Read Aramaic Peshita 1 Chronicles 27 Bible Online

1 Chronicles 27 - Aramaic Peshita bible

1 Chronicles 27

¹ܘܲܒ̣ܢܲܝ̈ ܝܼܣܪܵܝܹܠ ܠܡܸܢܝܵܢܗܘܿܢ ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ: ܘܪܵܘ̱ܪ̈ܒ̣ܵܢܹܐ ܕܐܲܠܦܹ̈ܐ ܘܲܕ݂ܡܲܐ̈ܘܵܬ̣ܵܐ ܘܫܲܠܝܼܛܵܢܲܝ̈ܗܘܿܢ: ܕܲܡܫܲܡܫܝܼܢ ܠܡܲܠܟܵܐ: ܠܟ݂ܠ ܦܸܬ̣ܓ̣ܵܡܵܐ ܕܦܵܠܓܘܼܬ̣ܵܐ ܕܥܵܐܠܵܐ ܘܢܵܦܩܵܐ ܒܝܲܪܚܵܐ ܒܝܲܪܚܵܐ: ܠܟ݂ܠ ܝܲܪ̈ܚܹܐ ܕܫܲܢ̄ܬܵܐ ܦܵܠܓܘܼܬ̣ܵܐ ܚܕ݂ܵܐ: ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

²ܥܲܠ ܦܵܠܓܘܼܬ̣ܵܐ ܩܲܕ݂ܡܵܝܬܵܐ: ܠܝܲܪܚܵܐ ܩܲܕ݂ܡܵܝܵܐ: ܫܒܲܥܲܡ ܒܲܪ ܙܲܒ̣ܕܵܐܹܝܠ: ܘܥܲܠ ܦܵܠܓܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

³ܡ̣ܢ ܒܢܵܘ̈ܗܝ ܕܦܲܨܲܪ: ܪܹ̈ܫܹܐ ܕܟ݂ܠ ܪܵܘ̱ܪ̈ܒ̣ܵܢܲܝ ܚܲܝ̈ܠܵܘܵܬ̣ܵܐ ܕܝܲܪܚܵܐ ܩܲܕ݂ܡܵܝܵܐ.

⁴ܘܥܲܠ: ܦܵܠܓܘܼܬ̣ܵܐ ܕܝܲܪܚܵܐ ܬܸܢܝܵܢܵܐ: ܕܘܼܕܝܼ ܚܘܼܚܵܝܵܐ: ܘܦܵܠܓܘܼܬܹܗ: ܘܡܲܩܠܘܼܬ ܫܲܠܝܼܛܵܐ: ܘܥܲܠ ܦܵܠܓܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

⁵ܪܲܒ̇ ܚܲܝܠܵܐ ܬܠܝܼܬ̣ܵܝܵܐ ܠܝܲܪܚܵܐ ܬܠܝܼܬ̣ܵܝܵܐ: ܒܢܵܝܵܐ ܒܲܪ ܝܘܿܝܵܕ݂ܵܥ ܟܵܗܢܵܐ ܪܹܫܵܝܵܐ. ܘܥܲܠ ܦܵܠܓܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

⁶ܗ̤ܘ ܒܢܵܝܵܐ ܓܲܢ̄ܒܵܪܵܐ ܕܲܬ̣ܠܵܬ̣ܝܼܢ ܘܥܲܠ ܬܠܵܬ̣ܝܼܢ ܘܦܵܠܓܘܼܬܹܗ: ܡܝܼܙܒܲܪ ܒܪܹܗ.

⁷ܪܒ̣ܝܼܥܵܝܵܐ: ܠܝܲܪܚܵܐ ܪܒ̣ܝܼܥܵܝܵܐ: ܥܫܵܐܹܝܠ ܐܲܚܘܼܗܝ ܕܝܘܿܐܵܒ̣: ܘܙܲܒ̣ܕܵܐܹܝܠ ܒܪܹܗ ܡ̣ܢ ܒܵܬ̣ܪܹܗ. ܘܥܲܠ ܦܵܠܓ̇ܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

⁸ܚܡܝܼܫܵܝܵܐ ܠܝܲܪܚܵܐ ܚܡܝܼܫܵܝܵܐ: ܪܲܒܵܐ ܫܲܡܗܘܿܬ̣ ܢܙܲܪܚܝܵܐ. ܘܥܲܠ ܦܵܠܓ̇ܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

⁹ܫܬ̇ܝܼܬ̣ܵܝܵܐ ܠܝܲܪܚܵܐ ܫܬ̇ܝܼܬ̣ܵܝܵܐ: ܥܝܼܪܵܐ ܒܲܪ ܥܩܝܼܣ ܬܩܘܿܥܵܝܵܐ. ܘܥܲܠ ܦܵܠܓ̇ܘܼܬܹܗ ܥܸܣܪܝܼܢ ܘܐܼܲܒ̇ܥܵܐ ܐܲܠܦ̈ܝܼܢ.

¹⁰ܫܒ̣ܝܼܥܵܝܵܐ ܠܝܲܪܚܵܐ ܫܒ̣ܝܼܥܵܝܵܐ: ܚܵܠܵܨ ܦܵܠܘܿܢܵܝܵܐ: ܡ̣ܢ ܒܢܵܘ̈ܗܝ ܕܐܲܦܪܹܝܡ. ܘܥܲܠ ܦܵܠܓ̇ܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

¹¹ܬܡܝܼܢܵܝܵܐ ܠܝܼܲܪܚܵܐ ܬܡܝܼܢܵܝܵܐ: ܣܲܒ̣ܟ̇ܝܼ ܚܘܼܫܬ̣ܵܝܵܐ ܡ̣ܢ ܒܹܝܬ̣ ܙܲܪܚ ܘܥܲܠ ܦܵܠܓ̇ܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

¹²ܬܫܝܼܥܵܝܵܐ ܠܝܲܪܚܵܐ ܬܫܝܼܥܵܝܵܐ: ܐܲܒ̣ܝܼܥܵܙܲܪ ܥܬ̣ܘܿܬ̣ܵܝܵܐ ܡ̣ܢ ܕܒܹܝܬ̣ ܒܸܢܝܵܡܹܝܢ ܘܥܲܠ ܦܵܠܓ̇ܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

¹³ܥܣܝܼܪܝܵܐ ܠܝܲܪܚܵܐ ܥܣܝܼܪܵܝܵܐ: ܡܵܗܵܪ ܢܛܘܼܦܬ̣ܵܝܵܐ ܡ̣ܢ ܕܒܹܝܬ̣ ܙܲܪܚ. ܘܥܲܠ ܦܵܠܓܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

¹⁴ܕܲܚܕܲܥܣܲܪ ܠܝܲܪܚܵܐ ܕܲܚܕܲܥܣܲܪ: ܒܢܵܝܵܐ ܦܪܲܥܬ̇ܘܿܢܵܝܵܐ ܡ̣ܢ ܒܢܵܘ̈ܗܝ ܕܐܲܦܪܹܝܡ ܘܥܲܠ ܦܵܠܓ̇ܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

¹⁵ܕܲܬ̣ܪܸܥܣܲܪ ܠܝܲܪܚܵܐ ܕܲܬ̣ܪܸܥܣܲܪ: ܢܲܚܕ̇ܝܼ ܢܛܘܼܦܬ̣ܵܝܵܐ: ܕܒܹܝܬ̣ ܥܢܘܿܬ̣ܢܝܼܐܹܝܠ. ܘܥܲܠ ܦܵܠܓ̇ܘܼܬܹܗ ܥܸܣܪܝܼܢ ܘܐܲܪܒ̇ܥܵܐ ܐܲܠܦ̈ܝܼܢ.

¹⁶ܘܥܲܠ ܫܲܒ̣̈ܛܹܐ ܕܲܒ̣ܢܲܝ̈ ܝܼܣܪܵܝܹܠ ܠܪ̈ܘܼܒܹܝܠܵܝܹܐ: ܡܕܲܒ̇ܪܵܢܵܐ ܐܹܠܝܼܥܵܙܲܪ ܒܲܪ ܙܲܟ݂ܪܝܼ: ܠܫܸܡܥ̈ܘܿܢܵܝܹܐ: ܫܦܲܛܝܵܐ ܒܲܪ ܡܲܥܟܵܐ.

¹⁷ܠܠܹܘܝܼ ܚܫܲܒ̣ܝܵܐ ܒܲܪ ܩܡܘܼܐܹܝܠ: ܠܐܲܗܪܘܿܢ ܨܵܕ݂ܘܿܩ.

¹⁸ܠܲܝܗܘܼܕ݂ܵܐ ܐܹܠܝܼܗܘܼ ܡ̣ܢ ܐܲܚܵܘ̈ܗܝ ܕܕ݂ܵܘܝܼܕ݂. ܠܐܝܼܣܵܟ݂ܵܪ ܥܡܘܿܪܝܼ ܒܲܪ ܡܝܼܟ݂ܵܐܹܝܠ.

¹⁹ܠܲܙܒ̣ܘܿܠܘܿܢ ܫܡܲܥܝܵܐ ܒܲܪ ܥܘܿܒܲܕ݂ܝܵܐ: ܠܢܲܦ̮ܬܵܠܝܼ ܝܲܪܡܘܿܬ̣ ܒܲܪ ܥܲܙܪܵܐܹܝܠ.

²⁰ܠܲܒ̣ܢܵܘ̈ܗܝ ܕܐܲܦܪܹܝܡ ܗܘܿܫܲܥ ܒܲܪ ܥܲܙܲܢܝܵܐ.

²¹ܠܦܸܠܓܘܼܬ̣ ܫܲܒ̣ܛܵܐ ܕܲܡܢܲܫܹܐ: ܝܘܼܐܹܝܠ ܒܲܪ ܦܸܪܝܵܐ. ܘܦܵܠܓܘܼܬ̣ܵܐ ܕܲܡܢܲܫܹܐ ܕܲܒ̣ܓܸܠܥܵܕ݂. ܝܲܕ̇ܘܿ ܒܲܪ ܙܟܲܪܝܵܐ: ܠܒܸܢܝܵܡܹܝܢ ܥܣܝܼܐܹܝܠ ܒܲܪ ܐܲܒ̣ܢܝܼܪ.

²²ܠܕ݂ܵܢ ܥܲܙܪܵܐܹܝܠ ܒܲܪ ܝܲܪܚܘܿܡ ܗܵܠܹܝܢ ܪܵܘ̱ܪ̈ܒ̣ܵܢܹܐ ܕܫܲܒ̣̈ܛܹܐ ܕܝܼܣܪܵܝܹܠ.

²³ܘܠܵܐ ܫ̣ܩܲܠ ܕܵܘܝܼܕ݂ ܡܸܢܝܵܢܗܘܿܢ ܡ̣ܢ ܒܲܪ ܥܸܣܪܝܼܢ ܫܢ̈ܝܼܢ ܘܲܠܬܲܚܬ̇: ܡܸܛܠ ܕܐܸܡܲܪ ܡܵܪܝܵܐ ܕܢܲܣܓܹ̇ܝܘܗܝ ܠܝܼܣܪܵܝܹܠ: ܐܲܝܟ݂ ܟܵܘ̈ܟ̇ܒܹܐ ܕܒܲܫܡܲܝܵܐ.

²⁴ܝܘܿܐܵܒ̣ ܒܲܪ ܨܘܿܪܝܼܵܐ ܫܲܪܝܼ ܕܢܸܡܢܸܐ ܘܠܵܐ ܫܲܠܸܡ ܘܲܗܘ̤ܵܐ ܪܘܼܓ̣ܙܵܐ ܥܲܠ ܝܼܣܪܵܝܹܠ ܘܠܵܐ ܣܠܸܩ̣ ܐܲܝܟ݂ ܡܸܢܝܵܢܵܐ ܕܲܕ݂ܒܲܪܝܲܡܝܼܡ ܠܡܲܠܟܵܐ ܕܵܘܝܼܕ݂.

²⁵ܘܥܲܠ ܐܵܘܨܪܹ̈ܐ ܕܡܲܠܟܵܐ: ܥܲܙܡܘܿܬ̣ ܒܲܪ ܓܕܲܠܝܵܐܹܝܠ. ܘܥܲܠ ܐܵܘܨܪܹ̈ܐ ܕܲܒ̣ܚܲܩܠܵܐ: ܕܲܒ̣ܩܘܼܪ̈ܝܵܐ: ܘܲܒ̣ܟܲܦܪ̈ܘܿܢܹܐ: ܘܲܒ̣ܡܲܓܕ̇ܠܹ̈ܐ: ܝܘܿܢܵܬ̣ܵܢ ܒܲܪ ܥܘܿܙܝܼܵܐ.

²⁶ܘܥܲܠ ܥܵܒ̣ܕܲܝ̈ ܥܒ̣̈ܝܼܕ݂ܵܬ̣ܵܐ ܕܚܲܩܠܵܐ ܠܦܘܼܠܚܵܢܵܐ ܕܐܲܪܥܵܐ: ܥܲܙܪܝܼ ܒܲܪ ܟܠܘܿܒ̣.

²⁷ܘܥܲܠ ܟܲܪ̈ܡܹܐ: ܫܡܲܥܝܵܐ ܪܵܡܬ̣ܵܝܵܐ. ܘܥܲܠ ܡܸܕܸ̇ܡ ܕܲܒ̣ܟܲܪ̈ܡܹܐ ܠܐܵܘܨܪܹ̈ܐ ܕܚܲܡܪܵܐ: ܙܲܒ̣ܕ̇ܝܼ ܫܲܦܡܵܝܵܐ.

²⁸ܘܥܲܠ ܙܲܝ̈ܬܹ̇ܐ ܘܫܲܩܡܹ̈ܐ ܕܲܒ̣ܥܘܼܡܩܵܐ: ܒܥܸܠܚܲܢܵܢ ܓܸܕ݂ܪܵܝܵܐ. ܘܥܲܠ ܐܵܘܨܪܹ̈ܐ ܕܡܸܫܚܵܐ ܝܲܥܘܿܫ.

²⁹ܘܥܲܠ ܬܵܘܪܹ̈ܐ ܕܪܵܥܝܼܢ ܒܫܵܪ̈ܘܿܢܹܐ: ܫܲܪܛܝܼ ܫܵܪܘܿܢܵܝܵܐ: ܘܥܲܠ ܬܵܘܪܹ̈ܐ ܕܲܒ̣ܥܘܼܡܩܵܐ: ܫܵܦܵܛ ܒܲܪ ܥܕ݂ܵܐܹܝܠ.

³⁰ܘܥܲܠ ܓܲܡ̈ܠܹܐ: ܐܲܒ̣ܝܼܠ ܐܝܼܫܡܵܥܝܼܠܵܐ: ܘܥܲܠ ܐܲܬܵܢܹ̈ܐ: ܝܼܗܘܼܕ݂ܵܐ ܡܲܪܬ̇ܘܿܢܵܝܵܐ.

³¹ܘܥܲܠ ܥܵـ̈ـܢܵܐ ܝܲܙܝܼܙ ܚܲܓܪܵܝܵܐ ܟܠܗܘܿܢ ܗܵܠܹܝܢ ܪܵܘ̱ܪ̈ܒ̣ܵܢܹܐ ܕܩܸܢܝܵܢܵܐ ܕܡܲܠܟܵܐ ܕܵܘܝܼܕ݂.

³²ܘܝܘܿܢܵܬ̣ܵܢ ܚܲܒ̇ܝܼܒܹܗ ܕܕ݂ܵܘܝܼܕ݂: ܡܵܠܘܿܟ݂ܵܐ: ܓܲܒ̣ܪܵܐ ܗ̄ܘ̣ ܣܲܟ̇ܘܼܠܬ̣ܵܢܵܐ ܘܣܵܦܪܵܐ. ܘܲܚܢܵܢܵܐܹܝܠ ܒܲܪ ܚܲܟ݂ܡܘܼܢܝܼ ܥܲܡ ܒܢܵܘ̈ܗܝ ܕܡܲܠܟܵܐ.

³³ܘܐܲܚܝܼܬ̣ܘܿܦܹܝܠ ܡܵܠܘܿܟ݂ܵܐ ܕܡܲܠܟܵܐ. ܘܚܘܿܫܝܼ ܐܲܪܟܵܝܵܐ ܪܵܚܡܹ̇ܗ ܕܡܲܠܟܵܐ.

³⁴ܘܡ̣ܢ ܒܵܬܲܪ ܐܲܚܝܼܬ̣ܘܿܦܹܝܠ: ܝܘܿܝܵܕ݂ܵܥ ܒܲܪ ܒܢܵܝܵܐ. ܘܐܲܒ̣ܝܼܬ̣ܵܪ: ܘܪܲܒ̇ ܚܲܝܠܵܐ ܕܡܲܠܟܵܐ ܝܘܿܐܵܒ̣.