Read Aramaic Peshita 2 Chronicles 20 Bible Online

2 Chronicles 20 - Aramaic Peshita bible

2 Chronicles 20

¹ܘܲܗܘ̤ܵܐ ܡ̣ܢ ܒܵܬܲܪ ܗܵܠܹܝܢ: ܐܸܬ̣ܵܘ ܒܢܲܝ̈ ܡܘܼܐܵܒ̣: ܘܲܒ̣ܢܲܝ̈ ܥܲܡܘܿܢ: ܘܥܲܡܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ: ܠܡܸܥܒܲܕ݂ ܩܪܵܒ̣ܵܐ ܥܲܡ ܝܵܗܘܿܫܵܦܵܛ.

²ܘܐܸܬ̣ܵܘ: ܘܚܵܘܝܼܘ ܠܝܵܗܘܿܫܵܦܵܛ: ܘܐܵܡ̇ܪܝܼܢ ܠܹܗ: ܐܸܬ̣ܵܐ ܥܠܲܝܟ ܚܲܝܠܵܐ ܣܲܓ̇ܝܼ: ܡ̣ܢ ܥܸܒ̣ܪܵܐ ܕܝܲܡܵܐ ܣܘܼܡܵܩܵܐ. ܗܵܐ ܗܸܢܘܿܢ ܫܪܹܝܢ ܒܐܝܼܪܝܼܚܘܿ: ܗ̤ܝ ܗ̄ܝ̣ ܥܹܝܢ ܓܵܕ݂.

³ܘܲܕ݂ܚܸܠ ܘܐܲܪܝܼܡ ܝܵܗܘܿܫܵܦܵܛ ܐܲܦܵܘ̈ܗܝ ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ. ܘܲܓ̣ܙܲܪ ܨܵܘܡܵܐ ܥܲܠ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܘܐܸܡܲܪ ܠܗܘܿܢ: ܐܸܬ̣ܟܲܢܲܫܘ: ܘܬ̣ܵܘ ܢܸܒ̣ܥܸܐ ܡ̣ܢ ܡܵܪܝܵܐ ܐܲܠܵܗܲܢ.

⁴ܘܐܸܬ̣ܟܲܢܲܫܘ: ܘܐܸܬ̣ܵܘ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܘܐܵܦ ܡ̣ܢ ܩܘܼܪ̈ܝܵܐ ܪ̈ܲܚܝܼܩܵܬ̣ܵܐ ܘܐܸܬ̣ܵܘ ܠܡܸܒ̣ܥܵܐ ܡ̣ܢ ܡܵܪܝܵܐ.

⁵ܘܩܵܡ̣ ܝܵܗܘܿܫܵܦܵܛ ܒܓ̣ܵܘ ܥܲܡܵܐ ܕܲܝܗܘܼܕ݂ܵܐ: ܒܓ̣ܵܘ ܒܲܝܬܹ̇ܗ ܕܡܵܪܝܵܐ ܕܐܝܼܬ̣ ܒܐܘܿܪܸܫܠܸܡ: ܩܕ݂ܵܡ ܬܲܪܥܵܐ ܚܲܕ݂ܬ̣ܵܐ.

⁶ܘܨܲܠܝܼ: ܘܗܵܟܲܢܵܐ ܐܸܡܲܪ: ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ: ܐܲܢ̄ܬ̇ ܗ̄ܘ̣ ܐܲܠܵܗܵܐ ܒܲܫܡܲܝܵܐ ܘܐܲܢ̄ܬ̇ ܫܲܠܝܼܛ ܐܲܢ̄ܬ̇ ܒܟ݂ܠܗܹܝܢ ܡܲܠ̈ܟ̇ܘܵܬ̣ܵܐ ܕܥܵܠܡܵܐ. ܘܕ݂ܝܼܠܵܟ݂ ܗ̄ܘ̣ ܚܲܝܠܵܐ ܘܓܲܢ̄ܒܵܪܘܼܬ̣ܵܐ. ܘܐܸܢܵܐ ܩܵܐܹ̇ܡ ܐ̄ܢܵܐ ܩܕ݂ܵܡܲܝܟ ܡܨܲܠܹܐ ܐ̄ܢܵܐ.

⁷ܘܐܲܢ̄ܬ̇ ܗ̄ܘ̣ ܐܲܠܵܗܲܢ ܐܵܘܒ̇ܕ̇ܬ ܥܵܡܘܿܪܹ̈ܝܗ̇ ܕܐܲܪܥܵܐ ܗܵܕܹܐ: ܩܕ݂ܵܡ ܝܼܣܪܵܝܹܠ. ܘܝܲܗ̄ܒ̣ܬܵܗ̇ ܠܙܲܪܥܹܗ ܕܐܲܒ̣ܪܗܵܡ ܪܵܚܡܵܟ݂: ܠܥܵܠܲܡ.

⁸ܘܝܼܬܸܒ̣ܘ ܒܵܗ̇. ܘܲܒ̣ܢܵܘ ܒܵܗ̇ ܡܲܩܕ̇ܫܵܐ ܠܲܫܡܵܟ݂: ܘܐܵܡ̇ܪܝܼܢ.

⁹ܡܸܟܹ̇ܝܠ ܕܡܲܩܕ̇ܫܵܐ ܐܝܼܬ̣ ܒܲܝܢܵܬܲܢ: ܠܵܐ ܐܵܬ̣ܝܵܐ ܥܠܲܝܢ ܒܝܼܫܬܵܐ: ܘܐܵܦܠܵܐ ܚܲܪܒܵܐ: ܘܐܵܦ ܠܵܐ ܕܝܼܢܵܐ: ܘܐܵܦܠܵܐ ܡܵܘܬܵܢܵܐ: ܘܐܵܦܠܵܐ ܟܲܦܢܵܐ. ܘܢܹܐܬܹܐ ܘܲܢܩܘܼܡ ܩܕ݂ܵܡ ܒܲܝܬܵܐ ܗܵܢܵܐ: ܘܲܩܕ݂ܵܡܲܝܟ. ܡܸܛܠ ܕܲܫܡܵܟ݂ ܐܸܬ̣ܩܪܝܼ ܒܒܲܝܬܵܐ ܗܵܢܵܐ. ܘܢܹܐܬܹܐ ܘܲܢܨܲܠܹܐ ܩܕ݂ܵܡܲܝܟ ܒܒܲܝܬܵܐ ܗܵܢܵܐ. ܘܬܸܫܡܲܥ ܒܩܵܠܵܐ ܕܲܨܠܘܿܬܲܢ: ܘܬܸܦ̱ܪܩܲܢ.

¹⁰ܘܐܵܦ ܗܵܫܵܐ ܗܵܐ ܒܢܲܝ̈ ܥܲܡܘܿܢ: ܘܛܘܼܪܵܐ ܪܲܓ̣ܒܸܠ: ܘܡܘܼܐܵܒ̣: ܕܠܵܐ ܝܲܗ̄ܒ̣ܬ̇ ܐܸܢܘܿܢ ܠܝܼܣܪܵܝܹܠ ܠܡܸܬ̣ܚܲܠܵܛܘܼ ܥܲܡܗܘܿܢ. ܡܸܛܠ ܕܡ̣ܢ ܐܲܪܥܵܐ ܕܡܸܨܪܹܝܢ ܐܲܦܸܩܬ̇ ܐܸܢܘܿܢ. ܘܐܲܦܪܸܩ̣ܬ̇ ܫܘܼܥܒܵܕ݂ܵܐ ܕܡܸܨܪ̈ܵܝܹܐ ܡܸܢܗܘܿܢ.

¹¹ܘܗܵܐ ܗܸܢܘܿܢ ܦܵܪܥܝܼܢ ܠܲܢ ܚܘܼܒ̣ܠܲܢ ܘܐܵܬܹ̇ܝܢ ܕܢܲܦܩܘܼܢܵܢ ܡ̣ܢ ܝܵܪܬ̇ܘܼܬ̣ܵܟ݂ ܕܐܵܘܪܸܬ̇ܬ̣ܵܢ.

¹²ܡܵܪܝܵܐ ܐܲܠܵܗܲܢ ܐܸܬ̣ܓܲܠܚ ܘܕ݂ܘܼܢ ܐܸܢܘܿܢ: ܡܸܛܠ ܕܠܲܝܬ̇ ܒܲܢ ܚܲܝܠܵܐ ܠܲܡܩܵܡ ܩܕ݂ܵܡܲܝܗܘܿܢ. ܐܲܝܬܵܐ ܥܠܲܝܗܘܿܢ ܚܲܪܒܵܐ ܕܕ݂ܝܼܢܵܟ݂. ܘܲܚܢܲܢ ܠܵܐ ܝܵܕ݂ܥܝܼܢܲܢ ܡܵܢܵܐ ܢܸܥܒܸ̇ܕ݂ ܡܸܛܠ ܕܥܲܝܢܲܝ̈ܟ ܥܠܲܝܟ ܫܩ̈ܝܼܠܵܢ.

¹³ܘܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܩܵܝ̇ܡܝܼܢ ܗ̄ܘ̣ܵܘ ܩܕ݂ܵܡ ܡܵܪܝܵܐ: ܘܐܵܦ ܛܠܵܝܲܝ̈ܗܘܿܢ: ܘܢܸܫܲܝ̈ܗܘܿܢ: ܘܲܒ̣ܢܲܝ̈ܗܘܿܢ: ܘܲܒ̣̈ܢܵܬ̣ܗܘܿܢ.

¹⁴ܘܲܚܙܵܐܹܝܠ ܒܲܪ ܙܟܲܪܝܵܐ: ܒܲܪ ܒܢܵܝܵܐ: ܒܲܪ ܝܘܿܝܵܕ݂ܵܥ: ܒܲܪ ܡܬܲܢܝܵܐ. ܠܹܘܵܝܹ̈ܐ: ܡ̣ܢ ܒܢܵܘ̈ܗܝ ܕܐܵܣܵܦ: ܫܪܵܬ̤ ܥܠܵܘܗܝ ܪܘܼܚܵܐ ܕܓܲܢ̄ܒܵܪܘܼܬ̣ܵܐ: ܡ̣ܢ ܩܕ݂ܵܡ ܡܵܪܝܵܐ. ܘܗ̤ܘ ܩܵܐܹ̇ܡ ܗ̄ܘ̣ܵܐ ܩܕ݂ܵܡ ܥܲܡܵܐ ܕܝܼܣܪܵܝܹܠ.

¹⁵ܘܐܸܡܲܪ: ܫܡܲܥ ܟܠܹܗ ܝܼܗܘܼܕ݂ܵܐ: ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܘܡܲܠ̈ܟܵܐ ܝܵܗܘܿܫܵܦܵܛ ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܟ݂ܘܿܢ. ܐܲܢ̄ܬ̇ܘܿܢ ܠܵܐ ܬܸܕ݂ܚ̄ܠܘܼܢ: ܘܠܵܐ ܬܙܘܼܥܘܼܢ: ܡ̣ܢ ܩܕ݂ܵܡ ܚܲܝܠܵܐ ܗܵܢܵܐ ܣܲܓ̇ܝܼܵܐܐ. ܡܸܛܠ ܕܠܵܐ ܗ̄ܘ̣ܵܐ ܕܝܼܠܟ݂ܘܿܢ ܩܪܵܒ̣ܵܐ. ܕܡܵܪܝܵܐ ܗ̄ܘ̣ ܓܹܝܪ ܩܪܵܒ̣ܵܐ.

¹⁶ܐܸܣܬܲܪܗܲܒ̣ܘ: ܘܚܘܿܬ̣ܘ ܥܠܲܝܗܘܿܢ ܗܵܐ ܗܸܢܘܿܢ ܣܵܠܩܝܼܢ ܒܡܲܣܩܵܢܵܐ ܕܨܲܦܪܵܐ. ܘܬܸܫܟ̇ܚܘܼܢ ܐܸܢܘܿܢ ܒܲܫܩܝܼܦܵܐ ܕܢܲܚܠܵܐ: ܩܕ݂ܵܡ ܡܲܕ݂ܒ̇ܪܵܐ. ܘܗܸܢܘܿܢ ܣܵܠܩܝܼܢ ܠܡܸܬ̣ܟܲܬܵܫܘܼ ܥܲܡܟ݂ܘܿܢ.

¹⁷ܘܲܒ̣ܗܵܝ ܫܵܥܬ̣ܵܐ ܩܘܼܡܝ ܘܲܚܙܵܘ ܦܘܼܪܩܵܢܵܐ ܕܥܵܒܹܕ݂ ܡܵܪܝܵܐ ܥܲܡܟ݂ܘܿܢ: ܕܒܹܝܬ̣ ܝܼܗܘܼܕ݂ܵܐ: ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܠܵܐ ܬܸܕ݂ܚ̄ܠܘܼܢ: ܐܵܦܠܵܐ ܬܙܘܼܥܘܼܢ ܡܚܵܪ ܦܘܿܩܘ ܩܕ݂ܵܡܲܝܗܘܿܢ. ܘܐܲܕ݂ܘܿܢܲܝ ܡܵܪܹܐ ܡܵܪ̈ܵܘܵܬ̣ܵܐ ܢܸܗܘܹܐ ܒܥܸܕ݂ܪ̱ܟ݂ܘܿܢ.

¹⁸ܘܲܢܦܲܠ ܝܵܗܘܿܫܵܦܵܛ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ ܘܲܣܓܸܕ݂. ܘܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܢܦܲܠ̣ܘ ܣܓܸܕ݂ܘ ܩܕ݂ܵܡ ܡܵܪܝܵܐ.

¹⁹ܘܩܵܡ̣ܘ ܠܹܘܵܝܹ̈ܐ ܡ̣ܢ ܒܢܲܝ̈ ܩܵܗܵܬ̣: ܘܡ̣ܢ ܒܢܲܝ̈ ܩܘܿܪܚ: ܠܲܡܫܲܒܵܚܘܼ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܒܩܵܠܵܐ ܪܵܡܵܐ.

²⁰ܘܩܲܕܸ̇ܡ̣ܘ ܒܨܲܦܪܵܐ: ܘܲܢܦܲܩܘ ܠܡܲܕ݂ܒ̇ܪܵܐ ܕܲܬ̣ܩܘܿܥ ܘܟܲܕ݂ ܢܦܲܩܘ: ܩܵܡ̣ ܝܵܗܘܿܫܵܦܵܛ: ܘܐܸܡܲܪ: ܫܘܼܡܥܘܼܢܝ ܕܒܹܝܬ̣ ܝܼܗܘܼܕ݂ܵܐ: ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܘܗܲܝܡܸܢܘ ܒܡܵܪܝܵܐ ܐܲܠܵܗܟ݂ܘܿܢ: ܘܬܸܬ̣ܗܲܝܡܢܘܿܢ ܗܲܝܡܸܢܘ ܒܲܢܒ̣ܝܼܘ̈ܗܝ: ܘܬܸܬ̣ܦܲܪܩܘܿܢ.

²⁴ܘܲܝܗܘܼܕ݂ܵܐ ܐܸܬ̣ܵܐ ܠܹܗ ܠܛܘܼܪܵܐ ܕܕ݂ܵܘܩܹ̈ܐ ܕܡܲܕ݂ܒ̇ܪܵܐ ܘܲܚܙܵܘ ܘܗܵܐ ܟܠܗܘܿܢ ܦܲܓ̣ܪ̈ܲܝܗܘܿܢ ܡܝܼܬ̣ܝܼܢ: ܘܲܪܡܹܝܢ ܥܲܠ ܐܲܪܥܵܐ ܘܠܵܐ ܐܝܼܬ̣ ܐ̄ܢܵܫ ܕܲܦܠܲܛ ܡܸܢܗܘܿܢ.

²⁵ܘܐܸܬ̣ܵܐ ܝܵܗܘܿܫܵܦܵܛ ܘܥܲܡܵܐ ܕܝܼܣܪܵܝܹܠ: ܠܡܸܒܲܙ ܒܸܙܲܬ̣ܗܘܿܢ ܘܐܸܫܟܲܚܘ ܒܗܘܿܢ ܒܸܙܬ̣ܵܐ ܣܘܿܓ̣ܵܐܐ ܕܛܵܒ̣: ܘܩܸܢܝܵܢܵܐ ܘܲܦܓ̣ܘܼ̈ܕܹܐ: ܘܪ̈ܲܟ݂ܫܵܐ: ܘܡܵܐܢܹ̈ܐ ܕܪܸܓ̇ܬ̣ܵܐ. ܘܲܫܩܲܠܘ ܠܗܘܿܢ ܡܸܕܸ̇ܡ ܕܲܨܒ̣ܵܘ.

²⁶ܘܲܗܘ̤ܵܐ ܒܵܬܲܪ ܬܠܵܬ̣ܵܐ ܝܵܘ̈ܡܝܼܢ: ܟܲܕ݂ ܒܲܙܘ ܒܸܙܬ̣ܵܐ: ܡܸܛܠ ܕܣܲܓ̇ܝܼܵܐܐ ܗ̄ܘ̣ܵܬ̣ ܛܵܒ̣: ܘܲܒ̣ܝܵܘܡܵܐ ܕܐܲܪܒ̇ܥܵܐ ܐܸܬ̣ܟܲܢܲܫܘ ܠܲܦܩܲܥܬ̣ܵܐ ܕܒ̣ܘܼܪܟ̇ܬ̣ܵܐ ܡܸܛܠ ܕܬܲܡܵܢ ܒܲܪܸܟ݂ܘ ܠܡܵܪܝܵܐ ܐܲܠܵܗܵܐ. ܡܸܛܠ ܗܵܢܵܐ ܐܸܬ̣ܩܪܝܼ ܫܡܵܗ̇ ܕܕ݂ܘܼܟ̇ܬ̣ܵܐ ܗܵܝ̇ ܒܘܼܪܟ̇ܬ̣ܵܐ ܥܕܲܡܵܐ ܠܝܵܘܡܵܢܵܐ.

²⁷ܘܲܗܦܲܟ݂ܘ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܠܐܘܿܪܸܫܠܸܡ: ܘܝܵܗܘܿܫܵܦܵܛ ܒܪܹܫܲܝܗܘܿܢ ܡܸܛܠ ܕܐܵܬܹ̇ܝܢ ܗ̄ܘ̣ܵܘ ܓܹܝܪ ܠܐܘܿܪܸܫܠܸܡ ܒܚܲܕ݂ܘܼܬ̣ܵܐ. ܡܸܛܠ ܕܚܲܕ̇ܝܼ ܐܸܢܘܿܢ ܡܵܪܝܵܐ ܡ̣ܢ ܒܥܸܠܕ̇ܒ̣ܵܒܲܝ̈ܗܘܿܢ.

²⁸ܘܐܸܬ̣ܵܘ ܠܐܘܿܪܸܫܠܸܡ: ܒܬܸܫܒ̇ـ̈ـܚܵܬ̣ܵܐ: ܘܲܒ̣ܟܸܢܵܪܹ̈ܐ: ܘܲܒ̣ܩܲܪ̈ܢܵܬ̣ܵܐ ܟܦܝܼ̈ܦܵܬ̣ܵܐ ܘܲܦܫ̈ܝܼܛܵܬ̣ܵܐ. ܘܐܸܬ̣ܵܘ ܠܒܲܝܬܹ̇ܗ ܕܡܵܪܝܵܐ.

²⁹ܘܢܸܦܠܲܬ̤ ܕܸܚ̱ܠܬܹܗ ܕܡܵܪܝܵܐ ܥܲܠ ܟܠܗܹܝܢ ܡܕ݂ܝܼ̈ܢܵܬ̣ܵܐ: ܘܥܲܠ ܡܲܠ̈ܟ̇ܘܵܬ̣ܗܹܝܢ: ܟܲܕ݂ ܫ̣ܡܲܥ ܕܡܵܪܝܵܐ ܡܸܬ̣ܟܲܬܲܫ ܥܲܡ ܒܥܸܠܕ̇ܒ̣ܵܒ̣ܵܘ̈ܗܝ ܕܝܼܣܪܵܝܹܠ.

³⁰ܘܐܸܬ̇ܬ̇ܢܝܼܚܲܬ̤ ܡܲܠܟ̇ܘܼܬܹܗ ܕܝܵܗܘܿܫܵܦܵܛ ܘܐܲܢܝܼܚܹܗ ܡܵܪܝܵܐ ܡ̣ܢ ܚܕ݂ܵܪ̈ܵܘܗܝ.

³¹ܘܐܲܡ̣ܠܸܟ݂ ܝܵܗܘܿܫܵܦܵܛ ܥܲܠ ܝܼܗܘܼܕ݂ܵܐ. ܒܲܪ ܬܠܵܬ̣ܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܝܵܗܘܿܫܵܦܵܛ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܥܸܣܪܝܼܢ ܘܚܲܡܸܫ ܫܢ̈ܝܼܢ: ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܐ ܕܐܸܡܹܗ ܥܪܘܿܒ̣ܵܐ ܒܲܪܬ̣ ܫܲܠܚܝܼ.

³²ܘܗܲܠܸܟ݂ ܒܟ݂ܠܗܹܝܢ ܐܘܼܪ̈ܚܵܬܹܗ ܕܐܵܣܵܐ ܐܲܒ̣ܘܼܗܝ. ܘܠܵܐ ܗ̣ܦܲܟ݂ ܡܸܢܗܹܝܢ ܠܡܸܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ.

³³ܒܲܠܚܘܿܕ݂ ܥܠܵـ̈ـܘܵܬ̣ܵܐ ܠܵܐ ܐܲܥܒܲܪ: ܥܕܲܡܵܐ ܠܗܵܫܵܐ. ܘܥܲܡܵܐ ܠܵܐ ܐܸܬ̣ܩܸܢܘ ܠܸܒ̇ܗܘܿܢ ܠܐܲܠܵܗܵܐ ܕܐܲܒ̣ܵܗܵܬ̣̈ܗܘܿܢ.

³⁴ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܵܗܘܿܫܵܦܵܛ ܩܲܕ݂ܡܵܝܹ̈ܐ ܘܐܲܚܪ̈ܵܝܹܐ ܗܵܐ ܗܸܢܘܿܢ ܟܬ̣ܝܼܒ̣ܝܼܢ ܒܦܸܬ̣ܓ̣ܵܡܵܘܗܝ ܕܝܵܗܘܿ ܒܲܪ ܚܢܲܢ: ܕܲܟ݂ܬ̣ܝܼܒ̣ ܒܲܣܦܲܪ ܡܲܠܟܲܝ̈ ܝܼܣܪܵܝܹܠ.

³⁵ܘܒ̣ܵܬܲܪ ܗܵܠܹܝܢ ܐܸܬ̣ܩܲܪܲܒ̣ ܝܵܗܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ: ܠܘܵܬ̣ ܐܸܚܲܙܝܵܐ ܡܲܠܟܵܐ ܕܝܼܣܪܵܝܹܠ: ܗܵܘ̇ ܪܲܫܝܼܥܵܐ: ܕܐܲܣܓ̇ܝܼ ܠܡܸܥܒܲܕ݂ ܒܝܼܫܵܬ̣ܵܐ ܡ̣ܢ ܟܠܗܘܿܢ ܡܲܠ̈ܟܹ̇ܐ ܕܝܼܣܪܵܝܹܠ.

³⁶ܘܐܸܬ̣ܩܲܪܲܒ̣ ܠܘܵܬܹܗ ܠܡܸܥܒܲܕ݂ ܣܦܝܼܢܹ̈ܐ ܕܐܵܙܵܠ̄ـ̈ـܢ ܠܬܲܪܫܝܼܫ ܘܲܥܒܲܕ݂ܘ ܣܦܝܼܢܹ̈ܐ ܒܥܹܨܝܼܢܘܿ ܓܒܲܪ ܡܕ݂ܝܼܢ̄ܬܵܐ.

³⁷ܘܐܸܬ̣ܢܲܒ̇ܝܼ ܐܹܠܝܼܥܵܙܲܪ ܒܲܪܕܵܕܹܗ ܒܡܹܐܪܫܵܐ ܡܕ݂ܝܼܢ̄ܬܵܐ: ܥܲܠ ܝܵܗܘܿܫܵܦܵܛ: ܘܐܸܡܲܪ ܠܹܗ. ܒܫܵܘܬܵܦܘܼܬ̣ܵܟ݂ ܕܥܲܡ ܐܹܚܲܙܝܵܐ: ܩܲܠܩܸܠ ܡܵܪܝܵܐ ܟܠܗܘܿܢ ܥܒ̣ܵܕܲܝ̈ܟ ܘܐܸܬ̇ܬܲܒܲܪ ܣܦܝܼܢܹ̈ܐ: ܘܠܵܐ ܐܸܫܟܲܚ ܠܡܹܐܙܲܠ ܠܬܲܪܫܝܼܫ.