Read Aramaic Peshita 1 Chronicles 17 Bible Online

1 Chronicles 17 - Aramaic Peshita bible

1 Chronicles 17

¹ܘܲܗܘ̤ܵܐ ܕܟܲܕ݂ ܝܼܬܸܒ̣ ܕܵܘܝܼܕ݂ ܒܒܲܝܬܹ̇ܗ: ܐܸܡܲܪ ܕܵܘܝܼܕ݂ ܠܢܵܬ̣ܵܢ ܢܒ̣ܝܼܵܐ: ܚܙܝܼ ܕܐܸܢܵܐ ܝܵܬܹ̇ܒ̣ ܒܒܲܝܬܵܐ ܕܲܡܛܲܠܲܠ ܒܩܵܪ̈ܝܵܬ̣ܵܐ ܕܐܲܪܙܵܐ: ܘܩܹܒ̣ܘܿܬܹܗ ܕܡܵܪܝܵܐ ܫܲܪܝܵܐ ܒܓ̣ܵܘ ܡܲܫܟ̇ܢܵܐ ܕܣܲܥܪܵܐ.

²ܘܐܸܡܲܪ ܢܵܬ̣ܵܢ ܠܕ݂ܵܘܝܼܕ݂: ܟܠ ܡܵܐ ܕܲܒ̣ܠܸܒܵܟ݂: ܙܸܠ ܘܲܥܒܸܕ݂.

³ܘܲܗܘ̤ܵܐ ܒܠܸܠܝܵܐ ܗܵܘ̇: ܘܡܸܠܬܹܗ ܕܡܵܪܝܵܐ ܗܘ̤ܵܬ̣ ܥܲܠ ܢܵܬ̣ܵܢ ܢܒ̣ܝܼܵܐ ܘܐܸܡܲܪ ܠܹܗ.

⁴ܙܸܠ ܘܗܵܟܲܢܵܐ ܬܹܐܡܲܪ ܠܥܲܒ̣ܕ̇ܝܼ ܕܵܘܝܼܕ݂: ܕܐܲܢ̄ܬ̇ ܠܵܐ ܬܸܒ̣ܢܸܐ ܠܝܼ ܒܲܝܬܵܐ ܠܡܸܬܲܒ̣ ܒܹܗ.

⁵ܡܸܛܠ ܕܠܵܐ ܝܵܬ̣ܒܹ̇ܬ̣ ܒܒܲܝܬܵܐ: ܡ̣ܢ ܝܵܘܡܵܐ ܕܐܲܣܩܹ̇ܬ̣ ܠܝܼܣܪܵܝܹܠ ܡ̣ܢ ܡܸܨܪܹܝܢ ܘܲܥܕܲܡܵܐ ܠܝܵܘܡܵܢܵܐ. ܘܲܗܘܹ̇ܝܬ̣ ܡܫܲܢܸܐ ܡ̣ܢ ܡܲܫܟ̇ܢܵܐ ܠܡܲܫܟܢܵܐ.

⁶ܗܵܐ ܟܡܵܐ ܕܲܡܗܲܠܸܟ݂ ܗ̄ܘܹ̇ܝܬ̣ ܒܟ݂ܠܗܘܿܢ ܒܢܲܝ̈ ܝܼܣܪܵܝܹܠ: ܕܲܠܡܵܐ ܡܸܠܬ̣ܵܐ ܐܸܡ̇ܪܹܬ̣ ܠܚܲܕ݂ ܡ̣ܢ ܕܲܝܵܢܹ̈ܐ ܕܲܒ̣ܢܲܝ̈ ܝܼܣܪܵܝܹܠ: ܕܦܸܩܕܹ̇ܬ̣ ܠܲܡܕ݂ܵܢ ܠܥܲܡܝ ܝܼܣܪܵܝܹܠ: ܘܐܸܡ̇ܪܹܬ̣ ܠܗܘܿܢ: ܕܲܠܡܵܢܵܐ ܠܵܐ ܒܵܢܹ̇ܝܬ̇ܘܿܢ ܠܝܼ ܒܲܝܬܵܐ ܕܲܡܛܲܠܲܠ ܒܐܲܪ̈ܙܹܐ.

⁷ܐܵܦ ܗܵܫܵܐ ܗܵܟܲܢܵܐ ܬܹܐܡܲܪ ܠܥܲܒ̣ܕ̇ܝܼ ܕܵܘܝܼܕ݂: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܸܢܵܐ ܕܒܲܪܬܵܟ݂ ܡ̣ܢ ܕܲܝܪܵܐ: ܡ̣ܢ ܒܵܬܲܪ ܥܵـ̈ـܢܵܐ: ܠܡܸܗܘܵܐ ܡܲܠܟܵܐ ܥܲܠ ܝܼܣܪܵܝܹܠ ܥܲܡܝ.

⁸ܘܲܗܘܹ̇ܝܬ̣ ܥܲܡܵܟ݂ ܒܟ݂ܠ ܐܲܬܲܪ ܕܐܹܙܲܠܬ̇. ܘܐܲܘܒ̇ܕܹܬ̣ ܠܟ݂ܠܗܘܿܢ ܒܥܸܠܕ̇ܒ̣ܵܒܲܝ̈ܟ ܡ̣ܢ ܩܕ݂ܵܡܲܝܟ. ܘܥܸܒ̣ܕܹ̇ܬ̣ ܠܵܟ݂ ܫܡܵܐ ܪܲܒܵܐ: ܐܲܝܟ݂ ܫܡܵܐ ܕܪܵܘ̱ܪ̈ܒ̣ܵܢܹܐ ܕܐܝܼܬ̣ ܒܐܲܪܥܵܐ.

⁹ܘܐܸܨܘܿܒ̣ ܕܘܼܟ̇ܬ̣ܵܐ ܠܥܲܡܝ ܝܼܣܪܵܝܹܠ: ܘܐܲܫܪܹܝܘܗܝ: ܘܢܸܬܸ̇ܒ̣ ܒܕ݂ܘܼܟ̇ܬܹܗ. ܘܠܵܐ ܢܙܘܼܥ ܬܘܼܒ̣ ܘܠܵܐ ܢܵܘܣܦܘܼܢ ܒܢܲܝ̈ ܥܵܘܼܠܵܐ ܠܲܡܓܲܠܵܝܘܼܬܹܗ ܐܲܝܟ݂ ܕܲܒ̣ܩܲܕ݂ܡܵܝܬܵܐ.

¹⁰ܡ̣ܢ ܝܵܘܡܵܐ ܕܲܥܒܲܕ̇ܬܵܟ݂ ܕܲܝܵܢܵܐ ܥܲܠ ܥܲܡܝ ܝܼܣܪܵܝܹܠ: ܘܐܲܢܝܼܚܹܬ̣ ܠܵܟ݂ ܡ̣ܢ ܟܠܗܘܿܢ ܒܥܸܠܕ̇ܒ̣ܵܒܲܝ̈ܟ: ܘܚܵܘܝܵܟ݂ ܡܵܪܝܵܐ ܕܡܲܠܟ̇ܘܼܬ̣ܵܐ ܩܲܝܵܡܵܐ ܗ̄ܝܼ ܠܵܟ݂ ܠܥܵܠܲܡ.

¹¹ܘܟܲܕ݂ ܢܸܫ̱ܠܡܘܼܢ ܝܵܘܡܲܝ̈ ܚܲܝܲܝ̈ܟ: ܘܬܹܐܙܲܠ ܘܬܸܬ̣ܟܲܢܲܫ ܠܘܵܬ̣ ܐܲܒ̣ܵܗܲܝ̈ܟ ܐܲܩܝܼܡ ܙܲܪܥܵܟ݂ ܡ̣ܢ ܒܵܬ̣ܪܵܟ݂: ܕܢܵܦܹ̇ܩ ܡ̣ܢ ܚܲܨܵܟ݂: ܘܐܲܬ̣ܩܢܝܼܗ̇ ܠܡܲܠܟ̇ܘܼܬ̣ܵܟ݂.

¹²ܘܗ̤ܘ ܢܸܒ̣ܢܸܐ ܠܝܼ ܒܲܝܬܵܐ ܠܫܹܡܝ. ܘܐܲܬ̣ܩܸܢ ܟܘܼܪܣܝܵܐ ܕܡܲܠܟ̇ܘܼܬܹܗ ܠܥܵܠܲܡ.

¹³ܐܸܢܵܐ ܐܸܗܘܹܐ ܠܹܗ ܠܐܲܒ̣ܵܐ. ܘܗ̤ܘ ܢܸܗܘܹܐ ܠܝܼ ܠܲܒ̣ܪܵܐ. ܘܛܲܝܒ̇ـ̈ـܘܵܬ̣ܝ ܠܵܐ ܢܸܥܒ̇ܪ̈ܵܢ ܡ̣ܢ ܠܘܵܬܹܗ: ܐܲܝܟ݂ ܕܐܲܥܒ̇ܪܹܬ̣ ܡ̣ܢ ܫܵܐܘܿܠ: ܕܲܗܘ̤ܵܐ ܡ̣ܢ ܩܕ݂ܵܡܲܝܟ.

¹⁴ܘܐܹܫܲܠܛܝܼܘܗܝ ܒܒܲܝܬ̇ܝ ܘܲܒ̣ܡܲܠܟ̇ܘܼܬ̣ܝ ܠܥܵܠܲܡ ܥܵܠܡܝܼܢ. ܘܟ݂ܘܼܪܣܝܵܐ ܕܡܲܠܟ̇ܘܼܬܹܗ: ܢܸܗܘܹܐ ܡܛܲܝܲܒ̣ ܠܹܗ ܠܥܵܠܲܡ.

¹⁵ܥܲܠ ܟܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ: ܘܥܲܠ ܟܠܹܗ ܚܸܙܘܵܐ ܗܵܢܵܐ: ܗܵܟܲܢܵܐ ܡܲܠܸܠ ܢܵܬܲܢ ܢܒ̣ܝܼܵܐ ܥܲܡ ܕܵܘܝܼܕ݂.

¹⁶ܘܐܸܬ̣ܵܐ ܡܲܠܟܵܐ ܕܵܘܝܼܕ݂: ܘܝܼܬܸܒ̣ ܩܕ݂ܵܡ ܡܵܪܝܵܐ: ܘܐܸܡܲܪ: ܡܵܢܵܐ ܚܫܝܼܒ̣ ܐ̄ܢܵܐ ܩܕ݂ܵܡܲܝܟ ܡܵܪܹܐ ܡܵܪ̈ܵܘܵܬ̣ܵܐ ܘܡܵܢܵܐ ܗ̄ܘܼ ܒܲܝܬ̇ܝ: ܕܡܲܛܝܼܬܵܢܝ ܥܕܲܡܵܐ ܠܗܵܪܟܵܐ.

¹⁷ܙܥܘܿܪܝܵܐ ܗ̄ܝܼ ܗܵܕܹܐ ܒܥܲܝܢܲܝ̈ܟ: ܡܵܪܹܐ ܡܵܪ̈ܵܘܵܬ̣ܵܐ: ܕܡܲܠܸܠܬ̇ ܥܲܠ ܒܲܝܬܹ̇ܗ ܕܥܲܒ̣ܕܵܟ݂ ܡ̣ܢ ܠܩܘܼܕ݂ܡܝܼܢ ܘܟ݂ܠܗܘܿܢ ܒܢܲܝ̈ܢܵܫܵܐ ܕܥܵܒ̣ܕܝܼܢ ܕܸܚ̱ܠܬ̣ܵܟ݂ ܒܟ݂ܠܹܗ ܠܸܒ̇ܗܘܿܢ: ܡܲܦܸܩ ܐܲܢ̄ܬ̇ ܡ̣ܢ ܚܸܫܘܿܟ݂ܵܐ ܠܢܲܗܝܼܪܵܐ ܡܵܪܹܐ ܡܵܪ̈ܵܘܵܬ̣ܵܐ.

¹⁸ܘܡܵܢܵܐ ܢܸܫܬܲܒ̣ܗܲܪ ܬܘܼܒ̣ ܕܵܘܝܼܕ݂ ܠܲܡܡܲܠܵܠܘܼ ܩܕ݂ܵܡܲܝܟ. ܓܠܹܝܢ ܥܒ̣ܵܕ݂ܵܘ̈ܗܝ ܕܥܲܒ̣ܕܵܟ݂ ܡܵܪܹܐ ܡܵܪ̈ܵܘܵܬ̣ܵܐ.

¹⁹ܡܸܛܠ ܕܝܵܕܲܥ ܐܲܢ̄ܬ̇: ܡܵܢܵܐ ܐܝܼܬ̣ ܒܠܸܒܹ̇ܗ ܕܥܲܒ̣ܕܵܟ݂. ܥܒܲܕ̇ܬ̇ ܠܹܗ ܟܠܗܹܝܢ ܪܵܘ̱ܪ̈ܒ̣ܵܬ̣ܵܐ ܗܵܠܹܝܢ: ܠܡܵܘܪܵܒ̣ܘܼ ܠܥܵܒ̣ܕܵܟ݂.

²⁰ܡܸܛܠ ܗܵܢܵܐ ܝܼܕܲܥ̣ܬ̇ ܡܵܪܹܐ ܡܵܪ̈ܵܘܵܬ̣ܵܐ: ܡܸܛܠ ܕܠܲܝܬ̇ ܐܲܟ݂ܘܵܬ̣ܵܟ݂: ܘܠܲܝܬ̇ ܐܲܠܵܗܵܐ ܐܸܠܵܐ ܐܸܢ ܐܲܢ̄ܬ̇: ܐܲܝܟ݂ ܟܠ ܕܲܫܡܲܥ̄ܢ ܒܐܸܕ݂ܢܲܝ̈ܢ.

²¹ܘܡܲܢܘܼ ܐܝܼܬ̣ ܠܵܟ݂ ܐܲܝܟ݂ ܥܲܡܵܟ݂ ܝܼܣܪܵܝܹܠ. ܥܲܡܵܐ ܚܲܕ݂ ܒܐܪܥܵܐ. ܕܐܸܬ̣ܓ̇ܠܝܼܬ̇ ܡ̣ܢ ܫܡܲܝܵܐ ܘܲܦܪܲܩ̣ܬ̇ ܐܸܢܘܿܢ: ܘܡܸܛܠܵܬ̣ܗܘܿܢ ܥܒܲܕ̇ܬ̇ ܢܸܣܝܘܿܢܹ̈ܐ ܪܵܘ̱ܪ̈ܒܹܐ ܘܲܕ݂ܚܝܼ̈ܠܹܐ: ܘܡܲܚ̈ܘܵܬ̣ܵܐ ܪܵܘ̱ܪ̈ܒ̣ܵܬ̣ܵܐ ܥܲܠ ܡܸܨܪ̈ܵܝܹܐ: ܥܕܲܡܵܐ ܠܐܲܝܟܵܐ ܕܐܲܦܸܩܬ̇ ܐܸܢܘܿܢ ܡ̣ܢ ܒܲܝܢܵܬ̣ܗܘܿܢ.

²²ܘܐܲܬ̣ܩܸܢܬ̇ ܠܵܟ݂ ܠܥܲܡܵܟ݂ ܝܼܣܪܵܝܹܠ: ܠܡܸܗܘܵܐ ܠܵܟ݂ ܥܲܡܵܐ: ܥܕܲܡܵܐ ܠܥܵܠܲܡ ܥܵܠܡܝܼܢ. ܘܐܲܢ̄ܬ̇ ܡܵܪܝܵܐ ܗ̤ܘܲܝܬ̇ ܠܗܘܿܢ ܐܲܠܵܗܵܐ.

²³ܡܸܟܹ̇ܝܠ ܡܵܪܝܵܐ: ܡܸܠܬ̣ܵܐ ܕܐܸܡܲܪܬ̇ ܥܲܠ ܥܲܒ̣ܕܵܟ݂: ܘܥܲܠ ܒܢܲܝ̈ ܒܲܝܬܹ̇ܗ: ܩܲܝܸܡ ܠܥܵܠܲܡ ܘܲܥܒܸܕ݂ ܐܲܝܟܲܢܵܐ ܕܐܸܡܲܪܬ̇.

²⁴ܘܢܸܫܬܲܪܪܘܼܢ ܥܒ̣ܵܕܲܝ̈ܟ ܠܥܵܠܲܡ ܘܢܸܫܬܲܒܲܚ ܫܡܵܟ݂ ܠܥܵܠܲܡ ܒܓ̣ܵܘ ܥܵܠܡܵܐ. ܘܢܸܗܘܘܿܢ ܐܵܡ̇ܪܝܼܢ: ܡܵܪܝܵܐ ܚܲܝܠܬ̣ܵܢܵܐ ܡܵܪܹܐ ܡܵܪ̈ܵܘܵܬ̣ܵܐ: ܐܲܠܵܗܵܐ ܕܝܼܣܪܵܝܹܠ ܘܒܲܝܬܹ̇ܗ ܕܕ݂ܵܘܝܼܕ݂ ܥܲܒ̣ܕܵܟ݂: ܢܸܗܘܹܐ ܡܲܬ̣ܩܲܢ ܩܕ݂ܵܡܲܝܟ ܠܥܵܠܲܡ.

²⁵ܡܸܛܠ ܕܐܲܢ̄ܬ̇ ܐܲܠܵܗܝ ܓܠܲܝܬ̇ ܐ̄ܪܵܙܵܐ ܠܥܲܒ̣ܕܵܟ݂: ܘܐܸܡܪܬ̇ ܠܹܗ: ܕܒܲܝܬܵܐ ܒܢܝܼ ܠܵܟ݂: ܡܸܛܠ ܗܵܢܵܐ ܣܕܲܪ ܥܲܒ̣ܕܵܟ݂ ܒܠܸܒܹ̇ܗ: ܠܲܡܨܲܠܵܝܘܼ ܩܕ݂ܵܡܲܝܟ ܨܠܘܿܬ̣ܵܐ ܗܵܕܹܐ.

²⁶ܡܸܟܹ̇ܝܠ ܡܵܪܝܵܐ ܐܲܢ̄ܬ̇ ܗ̄ܘ̣ ܐܲܠܵܗܝ: ܘܟ݂ܠ ܡܸܠܲܝ̈ܟ ܬܪ̈ܝܼܨܵܬ̣ܵܐ: ܐܲܝܠܹܝܢ ܕܡܲܠܸܠ̣ܬ̇ ܠܥܲܒ̣ܕܵܟ݂: ܛܵܒ̣ܵـ̈ـܬ̣ܵܐ ܐܸܢܹܝܢ.

²⁷ܘܡܸܟܹ̇ܝܠ ܐܸܬ̣ܓܲܠܚ ܠܲܡܒܲܪܵܟ݂ܘܼ ܠܒܲܝܬܹ̇ܗ ܕܥܲܒ̣ܕܵܟ݂: ܕܢܸܗܘܹܐ ܩܕ݂ܵܡܲܝܟ ܠܥܵܠܲܡ ܥܵܠܡܝܼܢ. ܡܸܛܠ ܕܐܲܢ̄ܬ̇ ܗ̄ܘ̣ ܡܵܪܝܵܐ ܡܵܪܹܐ ܡܵܪ̈ܵܘܵܬ̣ܵܐ ܡܲܠܸܠ̣ܬ̇ ܘܡ̣ܢ ܒܘܼܪܟܵܬ̣ܵܟ݂ ܡܸܬ̣ܒܲܪܟ݂ܝܼܢ ܒܵܬܲܝ̈ܗܘܿܢ ܕܙܲܕ̇ܝܼܩܹ̈ܐ ܠܥܵܠܲܡ.