Read Aramaic Peshita 2 Chronicles 23 Bible Online

2 Chronicles 23 - Aramaic Peshita bible

2 Chronicles 23

¹ܒܫܲܢ̄ܬܵܐ ܫܒ̣ܝܼܥܵܝܬܵܐ: ܐܸܬ̣ܓܲܢ̄ܒܲܪ ܝܘܿܝܵܕ݂ܵܥ. ܘܲܕ݂ܒܲܪ ܠܪܵܘ̱ܪ̈ܒ̣ܵܢܹܐ ܕܡܲܐ̈ܘܵܬ̣ܵܐ: ܠܥܲܙܪܝܵܐ ܒܲܪ ܝܲܪܚܘܿܡ: ܘܠܐܝܼܫܡܵܥܹܝܠ ܒܲܪ ܝܘܿܚܲܢܵܢ: ܘܲܠܥܲܙܲܪܝܵܐ ܒܲܪ ܥܘܿܒ̣ܝܼܕ݂: ܘܠܲܫܡܲܥܝܵܐ ܒܲܪ ܥܲܕ̇ܘܿ: ܘܠܹܐܠܝܼܫܵܦܵܛ ܒܲܪ ܙܲܟ݂ܪܝܼ.

²ܘܥܲܠ̣ܘ ܟܠܗܘܿܢ ܗܵܠܹܝܢ ܒܡܵܘ̈ܡܵܬ̣ܵܐ: ܕܢܸܬ̣ܟܲܪܟ̇ܘܿܢ ܒܲܝܗܘܼܕ݂ܵܐ. ܘܟܲܢܸܫܘ ܐܸܢܘܿܢ ܠܠܹܘܵܝܹ̈ܐ: ܡ̣ܢ ܟܠܗܹܝܢ ܩܘܼܪ̈ܝܵܐ ܕܲܝܗܘܼܕ݂ܵܐ: ܘܪܹ̈ܫܹܐ ܕܐܲܒ̣ܵـ̈ـܗܵܬ̣ܵܐ ܕܝܼܣܪܵܝܹܠ. ܘܐܸܬ̣ܵܘ ܠܐܘܿܪܸܫܠܸܡ.

³ܘܝܼܡܵܘ ܟܠܹܗ ܥܲܡܵܐ ܒܡܵܘ̈ܡܵܬ̣ܵܐ: ܒܒܲܝܬܹ̇ܗ ܕܡܵܪܝܵܐ ܩܕ݂ܵܡ ܡܲܠܟܵܐ. ܘܐܸܡܲܪ ܠܗܘܿܢ: ܗܵܐ ܒܲܪ ܡܲܠܟܵܐ: ܗ̤ܘ ܢܩܘܼܡ ܥܠܲܝܟ̇ܘܿܢ: ܐܲܝܟܲܢܵܐ ܕܡܲܠܸܠ ܡܵܪܝܵܐ ܥܲܡ ܕܵܘܝܼܕ݂ ܥܲܒ̣ܕܹ̇ܗ.

⁴ܗܵܢܵܐ ܦܸܬ̣ܓ̣ܵܡܵܐ ܬܸܥܒ̇ܕ݂ܘܼܢ. ܦܸܠܓܵܐ ܡܸܢܟ݂ܘܿܢ ܒܡܲܥܵܠܲܝ̈ ܫܲܒ̇ܬ̣ܵܐ ܕܟ݂ܵܗ̈ܢܹܐ ܘܲܕ݂ܠܹܘܵܝܹ̈ܐ: ܘܲܕ݂ܢܵܛܪ̈ܲܝ ܬܲܪ̈ܥܹܐ.

⁵ܘܬ̣ܘܼܠܬܵܐ ܒܹܝܬ̣ ܡܲܠܟܵܐ: ܘܬ̣ܘܼܠܬܵܐ ܒܬܲܪܥܵܐ ܕܛܲܒܵܚܹ̈ܐ ܘܟ݂ܠܹܗ ܥܲܡܵܐ ܢܵܛ̇ܪܝܼܢ ܒܕ݂ܵܪܬܵܐ ܕܒܹܝܬ̣ ܡܵܪܝܵܐ.

⁶ܘܠܵܐ ܢܸܗܘܹܐ ܐ̄ܢܵܫ ܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ: ܐܸܢܵܐ ܟܵܗܢܹ̈ܐ ܘܠܹܘܵܝܹ̈ܐ ܗܸܢܘܿܢ ܢܸܥܠܘܼܢ: ܡܸܛܠ ܕܩܲܕ̇ܝܼܫܝܼܢ ܐܸܢܘܿܢ. ܘܟ݂ܠܹܗ ܥܲܡܵܐ ܢܵܛ̇ܪܝܼܢ ܡܲܛܲܪܬܵܐ ܕܒܲܝܬܹ̇ܗ ܕܡܵܪܝܵܐ.

⁷ܘܢܸܩܦܘܼܢ ܠܹܘܵܝܹ̈ܐ ܠܡܲܠܟܵܐ: ܟܲܕ݂ ܚܕ݂ܝܼܪܝܼܢ ܠܹܗ: ܓܒܲܪ ܘܡܵܐܢܲܝ̈ ܙܲܝܢܹܗ ܒܐܝܼܕܹܗ. ܘܲܕ݂ܢܸܥܘܿܠ ܠܒܲܝܬܵܐ ܓܵܘܵܝܵܐ: ܢܡܘܼܬ̣ ܘܲܗܘ̤ܵܘ ܠܘܵܬ̣ ܡܲܠܟܵܐ ܒܡܲܥܠܹܗ ܘܲܒ̣ܡܲܦܩܹܗ.

⁸ܘܲܥܒܲܕ݂ ܠܹܘܵܝܹ̈ܐ ܘܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܐܲܝܟܲܢܵܐ ܕܦܲܩܸܕ݂ ܐܸܢܘܿܢ ܝܘܿܝܵܕ݂ܵܥ ܟܵܗܢܵܐ. ܘܲܕ݂ܒܲܪ ܓܲܒ̣ܪܵܐ ܠܚܲܒ̣ܪܹܗ: ܐܲܝܠܹܝܢ ܕܢܵܛ̇ܪܝܼܢ ܗ̄ܘ̣ܵܘ ܒܡܲܥܵܠܲܝ̈ ܫܒ̇ܬ̣ܵܐ: ܥܲܡ ܐܲܝܠܹܝܢ ܕܢܵܛ̇ܪܝܼܢ ܗ̄ܘ̣ܵܘ ܒܡܲܦܵܩܲܝ̈ ܫܲܒ̇ܬ̣ܵܐ ܡܸܛܠ ܕܫܵܪܹܐ ܗ̄ܘ̣ܵܐ ܐܸܢܘܿܢ ܝܘܿܝܵܕ݂ܵܥ ܟܵܗܢܵܐ ܡ̣ܢ ܡܲܛܪ̈ܵܬ̣ܗܘܿܢ.

⁹ܘܝܲܗ̄ܒ̣ ܝܘܿܝܵܕ݂ܵܥ ܟܵܗܢܵܐ ܠܪܵܘ̱ܪ̈ܒ̣ܵܢܹܐ ܕܡܲܐ̈ܘܵܬ̣ܵܐ: ܪ̈ܘܼܡܚܹܐ ܘܣܲܟ̇ܪܹ̈ܐ: ܘܫܲܠܛܹ̈ܐ ܕܡܲܠܟܵܐ ܕܵܘܝܼܕ݂: ܕܐܝܼܬ̣ ܗ̄ܘ̣ܵܐ ܒܒܲܝܬܹ̇ܗ ܕܡܵܪܝܵܐ.

¹⁰ܘܩܵܡ̣ ܟܠܹܗ ܥܲܡܵܐ: ܓܒܲܪ ܠܓܲܒܹ̇ܗ ܕܒܲܝܬܵܐ ܕܣܸܡܵܠܵܐ ܠܡܲܕ݂ܒ̇ܚܵܐ ܘܲܠܒܲܝܬܵܐ: ܘܚܲܕ݂ܪܘܼܗܝ ܠܡܲܠܟܵܐ.

¹¹ܘܐܲܦܸܩ̣ܘ ܠܒܲܪ ܡܲܠܟܵܐ: ܘܝܲܗ̄ܒ̣ܘ ܒܪܹܫܹܗ ܬܵܓ̣ܵܐ ܘܚܘܼܕ݂ܪܵܐ. ܘܐܲܩܝܼܡܘܼܗܝ ܒܡܲܠܟ̇ܘܼܬ̣ܵܐ. ܘܡܲܫܚܘܼܗܝ ܝܘܿܝܵܕ݂ܵܥ ܘܲܒ̣ܢܵܘ̈ܗܝ: ܘܐܵܡ̇ܪܝܼܢ ܢܸܚܹܐ ܡܲܠܟܵܐ.

¹²ܘܫܸܡܥܲܬ̤ ܥܬ̣ܵܠܝܵܐ ܩܵܠܵܐ ܕܥܲܡܵܐ ܕܚܵܕܹ̇ܐ: ܘܲܡܫܲܒ̇ܚܝܼܢ ܠܡܲܠܟܵܐ. ܘܐܸܬ̣ܵܬ̤ ܠܘܵܬ̣ ܡܲܠܟܵܐ ܠܒܲܝܬܹ̇ܗ ܕܡܵܪܝܵܐ.

¹³ܘܚܵܙܝܵܐ: ܘܗܵܐ ܡܲܠܟܵܐ ܩܵܐܹ̇ܡ ܥܲܠ ܐܸܣܛܘܿܪܵܐ: ܐܲܝܟ݂ ܢܵܡܘܿܣܵܐ ܕܡܲܠ̈ܟܹ̇ܐ: ܘܩܲܪ̈ܢܵܬ̣ܵܐ ܟܦܝܼ̈ܦܵܬ̣ܵܐ ܘܲܦܫܝܼ̈ܛܵܬ̣ܵܐ: ܩܵܪ̈ܝܵܢ ܩܕ݂ܵܡ ܡܲܠܟܵܐ. ܘܟ݂ܠܹܗ ܥܲܡܵܐ ܚܵܕܹܝܢ: ܘܲܡܝܲܒ̇ܒ̣ܝܼܢ ܒܩܲܪ̈ܢܵܬ̣ܵܐ: ܘܲܡܫܲܒ̇ܚܝܼܢ ܒܬܸܫ̈ܒ̇ܚܵܬ̣ܵܐ ܘܣܲܕ̇ܩܲܬ̤ ܥܬܲܠܝܵܐ ܢܲܚ̈ܬܹ̇ܝܗ̇: ܘܐܵܡܪܵܐ: ܟܲܕܵܒ̣ܘܼܬ̣ܵܐ: ܟܲܕܵܒ̣ܘܼܬ̣ܵܐ.

¹⁴ܘܲܦܩܲܕ݂ ܝܘܿܝܵܕ݂ܵܥ ܟܵܗܢܵܐ ܠܪ̈ܲܒܲܝ ܡܵܐ̈ܘܵܬ̣ܵܐ: ܕܫܲܠܝܼܛܝܼܢ ܥܲܠ ܚܲܝܠܵܐ: ܘܐܸܡܲܪ ܠܗܘܿܢ: ܐܲܦܩܘܼܗ̇ ܠܒܲܪ ܡ̣ܢ ܣܸܕ݂ܪܹ̈ܐ. ܘܡܲܢ ܕܥܵܐܹ̇ܠ ܒܵܬ̣ܪܵܗ̇: ܢܸܬ̣ܩܛܸܠ ܒܚܲܪܒܵܐ. ܡܸܛܠ ܕܐܸܡܲܪ ܟܵܗܢܵܐ: ܠܵܐ ܒܒܲܝܬܹ̇ܗ ܕܡܵܪܝܵܐ.

¹⁵ܘܲܥܒܲܕ݂ܘ ܠܵܗ̇ ܕܘܼܟ̇ܬ̣ܵܐ: ܘܥܸܠܲܬ̤ ܒܐܘܼܪܚܵܐ ܕܡܲܥܠܵܢܵܐ ܕܪ̈ܲܟ݂ܫܵܐ: ܘܡܝܼܬܲܬ̤ ܬܲܡܵܢ.

¹⁶ܘܝܼܡܵܐ ܝܘܿܝܵܕ݂ܵܥ ܒܡܵܘܡܵܬ̣ܵܐ ܒܲܝܢܵܘ̈ܗܝ ܠܒܹܝܬ̣ ܟܠܹܗ ܥܲܡܵܐ: ܘܒܹܝܬ̣ ܡܲܠܟܵܐ: ܠܡܸܗܘܵܐ ܥܲܡܵܐ ܠܡܵܪܝܵܐ.

¹⁷ܘܥܲܠ̣ܘ ܟܠܹܗ ܥܲܡܵܐ ܕܝܼܣܪܵܝܹܠ: ܠܒܹܝܬ̣ ܒܲܥܠܵܐ. ܘܥܲܩܪܘܼܗܝ ܘܲܥܠܵـ̈ـܘܵܬܹܗ ܬܲܒܲܪܘ ܫܲܦܝܼܪ ܘܨܲܠܡܵܘ̈ܗܝ ܕܲܩܸܩܘ ܘܟ݂ܘܼܡܪܵܐ ܕܒܲܥܠܵܐ ܩܲܛܠܘܼܗܝ ܩܕ݂ܵܡ ܡܲܕ݂ܒ̇ܚܵܐ.

¹⁸ܘܲܥܒܲܕ݂ ܝܘܿܝܵܕ݂ܵܥ ܫܲܠܝܼܛܵܢܹ̈ܐ ܒܒܲܝܬܹ̇ܗ ܕܡܵܪܝܵܐ: ܘܟ݂ܵܗܢܹ̈ܐ ܘܠܹܘܵܝܹ̈ܐ ܕܦܲܠܸܓ̣ ܕܵܘܝܼܕ݂: ܕܢܸܗܘܘܿܢ ܢܵܛܘܿܪܹ̈ܐ ܥܲܠ ܒܲܝܬܹ̇ܗ ܕܡܵܪܝܵܐ: ܠܡܲܣܵܩܘܼ ܥܠܵـ̈ـܘܵܬ̣ܵܐ: ܐܲܝܟ݂ ܕܲܟ݂ܬ̣ܝܼܒ̣ ܒܐܘܿܪܵܝܬܹ̇ܗ ܕܡܘܼܫܹܐ: ܒܚܲܕ݂ܘܼܬ̣ܵܐ ܘܲܒ̣ܬܸܫܒ̇ـ̈ـܚܵܬ̣ܵܐ ܥܲܠ ܐܝܼܕ݂ܵܘ̈ܗܝ ܕܕ݂ܵܘܝܼܕ݂.

¹⁹ܘܲܢܩܘܼܡܘܼܢ ܢܵܛܪ̈ܲܝ ܬܲܪ̈ܥܹܐ ܥܲܠ ܬܲܪ̈ܥܹܐ ܕܒܲܝܬܹ̇ܗ ܕܡܵܪܝܵܐ: ܕܠܵܐ ܢܸܥܠܘܼܢ ܠܬܲܡܵܢ ܡܣܲܝܒܹ̈ܐ.

²⁰ܘܲܢܣܲܒ̣ܘ ܪܹ̈ܫܲܝ ܡܲܐ̈ܘܵܬ̣ܵܐ: ܫܲܠܝܼܛܹ̈ܐ ܕܥܲܡܵܐ: ܘܟ݂ܠܹܗ ܥܲܡܵܐ ܕܐܲܪܥܵܐ. ܘܐܸܬ̣ܵܘ ܒܓ̣ܵܘ ܬܲܪܥܵܐ ܥܲܠ ܟܘܼܪܣܝܵܐ ܕܡܲܠܟ̇ܘܼܬ̣ܵܐ.

²¹ܘܚܵܕܹܝܢ ܟܠܹܗ ܥܲܡܵܐ ܕܐܲܪܥܵܐ. ܘܲܒ̣ܩܲܪ̈ܢܵܬ̣ܵܐ ܡܫܲܒ̇ܚܝܼܢ: ܘܠܲܥܬܲܠܝܵܐ ܩܛܲܠܘ ܒܚܲܪܒܵܐ.