Read Aramaic Peshita 2 Chronicles 34 Bible Online

2 Chronicles 34 - Aramaic Peshita bible

2 Chronicles 34

¹ܒܲܪ ܬܡܵܢܹܐ ܫܢ̈ܝܼܢ ܝܘܿܫܝܼܵܐ ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܬ̣ܠܵܬ̣ܝܼܢ ܘܲܚܕ݂ܵܐ ܫܲܢ̄ܬܵܐ ܐܲܡ̣ܠܸܟ݂ ܒܐܘܿܪܸܫܠܸܡ.

²ܘܲܥ̣ܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ. ܘܗܲܠܸܟ݂ ܒܐܘܼܪ̈ܚܵܬܹܗ ܕܕ݂ܵܘܝܼܕ݂ ܐܲܒ̣ܘܼܗܝ ܘܠܵܐ ܣܛ̣ܵܐ ܡܸܢܗܹܝܢ ܠܵܐ ܠܝܲܡܝܼܢܵܐ ܘܠܵܐ ܠܣܸܡܵܠܵܐ.

³ܘܒܲܬ̣ܡܵܢܹܐ ܫܢ̈ܝܼܢ ܠܡܲܠܟ̇ܘܼܬܹܗ: ܥܕܲܡܵܐ ܠܗܵܫܵܐ ܗ̄ܘ̣ ܛܲܠܝܵܐ ܗ̄ܘ̣ܵܐ ܙܥܘܿܪܵܐ. ܘܫܲܪܝܼ ܗ̄ܘ̣ܵܐ ܠܲܡܨܲܠܵܝܘܼ ܠܐܲܠܵܗܹܗ ܕܕ݂ܵܘܝܼܕ݂ ܐܲܒ̣ܘܼܗܝ ܘܒܲܫܢܲܬ̣ ܬܲܪܬܲܥܸܣܪܹ̈ܐ ܫܢ̈ܝܼܢ: ܫܲܪܝܼ ܗ̄ܘ̣ܵܐ ܠܲܡܕܲܟܵܝܘܼ ܠܲܝܗܘܼܕ݂ܵܐ: ܘܲܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܘܫܲܪܝܼ ܗ̄ܘ̣ܵܐ ܠܡܸܥܩܲܪ ܥܠܵـ̈ـܘܵܬ̣ܵܐ ܘܲܦܬܲܟ݂ܪܹ̈ܐ: ܘܢܸܡܪܹ̈ܐ ܘܚܘܼ̈ܓ̣ܒܹ̇ܐ.

⁴ܘܥܸܩܹ̈ܐ: ܘܙܲܓܹ̈ܐ: ܘܟ݂ܠ ܐܝܼܠܵܢܝܼܢ ܕܥܵܒ̣ܕ̇ܝܼܢ ܗ̄ܘ̣ܵܘ ܠܲܦܬܲܟ݂ܪܹ̈ܐ: ܬܲܒܲܪ: ܘܐܲܕܸ̇ܩ: ܘܲܕ݂ܪܵܐ ܩܸܛܡ̱ܗܘܿܢ ܒܹܝܬ̣ ܩܲܒ̣ܪܹ̈ܐ ܕܲܒ̣ܢܲܝ̈ ܐ̄ܢܵܫܵܐ: ܕܲܡܕܲܒ̇ܚܝܼܢ ܗ̄ܘ̣ܵܘ ܠܗܘܿܢ.

⁵ܘܓܲܪ̈ܡܹܐ ܕܟ݂ܘܼܡܪܹ̈ܐ ܕܦܵܠܚܝܼܢ ܗ̄ܘ̣ܵܘ ܠܗܘܿܢ: ܚܲܛܘ ܐܸܢܘܿܢ ܡ̣ܢ ܩܲܒ̣ܪ̈ܲܝܗܘܿܢ. ܘܐܲܝܬ̇ܝܼܘ ܘܐܵܘܩܸܕ݂ܘ ܐܸܢܘܿܢ. ܘܕܲܟ̇ܝܼ ܠܲܝܗܘܼܕ݂ܵܐ ܘܠܐܘܿܪܸܫܠܸܡ.

⁶ܘܲܠܩܘܼܪ̈ܝܵܐ ܕܒܹܝܬ̣ ܡܢܲܫܹܐ ܘܒܹܝܬ̣ ܐܲܦܪܹܝܡ: ܘܲܕ݂ܫܸܡܥܘܿܢ: ܘܲܕ݂ܢܲܦ̮ܬܵܠܝܼ: ܒܫܘܼܩܲܝ̈ܗܘܿܢ ܟܲܕ݂ ܚܵܕ݂ܪܝܼܢ.

⁷ܘܲܥܩܲܪ ܡܲܕ݂ܒ̇ܚܹ̈ܐ: ܘܬܲܒܲܪ ܨܲܠܡܹ̈ܐ: ܥܕܲܡܵܐ ܕܐܲܕܸ̇ܩ ܐܸܢܘܿܢ ܐܲܝܟ݂ ܥܲܦܪܵܐ ܘܲܕ݂ܪܵܐ ܐܸܢܘܿܢ ܒܟ݂ܠܵܗ̇ ܐܲܪܥܵܐ ܕܝܼܣܪܵܝܹܠ ܘܲܗܦܲܟ݂ ܘܐܸܬ̣ܵܐ ܠܐܘܿܪܸܫܠܸܡ.

⁸ܘܒܲܫܢܲܬ̣ ܬܡܵܢܲܥܸܣܪܹ̈ܐ ܫܢܝܼ̈ܢ ܠܡܲܠܟ̇ܘܼܬܹܗ: ܕܲܟ̇ܝܼ ܐܲܪܥܵܐ ܕܝܼܣܪܵܝܹܠ: ܘܒܲܝܬܹ̇ܗ. ܘܫܲܕܲܪ ܠܫܵܦܵܢ ܒܲܪ ܐܲܠܨܝܵܐ: ܘܠܲܡܥܲܣܝܵܐ ܣܵܦܪܵܐ ܕܲܩܪܝܼܬ̣ܵܐ. ܘܐܸܡܲܪ ܠܗܘܿܢ: ܙܸܠܘ ܘܲܒ̣ܕ݂ܘܿܩܘ ܒܲܝܬܹ̇ܗ ܕܡܵܪܝܵܐ ܐܲܠܵܗܟ݂ܘܿܢ.

⁹ܘܐܸܬ̣ܵܘ ܠܘܵܬ̣ ܚܹܠܲܩܝܵܐ ܟܵܗܢܵܐ ܪܲܒܵܐ. ܘܝܲܗ̄ܒ̣ܘ ܟܸܣܦܵܐ ܕܥܲܠ ܠܒܲܝܬܹ̇ܗ ܕܡܵܪܝܵܐ: ܕܟܲܢܸܫܘ ܠܹܘܵܝܹ̈ܐ ܢܵܛܪ̈ܲܝ ܬܲܪ̈ܥܹܐ: ܡ̣ܢ ܐܝܼܕ݂ܵܐ ܕܲܡܢܲܫܹܐ ܘܕܲܐܦܪܹܝܡ: ܘܡ̣ܢ ܐܝܼܕ݂ܵܐ ܕܟ݂ܠܹܗ ܝܼܣܪܵܝܹܠ: ܘܡ̣ܢ ܟܠܹܗ ܝܼܗܘܼܕ݂ܵܐ ܘܒܸܢܝܵܡܹܝܢ: ܘܡܢ ܟܠܗܘܿܢ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ.

¹⁰ܘܝܲܗ̄ܒ̣ܘ ܥܲܠ ܐܝܼܕ݂ܵܐ ܕܥܵܒ̣ܕܲܝ̈ ܥܒ̣ܝܼ̈ܕ݂ܵܬ̣ܵܐ: ܕܲܡܫܲܠܛܝܼܢ ܒܒܲܝܬܹ̇ܗ ܕܡܵܪܝܵܐ: ܘܝܵܗ̄ܒ̇ܝܼܢ ܟܸܣܦܵܐ ܠܥܵܒ̣ܕܲܝ̈ ܥܒ̣̈ܝܼܕ݂ܵܬ̣ܵܐ ܕܒܲܝܬܹ̇ܗ ܕܡܵܪܝܵܐ: ܠܲܒ̣ܕ݂ܵܩܵܐ ܘܠܲܛܪܵܝܵܐ ܕܒܲܝܬܵܐ.

¹¹ܘܝܵܗ̄ܒ̇ܝܼܢ ܠܢܲܓܵܪܹ̈ܐ ܘܲܠܒܲܢܵܝܹ̈ܐ ܘܲܠܙܵܒ̣ܢܲܝ̈ ܛܵܒ̣̈ܥܹܐ ܛܵܒܹ̈ܐ: ܘܩܲܝܣܹ̈ܐ ܠܲܒ̣ܕ݂ܵܩܵܐ ܘܲܠܛܪܵܝܵܐ ܕܒܲܝܬܵܐ: ܕܲܩܦܲܠܘ ܡܲܠ̈ܟܹ̇ܐ ܕܲܝܗܘܼܕ݂ܵܐ.

¹²ܘܓܲܒ̣ܪܹ̈ܐ ܥܵܒ̣ܕ̇ܝܼܢ ܗ̄ܘ̣ܵܘ ܒܗܲܝܡܵܢܘܼܬ̣ܵܐ: ܒܲܥܒ̣ܝܼ̈ܕ݂ܵܬ̣ܵܐ ܕܡܲܩܕ̇ܫܵܐ. ܘܲܥܠܲܝܗܘܿܢ ܫܲܠܝܼܛܝܼܢ ܗ̄ܘ̣ܵܘ: ܢܵܚܵܬ̣ ܘܥܘܿܒܲܕ݂ܝܵܐ ܒܢܲܝ̈ ܡܪܵܪܝܼ: ܘܲܙܟܲܪܝܵܐ ܘܫܵܠܘܿܡ ܒܢܲܝ̈ ܩܵܗܵܬ̣: ܘܲܡܫܲܒ̇ܚܵܢܹ̈ܐ ܘܠܹܘܵܝܹ̈ܐ ܐܲܝܠܹܝܢ ܕܲܡܫܲܒ̇ܚܝܼܢ ܗ̄ܘ̣ܵܘ ܒܡܵܐܢܲܝ̈ ܬܸܫ̈ܒ̇ܚܵܬ̣ܵܐ.

¹³ܘܟ݂ܠ ܥܵܒ̣ܕܲܝ̈ ܥܒ̣ܝ̣̈ܕ݂ܵܬ̣ܵܐ ܠܲܥܒ̣ܝܼ̈ܕ݂ܵܬ̣ܵܐ: ܘܡ̣ܢ ܠܹܘܵܝܹ̈ܐ: ܣܵܦܪܹ̈ܐ ܘܪܵܘ̱ܪ̈ܒ̣ܵܢܹܐ ܘܬ̣ܵܪ̈ܥܹܐ.

¹⁴ܘܟܲܕ݂ ܡܲܦܩܝܼܢ ܗ̄ܘ̣ܵܘ ܟܸܣܦܵܐ ܕܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ: ܐܸܫܟܲܚ ܗ̄ܘ̣ܵܐ ܚܹܠܲܩܝܵܐ ܟܵܗܢܵܐ: ܣܸܦܪܵܐ ܕܐܘܿܪܵܝܬܵܐ ܕܡܵܪܝܵܐ: ܕܐܸܬ̣̱ܝܼܗܸܒ̣ ܗ̄ܘ̣ܵܐ ܥܲܠ ܐܝܼܕ݂ܵܐ ܕܡܘܼܫܹܐ.

¹⁵ܘܲܥܢ̣ܵܐ ܚܹܠܲܩܝܵܐ ܟܵܗܢܵܐ: ܘܐܸܡܲܪ ܠܫܵܦܵܢ ܣܵܦܪܵܐ: ܣܸܦܪܵܐ ܕܐܘܿܪܵܝܬܵܐ ܐܸܫܟ̇ܚܹܬ̣ ܒܒܲܝܬܹ̇ܗ ܕܡܵܪܝܵܐ. ܘܝܲܗ̄ܒ̣ ܚܹܠܲܩܝܵܐ ܣܸܦܪܵܐ ܠܫܵܦܵܢ.

¹⁶ܘܐܸܡܲܪ ܫܵܦܵܢ ܣܵܦܪܵܐ ܠܡܲܠܟܵܐ: ܟܠ ܡܸܕܸ̇ܡ ܕܐܸܡܲܪ ܠܹܗ ܚܹܠܲܩܝܵܐ ܘܐܲܬ̣ܝܼܒܹܗ ܦܸܬ̣ܓ̣ܵܡܵܐ: ܘܐܸܡܲܪ ܠܹܗ: ܟܠܡܸܕܸ̇ܡ ܕܝܲܗ̄ܒ̣ܬ̇ ܒܐܝܼܕ݂ܵܐ ܕܥܲܒ̣ܕܲܝ̈ܟ: ܗܸܢܘܿܢ ܥܵܒ̣ܕ̇ܝܼܢ.

¹⁷ܘܡܲܦܩܝܼܢ ܟܸܣܦܵܐ ܠܲܒ̣ܕ݂ܵܩܵܐ ܕܒܲܝܬܵܐ ܕܡܵܪܝܵܐ: ܘܝܵܗ̄ܒ̇ܝܼܢ ܚܘܼܫܒܵܢܵܐ ܠܩܲܝܘܼܡܹ̈ܐ ܘܲܠܥܵܒ̣ܕܲܝ̈ ܥܒ̣ܝܼ̈ܕ݂ܵܬ̣ܵܐ.

¹⁸ܘܚܵܘܝܼ ܫܵܦܵܢ ܣܵܦܪܵܐ ܠܡܲܠܟܵܐ: ܘܐܸܡܲܪ: ܣܸܦܪܵܐ ܝܲܗ̄ܒ̣ ܠܝܼ ܚܹܠܲܩܝܵܐ ܟܵܗܢܵܐ: ܘܲܩܪܵܐ ܒܹܗ ܫܵܦܵܢ ܩܕ݂ܵܡ ܡܲܠܟܵܐ.

¹⁹ܘܲܗܘ̤ܵܐ ܕܟܲܕ݂ ܫ̣ܡܲܥ ܡܲܠܟܵܐ ܦܸܬ̣ܓ̣ܵܡܵܘ̈ܗܝ ܕܢܵܡܘܿܣܵܐ: ܣܲܕܸ̇ܩ ܢܲܚܬܵܘ̈ܗܝ.

²⁰ܘܲܦܩܲܕ݂ ܡܲܠܟܵܐ ܠܚܹܠܲܩܝܵܐ: ܘܠܲܐܚܩܘܼܡ ܒܲܪ ܫܵܦܵܢ: ܘܠܲܥܒܲܟ̇ܘܿܪ ܒܲܪ ܡܝܼܟ݂ܵܐ: ܘܲܠܫܵܦܵܢ ܣܵܦܪܵܐ: ܘܠܵܐܣܵܝܵܐ ܪܲܒ̇ ܒܲܝܬܹ̇ܗ ܕܡܲܠܟܵܐ: ܘܐܸܡܲܪ ܠܗܘܿܢ.

²¹ܙܸܠܘ ܨܲܠܵܘ ܩܕ݂ܵܡ ܡܵܪܝܵܐ ܥܠܲܝ: ܘܥܲܠ ܥܲܡܵܐ ܕܝܼܣܪܵܝܹܠ: ܘܥܲܠ ܝܼܗܘܼܕ݂ܵܐ: ܥܲܠ ܦܸܬ̣ܓ̣ܵܡܵܘ̈ܗܝ ܕܣܸܦܪܵܐ ܗܵܢܵܐ ܕܐܸܫܬ̇ܟܲܚ ܡܸܛܠ ܕܣܲܓܝܼܵܐܐ ܗ̄ܝ̣ ܚܸܡܬܹܗ ܕܡܵܪܝܵܐ: ܕܗ̤ܝ ܐܵܬ̣ܝܵܐ ܥܠܲܝܢ. ܥܲܠ ܕܠܵܐ ܫܡܲܥ̣ܘ ܐܲܒ̣ܵܗܲܝ̈ܢ ܦܸܬ̣ܓ̣ܵܡܵܘ̈ܗܝ ܕܡܼܵܝܵܐ: ܠܡܸܥܒܲܕ݂ ܟܠܡܵܐ ܕܲܟ݂ܬ̣ܝܼܒ̣ ܥܠܲܝܢ ܒܣܸܦܪܵܐ ܗܵܢܵܐ.

²²ܘܐܸܙܲܠ̣ ܚܹܠܲܩܝܵܐ: ܘܗܵܠܹܝܢ ܟܠܗܘܿܢ ܕܫܲܕܲܪ ܡܲܠܟܵܐ ܠܘܵܬ̣ ܚܘܼܠܕ̇ܝܼ ܢܒ̣ܝܼܬ̣ܵܐ ܐܲܢ̄ܬܲܬ̣ ܫܵܠܘܿܡ ܒܲܪ ܬܲܩܘܵܐ: ܒܲܪ ܚܸܣܪܵܐ ܢܵܛܲܪ ܡܵܐܢܹ̈ܐ: ܘܗ̤ܝ ܝܵܬ̣ܒܵܐ ܗ̄ܘ̣ܵܬ̣ ܒܓ̣ܵܘ ܐܘܿܪܸܫܠܸܡ: ܒܝܘܼܠܦܵܢܵܐ. ܘܡܲܠܸܠ̣ܘ ܥܲܡܵܗ̇ ܐܲܝܟ݂ ܦܘܼܩܕܵܢܵܐ ܕܡܲܠܟܵܐ.

²³ܘܐܵܡܪܵܐ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܐܸܡܲܪܘ ܠܓܲܒ̣ܪܵܐ ܕܫܲܕܲܪܟ݂ܘܿܢ ܠܘܵܬ̣ܝ.

²⁴ܗܵܟܲܢܵܐ. ܐܵܡܲܪ ܡܵܪܝܵܐ: ܗܵܐ ܡܲܝܬܸ̇ܐ ܐ̄ܢܵܐ ܒܝܼܫܬܵܐ ܥܲܠ ܐܲܬ̣ܪܵܐ ܗܵܢܵܐ: ܘܥܲܠ ܥܵܡܘܿܪ̈ܵܘܗܝ: ܟܠܗܹܝܢ ܠܵܘ̈ܛܵܬ̣ܵܐ ܕܲܟ݂ܬ̣ܝܼ̈ܒ̣ܵܢ ܥܲܠ ܣܸܦܪܵܐ ܕܲܩܪܵܘ ܩܕ݂ܵܡ ܡܲܠܟܵܐ ܕܲܝܗܘܼܕ݂ܵܐ.

²⁵ܡܸܛܠ ܕܫܲܒ̣ܩܘܼܢܝ: ܘܲܕ݂ܚܸܠ̣ܘ ܠܐܲܠܵܗܹ̈ܐ ܐ̄ܚܪ̈ܵܢܹܐ. ܘܐܲܪܓ̇ܙܘܼܢܝ ܒܲܥܒ̣ܵܕ݂ ܐܝܼܕܲܝ̈ܗܘܿܢ. ܘܬܹܐܬܹܐ ܚܸܡܬ̣ܝ ܥܲܠ ܐܲܬ̣ܪܵܐ ܗܵܢܵܐ: ܘܠܵܐ ܬܸܕ݂ܥܲܟ݂.

²⁶ܘܥܲܠ ܡܲܠܟܵܐ ܕܲܝܗܘܼܕ݂ܵܐ ܕܫܲܕܲܪܟ݂ܘܿܢ ܠܡܸܫܐܲܠ ܡ̣ܢ ܡܵܪܝܵܐ: ܗܵܟܲܢܵܐ ܬܹܐܡܪܘܿܢ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܦܸܬ̣ܓ̣ܵܡܹ̈ܐ ܕܲܫܡܲܥܬ̇.

²⁷ܚܠܵܦ ܕܐܸܬ̇ܬ̇ܒܲܪ ܠܸܒܵܟ݂: ܘܙܵܥܬ̇ ܡ̣ܢ ܩܕ݂ܵܡ ܡܵܪܝܵܐ: ܟܲܕ݂ ܫ̣ܡܲܥܬ̇ ܦܸܬ̣ܓ̣ܵܡܹ̈ܐ ܗܵܠܹܝܢ ܕܡܲܝܬܸ̇ܐ ܐ̄ܢܵܐ ܥܲܠ ܐܲܬ̣ܪܵܐ ܗܵܢܵܐ: ܘܥܲܠ ܥܵܡܘܿܪ̈ܵܘܗܝ. ܘܐܸܬ̇ܬ̇ܒܲܪܬ̇ ܩܕ݂ܵܡܲܝ: ܘܣܲܕܸ̇ܩܬ̇ ܢܲܚܬܲܝ̈ܟ: ܘܲܒ̣ܟܲܝܬ̇ ܩܕ݂ܵܡܲܝ ܘܐܵܦ ܐܸܢܵܐ ܫܸܡܥܹ̇ܬ̣: ܐܵܡܲܪ ܡܵܪܝܵܐ.

²⁸ܡܸܛܠ ܗܵܢܵܐ ܩܵܦܹܣ ܐ̄ܢܵܐ ܠܵܟ݂ ܠܘܵܬ̣ ܐܲܒ̣ܵܗܲܝ̈ܟ ܘܬܸܬ̣ܩܦܸܣ ܠܒܹܝܬ̣ ܩܒ̣ܘܼܪܝܵܟ݂ ܒܲܫܠܵܡ. ܘܠܵܐ ܢܸܚܙ̈ܝܵܢ ܥܲܝܢܲܝ̈ܟ ܒܟ݂ܠܵܗ̇ ܒܝܼܫܬܵܐ ܕܡܲܝܬܸ̇ܐ ܐ̄ܢܵܐ ܥܲܠ ܐܲܬ̣ܪܵܐ ܗܵܢܵܐ ܘܥܲܠ ܥܵܡܘܿܪ̈ܵܘܗܝ. ܘܐܲܗܦܸܟ݂ܘ ܠܡܲܠܟܵܐ ܦܸܬ̣ܓ̣ܵܡܵܐ.

²⁹ܘܫܲܕܲܪ ܡܲܠܟܵܐ: ܘܐܸܬ̣ܟܲܢܲܫܘ ܠܘܵܬܹܗ ܟܠܗܘܿܢ ܩܲܫܝܼܫܹ̈ܐ ܕܲܝܗܘܼܕ݂ܵܐ ܘܕ݂ܐܘܿܪܸܫܠܸܡ.

³⁰ܘܲܣܠܸܦ ܡܲܠܟܵܐ ܠܒܲܝܬܹ̇ܗ ܕܡܵܪܝܵܐ: ܘܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܘܟ݂ܵܗ̈ܢܹܐ ܘܠܹܘܵܝܹ̈ܐ ܘܟ݂ܠܹܗ ܥܲܡܵܐ ܡ̣ܢ ܙܥܘܼܪܵܐ ܘܲܥܕܲܡܵܐ ܠܪܲܒܵܐ. ܘܲܩܪܵܐ ܩܕ݂ܵܡܲܝܗܘܿܢ ܟܠܗܘܿܢ ܦܸܬ̣ܓ̣ܵܡܹ̈ܐ ܕܣܸܦܪܵܐ ܕܲܕ݂ܝܵܬܹܩܹܐ ܗܵܕܹܐ ܕܐܸܫܬ̇ܟܲܚ ܒܒܲܝܬܹ̇ܗ ܕܡܵܪܝܵܐ.

³¹ܘܩܵܡ ܡܲܠܟܵܐ ܥܲܠ ܕܘܼܟ̇ܬܹܗ. ܘܝܼܡܵܐ ܡܵܘ̈ܡܵܬ̣ܵܐ ܩܕ݂ܵܡ ܡܵܪܝܵܐ: ܠܡܹܐܙܲܠ ܒܵܬܲܪ ܡܵܪܝܵܐ ܠܲܡܗܲܠܵܟ݂ܘܼ ܒܐܘܼܪ̈ܚܵܬܹܗ: ܘܲܠܡܸܛܲܪ ܦܘܼܩܕܵܢܵܘ̈ܗܝ ܘܢܵܡܘܿܣܵܘ̈ܗܝ ܘܣܵܗ̈ܕ̇ܘܵܬܹܗ: ܒܟ݂ܠ ܠܸܒܵܐ ܘܲܒ̣ܟ݂ܠ ܢܲܦ̮ܫܵܐ: ܠܡܸܥܒܲܕ݂ ܦܸܬ̣ܓ̣ܵܡܹ̈ܐ ܕܲܕ݂ܝܵܬܹܩܹܐ ܕܲܟ݂ܬ̣ܝܼܒ̣ܝܼܢ ܒܣܸܦܪܵܐ ܗܵܢܵܐ.

³²ܘܩܵܡ̣ ܟܠ ܕܐܸܫܬ̇ܟܲܚ ܒܐܘܿܪܸܫܠܸܡ: ܘܲܒ̣ܒܸܢܝܵܡܹܝܢ ܘܲܥܒܲܪܘ ܥܵܡܘܿܪܹ̈ܐ ܕܐܘܿܪܸܫܠܸܡ ܒܲܩܝܵܡܵܐ ܕܡܵܪܝܵܐ ܐܲܠܵܗܵܐ ܕܐܲܒ̣ܵܗܵܬ̣̈ܗܘܿܢ.

³³ܘܐܲܥ̣ܒܲܪ ܝܘܿܫܝܼܵܐ ܥܒ̣ܵܕܹ̈ܐ ܣܢܲـ̈ـܝܵܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ. ܘܲܥܒܲܕ݂ ܟܠܹܗ ܥܲܡܵܐ ܕܐܸܫܬ̇ܟܲܚ ܒܝܼܣܪܵܝܹܠ. ܘܲܦܠܲܚ̣ܘ ܠܡܵܪܝܵܐ ܐܲܠܗܗܘܿܢ. ܘܠܵܐ ܣܛܵܘ ܡ̣ܢ ܒܵܬܲܪ ܡܵܪܝܵܐ ܐܲܠܵܗܵܐ ܕܐܲܒ̣ܵܗܵܬ̣̈ܗܘܿܢ.