Read Aramaic Peshita 2 Chronicles 11 Bible Online

2 Chronicles 11 - Aramaic Peshita bible

2 Chronicles 11

¹ܘܐܸܬ̣ܵܐ ܪܚܸܒ̣ܥܲܡ ܠܐܘܿܪܸܫܠܸܡ. ܘܟܲܢܸܫ̣ ܠܲܕ݂ܒܹܝܬ̣ ܝܼܗܘܼܕ݂ܵܐ: ܘܲܠܫܲܒ̣ܛܵܐ ܕܒܸܢܝܵܡܹܝܢ: ܡܵܐܐ ܘܲܬ̣ܡܵܢܐܝܼܢ ܐܲܠܦ̈ܝܼܢ: ܓܲܒ̣ܪܹ̈ܐ ܫܵܡܛܲܝ̈ ܣܲܝܦܵܐ: ܘܥܵܒ̣ܕܲܝ̈ ܩܪܵܒ̣ܵܐ: ܠܡܸܬ̣ܟܲܬܵܫܘܼ ܥܲܡ ܝܼܣܪܵܝܹܠ: ܠܡܲܗܦܵܟ݂ܘܼ ܡܲܠܟ̇ܘܼܬ̣ܵܐ ܠܲܪܚܸܒ̣ܥܲܡ ܒܪܹܗ ܕܲܫܠܹܝܡܘܿܢ.

²ܘܲܗܘ̤ܵܐ ܦܸܬ̣ܓ̣ܵܡܵܐ ܕܡܵܪܝܵܐ ܥܲܠ ܫܡܲܥܝܵܐ: ܘܐܸܡܲܪ ܠܹܗ.

³ܐܸܡܲܪ ܠܲܪܚܸܒ̣ܥܲܡ ܒܪܹܗ ܕܲܫܠܹܝܡܘܿܢ ܡܲܠܟܵܐ ܕܲܝܗܘܼܕ݂ܵܐ: ܘܥܲܠ ܒܹܝܬ̣ ܒܸܢܝܵܡܹܝܢ: ܘܥܲܠ ܟܠܹܗ ܝܼܣܪܵܝܹܠ: ܘܥܲܠ ܟܠܹܗ ܝܼܣܪܵܝܹܠ: ܘܥܲܠ ܫܲܪܟܵܐ ܕܥܲܡܵܐ: ܐܸܡܲܪ ܠܗܘܿܢ.

⁴ܗܵܟܲܢܵܐ ܐܵܡܲܪ ܡܵܪܝܵܐ: ܠܵܐ ܬܸܣܩܘܼܢ: ܘܠܵܐ ܬܸܬ̣ܟܲܬ̇ܫܘܼܢ. ܗܦܘܿܟ݂ܘ ܓܒܲܪ ܠܒܲܝܬܹ̇ܗ. ܡܸܛܠ ܕܡ̣ܢ ܩܕ݂ܵܡܲܝ ܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ. ܘܲܫܡܲܥ̣ܘ ܡܸܠܬܹܗ ܕܡܵܪܝܵܐ: ܘܲܗܦܲܟ݂ܘ ܠܡܹܐܙܲܠ ܐ̄ܢܵܫ ܠܒܲܝܬܹ̇ܗ.

⁵ܘܲܒ̣ܢܵܐ ܝܘܿܪܲܒ̣ܥܲܡ ܠܲܫܟܹܝܡ: ܒܛܘܼܪܵܐ ܕܫܲܒ̣ܛܵܐ ܕܒܹܝܬ̣ ܐܲܦܪܹܝܡ: ܘܝܼܬܸܒ̣ ܒܵܗ̇. ܘܲܢܦܲܩ̣ ܡ̣ܢ ܬܲܡܵܢ: ܘܲܒ̣ܢܵܐ ܠܲܦܢܘܼܐܹܝܠ.

⁶ܘܐܸܡܲܪ ܝܘܿܪܲܒ̣ܥܲܡ ܒܠܸܒܹ̇ܗ: ܗܵܦܟܵܐ ܠܵܗ̇ ܡܲܠܟ̇ܘܼܬ̣ܵܐ ܠܒܹܝܬ̣ ܕܵܘܝܼܕ݂.

⁷ܐܸܢܗ̤ܘ ܕܣܵܠ̇ܩܝܼܢ ܥܲܡܵܐ ܗܵܢܵܐ: ܠܡܸܥܒܲܕ݂ ܕܸܒ̣ܚܹ̈ܐ ܒܒܲܝܬܹ̇ܗ ܕܡܵܪܝܵܐ: ܒܐܘܿܪܸܫܠܸܡ ܘܗܵܦܸܟ݂ ܠܸܒܹ̇ܗ ܕܥܲܡܵܐ ܗܵܢܵܐ ܠܘܵܬ̣ ܡܵܪܗܘܿܢ. ܘܩܵܛ̇ܠܝܼܢ ܠܝܼ: ܘܡܲܗ̄ܦܟ݂ܝܼܢ ܠܵܗ̇ ܡܲܠܟ̇ܘܼܬ̣ܵܐ ܠܲܪܚܸܒ̣ܥܲܡ ܒܲܪ ܫܠܹܝܡܘܿܢ.

⁸ܘܐܸܬ̣ܪܲܥܝܼ ܡܲܠܟܵܐ: ܘܲܥܒܲܕ݂ ܬܪܹܝܢ ܥܸܓ̣̈ܠܝܼܢ ܕܕܲܗܒ̣ܵܐ. ܘܐܸܡܲܪ ܠܗܘܿܢ: ܣܲܓ̇ܝܼ ܠܟ݂ܘܿܢ ܠܡܸܣܲܩ: ܡܵܢܵܐ ܣܵܠܩܝܼܢ ܐܢ̄ܬ̇ܘܿܢ: ܘܢܵܚܬ̇ܝܼܢ ܠܐܘܿܪܸܫܠܸܡ. ܗܵܠܹܝܢ ܐܸܢܘܿܢ ܐܲܠܵܗܲܝ̈ܟ ܝܼܣܪܵܝܹܠ: ܕܐܲܣܩܘܼܟ݂ ܡ̣ܢ ܐܲܪܥܵܐ ܕܡܸܨܪܹܝܢ.

⁹ܘܣܵܡ̣ ܚܲܕ݂ ܒܹܝܬ̣ ܐܹܝܠ: ܘܐ̄ܚܪܹܢܵܐ ܣܵܡ̣ ܒܕ݂ܵܢ.

¹⁰ܘܲܗܘ̤ܵܬ̣ ܡܸܠܬ̣ܵܐ ܗܵܕܹܐ ܠܲܚܛܝܼܬ̣ܵܐ. ܘܐܸܙܲܠ̣ܘ ܥܲܡܵܐ ܩܕ݂ܵܡ ܥܸܓܠܵܐ ܥܕܲܡܵܐ ܠܕ݂ܵܢ. ܘܲܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ ܠܲܚܛܝܼܬ̣ܵܐ: ܠܟ݂ܠ ܒܹܝܬ̣ ܝܘܿܪܲܒ̣ܥܲܡ: ܠܡܸܥܩܲܪ ܘܲܠܡܵܘܒܵܕ݂ܘܼ ܡ̣ܢ ܐܲܪܥܵܐ.

¹¹ܒܹܗ ܒܙܲܒ̣ܢܵܐ ܗܵܢܵܐ: ܐܸܬ̣ܟ̇ܪܲܗ ܐܲܒ̣ܝܲܡ ܒܪܹܗ ܕܝܘܿܪܲܒ̣ܥܲܡ: ܘܐܸܡܲܪ ܝܘܿܪܲܒ̣ܥܲܡ ܠܐܲܢ̄ܬ̇ܬܹܗ: ܩܘܼܡܝ ܢܹܐ ܘܐܸܫܬܲܓ̣ܢܵܝ ܐܲܝܟ݂ ܐܲܢ̄ܬ̇ܬ̣ܵܐ ܗܸܕ݂ܝܘܿܛܬܵܐ. ܘܠܵܐ ܢܸܕ̇ܥܘܼܢ ܕܐܲܢ̄ܬ̇ܝ ܗ̄ܝܼ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ. ܘܬܹܐܙܠ̄ܝܼܢ ܠܫܝܼܠܘܿ. ܘܗܵܐ ܐܝܼܬ̣ ܬܲܡܵܢ ܐܲܚܝܼܵܐ ܢܒ̣ܝܼܵܐ: ܕܗ̤ܘ ܐܸܡܲܪ ܠܝܼ ܟܲܕ݂ ܩܵܐܹ̇ܡ ܗ̄ܘܹ̇ܝܬ̣ ܥܲܠ ܥܲܡܵܐ ܗܵܢܵܐ.

¹²ܘܬܹܐܙܠ̄ܝܼܢ ܠܘܵܬܹܗ: ܓܵܠܹ̇ܐ ܠܹܟ݂ܝ ܡܸܕܸ̇ܡ ܕܗܵܘܹ̇ܐ ܠܹܗ ܠܛܲܠܝܵܐ ܗܵܢܵܐ.

¹³ܘܡ̣ܢ ܩܕ݂ܵܡ ܡܵܪܝܵܐ ܐܸܬ̣̱ܐܡܲܪ ܠܐܲܚܝܼܵܐ: ܕܗܵܐ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ ܐܵܬ̣ܝܵܐ ܠܡܸܫܐܲܠ ܦܸܬ̣ܓ̣ܵܡܵܐ ܡܸܢܵܟ݂ ܥܲܠ ܒܪܵܗ̇ ܕܲܟ݂ܪܝܼܗ ܗ̄ܘ̣: ܗܵܟܲܢܵܐ ܘܗܵܟܲܢܵܐ ܬܹܐܡܲܪ ܠܵܗ̇. ܘܢܸܗܘܹܐ ܒܡܲܥܠܵܗ̇: ܘܗ̤ܝ ܡܸܫܬܲܓ̣ܢܝܵܐ.

¹⁴ܘܲܗܘ̤ܵܐ ܕܟܲܕ݂ ܫܡܲܥ̣ ܐܲܚܝܼܵܐ ܩܵܠܵܐ ܕܪܸ̈ܓ̣ܠܹܝܗ̇ ܟܲܕ݂ ܥܵܐܠܵܐ ܒܬܲܪܥܵܐ: ܘܐܸܡܲܪ ܠܵܗ̇: ܥܘܿܠܝ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ ܠܡܵܢܵܐ ܡܸܫܬ̇ܓ̣ܢܝܲܬ̇ܝ. ܘܐܸܢܵܐ ܡܫܲܕܲܪ ܐ̄ܢܵܐ ܕܐܹܡܲܪ ܥܠܲܝܟ̇ܝ ܡܸܠܹ̈ܐ ܩܲܫ̈ܝܵܬ̣ܵܐ.

¹⁵ܙܸܠܝ ܐܸܡܲܪܝ ܠܝܘܿܪܲܒ̣ܥܲܡ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܐܸܢܵܐ ܐܲܪܝܼܡܬܵܟ݂ ܡ̣ܢ ܥܲܡܵܐ: ܘܝܲܗ̄ܒ̣ܬܵܟ݂ ܡܲܠܟܵܐ ܥܲܠ ܥܲܡܝ ܝܼܣܪܵܝܹܠ.

¹⁶ܘܲܢܣܲܒ̣ܬܵܗ̇ ܡܲܠܟ̇ܘܼܬ̣ܵܐ ܡ̣ܢ ܒܹܝܬ̣ ܕܵܘܝܼܕ݂: ܘܝܸܗ̄ܒܹ̇ܬ̣ ܠܵܟ݂. ܘܠܵܐ ܗ̤ܘܲܝܬ̇ ܐܲܝܟ݂ ܕܵܘܝܼܕ݂ ܥܲܒ̣ܕ̇ܝܼ: ܕܲܢܛܲܪ ܦܘܼܩ̈ܕܵܢܲܝ: ܘܗܲܠܸܟ݂ ܒܢܵܡܘܿܣܲܝ̈ ܒܟ݂ܠܹܗ ܠܸܒܹ̇ܗ: ܠܡܸܥܒܲܕ݂ ܕܫܲܦܝܼܪ ܩܕ݂ܵܡܲܝ.

¹⁷ܘܐܲܢ̄ܬ̇ ܐܲܒ̣ܐܸܫܬ̇ ܠܡܸܥܒܲܕ݂ ܡ̣ܢ ܟܠ ܡܲܠ̈ܟܹ̇ܐ ܕܲܗܘ̤ܵܘ ܩܕ݂ܵܡܲܝܟ. ܘܐܸܙܲܠܬ̇ ܥܒܲܕ̇ܬ̇ ܠܵܟ݂ ܦܬܲܟ݂ܪܹ̈ܐ ܕܥܲܡܡܹ̈ܐ: ܘܨܲܠܡܹ̈ܐ ܠܲܡܓܲܕܵܦܘܼ ܩܕ݂ܵܡܲܝ. ܘܕܸܚܠܲܬ̣ܝ ܫܕܲܝܬ̇ ܒܸܣܬܲܪ ܨܵܘܪܵܟ݂.