Aramaic Peshita 1 Kings 7 Bible Online

1 Kings 7 - Aramaic Peshita bible

1 Kings 7

¹ܘܲܠܒܲܝܬܹ̇ܗ ܒܢ̣ܵܐ ܫܠܹܝܡܘܿܢ ܠܲܬ̣ܠܵܬܲܥܸܣܪܹ̈ܐ ܫܢ̈ܝܼܢ: ܘܐܸܫܬܲܟ݂ܠܲܠ ܟܠܹܗ ܒܲܝܬܵܐ.

²ܘܲܒ̣ܢܵܐ ܒܹܝܬ̣ ܥܵܒ̣ܵܐ ܕܠܸܒ̣ܢܵܢ: ܡܵܐܐ ܐܲܡ̈ܝܼܢ ܐܘܼܪܟܹ̇ܗ: ܘܚܲܡܫܝܼܢ ܐܲܡ̈ܝܼܢ ܦܬ̣ܵܝܹܗ: ܘܲܬ̣ܠܵܬ̣ܝܼܢ ܐܲܡ̈ܝܼܢ ܪܵܘܡܹܗ: ܥܲܠ ܐܲܪܒ̇ܥܵܐ ܣܕ݂ܪ̈ܝܼܢ ܕܥܲܡܘܼ̈ܕܹܐ: ܕܐܲܪܙܵܐ: ܘܲܟ݂ܪ̈ܵܡܵܬ̣ܵܐ ܕܐܲܪܙܵܐ ܥܲܠ ܥܲܡܘܼ̈ܕܹܐ.

³ܘܲܡܛܲܠܲܠ ܒܐܲܪ̈ܙܹܐ ܡ̣ܢ ܠܥܸܠ. ܥܲܠ ܚܹـ̈ـܬܹܐ ܕܥܲܠ ܥܲܡܘܼ̈ܕܹܐ ܐܲܪܒ̇ܥܝܼܢ ܘܚܲܡܸܫ: ܚܲܡܫܲܥܸܣܪܹ̈ܐ ܠܣܸܕ݂ܪܵܐ.

⁴ܘܐܲܟ݂ܣܸܕ݂ܪܹ̈ܐ ܬܠܵܬ̣ܵܐ ܣܸܕ݂ܪ̈ܝܼܢ: ܘܡܲܩ̈ܒ̇ܠܵܢ ܚܕ݂ܵܐ ܠܲܚܕ݂ܵܐ ܬܠܵܬ̣ ܙܲܒ̣ܢ̈ܝܼܢ.

⁵ܘܟ݂ܠܗܘܿܢ ܬܲܪ̈ܥܹܐ ܘܣܸܦܹ̈ܐ ܡܪܲܒ̇ܥܝܼܢ: ܘܡܲܩܒ̇ܠܝܼܢ ܚܲܕ݂ ܠܚܲܕ݂: ܬܠܵܬ̣ ܙܲܒ̣ܢ̈ܝܼܢ.

⁶ܘܐܸܣܛܘܵܐ ܕܥܲܡܘܼ̈ܕܹܐ ܥ̣ܒܲܕ݂: ܚܲܡܫܝܼܢ ܐܲܡ̈ܝܼܢ ܐܘܼܪܟܹ̇ܗ: ܘܲܬ̣ܠܵܬ̣ܝܼܢ ܐܲܡ̈ܝܼܢ ܦܬ̣ܵܝܹܗ: ܘܐܸܣܛܘܵܐ ܥܲܠ ܐܲܦܲܝ̈ܗܘܿܢ ܕܥܲܡܘܼ̈ܕܹܐ ܘܕ݂ܵܪܬܵܐ ܩܕ݂ܵܡܲܝܗܘܿܢ.

⁷ܘܐܸܣܛܘܵܐ ܕܟ݂ܘܼܪܣܝܵܐ ܕܕ݂ܵܐܹ̇ܢ ܗ̄ܘ̣ܵܐ ܬܲܡܵܢ: ܐܸܣܛܘܵܐ ܠܕ݂ܝܼܢܵܐ ܥ̣ܒܲܕ݂. ܘܩܲܪܡܹܗ ܒܐܲܪܙܵܐ: ܡ̣ܢ ܫܲܬ̣ܐ̱ܣܵܘ̈ܗܝ ܘܲܥܕܲܡܵܐ ܠܲܫܡܵܘ̈ܗܝ.

⁸ܘܒܲܝܬܵܐ ܕܝܵܬܹܒ̣ ܗ̄ܘ̣ܵܐ ܬܲܡܵܢ ܒܕ݂ܵܪܬܵܐ ܐ̄ܚܪܹܬܵܐ ܠܓ̣ܵܘ ܡ̣ܢ ܐܸܣܛܘܵܐ: ܐܲܝܟ݂ ܥܒ̣ܵܕ݂ܵܐ ܗܵܢܵܐ ܥ̣ܒܲܕ݂. ܘܒܲܝܬܵܐ ܥ̣ܒܲܕ݂ ܠܒܲܪܬ̣ ܦܸܪܥܘܿܢ ܕܲܢܣܲܒ̣ ܫܠܹܝܡܘܿܢ ܐܲܝܟ݂ ܥܒ̣ܵܕ݂ܵܐ ܗܵܢܵܐ.

⁹ܟܠܗܹܝܢ ܗܵܠܹܝܢ ܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܐܲܝܟ݂ ܡܫܘܼܚܬ̣ܵܐ ܕܲܦ̮ܣܝܼܠܬܵܐ ܕܲܢܓ̣ܝܼܕ݂ܵܐ ܒܛܘܼܪܢܘܿܣ.

¹⁰ܡ̣ܢ ܠܒܲܪ ܘܡ̣ܢ ܠܓ̣ܵܘ: ܘܡ̣ܢ ܫܲܬ̣ܐ̱ܣܵܘ̈ܗܝ ܘܲܥܕܲܡܵܐ ܠܥܸܠ: ܘܡ̣ܢ ܠܒܲܪ ܘܲܥܕܲܡܵܐ ܠܕ݂ܵܪܬܵܐ ܕܒܲܝܬܵܐ: ܕܡܲܬ̣ܩܲܢ ܒܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܘܲܒ̣ܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ: ܟܹܐܦܹ̈ܐ ܕܲܥܣܲܪ ܐܲܡ̈ܝܼܢ: ܘܟܹܐܦܹ̈ܐ ܕܲܬ̣ܡܵܢܹܐ ܐܲܡ̈ܝܼܢ.

¹¹ܡ̣ܢ ܠܥܸܠ: ܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܐܲܝܟ݂ ܡܫܘܼܚܬ̣ܵܐ ܕܲܦ̮ܣܝܼܠܬܵܐ: ܘܐܲܪ̈ܙܹܐ.

¹²ܘܕ݂ܵܪܬܵܐ ܪܲܒ̇ܬ̣ܵܐ ܟܲܕ݂ ܚܵܕ݂ܪܵܐ: ܬܠܵܬ̣ܵܐ ܣܚܵܦ̈ܝܼܢ ܕܲܦ̮ܣܝܼܠܬܵܐ: ܘܲܣܚܵܦܵܐ ܕܲܟ݂ܪ̈ܵܡܵܬ̣ܵܐ ܕܐܲܪ̈ܙܹܐ: ܘܲܠܕ݂ܵܪܬܵܐ ܕܒܲܝܬܹܗ ܕܡܵܪܝܵܐ ܓܵܘܵܝܬܵܐ: ܘܠܐܸܣܛܘܵܐ ܕܒܲܝܬܵܐ.

¹³ܘܫܲܕܲܪ ܡܲܠܟܵܐ ܫܠܹܝܡܘܿܢ: ܘܐܲܝܬ̇ܝܼ ܠܚܝܼܪܵܡ ܡ̣ܢ ܨܘܿܪ.

¹⁴ܘܗ̤ܘ ܒܲܪ ܐܲܢ̄ܬ̇ܬ̣ܵܐ ܗ̄ܘ̣ܵܐ ܐܲܪܡܲܠܬܵܐ ܡ̣ܢ ܫܲܒ̣ܛܵܐ ܕܢܲܦ̮ܬܵܠܝܼ: ܘܐܲܒ̣ܘܼܗܝ ܓܒܲܪ ܨܲܝܵܪ ܘܐܘܼܡܵܢ ܒܲܢܚܵܫܵܐ. ܘܐܸܬ̣ܡ̱ܠܝܼ ܚܸܟ݂ܡ̱ܬ̣ܵܐ ܘܒ̣ܘܼܝܵܢܵܐ ܘܝܼܕܲܥܬ̣ܵܐ: ܠܡܸܥܒܲܕ݂ ܟܠ ܥܒ̣ܵܕ݂ ܕܲܢܚܵܫܵܐ ܘܐܸܬ̣ܵܐ ܠܘܵܬ̣ ܡܲܠܟܵܐ ܫܠܹܝܡܘܿܢ: ܘܲܥܒܲܕ݂ ܟܠܹܗ ܥܒ̣ܵܕ݂ܵܐ.

¹⁵ܘܨܵܪ ܬܪܹܝܢ ܥܲܡܘܼ̈ܕܹܐ ܕܲܢܚܵܫܵܐ ܪܵܘܡܹܗ ܕܥܲܡܘܼܕ݂ܵܐ ܚܲܕ݂: ܬܡܵܢܬܲܥܸܣܪܹ̈ܐ ܐܲܡ̈ܝܼܢ ܘܚܘܼܛܵܐ ܕܬܲܪܬܲܥܸܣܪܹ̈ܐ ܐܲܡ̈ܝܼܢ ܟܵܪܹܟ݂ ܠܹܗ. ܘܗܵܟܲܢܵܐ ܠܥܲܡܘܼܕ݂ܵܐ ܐ̄ܚܪܹܢܵܐ.

¹⁶ܘܬܲܪܬܹ̇ܝܢ ܟܪܵܡܵܬ̣ܵܐ ܥ̣ܒܲܕ݂ ܠܲܡܣܵܡ ܥܲܠ ܪܹܫܵܐ ܕܥܲܡܘܼ̈ܕܹܐ: ܕܢܸܣܟ̇ܬ̣ܵܐ ܕܲܢܚܵܫܵܐ. ܘܚܲܡܸܫ ܐܲܡ̈ܝܼܢ ܪܵܘܡܵܗ̇ ܕܲܟ݂ܪܵܡܬ̣ܵܐ ܚܕ݂ܵܐ: ܘܚܲܡܸܫ ܐܲܡ̈ܝܼܢ ܪܵܘܡܵܗ̇ ܕܲܟ݂ܪܵܡܬ̣ܵܐ ܐ̄ܚܪܹܬܵܐ.

¹⁷ܘܗܸܠܩܵܐ ܥ̣ܒܲܕ݂: ܗܸܠܩܵܐ ܓܕ݂ܝܼܠܵܐ. ܘܲܥܒܲܕ݂ ܫܸܫ̈ܠܵܬ̣ܵܐ ܠܲܟ݂ܪ̈ܵܡܵܬ̣ܵܐ ܕܥܲܠ ܪܹܫ ܥܲܡܘܼ̈ܕܹܐ: ܫܒܲܥ ܠܲܟ݂ܪܵܡܬ̣ܵܐ ܚܕ݂ܵܐ: ܘܲܫܒܲܥ ܠܲܟ݂ܪܵܡܬ̣ܵܐ ܐ̄ܚܪܹܬ̣ܵܐ.

¹⁸ܘܲܥܒܲܕ݂ ܥܲܡܘܼ̈ܕܹܐ ܬܪܹܝܢ ܣܸܕ݂ܪ̈ܝܼܢ ܟܲܕ݂ ܚܵܕ݂ܪܵܐ ܥܲܠ ܗܸܠܩܵܐ ܚܲܕ݂: ܠܲܡܟܲܣܵܝܘܼ ܟܪ̈ܵܡܵܬ̣ܵܐ ܕܥܲܠ ܪܹܫ ܥܲܡܘܼ̈ܕܹܐ. ܘܗܵܟܲܢܵܐ ܐܵܦ ܠܥܲܡܘܼܕ݂ܵܐ ܐ̄ܚܪܹܢܵܐ.

¹⁹ܘܲܟ݂ܪ̈ܵܡܵܬ̣ܵܐ ܕܥܲܠ ܪܹܫ ܥܲܡܘܼ̈ܕܹܐ ܥܒ̣ܵܕ݂ܵܐ ܕܫܘܿܫܲܢܬܵܐ: ܘܲܥܒܲܕ݂ ܒܐܸܣܛܘܵܐ ܐܲܪܒܲܥ ܐܲܡ̈ܝܼܢ.

²⁰ܘܲܟ݂ܪ̈ܵܡܵܬ̣ܵܐ ܕܥܲܠ ܬܪܹܝܢ ܥܲܡܘܼ̈ܕܹܐ: ܐܵܦ ܡ̣ܢ ܠܥܸܠ ܡ̣ܢ ܠܘܼܩܒܲܠ ܓܲܒܵܐ ܕܠܘܼܩܒܲܠ ܗܸܠܩܵܐ: ܘܪ̈ܘܼܡܵܢܹܐ ܡܲܐܬܹ̇ܝܢ. ܬܪܹܝܢ ܣܸܕ݂ܪ̈ܝܼܢ ܟܲܕ݂ ܚܵܕ݂ܪܵܐ ܟܪܵܡܬ̣ܵܐ ܚܕ݂ܵܐ. ܘܗܵܟܲܢܵܐ ܟܪܵܡܬ̣ܵܐ ܐ̄ܚܪܹܬܵܐ.

²¹ܘܲܥܒܲܕ݂ ܥܲܡܘܼ̈ܕܹܐ ܕܐܸܣܛܘܵܐ ܕܗܲܝܟ̇ܠܵܐ: ܘܐܲܩܝܼܡ ܠܥܲܡܘܼܕ݂ܵܐ ܕܡ̣ܢ ܝܲܡܝܼܢܵܐ: ܘܲܩ̣ܪܵܐ ܫܡܹܗ ܝܵܟ݂ܝܼܢ. ܘܐܲܩܝܼܡ ܠܥܲܡܘܼܕ݂ܵܐ ܕܡ̣ܢ ܣܸܡܵܠܵܐ: ܘܲܩ̣ܪܵܐ ܫܡܹܗ ܒܵܥܵܙ.

²²ܘܥܲܠ ܪܹܫܵܐ ܕܥܲܡܘܼ̈ܕܹܐ ܥܒ̣ܵܕ݂ܵܐ ܕܫܘܿܫܲܢܬܵܐ. ܘܲܫܠܸܡ̣ ܥܒ̣ܵܕ݂ܗܘܿܢ ܕܥܲܡܘܼ̈ܕܹܐ.

²³ܘܲܥ̣ܒܲܕ݂ ܝܲܡܵܐ ܕܢܸܣܟ̇ܬ̣ܵܐ: ܥܣܲܪ ܐܲܡ̈ܝܼܢ: ܡ̣ܢ ܣܸܦܬܹܗ: ܘܲܥܕܲܡܵܐ ܠܣܸܦܬܹܗ: ܓܠܝܼܠ ܟܲܕ݂ ܚܵܕܲܪ ܘܚܲܡܸܫ ܐܲܡ̈ܝܼܢ ܪܵܘܡܹܗ ܘܚܘܼܛܵܐ ܕܲܬ̣ܠܵܬ̣ܝܼܢ ܐܲܡ̈ܝܼܢ ܟܵܪܸܟ݂ ܠܹܗ ܟܲܕ݂ ܚܵܕܲܪ.

²⁴ܘܲܦܩܝܼ̈ܥܹܐ ܠܬܲܚܬ̇ ܡ̣ܢ ܣܸܦܬܹܗ ܟܲܕ݂ ܚܵܕܲܪ ܟܪܝܼܟ݂ܝܼܢ ܠܹܗ: ܥܣܲܪ ܐܲܡ̈ܝܼܢ ܟܪܝܼܟ݂ܝܼܢ ܠܝܲܡܵܐ ܟܲܕ݂ ܚܵܕܲܪ: ܬܪܹܝܢ ܣܸܕ݂ܪ̈ܝܼܢ ܕܲܦܩܝܼܥܹ̈ܐ ܕܲܢܣܝܼܟ݂ܝܼܢ ܒܢܸܣܟ̇ܬ̣ܵܐ.

²⁵ܘܩܵܐܹ̇ܡ ܥܲܠ ܬܪܸܥܣܲܪ ܬܵܘܪ̈ܝܼܢ. ܬܠܵܬ̣ܵܐ ܦܵܢܹ̇ܝܢ ܠܓܲܪܒ̇ܝܵܐ: ܘܲܬ̣ܠܵܬ̣ܵܐ ܦܵܢܹ̇ܝܢ ܠܡܲܥ̱ܪܒ̣ܵܐ: ܘܲܬ̣ܠܵܬ̣ܵܐ ܦܵܢܹ̇ܝܢ ܠܬܲܝܡ̣ܢܵܐ: ܘܲܬ̣ܠܵܬ̣ܵܐ ܦܵܢܹ̇ܝܢ ܠܡܲܕ݂ܢ̱ܚܵܐ ܘܝܲܡܵܐ ܥܠܲܝܗܘܿܢ ܠܥܸܠ ܡܸܢܗܘܿܢ ܡ̣ܢ ܠܥܸܠ: ܘܐܲܚܪܵܝܬ̇ܗܘܿܢ ܠܓ̣ܵܘ ܒܲܝܬܵܐ.

²⁶ܘܲܥܒ̣ܵܝܹܗ ܦܫܸܟ݂: ܘܣܸܦܬܹܗ ܐܲܝܟ݂ ܣܸܦܬܹܗ ܕܟ݂ܵܣܵܐ: ܘܦܸܪܥܵܐ ܕܫܘܿܫܲܢܬܵܐ ܬܪܹܝܢ ܐܲܠܦ̈ܝܼܢ ܡܲܬ̣ܪ̱̈ܝܵܢ ܐܵܚܹ̇ܕ݂.

²⁷ܘܲܥ̣ܒܲܕ݂ ܐܲܓܵܢܹ̈ܐ ܥܣܲܪ ܕܲܢܚܵܫܵܐ. ܐܲܪܒܲܥ ܐܲܡ̈ܝܼܢ ܐܘܼܪܟܵܗ̇ ܕܐܲܓܵܢܵܐ ܚܕ݂ܵܐ: ܘܐܲܪܒܲܥ ܐܲܡ̈ܝܼܢ ܦܬ̣ܵܝܵܗ̇: ܘܲܬ̣ܠܵܬ̣ ܐܲܡ̈ܝܼܢ ܪܵܘܡܵܗ̇.

²⁸ܘܲܥܒ̣ܵܕ݂ܗܹܝܢ ܕܐܲܓܵܢܹ̈ܐ: ܓܕ݂ܵܢܦܹ̈ܐ ܐܝܼܬ̣ ܠܗܹܝܢ.

²⁹ܘܥܲܠ ܓܕ݂ܵܢܦܹ̈ܐ ܕܒܹܝܬ̣ ܚܢܵܩܹ̈ܐ: ܐܲܪ̈ܝܵܘܵܬ̣ܵܐ: ܘܬ̣ܵܘܪܹ̈ܐ: ܘܲܟ݂ܪ̈ܘܿܒܹܐ. ܘܥܲܠ ܟܣܵܝܹ̈ܐ ܗܵܟܲܢܵܐ: ܡ̣ܢ ܠܥܸܠ ܘܡ̣ܢ ܠܬܲܚܬ̇ ܐܲܪ̈ܝܵܘܵܬ̣ܵܐ ܘܬ̣ܵܘܪܹ̈ܐ: ܚܸܙܘܵܐ ܥܒ̣ܵܕ݂ܵܐ ܫܲܦܝܼܪܵܐ.

³⁰ܘܐܲܪܒܲܥ ܓܝܼ̈ܓ̣ܠܹܐ ܕܲܢܚܵܫܵܐ: ܠܐܲܓܵܢܵܐ ܚܕ݂ܵܐ: ܘܣܲܪܢܵܐ ܕܲܢܚܵܫܵܐ ܘܐܲܪܒܲܥ ܙܵܘ̈ܝܵܬ̣ܵܐ ܡܕܲܒ̇ـ̈ـܩܵܢ ܠܗܹܝܢ. ܘܟܲܬ̣̈ܦܵܬ̣ܵܐ ܐܝܼܬ̣ ܠܗܹܝܢ: ܠܬܲܚܬ̇ ܡܸܢܗܹܝܢ: ܟܲܬ̣̈ܦܵܬ̣ܵܐ ܕܢܸܣܟ̇ܬ̣ܵܐ ܥܒ̣ܵܕ݂ܵܐ ܫܲܦܝܼܪܵܐ.

³¹ܘܦܘܼܡܵܗ̇ ܕܐܲܓܵܢܵܐ ܡ̣ܢ ܠܓ̣ܵܘ ܐܲܡܵܐ. ܘܦܘܼܡܵܗ̇ ܓܠܝܼܠ ܐܲܡܵܐ: ܘܦܲܠܓ̇ܘܼܬ̣ ܐܲܡܵܐ. ܘܐܵܦ ܥܲܠ ܦܘܼܡܵܗ̇ ܩܥ̈ܝܼܠܵܬ̣ܵܐ ܘܲܓ̣ܕ݂ܵܢܦܹ̈ܐ. ܡܪܲܒ̇ܥܝܼܢ ܘܠܵܐ ܓܠܝܼܠܝܼܢ.

³²ܘܐܲܪܒܲܥ ܓܝܼ̈ܓ̣ܠܝܼܢ ܡ̣ܢ ܠܬܲܚܬ̇ ܠܲܓ̣ܕ݂ܵܢܦܹ̈ܐ: ܘܐܝܼ̈ܕ݂ܵܗܵܬ̣ܵܐ ܕܓ̣ܝܼ̈ܓ̣ܠܹܐ ܒܐܲܓܵܢܵܐ ܚܕ݂ܵܐ ܘܪܵܘܡܵܗ̇ ܕܓ̣ܝܼܓ̣ܠܵܐ ܚܕ݂ܵܐ ܐܲܡܵܐ ܘܦܸܠܓ̇ܘܼܬ̣ ܐܲܡܵܐ.

³³ܘܲܥܒ̣ܵܕ݂ܵܐ ܕܓ̣ܝܼ̈ܓ̣ܠܹܐ ܐܲܝܟ݂ ܥܒ̣ܵܕ݂ܵܐ ܕܓ̣ܝܼ̈ܓ̣ܠܹܐ ܕܡܲܪܟܲܒ̣ܬܵܐ. ܘܐܝܼ̈ܕ݂ܵܗܵܬ̣ܗܹܝܢ: ܘܲܓ̣ܒܲܝ̈ܗܹܝܢ: ܘܨܸܒ̣ܬ̇ܗܹܝܢ: ܘܫܘܼܦ̱ܪܗܹܝܢ: ܥܒ̣ܵܕ݂ܵܐ ܕܢܸܣܟ̇ܬ̣ܵܐ.

³⁴ܘܐܲܪܒܲܥ ܟܲܬ̣̈ܦܵܢ ܥܲܠ ܐܲܪܒܲܥ ܙܵܘ̈ܝܵܬ̣ܵܗ̇ ܕܐܲܓܵܢܵܐ ܚܕ݂ܵܐ ܡ̣ܢ ܐܲܓܵܢܹ̈ܐ.

³⁵ܟܲܬ̣̈ܦܵܬ̣ܵܗ̇ ܘܟܲܪܣܵܗ̇ ܕܐܲܓܵܢܵܐ ܦܸܠܓܘܼܬ̣ ܐܲܡܵܐ: ܘܪܵܘܡܵܗ̇ ܓܠܝܼܠ ܟܲܕ݂ ܚܵܕ݂ܪܵܐ: ܥܲܠ ܪܹܫܵܗ̇ ܕܐܲܓܵܢܵܐ. ܘܐܝܼ̈ܕ݂ܵܗܵܬ̣ܵܗ̇ ܘܲܓ̣ܕ݂ܵܢܦܹ̈ܝܗ̇ ܡܸܢܵܗ̇.

³⁶ܘܲܪܫܲܡ ܥܲܠ ܠܘܼܚܹ̈ܐ ܐܝܼ̈ܕ݂ܵܗܵܬ̣ܵܗ̇: ܘܥܲܠ ܓܕ݂ܵܢܦܹ̈ܝܗ̇ ܟܪ̈ܘ̇ܒܹܐ: ܘܐܲܪ̈ܝܵܘܵܬ̣ܵܐ: ܘܕܸܩ̈ܠܹܐ: ܟܲܕ݂ ܚܵܕ݂ܪܵܐ.

³⁷ܗܵܟܲܢܵܐ ܥ̣ܒܲܕ݂ ܐܸܢܹܝܢ ܠܲܥܣܲܪ ܐܲܓܵܢ̈ܝܼܢ: ܢܸܣܟ̇ܬ̣ܵܐ ܚܕ݂ܵܐ: ܘܲܡܫܘܼܚܬ̣ܵܐ ܚܕ݂ܵܐ: ܘܩܵܘܡܬ̣ܵܐ ܚܕ݂ܵܐ ܠܟ݂ܠܗܹܝܢ.

³⁸ܘܲܥ̣ܒܲܕ݂ ܥܣܲܪ ܠܲܩܢ̈ܝܼܢ ܕܲܢܚܵܫܵܐ. ܐܲܪܒ̇ܥܝܼܢ ܡܲܬ̣ܪ̱̈ܝܵܢ ܐܲܚܕ݂ܵܐ ܠܲܩܢܵܐ ܚܕ݂ܵܐ: ܐܲܪܒܲܥ ܐܲܡ̈ܝܼܢ ܠܲܩܢܵܐ ܚܕ݂ܵܐ ܥܲܠ ܐܲܓܵܢܵܐ ܚܕ݂ܵܐ. ܗܵܟܲܢܵܐ ܠܲܥܣܲܪ ܐܲܓܵܢ̈ܝܼܢ.

³⁹ܘܲܥܒܲܕ݂ ܐܸܢܹܝܢ ܠܐܲܓܵܢܹ̈ܐ: ܚܲܡܸܫ ܡ̣ܢ ܣܸܛܪܹܗ ܕܒܲܝܬܵܐ ܡ̣ܢ ܝܲܡܝܼܢܵܐ: ܘܚܲܡܸܫ ܡ̣ܢ ܣܸܛܪܹܗ ܕܒܲܝܬܵܐ ܡ̣ܢ ܣܸܡܵܠܵܐ. ܘܝܲܡܵܐ ܥܒܲܕ݂ ܡ̣ܢ ܣܸܛܪܹܗ ܕܒܲܝܬܵܐ: ܡ̣ܢ ܬܲܝܡܲܢ ܡܲܕ݂ܢܲܚ ܠܘܼܩܒܲܠ ܬܲܝ̱ܡܢܵܐ.

⁴⁰ܘܲܥ̣ܒܲܕ݂ ܚܝܼܪܵܡ ܠܲܩܢܹ̈ܐ: ܘܩܲܕ݂ܣܸܐ: ܘܐܝܼܪܹ̈ܐ: ܘܩܲܪ̈ܕ݂ܵܠܹܐ ܘܫܲܠܸܡ ܚܝܼܪܵܡ ܠܡܸܥܒܲܕ݂ ܟܠܹܗ ܥܒ̣ܵܕ݂ܵܐ ܕܲܥܒܲܕ݂ ܡܲܠܟܵܐ ܫܠܹܝܡܘܿܢ ܒܒܲܝܬܹ̇ܗ ܕܡܵܪܝܵܐ.

⁴¹ܥܲܡܘܼ̈ܕܹܐ ܬܪܹܝܢ: ܘܐܲܓܵܢܹ̈ܐ ܕܥܲܠ ܪܹܫ ܥܲܡܘܼ̈ܕܹܐ ܬܲܪܬܹ̇ܝܢ: ܘܲܟ݂ܣܵܝܹ̈ܐ ܬܪܝܼܢ: ܠܲܡܟܲܣܵܝܘܼ ܬܲܪܬܹ̇ܝܢ ܐܲܓܵܢܹ̈ܐ ܕܥܲܠ ܪܹܫ ܥܲܡܘܼ̈ܕܹܐ.

⁴²ܘܪ̈ܘܼܡܵܢܹܐ ܐܲܪܒܲܥܡܵܐܐ ܠܲܬ̣ܪܹܝܢ ܟܣܵܝܹ̈ܐ: ܬܪܹܝܢ ܣܸܕ݂ܪ̈ܝܼܢ ܕܪ̈ܘܼܡܵܢܹܐ ܠܲܟ݂ܣܵܝܵܐ ܚܲܕ݂: ܠܲܡܟܲܣܵܝܘܼ ܬܪܹܝܢ ܦܘܼܡܹ̈ܐ ܕܐܲܓܵܢܹ̈ܐ ܕܥܲܠ ܪܹܫ ܥܲܡܘܼ̈ܕܹܐ.

⁴³ܘܐܲܓܵܢܹ̈ܐ ܥܣܲܪ: ܘܠܲܩܢܹ̈ܐ ܥܣܲܪ ܕܥܲܠ ܐܲܓܵܢܹ̈ܐ.

⁴⁴ܘܝܲܡܵܐ ܚܲܕ݂: ܘܬ̣ܵܘܪܹ̈ܐ ܬܪܸܥܣܲܪ ܕܲܬ̣ܚܹܝܬ̣ ܝܲܡܵܐ.

⁴⁵ܘܩܲܕ݂ܣܹ̈ܐ ܘܐܝܼܪܹ̈ܐ: ܘܩܲܪ̈ܕ݂ܵܠܹܐ: ܘܟ݂ܠܗܘܿܢ ܡܵܐܢܹ̈ܐ ܕܬܸܫܡܸܫܬܵܐ: ܕܲܥܒܲܕ݂ ܚܝܼܪܵܡ ܠܡܲܠܟܵܐ ܫܠܹܝܡܘܿܢ ܠܒܲܝܬܹ̇ܗ ܕܡܵܪܝܵܐ: ܕܲܢܚܵܫܵܐ ܩܘܿܪܲܢܬ̣ܵܝܵܐ.

⁴⁶ܒܟ݂ܵܟ݂ܵܪ ܕܒܲܦܩܲܥܬ̣ܵܐ ܕܐܝܼܪܝܼܚܘܿ: ܥܲܠ ܓܹܢ̄ܒ̣ ܝܘܿܪܕ̇ܢܵܢ ܢܣܲܟ݂ ܐܸܢܘܿܢ ܡܲܠܟܵܐ: ܒܫܘܼܦܪܵܗ̇ ܕܐܲܪܥܵܐ: ܒܹܝܬ̣ ܣܵܟ݂ܘܼܬ̣ ܘܒܹܝܬ̣ ܨܲܪܬܵܢ.

⁴⁷ܘܲܥ̣ܒܲܕ݂ ܫܠܹܝܡܘܿܢ ܟܠܗܘܿܢ ܡܵܐܢܹ̈ܐ ܕܣܘܿܓ̣ܵܐܐ ܕܛܵܒ̣. ܠܵܐ ܗܘ̤ܵܐ ܣܵܟ݂ܵܐ ܠܡܲܬ̣ܩܵܠܵܐ ܕܲܢܚܵܫܵܐ ܕܲܥܒܲܕ݂ ܡܲܠܟܵܐ ܫܠܹܝܡܘܿܢ ܠܒܲܝܬܹ̇ܗ ܕܡܵܪܝܵܐ.

⁴⁸ܟܠܗܘܿܢ ܡܵܐܢܹ̈ܐ ܕܒܲܝܬܹ̇ܗ ܕܡܵܪܝܵܐ: ܡܲܕ݂ܒ̇ܚܵܐ ܕܕܲܗܒ̣ܵܐ: ܘܦܵܬ̣ܘܿܪ̈ܵܐ ܕܕܲܗܒ̣ܵܐ: ܕܲܥܠܵܘܗܝ ܠܲܚܡܵܐ ܕܐܲܦܹ̈ܐ.

⁴⁹ܘܲܡܢܵܪ̈ܵܬ̣ܵܐ ܕܕܲܗܒ̣ܵܐ ܣܢܝܼܢܵܐ. ܚܲܡܸܫ ܡ̣ܢ ܝܲܡܝܼܢܵܐ: ܘܚܲܡܸܫ ܡ̣ܢ ܣܸܡܵܠܵܐ ܩܕ݂ܵܡ ܗܲܝܟ̇ܠܵܐ. ܘܟܲܦܹ̈ܐ: ܘܲܫܪ̈ܵܓܹܐ: ܘܡܲܠܩܛܹ̈ܐ ܕܕܲܗܒ̣ܵܐ.

⁵⁰ܘܡܲܙ̱ܡܟܹ̈ܐ: ܘܢܲܦ̮ܛܹܪܹ̈ܐ: ܘܫܵܚ̈ܠܹܐ: ܘܟܲܦܹ̈ܐ: ܘܦܝܼܪ̈ܡܹܐ ܕܕܲܗܒ̣ܵܐ ܣܢܝܼܢܵܐ: ܘܲܩܪ̈ܵܡܹܐ ܕܬܲܪܥܵܐ ܓܵܘܵܝܵܐ ܕܲܩܕ݂ܘܿܫ ܩܘܼܕ݂ܫܹ̈ܐ: ܘܲܕ̇ܬܲܪܥܵܐ ܒܲܝܬܵܐ ܕܗܲܝܟ̇ܠܵܐ: ܕܕܲܗܒ̣ܵܐ ܣܢܝܼܢܵܐ.

⁵¹ܘܲܫܠܸܡ ܟܠܹܗ ܥܒ̣ܵܕ݂ܵܐ ܕܲܥܒܲܕ݂ ܡܲܠܟܵܐ ܫܠܹܝܡܘܿܢ ܒܒܲܝܬܹ̇ܗ ܕܡܵܪܝܵܐ. ܘܐܲܝܬ̇ܝܼ ܫܠܹܝܡܘܿܢ ܩܘܼܕ݂ܫܵܐ ܕܕ݂ܵܘܝܼܕ݂ ܐܲܒ̣ܘܼܗܝ: ܟܸܣܦܵܐ: ܘܕܲܗܒ̣ܵܐ: ܘܡܵܐܢܹ̈ܐ: ܐܲܥܲܠ ܠܓܲܙܵܐ ܕܒܲܝܬܹ̇ܗ ܕܡܵܪܝܵܐ.