Read Aramaic Peshita 2 Chronicles 16 Bible Online

2 Chronicles 16 - Aramaic Peshita bible

2 Chronicles 16

¹ܘܲܩܪܵܒ̣ܵܐ ܗܘ̤ܵܐ ܒܲܫܢܲܬ̣ ܬܠܵܬ̣ܝܼܢ ܘܚܲܡܸܫ ܕܡܲܠܟ̇ܘܼܬܹܗ ܕܐܵܣܵܐ. ܘܒܲܫܢܲܬ̣ ܬܠܵܬ̣ܝܼܢ ܘܫܸܬ̣ ܠܡܲܠܟ̇ܘܼܬܹܗ ܕܐܵܣܵܐ: ܣܠܸܩ ܒܲܥܫܵܐ ܡܲܠܟܵܐ ܕܝܼܣܪܵܝܹܠ: ܥܲܠ ܕܒܹܝܬ̣ ܝܼܗܘܼܕ݂ܵܐ. ܘܲܒ̣ܢܵܐ ܠܪܵܡܬ̣ܵܐ: ܡܸܛܠ ܫܵܒ̣ܩܝܼܢ ܗ̄ܘ̣ܵܘ ܠܡܸܦܲܩ ܘܲܠܡܸܥܲܠ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ.

²ܘܐܲܦܸܩ ܐܵܣܵܐ ܟܸܣܦܵܐ ܘܕܲܗܒ̣ܵܐ ܡ̣ܢ ܒܹܝܬ̣ ܓܲܙܵܐ ܕܡܵܪܝܵܐ: ܘܡ̣ܢ ܒܹܝܬ̣ ܡܲܠܟܵܐ ܘܫܲܕܲܪ ܠܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ: ܕܝܵܬܹܒ̣ ܒܕܲܪܡܣܘܿܩ: ܘܐܸܡܲܪ ܠܹܗ.

³ܡܵܘ̈ܡܵܬ̣ܵܐ ܐܝܼܬ̣ ܒܲܝܢܲܝ ܘܠܵܟ݂: ܘܒܹܝܬ̣ ܐܵܒ̣ܝ ܘܒܹܝܬ̣ ܐܲܒ̣ܘܼܟ݂ ܗܵܐ ܫܲܕ̇ܪܹܬ̣ ܠܵܟ݂ ܟܸܣܦܵܐ ܘܕܲܗܒ̣ܵܐ. ܙܸܠ ܒܲܛܸܠ ܡܵܘ̈ܡܵܬ̣ܵܐ ܕܝܼܡܲܝܬ̇ ܥܲܡ ܒܲܥܫܵܐ ܡܲܠܟܵܐ ܕܝܼܣܪܵܝܹܠ: ܡܸܬ̣ܥܲܠܹܐ ܡܹܢܝ.

⁴ܘܲܫܡܲܥ ܒܲܪ ܗܕ݂ܵܕ݂ ܠܡܲܠܟܵܐ ܐܵܣܵܐ. ܘܫܲܕܲܪ ܠܪ̈ܲܒܲܝ ܚܲܝ̈ܠܹܐ ܕܐܝܼܬ̣ ܠܹܗ. ܘܐܸܬ̣ܵܘ: ܘܲܫܪܵܘ ܥܲܠ ܩܘܼܪ̈ܝܵܐ ܕܝܼܣܪܵܝܹܠ: ܘܐܸܚܲܕ݂ܘ ܠܥܹܝܢܘܿܢ ܘܠܵܐܒܹܝܠ ܒܹܝܬ̣ ܡܲܥܟܵܐ: ܘܲܠܟ݂ܠܗܘܿܢ ܐܵܘܨܪܹ̈ܐ ܕܩܘܼܪ̈ܝܵܐ ܕܒܹܝܬ̣ ܢܲܦ̮ܬܵܠܝܼ.

⁵ܗܵܝܕܹ̇ܝܢ ܟܲܕ݂ ܫܡܲܥ ܒܲܥܫܵܐ: ܦܪܲܩ̣ ܗ̄ܘ̣ܵܐ ܡ̣ܢ ܕܲܠܡܸܒ̣ܢܵܐ ܠܪܵܡܬ̣ܵܐ: ܘܒܲܛܠܹܗ ܗ̄ܘ̣ܵܐ ܟܠܹܗ ܒܸܢܝܵܢܹܗ.

⁶ܘܐܵܣܵܐ ܡܲܠܟܵܐ ܟܲܢܸܫ ܗ̄ܘ̣ܵܐ ܠܟ݂ܠܗܘܿܢ ܒܹܝܬ̣ ܝܼܗܘܼܕ݂ܵܐ. ܘܲܢܣܲܒ̣ ܠܟܹܐܦܹ̈ܝܗ̇ ܕܪܵܡܬ̣ܵܐ: ܘܲܠܩܲܝܣܹ̈ܐ ܕܲܡܛܲܝܒ̣ܝܼܢ ܗ̄ܘ̣ܵܘ ܕܢܸܒ̣ܢܘܿܢܵܗ̇ ܠܒܲܥܫܵܐ. ܘܲܒ̣ܢܵܐ ܒܗܘܿܢ ܡܲܠܟܵܐ ܐܵܣܵܐ ܪܵܡܬ̣ܵܐ ܕܒܸܢܝܵܡܹܝܢ: ܘܡܲܨܦܝܵܐ ܩܪܝܼܬ̣ܵܐ.

⁷ܘܒܹܗ ܒܙܲܒ̣ܢܵܐ ܗܵܘ̇: ܐܸܬ̣ܵܐ ܚܲܢܲܢ ܢܒ̣ܝܼܵܐ ܠܘܵܬ̣ ܐܵܣܵܐ ܡܲܠܟܵܐ ܕܲܝܗܘܼܕ݂ܵܐ: ܘܐܸܡܲܪ ܠܹܗ: ܚܠܵܦ ܕܐܸܬ̇ܬ̇ܟܸܠܬ̇ ܥܲܠ ܡܲܠܟܵܐ ܕܐܲܕ݂ܘܿܡ: ܘܠܵܐ ܐܸܬ̇ܬ̇ܟܸܠܬ̇ ܥܲܠ ܡܵܪܝܵܐ ܐܲܠܗܵܟ݂: ܡܸܛܠ ܗܵܢܵܐ ܢܸܥܪܘܿܩ ܚܲܝܠܵܐ ܕܐܲܕ݂ܘܿܡ ܡܸܢܵܟ݂.

⁸ܘܢܹܐܙܠ̄ܘܿܢ ܘܢܸܬ̣ܚܲܝܠܘܼܢ ܗܸܢܘܿܢ ܘܗܸܢܕ̇ܘܵܝܹ̈ܐ: ܘܡܲܠ̈ܟܹ̇ܐ ܕܐܝܼܬ̣ ܥܲܡܗܘܿܢ. ܘܢܸܗܘܘܿܢ ܠܚܲܝ̈ܠܹܐ: ܘܲܠܙܵܘ̈ܓܹ̇ܐ ܘܲܠܦܲܪ̈ܵܫܹܐ: ܣܘܿܓ̣ܵܐܐ ܕܛܵܒ̣ ܘܟܲܕ݂ ܬܸܒ̣ܥܸܐ ܡ̣ܢ ܡܵܪܝܵܐ ܐܲܠܵܗܵܐ: ܢܲܫܠܸܡ ܐܸܢܘܿܢ ܒܐܝܼܕܲܝ̈ܟ.

⁹ܡܸܛܠ ܕܥܲܝܢܵܘ̈ܗܝ ܕܡܵܪܝܵܐ ܚܵܝܪܵܢ ܒܟ݂ܠܵܗ̇ ܐܲܪܥܵܐ. ܘܐܸܬ̣ܥܲܫܲܢܘ: ܘܢܸܗܘܹܐ ܠܸܒܟ݂ܘܿܢ ܫܠܸܡ ܠܕܸܚ̱ܠܬܹܗ ܘܐܸܣܬܲܟܲܠܘ ܒܟ݂ܠܗܹܝܢ ܬܸܕ݂ܡܪ̈ܵܬܹܗ. ܡܸܛܠ ܕܡܵܪܝܵܐ ܐܲܠܵܗܟ݂ܘܿܢ ܥܵܒܹܕ݂ ܠܟ݂ܘܿܢ ܩܪܵܒ̣ܵܐ.

¹⁰ܘܲܪܓܸܙ ܐܵܣܵܐ ܥܲܠ ܕܵܘܩܵܐ: ܘܝܲܗ̄ܒܹ̇ܗ ܒܹܝܬ̣ ܐܲܣܝܼܪܹ̈ܐ ܡܸܛܠ ܕܡܸܕܸ̇ܡ ܕܠܵܐ ܚܵܙܹ̇ܐ ܗ̄ܘ̣ܵܐ: ܡܸܫܬܲܥܹܐ ܗ̄ܘ̣ܵܐ: ܘܲܡܙܝܼܥ ܗ̄ܘ̣ܵܐ ܠܸܒܹ̇ܗ ܕܥܲܡܵܐ. ܘܡܸܛܠ ܗܵܢܵܐ ܪܗܸܛ ܐܵܣܵܐ ܒܙܲܒ̣ܢܵܐ ܗܵܘ̇ ܡ̣ܢ ܥܲܡܵܐ.

¹¹ܘܗܵܐ ܦܸܬ̣ܓ̣ܵܡܵܘ̈ܗܝ ܕܐܵܣܵܐ ܩܲܕ݂ܡܵܝܹ̈ܐ ܘܐܲܚܪ̈ܵܝܹܐ: ܗܵܐ ܟܬ̣ܝܼܒ̣ܝܼܢ ܥܲܠ ܣܸܦܪܵܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ ܘܕ݂ܝܼܣܪܵܝܹܠ.

¹²ܘܐܸܬ̣ܟܲܬܲܫ ܐܵܣܵܐ ܒܲܫܢܲܬ̣ ܬܠܵܬ̣ܝܼܢ ܘܲܬ̣ܫܲܥ ܠܡܲܠܟ̇ܘܼܬܹܗ. ܘܐܸܬ̣ܟ̇ܪܲܗ: ܘܲܢܦܲܠ̣ ܒܓ̣ܵܘ ܒܲܝܬܹ̇ܗ.

¹³ܘܲܫܟܸܒ̣ ܐܵܣܵܐ ܥܲܡ ܐܲܒ̣ܵـ̈ـܗܵܬܹܗ. ܘܐܸܬ̣ܩܒܲܪ ܒܲܩܪܝܼܬܹܗ. ܘܡܝܼܬ̣ ܒܲܫܢܲܬ̣ ܐܲܪܒ̇ܥܝܼܢ ܘܲܚܕ݂ܵܐ ܠܡܲܠܟ̇ܘܼܬܹܗ.

¹⁴ܘܐܸܬ̣ܩܒܲܪ ܒܩܲܒ̣ܪܹܗ ܕܕ݂ܵܘܝܼܕ݂: ܘܐܲܪܡܝܼܘܗܝ ܒܥܲܪܣܹܐ ܕܡܲܠܝܵܐ ܒܸܣܡܹ̈ܐ. ܘܐܵܘܩܸܕ݂ܘ ܝܲܩܕܵܐ ܪܲܒܵܐ ܕܛܵܒ̣.