Read Aramaic Peshita 1 Chronicles 16 Bible Online

1 Chronicles 16 - Aramaic Peshita bible

1 Chronicles 16

¹ܘܐܲܝܬ̇ܝܘܼܗ̇ ܠܩܹܒ̣ܘܿܬ̣ܵܐ ܕܡܵܪܝܵܐ: ܘܣܵܡܘܼܗ̇ ܒܕ݂ܘܼܟ̇ܬ̣ܵܗ̇: ܒܓ̣ܵܘ ܡܲܫܟ̇ܢܵܐ ܕܲܢܩܲܫ ܠܵܗ̇ ܕܵܘܝܼܕ݂. ܘܩܲܪܸܒ̣ܘ ܥܠܵـ̈ـܘܵܬ̣ܵܐ ܘܫܲܠܡܹ̈ܐ ܩܕ݂ܵܡ ܩܹܒ̣ܘܿܬ̣ܵܐ ܕܡܵܪܝܵܐ.

²ܘܟܲܕ݂ ܫܲܠܸܡ ܕܵܘܝܼܕ݂ ܠܲܡܩܲܪܵܒ̣ܘܼ ܥܠܵـ̈ـܘܵܬ̣ܵܐ ܘܫܲܠܡܹ̈ܐ: ܒܲܪܸܟ݂ ܠܥܲܡܵܐ ܕܝܼܣܪܵܝܹܠ ܒܲܫܡܹܗ ܕܡܵܪܝܵܐ ܚܲܝܠܬ̣ܵܢܵܐ.

³ܘܦܲܠܸܓ̣ ܠܟ݂ܠܹܗ ܥܲܡܵܐ: ܠܟ݂ܠܗܘܿܢ ܕܒܹܝܬ̣ ܝܼܣܪܵܝܹܠ: ܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ: ܘܡ̣ܢ ܓܲܕ̇ܘܼ̈ܕܹܐ ܠܝܵܢܩܲܝ̈ ܬܕܲܝܵܐ ܠܟܠ ܓܒܲܪ ܘܲܓ̣ܒܲܪ: ܓܪܝܼܨܬܵܐ ܕܠܲܚܡܵܐ ܚܕ݂ܵܐ: ܘܲܡܢܵܬ̣ܵܐ ܚܕ݂ܵܐ: ܘܲܣܢܵܪܩܵܐ ܚܕ݂ܵܐ: ܘܐܸܙܲܠܘ ܟܠܹܗ ܥܲܡܵܐ ܐ̄ܢܵܫ ܠܒܲܝܬܹ̇ܗ.

⁴ܘܝܲܗ̄ܒ̣ ܩܕ݂ܵܡ ܩܹܒ̣ܘܿܬ̣ܵܐ ܕܡܵܪܝܵܐ: ܠܹܘܵܝܹ̈ܐ ܕܲܡܫܲܡܫܝܼܢ ܩܕ݂ܵܡ ܡܵܪܝܵܐ: ܘܡܲܕ݂ܟ̇ܪܝܼܢ ܘܡܵܘܕܹ̇ܝܢ: ܘܲܡܫܲܒ̇ܚܝܼܢ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

⁵ܐܵܣܵܦ ܪܹܫܗܘܿܢ: ܬܸܢܝܵܢܵܐ ܙܟܲܪܝܵܐ: ܘܝܘܿܥܹܝܠ: ܘܝܘܿܚܵܐܹܝܠ: ܘܡܲܬ̇ܝܼܬ̣ܵܐ: ܘܐܹܠܝܼܵܒ̣: ܘܲܒ̣ܢܵܝܵܐ: ܘܐܵܣܵܦ: ܘܥܲܡܝܼܢܵܕ݂ܵܒ̣: ܘܐܵܣܵܦ: ܘܢܲܚܙܵܐܹܝܠ: ܘܐܵܣܵܦ.

⁶ܗܵܠܹܝܢ ܟܠܗܘܿܢ ܟܵܗ̈ܢܹܐ ܕܩܵܪܹܝܢ ܒܩܲܪ̈ܢܵܬ̣ܵܐ: ܐܲܡܝܼܢܵܐܝܼܬ̣ ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ.

⁷ܗܵܝܕܹ̇ܝܢ ܦܬܲܚ ܦܘܼܡܹܗ ܕܵܘܝܼܕ݂ ܒܝܵܘܡܵܐ ܗܵܘ̇: ܗ̤ܘ ܘܪܹ̈ܫܲܝ ܟܠܗܘܿܢ ܟܵܗܢܹ̈ܐ ܘܠܹܘܵܝܹ̈ܐ ܠܲܡܫܲܒܵܚܘܼ ܠܡܵܪܝܵܐ: ܥܲܠ ܛܝܵܪܵܐ ܕܐܵܣܵܦ ܘܕܲܐܚܵܘ̈ܗܝ ܘܗܵܠܹܝܢ ܪܹ̈ܫܹܐ ܕܬܸܫ̈ܒ̇ܚܵܬ̣ܵܐ ܕܐܸܡܲܪ ܕܵܘܝܼܕ݂: ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ ܒܝܵܘܡܵܐ ܗܵܘ̇.

⁸ܐܵܘܕܵܘ ܠܡܵܪܝܵܐ: ܘܲܩܪܵܘ ܫܡܹܗ. ܐܵܘܕܲܥܘ ܒܹܝܬ̣ ܥܲܡܡܹ̈ܐ ܥܒ̣ܵܕ݂ܵܘ̈ܗܝ.

⁹ܫܲܒܲܚܘ ܠܹܗ: ܘܐܵܘܕܵܘ ܠܹܗ: ܐܸܫܬܲܥܵܘ ܟܠܗܹܝܢ ܓܒܲܪ̈ܘܵܬܹܗ.

¹⁰ܐܸܫܬܲܒܲܚܘ ܒܲܫܡܵܐ ܕܩܘܼܕ݂ܫܹܗ: ܢܸܚܕܹ̇ܐ ܠܸܒܵܐ ܕܟ݂ܠ ܕܒ̣ܵܥܹܝܢ ܠܡܵܪܝܵܐ ܘܲܠܥܘܼܫܢܹܗ.

¹¹ܨܲܠܵܘ ܩܕ݂ܵܡܵܘܗܝ ܐܲܡܝܼܢܵܐܝܼܬ̣.

¹²ܐܸܬ̇ܕܲܟ݂ܪܘ ܓܒܲܪ̈ܘܵܬܹܗ ܕܲܥܒܲܕ݂: ܓܒܲܪ̈ܘܵܬܹܗ ܘܕ݂ܝܼܢܹ̈ܐ ܕܦܘܼܡܹܗ.

¹³ܙܲܪܥܹܗ ܕܐܲܒ̣ܪܵܗܵܡ ܥܲܒ̣ܕܹ̇ܗ: ܘܲܒ̣ܢܵܘܗܝ ܕܝܲܥܩܘܿܒ̣ ܓܒܲܝܵܐ ܕܲܓ̣ܒ̣ܵܐ.

¹⁴ܗ̤ܘܝܘܼ ܡܵܪܝܵܐ ܐܲܠܵܗܲܢ: ܕܲܒ̣ܟ݂ܠܵܗ̇ ܐܲܪܥܵܐ ܢܵܡܘܿܣܵܘ̈ܗܝ.

¹⁵ܐܸܬ̇ܕܲܟ݂ܪܘ ܠܥܵܠܲܡ ܕܝܵܬܹܩܹܐ ܕܝܼܠܹܗ: ܡܸܠܬ̣ܵܐ ܕܦܲܩܸܕ݂ ܠܐܵܠܸܦ ܕܵܪ̈ܝܼܢ.

¹⁶ܕܝܼܡܵܐ ܠܐܲܒ̣ܪܵܗܵܡ: ܘܲܕ݂ܝܵܬ̣ܩܹܐ ܕܝܲܗ̄ܒ̣ ܠܲܒ̣ܢܵܘ̈ܗܝ ܕܐܝܼܣܚܵܩ: ܘܓܲܙܪܵܗ̇ ܠܝܲܥܩܘܿܒ̣ ܠܥܵܠܲܡ.

¹⁷ܠܝܼܣܪܵܝܹܠ ܝܲܗ̄ܒ̣ ܠܗܘܿܢ ܕܝܵܬܹܩܹܐ ܠܥܵܠܲܡ ܥܵܠܡܝܼܢ.

¹⁸ܘܐܸܡܲܪ ܠܗܘܿܢ: ܕܲܠܟ݂ܘܿܢ ܝܵܗܹܒ̣ ܐ̄ܢܵܐ ܠܵܗ̇ ܐܲܪܥܵܐ ܕܲܟ݂ܢܲܥ̄ܢ: ܦܸܨܬ̣ܵܐ ܕܝܵܪܬ̇ܘܼܬ̣ܟ݂ܘܿܢ.

¹⁹ܟܲܕ݂ ܗ̤ܘܲܝܬ̇ܘܿܢ ܐ̄ܢܵܫܲܝ̈ ܡܸܢܝܵܢܵܐ: ܙܥܘܿܪ̈ܝܼܢ ܘܥܵܡܘܿܪ̈ܝܼܢ ܒܵܗ̇.

²⁰ܘܐܸܫܬ̇ܒ̣ܝܼܬ̇ܘܿܢ ܡ̣ܢ ܥܲܡܵܐ ܠܥܲܡܵܐ: ܘܡ̣ܢ ܡܲܠܟ̇ܘܼܬ̣ܵܐ ܠܡܲܠܟ̇ܘܼܬ̣ܵܐ ܐ̄ܚܪܹܬ̣ܵܐ.

²¹ܠܵܐ ܫܒܲܩ ܠܫܲܠܝܼܛܵܢܹ̈ܐ ܕܢܵܗܪܘܼܢܵܟ݂ܘܿܢ. ܘܲܪܕܵܐ ܡܸܛܠܵܬ̣ܟ݂ܘܿܢ ܡܲܠ̈ܟܹ̇ܐ: ܘܐܸܡܲܪ ܠܗܘܿܢ.

²²ܠܵܐ ܬܸܬ̣ܩܲܪܒ̣ܘܿܢ ܠܲܡܫܝܼܚܲܝ̈: ܘܲܠܢܒ̣ܝܲܝ̈ ܠܵܐ ܬܲܒ̣ܐ̱ܫܘܼܢ.

²³ܫܲܒܲܚܘ ܠܡܵܪܝܵܐ ܟܠܵܗ̇ ܐܲܪܥܵܐ: ܣܲܒܲܪܘ ܟܠܝܘܿܡ ܒܝܘܿܡ ܦܘܼܪܩܵܢܹܗ.

²⁴ܐܸܫܬܲܥܵܘ ܒܹܝܬ̣ ܥܲܡܡܹ̈ܐ ܐܝܼܩܵܪܹܗ.

²⁵ܡܸܛܠ ܕܪܲܒ̇ ܗ̄ܘ̣ ܡܵܪܝܵܐ ܘܲܫܒ̣ܝܼܚ ܛܵܒ̣: ܘܲܕ݂ܚܝܼܠ ܗ̄ܘ̣ ܥܲܠ ܟܠܗܘܿܢ ܡܲܠ̈ܟܹ̇ܐ.

²⁶ܡܸܛܠ ܕܟ݂ܠܗܘܿܢ ܦܬܲܟ݂ܪܹ̈ܐ ܕܥܲܡܡܹ̈ܐ ܨܲܠܡܹ̈ܐ ܐܸܢܘܿܢ: ܘܡܵܪܝܵܐ ܫܡܲܝܵܐ ܥܒܲܕ݂.

²⁷ܬܸܫܒ̇ܘܿܚܬܵܐ ܘܝܵܐܝܘܼܬ̣ܵܐ ܩܕ݂ܵܡܵܘܗܝ. ܥܘܼܫܢܵܐ ܘܪܲܒ̇ܘܼܬ̣ܵܐ ܒܡܲܩܕ̇ܫܹܗ.

²⁸ܐܵܘܕܵܘ ܠܡܵܪܝܵܐ ܫܲܪ̈ܒ̣ܵܬ̣ܵܐ ܕܥܲܡܡܹ̈ܐ. ܐܵܘܕܵܘ ܩܕ݂ܵܡ ܡܵܪܝܵܐ ܒܐܝܼܩܵܪܹܗ ܘܲܒ̣ܥܘܼܫܢܹܗ.

²⁹ܐܵܘܕܵܘ ܠܡܵܪܝܵܐ ܒܐܝܼܩܵܪܵܐ ܕܲܫܡܹܗ. ܫܩܘܿܠܘ ܩܘܼܪ̈ܒܵܢܹܐ: ܘܐܵܘܕܵܘ ܩܕ݂ܵܡܵܘܗܝ ܒܲܨܠܘܿܬ̣ܵܐ ܕܦܘܼܡܟ݂ܘܿܢ ܘܲܣܓܘܿܕ݂ ܠܡܵܪܝܵܐ ܒܬܸܫܒ̇ܚܵܬ̣ܵܐ ܕܩܘܼܕ݂ܫܵܐ.

³⁰ܬܙܘܼܥ ܡ̣ܢ ܩܕ݂ܵܡܵܘܗܝ ܟܠܵܗ̇ ܐܲܪܥܵܐ: ܘܬܸܬ̣ܩܲܢ ܬܹܒܹܝܠ ܕܠܵܐ ܬܙܘܼܥ.

³¹ܢܸܚܕ̇ܘܼܢ ܫܡܲܝܵܐ: ܘܲܬ̣ܫܲܒܲܚ ܐܲܪܥܵܐ. ܘܢܹܐܡܪܘܿܢ ܒܹܝܬ̣ ܥܲܡܡܹ̈ܐ: ܡܵܪܝܵܐ ܐܲܡ̣ܠܸܟ݂.

³²ܢܫܲܒܲܚ ܝܲܡܵܐ ܒܲܡܠܐܹܗ ܘܢܸܚ̈ܕ̇ܝܵܢ ܚܲܩ̈ܠܵܬ̣ܵܐ ܘܟ݂ܠ ܕܐܝܼܬ̣ ܒܗܹܝܢ.

³³ܗܵܝܕܹ̇ܝܢ ܢܫܲܒ̇ܚܘܼܢ ܐܝܼܠܵܢܹ̈ܐ ܕܥܵܒ̣ܵܐ: ܡ̣ܢ ܩܕ݂ܵܡ ܡܵܪܝܵܐ ܕܐܵܬܹܐ ܠܲܡܕ݂ܵܢܵܗ̇ ܠܐܲܪܥܵܐ. ܢܕ݂ܘܼܢ ܬܹܒܹܝܠ ܒܟܹܐܢܘܼܬ̣ܵܐ: ܘܢܲܟܸ̇ܣ ܠܥܲܡܡܹ̈ܐ ܒܗܲܝܡܵܢܘܼܬ̣ܵܐ.

³⁴ܘܐܸܡܲܪ: ܐܵܘܕܵܘ ܠܡܵܪܝܵܐ ܕܛܵܒ̣ ܗ̄ܘ̣: ܘܲܠܥܵܠܲܡ ܛܲܝܒ̇ܘܼܬܹܗ.

³⁵ܦܪܘܿܩܲܝܢ ܡܵܪܝܵܐ: ܦܪܘܿܩܲܝܢ ܘܟܲܢܸܫܲܝܢ: ܘܩܲܪܸܒܲܝܢ ܡ̣ܢ ܒܹܝܬ̣ ܥܲܡܡܹ̈ܐ: ܠܡܵܘܕܵܝܘܼ ܠܲܫܡܵܐ ܕܩܘܼܕ݂ܫܵܟ݂: ܘܠܲܡܫܲܒܵܚܘܼ ܬܸܫܒ̇ܚܵܬ̣ܵܟ݂.

³⁶ܒܪܝܼܟ݂ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܡ̣ܢ ܥܵܠܡܹ̈ܐ ܘܲܥܕܲܡܵܐ ܠܥܵܠܡܹ̈ܐ. ܘܢܹܐܡܲܪ ܟܠܹܗ ܥܲܡܵܐ ܐܵܡܹܝܢ. ܒܦܘܼܡܵܐ ܒܲܣܝܼܡܵܐ ܘܕܲܟ݂ܝܵܐ: ܢܫܲܒ̇ܚܘܼܢ ܠܐܲܠܵܗܗܘܿܢ.

³⁷ܘܲܫܒܲܩ ܬܲܡܵܢ ܩܕ݂ܵܡ ܩܹܒ̣ܘܿܬ̣ܵܐ ܕܲܕ݂ܝܵܬܹܩܵܐ ܕܡܵܪܝܵܐ: ܠܐܵܣܵܦ ܘܠܲܐܚܵܘ̈ܗܝ: ܠܲܡܫܲܡܵܫܘܼ ܩܕ݂ܵܡ ܡܵܪܝܵܐ ܐܲܡܝܼܢܵܐܝܼܬ̣: ܐ̄ܢܵܫ ܐ̄ܢܵܫ ܒܝܵܘܡܹܗ.

³⁸ܘܥܘܼܒ̣ܵܪ ܐܲܕ݂ܘܿܡ ܘܐܲܚܵܘ̈ܗܝ ܫܬ̇ܝܼܢ ܘܲܬ̣ܡܵܢܝܵܐ ܘܥܘܼܒ̣ܵܪ ܐܲܕ݂ܘܿܡ ܙܥܘܿܪܵܐ ܒܪܹܗ ܕܝܘܿܬ̣ܵܡ: ܘܚܵܣܘܼ ܗܵܠܹܝܢ ܟܠܗܘܿܢ ܢܵܛܪ̈ܲܝ ܬܲܪ̈ܥܹܐ ܒܲܪ̈ܵܝܹܐ.

³⁹ܘܨܵܕ݂ܘܿܩ ܟܵܗܢܵܐ: ܘܐܲܚܵܘ̈ܗܝ ܟܵܗܢܹ̈ܐ: ܗܵܠܹܝܢ ܟܠܗܘܿܢ ܟܵܗܢܹ̈ܐ ܕܲܡܫܲܡܫܝܼܢ ܩܕ݂ܵܡ ܡܲܫܟ̇ܢܹܗ ܕܡܵܪܝܵܐ: ܒܒ̣ܘܼܣܵܡܵܐ ܪܲܒܵܐ ܒܩܘܼܪܝܲܬ̣ ܓܸܒ̣ܥܘܿܢ.

⁴⁰ܠܲܡܩܲܪܵܒ̣ܘܼ ܥܠܵܘܵܬ̣ܵܐ ܠܡܵܪܝܵܐ ܥܲܠ ܡܲܕ݂ܒ̇ܚܵܐ ܕܲܥܠܵܬ̣ܵܐ: ܐܲܡܝܼܢܵܐܝܼܬ̣ ܒܨܲܦܪܵܐ ܘܲܒ̣ܪܲܡܫܵܐ: ܘܲܠܡܸܥܒܲܕ݂ ܟܠ ܡܵܐ ܕܲܟ݂ܬ̣ܝܼܒ̣ ܒܢܵܡܘܿܣܵܐ ܕܡܵܪܝܵܐ: ܕܝܲܗ̄ܒ̣ ܥܲܠ ܐܝܼܕ݂ܵܐ ܕܡܘܼܫܹܐ: ܠܡܲܠܵܦܘܼ ܠܲܒ̣ܢܲܝ̈ ܝܼܣܪܵܝܹܠ.

⁴¹ܘܗܵܠܹܝܢ ܫܡܵܗܹ̈ܐ ܕܓܲܒ̣ܪܹ̈ܐ ܕܩܵܝ̇ܡܝܼܢ ܒܬܸܫ̈ܒ̇ܚܵܬ̣ܵܐ: ܗܵܡܵܢ ܘܐܵܪܝܼܬ̣ܘܼܢ: ܘܫܲܪܟܵܐ ܕܐ̄ܢܵܫܵܐ ܙܲܕ̇ܝܼܩܹ̈ܐ ܐܲܝܠܹܝܢ ܕܐܸܬ̣ܟܲܣܝܼܘ ܫܡܵܗܲܝ̈ܗܘܿܢ: ܠܡܵܘܕܵܝܘܼ ܠܡܵܪܝܵܐ ܡܸܛܠ ܕܲܠܥܵܠܲܡ ܛܲܝܒ̇ܘܼܬܹܗ.

⁴²ܘܗܸܢܘܿܢ ܗܵܠܹܝܢ ܐ̄ܢܵܫܵܐ ܙܲܕ̇ܝܼܩܹ̈ܐ ܡܫܲܒ̇ܚܝܼܢ ܗ̄ܘ̣ܵܘ: ܠܵܐ ܗ̄ܘ̣ܵܐ ܒܡܵܐܢܲܝ̈ ܬܸܫ̈ܒ̇ܚܵܬ̣ܵܐ: ܘܠܵܐ ܒܲܦ̈ܠܲܓܹܐ: ܘܠܵܐ ܒܲܪ̈ܒ̣ܝܼܥܹܐ: ܘܠܵܐ ܒܩܲܪ̈ܢܵܬ̣ܵܐ ܟܦܝܼ̈ܦܵܬ̣ܵܐ: ܘܐܵܦܠܵܐ ܒܲܦܫܝܼ̈ܛܵܬ̣ܵܐ: ܘܐܵܦܠܵܐ ܒܨܸܨ̈ܠܹܐ ܡܫܲܒ̇ܚܝܼܢ ܗ̄ܘ̣ܵܘ: ܐܸܠܵܐ ܒܦܘܼܡܵܐ ܒܲܣܝܼܡܵܐ: ܘܒܲܨܠܘܿܬ̣ܵܐ ܕܟ݂ܝܼܬ̣ܵܐ ܘܲܡܫܲܡܠܲܝܬܵܐ: ܘܲܒ̣ܟܹܐܢܘܼܬ̣ܵܐ ܘܲܒ̣ܬܲܡܝܼܡܘܼܬ̣ܵܐ: ܠܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܡܵܪܹܗ ܕܝܼܣܪܵܝܹܠ: ܡܵܪܵܐ ܕܟ݂ܠܗܘܿܢ ܥܒ̣ܵܕܹ̈ܐ.

⁴³ܘܲܫ̣ܪܵܐ ܕܵܘܝܼܕ݂ ܠܥܲܡܵܐ. ܘܐܸܙܲܠܘ ܥܲܡܵܐ ܐ̄ܢܵܫ ܐ̄ܢܵܫ ܠܒܲܝܬܹ̇ܗ ܘܲܗܦܲܟ݂ ܕܵܘܝܼܕ݂ ܠܒܲܝܬܹ̇ܗ ܠܲܡܒܲܪܵܟ݂ܘܼ ܠܲܒ̣ܢܲܝ̈ ܒܲܝܬܹ̇ܗ.