Read Aramaic Peshita 1 Chronicles 18 Bible Online

1 Chronicles 18 - Aramaic Peshita bible

1 Chronicles 18

¹ܘܲܗܘ̤ܵܐ ܡ̣ܢ ܒܵܬܲܪ ܗܵܠܹܝܢ: ܘܲܚܪܲܒ̣ ܕܵܘܝܼܕ݂ ܠܲܦܠܸܫ̈ܬܵܝܹܐ ܘܐܵܘܒܸ̇ܕ݂ ܐܸܢܘܿܢ. ܘܲܢܣܲܒ̣ ܕܵܘܝܼܕ݂ ܚܘܼܛܵܐ ܕܲܡܫܘܼܚܬ̣ܵܐ: ܡ̣ܢ ܐܝܼܕ݂ܵܐ ܕܲܦܠܸܫܬܵܝܹ̈ܐ. ܘܲܢܣܲܒ̣ ܠܓܵܬ̣ ܘܲܠܟܲܦܪ̈ܘܿܢܹܝܗ̇: ܗܵܠܹܝܢ ܕܲܩܕ̇ܩܹ̈ܐ ܕܲܚܕ݂ܝܼܪܝܼܢ ܗ̄ܘ̣ܵܘ ܠܵܗ̇ ܡ̣ܢ ܦܠܸܫܬܵܝܹ̈ܐ.

²ܘܲܚܪܲܒ̣ ܠܡܘܼܐܒ̣ܵܝܹ̈ܐ: ܘܲܗܘ̤ܵܘ ܡܘܼܐܒ̣ܵܝܹ̈ܐ ܥܲܒ̣̈ܕܹ̇ܐ ܫܵܩܠܲܝ̈ ܡܲܕܲܐܬ̣ܵܐ.

³ܘܲܩܛܲܠ ܕܵܘܝܼܕ݂ ܠܲܗܕܲܪܥܙܲܪ ܡܲܠܟܵܐ ܕܲܢܨܝܼܒ̣ܝܼܢ: ܟܲܕ݂ ܐܸܙܲܠ̣ ܣܵܡ̣ ܬܚܘܼܡܵܐ ܒܢܲܗܪܵܐ ܦܪܵܬ̣.

⁴ܘܐܹܚܲܕ݂ ܕܵܘܝܼܕ݂ ܡܸܢܹܗ ܐܵܠܹܦ ܙܵܘ̈ܓ̇ܝܼܢ: ܘܫܲܒ̣ܥܵܐ ܐܲܠܦ̈ܝܼܢ ܦܲܪ̈ܵܫܝܼܢ. ܘܲܥܩܲܪ ܕܵܘܝܼܕ݂ ܠܟ݂ܠܗܘܿܢ ܙܵܘ̈ܓܹ̇ܐ: ܘܲܫܒܲܩ ܡܸܢܗܘܿܢ ܡܵܐܐ ܙܵܘ̈ܓ̇ܝܼܢ.

⁵ܘܐܸܬ̣ܵܘ ܐ̄ܢܵܫܲܝ̈ ܐܲܕ݂ܘܿܡ ܘܕܲܪܡܣܘܿܩ: ܠܲܡܥܲܕܵܪܘܼ ܠܲܗܕܲܪܥܙܲܪ ܡܲܠܟܵܐ ܕܲܢܨܝܼܒ̣ܝܼܢ. ܘܩܲܛܸܠ ܕܵܘܝܼܕ݂ ܡ̣ܢ ܐܲܕ݂ܘܿܡ: ܥܸܣܪܝܼܢ ܘܲܬ̣ܪܹܝܢ ܐܲܠܦ̈ܝܼܢ ܓܲܒ̣ܪ̈ܝܼܢ.

⁶ܘܐܲܩܝܼܡ ܕܵܘܝܼܕ݂ ܫܲܠܝܼܛܵܢܹ̈ܐ ܒܕܲܪܡܣܘܿܩ: ܘܲܗܘ̤ܵܘ ܕܲܪ̈ܡܘܼܣܩܵܝܹܐ ܥܲܒ̣̈ܕܹ̇ܐ ܠܕ݂ܵܘܝܼܕ݂: ܫܵܩܠܲܝ̈ ܡܲܕܲܐܬ̣ܵܐ ܘܲܦܪܲܩ̣ ܡܵܪܝܵܐ ܠܕ݂ܵܘܝܼܕ݂ ܒܟ݂ܠ ܕܘܼܟܵܐ ܕܐܸܙܲܠ.

⁷ܘܲܫܩܲܠ ܕܵܘܝܼܕ݂ ܫܲܠܛܹ̈ܐ ܕܕܲܗܒ̣ܵܐ ܕܲܗܘ̤ܵܘ ܬܠܹܝܢ ܥܲܠ ܪ̈ܲܟ݂ܫܵܐ ܕܥܲܒ̣ܕܵܘ̈ܗܝ ܕܲܗܕܲܪܥܙܲܪ: ܘܐܲܝܬ̇ܝܼ ܐܸܢܘܿܢ ܠܐܘܿܪܸܫܠܸܡ.

⁸ܘܡ̣ܢ ܛܒܲܚ: ܘܡ̣ܢ ܒܪܘܼܬ̣ܝ: ܩܘܼܪ̈ܝܵܐ ܕܲܗܕܲܪܥܙܲܪ: ܢ̣ܣܲܒ̣ ܕܵܘܝܼܕ݂ ܢܚܵܫܵܐ ܕܣܲܓ̇ܝܼ ܛܵܒ̣. ܘܡܸܢܹܗ ܥ̣ܒܲܕ݂ ܕܵܘܝܼܕ݂: ܝܲܡܵܐ ܕܲܢܚܵܫܵܐ: ܘܐܸܣܛܘܿܢܹ̈ܐ ܕܲܢܚܵܫܵܐ: ܘܬ̣ܵܘܪܹ̈ܐ ܕܲܢܚܵܫܵܐ: ܘܡܵܐܢܲܝ̈ ܢܚܵܫܵܐ: ܣܘܿܓ̣ܵܐܐ ܕܛܵܒ̣.

⁹ܘܲܫܡܲܥ̣: ܦܘܿܠ ܡܲܠܟܵܐ ܕܐܲܢܛܝܘܿܟ݂ܵܝܹ̈ܐ: ܕܲܚܪܲܒ̣ ܕܵܘܝܼܕ݂ ܚܲܝܠܵـ̈ـܘܵܬ̣ܵܐ ܕܲܗܕܲܪܥܙܲܪ ܡܲܠܟܵܐ ܕܲܢܨܝܼܒ̣ܝܼܢ.

¹⁰ܘܫܲܕܲܪ ܠܝܘܿܪܵܡ ܒܪܹܗ ܠܘܵܬ̣ ܡܲܠܟܵܐ ܕܵܘܝܼܕ݂: ܠܡܸܫܐܲܠ ܒܲܫܠܵܡܹܗ: ܘܠܲܡܒܲܪܵܟ݂ܘܼܬܹܗ: ܥܲܠ ܕܐܸܬ̣ܟܲܬܲܫ ܥܲܡ ܗܕܲܪܥܙܲܪ ܘܲܡܚܵܝܗܝ: ܡܸܛܠ ܕܓܲܒ̣ܪܵܐ ܗ̄ܘ̣ܵܐ ܩܪܲܒ̣ܬ̣ܵܢܵܐ ܗܕܲܪܥܙܲܪ. ܘܒ̣ܐܝܼܕܹܗ ܕܝܘܿܪܵܡ ܗ̄ܘ̣ܵܘ ܡܵܐܢܲܝ ܟܸܣܦܵܐ: ܘܡܵܐܢܲܝ̈ ܕܲܗܒ̣ܵܐ: ܘܡܵܐܢܲܝ̈ ܢܚܵܫܵܐ.

¹¹ܘܐܵܦ ܡܸܢܗܘܿܢ ܩܲܕܸ̇ܫ ܡܲܠܟܵܐ ܕܵܘܝܼܕ݂ ܠܡܵܪܝܵܐ: ܥܲܡ ܟܸܣܦܵܐ ܘܕܲܗܒ̣ܵܐ ܕܲܢܣܲܒ̣ ܡ̣ܢ ܟܠܗܘܿܢ ܥܲܡܡܹ̈ܐ ܕܲܟ݂ܒܲܫ̣: ܡ̣ܢ ܐܲܕ݂ܘܿܡܵܝܹ̈ܐ: ܘܡ̣ܢ ܒܢܲܝ̈ ܥܲܡܘܿܢ: ܘܡ̣ܢ ܡܘܼܐܒ̣ܵܝܹ̈ܐ: ܘܡ̣ܢ ܦܠܸܫܬܵܝܹ̈ܐ: ܘܡ̣ܢ ܥܡܵܠܩܵܝܹ̈ܐ.

¹²ܘܐܲܒ̣ܝܼܫܲܝ ܒܲܪ ܨܘܿܪܝܼܵܐ: ܐܲܚܘܼܗܝ ܕܝܘܿܐܵܒ̣: ܗ̤ܘ ܚ̣ܪܲܒ̣ ܠܐܲܕ݂ܘܿܡܵܝܹ̈ܐ ܒܢܲܚܠܵܐ ܕܡܸܠܚܵܐ: ܬܡܵܢܬܲܥܣܲܪ ܐܲܠܦ̈ܝܼܢ ܓܲܒ̣ܪ̈ܝܼܢ.

¹³ܘܐܲܩܝܼܡ ܕܘܝܼܕ݂ ܥܲܠ ܐܲܕ݂ܘܿܡܵܝܹ̈ܐ ܫܲܠܝܼܛܵܢܹ̈ܐ. ܘܲܗܘ̤ܵܘ ܟܠܗܘܿܢ ܐܲܕ݂ܘܿܡܵܝܹ̈ܐ ܥܲܒ̣̈ܕܹ̇ܐ ܠܕ݂ܵܘܝܼܕ݂. ܘܲܦܪܲܩ̣ ܡܵܪܝܵܐ ܠܕ݂ܵܘܝܼܕ݂ ܒܟ݂ܠ ܕܘܼܟܵܐ ܕܐܵܙܹ̇ܠ ܗ̄ܘ̣ܵܐ.

¹⁴ܘܐܲܡ̣ܠܸܟ݂ ܕܵܘܝܼܕ݂ ܥܲܠ ܟܠܹܗ ܝܼܣܪܵܝܹܠ. ܘܲܗܘ̤ܵܐ ܕܵܘܝܼܕ݂ ܥܵܒܹ̇ܕ݂ ܕܝܼܢܵܐ ܘܙܲܕ̇ܝܼܩܘܼܬ̣ܵܐ ܠܟ݂ܠܹܗ ܥܲܡܵܐ.

¹⁵ܘܝܘܿܐܵܒ̣ ܒܲܪ ܨܘܿܪܝܼܵܐ ܫܲܠܝܼܛ ܥܲܠ ܟܠܗܘܿܢ ܚܝ̈ܠܵܘܵܬ̣ܵܐ: ܘܝܵܗܘܿܫܵܦܵܛ ܒܲܪ ܐܲܚܝܼܠܘܿܕ݂ ܡܕܲܒ̇ܪܵܢܵܐ.

¹⁶ܘܨܵܕ݂ܘܿܩ ܒܲܪ ܐܲܚܝܼܛܘܿܒ̣: ܘܐܲܚܝܼܡܲܠܟ ܒܲܪ ܐܲܒ̣ܝܼܬ̣ܵܪ ܟܵܗܢܹ̈ܐ: ܘܣܲܪܝܼܵܐ ܣܵܦܪܵܐ.

¹⁷ܘܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܥܲܠ ܩܲܫܵܬܹ̈ܐ ܘܥܲܠ ܩܸܠܥܹ̈ܐ. ܘܲܒ̣ܢܵܘ̈ܗܝ ܕܕ݂ܵܘܝܼܕ݂ ܪܵܘ̱ܪ̈ܒ̣ܝܼܢ ܗ̄ܘ̣ܵܘ.