Read Aramaic Peshita 2 Chronicles 36 Bible Online

2 Chronicles 36 - Aramaic Peshita bible

2 Chronicles 36

¹ܘܲܕ݂ܒܲܪܘ ܥܲܡܵܐ ܠܝܵܗܘܿܐܵܚܵܙ ܒܲܪ ܝܘܿܫܝܼܵܐ. ܘܐܲܩܝܼܡܘܼܗܝ ܒܡܲܠܟ̇ܘܼܬܹܗ ܒܵܬܲܪ ܐܲܒ̣ܘܼܗܝ ܒܐܘܿܪܸܫܠܸܡ.

²ܒܲܪ ܥܸܣܪܝܼܢ ܘܲܬ̣ܠܵܬ̣ ܫܢ̈ܝܼܢ ܝܵܗܘܿܐܵܚܵܙ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܬ̣ܠܵܬ̣ܵܐ ܝܲܪ̈ܚܝܼܢ ܐܲܡ̣ܠܸܟ݂ ܗ̄ܘ̣ܵܐ ܒܐܘܿܪܸܫܠܸܡ.

³ܘܐܲܥ̣ܒ̇ܪܹܗ ܡܲܠܟܵܐ ܕܡܸܨܪܹܝܢ.

⁴ܘܐܲܩܝܼܡ ܠܐܹܠܝܵܩܝܼܡ ܐܲܚܘܼܗܝ: ܥܲܠ ܕܒܹܝܬ̣ ܝܼܗܘܼܕ݂ܵܐ: ܘܥܲܠ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ. ܘܫܲܡܝܼ ܫܡܹܗ ܝܘܿܝܵܩܝܼܡ: ܘܲܠܝܵܗܘܿܐܵܚܵܙ ܐܲܚܘܼܗܝ: ܕܒܲܪ ܦܸܪܥܘܿܢ ܚܓ̣ܝܼܪܵܐ. ܘܐܵܘܒ̇ܠܹܗ ܠܡܸܨܪܹܝܢ. ܘܡܝܼܬ̣ ܬܲܡܵܢ.

⁵ܒܲܪ ܥܸܣܪܝܼܢ ܘܚܲܡܸܫ ܫܢ̈ܝܼܢ ܝܘܿܝܵܩܝܼܡ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܚܕܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ ܐܲܠܵܗܹܗ.

⁶ܥܠܵܘܗܝ ܣܠܸܩ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ. ܘܐܲܣܪܹܗ ܒܫܸܫ̈ܠܵܬ̣ܵܐ: ܠܡܵܘܒܵܠܘܼܬܹܗ ܠܒ̣ܵܒܹܠ.

⁷ܘܡ̣ܢ ܟܠܗܘܿܢ ܡܵܐܢܲܝ̈ ܒܲܝܬܵܐ: ܐܲܝܬ̇ܝܼ ܢܒ̣ܘܼܟܲܕ݂ܢܵܨܲܪ ܠܒ̣ܵܒܹܠ. ܘܝܲܗ̄ܒ̣ ܐܸܢܘܿܢ ܒܗܲܝܟ̇ܠܹܗ ܒܒ̣ܵܒܹܠ.

⁸ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܝܵܩܝܼܡ: ܘܣܲܢ̈ܝܵܬ̣ܵܐ ܕܲܥܒܲܕ݂: ܗܵܐ ܗܸܢܹܝܢ ܟܬ̣ܝܼ̈ܒ̣ܵܢ ܥܲܠ ܣܸܦܪܵܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ ܘܕ݂ܝܼܣܪܵܝܹܠ ܘܐܲܡ̣ܠܸܟ݂ ܝܘܿܝܵܟ݂ܝܼܢ ܒܪܹܗ ܒܵܬ̣ܪܹܗ.

⁹ܒܲܪ ܬܡܵܢܲܥܸܣܪܹ̈ܐ ܫܢ̈ܝܼܢ ܝܘܿܝܵܟ݂ܝܼܢ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܡܵܐܐ ܝܵܘ̈ܡܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ.

¹⁰ܘܲܠܚܲܪܬ̣ܵܗ̇ ܕܫܲܢ̄ܬܵܐ: ܫܲܕܲܪ ܥܠܵܘܗܝ ܢܒ̣ܘܼܟܲܕ݂ܢܵܨܲܪ ܡܲܠܟܵܐ: ܘܐܲܝܬ̇ܝܹܗ ܠܒܵܒܹܠ: ܠܹܗ ܘܲܠܡܵܐܢܲܝ̈ ܪܸܓ̇ܬ̣ܵܐ ܕܲܗܘ̤ܵܘ ܒܒܲܝܬܹ̇ܗ ܕܡܵܪܝܵܐ ܘܐܲܡ̣ܠܸܟ݂ ܠܨܸܕܲܩܝܵܐ ܕܵܕܹܗ ܒܡܲܠܟ̇ܘܼܬ̣ܵܐ: ܥܲܠ ܝܼܗܘܼܕ݂ܵܐ ܘܥܲܠ ܐܘܿܪܸܫܠܸܡ.

¹¹ܒܲܪ ܥܸܣܪܝܼܢ ܘܲܚܕ݂ܵܐ ܫܢ̈ܝܼܢ ܨܹܕܲܩܝܵܐ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܚܕܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ.

¹²ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ ܐܲܠܵܗܹܗ. ܘܠܵܐ ܕܚܸܠ̣ ܡ̣ܢ ܐܹܪܲܡܝܵܐ ܢܒ̣ܝܼܵܐ: ܕܡܸܬ̣ܢܲܒܹ̇ܐ ܗ̄ܘ̣ܵܐ ܐܲܝܟ݂ ܕܡ̣ܢ ܦܘܼܡܹܗ ܕܡܵܪܝܵܐ.

¹³ܘܐܵܦ ܥܲܠ ܢܒ̣ܘܼܟܲܕ݂ܢܵܨܲܪ ܡܪܲܕ݂: ܕܝܼܡ̣ܵܐ ܗ̄ܘ̣ܵܐ ܠܹܗ ܒܲܫܡܹܗ ܕܡܵܪܝܵܐ ܘܩܲܫܝܼ ܩܕ݂ܵܠܹܗ: ܘܩܲܫܝܼ ܠܸܒܹ̇ܗ. ܘܠܵܐ ܨܒ̣ܵܐ ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

¹⁴ܘܐܵܦ ܟܠ ܩܲܫܝܼܫܹ̈ܐ ܕܟ݂ܵܗ̈ܢܹܐ ܘܲܕ݂ܠܹܘܵܝܹ̈ܐ ܘܲܕ݂ܥܲܡܵܐ: ܐܲܣܓܝܼܘ ܠܲܡܟܲܕܵܒ̣ܘܼ ܟܲܕܵܒ̣ܘܼܬ̣ܵܐ: ܐܲܝܟ݂ ܟܠܗܘܿܢ ܥܒ̣ܵܕܹ̈ܐ ܕܥܲܡܡܹ̈ܐ: ܘܛܲܡܲܐܘܼ ܒܲܝܬܹ̇ܗ ܕܡܵܪܝܵܐ ܩܲܕ̇ܝܼܫܵܐ ܒܐܘܿܪܸܫܠܸܡ.

¹⁵ܘܫܲܕܲܪ ܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܗܘܿܢ ܥܠܲܝܗܘܿܢ ܒܐܝܼܕ݂ܵܐ ܕܡܲܠܲܐܟ݂ܵܘ̈ܗܝ: ܡܩܲܕ̇ܡܝܼܢ ܘܡܲܚ̄ܫܟ݂ܝܼܢ. ܡܸܛܠ ܕܚܵܣ ܥܲܠ ܥܲܡܹܗ ܘܥܲܠ ܥܵـ̈ـܢܵܐ ܕܡܵܪܝܵܐ.

¹⁶ܘܲܗܘ̤ܵܐ ܓܵܚܟ̇ܝܼܢ ܥܲܠ ܡܲܠܲܐܟ݂ܵܘ̈ܗܝ ܕܡܵܪܝܵܐ: ܘܲܡܒܲܣܪܝܼܢ ܥܲܠ ܡܸܠܲܝ̈ܗܘܿܢ. ܘܓ̣ܵܚܟ̇ܝܼܢ ܥܲܠ ܢܒ̣ܝܼܵܘ̈ܗܝ ܥܕܲܡܵܐ ܕܣܸܠܩܲܬ̤ ܚܸܡܬܹܗ ܕܡܵܪܝܵܐ ܒܥܲܡܹܗ: ܥܕܲܡܵܐ ܠܐܲܝܟܵܐ ܕܠܵܐ ܗܘ̤ܵܬ̣ ܠܗܘܿܢ ܐܵܣܝܘܼ.

¹⁷ܘܐܲܣܸܩ ܥܠܲܝܗܘܿܢ ܠܡܲܠܟܵܐ ܕܟܲܠܕ݂ܵܝܹ̈ܐ: ܘܩܲܛܸܠ ܥܠܲܝܡܲܝ̈ܗܘܿܢ ܒܚܲܪܒܵܐ ܒܹܝܬ̣ ܡܲܩܕܲܫܗܘܿܢ. ܘܠܵܐ ܚܵܣ ܥܲܠ ܓܲܕ̇ܘܼܕܹܐ ܘܥܲܠ ܒܬ̣ܘܼ̈ܠܵܬ̣ܵܐ: ܘܥܲܠ ܩܲܫܝܼܫܹ̈ܐ: ܘܐܵܦܠܵܐ ܥܲܠ ܝܵܢܩܲܝ̈ ܚܲܠܒ̣ܵܐ. ܟܠܗܘܿܢ ܐܲܫܠܸܡ ܒܐܝܼܕܹܗ.

¹⁸ܘܟ݂ܠ ܡܵܐܢܲܝ̈ ܒܲܝܬܹ̇ܗ ܕܡܵܪܝܵܐ: ܪܵܘ̱ܪ̈ܒܹܐ ܘܕܲܩܕ̇ܩܹ̈ܐ: ܘܓܲܙܵܐ ܕܒܲܝܬܹ̇ܗ ܕܡܵܪܝܵܐ: ܘܓܲܙܵܐ ܕܡܲܠܟܵܐ ܘܲܕ݂ܫܲܠܝܼܛܵܢܵܘ̈ܗܝ: ܟܠܹܗ ܐܵܘܒ̇ܠܹܗ ܠܒ̣ܵܒܹܠ.

¹⁹ܘܐܵܘܩܕܹܗ ܠܒܲܝܬܹ̇ܗ ܕܡܵܪܝܵܐ ܘܲܥܩܲܪ ܠܫܘܼܪܹ̈ܝܗ̇ ܕܐܘܿܪܸܫܠܸܡ: ܘܟ݂ܠܗܹܝܢ ܣܵܚܪ̈ܵܬ̣ܵܗ̇ ܐܵܘܩܸܕ݂ ܒܢܘܼܪܵܐ. ܘܟ݂ܠ ܡܵܐܢܹ̈ܐ ܕܪܸܓ̇ܬ̣ܵܐ ܚܲܒܸ̇ܠܘ.

²⁰ܘܐܲܦܸܩܘ ܒܫܸܒ̣ܝܵܐ ܠܐܲܝܠܹܝܢ ܕܲܦܠܲܛܘ ܡ̣ܢ ܚܲܪܒܵܐ ܠܒ̣ܵܒܹܠ ܘܲܗܘ̤ܵܘ ܠܹܗ ܥܲܒ̣ܕ̇ܝܼ̈ܢ ܘܠܲܒ̣ܢܵܘ̈ܗܝ: ܥܕܲܡܵܐ ܠܐܲܝܟܵܐ ܕܐܲܫܠܸܡ ܡܲܠܟ̇ܘܼܬ̣ܵܐ ܠܦܵܪ̈ܣܵܝܹܐ.

²¹ܕܬܸܫܠܲܡ ܡܸܠܬܹܗ ܕܡܵܪܝܵܐ ܕܡܲܠܸܠ̣ ܗ̄ܘ̣ܵܐ ܐܹܪܲܡܝܵܐ ܢܒ̣ܝܼܵܐ: ܥܕܲܡܵܐ ܕܬܸܬ̇ܢܝܼܚ ܐܲܪܥܵܐ ܒܫܲܒܹ̇ܝ̈ܗ̇ ܟܠ ܝܵܘ̈ܡܵܬ̣ܵܐ ܕܬܸܨܕܸ̇ܐ: ܠܡܸܫܠܲܡ ܫܲܒ̣ܥܝܼܢ ܫܢ̈ܝܼܢ.

²²ܒܲܫܢܲܬ̣ ܚܕ݂ܵܐ ܠܟ݂ܘܼܪܸܫ ܡܲܠܟܵܐ ܦܵܪܣܵܝܵܐ: ܕܬܸܫܠܲܡ ܡܸܠܬܹܗ ܕܡܵܪܝܵܐ ܒܦܘܼܡܹܗ ܕܐܲܪܲܡܝܵܐ ܢܒ̣ܝܼܵܐ: ܐܲܥܝܼܪ ܡܵܪܝܵܐ ܪܘܼܚܹܗ ܕܟ݂ܘܼܪܸܫ ܡܲܠܟܵܐ ܦܲܪܣܵܝܵܐ. ܘܐܲܥܒܲܪ ܩܵܠܵܐ ܒܟ݂ܠܵܗ̇ ܡܲܠܟ̇ܘܼܬܹܗ. ܘܐܵܦ ܒܲܟ݂ܬ̣ܵܒ̣ܵܐ ܐܲܡܝܼܪ ܗ̄ܘ̣ܵܐ ܫܡܹܗ.

²³ܗܵܟܲܢܵܐ ܐܵܡܲܪ ܟܘܼܪܸܫ ܡܲܠܟܵܐ ܦܵܪܣܵܝܵܐ: ܟܠ ܡܲܠܟ̇ـ̈ـܘܵܬ̣ܵܐ ܕܐܲܪܥܵܐ ܝܲܗ̄ܒ̣ ܠܝܼ ܡܵܪܝܵܐ ܐܲܠܵܗܵܐ ܕܲܫܡܲܝܵܐ ܘܗ̤ܘ ܦܩܲܕ݂ ܥܠܲܝ ܕܐܸܒ̣ܢܸܐ ܠܹܗ ܒܲܝܬܵܐ ܒܐܘܿܪܸܫܠܸܡ ܕܒܲܝܗܘܼܕ݂ܵܐ ܡܲܢܘܼ ܐܝܼܬ̣ ܒܟ݂ܘܿܢ ܡ̣ܢ ܟܠܹܗ ܥܲܡܵܐ ܕܡܵܪܝܵܐ ܐܲܠܹܗܹܗ ܨܵܒܹ̇ܐ ܒܹܗ: ܢܸܣܲܩ ܢܹܐܬܹܐ ܠܘܵܬ̣ܝ.