Read Aramaic Peshita 1 Chronicles 22 Bible Online

1 Chronicles 22 - Aramaic Peshita bible

1 Chronicles 22

¹ܘܐܸܡܲܪ ܕܵܘܝܼܕ݂ ܕܗܵܢܵܘ ܒܲܝܬܹ̇ܗ ܕܡܵܪܝܵܐ ܐܲܠܵܗܵܐ: ܘܗܵܢܵܘ ܡܲܕ݂ܒ̇ܚܵܐ ܕܲܥܠܵـ̈ـܘܵܬ̣ܵܐ ܕܝܼܣܪܵܝܹܠ.

²ܘܐܸܡܲܪ ܕܵܘܝܼܕ݂ ܠܲܡܟܲܢܵܫܘܼ ܠܟ݂ܠܗܘܿܢ ܓܝܼܘܿܪܹ̈ܐ ܕܐܝܼܬ̣ ܗ̄ܘ̣ܵܐ ܒܐܲܪܥܵܐ ܕܝܼܣܪܵܝܹܠ. ܘܢܸܥܒ̇ܕ݂ܘܼܢ ܡܸܢܗܘܿܢ ܦܵܣ̈ܘܿܠܹܐ: ܢܸܦܣܩܘܼܢ ܟܹܐܦܹ̈ܐ ܠܒܲܝܬܹ̇ܗ ܕܡܵܪܝܵܐ.

³ܘܲܠܡܸܥܒܲܕ݂ ܡܸܢܗܘܿܢ ܩܲܝܢܵܝܹ̈ܐ ܥܵܒ̣ܕܲܝ̈ ܦܲܪܙܠܵܐ: ܠܡܸܥܒܲܕ݂ ܦܲܕܘܼܥܹ̈ܐ: ܘܐܲܟ݂ܣܝܼ̈ܕܹܐ. ܘܡܘܼܟ݂̈ܠܹܐ ܕܦܲܪܙܠܵܐ ܬܲܩܸܢ ܕܵܘܝܼܕ݂: ܘܲܢܚܵܫܵܐ ܣܲܓ̇ܝܼܵܐܐ ܕܠܲܝܬ̇ ܠܹܗ ܡܲܬ̣ܩܵܠܵܐ.

⁴ܘܩܲܝܣܹ̈ܐ ܕܐܲܪܙܵܐ ܕܠܲܝܬ̇ ܠܗܘܿܢ ܡܸܢܝܵܢܵܐ ܡܸܛܠ ܕܐܲܝܬ̇ܝܼܘ ܨܘܿܪ̈ܵܝܹܐ ܘܨܲܝܕ̇ܢܵܝܹ̈ܐ: ܩܲܝܣܹ̈ܐ ܕܐܲܪܙܵܐ ܣܘܿܓ̣ܵܐܐ ܕܛܵܒ̣ ܠܕ݂ܵܘܝܼܕ݂.

⁵ܘܐܸܡܲܪ ܕܵܘܝܼܕ݂: ܫܠܹܝܡܘܿܢ ܒܹܪܝ ܥܕܲܡܵܐ ܠܗܵܫܵܐ ܛܲܠܝܵܐ ܗ̄ܘ̣ ܙܥܘܿܪܵܐ ܘܲܥܠܵܘܗܝ ܗ̄ܘ̣ ܐܲܡܝܼܪܵܐ ܒܲܟ݂ܬ̣ܵܒ̣ܵܐ: ܕܢܸܒ̣ܢܹܐ ܒܲܝܬܵܐ ܠܡܵܪܝܵܐ: ܕܢܵܘܪ̱ܒ̣ܝܼܘܗܝ ܠܥܸܠ ܠܲܫܡܵܐ ܘܲܠܪܲܒ̇ܘܼܬ̣ܵܐ ܘܲܠܬܸܫܒ̇ܘܿܚܬܵܐ: ܕܥܲܠ ܟܠܗܹܝܢ ܡܕ݂ܝܼ̈ܢܵܬ̣ܵܐ. ܐܹܛܲܝܸܒ̣ ܠܹܗ ܐܸܢܵܐ ܟܠ ܡܸܕܸ̇ܡ ܕܡܸܬ̣ܒ̇ܥܹܐ ܠܹܗ ܡ̣ܢ ܚܲܝܲܝ̈. ܘܛܲܝܸܒ̣ ܕܵܘܝܼܕ݂ ܟܠ ܡܸܕܸ̇ܡ ܕܡܸܬ̣ܒ̇ܥܹܐ ܗ̄ܘ̣ܵܐ ܠܹܗ ܠܒܲܝܬܵܐ ܘܡܸܕܸ̇ܡ ܠܵܐ ܚ̣ܣܲܪ.

⁶ܘܲܩܪܵܐ ܠܲܫܠܹܝܡܘܿܢ ܒܪܹܗ: ܘܐܸܡܲܪ ܠܹܗ.

⁷ܐܲܢ̄ܬ̇ ܬܸܒ̣ܢܸܐ ܒܲܝܬܵܐ ܠܡܵܪܝܵܐ ܐܲܠܵܗܵܐ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ.

⁸ܡܸܛܠ ܕܫܲܕܲܪ ܥܠܲܝ ܒܐܝܼܕܲܝ ܕܲܢܒ̣ܝܼܵܐ: ܘܐܸܡܲܪ ܠܝܼ: ܕܡܵܐ ܣܲܓ̇ܝܼܵܐܐ ܐܸܫܲܕ̇ܬ̣ ܘܩܹܐܪ̈ܣܹܐ ܪܵܘ̱ܪ̈ܒܹܐ ܥܒܲܕ̇ܬ̇ ܐܲܢ̄ܬ̇ ܠܵܐ ܬܸܒ̣ܢܸܐ ܒܲܝܬܵܐ ܠܫܹܡܝ. ܡܸܛܠ ܕܲܕ݂ܡܵܐ ܣܲܓ̇ܝܼܵܐܐ ܐܸܫܲܕ̇ܬ̣ ܥܲܠ ܐܲܪܥܵܐ ܩܕ݂ܵܡܲܝ.

⁹ܒܪܵܐ ܕܹܝܢ ܕܡܸܬ̣̱ܝܼܠܸܕ݂ ܠܵܟ݂: ܗ̤ܘ ܢܸܗܘܹܐ ܓܲܒ̣ܪܵܐ ܕܲܢܝܵܚܵܐ ܘܐܲܢܝܼܚ ܠܹܗ ܡ̣ܢ ܟܠܗܘܿܢ ܒܥܸܠܕ̇ܒ̣ܵܒ̣ܵܘ̈ܗܝ: ܕܲܚܕ݂ܝܼܪܝܼܢ ܠܹܗ. ܘܲܫܠܹܝܡܘܿܢ ܢܸܗܘܹܐ ܫܡܹܗ. ܘܲܫܠܵܡܵܐ ܘܲܢܝܵܚܵܐ ܢܸܗܘܹܐ ܥܲܠ ܟܠܹܗ ܝܼܣܪܵܝܹܠ ܒܝܵܘ̈ܡܵܬܹܗ.

¹⁰ܘܗ̤ܘ ܢܸܒ̣ܢܹܐ ܒܲܝܬܵܐ ܠܫܹܡܝ ܘܗ̤ܘ ܢܸܗܘܹܐ ܠܝܼ ܐܲܝܟ݂ ܒܪܵܐ. ܘܐܸܢܵܐ ܐܸܗܘܹܐ ܠܹܗ ܐܲܝܟ݂ ܐܲܒ̣ܵܐ. ܘܐܲܬ̣ܩܸܢ ܟܘܼܪܣܝܵܐ ܕܡܲܠܟ̇ܘܼܬܹܗ ܥܲܠ ܝܼܣܪܵܝܹܠ: ܠܥܵܠܲܡ ܥܵܠܡܝܼܢ.

¹¹ܘܐܵܦ ܗܵܫܵܐ ܒܹܪܝ: ܢܸܗܘܹܐ ܡܵܪܝܵܐ ܥܲܡܵܟ݂: ܘܬܲܟ݂ܫܲܪ ܘܬܸܒ̣ܢܹܐ ܒܲܝܬܵܐ ܕܡܵܪܝܵܐ ܐܲܠܵܗܵܟ݂: ܐܲܝܟܲܢܵܐ ܕܐܸܡܲܪ ܠܝܼ.

¹²ܘܗ̤ܘ ܢܸܬܸ̇ܠ ܠܵܟ݂ ܚܸܟ݂ܡ̱ܬ̣ܵܐ ܘܲܢܒ̣ܝܼܘܼܬ̣ܵܐ. ܘܢܸܦܩܕ݂ܵܟ݂ ܥܲܠ ܝܼܣܪܵܝܹܠ ܘܬܸܛܲܪ ܢܵܡܘܿܣܵܘ̈ܗܝ ܕܡܵܪܝܵܐ ܐܲܠܵܗܵܐ ܐܲܝܟܲܢܵܐ ܕܦܲܩܕ݂ܵܟ݂. ܘܗܵܝܕܹ̇ܝܢ ܬܲܟ݂ܫܲܪ.

¹³ܘܐܸܢܗ̤ܘ ܕܬܸܛܲܪ ܘܬܸܥܒܸ̇ܕ݂ ܦܘܼܩ̈ܕܵܢܹܐ ܗܵܠܹܝܢ: ܘܢܵܡܘܿܣܹ̈ܐ ܘܕ݂ܝܼܢܹ̈ܐ ܐܲܝܟܲܢܵܐ ܕܦܲܩܸܕ݂ ܡܵܪܝܵܐ ܠܡܘܼܫܹܐ ܠܡܲܠܵܦܘܼ ܠܝܼܣܪܵܝܹܠ: ܗܵܝܕܹ̇ܝܢ ܐܸܬ̣ܥܲܫܲܢ ܘܐܸܬ̣ܓܲܢ̄ܒܲܪ. ܠܵܐ ܬܸܕ݂ܚܲܠ: ܘܐܵܦܠܵܐ ܬܙܘܼܥ.

¹⁴ܘܟ݂ܠ ܡܸܕܸ̇ܡ ܗܵܐ ܛܲܝܒܹ̇ܬ̣ ܠܵܟ݂: ܟܠ ܡܸܕܸ̇ܡ ܕܡܸܬ̣ܒ̇ܥܹܐ ܠܒܸܢܝܵܢܵܐ ܠܒܲܝܬܹ̇ܗ ܕܡܵܪܝܵܐ. ܛܲܝܒܹ̇ܬ̣ ܠܵܟ݂ ܟܲܟ̇ܪܹ̈ܐ ܕܕܲܗܒ̣ܵܐ ܡܵܐܐ ܐܲܠܦ̈ܝܼܢ. ܛܲܝܒܹܬ̣ ܠܵܟ݂ ܣܹܐܡܵܐ ܐܵܠܹܦ ܐܲܠܦ̈ܝܼܢ ܟܲܟ̇ܪ̈ܝܼܢ. ܘܲܢܚܵܫܵܐ ܘܦܲܪܙܠܵܐ ܛܲܝܒܹܬ̣ ܠܵܟ݂: ܕܠܵܐ ܐܝܼܬ̣ ܠܹܗ ܡܸܢܝܵܢܵܐ. ܘܟ݂ܠ ܒܢܲܝ̈ܢܵܫܵܐ ܕܲܡܗܲܠܟ݂ܝܼܢ ܥܲܠ ܐܲܪܥܵܐ: ܠܵܐ ܝܵܕ݂ܥܝܼܢ ܠܡܸܚܫܲܒ̣ ܣܵܟ݂ܵܐ ܕܠܝܼܛܪ̈ܵܘܗܝ: ܡܸܛܠ ܕܣܲܓܝܼܵܐܐ ܗ̄ܘ̣. ܘܩܲܝܣܹ̈ܐ ܘܟܹܐܦܹ̈ܐ ܛܲܝܒܹ̇ܬ̣ ܠܵܟ݂: ܘܲܥܠܲܝܗܹܝܢ ܬܵܘܣܸܦ.

¹⁵ܘܐܲܣܓܵܐ ܥܵܒ̣ܕܲܝ̈ ܥܒ̣ܝܼ̈ܕ݂ܵܬ̣ܵܐ: ܦܵܣ̈ܘܿܠܹܐ: ܘܐܲܪ̈ܕܸ̇ܟ݂ܠܹܐ: ܘܢܲܓܵܪܹ̈ܐ ܕܩܲܝܣܵܐ.

¹⁶ܘܥܵܒ̣ܕܲܝ̈ ܕܲܗܒ̣ܵܐ: ܘܥܵܒ̣ܕܲܝ̈: ܣܹܐܡܵܐ: ܘܥܵܒ̣ܕܲܝ̈ ܢܚܵܫܵܐ: ܘܥܵܒ̣ܕܲܝ̈ ܦܲܪܙܠܵܐ: ܕܠܵܐ ܐܝܼܬ̣ ܠܗܘܿܢ ܡܸܢܝܵܢܵܐ ܘܐܸܫܬܲܕܲܪ ܘܲܥܒܸܕ݂. ܘܢܸܗܘܹܐ ܡܵܪܝܵܐ ܒܥܘܼܕ݂ܪܵܢܵܟ݂.

¹⁷ܘܦܲܩܸܕ݂ ܕܵܘܝܼܕ݂ ܠܟ݂ܠܗܘܿܢ ܩܲܫܝܼ̈ܫܹܐ ܕܝܼܣܪܵܝܹܠ: ܘܐܸܡܲܪ ܠܗܘܿܢ: ܥܲܕܲܪܘ ܠܲܫܠܹܝܡܘܿܢ ܒܹܪܝ.

¹⁸ܡܸܛܠ ܕܗܵܐ ܡܵܪܝܵܐ ܐܲܠܵܗܟ݂ܘܿܢ ܥܲܡܟ݂ܘܿܢ: ܘܲܡܥܲܕܲܪ ܠܟ݂ܘܿܢ: ܘܲܡܣܲܝܲܥ ܠܟܘܿܢ: ܡ̣ܢ ܟܠܗܘܿܢ ܚܕ݂ܵܪ̈ܲܝܟ̇ܘܿܢ ܘܗܵܐ ܐܲܫܠܸܡ ܩܕ݂ܵܡܲܝܟ̇ܘܿܢ: ܟܠܗܘܿܢ ܥܵܡܘܿܪܹ̈ܐ ܕܐܲܪܥܵܐ. ܘܬܸܬ̣ܟ̇ܒܸܫ ܐܲܪܥܵܐ ܩܕ݂ܵܡ ܡܵܪܝܵܐ ܘܲܩܕ݂ܵܡ ܥܲܡܹܗ.

¹⁹ܘܐܵܦ ܗܵܫܵܐ ܐܲܬ̣ܩܸܢܘ ܠܸܒ̇ܟ݂ܘܿܢ ܘܢܲܦ̮ܫܟ݂ܘܿܢ: ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ. ܘܩܘܼܡܘ ܘܲܒ̣ܢܵܘ ܡܲܩܕ̇ܫܵܐ ܕܡܵܪܝܵܐ ܐܲܠܵܗܵܐ. ܘܐܲܥܸܠܘ ܠܬܲܡܵܢ ܩܹܒ̣ܘܿܬ̣ܵܐ ܕܒ̣ܵܗ̇ ܣܝܼܡܵܐ ܕܝܵܬܹܩܹܐ ܕܡܵܪܝܵܐ ܐܲܠܵܗܲܢ: ܘܡܵܐܢܲܝ ܩܘܼܕ݂ܫܵܐ ܕܡܵܪܝܵܐ ܐܲܠܵܗܲܢ ܘܲܒ̣ܢܵܘ ܒܲܝܬܵܐ ܡܸܛܠ ܫܡܹܗ ܪܲܒܵܐ ܕܐܸܬ̣ܩܪܝܼ ܥܠܲܝܢ.