Read Aramaic Peshita 2 Chronicles 21 Bible Online

2 Chronicles 21 - Aramaic Peshita bible

2 Chronicles 21

¹ܘܲܫܟܸܒ̣ ܝܵܗܘܿܫܵܦܵܛ ܥܲܡ ܐܲܒ̣ܵـ̈ـܗܵܬܹܗ: ܘܐܸܬ̣ܩܒܲܪ ܠܘܵܬ̣ ܐܲܒ̣ܵـ̈ـܗܵܬܹܗ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܘܩܵܡ ܒܡܲܠܟ̇ܘܼܬ̣ܵܐ ܝܵܗܘܿܪܵܡ ܒܪܹܗ ܒܵܬ̣ܪܹܗ.

²ܘܠܹܗ ܐܝܼܬ̣ ܗ̄ܘ̣ܵܐ ܐܲܚܹ̈ܐ ܒܢܲܝ̈ ܝܵܗܘܿܫܵܦܵܛ ܘܗܵܠܹܝܢ ܫܡܵܗܲܝ̈ܗܘܿܢ: ܥܲܙܲܪܝܵܐ: ܢܲܚܝܵܐܹܝܠ: ܙܟܲܪܝܵܐ ܥܲܙܲܪܝܵܐ: ܡܲܠܟܵܐܹܝܠ: ܫܦܲܛܝܵܐ. ܗܵܠܹܝܢ ܟܠܗܘܿܢ ܒܢܵܘ̈ܗܝ ܕܝܵܗܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ.

³ܘܝܲܗ̄ܒ̣ ܠܗܘܿܢ ܐܲܒ̣ܘܼܗܘܿܢ ܡܵܘ̈ܗܒ̣ܵܬ̣ܵܐ ܣܲܓ̇ܝܼ: ܟܸܣܦܵܐ ܘܕܲܗܒ̣ܵܐ: ܘܡܵܘ̈ܗܒ̣ܵܬ̣ܵܐ ܣܲܓ̇ܝܼ̈ܐܵܬ̣ܵܐ: ܘܩܘܼܪ̈ܝܵܐ ܥܲܫ̈ܝܼܢܵܬ̣ܵܐ ܕܲܝܗܘܼܕ݂ܵܐ ܘܡܲܠܟ̇ܘܼܬ̣ܵܐ ܐܸܬ̣ܝܲܗ̄ܒܲܬ̤ ܠܝܵܗܘܿܪܵܡ ܡܸܛܠ ܕܗ̤ܘܝܘܼ ܗܘ̤ܵܐ ܒܪܹܗ ܩܲܫܝܼܫܵܐ.

⁴ܘܩܵܡ̣ ܝܵܗܘܿܪܵܡ ܥܲܠ ܡܲܠܟ̇ܘܼܬ̣ܵܐ ܕܐܲܒ̣ܘܗܝ. ܘܐܸܬ̣ܓܲܢ̄ܒܲܪ: ܘܩܲܛܸܠ ܠܟ݂ܠܗܘܿܢ ܐܲܚܵܘ̈ܗܝ ܒܲܩܪܵܒ̣ܵܐ: ܘܐܵܦ ܡ̣ܢ ܩܲܫܝܼ̈ܫܹܐ ܕܝܼܣܪܵܝܹܠ ܩܲܛܸܠ.

⁵ܘܒܲܪ ܬܠܵܬ̣ܝܼܢ ܗ̄ܘ̣ܵܐ ܘܬܲܪܬܹ̇ܝܢ ܫܢܝܼ̈ܢ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܬ̣ܡܵܢܹܐ ܫܢܝܼ̈ܢ ܐܲܡ̣ܠܸܟ݂ ܒܐܘܿܪܸܫܠܸܡ.

⁶ܘܗܲܠܸܟ݂ ܒܐܘܼܪ̈ܚܵܬ̣ܵܐ ܕܡܲܠ̈ܟܹ̇ܐ ܕܝܼܣܪܵܝܹܠ: ܐܲܝܟܲܢܵܐ ܕܲܥܒܲܕ݂ܘ ܕܒܹܝܬ̣ ܐܵܚܵܒ̣ ܡܸܛܠ ܕܚܵܬܹܗ ܕܐܵܚܵܒ̣ ܗܘ̤ܵܬ̣ ܠܹܗ ܐܲܢܬ̇ܬ̣ܵܐ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ.

⁷ܘܠܵܐ ܨܒ̣ܵܐ ܡܵܪܝܵܐ ܠܲܡܚܲܒܵܠܘܼ ܒܲܝܬܹ̇ܗ ܕܕ݂ܵܘܝܼܕ݂: ܡܸܛܠ ܡܵܘܡܵܬ̣ܵܐ ܕܝܼܡܵܐ ܠܕ݂ܵܘܝܼܕ݂: ܠܡܸܬܲܠ ܠܹܗ ܫܪܵܓ̣ܵܐ ܢܲܗܝܼܪܵܐ: ܘܠܲܒ̣ܢܵܘ̈ܗܝ ܟܠܗܘܿܢ ܝܵܘ̈ܡܵܬ̣ܵܐ.

⁸ܒܝܵܘ̈ܡܵܬܹܗ ܡܪܲܕ݂ܘ ܐܲܕ݂ܘܿܡܵܝܹ̈ܐ: ܡ̣ܢ ܬܚܹܝܬ̣ ܐܝܼܕ݂ܵܐ ܕܲܝܗܘܼܕ݂ܵܐ. ܘܐܲܩܝܼܡܘ ܥܠܲܝܗܘܿܢ ܡܲܠܟܵܐ.

⁹ܘܲܥܒܲܪ ܝܵܗܘܿܪܵܡ ܥܲܡ ܪܵܘ̱ܪ̈ܒ̣ܵܢܵܘܗܝ: ܘܟ݂ܠܗܘܿܢ ܙܵܘܓܵܘ̈ܗܝ ܥܲܡܹܗ. ܘܲܗܘ̤ܵܐ ܕܟܲܕ݂ ܩܵܡ̣ ܒܠܸܠܝܵܐ: ܚܪܲܒ̣ ܠܐܲܕ݂ܘܿܡܵܝܹ̈ܐ. ܘܐܸܬ̣ܵܘ ܠܘܵܬܹܗ ܪܵܘ̱ܪ̈ܒ̣ܵܢܹܐ ܕܙܵܘ̈ܓܹ̇ܐ.

¹⁰ܘܲܡ̣ܪܲܕ݂ܘ ܐܲܕ݂ܘܿܡܵܝܹ̈ܐ ܡ̣ܢ ܬܚܹܝܬ̣ ܐܝܼܕ݂ܵܐ ܕܲܝܗܘܼܕ݂ܵܐ: ܠܝܵܘܡܵܢܵܐ ܗܵܝܕܹ̇ܝܢ ܡܪܲܕ݂ܘ ܐܲܕ݂ܘܿܡܵܝܹ̈ܐ ܕܝܵܬ̣ܒ̇ܝܼܢ ܒܠܸܒ̣ܢܵܐ: ܒܙܲܒ̣ܢܵܐ ܗܵܘ̇ ܡ̣ܢ ܬܚܹܝܬ̣ ܐܝܼܕܹܗ. ܡܸܛܠ ܕܲܫܒܲܩ ܠܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܹܗ.

¹¹ܘܐܵܦ ܗ̤ܘ ܥܒܲܕ݂ ܥܠܵـ̈ـܘܵܬ̣ܵܐ ܒܛܘܼܪܵܐ ܕܲܝܗܘܼܕ݂ܵܐ. ܘܚܲܡܪܵܐ ܐܲܫܩܝܼ ܠܲܢܙܝܼܪܹ̈ܝܗ̇ ܕܐܘܿܪܸܫܠܸܡ ܘܒܲܕܲܪ ܠܲܕ݂ܒܹܝܬ̣ ܝܼܗܘܼܕ݂ܵܐ.

¹²ܘܐܲܝܬ̇ܝܼ ܠܘܵܬܹܗ ܡ̣ܢ ܦܸܬ̣ܓ̣ܵܡܹ̈ܐ ܕܐܹܠܝܼܵܐ ܢܒ̣ܝܼܵܐ: ܕܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܹܗ ܕܕ݂ܵܘܝܼܕ݂ ܐܲܒ̣ܘܼܟ݂: ܚܠܵܦ ܕܠܵܐ ܗܲܠܸܟ݂ܬ̇ ܒܐܘܼܪ̈ܚܵܬܹܗ ܕܝܵܗܘܿܫܵܦܵܛ ܐܲܒ̣ܘܼܟ݂: ܘܒ̣ܐܪ̈ܚܵܬܹܗ ܕܐܵܣܵܐ ܡܲܠܟܵܐ ܕܲܝܗܘܼܕ݂ܵܐ.

¹³ܘܗܲܠܸܟ݂ܬ̇ ܠܵܟ݂ ܒܐܘܼܪ̈ܚܵܬ̣ܵܐ ܕܡܲܠ̈ܟܹ̇ܐ ܕܝܼܣܪܵܝܹܠ: ܘܐܲܛܥܝܼܬ̇ ܠܲܝܗܘܼܕ݂ܵܐ ܘܲܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܒܙܵܢܝܘܼܬ̣ܵܐ ܕܒܹܝܬ̣ ܐܵܚܵܒ̣ ܘܐܵܦ ܠܐܲܚܲܝ̈ܟ ܒܢܲܝ̈ ܐܲܒ̣ܘܼܟ݂ ܕܛܵܒ̣ܝܼܢ ܡܸܢܵܟ݂ ܩܲܛܸܠܬ̇.

¹⁴ܗܵܐ ܡܵܪܝܵܐ ܡܵܚܹ̇ܐ ܠܵܟ݂ ܡܚܘܿܬ̣ܵܐ ܪܲܒ̇ܬ̣ܵܐ: ܘܲܠܥܲܡܵܟ݂: ܘܠܲܒ̣ܢܲܝ̈ܟ ܘܢܸܫܲܝ̈ܟ: ܘܲܠܟ݂ܠܗܘܿܢ ܢܸܟ݂ܣܲܝ̈ܟ.

¹⁵ܘܐܲܢ̄ܬ̇ ܒܟ݂ܘܼܪܗܵܢܵܐ ܣܲܓ̇ܝܼܵܐܐ ܬܡܘܼܬ̣. ܘܲܒ̣ܬܲܫܢܝܼܩܵܐ ܪܲܒܵܐ ܬܹܐܒܲܕ݂: ܥܕܲܡܵܐ ܠܐܲܝܟܵܐ ܕܢܸܦܩܘܼܢ ܡܥܲܝ̈ܟ ܡ̣ܢ ܟܘܼܪܗܵܢܵܟ݂ ܘܲܫܢ̈ܝܼܢ ܣܲܓ̇ܝܼܵܐ̈ܢ ܒܬܲܫܢܝܼܩܵܐ ܬܸܦܸܠ.

¹⁶ܘܲܢܥܝܼܪ ܡܵܪܝܵܐ ܥܲܠ ܝܵܗܘܿܪܵܡ ܪܘܼܚܵܐ ܕܲܦܠܸܫܬܵܝܹ̈ܐ: ܘܲܕ݂ܥܲܪ̈ܒ̣ܵܝܹܐ ܕܲܫܪܹܝܢ ܒܹܝܬ̣ ܗܸܢ̈ܕ̇ܘܵܝܹܐ.

¹⁷ܘܢܸܣܩܘܼܢ ܥܲܠ ܝܼܗܘܼܕ݂ܵܐ: ܘܢܸܚܪܒ̣ܘܼܢ ܐܸܢܘܿܢ. ܘܢܲܗܦ̄ܟ݂ܘܼܢ ܟܠܵܗ̇ ܫܒ̣ܝܼܬ̣ܵܐ ܕܐܸܫܬܲܟ݂ܚܲܬ̤ ܠܒܹܝܬ̣ ܡܲܠܟܵܐ: ܘܐܵܦ ܒܢܵܘ̈ܗܝ ܘܢܸܫܵܘ̈ܗܝ ܘܠܵܐ ܢܸܫܬ̇ܒܸܩ ܠܹܗ ܒܪܵܐ ܕܸܟ݂ܪܹ̈ܐ: ܐܸܠܵܐ ܐܸܢ ܐܹܚܲܙܝܵܐ ܒܪܹܗ ܙܥܘܿܪܵܐ.

¹⁸ܡ̣ܢ ܒܵܬܲܪ ܟܠܗܹܝܢ ܗܵܠܹܝܢ: ܡܚܘܿܬ̣ܵܐ ܬܸܗܘܹܐ ܒܲܡܥܵܘ̈ܗܝ ܘܲܒ̣ܟ݂ܘܼܪܗܵܢܵܐ ܣܲܓ̇ܝܼܵܐܐ ܢܡܘܼܬ̣ ܘܐܵܣܝܘܼܬ̣ܵܐ ܠܵܐ ܬܸܗܘܹܐ ܠܹܗ.

¹⁹ܘܲܗܘ̤ܵܐ ܡ̣ܢ ܒܵܬܲܪ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ: ܟܲܕ݂ ܫܸܠܡܲܬ̤ ܡܸܠܬܹܗ ܕܲܢܒ̣ܝܼܵܐ: ܠܲܫܢ̈ܝܼܢ ܬܲܪܬܹ̇ܝܢ: ܢܦܲܩ̣ܘ ܡܥܵܘ̈ܗܝ ܡ̣ܢ ܟܘܼܪܗܵܢܹܗ. ܘܡܝܼܬ̣ ܒܟ݂ܘܼܪܗܵܢܵܐ ܒܝܼܫܵܐ: ܘܠܵܐ ܥܒܲܕ݂ ܠܹܗ ܐܝܼܩܵܪܵܐ ܥܲܡܵܐ: ܐܲܝܟܲܢܵܐ ܕܲܥܒܲܕ݂ܘ ܠܐܲܒ̣ܵـ̈ـܗܵܬܹܗ.

²⁰ܒܲܪ ܬܠܵܬ̣ܝܼܢ ܗ̄ܘ̣ܵܐ ܘܬܲܪܬܹ̇ܝܢ ܫܢ̈ܝܼܢ. ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܬ̣ܡܵܢܹܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܐܸܙܲܠ ܕܠܵܐ ܪܸܓ̇ܬ̣ܵܐ. ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܐܲܒ̣ܘܼܗܝ: ܘܠܵܐ ܒܲܩܒ̣ܘܼܪܬܵܐ ܕܡܲܠ̈ܟܹ̇ܐ.