Read Aramaic Peshita 2 Chronicles 6 Bible Online

2 Chronicles 6 - Aramaic Peshita bible

2 Chronicles 6

¹ܗܵܝܕܹ̇ܝܢ ܐܸܡܲܪ ܫܠܹܝܡܘܿܢ: ܡܵܪܝܵܐ ܐܲܢ̄ܬ̇ ܐܸܡܲܪܬ̇ ܠܡܸܫܪܵܐ ܒܥܲܪܦܸܠܵܐ.

²ܘܐܸܢܵܐ ܡܸܒ̣ܢܵܐ ܒܢܹ̇ܝܬ̣ ܒܲܝܬܵܐ ܠܵܟ݂: ܕܘܼܟ̇ܬ̣ܵܐ ܠܲܫܟ݂ܝܼܢܬܵܟ݂ ܠܥܵܠܡܝܼܢ.

³ܘܐܲܦܢܝܼ ܡܲܠܟܵܐ ܐܲܦܵܘ̈ܗܝ. ܘܒܲܪܸܟ݂ ܠܟ݂ܠܗܹܝܢ ܟܢܘܼ̈ܫܵܬ̣ܵܐ ܕܝܼܣܪܵܝܹܠ ܘܟ݂ܠܗܹܝܢ ܟܢܘܼ̈ܫܵܬ̣ܵܐ ܕܝܼܣܪܵܝܹܠ ܩܵܝ̈ܡܵܢ.

⁴ܘܐܸܡܲܪ: ܒܪܝܼܟ݂ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܡܲܠܸܠ̣ ܒܦܘܼܡܹܗ ܥܲܡ ܕܵܘܝܼܕ݂ ܐܵܒ̣ܝ: ܘܲܒ̣ܡܸܠܬܹܗ ܐܲܫܲܪ ܡܸܕܸ̇ܡ ܕܐܸܡܲܪ.

⁵ܕܡ̣ܢ ܝܵܘܡܵܐ ܕܐܲܦܩܹ̇ܬ̣ ܠܥܲܡܝ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ: ܠܵܐ ܓܒܹܝܬ̣ ܠܝܼ ܩܪܝܼܬ̣ܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܠܡܸܒ̣ܢܵܐ ܒܲܝܬܵܐ ܕܢܸܗܘܹܐ ܫܹܡܝ ܬܲܡܵܢ.

⁶ܘܲܓ̣ܒܹܝܬ̣ ܠܕ݂ܵܘܝܼܕ݂ ܕܢܸܗܘܹܐ ܡܲܠܟܵܐ ܥܲܠ ܥܲܡܝ ܝܼܣܪܵܝܹܠ.

⁷ܘܲܗܘ̤ܵܐ ܒܠܸܒܹ̇ܗ ܕܕ݂ܵܘܝܼܕ݂ ܐܵܒ̣ܝ: ܠܡܸܒ̣ܢܵܐ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

⁸ܘܐܸܡܲܪ ܡܵܪܝܵܐ ܠܕ݂ܵܘܝܼܕ݂ ܐܵܒ̣ܝ: ܡܸܟܹ̇ܝܠ ܕܲܗܘ̤ܵܐ ܒܠܸܒܵܟ݂ ܠܡܸܒ̣ܢܵܐ ܒܲܝܬܵܐ ܠܫܹܡܝ: ܐܲܛܐܸܒ̣ܬ̇ ܡܸܛܠ ܕܲܗܘ̤ܵܐ ܒܠܸܒܵܟ݂.

⁹ܐܲܢ̄ܬ̇ ܕܹܝܢ ܠܵܐ ܬܸܒ̣ܢܸܐ ܒܲܝܬܵܐ: ܐܸܠܵܐ ܒܪܵܟ݂ ܕܢܵܦܹ̇ܩ ܡ̣ܢ ܚܲܨܵܟ݂: ܗ̤ܘ ܢܸܒ̣ܢܸܐ ܒܲܝܬܵܐ ܠܫܹܡܝ.

¹⁰ܘܐܲܩܝܼܡ ܡܵܪܝܵܐ ܦܸܬ̣ܓ̣ܵܡܵܘ̈ܗܝ ܕܐܸܡܲܪ. ܘܩܵܡܹ̇ܬ̣ ܡ̣ܢ ܒܵܬܲܪ ܕܵܘܝܼܕ݂ ܐܵܒ̣ܝ: ܘܝܸܬ̣ܒܹ̇ܬ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ ܐܲܝܟܲܢܵܐ ܕܐܸܡܲܪ ܠܝܼ ܡܵܪܝܵܐ: ܘܲܒ̣ܢܹ̇ܝܬ̣ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

¹¹ܘܐܲܬ̣ܩܢܹ̇ܬ̣ ܕܘܼܟ̇ܬ̣ܵܐ ܠܩܹܒ̣ܘܿܬ̣ܵܐ ܕܒ̣ܵܗ̇ ܣܝܼܡܵܐ ܕܝܵܬܹܩܹܐ ܕܡܵܪܝܵܐ: ܕܝܲܗ̄ܒ̣ ܠܐܲܒ̣ܵـ̈ـܗܵܬܲܢ ܟܲܕ݂ ܐܲܦܸܩ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ.

¹²ܘܩܵܡ̣ ܫܠܹܝܡܘܿܢ ܩܕ݂ܵܡ ܡܲܕ݂ܒ̇ܚܵܐ ܕܡܵܪܝܵܐ: ܩܕ݂ܵܡ ܟܠܗܹܝܢ ܟܢܘܼ̈ܫܵܬ̣ܵܐ ܕܝܼܣܪܵܝܹܠ. ܘܲܦܪܲܣ ܐܝܼܕ݂ܵܘ̈ܗܝ ܠܲܫܡܲܝܵܐ.

¹³ܘܲܥܒܲܕ݂ ܫܠܹܝܡܘܿܢ ܐܲܣܛܘܿܢܵܐ ܚܲܕ݂ ܕܲܢܚܵܫܵܐ. ܘܐܲܩܝܼܡܹܗ ܗ̄ܘ̣ܵܐ ܡܸܨܥܲܬ̣ ܕܵܪܬܵܐ. ܪܵܘܡܹܗ ܚܲܡܸܫ ܐܲܡ̈ܝܼܢ. ܘܲܦܬ̣ܵܝܹܗ ܬܲܪܬܹ̇ܝܢ ܐܲܡܝܼ̈ܢ. ܘܲܣܠܸܩ ܗ̄ܘ̣ܵܐ ܘܩܵܡ̣ ܥܠܵܘܗܝ: ܘܲܒ̣ܪܲܟ݂ ܥܲܠ ܒܘܼܪ̈ܟܵܘܗܝ ܘܚܵܙܹ̇ܝܢ ܗ̄ܘ̣ܵܘ ܠܹܗ ܟܠܹܗ ܥܲܡܵܐ ܕܝܼܣܪܵܝܹܠ ܘܲܦܪܲܣ ܐܝܼܕ݂ܵܘ̈ܗܝ ܒܲܨܠܘܿܬ̣ܵܐ: ܠܥܹܝܢ ܥܲܡܵܐ ܕܝܼܣܪܵܝܹܠ: ܠܘܵܬ̣ ܫܡܲܝܵܐ.

¹⁴ܘܨܲܠܝܼ ܘܐܸܡܲܪ: ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܠܲܝܬ̇ ܐܲܟ݂ܘܵܬ̣ܵܟ݂ ܐܲܢ̄ܬ̇ ܗ̄ܘ̣ ܡܵܪܝܵܐ ܕܝܵܬܹܒ̣ ܐܲܢ̄ܬ̇ ܒܲܫܡܲܝܵܐ ܡ̣ܢ ܠܥܸܠ: ܘܨܸܒ̣ܝܵܢܲܝ̈ܟ ܡܸܬ̣ܥܲܒ̣ܕ̇ܝܼܢ ܥܲܠ ܐܲܪܥܵܐ ܡܟܢ ܠܬܲܚܬ̇ ܕܢܵܛܲܪ ܐܲܢ̄ܬ̇ ܕܝܵܬܹܩܹܐ ܘܚܸܣܕ݂ܵܐ ܠܥܲܒ̣ܕܲܝ̈ܟ: ܕܲܡܗܲܠܟ݂ܝܼܢ ܩܕ݂ܵܡܲܝܟ ܬܪܝܼܨܵܐܝܼܬ̣ ܒܟ݂ܠܹܗ ܠܸܒ̇ܗܘܿܢ.

¹⁵ܕܲܢܛܲܪܬ̇ ܠܕ݂ܵܘܝܼܕ݂ ܥܲܒ̣ܕܵܟ݂ ܐܵܒ̣ܝ ܡܸܕܸ̇ܡ ܕܐܸܡܲܪܬ̇ ܠܹܗ. ܘܡܲܠܸܠ̣ܬ̇ ܒܦܘܼܡܵܟ݂ ܘܲܒ̣ܨܸܒ̣ܝܵܢܵܟ݂ ܫܲܠܸܡ̣ܬ̇ ܐܲܝܟ݂ ܕܝܵܘܡܵܢܵܐ.

¹⁶ܘܐܵܦ ܗܵܫܵܐ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܛܲܪ ܠܥܲܒ̣ܕܵܟ݂ ܕܵܘܝܼܕ݂ ܐܵܒ̣ܝ: ܡܸܕܸ̇ܡ ܕܐܸܡܲܪܬ̇ ܠܹܗ: ܕܠܵܐ ܢܸܥܢܲܕ݂ ܠܵܟ݂ ܒܪܵܐ ܡ̣ܢ ܩܕ݂ܵܡܲܝ: ܕܝܵܬܹܒ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ. ܒܲܠܚܘܿܕ݂ ܐܸܢܗ̤ܘ ܕܢܸܛܪܘܼܢ ܒܢܲܝ̈ܟ ܐܘܼܪ̈ܚܵܬ̣ܗܘܿܢ ܠܲܡܗܲܠܵܟ݂ܘܼ ܩܕ݂ܵܡܲܝ ܒܢܵܡܘܿܣܵܐ: ܐܲܝܟܲܢܵܐ ܕܗܲܠܸܟ݂ܬ̇ ܐܲܢ̄ܬ̇ ܩܕ݂ܵܡܲܝ.

¹⁷ܘܡܸܟܹ̇ܝܠ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܢܸܬ̣ܗܲܝܡܢܘܿܢ ܡܸܟܹ̇ܝܠ ܦܸܬ̣ܓ̣ܵܡܲܝ̈ܟ: ܕܡܲܠܸܠ̣ܬ̇ ܠܕ݂ܵܘܝܼܕ݂ ܐܵܒ̣ܝ ܥܲܒ̣ܕܵܟ݂.

¹⁸ܡܸܛܠ ܕܲܒ̣ܗܲܝܡܵܢܘܼܬ̣ܵܐ ܐܲܫܪܝܼ ܡܵܪܝܵܐ ܫܟ݂ܝܼܢܬܹ̇ܗ ܥܲܠ ܥܲܡܹܗ ܝܼܣܪܵܝܹܠ ܥܲܠ ܐܲܪܥܵܐ. ܗܵܐ ܫܡܲܝܵܐ ܘܲܫܡܲܝ̈ ܫܡܲܝܵܐ ܠܵܐ ܡܣܲܝܒ̇ܪܝܼܢ ܠܵܟ݂: ܠܵܐ ܟܸܢ ܗܵܢܵܐ ܒܲܝܬܵܐ ܕܲܒ̣ܢܹ̇ܝܬ̣.

¹⁹ܘܬܸܬ̣ܦܢܸܐ ܥܲܠ ܨܠܘܿܬ̣ܵܐ ܕܥܲܒ̣ܕܵܟ݂ ܘܥܲܠ ܒܵܥܘܼܬܹܗ: ܡܵܪܝܵܐ ܐܲܠܵܗܵܐ: ܠܡܸܫܡܲܥ ܠܲܨܠܘܿܬ̣ܵܐ ܘܲܠܒ̣ܵܥܘܼܬ̣ܵܐ: ܕܥܲܒ̣ܕܵܟ݂ ܡܨܲܠܹܐ ܩܕ݂ܵܡܲܝܟ ܝܵܘܡܵܢܵܐ.

²⁰ܗܵܐ ܠܡܸܗܘܵܐ ܩܕ݂ܵܡܲܝܟ ܝܼܕ݂ܝܼܥ: ܘܲܠܡܸܫܡܲܥ ܠܩܵܠ ܨܠܘܿܬ̣ܵܐ ܕܡܲܢ ܕܢܹܐܬܹܐ ܘܲܢܨܲܠܹܐ ܩܕ݂ܵܡܲܝܟ ܒܒܲܝܬܵܐ ܗܵܢܵܐ: ܒܠܸܠܝܵܐ ܘܒ̣ܐܝܼܡܵܡܵܐ: ܗܵܝ̇ ܕܘܼܟ̇ܬ̣ܵܐ ܕܐܸܡܲܪܬ̇ ܠܡܲܫܪܵܝܘܼ ܫܟ݂ܝܼܢܬܵܟ݂ ܬܲܡܵܢ.

²¹ܠܡܸܫܡܲܥ ܒܲܨܠܘܿܬ̣ܵܐ ܕܥܲܒ̣ܕܵܟ݂ ܘܲܕ݂ܥܲܡܵܟ݂ ܝܼܣܪܵܝܹܠ: ܕܲܡܨܲܠܹܐ ܩܕ݂ܵܡܲܝܟ ܒܕܘܼܟ̇ܬ̣ܵܐ ܗܵܕܹܐ. ܘܐܲܢ̄ܬ̇ ܬܸܫܡܲܥ ܡ̣ܢ ܕܘܼܟ̇ܬ̣ܵܐ ܕܡܵܘܬ̇ܒ̣ܵܟ݂ ܡ̣ܢ ܫܡܲܝܵܐ: ܘܬܸܫܡܲܥ ܘܬܸܫܒ̇ܘܿܩ.

²²ܐܸܢܗ̤ܘ ܕܢܲܣܟܸ̇ܠ ܒܲܪܢܵܫܵܐ ܒܚܲܒ̣ܪܹܗ: ܘܢܸܦܣܘܿܩ ܥܠܵܘܗܝ ܡܵܘܡܵܬ̣ܵܐ ܠܡܵܘܡܵܝܘܼܬܹܗ: ܘܢܹܐܬܹܐ ܘܢܹܐܡܹܐ ܩܕ݂ܵܡ ܡܲܕ݂ܒ̇ܚܵܟ݂ ܒܒܲܝܬܵܐ ܗܵܢܵܐ.

²³ܘܐܲܢ̄ܬ̇ ܬܸܫܡܲܥ ܒܩܵܠ ܨܠܘܿܬܹܗ: ܡ̣ܢ ܕܘܼܟ̇ܬ̣ܵܟ݂ ܡ̣ܢ ܫܡܲܝܵܐ. ܘܬܸܥܒܸ̇ܕ݂ ܘܲܬ̇ܕ݂ܘܼܢ ܠܥܲܒ̣ܕܲܝ̈ܟ. ܠܲܡܚܲܝܵܒ̣ܘܼ ܠܚܲܝܵܒ̣ܘܼ: ܘܲܠܡܸܬܲܠ ܐܘܼܪܚܹܗ ܒܪܹܫܹܗ: ܘܠܲܡܙܲܕܵܩܘܼ ܠܙܲܕ̇ܝܼܩܵܐ: ܘܲܠܡܸܬܲܠ ܠܹܗ ܐܲܝܟ݂ ܙܲܕ̇ܝܼܩܘܼܬܹܗ.

²⁴ܘܐܸܢܗ̤ܘ ܕܢܸܬ̇ܬ̇ܒܲܪ ܥܲܡܵܟ݂ ܝܼܣܪܵܝܹܠ: ܩܕ݂ܵܡ ܒܥܸܠܕ̇ܒ̣ܵܒܹܗ ܟܲܕ݂ ܢܸܚܛܘܿܢ ܩܕ݂ܵܡܲܝܟ: ܘܢܸܗܦ̄ܟ݂ܘܿܢ ܠܘܵܬ̣ܵܟ݂: ܘܢܵܘܕ̇ܘܿܢ ܠܲܫܡܵܟ݂ ܪܲܒܵܐ: ܘܲܢܨܲܠܘܿܢ: ܘܢܸܒ̣ܥܘܿܢ ܡ̣ܢ ܩܕ݂ܵܡܲܝܟ ܒܒܲܝܬܵܐ ܗܵܢܵܐ.

²⁵ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ: ܘܬܸܫܒ̇ܘܿܩ ܠܲܚܛܵܗܵܘ̈ܗܝ ܕܥܲܡܵܟ݂ ܝܼܣܪܵܝܹܠ. ܘܬܲܗܦܸܟ݂ ܐܸܢܘܿܢ ܠܐܲܪܥܵܐ ܕܝܲܗ̄ܒ̣ܬ̇ ܠܗܘܿܢ ܘܠܲܐܒ̣ܵܗܲܝ̈ܗܘܿܢ.

²⁶ܘܟܲܕ݂ ܢܸܬ̣ܟ̇ܠܘܿܢ ܫܡܲܝܵܐ: ܘܠܵܐ ܢܸܗܘܹܐ ܡܸܛܪܵܐ: ܟܲܕ݂ ܢܸܚܛܘܿܢ ܩܕ݂ܵܡܲܝܟ: ܘܲܢܨܲܠܘܿܢ ܩܕ݂ܵܡܲܝܟ ܒܕ݂ܘܼܟ̇ܬ̣ܵܐ ܗܵܕܹܐ: ܘܢܵܘܕ̇ܘܿܢ ܠܲܫܡܵܟ݂ ܪܲܒܵܐ: ܘܡ̣ܢ ܚܛܵܗܲܝ̈ܗܘܿܢ ܢܸܗܦ̄ܟ݂ܘܿܢ: ܡܸܛܠ ܕܬܸܥܢܸܐ ܐܸܢܘܿܢ.

²⁷ܘܐܲܢ̄ܬ̇ ܬܸܫܡܲܥ ܒܩܵܠ ܨܠܘܿܬ̣ܗܘܿܢ ܡ̣ܢ ܫܡܲܝܵܐ ܘܬܸܫܒ̇ܘܿܩ ܠܲܚܛܵܗܵܘ̈ܗܝ ܕܥܲܒ̣ܕܵܟ݂ ܘܲܕ݂ܥܲܡܵܟ݂ ܝܼܣܪܵܝܹܠ ܡܸܛܠ ܕܬܲܠܸܦ ܐܸܢܘܿܢ ܐܘܼܪܚܵܟ݂ ܫܲܦܝܼܪܬܵܐ ܕܢܹܐܙ̄ܠܘܼܢ ܒܵܗ̇: ܘܬܸܬܸ̇ܠ ܡܸܛܪܵܐ ܕܒ̣ܘܼܪܟ̇ܬ̣ܵܐ ܥܲܠ ܐܲܪܥܵܐ ܕܝܲܗ̄ܒ̣ܬ̇ ܒܝܵܪܬ̇ܘܼܬܹܗ ܕܥܲܡܵܟ݂.

²⁸ܘܟܲܦܢܵܐ ܟܲܕ݂ ܢܸܗܘܹܐ ܒܐܲܪܥܵܐ: ܘܡܵܘܬܵܢܵܐ ܟܲܕ݂ ܢܸܗܘܹܐ: ܘܫܘܼܚܢܵܐ ܘܫܘܼܢܵܩܵܐ: ܘܩܲܡܨܵܐ ܦܵܪܚܵܐ: ܘܙܵܚܠܵܐ ܟܲܕ݂ ܢܸܗܘܹܐ: ܘܟܲܕ݂ ܢܥܝܼܩܘܼܢ ܠܗܘܿܢ ܒܥܠܕ̇ܒ̣ܵܒܹ̈ܐ ܒܐܲܪ̱ܥܗܘܿܢ ܘܲܒ̣ܩܘܼܪ̈ܝܼܗܘܿܢ: ܟܠ ܡܲܟ݂ܬܵܫܵܐ ܘܟ݂ܠ ܟܹܐܒ̣̈ܝܼܢ.

²⁹ܟܠ ܨܠܘܿܬ̣ܵܐ ܘܒ̣ܵܥܘܼܬ̣ܵܐ ܕܬܸܗܘܹܐ ܠܟ݂ܠܗܘܿܢ ܒܢܲܝ̈ܢܵܫܵܐ: ܠܟ݂ܠܹܗ ܥܲܡܵܟ݂ ܝܼܣܪܵܝܹܠ: ܕܲܢܣܲܝܒ̇ܪܘܼܢ ܓܒܲܪ ܟܹܐܒ̣ܵܐ ܕܠܸܒܹ̇ܗ. ܘܢܹܐܬܹܐ ܘܢܸܦܪܘܿܣ ܐܝܼܕ݂ܵܘ̈ܗܝ ܒܒܲܝܬܵܐ ܗܵܢܵܐ.

³⁰ܘܐܲܢ̄ܬ̇ ܬܸܫܡܲܥ ܒܩܵܠܵܐ ܕܲܨܠܘܿܬ̣ܗܘܿܢ ܡ̣ܢ ܫܡܲܝܵܐ. ܘܬܸܫܒ̇ܘܿܩ ܠܚܵܘ̈ܒܲܝܗܘܿܢ ܘܬܸܦܪܘܿܥ ܠܓܲܒ̣ܪܵܐ ܐܲܝܟ݂ ܟܠܗܹܝܢ ܐܘܼܪ̈ܚܵܬܹܗ: ܕܝܵܕܲܥ ܐܲܢ̄ܬ̇ ܠܸܒܹ̇ܗ: ܡܸܛܠ ܕܐܲܢ̄ܬ̇ ܗ̄ܘ̣ ܝܵܕܲܥ ܐܲܢ̄ܬ̇ ܒܲܠܚܘܿܕܲܝܟ ܠܸܒ̇ܗܘܿܢ ܕܟ݂ܠܗܘܿܢ ܒܢܲܝ̈ܢܵܫܵܐ.

³¹ܡܸܛܠ ܗܵܢܵܐ ܢܸܕ݂ܚ̄ܠܘܼܢ ܠܲܡܗܲܠܵܟ݂ܘܼ ܩܕ݂ܵܡܲܝܟ ܒܐܘܼܪ̈ܚܵܬ̣ܵܟ݂: ܟܠܗܘܿܢ ܝܵܘ̈ܡܵܬ̣ܵܐ ܕܚܲܝܝܼܢ ܥܲܠ ܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵܗܲܝ̈ܗܘܿܢ.

³²ܐܵܦ ܥܲܠ ܢܘܼܟ݂ܪܵܝܵܐ ܕܠܵܐ ܗ̄ܘ̣ܵܐ ܡ̣ܢ ܥܲܡܵܟ݂ ܝܼܣܪܵܝܹܠ: ܘܢܹܐܬܹܐ ܡ̣ܢ ܡܕ݂ܝܼ̈ܢܵܬ̣ܵܐ ܪ̈ܲܚܝܼܩܵܬ̣ܵܐ ܡܸܛܠ ܫܡܵܟ݂. ܡܸܛܠ ܕܢܸܫ̱ܡܥܘܼܢ ܛܸܒܹ̇ܗ ܕܲܫܡܵܟ݂ ܪܲܒܵܐ. ܘܢܹܐܬ̣ܘܿܢ ܘܲܢܨܲܠܘܿܢ ܩܕ݂ܵܡܲܝܟ ܒܝܵܘܡܵܐ ܗܵܘ̇ ܒܒܲܝܬܵܐ ܗܵܢܵܐ.

³³ܘܐܲܢ̄ܬ̇ ܬܸܫܡܲܥ ܡ̣ܢ ܕܘܼܟ̇ܬ̣ܵܟ݂ ܡ̣ܢ ܫܡܲܝܵܐ. ܘܬܸܥܒܸ̇ܕ݂ ܐܲܝܟܲܢܵܐ ܕܲܢܨܲܠܹܐ ܩܕ݂ܵܡܲܝܟ ܢܘܼܟ݂ܪܵܝܵܐ: ܡܸܛܠ ܕܢܸܕ̇ܥܘܼܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ ܫܡܵܟ݂. ܠܡܸܕܚܲܠ ܩܕ݂ܵܡܲܝܟ ܐܲܝܟ݂ ܥܲܡܵܟ݂ ܝܼܣܪܵܝܹܠ: ܘܲܠܡܸܕܲܥ ܕܲܫܡܵܟ݂ ܐܸܬ̣ܩܪܝܼ ܥܲܠ ܒܲܝܬܑܵ ܗܵܢܵܐ ܕܲܒ̣ܢܹ̇ܝܬ̣.

³⁴ܘܟܲܕ݂ ܢܸܦܘܿܩ ܥܲܡܵܟ݂ ܠܲܩܪܵܒ̣ܵܐ ܥܲܠ ܒܥܸܠܕ̇ܒ̣ܵܒ̣ܵܘ̈ܗܝ ܒܐܘܼܪܚܵܐ ܕܲܬ̣ܫܲܕܲܪ ܐܸܢܘܿܢ: ܘܲܢܨܲܠܘܿܢ ܩܕ݂ܵܡܲܝܟ ܒܐܘܼܪܚܵܐ ܕܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵܗܵܬ̣̈ܗܘܿܢ: ܒܲܩܪܝܼܬ̣ܵܐ ܕܲܓܒܲܝܬ̇ ܠܵܟ݂: ܘܒܲܝܬܵܐ ܕܲܒ̣ܢܹ̇ܝܬ̣ ܠܲܫܡܵܟ݂.

³⁵ܘܬܸܫܡܲܥ ܡ̣ܢ ܫܡܲܝܵܐ ܨܠܘܿܬ̣ܗܘܿܢ ܘܒ̣ܵܥܘܼܬ̣ܗܘܿܢ: ܘܬܸܥܒܸ̇ܕ݂ ܕܝܼܢܗܘܿܢ.

³⁶ܟܲܕ݂ ܢܸܚܛܘܿܢ ܩܕ݂ܵܡܲܝܟ: ܡܸܛܠ ܕܠܵܐ ܐܝܼܬ̣ ܒܲܪܢܵܫܵܐ ܕܠܵܐ ܚܵܛܹ̇ܐ ܘܪܵܓܹ̇ܙ ܐܲܢ̄ܬ̇ ܥܠܲܝܗܘܿܢ: ܘܡܲܫܠܸܡ ܐܲܢ̄ܬ̇ ܠܗܘܿܢ ܩܕ݂ܵܡ ܒܥܸܠܕ̇ܒ̣ܵܒܲܝ̈ܗܘܿܢ. ܘܢܸܫܒ̇ܘܿܢ ܐܸܢܘܿܢ ܫܵܒܲܝ̈ܗܘܿܢ: ܠܐܲܪܥܵܐ ܪܚܝܼܩܬ̣ܵܐ ܐܵܘ ܩܲܪܝܼܒ̣ܬܵܐ.

³⁷ܘܲܢܨܲܠܘܿܢ ܩܕ݂ܵܡܲܝܟ: ܘܢܸܗܦ̄ܟ݂ܘܿܢ. ܘܒܲܡܕ݂ܝܼ̈ܢܵܬ̣ܵܐ ܕܫܵܒܲܝ̈ܗܘܿܢ: ܢܹܐܡܪܘܿܢ ܕܲܚܛܲܝܢ ܘܐܲܪܓܸ̇ܙ̄ܢ ܘܐܲܥܘܸܠ̄ܢ.

³⁸ܘܢܸܗܦ̄ܟ݂ܘܿܢ ܠܘܵܬ̣ܵܟ݂: ܒܟ݂ܠܹܗ ܠܸܒ̇ܗܘܿܢ: ܘܲܒ̣ܟ݂ܠܵܗ̇ ܢܲܦ̮ܫܗܘܿܢ: ܒܲܡܕ݂ܝܼ̈ܢܵܬ̣ܵܐ ܕܫܵܒܲܝ̈ܗܘܿܢ ܕܲܫܒ̣ܵܘ ܐܸܢܘܿܢ. ܘܲܢܨܲܠܘܿܢ ܒܐܘܼܪܚܵܐ ܕܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵـ̈ـܗܵܬ̣ܗܘܿܢ: ܩܪܝܼܬ̣ܵܐ ܕܲܓ̣ܒܲܝܬ̇ ܠܵܟ݂: ܘܒܲܝܬܵܐ ܕܲܒ̣ܢܹ̇ܝܬ̣ ܠܲܫܡܵܟ݂.

³⁹ܘܬܸܫܡܲܥ ܡ̣ܢ ܫܡܲܝܵܐ ܡ̣ܢ ܕܘܼܟ̇ܬ̣ܵܟ݂ ܨܠܘܿܬ̣ܗܘܿܢ ܘܒ̣ܵܥܘܼܬ̣ܗܘܿܢ: ܘܬܸܥܒܸ̇ܕ݂ ܕܝܼܢܗܘܿܢ. ܘܬܸܫܒ̇ܘܿܩ ܠܥܲܡܵܟ݂ ܕܲܚܛܵܘ ܩܕ݂ܵܡܲܝܟ.

⁴⁰ܘܡܸܟܹ̇ܝܠ ܐܲܠܵܗܝ: ܢܸܗ̱ܘ̈ܝܵܢ ܥܲܝܢܲܝ̈ܟ ܦܬ̣ܝܼ̈ܚܝܼܢ: ܘܐܸܕ݂ܢܲܝ̈ܟ ܨܵܝ̈ܬܵܢ ܠܲܨܠܘܿܬ̣ܵܐ ܕܕ݂ܘܼܟ̇ܬ̣ܵܐ ܗܵܕܹܐ.

⁴¹ܘܡܸܟܹ̇ܝܠ ܩܘܼܡ ܡܵܪܹܐ ܡܵܪ̈ܵܘܵܬ̣ܵܐ ܠܲܢܝܵܚܬܵܟ݂: ܐܲܢ̄ܬ̇ ܘܐܵܪܘܿܢ ܥܘܼܫܢܵܟ݂. ܟܵܗ̈ܢܲܝܟ ܡܵܪܹܐ ܡܵܪ̈ܵܘܵܬ̣ܵܐ ܦܘܼܪܩܵܢܵܐ ܬܲܠܒܸ̇ܫ: ܘܙܲܕ̇ܝܼܩܲܝ̈ܟ ܢܸܚܕ̇ܘܿܢ ܒܛܵܒ̣ܵـ̈ـܬ̣ܵܟ݂.

⁴²ܡܵܪܹܐ ܡܵܪ̈ܵܘܵܬ̣ܵܐ ܠܵܐ ܬܲܗܦܸܟ݂ ܐܲܦܵܘ̈ܗܝ ܕܲܡܫܝܼܚܵܟ݂. ܐܸܬ̇ܕܲܟ݂ܪ ܛܲܝ̈ܒ̇ܘܵܬܹܗ ܕܥܲܒ̣ܕܵܟ݂ ܕܵܘܝܼܕ݂.