Read Aramaic Peshita 2 Chronicles 5 Bible Online

2 Chronicles 5 - Aramaic Peshita bible

2 Chronicles 5

¹ܘܫܸܠܡܲܬ̤ ܟܠܵܗ̇ ܥܒ̣ܝܼܕ̇ܬܵܐ ܕܲܥܒܲܕ݂ ܫܠܹܝܡܘܿܢ ܒܒܲܝܬܹ̇ܗ ܕܡܵܪܝܵܐ. ܘܐܲܝܬ̇ܝܼ ܫܠܹܝܡܘܿܢ ܩܘܼܕ݂ܫܹ̈ܐ ܕܕ݂ܵܘܝܼܕ݂ ܐܲܒ̣ܘܗܝ: ܟܸܣܦܵܐ ܘܕܲܗܒ̣ܵܐ ܘܡܵܐܢܹ̈ܐ. ܘܟܲܢܸܫ ܐܸܢܘܿܢ. ܘܐܲܥܸܠ ܦܣܲܩ ܐܸܢܘܿܢ ܒܒܹܝܬ̣ ܓܲܙܵܐ ܕܡܵܪܝܵܐ.

²ܗܵܝܕܹ̇ܝܢ ܟܲܢܸܫ̣ ܗ̄ܘ̣ܵܐ ܫܠܹܝܡܘܿܢ ܟܠܗܘܿܢ ܩܲܫܝܼܫܹ̈ܐ ܕܝܼܣܪܵܝܹܠ: ܪܹ̈ܫܲܝ ܫܲܒ̣̈ܛܹܐ: ܘܪܵܘ̱ܪ̈ܒ̣ܵܢܲܝ ܐܲܒ̣ܵـ̈ـܗܵܬ̣ܵܐ ܕܲܒ̣ܢܲܝ̈ ܝܼܣܪܵܝܹܠ. ܘܐܸܬ̣ܵܘ ܠܘܵܬ̣ ܡܲܠܟܵܐ ܫܠܹܝܡܘܿܢ ܠܐܘܿܪܸܫܠܸܡ: ܠܡܲܣܵܩܘܼ ܠܩܹܒ̣ܘܿܬ̣ܵܐ ܕܐܝܼܬ̣ ܒܵܗ̇ ܕܝܵܬ̣ܩܹܐ ܕܡܵܪܝܵܐ: ܡ̣ܢ ܩܪܝܼܬܹܗ ܕܕ݂ܵܘܝܼܕ݂: ܕܗ̤ܝ ܗ̄ܝ̣ ܨܸܗܝܘܿܢ.

³ܘܐܸܬ̣ܟܲܢܲܫܘ ܘܐܸܬ̣ܵܘ ܠܘܵܬ̣ ܡܲܠܟܵܐ ܫܠܹܝܡܘܿܢ ܠܐܘܿܪܸܫܠܸܡ: ܒܝܲܪܚܵܐ ܕܐܸܒܵܐ ܕܥܹܐܕ݂ܵܐ ܕܲܡܛܲܠ̈ܠܹܐ: ܗ̤ܘ ܝܲܪܚܵܐ ܫܒ̣ܝܼܥܵܝܵܐ.

⁴ܘܐܸܬ̣ܵܘ ܟܠܗܘܿܢ ܩܲܫܝܼܫܹ̈ܐ ܕܝܼܣܪܵܝܹܠ. ܘܲܫܩܲܠܘ ܟܵܗ̈ܢܹܐ ܠܩܹܒ̣ܘܿܬ̣ܵܐ.

⁵ܘܐܲܣܩܘܼܗ̇ ܠܩܹܒ̣ܘܿܬܹܗ ܕܡܵܪܝܵܐ: ܘܲܠܡܲܫܟ̇ܢܵܐ ܕܥܹܐܕ݂ܵܐ: ܘܲܠܟ݂ܠܗܘܿܢ ܡܵܐܢܲܝ̈ ܩܘܼܕ݂ܫܵܐ ܕܲܗܘ̤ܵܘ ܒܡܲܫܟ̇ܢܵܐ. ܘܐܲܣܸܩܘ ܐܸܢܘܿܢ ܟܵܗ̈ܢܹܐ ܘܠܹܘܵܝܹܐ.

⁶ܘܡܲܠܟܵܐ ܫܠܹܝܡܘܿܢ ܘܟ݂ܠܹܗ ܥܲܡܵܐ ܕܝܼܣܪܵܝܹܠ ܕܐܹܬ̇ܛܲܝܲܒ̣ܘ: ܩܵܝ̇ܡܝܼܢ ܩܕ݂ܵܡ ܩܹܒ̣ܘܿܬ̣ܵܐ ܘܲܡܕܲܒ̇ܚܝܼܢ ܥܵـ̈ـܢܵܐ ܕܠܵܐ ܡܸܬ̣ܡܲܢ̈ܝܵܢ ܘܬ̣ܵܘܪܹ̈ܐ ܕܠܵܐ ܡܸܬ̣ܚܲܫܒ̇ܝܼܢ ܡ̣ܢ ܣܘܿܓ̣ܐܗܘܿܢ.

⁷ܘܐܲܝܬ̇ܝܼܘ ܟܵܗ̈ܢܹܐ ܠܩܹܒ̣ܘܿܬ̣ܵܐ ܕܡܵܪܝܵܐ. ܘܣܵܡܘܼܗ̇ ܠܩܹܒ̣ܘܿܬ̣ܵܐ ܒܕ݂ܘܿܟ̇ܬ̣ܵܗ̇ ܒܹܝܬ̣ ܩܕ݂ܘܿܫ ܩܘܼܕ݂ܫܹ̈ܐ: ܬܚܹܝܬ̣ ܟܸܢܦܲܝ̈ܗܘܿܢ ܕܲܟ݂ܪ̈ܘܿܒܹܐ.

⁸ܘܲܗܘ̤ܵܘ ܟܪ̈ܘܿܒܹܐ ܦܪܝܼܣܝܼܢ ܥܲܠ ܕܘܼܟ̇ܬ̣ܵܗ̇ ܕܩܹܒ̣ܘܿܬ̣ܵܐ. ܘܲܡܟܲܣܹܝܢ ܗ̄ܘ̣ܵܘ ܟܪ̈ܘܿܒܹܐ ܥܲܠ ܩܹܒ̣ܘܿܬ̣ܵܐ ܘܥܲܠ ܩܘܿܦܹܝ̈ܗ̇ ܡ̣ܢ ܠܥܸܠ.

⁹ܘܲܗܘ̤ܵܘ ܐܲܪܝܼܟ݂ܝܼܢ ܩܘܿܦܹ̈ܐ. ܘܡܸܬ̣ܚ̄ܙܹܝܢ ܗ̄ܘ̣ܵܘ ܪܹ̈ܫܲܝܗܘܿܢ ܡ̣ܢ ܬܚܹܝܬ̣ ܩܹܒ̣ܘܿܬ̣ܵܐ ܠܓ̣ܵܘܹܗ ܕܒܲܝܬܵܐ. ܘܠܵܐ ܡܸܬ̣ܚ̄ܙܹܝܢ ܗ̄ܘ̣ܵܘ ܠܒܲܪ. ܘܲܗܘ̤ܵܘ ܬܲܡܵܢ: ܥܕܲܡܵܐ ܠܝܵܘܡܵܢܵܐ.

¹⁰ܠܵܐ ܐܝܼܬ̣ ܒܩܹܒ̣ܘܿܬ̣ܵܐ: ܐܸܠܵܐ ܬܲܪܬܹ̇ܝܢ ܠܘܼܚܹ̈ܐ ܕܟܹܐܦܵܐ: ܕܣܵܡ̣ ܬܲܡܵܢ ܡܘܼܫܹܐ: ܕܐܲܚܸܬ̣ ܡ̣ܢ ܛܘܼܪܵܐ ܕܣܝܼܢܲܝ. ܗ̤ܝ ܗ̄ܝ̣ ܕܝܵܬܹܩܹܐ ܕܝܲܗ̄ܒ̣ ܡܵܪܝܵܐ ܠܲܒ̣ܢܲܝ̈ ܝܼܣܪܵܝܹܠ ܟܲܕ݂ ܢܦܲܩ̣ܘ ܡ̣ܢ ܐܲܪܥܵܐ ܕܡܸܨܪܹܝܢ.

¹¹ܘܲܗܘ̤ܵܐ ܕܟܲܕ݂ ܢܦܲܩ̣ܘ ܟܵܗ̈ܢܹܐ ܡ̣ܢ ܒܹܝܬ̣ ܬܸܫܡܸܫܬܵܐ: ܡܸܛܠ ܕܟ݂ܠܗܘܿܢ ܟܵܗ̈ܢܹܐ ܕܐܸܫܬ̇ܟܲܚܘ ܬܲܡܵܢ: ܥܲܠ̣ܘ ܠܒܹܝܬ̣ ܬܸܫܡܸܫܬܵܐ.

¹²ܘܠܵܐ ܐܸܫܟܲܚܘ ܟܵܗ̈ܢܹܐ ܠܲܡܩܵܡ ܠܲܡܫܲܡܵܫܘܼ ܡ̣ܢ ܩܕ݂ܵܡ ܥܢܵܢܵܐ. ܡܸܛܠ ܕܐܸܬ̣ܡ̱ܠܝܼ ܒܲܝܬܹ̇ܗ ܕܡܵܪܝܵܐ ܡ̣ܢ ܙܝܼܘܵܐ ܕܲܫܟ݂ܝܼܢܬܹ̇ܗ.