Read Aramaic Peshita 2 Chronicles 18 Bible Online

2 Chronicles 18 - Aramaic Peshita bible

2 Chronicles 18

¹ܘܲܗܘ̤ܵܐ ܠܝܵܗܘܿܫܵܦܵܛ ܥܘܼܬ̣ܪܵܐ ܘܐܝܼܩܵܪܵܐ ܣܲܓ̇ܝܼ ܛܵܒ̣. ܘܐܸܬ̣ܩܲܪܲܒ̣ ܠܘܵܬ̣ ܐܵܚܵܒ̣.

²ܘܲܢܚܸܬ̣ ܒܵܬܲܪ ܬܲܪܬܹ̇ܝܢ ܫܢ̈ܝܼܢ: ܠܘܵܬ̣ ܐܵܚܵܒ̣ ܠܫܵܡ̇ܪܹܝܢ. ܘܕܲܒܲܚ ܠܹܗ ܐܵܚܵܒ̣ ܥܵـ̈ـܢܵܐ ܘܬ̣ܵܘܪܹ̈ܐ ܣܘܿܓ̣ܵܐܐ ܕܛܵܒ̣: ܘܲܠܚܲܝ̈ܠܵܘܵܬ̣ܵܐ ܕܥܲܡܹܗ ܘܡܲܠܟܹ̇ܗ ܕܢܸܣܲܩ ܠܪܵܡܲܬ̣ ܓܸܠܥܵܕ݂.

³ܘܐܸܡܲܪ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܠܝܵܗܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ: ܬܸܣܲܩ ܥܲܡܝ ܠܪܵܡܲܬ̣ ܓܸܠܥܵܕ݂. ܘܐܸܡܲܪ ܠܹܗ: ܣܵܠܹܩ ܐ̄ܢܵܐ ܐܲܟ݂ܘܵܬ̣ܵܟ݂ ܘܥܲܡܝ ܐܲܝܟ݂ ܥܲܡܵܟ݂: ܘܪ̈ܲܟ݂ܫ̄ܝ ܐܲܝܟ݂ ܪ̈ܲܟ݂ܫܵܟ݂. ܘܥܲܡܵܟ݂ ܐܵܙܹ̇ܠ ܐ̄ܢܵܐ ܠܲܩܪܵܒ̣ܵܐ.

⁴ܘܐܸܡܲܪ ܝܵܗܘܿܫܵܦܵܛ ܠܡܲܠܟܵܐ ܕܝܼܣܪܵܝܹܠ: ܫܐܲܠ ܢܹܐ ܐܲܝܟ݂ ܝܵܘܡܵܢܵܐ: ܦܸܬ̣ܓ̣ܵܡܹܗ ܕܡܵܪܝܵܐ.

⁵ܘܟܲܢܸܫ ܡܲܠܟܵܐ ܕܝܼܣܪܵܝܹܠ: ܢܒ̣ܝܹ̈ܐ ܐܲܝܟ݂ ܐܲܪܒܲܥܡܵܐܐ ܓܲܒ̣ܪ̈ܝܼܢ: ܘܐܸܡܲܪ ܠܗܘܿܢ: ܢܹܐܙܲܠ ܠܲܩܪܵܒ̣ܵܐ ܠܪܵܡܲܬ̣ ܓܸܠܥܵܕ݂: ܐܵܘ ܠܵܐ ܘܐܵܡ̇ܪܝܼܢ ܠܹܗ: ܣܲܩ: ܘܡܵܪܝܵܐ ܢܲܫܠܸܡ ܒܥܸܠܕ̇ܒ̣ܵܒܲܝ̈ܟ ܒܐܝܼܕܲܝ̈ܟ.

⁶ܘܐܸܡܲܪ ܡܲܠܟܵܐ ܝܵܗܘܿܫܵܦܵܛ: ܕܲܠܡܵܐ ܐܝܼܬ̣ ܗܵܪܟܵܐ ܕܩܘܼܫܬܵܐ ܕܡܵܪܝܵܐ: ܘܢܸܫܐܲܠ ܡܸܢܹܗ.

⁷ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܝܵܗܘܿܫܵܦܵܛ: ܬܘܼܒ̣ ܐܝܼܬ̣ ܓܲܒ̣ܪܵܐ ܚܲܕ݂ ܠܡܸܫܐܲܠ ܡܸܠܬܹܗ ܕܡܵܪܝܵܐ ܡܸܢܹܗ. ܘܐܸܢܵܐ ܣܵܢܹ̇ܐ ܐ̄ܢܵܐ ܠܹܗ: ܕܠܵܐ ܡܸܬ̣ܢܲܒܹ̇ܐ ܥܠܲܝ ܛܵܒ̣ܬ̣ܵܐ: ܐܸܠܵܐ ܒܝܼܫܬܵܐ ܡܝܼܟ݂ܵܐ ܒܲܪ ܝܲܡܠܵܐ ܫܡܹܗ. ܘܐܸܡܲܪ ܝܵܗܘܿܫܵܦܵܛ: ܠܵܐ ܢܹܐܡܲܪ ܡܲܠܟܵܐ ܗܵܟܲܢܵܐ.

⁸ܘܲܩܪܵܐ ܡܲܠܟܵܐ ܕܝܼܣܪܵܝܹܠ ܠܲܡܗܲܝܡܢܵܐ ܚܲܕ݂: ܘܐܸܡܲܪ ܠܹܗ: ܣܲܪܗܸܒ̣ ܐܲܝܬܵܐ ܠܝܼ ܠܡܝܼܟ݂ܵܐ ܒܲܪ ܝܲܡܠܵܐ.

⁹ܘܡܲܠܟܵܐ ܕܝܼܣܪܵܝܹܠ: ܘܝܵܗܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ: ܝܵܬ̣ܒ̇ܝܼܢ ܓܒܲܪ ܥܲܠ ܟܘܼܪܣܝܹܗ. ܘܲܠܒ̣ܝܼܫܝܼܢ ܠܒ̣ܘܼܫܵܐ ܒܵܪܕܵܐ. ܘܝܵܬ̣ܒ̇ܝܼܢ ܒܬܲܪܥܵܐ ܕܫܵܡܪܝܼܢ ܘܟ݂ܠܗܘܿܢ ܢܒ̣ܝܹ̈ܐ ܕܲܓܵܠܹ̈ܐ ܡܸܬ̣ܢܲܒܹ̇ܝܢ ܗ̄ܘ̣ܵܘ ܩܕ݂ܵܡܲܝܗܘܿܢ.

¹⁰ܘܲܥܒܲܕ݂ ܠܹܗ ܨܸܕ݂ܩܝܵܐ ܒܲܪ ܟܢܲܥܢܵܝܬܵܐ: ܩܲܪ̈ܢܵܬ̣ܵܐ ܕܦܲܪܙܠܵܐ: ܘܐܸܡܲܪ ܠܵܗ̇: ܗܵܟܲܢܵܐ ܐܵܡܲܪ ܡܵܪܝܵܐ: ܒܗܵܠܹܝܢ ܬܕܲܩܲܪ ܐܸܢܘܿܢ ܠܐܲܕ݂ܘܿܡܵܝܹ̈ܐ: ܥܕܲܡܵܐ ܕܲܬ̣ܓܲܡܲܪ ܐܸܢܘܿܢ: ܘܲܥܕܲܡܵܐ ܠܐܲܝܟܵܐ ܕܬ̣ܵܘܒܸ̇ܕ݂ ܐܸܢܘܿܢ.

¹¹ܘܟ݂ܠܗܘܿܢ ܢܒ̣ܝܹ̈ܐ ܕܲܓܵܠܹ̈ܐ ܡܸܬ̣ܢܲܒܹ̇ܝܢ ܗܵܟܲܢܵܐ. ܘܐܵܡ̇ܪܝܼܢ: ܣܲܩ ܠܪܵܡܲܬ̣ ܓܸܠܥܵܕ݂: ܘܲܙܟ݂ܝܼܗ̇ ܘܢܲܫܠܸܡ ܡܵܪܝܵܐ ܒܥܸܠܕ̇ܒ̣ܵܒܲܝ̈ܟ ܒܐܝܼܕܲܝ̈ܟ: ܡܲܠܟܵܐ.

¹²ܘܐܝܼܙܓܲܕܵܐ ܕܐܸܙܲܠ̣ ܠܡܸܩܪܵܐ ܠܡܝܼܟ݂ܵܐ: ܡܲܠܸܠ̣ ܥܲܡܹܗ: ܘܐܸܡܲܪ ܠܹܗ: ܗܵܐ ܡܸܠܲܝ̈ܗܘܿܢ ܕܲܢܒ̣ܝܹ̈ܐ ܕܲܓܵܠܹ̈ܐ: ܫܲܘ̈ܝܵܢ ܐܸܢܹܝܢ ܠܲܡܡܲܠܵܠܘܼ ܐܲܟܲܚ̄ܕ݂ ܛܵܒ̣ܬ̣ܸܵܐ ܩܕ݂ܵܡ ܡܲܠܟܵܐ. ܢܸܗܘܘܿܢ ܦܸܬ̣ܓ̣ܵܡܲܝ̈ܟ ܒܲܣܝܼܡܝܼܢ ܐܲܝܟ݂ ܕܚܲܕ݂ ܡܸܢܗܘܿܢ ܘܬܸܬ̣ܢܲܒܹ̇ܐ ܐܵܦ ܐܲܢ̄ܬ̇ ܛܵܒ̣ܬ̣ܵܐ.

¹³ܘܐܸܡܲܪ ܡܝܼܟ݂ܵܐ: ܚܲܝ ܗ̄ܘܼ ܡܵܪܝܵܐ ܐܲܠܵܗܵܐ: ܐܸܠܵܐ ܡܸܕܸ̇ܡ ܕܢܲܪܡܹܐ ܐܲܠܵܗܵܐ ܒܠܹܒ̇ܝ: ܗܵܘ̇ ܐܹܡܲܠܸܠ.

¹⁴ܘܐܸܙܲܠ̣ ܠܘܵܬ̣ ܡܲܠܟܵܐ. ܘܐܸܡܲܪ ܠܹܗ ܡܲܠܟܵܐ: ܡܝܼܟ݂ܵܐ: ܢܹܙܲܠ ܠܪܵܡܲܬ̣ ܓܸܠܥܵܕ݂: ܐܵܘ ܠܵܐ ܘܐܸܡܲܪ ܠܹܗ: ܣܲܩ ܘܲܙܟ݂ܝܼܗ̇: ܘܢܸܫܬܲܠܡܘܼܢ ܒܐܝܼܕܲܝ̈ܟ.

¹⁵ܘܐܸܡܲܪ ܠܹܗ ܡܲܠܟܵܐ: ܥܲܠ ܟܡܵܐ ܙܲܒ̣̈ܢܝܼܢ ܐܸܢܵܐ ܡܵܘܡܸܐ ܐ̄ܢܵܐ ܠܵܟ݂: ܕܠܵܐ ܬܡܲܠܸܠ ܥܲܡܝ: ܐܸܠܵܐ ܐܸܢ ܬܪ̈ܝܼܨܵܬ̣ܵܐ: ܒܲܫܡܹܗ ܕܡܵܪܝܵܐ.

¹⁶ܘܐܸܡܲܪ ܚܵܙܹ̇ܐ ܗ̄ܘܹ̇ܝܬ̣ ܠܹܗ ܠܟ݂ܠܹܗ ܝܼܣܪܵܝܹܠ: ܕܲܡܒܲܕ̇ܪܝܼܢ ܒܹܝܬ̣ ܛܘܼܪܹ̈ܐ: ܘܕ݂ܵܡܹ̇ܝܢ ܠܥܵـ̈ـܢܵܐ ܕܠܲܝܬ̇ ܠܵܗ̇ ܪܵܥܝܵܐ ܘܐܸܡܲܪ ܡܵܪܝܵܐ: ܠܲܝܬ̇ ܡܲܠܟܵܐ ܠܗܵܠܹܝܢ: ܢܸܗܦܘܿܟ݂ ܓܒܲܪ ܠܒܲܝܬܹ̇ܗ ܒܲܫܠܵܡܵܐ.

¹⁷ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܝܵܗܘܿܫܵܦܵܛ: ܠܵܐ ܐܸܡ̇ܪܹܬ̣ ܠܵܟ݂ ܕܠܵܐ ܡܸܬ̣ܢܲܒܸܐ ܥܠܲܝ ܗܵܢܵܐ ܛܵܒ̣ܬ̣ܵܐ: ܐܸܠܵܐ ܐܸܢ ܒܝܼܫܬܵܐ.

¹⁸ܘܐܸܡܲܪ ܡܝܼܟ݂ܵܐ: ܡܸܛܠ ܗܵܢܵܐ ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ: ܚܙܹ̇ܝܬ̣ ܠܡܵܪܝܵܐ ܝܵܬܹܒ̣ ܥܲܠ ܟܘܼܪܣܝܹܗ: ܘܟ݂ܠ ܚܲܝ̈ܠܵܘܵܬ̣ܵܐ ܕܲܫܡܲܝܵܐ ܩܵܝ̇ܡܝܼܢ ܡ̣ܢ ܝܲܡܝܼܢܹܗ ܘܡ̣ܢ ܣܸܡܵܠܹܗ.

¹⁹ܘܐܸܡܲܪ ܡܵܪܝܵܐ ܡܲܢܘܼ ܢܫܲܕ̇ܠܝܼܘܗܝ ܠܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܕܢܸܣܲܩ ܘܢܸܬ̣ܩܛܸܠ ܒܪܵܡܲܬ̣ ܓܸܠܥܵܕ݂. ܚܲܕ݂ ܐܵܡܲܪ ܡܫܲܕܸ̇ܠ ܐ̄ܢܵܐ ܠܹܗ: ܘܐܲܚ̄ܪܹܢܵܐ ܐܵܡܲܪ ܡܫܲܕܸ̇ܠ ܐ̄ܢܵܐ ܠܹܗ.

²⁰ܘܲܢܦܲܩ̣ ܪܘܼܚܵܐ: ܘܩܵܡ̣ ܩܕ݂ܵܡ ܡܵܪܝܵܐ ܘܐܸܡܲܪ: ܐܸܢܵܐ ܡܫܲܕܸ̇ܠ ܐ̄ܢܵܐ ܠܹܗ. ܘܐܸܡܲܪ ܠܹܗ ܡܵܪܝܵܐ: ܒܡܵܢܵܐ.

²¹ܘܐܸܡܲܪ ܐ̄ܢܵܐ ܐܸܦܘܿܩ: ܘܐܸܗܘܹܐ ܪܘܼܚܵܐ ܟܲܕܵܒ̣ܵܐ ܒܦܘܼܡܵܐ ܕܟ݂ܠܗܘܿܢ ܢܒ̣ܝܼܵܘ̈ܗܝ ܘܐܸܡܲܪ ܠܹܗ: ܡܫܲܕܸ̇ܠ ܐܲܢ̄ܬ̇ ܠܹܗ: ܐܵܦ ܡܸܫܟܲܚ ܐܲܢ̄ܬ̇ ܠܹܗ. ܦܘܿܩ ܘܲܥܒܸܕ݂ ܐܲܝܟܲܢܵܐ ܕܐܸܡܲܪܬ̇.

²²ܘܐܵܦ ܗܵܫܵܐ ܗܵܐ ܝܲܗ̄ܒ̣ ܡܵܪܝܵܐ ܪܘܼܚܵܐ ܟܲܕܵܒ̣ܵܐ ܒܦܘܼܡܵܐ ܕܟ݂ܠܗܘܿܢ ܢܒ̣ܝܼܲܝ̈ܟ ܗܵܠܹܝܢ. ܘܡܵܪܝܵܐ ܦܣܲܩ̣ ܥܠܲܝܟ ܒܝܼܫܬܵܐ.

²³ܘܲܩܪܸܒ̣ ܨܸܕܲܩܝܵܐ ܒܲܪ ܟܢܲܥܢܵܝܬܵܐ: ܘܲܡܚܵܝܗܝ ܠܡܝܼܟ݂ܵܐ ܥܲܠ ܦܲܟܹ̇ܗ: ܘܐܸܡܲܪ ܠܹܗ. ܡ̣̤ ܐܸܡܲܬ̣ܝ ܘܲܠܟ݂ܵܐ: ܥܸܒ̣ܪܲܬ̣ ܪܘܼܚܹܗ ܕܡܵܪܝܵܐ ܡܹܢܝ: ܠܲܡܡܲܠܵܠܘܼ ܥܲܡܵܟ݂.

²⁴ܘܐܸܡܲܪ ܡܝܼܟ݂ܵܐ: ܗܵܐ ܚܵܙܹ̇ܝܬ̇ ܒܝܵܘܡܵܐ ܗܵܘ̇: ܟܲܕ݂ ܬܸܥܘܿܠ ܬܵܘܵܢ ܒܓ̣ܵܘ ܬܵܘܵܢ ܠܡܸܬ̇ܛܲܫܵܝܘܼ.

²⁵ܘܐܸܡܲܪ ܡܲܠܟܵܐ ܕܝܼܣܪܵܝܹܠ: ܕܒܲܪܘ ܠܡܝܼܟ݂ܵܐ. ܘܙܸܠܘ ܟܠܵܐܘܼܗܝ ܒܹܝܬ̣ ܐܲܡܘܿܢ ܫܲܠܝܼܛܵܐ ܕܲܩܪܝܼܬ̣ܵܐ: ܘܲܒ̣ܒܲܝܬܹ̇ܗ ܕܝܘܿܐܵܫ ܒܲܪ ܡܲܠܟܵܐ.

²⁶ܘܬܹܐܡܪܘܿܢ: ܗܵܟܲܢܵܐ ܐܵܡܲܪ ܡܲܠܟܵܐ: ܐܲܪܡܵܐܘܼܗܝ ܠܗܵܢܵܐ ܒܹܝܬ̣ ܐܲܣܝܼܪܹ̈ܐ. ܘܐܵܘܟ̇ܠܘܼܗܝ ܠܲܚܡܵܐ ܠܡܸܛܲܪ ܢܦܸܫ. ܘܐܲܫܩܵܐܘܼܗܝ ܡܲـ̈ـܝܵܐ ܠܡܸܛܲܪܢܦܸܫ: ܥܕܲܡܵܐ ܠܐܲܝܟܵܐ ܕܐܸܗܦܘܿܟ݂ ܒܲܫܠܵܡܵܐ.

²⁷ܘܐܸܡܲܪ ܡܝܼܟ݂ܵܐ: ܐܸܢ ܡܸܗܦܲܟ݂ ܗܵܦܹ̇ܟ݂ ܐܲܢ̄ܬ̇: ܘܐܵܬܹ̇ܐ ܐܲܢ̄ܬ̇ ܒܲܫܠܵܡܵܐ: ܠܵܐ ܡܲܠܸܠ̣ ܡܵܪܝܵܐ ܥܲܡܝ. ܘܐܸܡܲܪ: ܫܡܲܥܘ ܥܲܡܡܹ̈ܐ ܟܠܟ݂ܘܿܢ.

²⁸ܘܲܣܠܸܩ ܝܵܗܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ: ܘܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܠܪܵܡܲܬ̣ ܓܸܠܥܵܕ݂.

²⁹ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܝܵܗܘܿܫܵܦܵܛ ܐܸܙܕܲܝܲܢ: ܘܐܹܬܹܐ: ܘܐܹܩܘܿܡ ܒܣܸܕ݂ܪܵܐ ܕܲܩܪܵܒ̣ܵܐ. ܘܐܲܢ̄ܬ̇ ܠܒܲܫ ܡܵܐܢܲܝ̈ ܙܲܝܢܵܟ݂. ܘܐܸܙܕܲܝܲܢ ܡܲܠܟܵܐ ܕܝܼܣܪܵܝܹܠ: ܘܥܲܠ ܘܩܵܡ ܒܣܸܕ݂ܪܵܐ ܕܲܩܪܵܒ̣ܵܐ.

³⁰ܘܡܲܠܟܵܐ ܕܐܲܕ݂ܘܿܡܵܝܹ̈ܐ: ܦ̣ܩܲܕ݂ ܠܫܲܠܝܼܛܵܢܹ̈ܐ ܕܙܵܘ̈ܓܹ̇ܐ ܕܐܝܼܬ̣ ܠܹܗ: ܬܠܵܬ̣ܝܼܢ ܘܲܬ̣ܪܹܝܢ. ܘܐܸܡܲܪ ܠܗܘܿܢ: ܠܵܐ ܬܸܬ̣ܟܲܬ̇ܫܘܼܢ ܠܵܐ ܥܲܡ ܙܥܘܿܪܵܐ: ܘܠܵܐ ܥܲܡ ܪܲܒܵܐ: ܐܸܠܵܐ ܥܲܡ ܡܲܠܟܵܐ ܕܝܼܣܪܵܝܹܠ ܒܲܠܚܘܿܕ݂.

³¹ܘܲܗܘ̤ܵܐ ܕܟܲܕ݂ ܚ̣ܙܵܘ ܫܲܠܝܼܛܵܢܹ̈ܐ ܕܙܵܘ̈ܓܹ̇ܐ: ܠܝܵܗܘܿܫܵܦܵܛ: ܐܵܡ̇ܪܝܼܢ: ܡܲܠܟܵܐ ܕܝܼܣܪܵܝܹܠ ܗܵܢܵܘ ܘܐܸܬ̣ܵܘ ܥܠܵܘܗܝ: ܠܡܸܬ̣ܟܲܬܵܫܘܼ ܥܲܡܹܗ. ܘܐܲܝܠܸܠ ܝܵܗܘܿܫܵܦܵܛ ܘܡܵܪܝܵܐ ܥܲܕ̇ܪܹܗ: ܘܐܲܦܪܸܩ̣ ܐܸܢܘܿܢ ܡܸܢܹܗ.

³²ܘܲܗܘ̤ܵܐ ܕܟܲܕ݂ ܚܙ̣ܵܘ ܫܲܠܝܼܛܵܢܹ̈ܐ ܕܙܵܘ̈ܓܹ̇ܐ: ܕܠܵܐ ܗܘ̤ܵܐ ܡܲܠܟܵܐ ܕܝܼܣܪܵܝܹܠ: ܗܦܲܟ݂ܘ ܠܗܘܿܢ ܡ̣ܢ ܒܸܣܬ̇ܪܹܗ.

³³ܘܓܲܒ̣ܪܵܐ ܫܵܕܹ̇ܐ ܗ̄ܘ̣ܵܐ ܒܩܸܫܬܵܐ ܬܲܡܝܼܡܵܐܝܼܬ̣ ܠܩܘܼܒ̣ܠܹܗ ܘܲܡܚܵܝܗܝ ܠܡܲܠܟܵܐ ܕܝܼܣܪܵܝܹܠ: ܒܹܝܬ̣ ܦܪܵܩܵܐ ܕܫܸܪܝܵܢܹܗ. ܘܐܸܡܲܪ ܠܡܲܪܟ̇ܒ̣ܵܢܹܗ: ܐܲܗܦܸܟ݂ ܐܝܼܕ݂ܵܟ݂: ܘܐܲܦܸܩܲܝܢܝ ܠܒܲܪ ܡ̣ܢ ܡܲܫܪܝܼܬ̣ܵܐ: ܡܸܛܠ ܕܲܡܚܘܿܬ̣ܵܐ ܕܡܵܘܬܵܐ ܡܚܸܐ ܗ̄ܘ̣ܵܐ.

³⁴ܘܲܥܫܸܢ ܩܹܐܪܣܵܐ ܒܝܵܘܡܵܐ ܗܵܘ̇. ܘܡܲܠܟܵܐ ܕܝܼܣܪܵܝܹܠ ܝܵܬܹ̇ܒ̣ ܗ̄ܘ̣ܵܐ ܒܙܵܘܓ̣ܵܐ. ܘܡܸܬ̣ܟܲܬܲܫ ܗ̄ܘ̣ܵܐ ܥܲܡ ܐܲܕ݂ܘܿܡܵܝܹ̈ܐ: ܥܕܲܡܵܐ ܠܪܲܡܫܵܐ ܘܡܝܼܬ̣ ܥܸܕܵܢ ܡܲܥܪ̈ܵܒܲܝ ܫܸܡܫܵܐ.