Read Aramaic Peshita 2 Chronicles 31 Bible Online

2 Chronicles 31 - Aramaic Peshita bible

2 Chronicles 31

¹ܘܟܲܕ݂ ܫܲܠܸܡ̣ ܗܵܠܹܝܢ ܟܠܗܹܝܢ: ܢܦܲܩ̣ܘ ܟܠܹܗ ܥܲܡܵܐ ܕܝܼܣܪܵܝܹܠ ܕܐܸܫܬ̇ܟܲܚܘ: ܠܩܘܼܪ̈ܝܵܐ ܕܒܹܝܬ̣ ܝܼܗܘܼܕ݂ܵܐ ܘܬܲܒܲܪܘ ܩܵܝ̈ܡܵܬ̣ܵܐ: ܘܬܲܒܲܪܘ ܢܸܡܪܹ̈ܐ. ܘܲܥܩܲܪܘ ܥܠܵـ̈ـܘܵܬ̣ܵܐ ܕܐܝܼܬ̣ ܒܲܝܗܘܼܕ݂ܵܐ ܘܲܒ̣ܒܸܢܝܵܡܹܝܢ: ܘܒܲܐܦܪܹܝܡ: ܘܒܲܡܢܲܫܹܐ: ܥܕܲܡܵܐ ܠܐܲܝܟܵܐ ܕܲܗܦܲܟ݂ܘ ܝܼܣܪܵܝܹܠ ܘܐܸܬ̣ܵܘ ܟܠܗܘܿܢ ܠܝܵܪܬ̇ܘܼܬ̣ܗܘܿܢ. ܘܥܲܠ̣ܘ ܒܲܫܠܵܡܵܐ ܠܩܘܼܪ̈ܝܼܗܘܿܢ.

²ܘܐܲܩܝܼܡ ܚܹܙܲܩܝܵܐ ܡܲܛܪ̈ܵܬ̣ܵܐ ܕܟ݂ܵܗ̈ܢܹܐ ܘܲܕ݂ܠܹܘܵܝܹ̈ܐ: ܥܲܠ ܡܲܛܪ̈ܵܬ̣ܗܘܿܢ: ܓܲܒ̣ܪܵܐ ܐܲܝܟ݂ ܦܘܼܠܚܵܢܹܗ: ܠܟ݂ܵܗ̈ܢܹܐ ܘܲܠܠܹܘܵܝܹ̈ܐ: ܘܠܲܥܠܵـ̈ـܘܵܬ̣ܵܐ ܘܲܠܫܲܠܡܹ̈ܐ: ܠܲܡܫܲܡܵܫܘܼ ܘܲܠܡܵܘܕܵܝܘܼ ܘܠܲܡܫܲܒܵܚܘܼ ܒܬܲܪܥܵܐ ܕܡܵܪܝܵܐ.

³ܘܝܲܗ̄ܒ̣ ܡܲܠܟܵܐ ܡ̣ܢ ܢܸܟ݂ܣܵܘ̈ܗܝ: ܥܠܵـ̈ـܘܵܬ̣ܵܐ ܕܬ̣ܵܘܪܹ̈ܐ: ܕܨܲܦܪܵܐ ܘܲܕ݂ܪܲܡܫܵܐ: ܘܲܥܠܵـ̈ـܘܵܬ̣ܵܐ ܕܫܲܒܹ̇ܐ: ܘܲܕ݂ܪܹܫ ܝܲܪ̈ܚܹܐ ܘܲܕ݂ܥܹܐܕܹ̈ܐ.

⁴ܘܐܸܡܲܪ ܠܥܲܡܵܐ ܐܲܝܟܲܢܵܐ ܕܲܟ݂ܬ̣ܝܼܒ̣ ܒܢܵܡܘܿܣܹܗ ܕܡܵܪܝܵܐ. ܘܐܸܡܲܪ ܠܝܼܣܪܵܝܹܠ ܕܥܵܡ̇ܪܝܼܢ ܒܐܘܿܪܸܫܠܸܡ: ܠܡܸܬܲܠ ܙܸܕ݂ܩܵܐ ܕܟ݂ܵܗ̈ܢܹܐ ܘܲܕ݂ܠܹܘܵܝܹ̈ܐ: ܡܸܛܠ ܕܚܲܝܸܠ ܐܸܢܘܿܢ ܒܢܵܡܘܿܣܹܗ ܕܡܵܪܝܵܐ.

⁵ܘܟܲܕ݂ ܐܲܣܓ̇ܝܼ ܦܸܬ̣ܓ̣ܵܡܵܐ ܥܲܠ ܝܼܣܪܵܝܹܠ: ܡܲܝܬܹ̇ܝܢ ܗ̄ܘ̣ܵܘ ܪܹ̈ܫܝܵܬ̣ܵܐ ܕܲܥܒ̣ܘܼܪܵܐ: ܘܲܕ݂ܚܲܡܪܵܐ: ܘܲܕ݂ܡܸܫܚܵܐ: ܘܡ̣ܢ ܚܲܝ̈ܘܵܬ̣ܗܘܿܢ: ܘܡ̣ܢ ܥܲܠ̈ܠܵܬ̣ܵܐ ܕܚܲܩܠܵܐ ܘܚܲܕ݂ ܡ̣ܢ ܥܸܣܪܵܐ ܡܲܝܬܹ̇ܝܢ ܗ̄ܘ̣ܵܘ ܣܲܓ̇ܝܼ.

⁶ܘܲܒ̣ܢܲܝ̈ ܝܼܣܪܵܝܹܠ ܘܲܝܗܘܼܕ݂ܵܐ ܕܝܵܬ̣ܒ̇ܝܼܢ ܗ̄ܘ̣ܵܘ ܒܩܘܼܪ̈ܝܵܐ ܕܲܝܗܘܼܕ݂ܵܐ: ܘܐܵܦ ܗܸܢܘܿܢ ܡܲܝܬܹ̇ܝܢ ܗ̄ܘ̣ܵܘ ܚܲܕ݂ ܡ̣ܢ ܥܸܣܪܵܐ: ܡܲܥܣܵܪܹ̈ܐ. ܘܡܲܝܬܹ̇ܝܢ ܗ̄ܘ̣ܵܘ: ܘܲܡܩܲܪܒ̣ܝܼܢ ܗ̄ܘ̣ܵܘ ܠܡܵܪܝܵܐ ܐܲܠܵܗܗܘܿܢ ܡܲܝܬܹ̇ܝܢ ܗ̄ܘ̣ܵܘ ܪܹ̈ܫܝܵܬ̣ܵܐ ܥܲܠ ܪܹ̈ܫܝܵܬ̣ܵܐ: ܕܲܥܒ̣ܘܼܪܵܐ: ܘܲܕ݂ܚܲܡܪܵܐ: ܘܲܕ݂ܡܸܫܚܵܐ: ܘܡ̣ܢ ܚܲܝ̈ܘܵܬ̣ܗܘܿܢ: ܘܡ̣ܢ ܥܲܠ̈ܠܵܬ̣ܵܐ ܕܚܲܩܠܵܐ. ܘܚܲܕ݂ ܡ̣ܢ ܥܸܣܪܵܐ ܡܲܝܬܹ̇ܝܢ ܗ̄ܘ̣ܵܘ: ܘܲܡܩܲܕ̇ܫܝܼܢ ܗ̄ܘ̣ܵܘ ܠܡܵܪܝܵܐ ܐܲܠܵܗܗܘܿܢ.

⁷ܘܲܒ̣ܝܲܪܚܵܐ ܕܲܬ̣ܠܵܬ̣ܵܐ: ܐܸܫܬܲܟ݂ܚܲܬ̣ ܪܹܫܝܼܬ̣ܵܐ ܣܘܿܓ̣ܵܐܐ ܕܛܵܒ̣. ܘܲܒ̣ܝܲܪܚܵܐ ܕܫܲܒ̣ܥܵܐ: ܢܣܲܒ̣ ܚܹܙܲܩܝܵܐ: ܘܦܲܠܓܵܗ̇ ܠܟ݂ܵܗ̈ܢܹܐ ܘܲܠܠܹܘܵܝܹ̈ܐ.

⁸ܘܲܚܙܵܐ ܚܹܙܲܩܝܵܐ ܘܪܵܘ̱ܪ̈ܒ̣ܵܢܹܐ ܠܪܹܫܝܼܬ̣ܵܐ ܗܵܝ̇ ܕܟܵܗ̈ܢܹܐ ܕܣܸܓܝܲܬ̤̱ ܛܵܒ̣: ܘܒܲܪܸܟ݂ܘ ܠܡܵܪܝܵܐ: ܘܨܲܠܝܼܘ ܥܲܠ ܝܼܣܪܵܝܹܠ.

⁹ܘܨܲܠܝܼ ܚܹܙܲܩܝܵܐ ܥܲܠ ܟܵܗܢܹ̈ܐ ܘܥܲܠ ܠܹܘܵܝܹ̈ܐ: ܥܲܠ ܪܹܫܝܼܬ̣ܵܐ ܕܣܸܓ̣ܝܲܬ̤.

¹⁰ܘܲܩ̣ܪܵܐ ܠܹܗ ܠܥܲܙܲܪܝܵܐ ܟܵܗܢܵܐ ܪܲܒܵܐ ܡ̣ܢ ܕܒܹܝܬ̣ ܨܵܕ݂ܘܿܩ. ܘܐܸܡܲܪ ܠܗܘܿܢ: ܫܲܪܝܵܐ ܗ̄ܝ̣ ܠܟ݂ܘܿܢ ܪܹܫܝܼܬ̣ܵܐ ܗܵܕܹܐ ܠܡܸܐܟܲܠ ܡܸܛܠ ܕܲܠܒܲܝܬܹ̇ܗ ܕܡܵܪܝܵܐ ܥܸܠܲܬ̤. ܐܲܟ݂ܘܿܠܘ ܘܣܒܲܥ̣ܘ. ܘܲܕ݂ܝܵܬܲܪ ܡܸܢܵܗ̇: ܗܲܒ̣ܘ ܠܡܸܣܟܹ̇ܢܹ̈ܐ ܘܲܠܒ̣ܵܝܫܹ̈ܐ. ܡܸܛܠ ܕܡܵܪܝܵܐ ܒܲܪܸܟ݂ ܠܥܲܡܹܗ: ܘܝܲܗ̄ܒ̣ ܠܗܘܿܢ ܗܵܢܵܐ ܣܘܿܓ̣ܵܐܐ ܘܕ݂ܝܼܬܲܪ: ܝܲܗ̄ܒ̣ܘ ܠܥܲܡܵܐ ܕܝܼܣܪܵܝܹܠ ܟܠܹܗ.

¹¹ܘܐܸܡܲܪ ܚܹܙܲܩܝܵܐ ܠܲܡܛܲܝܵܒ̣ܘܼ ܕܵܪܹ̈ܐ ܒܒܲܝܬܹ̇ܗ ܕܡܵܪܝܵܐ. ܘܛܲܝܸܒ̣ܘ.

¹²ܘܐܲܝܬ̇ܝܼܘ ܪܹܫܝܼܬ̣ܵܐ: ܚܲܕ݂ ܡ̣ܢ ܥܸܣܪܵܐ: ܘܩܘܼܕ݂ܫܹ̈ܐ ܒܗܲܝܡܵܢܘܼܬ̣ܵܐ. ܘܲܥܠܲܝܗܘܿܢ ܐܝܼܬ̣ ܗ̄ܘ̣ܵܘ ܫܲܠܝܼܛܹ̈ܐ: ܟܢܲܥܢܝܼܵܐ ܠܹܘܵܝܵܐ: ܘܫܲܡܥܝܼ ܐܲܚܘܼܗܝ.

¹³ܘܲܢܚܵܐܹܝܠ: ܘܥܘܿܙܝܼܵܐ: ܘܢܵܚܵܬ̣: ܘܲܥܫܵܐܹܝܠ: ܘܝܲܪܡܘܿܬ̣: ܘܝܘܿܙܵܒ̣ܵܪ: ܘܐܲܠܝܼܠ: ܘܲܣܡܲܟ݂ܝܵܐ: ܘܡܵܬ̣ܵܚ: ܘܲܒ̣ܢܵܝܵܐ: ܘܲܫܡܲܥܝܵܐ ܐܲܚܘܼܗܝ. ܗܵܠܹܝܢ ܟܠܗܘܿܢ ܫܲܠܝܼܛܝܼܢ ܗ̄ܘ̣ܵܘ ܥܲܠ ܐܝܼܕ݂ܵܐ ܕܲܟ݂ܢܲܥܢܝܵܐ: ܐܲܝܟ݂ ܫܘܼܠܛܵܢܵܐ ܕܚܹܙܲܩܝܵܐ ܡܲܠܟܵܐ: ܘܥܲܙܲܪܝܵܐ ܪܲܒ̇ܒܲܝܬܹ̇ܗ ܕܡܲܠܟܵܐ.

¹⁴ܘܩܲܪܝܵܐ ܒܲܪ ܝܲܡܝܼܢܵܐ ܠܹܘܵܝܹ̈ܐ: ܢܵܛܲܪ ܬܲܪܥܵܐ ܡܲܕ݂ܢ̱ܚܵܝܵܐ: ܫܲܠܝܼܛ ܗ̄ܘ̣ܵܐ ܥܲܠ ܩܘܼܪ̈ܒܵܢܹܐ ܕܡܵܪܝܵܐ: ܘܥܲܠ ܩܕ݂ܘܿܫ ܩܘܼܕ݂ܫܹܐ.

¹⁵ܘܠܹܗ ܡܫܲܠܡܝܼܢ ܗ̄ܘ̣ܵܘ ܥܲܕ̇ܘܿܢ ܘܒܸܢܝܵܡܹܝܢ: ܘܝܼܫܘܿܥ: ܘܲܫܡܲܥܝܵܐ: ܘܐܵܡܘܿܪܝܵܐ: ܘܲܫܟܲܢܝܵܐ: ܒܩܘܼܪ̈ܝܵܐ ܕܟ݂ܵܗ̈ܢܹܐ: ܒܗܲܝܡܵܢܘܼܬ̣ܵܐ: ܠܡܸܬܲܠ ܠܐܲܚܲܝ̈ܗܘܿܢ ܦܵܠܓـ̈ـܘܵܬ̣ܵܐ: ܠܪܲܒܵܐ ܐܲܝܟ݂ ܙܥܘܿܪܵܐ.

¹⁶ܠܒܲܪ ܡ̣ܢ ܕܙܵܕܸܩ: ܠܕܸܟ݂ܪܵܐ ܡ̣ܢ ܒܲܪ ܬܠܵܬ̣ ܫܢ̈ܝܼܢ ܘܲܠܥܸܠ: ܠܟ݂ܠ ܡ̣ܢ ܕܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ.

¹⁷ܘܚܘܼܫܒܵܢ ܝܘܿܡ ܒܝܵܘܡܹܗ: ܠܦܘܼܠܚܵܢܗܘܿܢ ܒܡܲܛܪ̈ܵܬ̣ܗܘܿܢ: ܒܦܵܠܓـ̈ـܘܵܬ̣ܗܘܿܢ ܘܡܸܫܚܵܐ ܘܚܲܡܪܵܐ ܡܸܬ̣̱ܝܼܗܸܒ̣ ܠܟ݂ܵܗܢܹ̈ܐ ܘܲܠܠܹܘܵܝܹ̈ܐ ܠܒܹܝܬ̣ ܐܲܒ̣ܵܗܲܝ̈ܗܘܿܢ: ܡ̣ܢ ܒܲܪ ܥܸܣܪܝܼܢ ܫܢ̈ܝܼܢ ܘܲܠܥܸܠ: ܒܡܲܛܪ̈ܵܬ̣ܗܘܿܢ ܒܦܵܠܓ̇ـ̈ـܘܵܬ̣ܗܘܿܢ.

¹⁸ܘܡܸܫܚܵܐ ܡܸܬ̣̱ܝܼܗܸܒ̣ ܠܢܲܦ̮ܛܹܝܪ̈ܲܝܗܘܿܢ: ܘܲܠܢܸܫܲܝ̈ܗܘܿܢ: ܘܠܲܒ̣ܢܲܝ̈ܗܘܿܢ: ܘܠܲܒ̣ܢܵܬ̣̈ܗܘܿܢ: ܘܲܠܟ݂ܠܹܗ ܥܲܡܵܐ ܕܝܼܣܪܵܝܹܠ ܕܲܒ̣ܗܲܝܡܵܢܘܼܬ̣ܵܐ ܡܸܬ̣ܩܲܕ̇ܫܝܼܢ ܗ̄ܘ̣ܵܘ.

¹⁹ܡܸܛܠ ܕܩܲܕ̇ܝܼܫܝܼܢ ܗ̄ܘ̣ܵܘ ܒܢܵܘ̈ܗܝ ܕܐܲܗܪܘܿܢ ܟܵܗܢܵܐ. ܩܲܕ̇ܝܼܫ ܗ̄ܘ̣ܵܐ ܒܸܣ̱ܪܗܘܿܢ. ܘܲܠܘܵܬ̣ ܢܸܫܹ̈ܐ ܠܵܐ ܡܸܬ̣ܩܲܪܒ̣ܝܼܢ ܗ̄ܘ̣ܵܘ. ܘܡܸܬ̣ܟܲܪܟ̇ܝܼܢ ܗ̄ܘ̣ܵܘ ܒܟ݂ܠ ܩܪܸܐ ܘܲܩܪܸܐ: ܓܲܒ̣ܪܹ̈ܐ ܐܲܝܠܹܝܢ ܕܝܼܕ݂ܥܝܼܢ ܫܡܵܗܲܝ̈ܗܘܿܢ: ܕܢܸܬ̇ܠܘܼܢ ܙܸܕ݂ܩܵܐ: ܠܟ݂ܠ ܕܸܟ݂ܪܵܐ ܕܐܝܼܬ̣ ܒܟ݂ܵܗ̈ܢܹܐ: ܘܲܠܟ݂ܠܗܹܝܢ ܫܲܪ̈ܒ̣ܵܬ̣ܵܐ ܕܠܹܘܵܝܹ̈ܐ.

²⁰ܘܲܥܒܲܕ݂ ܗܵܟܲܢܵܐ ܚܹܙܲܩܝܵܐ: ܒܟ݂ܠܹܗ ܝܼܗܘܼܕ݂ܵܐ. ܘܲܥ̣ܒܲܕ݂ ܕܛܵܒ̣ ܘܫܲܦܝܼܪ. ܘܗܲܠܸܟ݂ ܒܩܘܼܫܬܵܐ ܩܕ݂ܵܡ ܡܵܪܝܵܐ.

²¹ܒܟ݂ܠܗܘܿܢ ܥܒ̣ܵܕ݂ܵܘ̈ܗܝ ܕܫܼܲܝܼ ܗ̄ܘ̣ܵܐ ܠܡܸܥܒܲܕ݂ ܒܒܲܝܬܹ̇ܗ ܕܡܵܪܝܵܐ: ܘܲܒ̣ܢܵܡܘܿܣܵܐ ܘܲܒ̣ܦܘܼܩܕܵܢܵܐ: ܠܡܸܬ̣ܒܲܥ ܠܐܲܠܵܗܹܗ ܒܟ݂ܠܹܗ ܠܸܒܹ̇ܗ. ܘܲܥ̣ܒܲܕ݂ ܘܐܲܟ݂ܫܲܪ.