Read Aramaic Peshita 1 Chronicles 19 Bible Online

1 Chronicles 19 - Aramaic Peshita bible

1 Chronicles 19

¹ܘܲܗܘ̤ܵܐ ܡ̣ܢ ܒܵܬܲܪ ܗܵܠܹܝܢ: ܘܡ̣ܝܼܬ̣ ܢܵܚܵܫ ܡܲܠܟܵܐ ܕܲܒ̣ܢܲܝ̈ ܥܲܡܘܿܢ ܘܐܲܡ̣ܠܸܟ݂ ܚܵܢܘܿܢ ܒܪܹܗ ܒܵܬ̣ܪܹܗ.

²ܘܐܸܡܲܪ ܕܵܘܝܼܕ݂: ܡܸܥܒܲܕ݂ ܐܸܥܒܸ̇ܕ݂ ܚܸܣܕ݂ܵܐ ܥܲܡ ܚܵܢܘܿܢ ܒܲܪ ܢܵܚܵܫ: ܐܲܝܟܲܢܵܐ ܕܲܥܒܲܕ݂ ܐܲܒ̣ܘܼܗܝ ܥܲܡܝ ܚܸܣܕ݂ܵܐ ܘܫܲܕܲܪ ܕܵܘܝܼܕ݂ ܐܝܼܙ̈ܓܲܕܹ̇ܐ ܠܲܡܒܲܝܵܐܘܼܬܹܗ ܥܲܠ ܐܲܒ̣ܘܼܗܝ ܘܐܸܬ̣ܵܘ ܥܲܒ̣ܕܵܘ̈ܗܝ ܕܕ݂ܵܘܝܼܕ݂ ܠܐܲܪܥܵܐ ܕܲܒ̣ܢܲܝ̈ ܥܲܡܘܿܢ: ܠܘܵܬ̣ ܚܵܢܘܿܢ ܠܲܡܒܲܝܵܐܘܼܬܹܗ.

³ܘܐܵܡ̇ܪܝܼܢ ܪܵܘ̱ܪ̈ܒ̣ܵܢܹܐ ܕܲܒ̣ܢܲܝ̈ ܥܲܡܘܿܢ ܠܚܵܢܘܿܢ ܡܵܪܗܘܿܢ: ܡܝܲܩܵܪܘܼ ܡܝܲܩܲܪ ܗ̄ܘ̣ܵܐ ܕܵܘܝܼܕ݂ ܠܐܲܒ̣ܘܼܟ݂ ܒܚܲܝܵܘ̈ܗܝ ܡܸܛܠ ܕܗܵܐ ܫܲܕܲܪ ܠܵܟ݂ ܡܒܲܝܵܐܢܹ̈ܐ. ܡܸܛܠ ܕܲܠܡܸܓܲܫ ܡܕ݂ܝܼܢ̄ܬܵܐ: ܘܲܠܡܸܕܲܥ ܡܲܦܩܵܢܹ̈ܐ ܘܡܲܥܠܵܢܹ̈ܐ: ܫܲܕܲܪ ܕܵܘܝܼܕ݂ ܥܲܒ̣ܕܵܘ̈ܗܝ ܠܘܵܬܲܢ.

⁴ܘܲܕ݂ܒܲܪ ܚܵܢܘܿܢ ܠܥܲܒ̣ܕܵܘ̈ܗܝ ܕܕ݂ܵܘܝܼܕ݂: ܘܲܓ̣ܪܲܓ̣ ܦܵܠܓܘܼܬ̣ ܕܲܩܢܲܝ̈ܗܘܿܢ: ܘܦܵܠܓܘܼܬ̣ ܪܹ̈ܫܲܝܗܘܿܢ: ܘܩܲܕܸ̇ܕ݂ ܟܘܿܬ̇ܝܼܢ̈ܝܵܬ̣ܗܘܿܢ: ܥܕܲܡܵܐ ܠܲܟ݂ܢܘܼܬ̣ ܫܸܪ̈ܲܝܗܘܿܢ: ܘܫܲܕܲܪ ܐܸܢܘܿܢ.

⁵ܘܚܵܘܝܼܘ ܠܕ݂ܵܘܝܼܕ݂. ܘܫܲܕܲܪ ܠܐܘܼܪܥ̱ܗܘܿܢ ܕܓܲܒ̣ܪܹ̈ܐ: ܡܸܛܠ ܕܒܲܗܝܼܬ̣ܝܼܢ ܗ̄ܘ̣ܵܘ. ܘܐܸܡܲܪ ܠܗܘܿܢ ܡܲܠܟܵܐ: ܬܸܒ̣ܘ ܒܐܝܼܪܝܼܚܘܿ ܥܕܲܡܵܐ ܠܐܲܝܟܵܐ ܕܢܹܐܗܘܿܢ ܕܲܩܢܲܝ̈ܟ̇ܘܿܢ: ܘܬܸܗܦܟ݂ܘܿܢ.

⁶ܘܲܚܙܲܘ ܒܢܲܝ̈ ܥܲܡܘܿܢ ܕܐܲܣܟܸ̇ܠܘ ܒܥܲܒ̣ܕܵܘ̈ܗܝ ܕܕ݂ܵܘܝܼܕ݂ ܘܫܲܕܲܪ ܚܵܢܘܿܢ ܘܲܒ̣ܢܲܝ̈ ܥܲܡܘܿܢ ܠܡܹܐܓܲܪ ܠܗܘܿܢ ܒܐܵܠܹܦ ܟܲܟ̇ܪ̈ܝܼܢ ܕܟܸܣܦܵܐ: ܡ̣ܢ ܐܵܪܵܡ ܢܲܗܪ̈ܝܼܢ: ܘܡ̣ܢ ܚܵܪܵܢ: ܘܡ̣ܢ ܢܨܝܼܒ̣ܝܼܢ: ܘܡ̣ܢ ܐܵܕܿܘܿܡ: ܙܵܘ̈ܓܹ̇ܐ ܘܦܲܪ̈ܵܫܹܐ.

⁷ܘܐܸܓܲܪܘ ܠܗܘܿܢ ܬܠܵܬ̣ܝܼܢ ܘܲܬ̣ܪܹܝܢ ܐܲܠܦ̈ܝܼܢ ܦܲܪ̈ܵܫܝܼܢ: ܘܲܠܡܲܠܟܵܐ ܕܚܵܪܵܢ: ܘܲܠܡܲܠܟܵܐ ܕܐܲܕ݂ܘܿܡ: ܘܲܠܡܲܠܟܵܐ ܕܐܵܪܡ ܢܲܗܪ̈ܝܼܢ: ܘܲܠܡܲܠܟܵܐ ܕܲܢܨܝܼܒ̣ܝܼܢ: ܘܲܠܚܲܝ̈ܠܵܘܵܬ̣ܗܘܿܢ ܘܐܸܬ̣ܵܘ ܘܲܫܪܵܘ ܩܕ݂ܵܡ ܡܲܐܕ̇ܒ̣ܵܐ. ܘܲܒ̣ܢܲܝ̈ ܥܲܡܘܿܢ ܐܸܬ̣ܟܲܢܲܫܘ ܡ̣ܢ ܩܘܼܪ̈ܝܼܗܘܿܢ: ܘܐܸܬ̣ܵܘ ܠܲܩܪܵܒ̣ܵܐ.

⁸ܘܲܫܡܲܥ ܕܵܘܝܼܕ݂: ܘܫܲܕܲܪ ܠܝܘܿܐܵܒ̣: ܘܲܠܟ݂ܠ ܚܲܝ̈ܠܵܘܵܬ̣ܵܐ ܕܓܲܢ̄ܒܵܪܹ̈ܐ.

⁹ܘܲܢܦܲܩ̣ܘ ܒܢܲܝ̈ ܥܲܡܘܿܢ: ܘܲܥܒܲܕ݂ܘ ܩܪܵܒ̣ܵܐ ܩܕ݂ܵܡ ܬܲܪܥܵܐ. ܘܗܵܠܹܝܢ ܡܲܠܟܹ̇ܐ ܗܸܢܘܿܢ ܘܚܲܝ̈ܠܵܘܵܬ̣ܗܘܿܢ ܫܪܹܝܢ ܗ̄ܘ̣ܵܘ ܒܲܠܚܘܿܕܲܝ̈ܗܘܿܢ ܒܚܲܩ̈ܠܵܬ̣ܵܐ.

¹⁰ܘܲܚܙܵܐ ܝܘܿܐܵܒ̣ ܕܲܥܫܸܢ ܥܠܵܘܗܝ ܩܪܵܒ̣ܵܐ. ܡ̣ܢ ܩܕ݂ܵܡܵܘܗܝ ܘܡ̣ܢ ܒܸܣܬ̇ܪܹܗ. ܘܲܓܒ̣ܵܐ ܠܹܗ ܡ̣ܢ ܟܠܗܘܿܢ ܓܲܢ̄ܒܵܪܹ̈ܐ ܕܝܼܣܪܵܝܹܠ: ܘܲܥܒܲܕ݂ ܩܪܵܒ̣ܵܐ ܠܘܼܩܒܲܠ ܐܲܕ݂ܘܿܡ.

¹¹ܘܫܲܪܟܵܐ ܕܥܲܡܵܐ: ܐܲܫܠܸܡ ܠܐܲܒ̣ܝܼܫܲܝ ܐܲܚܘܼܗܝ. ܘܲܣܕܲܪ ܠܘܼܩܒܲܠ ܒܢܲܝ̈ ܥܲܡܘܿܢ.

¹²ܘܐܸܡܲܪ ܠܹܗ: ܐܸܢܗ̤ܘ ܕܢܸܬ̣ܩܲܦ ܡܹܢܝ ܐܲܕ݂ܘܿܡ: ܬܹܐܬܹܐ ܬܦܲܨܹܝܢܝ ܘܐܸܢ ܒܢܲܝ̈ ܥܲܡܘܿܢ ܢܸܬ̣ܩܦܘܼܢ ܡܸܢܵܟ݂: ܐܹܬܹܐ ܘܐܹܦܲܨܹܝܟ݂ ܡܸܢܗܘܿܢ.

¹³ܬܩܲܦ: ܘܐܸܬ̇ܬܲܩܲܦ ܘܢܸܬ̣ܟܲܬܲܫ ܥܲܠ ܐܲܦܲܝ̈ ܥܲܡܲܢ: ܘܥܲܠ ܐܲܦܲܝ̈ ܩܘܼܪ̈ܝܵܐ ܕܐܲܠܵܗܵܐ. ܘܡܵܪܝܵܐ ܢܸܥܒܸ̇ܕ݂ ܡܸܕܸ̇ܡ ܕܫܲܦܝܼܪ ܒܥܲܝܢܵܘ̈ܗܝ.

¹⁴ܘܲܩܪܸܒ̣ ܝܘܿܐܵܒ̣ ܘܥܲܡܵܐ ܕܐܝܼܬ̣ ܥܲܡܹܗ: ܠܡܸܬ̣ܟܲܬܵܫܘܼ ܥܲܡ ܐܲܕ݂ܘܿܡܵܝܹ̈ܐ: ܘܲܥܪܲܩܘ ܡ̣ܢ ܩܕ݂ܵܡܵܘܗܝ.

¹⁵ܘܲܒ̣ܢܲܝ̈ ܥܲܡܘܿܢ ܚܙܵܘ ܕܲܥܪܲܩ̣ܘ ܐܲܕ݂ܘܿܡܵܝܹ̈ܐ. ܘܲܥܪܲܩ̣ܘ ܐܵܦ ܗܸܢܘܿܢ ܡ̣ܢ ܩܕ݂ܵܡ ܐܲܒ̣ܝܼܫܲܝ ܐܲܚܘܼܗܝ. ܘܐܸܬ̣ܵܘ ܠܲܩܪܝܼܬ̣ܵܐ. ܘܲܗܦܲܟ݂ ܝܘܿܐܵܒ̣ ܠܐܘܿܪܸܫܠܸܡ.

¹⁶ܘܲܚܙ̣ܵܘ ܐܲܕ݂ܘܿܡܵܝܹ̈ܐ ܕܐܸܬ̇ܬ̇ܒܲܪܘ ܩܕ݂ܵܡ ܒܢܲܝ̈ ܝܼܣܪܵܝܹܠ. ܘܫܲܕܲܪܘ ܐܝܼܙ̈ܓܲܕܹ̇ܐ: ܘܐܲܦܸܩܘ ܠܐܲܕ݂ܘܿܡܵܝܹ̈ܐ ܕܐܝܼܬ̣ ܡ̣ܢ ܥܒܲܪ ܢܲܗܪܵܐ. ܘܐܸܬ̣ܵܘ ܠܚܝܼܠܲܡ: ܘܲܫܒ̣ܘܿܟ݂ ܪܲܒ̇ ܚܲܝܠܹܗ ܕܲܗܕܲܪܥܙܲܪ ܩܕ݂ܵܡܲܝܗܘܿܢ.

¹⁷ܘܚܵܘܝܼܘ ܠܕ݂ܵܘܝܼܕ݂. ܘܟܲܢܸܫ ܠܟ݂ܠܹܗ ܝܼܣܪܵܝܹܠ: ܘܐܸܬ̣ܵܐ ܥܠܲܝܗܘܿܢ ܘܲܣܕܲܪ ܕܵܘܝܼܕ݂ ܠܘܼܩܒܲܠ ܐܲܕ݂ܘܿܡܵܝܹ̈ܐ ܩܪܵܒ̣ܵܐ. ܘܐܸܬ̣ܟܲܬܲܫ ܥܲܡܗܘܿܢ.

¹⁸ܘܲܥܪܲܩ̣ܘ ܐܲܕ݂ܘܿܡܵܝܹ̈ܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ ܘܲܚܪܲܒ̣ ܕܵܘܝܼܕ݂ ܒܐܲܕ݂ܘܿܡܵܝܹ̈ܐ: ܫܲܒ̣ܥܵܐ ܐܲܠܦ̈ܝܼܢ ܙܵܘ̈ܓ̇ܝܼܢ: ܘܐܲܪܒ̇ܥܵܐ ܐܲܠܦ̈ܝܼܢ ܓܲܒ̣ܪܹ̈ܐ ܪܸ̈ܓ̣ܠܵܝܹܐ. ܘܲܫܒ̣ܘܿܟ݂ ܪܲܒ̇ ܚܲܝܠܹܗ ܕܲܗܕܲܪܥܙܲܪ ܐܸܬ̣ܩܛܸܠ ܬܲܡܵܢ.

¹⁹ܘܲܚܙܵܘ ܥܲܒ̣ܕܵܘ̈ܗܝ ܕܲܗܕܲܪܥܙܲܪ ܕܐܸܬ̇ܬ̇ܒܲܪܘ ܩܕ݂ܵܡ ܒܢܲܝ̈ ܝܼܣܪܵܝܹܠ ܘܐܲܫܠܸܡ̣ܘ ܠܕ݂ܵܘܝܼܕ݂: ܘܦܲܠܚܘܼܗܝ. ܘܠܵܐܨܒ̣ܵܘ ܐܲܕ݂ܘܿܡܵܝܹ̈ܐ ܠܲܡܥܲܕܵܪܘܼ ܬܘܼܒ̣ ܠܲܒ̣ܢܲܝ̈ ܥܲܡܘܿܢ.