Read Aramaic Peshita 2 Chronicles 19 Bible Online

2 Chronicles 19 - Aramaic Peshita bible

2 Chronicles 19

³ܐܸܠܵܐ ܡܗܲܝܡܸܢ ܐ̄ܢܵܐ: ܕܦܸܬ̣ܓ̣ܵܡܹ̈ܐ ܛܵܒܹ̈ܐ ܐܸܫܬܲܡܲܥܘ ܡܸܢܵܟ݂. ܡܸܛܠ ܕܲܕ݂ܡܵܐ ܙܲܟܵܝܵܐ ܠܵܐ ܐܹܫܲܕ̇ܬ̇ ܒܐܲܪܥܵܐ. ܘܐܲܬ̣ܩܸܢܬ̇ ܠܸܒܵܟ݂ ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ ܒܩܘܼܫܬܵܐ.

⁴ܘܝܼܬܸܒ̣ ܝܵܗܘܿܫܵܦܵܛ ܒܐܘܿܪܸܫܠܸܡ ܘܲܗܦܲܟ݂ ܘܲܢܦܲܩ̣ ܡ̣ܢ ܒܹܪ ܫܒܲܥ ܡܕ݂ܝܼܢ̄ܬܵܐ. ܘܡܲܛܝܼ ܠܛܘܼܪܵܐ ܕܐܲܦܪܹܝܡ ܘܐܲܗܦܸܟ݂ ܐܸܢܘܿܢ ܠܡܸܕ݂ܚܲܠ ܩܕ݂ܵܡ ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ.

⁵ܘܐܲܩܝܼܡ ܕܲܝܵܢܹ̈ܐ ܒܐܲܪܥܵܐ: ܒܟ݂ܠܗܹܝܢ ܩܘܼܪ̈ܝܵܐ ܕܲܝܗܘܼܕ݂ܵܐ ܥܲܫܝܼ̈ܢܵܬ̣ܵܐ: ܘܩܘܼܪ̈ܝܵܐ ܓܲܢ̄ܒܵܪ̈ܵܬ̣ܵܐ.

⁶ܘܐܸܡܲܪ ܠܕܲܝܵܢܹ̈ܐ: ܚܙܵܘ ܡܵܢܵܐ ܥܵܒ̣ܕ̇ܝܼܢ ܐ̄ܢܬ̇ܘܿܢ. ܕܠܵܐ ܗ̄ܘ̣ܵܐ ܠܲܒ̣ܢܲܝ̈ܢܵܫܵܐ ܕܵܝܢܝܼܢ ܐ̄ܢܬ̇ܘܿܢ: ܐܸܠܵܐ ܠܡܵܪܝܵܐ ܐܲܠܵܗܲܢ.

⁷ܐܸܬ̣ܥܲܫܲܢܘ: ܘܕ݂ܘܢܘ ܕܝܼܢܵܐ ܕܩܘܼܫܬܵܐ ܘܢܸܗܘܹܐ ܡܵܪܝܵܐ ܥܲܡܟ݂ܘܿܢ ܠܥܵܠܲܡ. ܘܛܲܪܘ ܘܲܥܒܸܕ݂ܘ. ܡܸܛܠ ܕܠܲܝܬ̇ ܩܕ݂ܵܡ ܡܵܪܝܵܐ ܐܲܠܵܗܲܢ ܥܵܘܼܠܵܐ: ܘܡܲܣܲܒ̣ ܒܐܲܦܹ̈ܐ: ܘܩܘܼܒܵܠܵܐ ܕܫܘܼܚܕܵܐ.

⁸ܘܐܵܦ ܒܐܘܿܪܸܫܠܸܡ ܐܲܩܝܼܡ ܝܵܗܘܿܫܵܦܵܛ ܡ̣ܢ ܠܹܘܵܝܹ̈ܐ: ܘܡ̣ܢ ܟܵܗ̈ܢܹܐ: ܘܡ̣ܢ ܪܹ̈ܫܹܐ ܕܐܲܒ̣ܵـ̈ـܗܵܬ̣ܵܐ ܕܲܒ̣ܢܲܝ̈ ܝܼܣܪܵܝܹܠ: ܠܕ݂ܝܼܢܵܐ ܕܡܵܪܝܵܐ.

⁹ܘܲܗܦܲܟ݂ ܠܐܘܿܪܸܫܠܸܡ ܦܩܲܕ݂ ܐܸܢܘܿܢ ܘܐܸܡܲܪ ܠܗܘܿܢ: ܗܵܟܲܢܵܐ ܬܸܥܒ̇ܕ݂ܘܼܢ ܠܕܸܚ̱ܠܬܹܗ ܕܡܵܪܝܵܐ: ܒܗܲܝܡܵܢܘܼܬ̣ܵܐ ܘܲܒ̣ܠܸܒܵܐ ܫܲܠܡܵܐ.

¹⁰ܘܟ݂ܠ ܕܝܼܢܵܐ ܕܐܵܬܹ̇ܐ ܠܘܵܬ̣ܟ݂ܘܿܢ ܡ̣ܢ ܐܲܚܲܝ̈ܟ̇ܘܿܢ: ܕܝܵܬ̣ܒ̇ܝܼܢ ܒܩܘܼܪ̈ܝܼܟ݂ܘܿܢ: ܒܹܝܬ̣ ܕܡܵܐ ܠܲܕ݂ܡܵܐ: ܘܒܹܝܬ̣ ܢܵܡܘܿܣܵܐ ܠܦܘܼܩܕܵܢܵܐ: ܘܲܠܕ݂ܝܼܢܵܐ. ܘܲܬ̣ܙܲܗܪܘܿܢ ܐܸܢܘܿܢ: ܕܠܵܐ ܢܚܘܼܒ̣ܘܼܢ ܩܕ݂ܵܡ ܡܵܪܝܵܐ: ܘܢܸܪܓܲܙ ܥܠܲܝܗܘܿܢ ܘܥܲܠ ܐܲܚܲܝ̈ܗܘܿܢ. ܘܗܵܟܲܢܵܐ ܬܸܥܒ̇ܕ݂ܘܼܢ: ܘܠܵܐ ܬܚܘܼܒ̣ܘܼܢ.

¹¹ܗܵܐ ܐܲܩܝܼܡܹ̇ـܬ̣ ܥܠܲܝܟ̇ܘܿܢ ܟܵܗ̈ܢܹܐ: ܕܲܢܕ݂ܘܼܢܘܼܢ ܕܝܼܢܵܐ ܕܩܘܼܫܬܵܐ: ܘܕ݂ܝܼܢܵܐ ܕܗܲܝܡܵܢܘܼܬ̣ܵܐ: ܐܲܝܟ݂ ܦܘܼܩܕܵܢܹܗ ܕܡܵܪܝܵܐ. ܘܲܙܟܲܪܝܵܐ ܒܲܪ ܫܡܲܥܝܵܐ: ܚܵܘܝܼ ܠܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܟܠܗܘܿܢ ܦܘܼܩܕܵܢܵܘ̈ܗܝ ܕܡܲܠܟܵܐ ܘܚܵܘܝܼ ܠܣܵܦܪܹ̈ܐ ܘܲܠܠܹܘܵܝܹ̈ܐ: ܟܠ ܡܸܕܸ̇ܡ ܩܕ݂ܵܡܲܝܗܘܿܢ ܬܲܢܝܼ: ܘܐܸܡܲܪ ܠܗܘܿܢ. ܐܸܬ̣ܥܲܫܲܢܘ: ܘܲܥܒܸܕ݂ܘ. ܘܢܸܗܘܹܐ ܡܵܪܝܵܐ ܒܥܸܕ݂ܪ̱ܟ݂ܘܿܢ ܠܥܵܠܲܡ.