Read Aramaic Peshita 1 Chronicles 11 Bible Online

1 Chronicles 11 - Aramaic Peshita bible

1 Chronicles 11

¹ܘܐܸܬ̣ܟܲܢܲܫܘ ܟܠܗܘܿܢ ܒܢܲܝ̈ ܝܼܣܪܵܝܹܠ ܠܘܵܬ̣ ܕܵܘܝܼܕ݂ ܠܚܸܒ̣ܪܘܿܢ: ܘܐܵܡ̇ܪܝܼܢ ܠܹܗ: ܕܡܵܟ݂ ܚܢܲܢ ܘܒܸܣܪܵܟ݂: ܘܐܵܦ ܐܸܬ̣ܡܵܠܝܼ ܘܲܡܢܵܬ̣ܡܵܠܝ.

²ܟܲܕ݂ ܫܵܐܘܿܠ ܗܘ̤ܵܐ ܡܲܠܟܵܐ ܥܠܲܝܢ: ܐܲܢ̄ܬ̇ ܢܵܦܹܩ ܗ̄ܘܲܝܬ̇: ܘܥܵܐܹ̇ܠ ܒܪܹܫܹܗ ܕܝܼܣܪܵܝܹܠ. ܘܐܸܡܪ ܠܵܟ݂ ܡܵܪܝܵܐ: ܙܸܠ ܐܲܢ̄ܬ̇ ܬܸܪܥܸܐ ܠܥܲܡܝ ܝܼܣܪܵܝܹܠ ܘܐܲܢ̄ܬ̇ ܬܸܗܘܹܐ ܡܕܲܒ̇ܪܵܢܵܐ ܥܲܠ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ.

³ܘܐܸܬ̣ܵܘ ܟܠܗܘܿܢ ܣܵܒܹ̈ܐ ܕܲܒ̣ܢܲܝ̈ ܝܼܣܪܵܝܹܠ ܠܘܵܬ̣ ܡܲܠܟܵܐ ܠܚܸܒ̣ܪܘܿܢ ܘܝܼܡܵܐ ܠܗܘܿܢ ܡܲܠܟܵܐ ܕܵܘܝܼܕ݂: ܒܡܵܘܡܵܬ̣ܵܐ ܒܚܸܒ̣ܪܘܿܢ ܩܕ݂ܵܡ ܡܵܪܝܵܐ: ܘܐܲܩܝܼܡܘ ܠܕ݂ܵܘܝܼܕ݂ ܕܢܸܗܘܹܐ ܡܲܠܟܵܐ ܥܲܠ ܝܼܣܪܵܝܹܠ. ܘܐܸܬ̣ܩܲܝܲܡ ܡܸܠܵܘ̈ܗܝ ܕܲܫܡܘܼܐܹܝܠ ܢܒ̣ܝܼܵܐ: ܕܡܲܠܸܠ ܗ̄ܘ̣ܵܐ ܒܲܫܡܹܗ ܕܡܵܪܝܵܐ.

⁴ܘܐܸܙܲܠ ܕܵܘܝܼܕ݂ ܘܟ݂ܠܗܘܿܢ ܒܢܲܝ̈ ܝܼܣܪܵܝܹܠ ܠܐܘܿܪܸܫܠܸܡ: ܕܗ̤ܝ ܡܸܬ̣ܩܲܪܝܵܐ ܗ̄ܘ̣ܵܬ̣ ܝܵܒ̣ܘܿܣ ܡ̣ܢ ܠܘܼܩܕܲܡ ܘܬܲܡܵܢ ܗ̄ܘ̣ܵܘ ܝܵܒ̣ܘܿܣܵܝܹ̈ܐ ܥܵܡܘܿܪܹ̈ܝܗ̇ ܕܐܲܪܥܵܐ.

⁵ܘܐܵܡ̇ܪܝܼܢ ܐ̄ܢܵܫܵܐ ܝܵܬ̣ܒܲܝ̈ ܝܵܒ̣ܘܿܣ ܠܕ݂ܵܘܝܼܕ݂: ܠܵܐ ܬܸܥܘܿܠ ܠܗܵܪܟܵܐ ܘܟܲܢܸܫ ܕܵܘܝܼܕ݂ ܠܟ݂ܠܹܗ ܥܲܡܵܐ: ܘܲܟܒܲܫ ܠܩܘܼܪ̈ܝܵܐ ܕܨܸܗܝܘܿܢ ܗܵܢܹܝܢ ܗܵܠܹܝܢ ܕܐܸܬ̣ܩܪܝܼ ܩܘܼܪ̈ܝܵܐ ܕܕ݂ܵܘܝܼܕ݂.

⁶ܗܵܝܕܹ̇ܝܢ ܐܸܡܲܪ ܕܵܘܝܼܕ݂: ܟܠܡܲܢ ܕܢܸܩܛܘܿܠ ܠܘܼܩܕܲܡ ܓܲܒ̣ܪܵܐ ܝܵܒ̣ܘܿܣܵܝܵܐ: ܗ̤ܘ ܢܸܗܘܹܐ ܪܹܫܵܐ ܘܪܲܒ̇ ܚܲܝܠܵܐ. ܘܲܣܠܸܩ̣ ܝܘܿܐܵܒ̣ ܒܲܪ ܨܘܿܪܝܼܵܐ ܠܘܼܩܕܲܡ. ܘܐܲܩܝܼܡܹܗ ܡܲܠܟܵܐ ܕܵܘܝܼܕ݂ ܪܹܫܵܐ ܘܪܲܒ̇ ܚܲܝܠܵܐ.

⁷ܘܝܼܬܸܒ̣ ܕܵܘܝܼܕ݂ ܒܩܘܼܪ̈ܝܵܐ ܕܨܸܗܝܘܿܢ ܡܸܛܠ ܗܵܢܵܐ ܩܵܪܹܝܢ ܗ̄ܘ̣ܵܘ ܠܗܹܝܢ ܩܘܼܪ̈ܝܵܐ ܕܕ݂ܵܘܝܼܕ݂.

⁸ܘܲܒ̣ܢܵܐ ܕܵܘܝܼܕ݂ ܚܕ݂ܵܪܹ̈ܝܗ̇ ܕܲܩܪܝܼܬ̣ܵܐ ܡ̣ܢ ܚܹܐܪܝܼܬ̣ܵܐ ܕܲܠܒܲܪ ܘܝܲܗ̄ܒ̣ ܕܵܘܝܼܕ݂ ܝܲܡܝܼܢܵܐ ܠܫܲܪܟܵܐ ܕܲܒ̣ܢܲܝ̈ ܐ̄ܢܵܫܵܐ ܕܐܝܼܬ̣ ܒܩܘܼܪ̈ܝܵܐ.

⁹ܘܕܘܝܼܕ݂ ܐܵܙܹ̇ܠ ܗ̄ܘ̣ܵܐ ܘܥܵܬܲܪ ܘܡܵܪܝܵܐ ܚܲܝܠܬ̣ܵܢܵܐ ܥܲܡܹܗ.

¹⁰ܘܗܵܠܹܝܢ ܪܹ̈ܫܹܐ ܕܓܲܒ̣ܪܹ̈ܐ ܕܕ݂ܵܘܝܼܕ݂: ܕܲܡܥܲܫܢܝܼܢ ܗ̄ܘ̣ܵܘ ܥܲܡܹܗ ܒܡܲܠܟ̇ܘܼܬܹܗ: ܠܲܡܩܵܡܘܼܬܹܗ ܡܲܠܟܵܐ ܥܲܠ ܟܠܹܗ ܝܼܣܪܵܝܹܠ: ܐܲܝܟ݂ ܡܸܠܬܹܗ ܕܡܵܪܝܵܐ ܕܡܲܠܸܠ̣ ܥܲܠ ܝܼܣܪܵܝܹܠ.

¹¹ܘܗܵܠܹܝܢ ܡܸܢܝܵܢܹ̈ܐ ܕܓܲܒ̣ܪ̈ܵܘܗܝ ܕܕ݂ܵܘܝܼܕ݂. ܝܵܬܹܒ̣ ܒܡܵܘܬܒ̣ܵܐ ܩܲܕ݂ܡܵܝܵܐ ܪܹܫܵܐ ܕܲܬ̣ܠܵܬ̣ܝܼܢ: ܗ̤ܘܝܘܼ ܓܸܕ݂ܚܘܼ ܓܲܢ̄ܒܵܪܵܐ. ܗ̤ܘ ܫ̣ܡܲܛ ܪܘܼܡܚܵܐ: ܘܲܩܛܲܠ ܬܠܵܬ̣ܡܵܐܐ ܓܲܒ̣ܪ̈ܝܼܢ ܒܫܵܥܬ̣ܵܐ ܚܕ݂ܵܐ.

¹²ܒܵܬ̣ܪܹܗ ܗܘ̤ܵܐ ܐܹܠܝܼܥܵܙܲܪ ܒܲܪ ܕܵܕܹܗ ܡ̣ܢ ܕܵܚܘܿܚ ܩܪܝܼܬ̣ܵܐ: ܗ̤ܘ ܗܘ̤ܵܐ ܥܲܠ ܬܠܵܬ̣ܡܵܐܐ ܓܲܒ̣ܪ̈ܝܼܢ.

¹³ܟܲܕ݂ ܗܘ̤ܵܐ ܥܲܡ ܕܵܘܝܼܕ݂ ܒܦܲܣܝܼ ܕܡܲـ̈ـܝܵܐ: ܘܲܦܠܸܫܬܵܝܹ̈ܐ ܥܵܒ̣ܕ̇ܝܼܢ ܗ̄ܘ̣ܵܘ ܬܲܡܵܢ ܩܪܵܒ̣ܵܐ. ܘܲܗܘ̤ܵܬ̣ ܬܲܡܵܢ ܚܲܩܠܵܐ ܚܕ݂ܵܐ ܕܲܙܪܝܼܥܵܐ ܣܥܵܪܹ̈ܐ. ܘܥܲܡܵܐ ܐܸܬ̣ܒܲܕܲܪ ܡ̣ܢ ܩܕ݂ܵܡ ܦܠܸܫܬܵܝܹ̈ܐ.

¹⁴ܘܩܵܡ̣ܘ ܒܓ̣ܵܘ ܚܲܩܠܵܐ ܘܦܲܨܝܘܼܗ̇: ܘܲܚܪܲܒ̣ܘ ܠܲܦܠܸܫܬܵܝܹ̈ܐ ܘܲܥܒܲܕ݂ ܡܵܪܝܵܐ ܢܸܨܚܵܢܵܐ ܪܲܒܵܐ.

¹⁵ܘܲܢܚܸܬ̣ܘ ܬܠܵܬ̣ܵܐ ܡ̣ܢ ܓܲܒ̣ܪܹ̈ܐ ܠܘܵܬ̣ ܕܵܘܝܼܕ݂ ܠܲܡܥܲܪܬ̣ܵܐ ܕܥܲܪܠܲܡ: ܘܡܲܫ̱ܪ̈ܝܵܬ̣ܵܐ ܕܲܦܠܸܫܬܵܝܹ̈ܐ ܫܲܪ̈ܝܵܢ ܗ̄ܘܲܝ̈ ܒܲܦܩܲܥܬ̣ܵܐ ܕܓܲܢ̄ܒܵܪܹ̈ܐ.

¹⁶ܘܕ݂ܵܘܝܼܕ݂ ܫܪܸܐ ܗ̄ܘ̣ܵܐ ܒܡܲܫܟ̇ܢܵܐ: ܘܓܲܒ̣ܪܹ̈ܐ ܕܦܠܸܫܬܵܝܹ̈ܐ ܒܒܹܝܬ̣ ܠܚܸܡ.

¹⁷ܘܐܸܬ̣ܪܲܓ̣ܪܲܓ̣ ܕܵܘܝܼܕ݂: ܘܐܸܡܲܪ: ܡ̇ܢ ܕܹܝܢ ܝܲܗ̄ܒ̣ܠܝܼ ܡܲـ̈ـܝܵܐ ܕܐܸܫܬ̇ܝܼܬ̣ ܡ̣ܢ ܓܘܼܒܵܐ ܪܲܒܵܐ ܕܒܹܝܬ̣ ܠܚܸܡ: ܕܐܝܬ̣ ܒܬܲܪܥܵܐ ܕܲܩܪܝܼܬ̣ܵܐ.

¹⁸ܘܒ̣ܵܗ̇ ܒܫܵܥܬ̣ܵܐ ܫܡܲܥܘ ܬܠܵܬ̣ܵܐ ܓܲܒ̣ܪ̈ܝܼܢ: ܘܲܨܪܵܘ ܘܥܲܠ̣ܘ ܒܡܲܫܪܝܼܬ̣ܵܐ ܕܲܦܠܸܫܬܵܝܹ̈ܐ. ܘܐܸܙܲܠܘ: ܘܲܡܠܵܘ ܡܲـ̈ـܝܵܐ ܡ̣ܢ ܓܘܼܒܵܐ ܪܲܒܵܐ ܕܐܝܼܬ̣ ܒܒܹܝܬ̣ ܠܚܸܡ: ܒܬܲܪܥܵܐ ܕܲܩܪܝܼܬ̣ܵܐ.ܘܲܢܣܲܒ̣ܘ ܘܐܲܝܬ̇ܝܼܘ: ܘܝܲܗ̄ܒ̣ܘ ܠܕ݂ܵܘܝܼܕ݂. ܘܠܵܐ ܨܒ̣ܵܐ ܠܡܸܫܬܵܐ ܐܸܢܘܿܢ: ܘܲܢܣܲܟ݂ ܐܸܢܘܿܢ ܩܕ݂ܵܡ ܡܵܪܝܵܐ.

¹⁹ܘܐܸܡܲܪ ܚܵܣ ܠܝܼ ܡ̣ܢ ܡܵܪܝܵܐ ܕܐܸܥܒܸ̇ܕ݂ ܗܵܢܵܐ ܩܕ݂ܵܡ ܐܲܠܵܗܝ. ܐ̄ܢܵܫܵܐ ܗܵܠܹܝܢ ܢܦܲܩ̣ܘ ܐܸܙܲܠܘ ܥܲܠ ܕܡܵܐ ܕܨܵܘܪ̈ܲܝܗܘܿܢ ܘܠܵܐ ܨܒ̣ܵܐ ܠܡܸܫܬܵܐ ܐܸܢܘܿܢ. ܗܵܠܹܝܢ ܥܒܲܕ݂ܘ ܬܠܵܬ̣ܵܐ ܓܲܒ̣ܪ̈ܝܼܢ.

²⁰ܘܐܲܒ̣ܝܼܫܲܝ ܐܲܚܘܼܗܝ ܕܝܘܿܐܵܒ̣ ܗ̤ܘ ܗܘ̤ܵܐ ܪܹܫܵܐ ܕܲܬ̣ܠܵܬ̣ܝܼܢ ܘܗ̤ܘ ܫ̣ܡܲܛ ܪܘܼܡܚܵܐ ܥܲܠ ܬܠܵܬ̣ܡܵܐܐ ܩܛ̈ܝܼܠܝܼܢ ܘܠܹܗ ܐܝܼܬ̣ ܗ̄ܘ̣ܵܐ ܐܝܼܩܵܪܵܐ.

²¹ܥܲܠ ܬܠܵܬ̣ܝܼܢ ܡܝܲܩܲܪ ܗ̄ܘ̣ܵܐ. ܘܲܗܘ̤ܵܐ ܥܠܲܝܗܘܿܢ ܪܹܫܵܐ. ܘܲܩܪܵܒ̣ܵܐ: ܐܲܝܟ݂ ܬܠܵܬ̣ܝܼܢ ܥܵܒܹ̇ܕ݂ ܗ̄ܘ̣ܵܐ.

²²ܒܢܵܝܵܐ ܒܲܪ ܝܘܿܝܵܕ݂ܵܥ: ܓܲܒ̣ܪܵܐ ܓܲܢ̄ܒܵܪ ܚܲܝܠܵܐ ܕܫܲܦܝܼܪܝܼܢ ܗ̄ܘ̣ܵܘ ܥܒ̣ܵܕ݂ܵܘ̈ܗܝ: ܡ̣ܢ ܟܲܪܟ݂ܵܐ ܕܩܲܒ̣ܨܵܐܹܝܠ. ܗ̤ܘ ܚ̣ܪܲܒ̣ ܠܲܬ̣ܪܹܝܢ ܓܲܢ̄ܒܵܪ̈ܝܼܢ ܕܡܘܼܐܵܒ̣. ܘܗ̤ܘ ܢܚܸܬ̣ ܘܲܩܛܲܠ ܠܐܲܪܝܵܐ ܒܓ̣ܵܘ ܥܵܒ̣ܵܐ: ܒܝܵܘܡܵܐ ܕܬܲܠܓܵܐ.

²³ܘܗ̤ܘ ܩܛܲܠ ܠܓܲܒ̣ܪܵܐ ܡܸܨܪܵܝܵܐ: ܓܲܒ̣ܪܵܐ ܡܵܪܹܐ ܚܲܝܠܵܐ: ܕܐܲܪܝܼܟ݂ ܗ̄ܘ̣ܵܐ ܚܲܡܸܫ ܐܲܡ̈ܝܼܢ: ܘܒ̣ܐܝܼܕܹܗ ܕܡܸܨܪܵܝܹܐ ܗܘ̤ܵܬ̣ ܪܘܼܡܚܵܐ ܕܗܵܘܹ̇ܐ ܗ̄ܘ̣ܵܐ ܥܲܒ̣ܝܵܐ ܕܲܫܢܵܢܵܗ̇: ܐܲܝܟ݂ ܢܵܘܠܵܐ ܕܓܲܪ̈ܕ̇ܝܵܝܹܐ ܘܲܢܚܸܬ̣ ܥܠܵܘܗܝ ܒܚܘܼܛܪܵܐ: ܘܢܲܣܒܵܗ̇ ܪܘܼܡܚܵܐ ܡ̣ܢ ܐܝܼܕܲܝ̈ܗܘܿܢ ܕܡܸܨܪܵܝܵܐ: ܘܩܲܛܠܹܗ ܒܵܗ̇ ܒܪܘܼܡܚܹܗ.

²⁴ܗܵܠܹܝܢ ܟܠܗܹܝܢ ܥܒܲܕ ܒܢܵܝܵܐ ܒܲܪ ܝܘܿܝܵܕ݂ܵܥ ܘܠܹܗ ܐܝܼܬ̣ ܗ̄ܘ̣ܵܐ ܫܡܵܐ ܝܲܬ̇ܝܼܪ ܡ̣ܢ ܬܠܵܬ̣ܵܐ ܓܲܒ̣ܪ̈ܝܼܢ.

²⁵ܘܡ̣ܢ ܬܠܵܬ̣ܵܐ ܓܹܝܪ ܡܝܲܩܲܪ ܗ̄ܘ̣ܵܐ. ܘܩܹܐܪܣܵܐ ܐܲܝܟ݂ ܬܠܵܬ̣ܵܐ ܥܵܒܹܕ݂ ܗ̄ܘ̣ܵܐ. ܘܐܲܩܝܼܡܹܗ ܕܵܘܝܼܕ݂ ܕܢܸܗܘܹܐ ܢܵܛܘܿܪܵܐ ܥܲܠ ܪܘܼܡܚܹܗ: ܘܥܲܠ ܓܲܢ̄ܒܵܪ̈ܲܝ ܚܲܝܠܵܐ.

²⁶ܥܫܵܐܝܹܠ ܐܲܚܘܼܗܝ ܕܝܘܿܐܵܒ̣: ܐܸܠܚܲܢܵܢ ܒܲܪ ܕܵܕܹܗ ܡ̣ܢ ܒܹܝܬ̣ ܠܚܸܡ.

²⁷ܫܡܘܿܬ̣ ܡ̣ܢ ܛܘܼܪ ܡܲܠܟܵܐ: ܚܵܠܵܨ ܕܡ̣ܢ ܦܵܠܝܵܛܘܿܢ.

²⁸ܥܝܼܪܵܐ ܒܲܪ ܥܩܝܼܣ ܕܡ̣ܢ ܬܩܘܿܥ: ܘܐܲܒ̣ܝܼܥܵܙܲܪ ܕܡ̣ܢ ܥܢܵܬ̣ܘܿܬ̣.

²⁹ܣܵܒ̣ܝܼ ܕܡ̣ܢ ܚܫܘܿܒܲܬ̣: ܥܲܠܝܼ ܕܡ̣ܢ ܚܘܿܚ.

³⁰ܡܲܗܪܝܼ ܕܡ̣ܢ ܢܵܛܘܿܦܲܬ̣: ܚܵܠܵܕ݂ ܒܲܪ ܒܲܥܢܵܐ ܕܡ̣ܢ ܢܛܘܿܦܲܬ̣.

³¹ܐܵܬܲܝ ܒܲܪ ܪܲܒ̇ܝ ܕܡ̣ܢ ܓܒܲܥܬ̣ܵܐ ܕܲܒ̣ܢܲܝ̈ ܒܸܢܝܵܡܹܝܢ: ܒܢܵܝܵܐ ܒܲܪ ܦܪܲܥܬ̇ܘܿܢ.

³²ܚܲܕ̇ܝܼ ܕܡ̣ܢ ܢܚܸܠܓܝܼܫ: ܐܲܒ̣ܝܼܐܹܝܠ ܒܲܪ ܥܪܲܒ̣ܬ̇ܘܿܢ.

³³ܥܘܿܙܒܵܢ ܕܡ̣ܢ ܡܲܪܚܲܡ: ܐܹܠܝܼܦܵܐ ܕܡ̣ܢ ܫܲܠܒܲܡ.

³⁴ܒܢܲܝ̈ ܫܹܝܡ ܕܡ̣ܢ ܥܲܙܘܿܢ: ܝܘܿܢܵܬ̣ܵܢ ܒܲܪ ܫܵܓ̣ܵܐ ܕܡ̣ܢ ܛܘܼܪ ܟܲܪܡܠܵܐ.

³⁵ܐܲܚܝܼܪܵܡ ܒܲܪ ܣܵܟ݂ܵܡ ܕܡ̣ܢ ܛܘܼܪ ܒܲܝܬܵܐ: ܐܲܠܝܼܦܘܿܢ ܒܲܪ ܐܘܿܪ ܕܡ̣ܢ ܒܓܲܪܬ̇ܘܿܢ.

³⁶ܚܵܦܵܪ ܕܡ̣ܢ ܡܟܲܪܬ̇ܝܼܡ: ܐܲܚܝܼܵܐ ܕܡ̣ܢ ܚܵܨܵܪ.

³⁷ܚܲܨܪܝܼ ܕܡ̣ܢ ܟܲܪܡܠܵܐ. ܠܵܥܵܙܲܪ ܕܡ̣ܢ ܐܘܿܒ̣ܵܝ.

³⁸ܝܘܼܐܹܝܠ ܐܲܚܘܼܗܝ ܕܝܘܿܢܵܬ̣ܵܢ: ܡܲܟ݂ܚܲܕ݂ ܕܡ̣ܢ ܓܵܕ݂.

³⁹ܨܵܠܵܩ ܐܲܡܘܿܢܵܝܵܐ: ܡܲܚܙܝܼ ܒܪܵܬ̣ܵܝܵܐ: ܫܵܩܹܠ ܡܵܐܢܲܝ̈ ܙܲܝܢܹܗ ܕܝܘܿܐܵܒ̣ ܒܲܪ ܨܘܿܪܝܼܵܐ.

⁴⁰ܥܝܼܪܵܐ ܕܡ̣ܢ ܝܵܬ̣ܝܼܪ: ܥܵܪܵܒ̣ ܕܡ̣ܢ ܝܵܬ̣ܵܪ.

⁴¹ܐܘܿܪܝܼܵܐ ܚܹܬ̣ܝܵܐ.

⁴²ܥܕ݂ܝܼܢܘܼ ܒܲܪ ܫܵܪܵܐ ܡ̣ܢ ܫܲܒ̣ܛܵܐ ܕܒܹܝܬ̣ ܪܘܼܒܹܝܠ. ܘܗ̤ܘܝܘܼ ܫܲܠܝܼܛ ܗ̄ܘ̣ܵܐ ܥܲܠ ܓܲܒ̣ܪܹ̈ܐ ܬܠܵܬ̣ܝܼܢ.

⁴³ܚܲܢܵܢ ܒܲܪ ܡܲܠܟܵܐ: ܥܲܙܝܼ ܕܡ̣ܢ ܥܢܵܬ̣ܘܿܬ̣.

⁴⁴ܝܘܿܫܵܦܵܛ ܕܡ̣ܢ ܥܸܣܬ̇ܪܘܼܬ̣: ܫܵܡܵܥ ܘܲܥܡܵܐܹܝܠ ܒܢܲܝ̈ ܚܘܿܬ̣ܵܡ ܕܡ̣ܢ ܥܲܪܥܪܘܼܬ̣.

⁴⁵ܝܲܕ݂ܥܵܐܹܝܠ ܒܲܪ ܫܲܡܪܝܼ: ܘܝܘܿܚܵܐ ܐܵܚܘܼܗܝ.

⁴⁶ܥܡܘܿܙܘܼܬ̣: ܘܲܥܢܵܐܹܝܠ: ܡܘܿܚܵܡ: ܡܘܿܨܝܹܠ: ܪܝܼܒܲܝ: ܘܐܲܫܘܵܐ ܒܪܹܗ: ܐܲܚܡܵܐܹܝܠ: ܘܝܲܬ̣ܡܵܐ: ܡܘܼܐܒ̣ܵܝܹ̈ܐ.

⁴⁷ܐܸܠܝܹܠ: ܘܝܲܬ̣ܡܵܐ: ܘܥܘܿܒ̣ܝܼܪ: ܠܲܠܣܵܐܹܝܠ ܘܐܲܫܟ݂ܝܼܪ.