Read Aramaic Peshita 2 Chronicles 27 Bible Online

2 Chronicles 27 - Aramaic Peshita bible

2 Chronicles 27

¹ܒܲܪ ܥܸܣܪܝܼܢ ܘܚܲܡܸܫ ܫܢ̈ܝܼܢ ܝܘܿܬ̣ܵܡ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܫܸܬ̇ܬܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܐ ܕܐܸܡܹܗ: ܝܹܪܘܿܫܵܐ ܒܲܪܬ̣ ܨܵܕ݂ܘܿܩ.

²ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܐܲܝܟܲܢܵܐ ܕܲܥܒܲܕ݂ ܥܘܿܙܝܼܵܐ ܐܲܒ̣ܘܼܗܝ ܒܲܠܚܘܿܕ݂ ܠܵܐ ܥܲܠ ܠܒܲܝܬܹ̇ܗ ܕܡܵܪܝܵܐ. ܘܲܥܕܲܡܵܐ ܠܗܵܫܵܐ ܥܲܡܵܐ ܡܚܲܒ̇ܠܝܼܢ ܗ̄ܘ̣ܵܘ.

³ܘܗ̤ܘ ܒܢ̣ܵܐ ܬܲܪܥܵܐ ܕܒܲܝܬܹ̇ܗ ܕܡܵܪܝܵܐ ܥܸܠܵܝܵܐ. ܘܐܵܦ ܒܫܘܼܪܵܐ ܕܐܸܬ̣ܓ̇ܡܲܪ: ܒܢ̣ܵܐ ܣܲܓ̇ܝܼ ܛܵܒ̣.

⁴ܘܩܘܼܪ̈ܝܵܐ ܒܢ̣ܵܐ ܒܐܲܪܥܵܐ ܕܲܝܗܘܼܕ݂ܵܐ ܘܲܒ̣ܚܲܪܫܲܬ̣ ܒܢ̣ܵܐ ܒܝܼܪ̈ܵܬ̣ܵܐ ܘܡܲܓܕ̇ܠܹ̈ܐ.

⁵ܘܗ̤ܘ ܐܸܬ̣ܟܲܬܲܫ ܗ̄ܘ̣ܵܐ ܥܲܡ ܥܲܡܵܐ ܕܲܒ̣ܢܲܝ̈ ܥܲܡܘܿܢ: ܘܐܸܬ̇ܬܲܩܲܦ ܥܠܲܝܗܘܿܢ. ܘܝܲܗ̄ܒ̣ܘ ܠܹܗ ܒܢܲܝ̈ ܥܲܡܘܿܢ ܒܫܲܢ̄ܬܵܐ ܗܵܝ̇: ܡܵܐܐ ܟܲܟ̇ܪ̈ܝܼܢ ܕܟܸܣܦܵܐ: ܘܥܸܣܪܵܐ ܐܲܠܦ̈ܝܼܢ ܟܘܿܪܹ̈ܐ ܕܚܸܛܹ̈ܐ: ܘܥܸܣܪܵܐ ܐܲܠܦ̈ܝܼܢ ܟܘܿܪܹ̈ܐ ܕܲܣܥܵܪܹ̈ܐ. ܗܵܢܵܐ ܟܠܹܗ ܩܘܼܪܒܵܢܵܐ: ܚܫܲܒ̣ܘ ܘܩܲܪܸܒ̣ܘ ܠܹܗ ܒܢܲܝ̈ ܥܲܡܘܿܢ.

⁶ܘܲܒ̣ܫܲܢ̄ܬܵܐ ܕܬܲܪܬܹ̇ܝܢ ܘܕܲܬ̣ܠܵܬ̣: ܐܸܬ̣ܥܲܫܲܢ ܝܘܿܬ̣ܵܡ: ܡܸܛܠ ܕܐܲܬ̣ܩܸܢ ܐܘܼܪ̈ܚܵܬܹܗ ܩܕ݂ܵܡ ܡܵܪܝܵܐ ܐܲܠܵܗܹܗ.

⁷ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܬ̣ܵܡ: ܘܟ݂ܠܗܘܿܢ ܩܪ̈ܵܒ̣ܵܘܗܝ ܘܐܘܼܪ̈ܚܵܬܹܗ: ܗܸܢܘܿܢ ܟܬ̣ܝܼܒ̣ܝܼܢ ܥܲܠ ܣܸܦܪܵܐ ܕܡܲܠ̈ܟܹ̇ܐ ܕܝܼܣܪܵܝܹܠ ܘܕܲܝܗܘܼܕ݂ܵܐ.

⁸ܘܲܫܟܸܒ̣ ܝܘܿܬ̣ܵܡ ܥܲܡ ܐܲܒ̣ܸܵܗܵܘ̈ܗܝ. ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܘܐܲܡ̣ܠܸܟ݂ ܐܵܚܵܙ ܒܪܹܗ ܒܵܬ̣ܪܹܗ.