Read Aramaic Peshita 1 Kings 8 Bible Online

1 Kings 8 - Aramaic Peshita bible

1 Kings 8

¹ܗܵܝܕܹ̇ܝܢ ܟܲܢܸܫ ܫܠܹܝܡܘܿܢ ܠܟ݂ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܘܲܠܟ݂ܠܗܘܿܢ ܪܹ̈ܫܹܐ ܕܫܲܒ̣̈ܛܹܐ: ܘܪܵܘ̱ܪ̈ܒ̣ܵܢܹܐ ܕܐܲܒ̣ܵـ̈ـܗܵܬ̣ܵܐ. ܘܐܸܬ̣ܟܲܢܲܫܘ ܠܘܵܬ̣ ܡܲܠܟܵܐ ܫܠܹܝܡܘܿܢ ܠܐܘܿܪܸܫܠܸܡ: ܠܡܲܣܵܩܘܼ ܠܐܵܪܘܿܢܵܐ ܕܲܩܝܵܡܹܗ ܕܡܵܪܝܵܐ ܡ̣ܢ ܩܪܝܼܬܹܗ: ܕܗ̤ܝ ܗ̄ܝ̣ ܨܸܗܝܘܿܢ.

²ܘܐܸܬ̣ܟܲܢܲܫܘ ܠܘܵܬ̣ ܡܲܠܟܵܐ ܫܠܹܝܡܘܿܢ: ܟܠܗܘܿܢ ܕܒܹܝܬ̣ ܝܼܣܪܵܝܹܾܠ: ܒܝܲܪܚܵܐ ܕܥܲܠܠܵـ̈ـܬ̣ܵܐ ܒܓܚܲܓܵܐ: ܗ̤ܘܝܘܼ ܝܲܪܚܵܐ ܫܒ̣ܝܼܥܵܝܵܐ.

³ܘܐܸܬ̣ܵܘ ܟܠܗܘܿܢ ܫܲܒ̣ܛܹܐ ܕܝܼܣܪܵܝܹܠ: ܘܫܲܩܠܘܼܗܝ ܟܵܗ̈ܢܹܐ ܠܐܲܪܘܿܢܹܗ ܕܡܵܪܝܵܐ.

⁴ܘܐܲܣܩܘܼܗܝ ܠܗܲܝܟ̇ܠܹܗ ܕܡܵܪܝܵܐ: ܘܲܠܡܲܫܟܲܢܙܲܒ̣ܢܵܐ: ܘܲܠܡܵܐܢܲܝ̈ ܩܘܼܕ݂ܫܵܐ ܕܡܲܫܟܢܵܐ: ܘܲܣܠܸܩܘ ܥܲܡܗܘܿܢ ܟܵܗ̈ܢܹܐ ܘܠܹܘܵܝܹ̈ܐ ܕܝܼܣܪܵܝܹܠ.

⁵ܘܡܲܠܟܵܐ ܫܠܹܝܡܘܿܢ ܘܟ݂ܠܵܗ̇ ܟܢܘܼܫܬܵܐ ܕܝܼܣܪܵܝܹܠ ܕܐܸܬ̣ܘܲܥܕ݂ܘ ܠܘܵܬܹ̈: ܩܵܝ̇ܡܝܼܢ ܥܲܡܹܗ ܩܕ݂ܵܡ ܐܵܪܘܿܢܵܐ: ܘܲܡܕܲܒ̇ܚܝܼܢ ܥܵـ̈ـܢܵܐ ܘܬ̣ܵܘܪܹ̈ܐ ܕܠܵܐ ܡܸܬ̣ܡ̱ܢܹܝܢ: ܘܠܵܐ ܡܸܬ̣ܚܲܫܒܲܢ ܡ̣ܢ ܣܘܿܓ̣ܐܗܘܿܢ.

⁶ܘܐܲܝܬ̇ܝܼܘ ܟܵܗܢܹ̈ܐ ܠܐܵܪܘܿܢܵܐ ܕܲܩܝܵܡܹܗ ܕܡܵܪܝܵܐ ܠܐܲܬ̣ܪܹܗ ܠܗܲܝܟ̇ܠܵܐ: ܠܒܲܝܬܵܐ ܕܲܩܕ݂ܘܿܫ ܩܘܼܕ݂ܫܹ̈ܐ: ܠܲܬ̣ܚܹܝܬ̣ ܓܸܦܲܝ̈ܗܘܿܢ ܕܲܟ݂ܪ̈ܘܿܒܹܐ.

⁷ܡܸܛܠ ܕܲܟ݂ܪ̈ܘܿܒܹܐ ܦܪܝܼܣܝܼܢ ܓܸܦܲܝ̈ܗܘܿܢ ܒܐܲܬ̣ܪܵܐ ܩܲܕ̇ܝܼܫܵܐ: ܘܡܲܛܠܠܝܼܢ ܒܓܸܦܲܝ̈ܗܘܿܢ ܥܲܠ ܐܵܪܘܿܢܵܐ: ܘܥܲܠ ܩܘܿܦܵܘ̈ܗܝ ܡ̣ܢ ܠܥܸܠ.

⁸ܘܐܲܪܝܼܟ݂ܝܼܢ ܗ̄ܘ̣ܵܘ ܩ̈ܘܿܦܹܐ: ܘܡܸܬ̣ܚܙܹܝܢ ܗ̄ܘ̣ܵܘ ܪܹ̈ܫܲܝܗܘܿܢ ܕܩ̈ܘܿܦܹܐ ܡ̣ܢ ܩܘܼܕ݂ܫܵܐ ܠܲܩܕ݂ܵܡ ܗܲܝܟ̇ܠܵܐ: ܘܲܠܒܲܪ ܠܵܐ ܡܸܬ̣ܚܙܹܝܢ ܗ̄ܘ̣ܵܘ. ܘܲܗܘ̤ܵܘ ܬܲܡܵܢ ܥܕܲܡܵܐ ܠܝܵܘܡܵܢܵܐ.

⁹ܠܲܝܬ̇ ܒܐܵܪܘܿܢܵܐ: ܐܸܠܵܐ ܐܸܢ ܬܲܪܬܹ̇ܝܢ ܠܘܼܚܹ̈ܐ ܕܟܹܐܦܵܐ: ܕܣܵܡ̣ ܬܲܡܵܢ ܡܘܼܫܹܐ ܒܚܘܿܪܝܼܒ̣: ܟܲܕ݂ ܐܲܩܝܼܡ ܡܵܪܝܵܐ ܩܝܵܡܵܐ ܥܲܡ ܒ̈ܢܲܝ ܝܼܣܪܵܝܹܠ: ܟܲܕ݂ ܢܦܲܩ̣ܘ ܡ̣ܢ ܡܸܨܪܹܝܢ.

¹⁰ܘܟܲܕ݂ ܢܦܲܩ̣ܘ ܟܵܗ̈ܢܹܐ ܡ̣ܢ ܩܘܼܕ݂ܫܵܐ: ܥܢܵܢܵܐ ܐܸܬ̣̱ܡܠܝܼ ܒܲܝܬܹ̇ܗ ܕܡܵܪܝܵܐ.

¹¹ܘܠܵܐ ܐܸܫܟܲܚܲܘ ܟܵܗ̈ܢܹܐ ܠܲܡܩܵܡ ܘܠܲܡܫܲܡܵܫܘܼ ܡ̣ܢ ܩܕ݂ܵܡ ܥܢܵܢܵܐ: ܡܸܛܠ ܕܐܸܬ̣̱ܡܠܝܼ ܐܝܼܩܵܪܹܗ ܕܡܵܪܝܵܐ ܒܲܝܬܹ̇ܗ ܕܡܵܪܝܵܐ.

¹²ܗܵܝܕܹ̇ܝܢ ܐܸܡܲܪ ܫܠܹܝܡܘܿܢ: ܡܵܪܝܵܐ ܐܲܢ̄ܬ̇ ܐܸܡܲܪܬ̇ ܠܡܸܫܪܵܐ ܒܥܲܪܦܠܵܐ.

¹³ܘܐܸܢܵܐ ܡܸܒ̣ܢܵܐ ܒܢܹ̇ܝܬ̣ ܒܹܝܬ̣ ܡܲܥ̱ܡܪܵܐ ܠܵܟ݂: ܡܲܬ̣ܩܢܵܐ ܠܡܵܘܬܵܒ̣ܵܟ݂ ܠܥܵܠܡ̈ܝܼܢ.

¹⁴ܘܐܲܦܢܝܼ ܡܲܠܟܵܐ ܐܲܦܵܘ̈ܗܝ: ܘܒܲܪܸܟ݂ ܠܟ݂ܠܹܗ ܟܸܢܫܵܐ ܕܝܼܣܪܵܝܹܠ: ܘܟ݂ܠܹܗ ܟܸܢܫܵܐ ܕܝܼܣܪܵܝܹܠ ܩܵܝ̇ܡܝܼܢ.

¹⁵ܘܐܸܡܲܪ: ܒܪܝܼܟ݂ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܡܲܠܸܠ ܒܦܘܼܡܹܗ ܥܲܡ ܕܵܘܝܼܕ݂ ܐܵܒ̣ܝ ܘܒ̣ܐܝܼܕ݂ܵܘ̈ܗܝ ܫܲܠܸܡ: ܘܐܸܡܲܪ.

¹⁶ܡ̣ܢ ܝܵܘܡܵܐ ܕܐܲܦܩܹܬ̣ ܠܥܲܡܝ ܒ̈ܢܲܝ ܝܼܣܪܵܝܹܠ: ܡ̣ܢ ܡܸܨܪܹܝܢ: ܠܵܐ ܨܒܹܝܬ̣ ܒܲܩܪܝܼܬ̣ܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܠܡܸܒ̣ܢܵܐ ܒܲܝܬܵܐ ܕܢܸܗܘܹܐ ܫܹܡܝ ܬܲܡܵܢ. ܘܲܨܒܹ̇ܝܬ̣ ܒܕ݂ܵܘܝܼܕ݂ ܕܢܸܗܘܹܐ ܥܲܠ ܥܲܡܝ ܝܼܣܪܵܝܹܠ.

¹⁷ܘܲܗܘ̤ܵܐ ܒܠܸܒܹ̇ܗ ܕܕ݂ܵܘܝܼܕ݂ ܐܲܒ̣ܝ: ܠܡܸܒ̣ܢܵܐ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

¹⁸ܘܐܸܡܲܪ ܡܵܪܝܵܐ ܠܕ݂ܵܘܝܼܕ݂ ܐܵܒ̣ܝ: ܚܠܵܦ ܕܲܗܘ̤ܵܬ̣ ܒܠܸܒܵܟ݂ ܠܡܸܒ̣ܢܵܐ ܒܲܝܬܵܐ ܠܫܹܡܝ: ܫܲܦܝܼܪ ܥ̣ܒܲܕ̇ܬ̇ ܕܲܗܘ̤ܵܬ̣ ܒܠܸܒܵܟ݂.

¹⁹ܒܪܲܡ ܐܲܢ̄ܬ̇ ܠܵܐ ܬܸܒ̣ܢܸܐ ܒܲܝܬܵܐ ܠܫܹܡܝ: ܐܸܠܵܐ ܐܸܢ ܒܪܵܟ݂ ܕܢܵܦܹܩ ܡ̣ܢ ܚܲܨܵܟ݂: ܗ̤ܘ ܢܸܒ̣ܢܸܐ ܒܲܝܬܵܐ ܠܫܹܡܝ.

²⁰ܘܐܲܩܝܼܡ ܡܵܪܝܵܐ ܦܸܬ̣ܓ̣ܵܡܵܐ ܕܐܸܡܲܪ: ܘܩܵܡܹ̇ܬ̣ ܚܠܵܦ ܕܵܘܝܼܕ݂ ܐܵܒ̣ܝ: ܘܝܼܬܸܒܹ̇ܬ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ ܐܲܝܟ݂ ܕܐܸܡܲܪ ܡܵܪܝܵܐ: ܘܲܒ̣ܢܹ̇ܝܬ̣ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

²¹ܘܣܵܡܹܬ̣ ܬܲܡܵܢ ܐܵܪܘܿܢܵܐ ܕܲܩܝܵܡܹܗ ܕܡܵܪܝܵܐ: ܕܐܲܩܝܼܡ ܥܲܡ ܐܲܒ̣ܵܗܲܝ̈ܢ ܟܲܕ݂ ܐܲܦܸܩ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ.

²²ܘܩܵܡ̣ ܫܠܹܝܡܘܿܢ ܩܕ݂ܵܡ ܡܲܕ݂ܒ̇ܚܹܗ ܕܡܵܪܝܵܐ ܠܘܼܩܒܲܠ ܟܠܹܗ ܟܸܢܫܵܐ ܕܝܼܣܪܵܝܹܠ. ܘܲܦܪܲܣ ܐܝܼܕ݂ܵܘ̈ܗܝ ܠܲܫܡܲܝܵܐ. ܘܨܲܠܝܼ: ܘܐܸܡܲܪ.

²³ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܠܲܝܬ̇ ܐܲܟ݂ܘܵܬ̣ܵܟ݂ ܒܲܫܡܲܝܵܐ ܡ̣ܢ ܠܥܸܠ: ܘܥܲܠ ܐܲܪܥܵܐ ܡ̣ܢ ܠܬܲܚܬ̇. ܕܢܵܛܲܪ ܐܲܢ̄ܬ̇ ܩܝܵܡܵܐ ܘܛܲܝܒ̇ܘܼܬ̣ܵܐ ܠܥܲܒ̣ܕܲܝ̈ܟ ܕܲܡܗܲܠܟ݂ܝܼܢ ܩܕ݂ܵܡܲܝܟ ܒܩܘܼܫܬܵܐ: ܒܟ݂ܠܹܗ ܠܸܒ̇ܗܘܿܢ ܘܲܒ̣ܟ݂ܠܹܗ ܢܲܦ̮ܫܗܘܿܢ.

²⁴ܕܲܢܛܲܪܬ̇ ܠܥܲܒ̣ܕܵܟ݂ ܕܵܘܝܼܕ݂ ܐܵܒ̣ܝ ܡܸܕܸ̇ܡ ܕܐܸܡܲܪܬ̇ ܠܹܗ. ܕܡܲܠܠܬ̇ ܒܦܘܼܡܵܟ݂: ܘܒ̣ܐܝܼܕܲܝ̈ܟ ܫܲܡ̣ܠܝܼܬ̇ ܐܲܝܟ݂ ܕܝܵܘܡܵܢܵܐ.

²⁵ܘܗܵܫܵܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܛܲܪ ܠܥܲܒ̣ܕܵܟ݂ ܕܵܘܝܼܕ݂ ܐܵܒ̣ܝ ܡܸܕܸ̇ܡ ܕܐܸܡܲܪܬ̇ ܠܹܗ: ܕܠܵܐ ܢܸܥܢܲܕ݂ ܠܵܟ݂ ܒܪܵܐ ܡ̣ܢ ܩܕ݂ܵܡܲܝ ܕܝܵܬܹܒ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ: ܒܲܠܚܘܿܕ݂ ܐܸܢ ܢܸܛܪܘܿܢ ܒܢܲܝ̈ܟ ܐܘܼܪ̈ܚܵܬ̣ܗܘܿܢ ܠܲܡܗܲܠܵܟ݂ܘܼ ܩܕ݂ܵܡܲܝ ܒܩܘܼܫܬܵܐ: ܐܲܝܟ݂ ܩܕ݂ܵܡܲܝ.

²⁶ܘܗܵܫܵܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. ܢܸܬ̣ܗܲܝܡܲܢ ܦܸܬ̣ܓ̣ܵܡܵܟ݂ ܕܝܼܡܲܝܬ̇ ܠܥܲܒ̣ܕܵܟ݂ ܕܵܘܝܼܕ݂ ܐܵܒ̣ܝ.

²⁷ܡܸܛܠ ܕܫܲܪܝܼܪܵܐܝܼܬ̣ ܝܼܬܸܒ̣ ܐܲܠܵܗܵܐ ܥܲܠ ܐܲܪܥܵܐ. ܗܵܐ ܫܡܲܝܵܐ ܘܲܫܡܲܝ̈ ܫܡܲܝܵܐ ܠܵܐ ܡܣܲܒ̇ܪܝܼܢ ܠܵܟ݂: ܠܵܐ ܟ݂ܢ ܒܲܝܬܵܐ ܗܵܢܵܐ ܕܲܒ̣ܢܹܝܬ̣.

²⁸ܘܐܸܬ̣ܦܲܢ ܥܲܠ ܨܠܘܿܬܹܗ ܕܥܲܒ̣ܕܵܟ݂ ܘܥܲܠ ܒܵܥܘܼܬܹܗ: ܡܵܪܝܵܐ ܐܲܠܵܗܝ: ܠܡܸܫܡܲܥ ܒܵܥܘܼܬ̣ܵܐ ܘܲܨܠܘܿܬ̣ܵܐ: ܕܥܲܒ̣ܕܵܟ݂ ܡܨܲܠܹܐ ܩܕ݂ܵܡܲܝܟ ܝܵܘܡܵܢܵܐ.

²⁹ܕܢܸܗ̱ܘ̈ܝܵܢ ܥܲܝܢܝ̈ܟ ܦܬ̣ܝܼ̈ܚܵܢ ܥܲܠ ܒܲܝܬܵܐ ܗܵܢܵܐ ܒܐܝܼܡܵܡܵܐ ܘܲܒ̣ܠܸܠܝܵܐ: ܒܐܲܬ̣ܪܵܐ ܕܐܸܡܲܪܬ̇ ܕܢܸܗܘܹܐ ܫܹܡܝ ܬܲܡܵܢ ܠܡܸܫܡܲܥ ܨܠܘܿܬ̣ܵܐ: ܕܥܲܒ̣ܕܵܟ݂ ܡܨܲܠܹܐ ܩܕ݂ܵܡܲܝܟ ܥܲܠ ܐܲܬ̣ܪܵܐ ܗܵܢܵܐ.

³⁰ܘܲܫܡܲܥ ܒܵܥܘܼܬܹܗ ܕܥܲܒ̣ܕܵܟ݂ ܘܲܕ݂ܥܲܡܵܟ݂ ܝܼܣܪܵܝܹܠ: ܕܲܡܨܲܠܹܝܢ ܩܕ݂ܵܡܲܝܟ ܒܐܲܬ̣ܪܵܐ ܗܵܢܵܐ. ܘܐܲܢ̄ܬ̇ ܬܸܫܡܲܥ ܡ̣ܢ ܡܲܥ̱ܡܪܵܟ݂ ܡ̣ܢ ܫܡܲܝܵܐ: ܘܬܸܫܒ̇ܘܿܩ.

³¹ܢܸܚܛܹܐ ܓܲܒ̣ܪܵܐ ܒܚܲܒ̣ܪܹܗ: ܘܲܢܚܲܝܒ̣ܝܼܘܗܝ ܡܵܘܡܵܬ̣ܵܐ ܠܡܵܘܡܵܝܘܼܬܹܗ: ܘܢܹܐܬܹܐ ܘܢܹܐܡܹܐ ܩܕ݂ܵܡ ܡܲܕ݂ܒ̇ܚܵܟ݂ ܒܒܲܝܬܵܐ ܗܵܢܵܐ.

³²ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ: ܘܬܸܥܒܸ̇ܕ݂ ܘܲܬ̇ܕ݂ܘܼܢ ܠܥܲܒ̣ܕܲܝ̈ܟ ܠܲܡܚܲܝܵܒ̣ܘܼ ܠܚܲܝܵܒ̣ܵܐ: ܘܲܠܡܸܬܲܠ ܐܘܼܪܚܹܗ ܒܪܹܫܹܗ: ܘܠܲܡܙܲܟܵܝܘܼ ܠܙܲܟܵܝܵܐ: ܘܲܠܡܸܬܲܠ ܠܹܗ ܐܲܝܟ݂ ܙܲܟܵܝܘܼܬܹܗ.

³³ܘܟܲܕ݂ ܢܸܬ̇ܬ̇ܒܲܪ ܥܲܡܵܟ݂ ܝܼܣܪܵܝܹܠ ܒܲܩܪܵܒ̣ܵܐ ܕܲܒ̣ܥܸܠܕ̇ܒ̣ܵܒܹ̈ܐ: ܟܲܕ݂ ܢܸܚܛܘܿܢ ܩܕ݂ܵܡܲܝܟ: ܘܲܢܬ̣ܘܼܒ̣ܘܼܢ ܠܘܵܬ̣ܵܟ݂ ܘܢܵܘܕ̇ܘܿܢ ܠܲܫܡܵܟ݂: ܘܲܢܨܲܠܘܿܢ ܘܢܸܒ̣ܥܘܿܢ ܡܸܢܵܟ݂ ܒܐܲܬ̣ܪܵܐ ܗܵܢܵܐ.

³⁴ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ: ܘܬܸܫܒ̇ܘܿܩ ܠܲܚܛܵܗܹ̈ܐ ܕܥܲܒ̣ܕܲܝ̈ܟ ܘܲܕ݂ܥܲܡܵܟ݂. ܝܼܣܪܵܝܹܠ: ܘܬܲܗܦܲܟ݂ ܐܸܢܘܿܢ ܠܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵܗܲܝ̈ܗܘܿܢ.

³⁵ܘܟܲܕ݂ ܢܸܬ̣ܟ̇ܠܘܿܢ ܫܡܲܝܵܐ: ܘܠܵܐ ܢܸܗܘܹܐ ܡܸܛܪܵܐ ܥܲܠ ܕܲܚܛܵܘ ܠܵܟ݂: ܘܢܹܐܬ̣ܘܿܢ ܘܲܢܨܲܠܘܿܢ ܒܐܲܬ̣ܪܵܐ ܗܵܢܵܐ ܘܢܵܘܕ̇ܘܿܢ ܠܲܫܡܵܟ݂: ܘܡ̣ܢ ܚܛܵܗܲܝ̈ܗܘܿܢ ܢܸܬ̣ܦܢܘܿܢ.

³⁶ܟܲܕ݂ ܬܸܥܢܸܐ ܐܸܢܘܿܢ: ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ. ܘܬܸܫܒ̇ܘܿܩ ܠܲܚܛܵܗܹ̈ܐ ܕܥܲܒ̣ܕܲܝ̈ܟ ܘܲܕ݂ܥܲܡܵܟ݂ ܝܼܣܪܵܝܹܠ: ܟܲܕ݂ ܬܲܠܸܦ ܐܸܢܘܿܢ ܐܘܼܪܚܵܐ ܛܵܒ̣ܬ̣ܵܐ ܕܢܹܐܙܠ̄ܘܿܢ ܒܵܗ̇. ܘܬܸܬܸ̇ܠ ܡܸܛܪܵܐ ܥܲܠ ܐܲܪܥܵܐ ܕܝܲܗ̄ܒ̣ܬ̇ ܠܥܲܡܵܟ݂ ܠܝܘܼܪܬܵܢܵܐ.

³⁷ܘܟܲܦܢܵܐ ܟܲܕ݂ ܢܸܗܘܹܐ ܒܐܲܪܥܵܐ: ܘܡܵܘܬܵܢܵܐ ܘܫܘܼܩܵܦܵܐ ܘܝܲܪܩܵܢܵܐ: ܘܩܲܡܨܵܐ ܘܙܵܚܠܵܐ ܟܲܕ݂ ܢܸܗܘܹܐ: ܘܟܲܕ݂ ܢܥܝܼܩܘܼܢ ܠܗܘܿܢ ܒܥܸܠܕ̇ܒ̣ܵܒܹ̈ܐ ܒܲܚܕ݂ܵܐ ܡ̣ܢ ܡܕ݂ܝܼ̈ܢܵܬ̣ܗܘܿܢ: ܘܟ݂ܠ ܟܘܼܪܗܵܢ: ܘܟ݂ܠ ܡܲܚܘܵܐ.

³⁸ܘܟ݂ܠ ܨܠܘܿܬ̣ܵܐ ܘܟ݂ܠ ܒܵܥܘܼܬ̣ܵܐ ܕܬܸܗܘܹܐ ܠܟ݂ܠ ܐ̄ܢܵܫ ܠܟܠܹܗ ܥܲܡܵܟ݂ ܝܼܣܪܵܝܹܠ: ܕܢܸܕ̇ܥܘܼܢ ܓܒܲܪ ܡܲܟ݂ܬܵܫܵܐ ܕܠܸܒܹ̇ܗ: ܘܢܸܦܫܘܿܛ ܐܝܼܕ݂ܵܘ̈ܗܝ ܩܕ݂ܵܡܲܝܟ ܒܒܲܝܬܵܐ ܗܵܢܵܐ.

³⁹ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ: ܡ̣ܢ ܡܲܬ̣ܩܢܵܐ ܕܡܵܘܬ̇ܒ̣ܵܟ݂: ܘܬܸܫܒ̇ܘܿܩ ܘܬܸܥܒܸ̇ܕ݂: ܘܬܸܬܸ̇ܠ ܠܓܲܒ̣ܪܵܐ ܐܲܝܟ݂ ܐܘܼܪ̈ܚܵܬܹܗ: ܕܬܸܕܲܥ ܠܸܒܹ̇ܗ. ܡܸܛܠ ܕܐܲܢ̄ܬ̇ܘܼ ܒܲܠܚܘܿܕܲܝܟ ܝܵܕܲܥ ܐܲܢ̄ܬ̇ ܠܸܒܵܐ ܕܟ݂ܠܗܘܿܢ ܒܢܲܝ̈ܢܵܫܵܐ.

⁴⁰ܡܸܛܠ ܕܢܸܕ݂ܚ̄ܠܘܿܢ ܠܵܟ݂ ܟܠܗܘܿܢ ܝܵܘ̈ܡܵܬ̣ܵܐ ܕܗܸܢܘܿܢ ܚܲܝܝܼܢ: ܥܲܠ ܐܲܦܲܝ̈ ܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵܗܲܝ̈ܗܘܿܢ.

⁴¹ܘܐܵܦ ܥܲܠ ܢܘܼܟ݂ܪܵܝܵܐ ܕܠܵܐ ܗܘ̤ܵܐ ܡ̣ܢ ܥܲܡܵܟ݂ ܝܼܣܪܵܝܹܠ: ܘܢܹܐܬܹܐ ܡ̣ܢ ܐܲܪܥܵܐ ܪܲܚܝܼܩܬܵܐ ܡܸܛܠ ܫܡܵܟ݂.

⁴²ܟܲܕ݂ ܢܸܫܡ̱ܥܘܿܢ ܫܡܵܟ݂ ܪܲܒܵܐ: ܘܐܝܼܕ݂ܵܟ݂ ܬܲܩܝܼܦܬܵܐ: ܘܲܕ݂ܪܵܥܵܟ݂ ܪܵܡܵܐ: ܘܢܹܐܬܹܐ ܘܲܢܨܲܠܹܐ ܩܕ݂ܵܡܲܝܟ ܒܒܲܝܬܵܐ ܗܵܢܵܐ.

⁴³ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ ܡ̣ܢ ܡܲܬ̣ܩܢܵܐ ܕܡܵܘܬ̇ܒ̣ܵܟ݂: ܘܬܸܥܒܸ̇ܕ݂ ܐܲܝܟ݂ ܕܩܵܪܹܐ ܠܵܟ݂ ܢܘܼܟ݂ܪܵܝܵܐ: ܡܸܛܠ ܕܢܸܕ̇ܥܘܿܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ ܫܡܵܟ݂: ܠܡܸܕ݂ܚܲܠ ܐܲܝܟ݂ ܥܲܡܵܟ݂ ܝܼܣܪܵܝܹܠ: ܘܲܠܡܸܕܲܥ ܕܲܫܡܵܟ݂ ܐܸܬ̣ܩܪܝܼ ܥܲܠ ܒܲܝܬܵܐ ܗܵܢܵܐ ܕܲܒ̣ܢܹ̇ܝܬ̣.

⁴⁴ܘܟܲܕ݂ ܢܸܦܘܿܩ ܥܲܡܵܟ݂ ܠܲܩܪܵܒ̣ܵܐ ܥܲܠ ܒܥܸܠܕ̇ܒ̣ܵܒܲܝ̈ܗܘܿܢ ܒܐܘܼܪܚܵܐ ܕܲܬ̣ܫܲܕܲܪ ܐܸܢܘܿܢ: ܘܲܢܨܲܠܘܿܢ ܩܕ݂ܵܡܲܝܟ ܡܵܪܝܵܐ ܒܐܘܼܪܚܵܐ ܕܲܩܪܝܼܬ̣ܵܐ ܕܲܨܒ̇ܝܼܬ̇ ܒܵܗ̇: ܘܒܲܝܬܵܐ ܗܵܢܵܐ ܕܲܒ̣ܢܹ̇ܝܬ̣ ܠܲܫܡܵܟ݂.

⁴⁵ܘܬܸܫܡܲܥ ܡ̣ܢ ܫܡܲܝܵܐ ܨܠܘܿܬ̣ܗܘܿܢ ܘܒ̣ܵܥܘܼܬ̣ܗܘܿܢ: ܘܬܸܥܒܸ̇ܕ݂ ܕܝܼܢܗܘܿܢ ܟܲܕ݂ ܢܸܚܛܘܿܢ ܠܵܟ݂.

⁴⁶ܡܸܛܠ ܕܠܲܝܬ̇ ܐ̄ܢܵܫ ܕܠܵܐ ܚܵܛܹ̇ܐ: ܘܪܵܓܹܙ̣ ܐܲܢ̄ܬ̇ ܥܠܲܝܗܘܿܢ: ܘܡܲܫܠܸܡ ܐܲܢ̄ܬ̇ ܠܗܘܿܢ ܩܕ݂ܵܡ ܒܥܸܠܕ̇ܒ̣ܵܒܹ̈ܐ: ܘܫܵܒܹ̇ܝܢ ܠܗܘܿܢ ܫܵܒܲܝ̈ܗܘܿܢ: ܠܐܲܪܥܵܐ ܕܲܒ̣ܥܸܠܕ̇ܒ̣ܵܒܲܝ̈ܗܘܿܢ ܕܪܲܚܝܼܩܵܐ ܐܵܘ ܕܩܲܪܝܼܒ̣ܵܐ.

⁴⁷ܘܢܸܬ̣ܚܲܫܒ̣ܘܿܢ ܒܠܸܒ̇ܗܘܿܢ ܒܐܲܪܥܵܐ ܕܐܸܫܬ̇ܒ̣ܝܼܘ ܠܬܲܡܵܢ: ܘܲܢܬ̣ܘܼܒ̣ܘܼܢ: ܘܢܸܒ̣ܥܘܿܢ ܡܸܢܵܟ݂ ܒܐܲܪܥܵܐ ܕܫܵܒܲܝ̈ܗܘܿܢ: ܘܢܹܐܡܪܘܿܢ: ܚܛܲܝܢ ܘܐܲܣܟܸ̇ܠܢ ܘܐܲܥܠܝܼܢ.

⁴⁸ܘܢܸܬ̣ܦܢܘܿܢ ܠܘܵܬ̣ܵܟ݂ ܡ̣ܢ ܟܠܹܗ ܠܸܒ̇ܗܘܿܢ: ܘܡ̣ܢ ܟܠܵܗ̇ ܢܲܦ̮ܫܗܘܿܢ: ܒܐܲܪܥܵܐ ܕܲܒ̣ܥܸܠܕ̇ܒ̣ܵܒܲܝ̈ܗܘܿܢ ܕܲܫܒ̣ܵܘ ܐܸܢܘܿܢ. ܘܲܢܨܲܠܘܿܢ ܩܕ݂ܵܡܲܝܟ ܒܐܘܼܪܚܵܐ ܕܐܲܪܥ̱ܗܘܿܢ ܕܝܲܗ̄ܒ̣ܬ̇ ܠܐܲܒ̣ܵܗܲܝ̈ܗܘܿܢ: ܩܪܝܼܬ̣ܵܐ ܕܲܓ̣ܒܝܼܬ̇: ܘܒܲܝܬܵܐ ܕܲܒ̣ܢܹ̇ܝܬ̣ ܠܲܫܡܵܟ݂.

⁴⁹ܘܬܸܫܡܲܥ ܡ̣ܢ ܫܡܲܝܵܐ ܡ̣ܢ ܡܲܬ̣ܩܢܵܐ ܕܡܵܘܬ̇ܒ̣ܵܟ݂: ܨܠܘܿܬ̣ܗܘܿܢ ܘܒ̣ܵܥܘܼܬ̣ܗܘܿܢ ܘܬܸܥܒܸ̇ܕ݂ ܕܝܼܢܗܘܿܢ.

⁵⁰ܘܬܸܫܒ̇ܘܿܩ ܠܥܲܡܵܟ݂ ܥܲܠ ܕܲܚܛܵܘ ܠܵܟ݂: ܘܥܲܠ ܟܠܗܹܝܢ ܣܲܟ݂̈ܠ̱ܘܵܬ̣ܗܘܿܢ ܕܐܲܣܟܸ̇ܠܘ ܒܵܟ݂: ܘܬܸܬܸ̇ܠ ܐܸܢܘܿܢ ܠܪ̈ܲܚܡܹܐ ܩܕ݂ܵܡ ܫܲܒܲܝ̈ܗܘܿܢ: ܘܢܸܪܚ̄ܡܘܼܢ ܐܸܢܘܿܢ.

⁵¹ܡܸܛܠ ܕܥܲܡܵܟ݂ ܐܸܢܘܿܢ ܘܝܵܪܬ̇ܘܼܬ̣ܵܟ݂: ܕܐܲܦܸܩܬ̇ ܐܸܢܘܿܢ ܡ̣ܢ ܡܸܨܪܝܼܢ ܡ̣ܢ ܟܘܼܪܵܐ ܕܦܲܪܙܠܵܐ.

⁵²ܘܢܸܗ̱ܘ̈ܝܵܢ ܥܲܝܢܲܝ̈ܟ ܦܬ̣ܝܼ̈ܚܵܢ ܥܲܠ ܒܵܥܘܼܬ̣ܵܐ ܕܥܲܒ̣ܕܲܝ̈ܟ ܘܲܕ݂ܥܲܡܵܟ݂ ܝܼܣܪܵܝܹܠ: ܘܬܸܫܡܲܥ ܐܸܢܘܿܢ ܒܟ݂ܠ ܕܩܵܪܹܝܢ ܠܵܟ݂.

⁵³ܡܸܛܠ ܐܲܢ̄ܬ̇ ܦܪܲܫܬ̇ ܐܸܢܘܿܢ ܠܵܟ݂ ܠܝܵܪܬ̇ܘܼܬ̣ܵܐ: ܡ̣ܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ: ܐܲܝܟ݂ ܕܐܸܡܲܪܬ̇ ܒܐܝܼܕ݂ܵܐ ܕܡܘܼܫܹܐ ܥܲܒ̣ܕܵܟ݂: ܟܲܕ݂ ܐܲܦܸܩܬ̇ ܠܐܲܒ̣ܵܗܲܝ̈ܗܘܿܢ: ܡ̣ܢ ܡܸܨܪܹܝܢ ܡܵܪܝܵܐ ܐܲܠܵܗܵܐ.

⁵⁴ܘܟܲܕ݂ ܫܲܠܸܡ ܫܠܹܝܡܘܿܢ ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ ܐܲܠܵܗܵܐ: ܟܠܵܗ̇ ܨܠܘܿܬ̣ܵܐ ܘܒ̣ܵܥܘܼܬ̣ܵܐ ܗܵܕܹܐ: ܩܵܡ ܡ̣ܢ ܩܕ݂ܵܡ ܡܲܕ݂ܒ̇ܚܹܗ ܕܡܵܪܝܵܐ: ܕܲܗܘ̤ܵܐ ܒܲܪܝܼܟ݂ ܥܲܠ ܒܘܼܪ̈ܟܵܘܗܝ: ܘܐܝܼܕ݂ܵܘ̈ܗܝ ܦܪ̈ܝܼܣܵܢ ܠܲܫܡܲܝܵܐ.

⁵⁵ܘܩܵܡ ܘܒܲܪܸܟ݂ ܠܟ݂ܠܹܗ ܟܸܢܫܵܐ ܕܝܼܣܪܵܝܹܠ ܒܩܵܠܵܐ ܪܵܡܵܐ: ܘܐܸܡܲܪ.

⁵⁶ܒܪܝܼܟ݂ ܗ̄ܘ̣ ܡܵܪܝܵܐ ܐܲܠܵܗܵܐ: ܕܝܲܗ̄ܒ̣ ܢܝܵܚܵܐ ܠܝܼܣܪܵܝܹܠ ܥܲܡܹܗ ܐܲܝܟ݂ ܕܐܸܡܲܪ: ܘܠܵܐ ܢܦܲܠ ܚܲܕ݂ ܦܸܬ̣ܓ̣ܵܡܵܐ ܡ̣ܢ ܟܠܗܘܿܢ ܦܸܬ̣ܓ̣ܵܡܹ̈ܐ ܛܵܒܹ̈ܐ ܕܐܸܡܲܪ ܡܵܪܝܵܐ ܒܐܝܼܕ݂ܵܐ ܕܡܘܼܫܹܐ ܥܲܒ̣ܕܹ̇ܗ.

⁵⁷ܘܢܸܗܘܹܐ ܡܵܪܝܵܐ ܐܲܠܵܗܲܢ ܥܲܡܲܢ: ܐܲܝܟ݂ ܕܲܗܘ̤ܵܐ ܥܲܡ ܐܲܒ̣ܵܗܲܝ̈ܢ: ܠܵܐ ܢܲܪܦܹܝܢ ܘܠܵܐ ܢܸܫܒ̇ܩܲܢ.

⁵⁸ܠܡܲܦܢܵܝܘܼ ܠܸܒܲܢ ܠܘܵܬܹܗ: ܠܲܡܗܲܠܵܟ݂ܘܼ ܒܐܘܼܪ̈ܚܵܬܹܗ: ܠܡܸܛܲܪ ܦܘܼܩܕܵܢܵܘ̈ܗܝ: ܘܲܩܝܵܡܵܘ̈ܗܝ: ܘܕ݂ܝܼܢܵܘ̈ܗܝ: ܘܢܵܡܘܿܣܵܘ̈ܗܝ: ܕܦܲܩܸܕ݂ ܠܐܲܒ̣ܵܗܲܝ̈ܢ.

⁵⁹ܘܢܸܗܘܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ ܕܲܒ̣ܥܹܝܬ̣ ܡ̣ܢ ܩܕ݂ܵܡ ܡܵܪܝܵܐ: ܩܲܪܝܼܒ̣ܝܼܢ ܠܡܵܪܝܵܐ ܐܲܠܵܗܵܐ ܒܠܸܠܝܵܐ ܘܒ̣ܐܝܼܡܵܡܵܐ: ܠܡܸܥܒܲܕ݂ ܕܝܼܢܵܐ ܕܥܲܒ̣ܕܹ̇ܗ: ܘܕ݂ܝܼܢܵܐ ܕܥܲܡܹܗ ܝܼܣܪܵܝܹܠ ܟܠܝܘܿܡ ܒܝܘܿܡ.

⁶⁰ܡܸܛܠ ܕܢܸܕ̇ܥܘܼܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ ܕܡܵܪܝܵܐ ܗ̄ܘ̣ ܐܲܠܵܗܵܐ: ܘܠܲܝܬ̇ ܬܘܼܒ̣ ܠܒܲܪ ܡܸܢܹܗ.

⁶¹ܘܢܸܗܘܹܐ ܠܸܒ̇ܟ݂ܘܿܢ ܫܠܸܡ ܥܲܡ ܡܵܪܝܵܐ ܐܲܠܵܗܲܢ: ܠܲܡܗܲܠܵܟ݂ܘܼ ܒܐܘܼܪ̈ܚܵܬܹܗ: ܘܲܠܡܸܛܲܪ ܦܘܼܩܕܵܢܵܘ̈ܗܝ: ܘܲܩܝܵܡܵܘ̈ܗܝ: ܘܕ݂ܝܼܢܵܘ̈ܗܝ: ܘܢܵܡܘܿܣܵܘ̈ܗܝ ܐܲܝܟ݂ ܕܝܵܘܡܵܢܵܐ.

⁶²ܘܡܲܠܟܵܐ ܫܠܹܝܡܘܿܢ ܘܟ݂ܠܹܗ ܝܼܣܪܵܝܹܠ ܥܲܡܹܗ: ܡܕܲܒ̇ܚܝܼܢ ܗ̄ܘ̣ܵܘ ܕܸܒ̣ܚܬ̣ܵܐ ܪܲܒ̇ܬ̣ܵܐ ܩܕ݂ܵܡ ܡܵܪܝܵܐ.

⁶³ܘܕܲܒܲܚ ܫܠܹܝܡܘܿܢ ܕܸܒ̣ܚܹ̈ܐ ܫܲܠܡܹ̈ܐ ܩܕ݂ܵܡ ܡܵܪܝܵܐ: ܬܵܘܪܹ̈ܐ ܥܸܣܪܝܼܢ ܘܲܬ̣ܪܹܝܢ ܐܲܠܦ̈ܝܼܢ: ܘܥܵـ̈ـܢܵܐ ܡܵܐܐ ܘܥܸܣܪܝܼܢ ܐܲܠܦ̈ܝܼܢ.

⁶⁴ܘܚܲܕܸ̇ܬ̣ܘ ܠܒܲܝܬܹ̇ܗ ܕܡܵܪܝܵܐ: ܡܲܠܟܵܐ ܘܟܠܗܘܿܢ ܒ̈ܢܲܝ ܝܼܣܪܵܝܹܠ ܒܝܵܘܡܵܐ ܗܵܘ̇: ܩܲܕܸ̇ܫ ܡܲܠܟܵܐ ܠܓ̣ܵܘܵܗ̇ ܕܕ݂ܵܪܬܵܐ ܕܲܩܕ݂ܵܡ ܒܲܝܬܹ̇ܗ ܕܡܵܪܝܵܐ. ܡܸܛܠ ܕܲܥܒܲܕ݂ ܬܲܡܵܢ ܥܠܵـ̈ـܘܵܬ̣ܵܐ ܘܩܘܼܪ̈ܒܵܢܹܐ: ܘܬܲܪܒܵܐ ܕܫܲܠܡܹ̈ܐ. ܡܸܛܠ ܕܡܲܕ݂ܒ̇ܚܵܐ ܕܲܢܚܵܫܵܐ ܕܲܩܕ݂ܵܡ ܡܵܪܝܵܐ: ܙܥܘܿܪ ܗ̄ܘ̣ܵܐ ܠܲܡܣܲܝܒܵܪܘܼ ܥܠܵـ̈ـܘܵܬ̣ܵܐ: ܘܩܘܼܪ̈ܒܵܢܹܐ ܘܬܲܪܒܵܐ ܕܫܲܠܡܹ̈ܐ.

⁶⁵ܘܲܥܒܲܕ݂ ܫܠܹܝܡܘܿܢ ܒܝܵܘܡܵܐ ܗܵܘ̇ ܚܲܓܵܐ: ܘܟ݂ܠܹܗ ܝܼܣܪܵܝܹܠ ܥܲܡܹܗ ܟܢܝܼܫܝܼܢ: ܡ̣ܢ ܡܲܥܠܵܢܵܐ ܕܲܚܡܵܬ̣: ܘܲܥܕܲܡܵܐ ܠܡܲܥܠܵܢܵܐ ܕܢܲܚܠܵܐ ܕܡܸܨܪܹܝܢ ܩܕ݂ܵܡ ܡܵܪܝܵܐ ܐܲܠܵܗܲܢ: ܫܲܒ̣ܥܵܐ ܝܵܘ̈ܡܝܼܢ ܘܫܲܒ̣ܥܵܐ ܝܵܘ̈ܡܝܼܢ: ܐܲܪܒܲܬܲܥܣܲܪ ܝܵܘ̈ܡܝܼܢ.

⁶⁶ܘܲܒ̣ܝܵܘܡܵܐ ܕܲܬ̣ܡܵܢܝܵܐ: ܫܲܕܲܪܘ ܥܲܡܵܐ ܘܒܲܪܸܟ݂ܘ ܠܡܲܠܟܵܐ. ܘܐܸܙܲܠ̣ܘ ܠܡܲܫܟ̇ܢܲܝ̈ܗܘܿܢ ܟܲܕ݂ ܚܵܕܹܝܢ ܘܫܲܦܝܼܪ ܠܸܒ̇ܗܘܿܢ ܥܲܠ ܟܠܗܹܝܢ ܛܵܒ̣ܵـ̈ـܬ̣ܵܐ ܕܲܥܒܲܕ݂ ܡܵܪܝܵܐ ܠܕ݂ܵܘܝܼܕ݂ ܥܲܒ̣ܕܹ̇ܗ ܘܠܥܲܡܹܗ ܝܼܣܪܵܝܹܠ.