Read Aramaic Peshita 2 Chronicles 10 Bible Online

2 Chronicles 10 - Aramaic Peshita bible

2 Chronicles 10

¹ܘܐܸܙܲܠ̣ ܪܚܸܒ̣ܥܲܡ ܠܲܫܟܹܝܡ: ܡܸܛܠ ܕܠܲܫܟܹܝܡ ܐܸܙܲܠ ܟܠܹܗ ܝܼܣܪܵܝܹܠ: ܠܲܡܩܵܡܘܼܬܹܗ ܡܲܠܟܵܐ.

²ܘܲܗܘ̤ܵܐ ܕܟܲܕ݂ ܫ̣ܡܲܥ ܝܘܿܪܲܒ̣ܥܲܡ ܘܟ݂ܠܹܗ ܝܼܣܪܵܝܹܠ.

³ܐܸܬ̣ܵܘ ܘܐܵܡ̇ܪܝܼܢ ܠܲܪܚܸܒ̣ܥܲܡ ܒܲܪ ܫܠܹܝܡܘܿܢ.

⁴ܐܲܒ̣ܘܼܟ݂ ܐܲܣܓ̇ܝܼ ܫܘܼܥܒܵܕܲܢ. ܘܐܲܢ̄ܬ̇ ܗܵܫܵܐ ܐܲܩܸܠ ܡ̣ܢ ܫܘܼܥܒܵܕܹܗ ܕܐܲܒ̣ܘܼܟ݂ ܩܲܫܝܵܐ: ܘܡ̣ܢ ܡܵܪܘܼܬܹܗ ܥܲܫܝܼܢܬܵܐ ܘܢܸܦ̱ܠܚܵܟ݂.

⁵ܘܐܸܡܲܪ ܠܗܘܿܢ: ܙܸܠܘ: ܘܡܸܟܵܐ ܠܲܬ̣ܠܵܬ̣ܵܐ ܝܵܘ̈ܡܝܼܢ ܬܵܘ ܠܘܵܬ̣ܝ ܘܐܸܬ̣ܵܐ ܥܲܡܵܐ ܠܘܵܬܹܗ.

⁶ܘܐܸܬ̣ܡܲܠܲܟ݂ ܡܲܠܟܵܐ ܪܚܸܒ̣ܥܲܡ: ܒܩܲܫܝܼ̈ܫܹܐ ܕܦܵܠܚܝܼܢ ܗ̄ܘ̣ܵܘ ܠܲܫܠܹܝܡܘܿܢ ܐܲܒ̣ܘܗܝ ܟܲܕ݂ ܚܲܝ ܗ̄ܘ̣ܵܐ. ܘܐܸܡܲܪ ܗ̄ܘ̣ܵܐ: ܡܵܢܵܐ ܡܵܠܟ̇ܝܼܢ ܐ̄ܢܬ̇ܘܿܢ ܠܝܼ: ܕܢܲܗܦܸܟ݂ ܦܸܬ̣ܓ̣ܵܡܵܐ ܠܥܲܡܵܐ ܗܵܢܵܐ.

⁷ܘܡܲܠܸܠ̣ܘ ܥܲܡܹܗ ܘܐܸܡܲܪܘ ܠܹܗ: ܐܸܢܗ̤ܘ ܕܛܵܒ̣ܵـ̈ـܬ̣ܵܐ ܬܸܥܢܹܐ ܠܥܲܡܵܐ ܗܵܢܵܐ ܘܬܸܚܕܹ̇ܐ ܠܘܼܩܒܲܠ ܐܲܦܲܝ̈ܗܘܿܢ: ܘܲܬ̣ܡܲܠܸܠ ܥܲܡܗܘܿܢ ܡܸܠܹ̈ܐ ܛܵܒ̣ܵـ̈ـܬ̣ܵܐ: ܢܸܗܘܘܿܢ ܠܵܟ݂ ܥܲܒ̣̈ܕܹ̇ܐ ܛܵܒܹ̈ܐ: ܘܦܲܠܵܚܹ̈ܐ ܟܠ ܝܵܘ̈ܡܵܬ̣ܵܐ ܕܚܲܝܲܝ̈ܟ.

⁸ܘܲܫܒܲܩ ܡܸܠܟܵܐ ܕܩܲܫܝܼܫܹ̈ܐ ܕܡܲܠܟ̇ܘܼܗܝ. ܘܐܸܙܲܠ̣ ܐܸܬ̣ܡܲܠܲܟ݂ ܒܲܛܠܵܝܹ̈ܐ ܕܲܪܒ̣ܵܘ ܥܲܡܹܗ ܕܩܵܝ̇ܡܝܼܢ ܩܕ݂ܵܡܵܘܗܝ.

⁹ܘܐܸܡܲܪ ܠܗܘܿܢ: ܡܵܢܵܐ ܡܵܠܟ̇ܝܼܢ ܐ̄ܢܬ̇ܘܿܢ ܠܝܼ: ܕܢܲܗܦܸܟ݂ ܦܸܬ̣ܓ̣ܵܡܵܐ ܠܥܲܡܵܐ ܗܵܢܵܐ ܕܡܲܠܸܠ̣ܘ ܥܲܡܝ: ܘܐܵܡ̇ܪܝܼܢ ܠܝܼ: ܕܐܲܩܸܠ ܡܸܢܲܢ ܫܘܼܥܒܵܕ݂ܵܐ ܕܫܲܥܒ̇ܕܲܢ ܐܲܒ̣ܘܼܟ݂: ܘܢܸܦܠ̱ܚܵܟ݂.

¹⁰ܘܡܲܠܸܠܘ ܥܲܡܹܗ ܛܠܵܝܹ̈ܐ ܕܲܪܒ̣ܵܘ ܥܲܡܹܗ ܒܫܘܼܩܹ̈ܐ: ܘܐܵܡ̇ܪܝܼܢ ܠܹܗ: ܗܵܟܲܢܵܐ ܬܹܐܡܲܪ ܠܥܲܡܵܐ ܕܡܲܠܸܠ ܥܲܡܵܟ݂: ܘܐܵܡ̇ܪܝܼܢ ܠܵܟ݂: ܕܐܲܒ̣ܘܼܟ݂ ܐܲܥܫܸܢ ܫܘܼܥܒܵܕܲܢ: ܘܐܲܢ̄ܬ̇ ܐܲܩܸܠ ܡ̣ܢ ܫܘܼܥܒܵܕܲܢ. ܗܵܟܲܢܵܐ ܬܹܐܡܲܪ ܠܗܘܿܢ: ܕܚܸܨܪܝ ܥܲܒ̣ܝܵܐ ܗ̄ܝܼ ܡ̣ܢ ܟܪܵܬܹܗ ܕܐܵܒ̣ܝ.

¹¹ܘܐܵܦ ܗܵܫܵܐ ܐܵܒ̣ܝ ܫܲܥܒܸ̇ܕ݂ܟ݂ܘܿܢ ܫܘܼܥܒܵܕ݂ܵܐ ܩܲܫܝܵܐ. ܘܐܸܢܵܐ ܡܵܘܣܸܦ ܐ̄ܢܵܐ ܥܲܠ ܫܘܼܥܒܵܕ݂ܟ݂ܘܿܢ. ܐܵܒ̣ܝ ܪܕ݂ܵܟ݂ܘܿܢ ܒܫܵܘ̈ܛܹܐ: ܘܐܸܢܵܐ ܪܵܕܹܐ ܐ̄ܢܵܐ ܠܟ݂ܘܿܢ ܒܡܵܪ̈ܲܓ̣ܢܹܐ.

¹²ܘܐܸܬ̣ܵܐ ܝܘܿܪܲܒ̣ܥܲܡ: ܘܟ݂ܠܹܗ ܥܲܡܵܐ ܒܝܵܘܡܵܐ ܕܲܬ̣ܠܵܬ̣ܵܐ: ܐܲܝܟܲܢܵܐ ܕܲܫܐܸܠ̣ ܡܸܢܗܘܿܢ ܙܲܒ̣ܢܵܐ: ܘܐܸܡܲܪ ܠܗܘܿܢ ܕܬ̣ܵܘ ܠܘܵܬ̣ܝ ܒܝܵܘܡܵܐ ܕܲܬ̣ܠܵܬ̣ܵܐ.

¹³ܘܲܥܢ̣ܵܐ ܐܸܢܘܿܢ ܡܲܠܟܵܐ ܡܸܠܹ̈ܐ ܩܲܫ̈ܝܵܬ̣ܵܐ. ܘܲܫܒܲܩ ܡܲܠܟܵܐ ܪܚܸܒ̣ܥܲܡ: ܡܸܠܟܵܐ ܕܩܲܫܝܼܫܹ̈ܐ ܕܡܲܠܟ̇ܘܼܗܝ.

¹⁴ܘܡܲܠܸܠ̣ ܥܲܡܗܘܿܢ ܐܲܝܟ݂ ܡܸܠܹ̈ܐ ܕܲܛܠܵܝܹ̈ܐ: ܘܐܸܡܲܪ ܠܗܘܿܢ: ܐܵܒ̣ܝܼ ܐܲܣܓ̇ܝܼ ܫܘܼܥܒܵܕ݂ܟ݂ܘܿܢ. ܘܐܸܢܵܐ ܡܵܘܣܸܦ ܐ̄ܢܵܐ ܥܲܠ ܫܘܼܥܒܵܕ݂ܟ݂ܘܿܢ ܐܵܒ̣ܝ ܪܕ݂ܵܟ݂ܘܿܢ ܒܫܵܘ̈ܛܹܐ: ܐܸܢܵܐ ܪܵܕܹܐ ܐ̄ܢܵܐ ܠܟ݂ܘܿܢ ܒܡܵܪ̈ܲܓ̣ܢܹܐ.

¹⁵ܘܠܵܐ ܫ̣ܡܲܥܘ ܥܲܡܵܐ ܡ̣ܢ ܡܲܠܟܵܐ. ܡܸܛܠ ܕܲܗܘ̤ܵܬ̣ ܗܦܝܼܟ݂ܬܵܐ ܡ̣ܢ ܩܕ݂ܵܡ ܡܵܪܝܵܐ. ܕܬܸܫܲܪ ܡܸܠܬܹܗ ܕܐܲܚܝܼܵܐ ܢܒ̣ܝܼܵܐ ܕܡ̣ܢ ܫܝܼܠܘܿ: ܥܲܠ ܝܘܿܪܲܒ̣ܥܲܡ ܒܲܪ ܢܵܒ̣ܵܛ.

¹⁶ܘܲܚܙ̣ܵܘ ܟܠܹܗ ܝܼܣܪܵܝܹܠ: ܕܠܵܐ ܫ̣ܡܲܥ ܠܗܘܿܢ ܡܲܠܟܵܐ. ܘܐܲܬ̣ܝܼܒ̣ܘܼܗܝ ܥܲܡܵܐ ܦܸܬ̣ܓ̣ܵܡܵܐ ܠܡܲܠܟܵܐ: ܘܐܵܡ̇ܪܝܼܢ: ܠܲܝܬ̇ ܠܲܢ ܡܢܵܬ̣ܵܐ ܒܕ݂ܵܘܝܼܕ݂. ܐܵܦܠܵܐ ܝܵܪܬ̇ܘܼܬ̣ܵܐ ܒܲܒ̣ܪܹܗ ܕܐܝܼܫܲܝ ܐ̄ܢܵܫ ܠܒܲܝܬܹ̇ܗ. ܙܸܠܘ ܝܼܣܪܵܝܹܠ. ܡܸܟܹ̇ܝܠ ܚܙܝܼ ܒܲܝܬܵܟ݂ ܕܵܘܝܼܕ݂. ܘܐܸܙܲܠ̣ܘ ܝܼܣܪܵܝܹܠ ܠܒ̣ܵܬܲܝ̈ܗܘܿܢ.

¹⁷ܘܲܕ݂ܝܵܬ̣ܒ̇ܝܼܢ ܒܩܘܼܪ̈ܝܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ܘ ܥܠܲܝܗܘܿܢ ܠܲܪܚܸܒ̣ܥܲܡ.

¹⁸ܘܫܲܕܲܪ ܥܠܲܝܗܘܿܢ ܡܲܠܟܵܐ ܪܚܸܒ̣ܥܲܡ ܠܐܲܕ݂ܘܿܢܝܼܪܲܡ ܕܫܲܠܝܼܛ ܗ̄ܘ̣ܵܐ ܥܲܠ ܡܲܣܩܲܝ̈ ܡܲܕܲܐܬ̣ܵܐ. ܘܪܲܓ̣ܡܘܼܗܝ ܟܠܹܗ ܝܼܣܪܵܝܹܠ ܒܟܹܐܦܹ̈ܐ: ܘܡܝܼܬ. ܘܡܲܠܟܵܐ ܪܚܸܒ̣ܥܲܡ ܣܠܸܩ̣ ܘܝܼܬܸܒ̣ ܠܹܗ ܒܙܵܘܓܵܐ: ܠܡܸܥܪܲܩ ܠܐܘܿܪܸܫܠܸܡ.

¹⁹ܘܲܡܪܲܕ݂ܘ ܒܢܲܝ̈ ܝܼܣܪܵܝܹܠ ܥܲܠ ܒܲܝܬܹ̇ܗ ܕܕ݂ܵܘܝܼܕ݂: ܥܕܲܡܵܐ ܠܝܵܘܡܵܢܵܐ.