Read Aramaic Peshita 1 Chronicles 26 Bible Online

1 Chronicles 26 - Aramaic Peshita bible

1 Chronicles 26

¹ܦܵܠ̈ܓܘܵܬ̣ܵܐ ܕܬ̣ܵܪ̈ܥܹܐ ܕܐܲܩܝܼܡ ܕܵܘܝܼܕ݂ ܡܲܠܟܵܐ ܢܵܛܘܼܪܹ̈ܐ: ܡܫܲܠܝܵܐ ܡ̣ܢ ܒܢܵܘ̈ܗܝ ܕܝܵܘܣܸܦ.

²ܘܠܲܡܫܲܠܝܵܐ ܗܘ̤ܵܘ ܠܹܗ ܒ̈ܢܲܝܵܐ ܕܸܟ݂ܪܹ̈ܐ: ܫܲܒ̣ܥܵܐ: ܙܟܲܪܝܵܐ ܒܘܼܟ݂ܪܹܗ: ܝܲܕ݂ܥܹܝܠ ܬܸܢܝܵܢܵܐ: ܙܟܲܪܝܵܐ ܬܠܝܼܬ̣ܵܝܵܐ: ܢܲܬ̣ܢܝܼܐܹܝܠ ܪܒ̣ܝܼܥܵܝܵܐ.

³ܥܝܼܠܵܡ ܚܡܝܼܫܵܝܵܐ: ܝܘܿܚܲܢܵܢ ܫܬ̇ܝܼܬ̣ܵܝܵܐ: ܝܲܕ݂ܥܝܼ ܫܒ̣ܝܼܥܵܝܵܐ.

⁴ܘܲܠܥܘܼܒ̣ܵܪ ܐܲܕ݂ܘܿܡ: ܗܘ̤ܵܘ ܠܹܗ ܒ̈ܢܲܝܵܐ. ܫܡܲܥܝܵܐ ܒܘܼܟ݂ܪܹܗ: ܝܵܗܘܿܙܵܒ̣ܵܢ ܬܸܢܝܵܢܵܐ: ܝܘܿܐܵܚ ܬܠܝܼܬ̣ܵܝܵܐ: ܫܵܒ̣ܵܪ ܪܒ̣ܝܼܥܵܝܵܐ: ܡܲܛܠܲܠ ܚܡܝܼܫܵܝܵܐ.

⁵ܓܡܵܝܹܠ ܫܬ̇ܝܼܬ̣ܵܝܵܐ: ܐܝܼܣܵܟ݂ܵܪ ܫܒ̣ܝܼܥܵܝܵܐ: ܦܲܥܠܝܼ ܬܡܝܼܢܵܝܵܐ: ܡܸܛܠ ܕܒܲܪܟܹܗ ܡܵܪܝܵܐ.

⁶ܘܠܲܫܡܲܥܝܵܐ ܒܪܹܗ: ܐܸܬ̣̱ܝܼܠܸܕ݂ܘ ܒ̈ܢܲܝܵܐ ܕܫܲܠܝܼܛܝܼܢ ܥܲܠ ܒܹܝܬ̣ ܐܲܒ̣ܵܗܵܬ̣̈ܗܘܿܢ: ܡܸܛܠ ܕܓܲܢ̄ܒܵܪ̈ܲܝ ܚܲܝܠܵܐ ܐܸܢܘܿܢ.

⁷ܒܢܵܘ̈ܗܝ ܕܲܫܡܲܥܝܵܐ: ܓܲܥܬ̣ܵܐܹܝܠ: ܘܟܲܕ݂ܚܵܐܹܝܠ: ܘܥܘܼܒ̣ܕ݂ܵܐܹܝܠ: ܘܲܙܟܲܪܝܵܐ ܓܲܢ̄ܒܵܪ ܚܲܝܠܵܐ: ܘܐܹܠܝܼܵܐ: ܘܲܣܡܲܟ݂ܝܵܐ.

⁸ܟܠܗܘܿܢ ܗܵܠܹܝܢ ܡ̣ܢ ܒܢܵܘ̈ܗܝ ܕܥܘܼܒ̣ܵܪ ܐܲܕ݂ܘܿܡ: ܗܸܢܘܿܢ ܘܲܒ̣ܢܲܝ̈ܗܘܿܢ ܘܐܲܚܲܝ̈ܗܘܿܢ ܓܲܢ̄ܒܵܪ̈ܲܝ ܚܲܝܠܵܐ: ܕܚܲܝܠܵܐ ܕܲܥܒ̣̈ܝܼܕ݂ܵܬ̣ܵܐ ܕܒܹܝܬ̣ ܡܲܩܕ̇ܫܵܐ. ܫܬ̇ܝܼܢ ܘܲܬ̣ܪܹܝܢ ܒܢܵܘ̈ܗܝ ܕܥܘܼܒ̣ܵܪ ܐܲܕ݂ܘܿܡ.

⁹ܘܠܲܡܫܲܠܝܵܐ ܒܪܹܗ ܩܲܫܝܼܫܵܐ: ܒ̈ܢܲܝܵܐ ܓܲܢ̄ܒܵܪ̈ܲܝ ܚܲܝܠܵܐ: ܬܡܵܢܬܲܥܣܲܪ.

¹⁰ܘܲܠܚܵܣܵܐ ܡ̣ܢ ܒܢܲܝ̈ ܡܪܵܪܝܼ: ܒ̈ܢܲܝܵܐ ܓܲܢ̄ܒܵܪ̈ܲܝ ܚܲܝܠܵܐ. ܘܲܒ̣ܪܹܗ ܩܲܫܝܼܫܵܐ ܡ̣ܝܼܬ̣ ܗ̄ܘ̣ܵܐ ܠܹܗ. ܘܐܲܩܝܼܡ ܐܲܒ̣ܘܼܗܝ ܠܲܕ݂ܒ̣ܵܬ̣ܪܹܗ ܪܹܫܵܐ. ܘܠܵܐ ܩܪܵܝܗܝ ܒܲܫܡܵܐ ܕܩܲܫܝܼܫܘܼܬ̣ܵܐ.

¹¹ܚܹܠܲܩܝܵܐ ܬܸܢܝܵܢܵܐ: ܛܒܲܥܝܵܐ ܬܠܝܼܬ̣ܵܝܵܐ: ܙܟܲܪܝܵܐ ܪܒ̣ܝܼܥܵܝܵܐ ܟܠ ܒ̈ܢܲܝܵܐ ܘܐܲܚܵܘ̈ܗܝ ܕܚܵܣܵܐ ܬܠܵܬܲܥܣܲܪ.

¹²ܠܗܵܠܹܝܢ ܐܸܬ̣ܦܲܠܲܓ̣ܘ ܬܲܪ̈ܥܹܐ: ܠܹܪܫ ܐ̄ܢܵܫ ܡܲܛܲܪܬܵܐ ܠܘܼܩܒܲܠ ܐܲܚܲܝ̈ܗܘܿܢ: ܕܢܸܗܘܘܿܢ ܡܫܲܡܫܝܼܢ ܒܹܝܬ̣ ܡܲܩܕ̇ܫܵܐ.

¹³ܘܐܲܪܡܝܼܘ ܦܸܨܹ̈ܐ: ܙܥܘܿܪܵܐ ܐܲܝܟ݂ ܪܲܒܵܐ ܠܒܹܝܬ̣ ܐܲܒ̣ܵܗܲܝ̈ܗܘܿܢ: ܠܬܲܪܥܵܐ ܘܬܲܪܥܵܐ.

¹⁴ܘܢܸܦܠܲܬ̤ ܦܸܨܬ̣ܵܐ ܠܡܲܕ݂ܢ̱ܚܵܐ ܠܲܫܠܲܡܝܵܐ. ܘܲܙܟܲܪܝܵܐ ܒܪܹܗ: ܡܵܠܘܿܟ݂ܵܐ ܒܣܘܼܟܵܠܵܐ. ܐܲܪܡܝܼܘ ܦܸܨܹ̈ܐ: ܘܢܸܦܩܲܬ̤ ܦܸܨܬܹܗ ܠܓܲܪܒ̇ܝܵܐ.

¹⁵ܠܥܘܼܒ̣ܵܪ ܐܲܕ݂ܘܿܡ ܠܬܲܝܡܢܵܐ.

¹⁶ܠܲܒ̣ܢܵܘ̈ܗܝ ܒܹܝܬ̣ ܣܸܦܹ̈ܐ ܠܫܘܿܦܝܼܡ: ܘܲܠܚܘܼܣܵܐ ܠܡܲܥ̱ܪܒ̣ܵܐ: ܥܕܲܡܵܐ ܠܬܲܪܥܵܐ ܕܡܲܬ̣ܩܲܢ ܒܲܫܒ̣ܝܼܠܵܐ ܕܣܵܠܹ̇ܩ.

¹⁷ܡܲܛܲܪܬܵܐ ܠܘܼܩܒܲܠ ܡܲܛܲܪܬܵܐ ܠܡܲܕ݂ܢ̱ܚܵܐ: ܠܹܘܵܝܹ̈ܐ ܫܬܵܐ ܠܡܲܕ݂ܢ̱ܚܵܐ ܠܓܲܪܒ̇ܝܵܐ ܠܝܵܘ̈ܡܹܐ ܐܲܪܒ̇ܥܵܐ: ܘܲܠܬܲܝܡܢܵܐ ܠܝܵܘ̈ܡܵܐ ܐܲܪܒ̇ܥܵܐ: ܘܲܠܒܹܝܬ̣ ܣܸܦܹ̈ܐ ܬܪܹܝܢ ܬܪܹܝܢ.

¹⁸ܠܦܲܪܒܲܪ ܠܡܲܥ̱ܪܒ̣ܵܐ: ܐܲܪܒ̇ܥܵܐ ܠܲܫܒ̣ܝܼ̈ܠܹܐ: ܬܪܹܝܢ ܠܦܲܪܒܲܪ.

¹⁹ܗܵܠܹܝܢ ܦܵܠܓܘܵܬ̣ܵܐ ܕܬ̣ܵܪ̈ܥܹܐ ܕܲܒ̣ܢܵܘ̈ܗܝ ܕܩܘܿܪܚ: ܘܕܲܒ̣ܢܵܘ̈ܗܝ ܕܲܡܪܵܪܝܼ ܠܹܘܵܝܹ̈ܐ.

²⁰ܐܲܚܝܼܵܐ ܥܲܠ ܐܵܘܨܪܹ̈ܐ ܕܒܹܝܬ̣ ܐܲܠܵܗܵܐ: ܘܥܲܠ ܐܵܨܘܿܪܹ̈ܐ ܕܩܘܼܕ݂ܫܵܐ.

²¹ܒܢܵܘ̈ܗܝ ܕܠܲܥܕܵܢ ܡ̣ܢ ܒܢܲܝ̈ ܓܸܪܫܘܿܢ: ܠܠܲܥܕܵܢ ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ: ܠܠܲܥܕܵܢ ܓܲܪܫܘܿܢܵܝܵܐ.

²²ܢܲܚܠܝܼ: ܙܝܼܬ̣ܵܡ: ܘܝܘܼܐܹܝܠ ܐܲܚܵܘ̈ܗܝ: ܥܲܠ ܐܵܘܨܪܹ̈ܐ ܕܒܹܝܬ̣ ܡܵܪܝܵܐ.

²³ܠܥܲܡܪ̈ܲܡܵܝܹܐ: ܠܝܲܨܗܵܪ̈ܵܝܵܐ: ܠܚܸܒ̣ܪ̈ܘܿܢܵܝܹܐ. ܠܥܘܿܙ̈ܝܼܠܵܝܹܐ.

²⁴ܘܠܲܫܡܘܼܐܹܝܠ ܒܲܪ ܓܸܪܫܘܿܢ: ܒܲܪ ܡܘܼܫܹܐ: ܡܩܲܝܲܡ ܥܲܠ ܐܵܘܨܪܹ̈ܐ.

²⁵ܘܐܲܚܵܘ̈ܗܝ ܐܹܠܝܼܥܵܙܲܪ: ܪܚܲܒ̣ܝܵܐ ܒܪܹܗ: ܐܹܫܲܥܝܵܐ ܒܪܹܗ: ܝܘܿܪܵܡ ܒܪܹܗ: ܙܲܟ݂ܪܝܼ ܒܪܹܗ.

²⁶ܫܲܠܘܿܡܝܼܬ̣ ܒܪܹܗ ܗ̤ܘ ܫܲܠܘܿܡܝܼܬ̣ ܘܐܲܚܵܘ̈ܗܝ: ܥܲܠ ܟܠ ܐܵܘܨܪܹ̈ܐ ܕܩܘܼܕ݂ܫܹ̈ܐ: ܕܩܲܕܸ̇ܫ̣ ܕܵܘܝܼܕ݂ ܡܲܠܟܵܐ ܘܪܹ̈ܫܲܝ ܐܲܒ̣ܵـ̈ـܗܵܬ̣ܵܐ. ܘܪܵܘ̱ܪ̈ܒ̣ܵܢܹܐ ܕܐܲܠܦܹ̈ܐ ܘܲܕ݂ܡܲܐ̈ܘܵܬ̣ܵܐ.

²⁷ܘܪܵܘ̱ܪ̈ܒ̣ܵܢܹܐ ܕܚܲܝܠܵܐ ܡ̣ܢ ܩܪܵܒ̣ܵܐ: ܘܡ̣ܢ ܒܸܙܬ̣ܵܐ ܩܲܕܸ̇ܫܘ ܠܚܘܼܝܵܠܵܐ ܕܒܲܝܬܹ̇ܗ ܕܡܵܪܝܵܐ.

²⁸ܘܟ݂ܠ ܕܩܲܕܸ̇ܫ̣ ܫܡܘܼܐܹܝܠ ܚܲܙܵܝܵܐ: ܘܫܵܐܘܿܠ ܒܲܪ ܩܝܼܫ: ܘܐܲܒ̣ܢܝܼܪ ܒܲܪ ܢܝܼܪ: ܘܝܘܿܐܵܒ̣ ܒܲܪ ܨܘܿܪܝܼܵܐ: ܟܠ ܕܲܡܩܲܕܲܫ ܥܲܠ ܐܝܼܕ݂ܵܘ̈ܗܝ ܕܫܲܠܘܿܡܝܼܬ̣ ܘܕܲܐܚܵܘ̈ܗܝ.

²⁹ܠܝܲܨܗܵܪ̈ܝܹܐ: ܟܘܼܢܲܢܝܵܐ ܘܲܒ̣ܢܵܘ̈ܗܝ ܠܲܥܒ̣ܝܼ̈ܕ݂ܵܬ̣ܵܐ ܒܲܪ̈ܵܝܵܬ̣ܵܐ: ܥܲܠ ܝܼܣܪܵܝܹܠ: ܠܫܲܠܝܼܛܵܢܹ̈ܐ: ܘܲܠܕܲܝܵܢܹ̈ܐ.

³⁰ܘܲܠܚܸܒ̣ܪ̈ܘܿܢܵܝܹܐ: ܚܫܲܒ̣ܝܵܐ ܘܐܲܚܵܘ̈ܗܝ ܒܢܲܝ̈ ܚܲܝܠܵܐ: ܐܵܠܹܦ ܘܲܫܒܲܥܡܵܐܐ ܥܲܠ ܡܸܢܝܵܢܵܐ ܕܝܼܣܪܵܝܹܠ: ܘܡ̣ܢ ܥܸܒ̣ܪܵܐ ܕܝܘܿܪܕ̇ܢܵܢ: ܘܲܠܡܲܥ̱ܪܒ̣ܵܐ: ܠܟ݂ܠ ܥܒ̣ܝܼ̈ܕ݂ܵܬ̣ܵܐ ܕܡܵܪܝܵܐ ܘܲܠܦܘܼܠܚܵܢܵܐ ܕܡܲܠܟܵܐ.

³¹ܠܚܸܒ̣ܪ̈ܘܿܢܵܝܹܐ: ܢܹܪܝܼܵܐ ܪܹܫܵܐ ܠܚܸܒ̣ܪ̈ܘܿܢܵܝܹܐ: ܠܬ̣ܵܘ̈ܠܕ݂ܵܬ̣ܗܘܿܢ ܠܒܹܝܬ̣ ܐܲܒ̣ܵܗܲܝ̈ܗܘܿܢ. ܒܲܫܢܲܬ̣ ܐܲܪܒ̇ܥܝܼܢ ܠܡܲܠܟ̇ܘܼܬܹܗ ܕܕ݂ܵܘܝܼܕ݂ ܐܸܬ̇ܬ̇ܒܲܥܘ: ܘܐܸܫܬܲܟܲܚܘ ܒܗܘܿܢ ܓܲܢ̄ܒܵܪ̈ܲܝ ܚܲܝܠܵܐ: ܒܝܲܥܙܝܼܪ ܕܓܸܠܥܵܕ݂.

³²ܘܐܲܚܵܘ̈ܗܝ ܒܢܲܝ̈ ܚܲܝܠܵܐ: ܬܪܹܝܢ ܐܲܠܦ̈ܝܼܢ ܘܲܫܒܲܥܡܵܐܐ ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ: ܕܐܲܫܠܸܛ ܐܸܢܘܿܢ ܕܵܘܝܼܕ݂ ܡܲܠܟܵܐ ܥܲܠ ܒܢܲܝ̈ ܪܘܼܒܹܝܠ: ܘܲܒ̣ܢܲܝ̈ ܓܵܕ݂: ܘܥܲܠ ܦܸܠܓ̇ܘܼܬ̣ ܫܲܒ̣ܛܵܐ ܕܲܡܢܲܫܹܐ: ܠܟ݂ܠ ܦܸܬ̣ܓ̣ܵܡܵܐ ܕܐܲܠܵܗܵܐ ܘܦܸܬ̣ܓ̣ܵܡܵܐ ܕܡܲܠܟܵܐ.