Read Aramaic Peshita 2 Chronicles 2 Bible Online

2 Chronicles 2 - Aramaic Peshita bible

2 Chronicles 2

¹ܘܐܸܡܲܪ ܫܠܹܝܡܘܿܢ ܠܡܸܒ̣ܢܵܐ ܒܲܝܬܵܐ ܠܲܫܡܹܗ ܕܡܵܪܝܵܐ: ܘܒܲܝܬܵܐ ܕܡܲܠܟ̇ܘܼܬܹܗ.

²ܘܲܡܢ̣ܵܐ ܐܸܢܘܿܢ ܫܠܹܝܡܘܿܢ ܫܲܒ̣ܥܝܼܢ ܐܲܠܦ̈ܝܼܢ ܓܲܒ̣ܪ̈ܝܼܢ ܫܩ̈ܝܼܠܲܝ ܩܘܿܦܹ̈ܐ: ܘܲܬ̣ܡܵܢܐܝܼܢ ܐܲܠܦ̈ܝܼܢ ܓܲܒ̣ܪܹ̈ܐ ܦܵܣܘܿܠܹ̈ܐ ܒܛܘܼܪܵܐ: ܘܫܲܠܝܼܛܝܼܢ ܥܠܲܝܗܘܿܢ ܬܠܵܬ̣ܵܐ ܐܲܠܦ̈ܝܼܢ ܘܫܸܬ̣ܡܵܐܐ.

³ܘܫܲܕܲܪ ܫܠܹܝܡܘܿܢ ܠܘܵܬ̣ ܚܝܼܪܵܡ ܡܲܠܟܵܐ ܕܨܘܿܪ: ܘܐܸܡܲܪ ܠܹܗ: ܐܲܝܟܲܢܵܐ ܕܲܥܒܲܕ̇ܬ̇ ܥܲܡ ܕܵܘܝܼܕ݂ ܐܲܒ̣ܝ ܚܸܣܕ݂ܵܐ ܪܲܒܵܐ: ܘܫܲܕܲܪܬ̇ ܠܹܗ ܐܲܪ̈ܙܹܐ: ܠܡܸܒ̣ܢܵܐ ܠܹܗ ܒܲܝܬܵܐ: ܠܡܸܬܲܒ̣ ܒܹܗ.

⁴ܘܗܵܐ ܐܸܢܵܐ ܒܵܢܹ̇ܐ ܐ̄ܢܵܐ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܝ: ܠܲܡܩܲܕܵܫܘܼ ܠܹܗ ܘܠܲܡܩܲܪܵܒ̣ܘܼ ܩܕ݂ܵܡܵܘܗܝ ܩܲܛܪ̈ܘܼܩܹܐ ܕܒܸܣܡܹ̈ܐ. ܠܡܲܢܗܵܪܘܼ ܫܪ̈ܵܓܹܐ ܐܲܡܝܼܢܵܐܝܼܬ̣: ܘܕܸܒ̣ܚܹ̈ܐ ܠܲܡܩܲܪܵܒ̣ܘܼ ܒܨܲܦܪܵܐ ܘܲܒ̣ܪܲܡܫܵܐ: ܒܫܲـ̈ـܒܹ̇ܐ ܘܲܒ̣ܪܸܫ ܝܲܪ̈ܚܹܐ: ܘܲܒ̣ܥܹܐܕܹ̈ܐ ܕܡܵܪܝܵܐ ܐܲܠܵܗܲܢ. ܗܵܕܹܐ ܓܙܲܪܘ ܥܲܠ ܟܠܹܗ ܝܼܣܪܵܝܹܠ.

⁵ܘܒܲܝܬܵܐ ܕܐܸܢܵܐ ܒܵܢܹ̇ܐ ܐ̄ܢܵܐ: ܪܲܒ̇ ܗ̄ܘ̣ ܛܵܒ̣. ܡܸܛܠ ܕܪܲܒ̇ ܗ̄ܘ̣ ܓܹܝܪ ܡܵܪܝܵܐ ܐܲܠܵܗܲܢ ܡ̣ܢ ܟܠܗܘܿܢ ܡܲܠ̈ܟܹ̇ܐ.

⁶ܘܡܲܢܘܼ ܐܝܼܬ̣ ܒܹܗ ܚܲܝܠܵܐ ܠܡܸܒ̣ܢܵܐ ܠܹܗ ܒܲܝܬܵܐ. ܡܸܛܠ ܕܲܫܡܲܝܵܐ ܘܲܫܡܲܝ̈ ܫܡܲܝܵܐ ܠܵܐ ܡܣܲܝܒ̇ܪܝܼܢ ܠܹܗ. ܘܡܵܢ̣ܵܐ ܚܫܝܼܒ̣ ܐ̄ܢܵܐ ܕܐܸܒ̣ܢܹܐ ܠܹܗ ܒܲܝܬܵܐ: ܐܵܘ ܕܐܲܣܸܩ ܠܹܗ ܩܲܛܪ̈ܘܼܩܹܐ ܕܒܸܣܡܹ̈ܐ.

⁷ܡܸܟܹ̇ܝܠ ܫܲܕܲܪ ܠܝܼ ܓܲܒ̣ܪܵܐ ܚܲܕ݂ ܚܲܟ̇ܝܼܡܵܐ. ܕܢܸܥܒܸ̇ܕ݂ ܒܕܲܗܒ̣ܵܐ ܘܲܒ̣ܟܸܣܦܵܐ: ܘܲܢܚܵܫܵܐ ܘܦܲܪܙܠܵܐ: ܘܐܲܪܓ̇ܘܵܢܵܐ ܘܣܵܣܓܵܘܢܵܐ: ܘܲܒ̣ܬܸܟ݂ܠ̱ܬ̣ܵܐ: ܘܲܒ̣ܒ̣ܘܼܨܵܐ: ܘܝܵܕܲܥ ܠܡܲܪܡܵܝܘܼ ܩܠܝܼ̈ܕܹܐ ܥܲܡ ܚܲܟ̇ܝܼܡܹ̈ܐ ܕܐܝܼܬ̣ ܒܲܝܗܘܼܕ݂ܵܐ: ܘܒ̣ܐܘܿܪܸܫܠܸܡ: ܕܐܲܬ̣ܩܸܢ ܕܵܘܝܼܕ݂ ܐܵܒ̣ܝ.

⁸ܘܫܲܕܲܪ ܠܝܼ ܩܲܝܣܹ̈ܐ ܕܐܲܪܙܵܐ ܘܲܕ݂ܩܲܛܪ̈ܘܼܩܹܐ ܘܕܸܐܫܟܵܪܥܵܐ ܡ̣ܢ ܠܸܒ̣ܢܵܢ. ܡܸܛܠ ܕܐܸܢܵܐ ܝܵܕܲܥ ܐ̄ܢܵܐ ܕܥܲܒ̣ܕܲܝ̈ܟ ܝܵܕ݂ܥܝܼܢ ܠܡܸܦܣܲܩ ܐܲܪ̈ܙܹܐ ܡ̣ܢ ܠܸܒ̣ܢܵܢ. ܘܗܵܐ ܥܲܒ̣̈ܕܲܝ ܥܲܡ ܥܲܒ̣̈ܕܲܝܟ.

⁹ܢܸܗܘܘܿܢ ܡܲܝܬܹ̇ܝܢ ܠܝܼ ܩܝܣܹ̈ܐ ܣܲܓ̇ܝܼ. ܡܸܛܠ ܕܒܲܝܬܵܐ ܕܒ̣ܵܢܹܐ ܐ̄ܢܵܐ: ܪܲܒ̇ ܗ̄ܘ̣ ܛܵܒ̣: ܘܲܕ̇ܬܸܡܗܵܐ ܗ̄ܘ̣.

¹⁰ܘܐܸܢܵܐ ܡܲܝܬܹ̇ܐ ܐ̄ܢܵܐ ܢܲܓܵܪܹ̈ܐ ܕܐܘܼܡܵܢ̈ܝܼܢ ܘܐܸܢܵܐ ܝܵܗܹ̇ܒ̣ ܐ̄ܢܵܐ ܚܸܛܹ̈ܐ ܣܲܝܒܵܪܬܵܐ ܠܥܲܒ̣ܕܲܝ̈ܟ: ܟܘܿܪܹ̈ܐ ܥܸܣܪܝܼܢ ܐܲܠܦ̈ܝܼܢ: ܘܲܣܥܵܪܹ̈ܐ ܥܸܣܪܝܼܢ ܐܲܠܦ̈ܝܼܢ: ܘܚܲܡܪܵܐ ܪܸ̈ܒ̣ܥܹܐ ܥܸܣܪܝܼܢ ܐܲܠܦ̈ܝܼܢ: ܘܡܸܫܚܵܐ ܪܸ̈ܒ̣ܥܹܐ ܥܸܣܪܝܼܢ ܐܲܠܦ̈ܝܼܢ.

¹¹ܘܐܸܡܲܪ ܚܝܼܪܵܡ ܡܲܠܟܵܐ ܕܨܘܿܪ: ܒܲܟ݂ܬ̣ܵܒ̣ܵܐ. ܘܫܲܕܲܪ ܠܘܵܬ̣ ܫܠܹܝܡܘܿܢ ܘܐܸܡܲܪ ܠܹܗ: ܡܸܛܠ ܕܲܪܚܸܡ ܡܵܪܝܵܐ ܠܥܲܡܹܗ: ܐܲܩܝܼܡܵܟ݂ ܥܠܲܝܗܘܿܢ ܡܲܠܟܵܐ.

¹²ܘܐܸܡܲܪ ܚܝܼܪܵܡ: ܒܪܝܼܟ݂ ܗ̄ܘ̣ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܕܲܒ̣ܪܵܐ ܫܡܲܝܵܐ ܘܐܲܪܥܵܐ: ܘܝܲܗ̄ܒ̣ ܠܕ݂ܵܘܝܼܕ݂ ܒܪܵܐ ܚܲܟ̇ܝܼܡܵܐ: ܡܸܫܬܵܘܕܲܥ ܘܡܸܬ̣ܒܲܝܲܢ: ܘܲܗܘ̤ܵܬ̣ ܡ̣ܢ ܪܸܥܝܵܢܹܗ ܠܡܸܒ̣ܢܵܐ ܒܲܝܬܵܐ ܠܡܵܪܝܵܐ: ܘܒܲܝܬܵܐ ܠܡܲܠܟ̇ܘܼܬܹܗ.

¹³ܘܐܵܦ ܗܵܫܵܐ ܫܲܕ̇ܪܹܬ̣ ܠܵܟ݂ ܓܲܒ̣ܪܵܐ ܚܲܟ̇ܝܼܡܵܐ ܝܵܕܲܥ ܡܒܲܝܢܵܢܘܼܬ̣ܵܐ: ܠܚܝܼܪܵܡ.

¹⁴ܒܲܪ ܐܲܢ̄ܬ̇ܬ̣ܵܐ ܗ̄ܘ̣ ܐܲܪܡܲܠܬܵܐ ܡ̣ܢ ܒܹܝܬ̣ ܕܵܢ. ܘܐܲܒ̣ܘܼܗܝ ܓܲܒ̣ܪܵܐ ܗ̄ܘ̣ܵܐ ܐܘܼܡܵܢܵܐ: ܝܵܕܲܥ ܠܡܸܥܒܲܕ݂ ܒܕܲܗܒ̣ܵܐ ܘܲܒ̣ܟܸܣܦܵܐ: ܘܒܲܢܚܵܫܵܐ: ܘܲܒ̣ܦܲܪܙܠܵܐ: ܘܲܒ̣ܟܹܐܦܹ̈ܐ: ܘܲܒ̣ܩܲܝܣܹ̈ܐ: ܘܒܲܐܪܓ̇ܘܵܢܵܐ: ܘܲܒ̣ܬܸܟ݂ܠ̱ܬ̣ܵܐ: ܘܲܒ̣ܒ̣ܘܼܨܵܐ: ܘܲܒ̣ܣܵܣܓܵܘܢܵܐ: ܘܒܸܐܣܦܝܼܢܝܼܩܵܐ: ܠܡܸܥܒܲܕ݂ ܩܠܝܼ̈ܕܹܐ ܠܬܲܪ̈ܥܹܐ: ܘܲܠܡܸܥܒܲܕ݂ ܟܠ ܐܘܼܡܵܢܘܼ: ܕܐܸܬ̣̱ܝܼܗܸܒ̣ ܠܹܗ ܡ̣ܢ ܩܕ݂ܵܡ ܡܵܪܝܵܐ: ܡ̣ܢ ܚܲܟ̇ܝܼܡܲܝ̈ܟ ܘܚܲܟ̇ܝܼܡܵܘ̈ܗܝ ܕܡܵܪܲܢ ܕܵܘܝܼܕ݂ ܐܲܒ̣ܘܼܟ݂.

¹⁵ܘܐܵܦ ܗܵܫܵܐ ܚܸܛܹ̈ܐ: ܘܲܣܥܵܪܹ̈ܐ: ܘܡܸܫܚܵܐ: ܘܚܲܡܪܵܐ: ܕܐܸܡܲܪ ܡܵܪܝ ܠܲܡܫܲܕܵܪܘܼ ܠܥܲܒ̣ܕܵܘ̈ܗܝ: ܢܫܲܕܲܪ.

¹⁶ܘܲܚܢܲܢ ܢܸܦܣܘܿܩ ܐܲܪ̈ܙܹܐ ܡ̣ܢ ܠܸܒ̣ܢܵܢ ܐܲܝܟ݂ ܨܸܒ̣ܝܵܢܵܟ݂: ܘܐܲܝܟ݂ ܡܘܼܫ̈ܚܵܬ̣ܵܟ݂. ܘܢܲܝܬܹ̇ܐ ܐܸܢܘܿܢ ܠܵܟ݂. ܘܢܲܪܡܹܐ ܐܸܢܘܿܢ ܒܝܲܡܵܐ ܕܝܘܿܦܹܐ. ܘܐܲܢ̄ܬ̇ ܬܲܣܸܩ ܐܸܢܘܿܢ ܠܐܘܿܪܸܫܠܸܡ.

¹⁷ܘܟܲܢܸܫ ܫܠܹܝܡܘܿܢ ܟܠ ܓܲܒ̣ܪܹ̈ܐ ܓܝܼܘܿܪܹ̈ܐ ܕܲܗܘ̤ܵܘ ܒܐܲܪܥܵܐ ܕܝܼܣܪܵܝܹܠ: ܒܵܬܲܪ ܡܸܢܝܵܢܵܐ ܕܲܡܢ̣ܵܐ ܐܸܢܘܿܢ ܕܵܘܝܼܕ݂ ܐܲܒ̣ܘܼܗܝ.

¹⁸ܘܐܸܫܟܲܚ ܡܵܐܐ ܘܚܲܡܫܝܼܢ ܐܲܠܦ̈ܝܼܢ ܘܲܬ̣ܠܵܬ̣ܵܐ ܐܲܠܦ̈ܝܼܢ: ܘܫܸܬ̣ܡܵܐܐ. ܘܲܥܒܲܕ݂ܘ ܡܸܢܗܘܿܢ ܫܠܹܝܡܘܿܢ ܡܠܟܵܐ: ܫܲܒ̣ܥܝܼܢ ܐܲܠܦ̈ܝܼܢ ܫܵܩܠܲܝ̈ ܩܘܿܦܹ̈ܐ: ܘܲܬ̣ܡܵܢܐܝܼܢ ܐܲܠܦ̈ܝܼܢ ܦܵܣܘܿܠܹ̈ܐ ܒܛܘܼܪܵܐ: ܘܲܬ̣ܠܵܬ̣ܵܐ ܐܲܠܦ̈ܝܼܢ ܘܫܸܬ̣ܡܵܐܐ ܩܲܝܘܼ̈ܡܹܐ ܕܡܲܥܒ̇ܕ݂ܝܼܢ ܠܥܲܡܵܐ.