Read Aramaic Peshita 1 Kings 9 Bible Online

1 Kings 9 - Aramaic Peshita bible

1 Kings 9

¹ܘܟܲܕ݂ ܫܲܠܸܡ ܫܠܹܝܡܘܿܢ ܠܡܸܒ̣ܢܵܐ ܒܲܝܬܹ̇ܗ ܕܡܵܪܝܵܐ: ܘܒܲܝܬܹ̇ܗ ܕܡܲܠܟܵܐ: ܘܟ݂ܠܹܗ ܨܸܒ̣ܝܵܢܹܗ ܕܲܫܠܹܝܡܘܿܢ ܕܲܨܒ̣ܵܐ ܠܡܸܥܒܲܕ݂.

²ܗܵܝܕܹ̇ܝܢ ܐܸܬ̣ܓ̇ܠܝܼ ܡܵܪܝܵܐ ܥܲܠ ܫܠܹܝܡܘܿܢ ܕܬܲܪܬܹ̇ܝܢ ܙܲܒ̣ܢ̈ܝܼܢ: ܐܲܝܟ݂ ܕܐܸܬ̣ܓ̇ܠܝܼ ܥܠܵܘܗܝ ܒܓܸܒ̣ܥܘܿܢ.

³ܘܐܸܡܲܪ ܠܹܗ ܡܵܪܝܵܐ: ܫܸܡ̇ܥܹܬ̣ ܨܠܘܿܬ̣ܵܟ݂ ܘܒ̣ܵܥܘܼܬ̣ܵܟ݂ ܕܲܒ̣ܥܲܝܬ̇ ܡ̣ܢ ܩܕ݂ܵܡܲܝ: ܘܩܲܕ̇ܫܹ̇ܬ̣ ܠܝܼ ܒܲܝܬܵܐ ܗܵܢܵܐ ܕܲܒ̣ܢܲܝܬ̇: ܠܲܡܣܵܡ ܫܹܡܝ ܬܲܡܵܢ ܥܕܲܡܵܐ ܠܥܵܠܲܡ. ܘܢܸܗ̱ܘ̈ܝܵܢ ܥܲܝܢܲܝ̈ ܘܠܹܒ̇ܝ ܬܲܡܵܢ ܟܠܗܘܿܢ ܝܵܘ̈ܡܵܬ̣ܵܐ.

⁴ܘܐܲܢ̄ܬ̇ ܬܗܲܠܸܟ݂ ܩܕ݂ܵܡܲܝ ܐܲܝܟ݂ ܕܗܲܠܸܟ݂ ܕܵܘܝܼܕ݂ ܐܲܒ̣ܘܼܟ݂: ܒܬܲܡܝܼܡܘܼܬ̣ ܠܸܒܵܐ ܘܒܲܬ̣ܪܝܼܨܘܼܬ̣ܵܐ ܠܡܸܥܒܲܕ݂ ܐܲܝܟ݂ ܕܦܲܩܕ̇ܬܵܟ݂: ܘܲܩܝܵܡܝ̈ ܘܕ݂ܝܼܢܲܝ̈ ܬܸܛܲܪ.

⁵ܐܲܩܝܼܡ ܟܘܼܪܣܝܵܐ ܕܡܲܠܟ̇ܘܼܬ̣ܵܟ݂ ܥܲܠ ܝܼܣܪܵܝܹܠ ܠܥܵܠܲܡ: ܐܲܝܟ݂ ܕܐܸܡ̇ܪܹܬ̣ ܠܕ݂ܵܘܝܼܕ݂ ܐܲܒ̣ܘܼܟ݂: ܕܠܵܐ ܢܸܥܢܲܕ݂ ܠܵܟ݂ ܓܲܒ̣ܪܵܐ ܡ̣ܢ ܟܘܼܪܣܝܵܐ ܕܝܼܣܪܵܝܹܠ.

⁶ܘܐܸܢ ܡܸܗܦܲܟ݂ ܬܸܗܦܟ݂ܘܿܢ ܡ̣ܢ ܒܵܬܲܪܝ ܐܲܢ̄ܬ̇ܘܿܢ ܘܲܒ̣ܢܲܝ̈ܟ̇ܘܿܢ: ܘܠܵܐ ܬܸܛܪܘܿܢ ܦܘܼܩ̈ܕܵܢܲܝ ܘܲܩܝܵܡܲܝ̈ ܕܝܸܗ̄ܒܹ̇ܬ̣ ܩܕ݂ܵܡܲܝܟ̇ܘܿܢ: ܘܬܹܐܙܠ̄ܘܿܢ ܘܬܸܦ̱ܠܚܘܼܢ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܬܸܣܓܕ݂ܘܿܢ ܠܗܘܿܢ.

⁷ܐܵܘܒܸ̇ܕ݂ ܠܝܼܣܪܵܝܹܠ ܡ̣ܢ ܐܲܦܲܝ̈ ܐܲܪܥܵܐ ܕܝܸܗ̄ܒܹ̇ܬ̣ ܠܗܘܿܢ. ܘܒܲܝܬܵܐ ܕܩܲܕܫܹܬ̣ ܠܫܹܡܝ ܐܸܥܩ̄ܪܝܼܘܗܝ ܡ̣ܢ ܩܕ݂ܵܡܲܝ. ܘܢܸܗܘܹܐ ܝܼܣܪܵܝܹܠ ܠܡܲܬ̣ܠܵܐ ܘܲܠܬ̣ܘܼܢܵܝܵܐ ܒܟ݂ܠܗܘܿܢ ܥܲܡܡܹ̈ܐ.

⁸ܘܒܲܝܬܵܐ ܗܵܢܵܐ ܢܸܗܘܹܐ ܚܪܸܒ̣. ܘܟ݂ܠ ܕܢܸܥܒܲܪ ܥܠܵܘܗܝ: ܢܸܬ̣ܡܲܗ ܘܢܲܫܪܸܩ ܘܢܹܐܡܪܘܿܢ ܥܲܠ ܡܵܢܵܐ ܥܒܲܕ݂ ܡܵܪܝܵܐ ܗܵܟܲܢܵܐ ܠܐܲܪܥܵܐ ܗܵܕܹܐ ܘܲܠܒܲܝܬܵܐ ܗܵܢܵܐ.

⁹ܘܢܹܐܡܪܘܿܢ ܥܲܠ ܕܲܫܒܲܩ̣ܘ ܠܡܵܪܝܵܐ ܐܲܠܗܗܘܿܢ ܕܐܲܦܸܩ̣ ܠܐܲܒ̣ܵܗܲܝ̈ܗܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܘܐܸܚܲܕ݂ܘ ܒܐܲܠܵܗܹ̈ܐ ܕܥܲܡܡܹ̈ܐ ܐ̄ܚܪܸ̈ܵܢܹܐ: ܘܲܦܠܲܚ̣ܘ ܐܸܢܘܿܢ: ܘܲܣܓܲܕ݂ܘ ܠܗܘܿܢ: ܡܸܛܠ ܗܵܢܵܐ ܐܲܝܬ̇ܝܼ ܡܵܪܝܵܐ ܥܠܲܝܗܘܿܢ ܒܝܼܫܬܵܐ ܗܵܕܹܐ ܟܠܵܗ̇.

¹⁰ܘܲܗܘ̤ܵܐ ܡ̣ܢ ܒܵܬܲܪ ܥܸܣܪܝܼܢ ܫܢ̈ܝܼܢ: ܕܲܒ̣ܢܵܐ ܫܠܹܝܡܘܿܢ ܬܪܹܝܢ ܒܵܬܲܝܼ̈ܢ: ܒܲܝܬܹ̇ܗ ܕܡܵܪܝܵܐ ܘܒܲܝܬܹ̇ܗ ܕܡܲܠܟܵܐ.

¹¹ܘܚܝܼܪܵܡ ܡܲܠܟܵܐ ܕܨܘܿܪ ܬܲܪܣܝܼ ܠܲܫܠܹܝܡܘܿܢ: ܒܩܲܝܣܹ̈ܐ ܕܐܲܪ̈ܙܹܐ: ܘܲܒ̣ܩܲܝܣܹ̈ܐ ܕܫܲܪ̈ܘܲܝܢܹܐ: ܘܲܒ̣ܕܲܗܒ̣ܵܐ ܐܲܝܟ݂ ܕܲܨܒ̣ܵܐ: ܗܵܝܕܹ̇ܝܢ ܝܲܗ̄ܒ̣ ܡܲܠܟܵܐ ܫܠܹܝܡܘܿܢ ܠܚܝܼܪܵܡ ܥܸܣܪܝܼܢ ܩܘܼܪ̈ܝܵܐ ܒܐܲܪܥܵܐ ܕܲܓ̣ܠܝܼܠܵܐ.

¹²ܘܲܢܦܲܩ ܚܝܼܪܵܡ ܡ̣ܢ ܨܘܿܪ ܠܡܸܚܙܵܐ ܩܘܼܪ̈ܝܵܐ ܕܝܲܗ̄ܒ̣ ܠܹܗ ܫܠܹܝܡܘܿܢ: ܘܠܵܐ ܫܦܲܪ ܒܥܲܝܢܵܘ̈ܗܝ.

¹³ܘܐܸܡܲܪ: ܡܵܢܵܐ ܐܸܢܹܝܢ ܗܵܠܹܝܢ ܩܘܼܪ̈ܝܵܐ ܕܝܲܗ̄ܒ̣ܬ̇ ܠܝܼ: ܐܵܚܝ. ܘܲܩ̣ܪܵܐ ܐܸܢܹܝܢ ܐܲܪܥܵܐ ܕܟܲܒ̇ܘܿܠܝܼ: ܥܕܲܡܵܐ ܠܝܵܘܡܵܢܵܐ.

¹⁴ܘܫܲܕܲܪ ܡܲܠܟܵܐ ܚܝܼܪܵܡ ܠܡܲܠܟܵܐ ܫܠܹܝܡܘܿܢ: ܡܵܐܐ ܘܥܸܣܪܝܼܢ ܟܲܟ̇ܪܹ̈ܐ ܕܕܲܗܒ̣ܵܐ.

¹⁵ܘܗܵܢܵܐ ܦܘܼܣܩܵܢܵܐ ܕܡܲܕܲܐܬ̣ܵܐ ܕܐܲܣܸܩ̣ ܡܲܠܟܵܐ ܫܠܹܝܡܘܿܢ: ܠܡܸܒ̣ܢܵܐ ܒܲܝܬܹ̇ܗ ܕܡܵܪܝܵܐ ܘܒܲܝܬܹ̇ܗ. ܘܲܒ̣ܢܵܐ ܫܘܼܪܵܐ ܕܐܘܿܪܸܫܠܸܡ: ܘܡܲܠܘܿ: ܘܚܵܨܘܿܪ: ܘܡܲܓܕ̇ܘܿ: ܘܓ̣ܵܙܵܪ.

¹⁶ܘܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܣܠܸܩ ܗ̄ܘ̣ܵܐ ܘܟܲܒ̣ܫܵܗ̇ ܠܓ̣ܵܙܵܪ: ܘܐܵܘܩܕ݂ܵܗ̇ ܒܢܘܼܪܵܐ. ܘܠܲܟ݂ܢܲܥܢܵܝܹ̈ܐ ܕܝܵܬ̣ܒ̇ܝܼܢ ܒܲܩܪܝܼܬ̣ܵܐ ܩܲܛܸܠ. ܘܝܲܗ̄ܒܵܗ̇ ܡܵܘܗܲܒ̣ܬ̣ܵܐ ܠܒܲܪܬܹܗ ܐܲܢ̄ܬܲܬ̣ ܫܠܹܝܡܘܿܢ.

¹⁷ܘܲܒ̣ܢܵܐ ܫܠܹܝܡܘܿܢ ܠܓ̣ܵܙܵܪ ܘܲܠܒܹܝܬ̣ ܚܵܘܪܵܢ ܬܲܚܬܵܝܬܵܐ.

¹⁸ܘܲܠܒܲܥܠܘܼܬ̣: ܘܲܠܬ̣ܕ݂ܡܘܿܪ ܕܒܲܐܪܥܵܐ ܕܡܲܕ݂ܒ̇ܪܵܐ.

¹⁹ܘܲܠܟ݂ܠܗܹܝܢ ܩܘܼܪ̈ܝܵܐ ܕܒܹܝܬ̣ ܓܲܙܵܐ: ܕܲܗ̤̈ܘܲܝ ܠܲܫܠܹܝܡܘܿܢ: ܘܲܠܩܘܼܪ̈ܝܵܐ ܕܡܲܪ̈ܟ̇ܒ̣ܵܬ̣ܵܐ: ܘܲܠܩܘܼܪ̈ܝܵܐ ܕܦܲܪ̈ܵܫܹܐ: ܘܨܸܒ̣ܝܵܢܹܗ ܕܲܫܠܹܝܡܘܿܢ ܕܲܨܒ̣ܵܐ ܠܡܸܒ̣ܢܵܐ ܒܐܘܿܪܸܫܠܸܡ: ܘܲܒ̣ܠܸܒ̣ܢܵܢ: ܘܲܒ̣ܟ݂ܠܵܗ̇ ܐܲܪܥܵܐ ܕܫܘܼܠܛܵܢܹܗ.

²⁰ܘܟ݂ܠܹܗ ܥܲܡܵܐ ܕܐܸܫܬ̇ܚܲܕ݂ܘ ܡ̣ܢ ܐܵܡܘܿܪ̈ܵܝܹܐ: ܘܚܹܬ̣ܵܝܹ̈ܐ: ܘܦܲܪ̈ܙܵܝܹܐ: ܘܚܵـ̈ـܘܵܝܹܐ: ܘܝܵܒ̣ܘܿܣܵܝܹ̈ܐ: ܕܠܵܐ ܗܘ̤ܵܘ ܡ̣ܢ ܒܢܲܝ̈ ܝܼܣܪܵܝܹܠ.

²¹ܒܢܲܝ̈ܗܘܿܢ ܕܐܸܫܬ̇ܚܲܪܘ ܡ̣ܢ ܒܵܬܲܪܗܘܿܢ: ܘܠܵܐ ܐܸܫܟܲܚ̣ܘ ܒܢܲܝ̈ ܝܼܣܪܵܝܹܠ ܠܡܵܘܒܵܕ݂ܘܼ ܐܸܢܘܿܢ: ܥ̣ܒܲܕ݂ ܐܸܢܘܿܢ ܫܠܹܝܡܘܿܢ ܥܲܒ̣̈ܕܹ̇ܐ ܡܲܣܩܲܝ̈ ܡܲܕܲܐܬ̣ܵܐ: ܥܕܲܡܵܐ ܠܝܵܘܡܵܢܵܐ.

²²ܘܡ̣ܢ ܒܢܲܝ̈ ܝܼܣܪܵܝܹܠ ܠܵܐ ܝܲܗ̄ܒ̣ ܫܠܹܝܡܘܿܢ ܥܲܒ̣̈ܕܹ̇ܐ: ܡܸܛܠ ܕܗܸܢܘܿܢ ܐܸܢܘܿܢ ܓܲܒ̣ܪܹ̈ܐ ܩܪ̈ܲܒ̣ܬ݂ܵܢܹܐ: ܘܥܲܒ̣ܕܵܘ̈ܗܝ ܘܪܵܘ̱ܪ̈ܒ̣ܵܢܵܘܗܝ ܘܓܲܢ̄ܒܵܪ̈ܵܘܗܝ ܘܪܵܘ̱ܪ̈ܒ̣ܵܢܲܝ ܡܲܪ̈ܟ̇ܒ̣ܵܬܹܗ ܘܦܲܪ̈ܵܫܵܘܗܝ.

²³ܗܵܠܹܝܢ ܐܸܢܘܿܢ ܩܲܝܘܼܡܹ̈ܐ ܕܥܲܠ ܥܒ̣ܵܕ݂ܵܐ ܕܲܫܠܹܝܡܘܿܢ: ܚܲܡܸܫܡܵܐܐ ܘܚܲܡܫܝܼܢ ܕܫܲܠܝܼܛܝܼܢ ܥܲܠ ܥܲܡܵܐ ܘܡܲܥܒ̇ܕ݂ܝܼܢ ܒܲܥܒ̣ܵܕ݂ܵܐ.

²⁴ܘܒܲܪܬ ܦܸܪܥܘܿܢ ܣܸܠܩܲܬ̤ ܡ̣ܢ ܩܪܝܼܬܹܗ ܕܕ݂ܵܘܝܼܕ݂: ܠܒܲܝܬܵܐ ܕܲܒ̣ܢܵܐ ܠܵܗ̇ ܫܠܹܝܡܘܿܢ: ܗܵܝܕܹ̇ܝܢ ܒܢܵܐ ܠܡܲܠܘܿ.

²⁵ܘܡܲܣܸܩ ܗ̄ܘ̣ܵܐ ܫܠܹܝܡܘܿܢ: ܬܠܵܬ̣ ܙܲܒ̣ܢ̈ܝܼܢ ܒܫܲܢ̄ܬܵܐ: ܥܠܵـ̈ـܘܵܬ̣ܵܐ ܘܫܲܠܡܹ̈ܐ: ܥܲܠ ܡܲܕ݂ܒ̇ܚܵܐ: ܘܣܵܐܹ̇ܡ ܗ̄ܘ̣ܵܐ ܥܠܵܘܗܝ ܒܸܣܡܹ̈ܐ ܩܕ݂ܵܡ ܡܵܪܝܵܐ.

²⁶ܘܫܲܠܡܹܗ ܠܒܲܝܬܵܐ: ܘܲܥ̣ܒܲܕ݂ ܣܦ̈ܝܼܢܵܬ̣ܵܐ ܡܲܠܟܵܐ ܫܠܹܝܡܘܿܢ ܒܥܹܨܝܼܢܘܿ ܓܒܲܪ ܕܥܲܡ ܐܲܠܘܿܬ̣: ܥܲܠ ܣܦܲܬ̣ ܝܲܡܵܐ ܕܣܘܿܦ ܒܐܲܪܥܵܐ ܕܐܲܪܘܲܕ݂.

²⁷ܘܫܲܕܲܪ ܡܲܠܟܵܐ ܚܝܼܪܵܡ ܠܥܲܒ̣ܕܵܘ̈ܗܝ ܒܲܣܦ̈ܝܼܢܵܬ̣ܵܐ: ܓܲܒ̣ܪܹ̈ܐ ܣܲܦܵܢܹ̈ܐ ܕܝܵܕ݂ܥܝܼܢ ܝܲܡܵܐ ܥܲܡ ܥܲܒ̣ܕܵܘ̈ܗܝ ܕܲܫܠܹܝܡܘܿܢ.

²⁸ܘܐܸܬ̣ܵܘ ܠܐܵܘܦܹܝܪ: ܘܲܢܣܲܒ̣ܘ ܡ̣ܢ ܬܲܡܵܢ ܕܲܗܒ̣ܵܐ: ܐܲܪܒܲܥܡܵܐܐ ܘܥܸܣܪܝܼܢ ܟܲܟ̇ܪ̈ܝܼܢ: ܘܐܲܝܬ̇ܝܼܘ ܠܡܲܠܟܵܐ ܫܠܹܝܡܘܿܢ.