Read Aramaic Peshita 2 Chronicles 26 Bible Online

2 Chronicles 26 - Aramaic Peshita bible

2 Chronicles 26

¹ܘܲܕ݂ܒܲܪܘ ܟܠܹܗ ܥܲܡܵܐ ܕܲܝܗܘܼܕ݂ܵܐ ܠܥܘܿܙܝܼܵܐ ܒܪܹܗ. ܒܲܪ ܫܸܬ̇ܬܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ. ܘܐܲܩܝܼܡܘܼܗܝ ܒܡܲܠܟ̇ܘܼܬ̣ܵܐ: ܒܵܬܲܪ ܐܲܒ̣ܘܼܗܝ ܐܵܡܘܿܨܝܼܵܐ.

²ܗ̤ܘ ܒܢ̣ܵܐ ܠܐܲܝܠܲܬ̣: ܘܦܲܢܝܵܗ̇ ܠܲܕ݂ܒܹܝܬ̣ ܝܼܗܘܼܕ݂ܵܐ: ܡ̣ܢ ܒܵܬܲܪ ܕܲܫܟܸܒ̣ ܡܲܠܟܵܐ ܥܲܡ ܐܲܒ̣ܵـ̈ـܗܵܬܹܗ.

³ܥܘܿܙܝܼܵܐ ܒܲܪ ܫܸܬ̇ܬܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܚܲܡܫܝܼܢ ܘܬܲܪܬܹ̇ܝܢ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܐ ܕܐܸܡܹܗ ܐܹܠܥܵܣܵܐ ܡ̣ܢ ܐܘܿܪܸܫܠܸܡ.

⁴ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܐܲܝܟܲܢܵܐ ܕܲܥܒܲܕ݂ ܕܵܘܝܼܕ݂ ܐܲܒ̣ܘܼܗܝ.

⁵ܘܲܗܘ̤ܵܐ ܡܨܲܠܹܐ ܩܕ݂ܵܡܵܘܗܝ: ܒܝܵܘ̈ܡܲܝ ܙܟܲܪܝܵܐ: ܕܲܗܘ̤ܵܐ ܡܦܝܼܣ ܠܹܗ ܒܕܸܚ̱ܠܬܹܗ ܕܡܵܪܝܵܐ. ܘܲܗܘ̤ܵܐ ܡܵܪܝܵܐ ܡܲܬ̣ܩܸܢ ܟܠܗܹܝܢ ܐܘܼܪ̈ܚܵܬܹܗ.

⁶ܘܲܢܦܲܩ ܘܐܸܬ̣ܟܲܬܲܫ ܥܲܡ ܦܠܸܫܬܵܝܹ̈ܐ. ܘܲܬ̣ܪܲܥ ܫܘܼܪܵܐ ܕܓ̣ܵܬ̣ ܘܲܕ݂ܥܵܐܙܵܐ ܘܕܲܐܫܕ̇ܘܿܕ݂.

⁷ܘܲܗܘ̤ܵܐ ܐܵܙܹ̇ܠ ܫܡܹܗ: ܥܕܲܡܵܐ ܠܐܲܪܥܵܐ ܕܡܸܨܪܹܝܢ. ܡܸܛܠ ܕܡܲܣܓܹ̇ܐ ܗ̄ܘ̣ܵܐ ܠܡܸܥܒܲܕ݂ ܩܪܵܒ̣ܵܐ.

⁸ܘܲܒ̣ܢܵܐ ܠܹܗ ܥܘܿܙܝܼܵܐ ܡܲܓ̣̈ܕ̇ܠܹܐ ܒܐܘܿܪܸܫܠܸܡ: ܥܲܠ ܬܲܪܥܵܐ ܕܙܵܘܝܼܬ̣ܵܐ: ܘܥܲܠ ܬܲܪܥܵܐ ܡܲܥ̱ܪܒ̣ܵܝܵܐ. ܘܲܚܙܲܩ̣ ܐܸܢܘܿܢ ܒܩܲܪ̈ܢܵܬ̣ܗܘܿܢ ܒܲܩܠܝܼܕܹ̈ܐ ܕܦܲܪܙܠܵܐ.

¹¹ܘܲܗܘ̤ܵܘ ܠܥܘܿܙܝܼܵܐ: ܓܲܒ̣ܪܹ̈ܐ ܓܲܢ̄ܒܵܪ̈ܲܝ ܚܲܝܠܵܐ ܥܵܒ̣ܕܲܝ̈ ܩܪܵܒ̣ܵܐ.

¹²ܒܡܸܢܝܵܢܵܐ ܬܠܵܬ̣ܝܼܢ ܘܲܬ̣ܪܹܝܢ ܐܲܠܦ̈ܝܼܢ ܘܫܸܬ̣ܡܵܐܐ.

¹³ܘܐܲܚܪ̈ܵܢܹܐ ܥܲܡܪ̈ܲܝ ܕܲܒ̣ܪܵܐ ܗܘ̤ܵܘ ܠܹܗ ܬܠܵܬ̣ܡܵܐܐ ܐܲܠܦ̈ܝܼܢ. ܘܓܲܒ̣ܪܹ̈ܐ ܐܵܣܪ̈ܲܝ ܣܲܝܦܵܐ: ܗܘ̤ܵܘ ܠܹܗ ܫܲܒ̣ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ.

¹⁴ܕܲܗܘ̤ܵܘ ܩܵܝ̇ܡܝܼܢ ܟܠ ܝܘܿܡ: ܘܢܵܛ̇ܪܝܼܢ ܠܡܲܠܟܵܐ.

¹⁵ܘܲܢܦܲܩ̣ ܫܡܹܗ ܒܟ݂ܠܗܹܝܢ ܡܕ݂ܝܼ̈ܢܵܬ̣ܵܐ: ܥܕܲܡܵܐ ܕܐܲܣܓ̇ܝܼ ܗ̄ܘ̣ܵܐ ܠܡܸܥܬܲܪ.

¹⁶ܘܟܲܕ݂ ܥܬܲܪ ܗ̄ܘ̣ܵܐ ܒܢܸܟ݂ܣܹ̈ܐ: ܐܸܬ̇ܬ̇ܪܝܼܡܲܬ̣ ܪܘܼܚܹܗ ܛܵܒ̣. ܘܟܲܕܸ̇ܒ̣ ܒܡܵܪܝܵܐ ܐܲܠܵܗܹܗ. ܘܥܲܠ ܗ̄ܘ̣ܵܐ ܠܗܲܝܟ̇ܠܵܐ ܕܡܵܪܝܵܐ ܠܡܲܣܵܩܘܼ ܩܲܛܪ̈ܘܿܩܹܐ ܕܒܸܣܡܹ̈ܐ.

¹⁷ܘܥܲܠ ܗ̄ܘ̣ܵܐ ܒܵܬ̣ܪܹܗ ܥܘܿܙܝܼܵܐ ܟܵܗܢܵܐ: ܘܐܸܡܲܪ ܠܹܗ.

¹⁸ܠܵܐ ܗ̄ܘ̣ܵܬ̣ ܕܝܼܠܵܟ݂ ܡܲܠܟܵܐ ܕܘܼܟ̇ܬ̣ܵܐ. ܘܐܵܦܠܵܐ ܘܵܠܹܐ ܠܵܟ݂ ܕܬܲܣܸܩ ܒܸܣܡܹ̈ܐ ܥܲܠ ܡܲܕ݂ܒ̇ܚܵܐ.

¹⁹ܘܒ̣ܵܗ̇ ܒܫܵܥܬ̣ܵܐ ܐܸܙܕ̇ܥܸܦ ܥܘܿܙܝܼܵܐ ܡܲܠܟܵܐ ܥܲܠ ܟܵܗܢܹ̈ܐ. ܘܲܦܩܲܕ݂ ܕܢܲܦܩܘܼܢ ܐܸܢܘܿܢ ܡ̣ܢ ܒܹܝܬ̣ ܡܲܩܕ̇ܫܵܐ. ܘܒ̣ܵܗ̇ ܒܫܵܥܬ̣ܵܐ ܗܵܝ̇: ܓܲܪܒܵܐ ܢܦܲܩ̣ ܡ̣ܢ ܒܹܝܬ̣ ܡܲܩܕ̇ܫܵܐ. ܘܲܢܦܲܠ ܥܲܠ ܒܹܝܬ̣ ܥܲܝܢܵܘ̈ܗܝ ܕܡܲܠܟܵܐ ܥܘܿܙܝܼܵܐ: ܟܲܕ݂ ܥܲܠ ܠܲܡܩܲܪܵܒ̣ܘܼ ܒܸܣܡܹ̈ܐ ܒܒܲܝܬܹ̇ܗ ܕܡܵܪܝܵܐ.

²⁰ܘܐܸܬ̣ܦܢܝܼ ܠܘܵܬܹܗ ܥܘܿܙܝܼܵܐ ܟܵܗܢܵܐ ܘܫܲܪܟܵܐ ܕܟ݂ܵܗܢܹ̈ܐ. ܘܲܚܙ̣ܵܘ ܕܡܸܣܬܲܪܗܲܒ̣ ܗ̄ܘ̣ܵܐ ܠܡܸܦܲܩ: ܡܸܛܠ ܕܝܼܕܲܥ̣ ܕܲܡܚܵܝܗܝ ܡܵܪܝܵܐ.

²¹ܘܲܗܘ̤ܵܐ ܥܘܿܙܝܼܵܐ ܡܲܠܟܵܐ ܝܵܬܹܒ̣ ܒܓܲܪܒܹ̇ܗ ܥܕܲܡܵܐ ܠܡܵܘܬܹ̇ܗ. ܘܝܵܬܹܒ̣ ܗ̄ܘ̣ܵܐ ܒܒܲܝܬܵܐ ܕܲܚܕ݂ܵܝܘܼܬ̣ܵܐ ܟܲܕ݂ ܓܪܸܫ. ܡܸܛܠ ܕܓܲܕܸ̇ܦ ܗ̄ܘ̣ܵܐ ܥܲܠ ܒܲܝܬܹ̇ܗ ܕܡܵܪܝܵܐ. ܘܝܘܿܬ̣ܵܡ ܒܪܹܗ ܫܲܠܝܼܛ ܗ̄ܘ̣ܵܐ ܥܲܠ ܒܲܝܬܹ̇ܗ ܕܡܲܠܟܵܐ: ܘܕ݂ܵܐܹ̇ܢ ܗ̄ܘ̣ܵܐ ܠܥܲܡܵܐ ܕܐܲܪܥܵܐ.

²²ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܥܘܿܙܝܼܵܐ: ܩܲܕ݂ܡܵܝܹ̈ܐ ܘܐܲܚܪ̈ܵܝܹܐ: ܗܵܐ ܗܸܢܘܿܢ ܟܬ̣ܝܼܒ̣ܝܼܢ ܒܐܹܫܲܥܝܵܐ ܒܪܹܗ ܕܐܵܡܘܿܨ ܢܒ̣ܝܼܵܐ.

²³ܘܲܫܟܸܒ̣ ܥܘܿܙܝܼܵܐ ܥܲܡ ܐܲܒ̣ܵـ̈ـܗܵܬܹܗ. ܘܩܲܒ̣ܪܘܼܗܝ ܒܹܝܬ̣ ܩܒ̣ܘܼܪܹ̈ܐ: ܠܵܐ ܒܲܩܒ̣ܘܼܪܬܵܐ ܕܡܲܠ̈ܟܹ̇ܐ. ܡܸܛܠ ܕܐܵܡ̇ܪܝܼܢ ܕܓܲܪܒܵܐ ܗ̄ܘ̣. ܘܐܲܡ̣ܠܸܟ݂ ܝܘܿܬ̣ܵܡ ܒܪܹܗ ܒܵܬ̣ܪܹܗ.