Read Aramaic Peshita Ezra 10 Bible Online

Ezra 10 - Aramaic Peshita bible

Ezra 10

¹ܘܟܲܕܼ ܨܲܠܝܼ ܥܲܙܪܵܐ: ܘܟܲܕܼ ܐܸܬ̣ܝܲܕ̇ܝܼ: ܪܡܸܐ ܗ̄ܘ̣ܵܐ ܘܒ̣ܵܟܹ̇ܐ ܩܕܼܵܡ ܒܲܝܬܹ̇ܗ ܕܡܵܪܝܵܐ. ܘܐܸܬ̣ܟܲܢܲܫܘ ܠܘܵܬܹܗ ܡ̣ܢ ܝܼܣܪܵܝܹܠ ܟܸܢܫܵܐ ܪܲܒܵܐ ܕܛܵܒ̣: ܓܲܒ̣ܪܹ̈ܐ ܘܲܛܠܵܝܹ̈ܐ: ܡܸܛܠ ܕܒ̣ܵܟܹܝܢ ܗ̄ܘ̣ܵܘ ܛܠܵܝܹ̈ܐ ܪܲܒܵܐ ܕܛܵܒ̣.

²ܘܲܥܢܵܐ ܫܟܲܢܝܵܐ ܒܲܪ ܢܚܵܐܹܝܠ ܡ̣ܢ ܒܢܲܝ̈ ܥܝܼܠܵܡ: ܘܐܸܡܲܪ ܠܥܲܙܪܵܐ ܣܵܦܪܵܐ: ܚܢܲܢ ܟܲܕܸ̇ܒ̣̄ܢ ܒܡܵܪܝܵܐ ܐܲܠܵܗܲܢ. ܘܐܵܘܬܸ̇ܒ̣̄ܢ ܢܸܫܹ̈ܐ ܢܘܼܟ̣ܪ̈ܵܝܵܬ̣ܵܐ ܡ̣ܢ ܥܲܡܡܹ̈ܐ ܕܐܲܪܥܵܐ. ܡܸܟܹ̇ܝܠ ܐܝܼܬ̣ ܣܲܒ̣ܪܵܐ ܠܝܼܣܪܵܝܹܠ ܡܸܛܠ ܗܵܕܹܐ.

³ܡܸܟܹ̇ܝܠ ܢܹܐܡܲܪ ܡܵܘ̈ܡܵܬ̣ܵܐ ܩܕܼܵܡ ܐܲܠܵܗܲܢ: ܠܡܲܦܵܩܘܼ ܟܠ ܢܸܫܹ̈ܐ ܢܘܼܟ̣ܪ̈ܵܝܵܬ̣ܵܐ: ܘܐܲܝܠܹܝܢ ܕܐܸܬ̣̱ܝܼܠܸܕܼܘ ܡܸܢܗܹܝܢ ܘܐܲܝܟ ܡܸܠܟܵܐ ܕܡܵܪܝܵܐ ܘܐܲܝܠܹܝܢ ܕܕܼܵܚ̇ܠܝܼܢ ܡ̣ܢ ܢܵܡܘܿܣܵܐ ܕܐܲܠܵܗܲܢ ܘܡ̣ܢ ܦܘܼܩܕܵܢܹܗ: ܥܒܸܕܼ ܘܐܲܫܲܪ.

⁴ܡܸܛܠ ܕܲܥܠܲܝܟ ܗ̄ܘ̣ ܦܣܝܼܩ ܦܣܵܩܵܐ ܗܵܢܵܐ. ܡܸܛܠ ܕܲܚܢܲܢ ܥܲܡܵܟ. ܐܸܬ̣ܥܲܫܲܢ ܘܲܥܒܸܕܼ.

⁵ܘܩܵܡ ܥܲܙܪܵܐ ܣܵܦܪܵܐ ܘܐܵܘܡܝܼ ܠܩܲܫܝܼܫܲܝ̈ ܟܘܼܡܪܹ̈ܐ ܘܠܹܘܵܝܹ̈ܐ: ܘܲܠܟ̣ܠܹܗ ܝܼܣܪܵܝܹܠ: ܠܡܸܥܒܲܕܼ ܐܲܝܟ̣ ܦܘܼܩܕܵܢܵܐ ܗܵܢܵܐ. ܘܝܼܡܝܼܘ.

⁶ܘܩܵܡ ܥܲܙܪܵܐ ܣܵܦܪܵܐ ܡ̣ܢ ܩܕܼܵܡ ܒܲܝܬܵܐ ܕܡܵܪܝܵܐ. ܘܐܸܙܲܠ ܠܐܲܟ̣ܣܸܕܼܪܹ̈ܐ ܕܝܘܿܚܲܢܵܢ ܒܲܪ ܐܹܠܝܼܫܲܥ: ܘܝܼܬܸܒ̣ ܬܲܡܵܢ. ܠܲܚܡܵܐ ܠܵܐ ܐܸܟܲܠ: ܘܡܲـ̈ـܝܵܐ ܠܵܐ ܐܸܫܬ̇ܝܼ ܡܸܛܠ ܕܟܲܪܝܵܐ ܗ̄ܘ̣ܵܬ̣ ܠܹܗ ܥܲܠ ܥܵܘܼܠܹܗ ܕܥܲܡܵܐ.

⁷ܘܲܩܪܵܘ ܟܵܗ̈ܢܹܐ ܒܲܝܗܘܼܕܼ ܘܒ̣ܐܘܿܪܸܫܠܸܡ: ܘܲܒ̣ܟ̣ܠ ܒܢܲܝ̈ ܫܒ̣ܝܼܬ̣ܵܐ: ܠܡܸܬ̣ܩܲܪܵܒ̣ܘܼ ܠܐܘܿܪܸܫܠܸܡ ܡܕܼܝܼܢ̄ܬܵܐ.

⁸ܘܟ̣ܠ ܡܲܢ ܕܠܵܐ ܢܹܐܬܹܐ ܠܲܬ̣ܠܵܬ̣ܵܐ ܝܵܘ̈ܡܝܼܢ: ܢܸܗܘܹܐ ܠܹܗ ܐܲܝܟ ܡܸܠܟܵܐ ܕܩܲܫܝܼܫܹ̈ܐ ܘܲܕܼܪܵܘ̱ܪ̈ܒ̣ܵܢܹܐ. ܢܸܗܘܘܿܢ ܚܸܪ̈ܡܝܼܢ ܢܸܟ̣ܣܵܘ̈ܗܝ ܘܗ̤ܘ ܢܸܬ̣ܦܪܸܫ ܡ̣ܢ ܥܲܡܵܐ ܕܝܼܣܪܵܝܹܠ.

⁹ܘܐܸܬ̣ܟܲܢܲܫܘ ܟܠ ܐ̄ܢܵܫܲܝ̈ ܝܼܗܘܼܕܼܵܐ ܘܒܸܢܝܵܡܹܝܢ ܠܐܘܿܪܸܫܠܸܡ: ܠܲܬ̣ܠܵܬ̣ܵܐ ܝܵܘ̈ܡܝܼܢ ܒܝܲܪܚܵܐ ܕܬܸܫܥܵܐ: ܒܲܥܣܲܪܬܵܐ ܒܝܲܪܚܵܐ ܘܲܟ̣ܢܲܫܘ ܟܠܹܗ ܥܲܡܵܐ ܕܡܵܪܝܵܐ: ܘܙܵܝܥܝܼܢ ܘܪܲܬ̇ܝܼܬ̣ܝܼܢ ܥܲܠ ܡܸܠܬ̣ܵܐ.

¹⁰ܘܩܵܡ̣ ܥܲܙܪܵܐ ܟܵܗܢܵܐ: ܘܐܸܡܲܪ ܠܗܘܿܢ: ܐܲܢ̄ܬ̇ܘܿܢ ܟܲܕܸ̇ܒ̣ܬܘܿܢ ܒܐܲܠܵܗܵܐ. ܘܲܢܣܲܒ̣ܬ̇ܘܿܢ ܢܸܫܹ̈ܐ ܢܘܼܟ̣ܪ̈ܵܝܵܬ̣ܵܐ. ܘܐܵܘܣܸܦܬ̇ܘܿܢ ܥܲܠ ܚܛܵܗܹ̈ܐ ܕܝܼܣܪܵܝܹܠ.

¹¹ܡܸܟܹ̇ܝܠ ܗܲܒ̣ܘ ܬܵܘܕ̇ܝܼܬ̣ܵܐ ܠܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܟ̇ܘܿܢ ܘܲܥܒܸܕܼܘ ܨܸܒ̣ܝܵܢܹܗ. ܘܐܸܬ̣ܦܲܪܫ̄ܘ ܡ̣ܢ ܥܲܡܡܹ̈ܐ ܕܐܲܪܥܵܐ. ܘܡ̣ܢ ܢܸܫܹ̈ܐ ܢܘܼܟ̣ܪ̈ܵܝܵܬ̣ܵܐ.

¹²ܘܲܥܢܵܐ ܟܠܹܗ ܥܲܡܵܐ ܘܐܵܡ̇ܪܝܼܢ ܠܥܲܙܪܵܐ ܒܩܵܠܵܐ ܪܵܡܵܐ: ܫܲܦܝܼܪܝܼܢ ܦܸܬ̣ܓ̣ܵܡܲܝ̈ܟ ܥܠܲܝܢ. ܘܲܡܩܲܒܲܠ ܟܠ ܡܸܕܸ̇ܡ ܐܲܢ̄ܬ̇ ܥܠܲܝܢ ܠܡܸܥܒܲܕܼ ܒܫܲܪܝܼܪ̈ܵܬ̣ܵܐ.

¹³ܗܵܫܵܐ ܕܹܝܢ ܥܲܡܵܐ ܣܲܓ̇ܝܼ: ܘܥܸܕܵܢܵܐ ܕܡܸܛܪܵܐ ܗ̄ܘ̣ ܘܠܲܝܬ̇ ܒܲܢ ܚܲܝܠܵܐ ܠܲܡܩܵܡ ܒܫܘܼܩܵܐ. ܘܲܥܒ̣ܝܼܕ̇ܬܵܐ ܠܵܐ ܗ̄ܘ̣ܵܬ̣ ܕܚܲܕܼ ܗ̄ܝ̣ ܝܘܿܡ ܘܠܵܐ ܕܲܬ̣ܪܹܝܢ ܡܸܛܠ ܕܣܲܓ̇ܝܼܐܝܼܢ ܐܸܢܘܿܢ ܚܛܵܗܲܝ̈ܢ ܒܦܸܬ̣ܓ̣ܵܡܵܐ ܗܵܢܵܐ.

¹⁴ܡܸܟܹ̇ܝܠ ܢܩܘܼܡܘܿܢ ܩܲܫܝܼ̈ܫܲܝܢ ܘܟ̣ܠܹܗ ܥܲܡܵܐ: ܘܟ̣ܠ ܕܐܝܼܬ̣ ܒܩܘܼܪ̈ܝܵܐ ܕܝܼܠܲܢ: ܐܝܠܹܝܢ ܕܐܵܘܬܸ̇ܒ̣ܘ ܢܸܫܹ̈ܐ ܢܘܼܟ̣ܪ̈ܵܝܵܬ̣ܵܐ: ܘܢܹܐܬ̣ܘܿܢ ܠܥܸܕܵܢܵܐ ܕܲܨܠܘܿܬ̣ܵܐ: ܘܥܲܡܗܘܿܢ ܩܲܫܝܼ̈ܫܹܐ ܕܩܘܼܪ̈ܝܵܐ: ܘܩܘܼܪ̈ܝܵܐ ܘܕܲܝܵܢܲܝܗܹܝܢ: ܥܕܲܡܵܐ ܕܢܲܗܦ̄ܟ̣ܘܼܢ ܚܸܡܬܹܗ ܕܐܲܠܵܗܲܢ ܡܸܢܲܢ: ܡܸܛܠ ܡܵܘܡܵܬ̣ܵܐ ܗܵܕܹܐ.

¹⁵ܒܪܲܡ ܝܘܿܢܵܬܲܢ ܒܲܪ ܥܲܡܲܢܘܼܐܹܝܠ: ܘܲܢܚܲܙܝܵܐ ܒܲܪ ܬܲܩܘܵܐ: ܘܡܲܫܠܲܡ: ܩܵܡ̣ܘ ܥܲܠ ܡܸܠܬ̣ܵܐ ܗܵܕܹܐ: ܘܡܲܬܲܝ ܠܹܘܵܝܵܐ ܥܵܕܼܘܿܪܗܘܿܢ.

¹⁶ܘܗܵܟܲܢܵܐ ܥܒܲܕܼܘ ܒܢܲܝ̈ ܫܒ̣ܝܼܬ̣ܵܐ ܘܲܦܪܲܫ ܥܲܙܪܵܐ ܟܵܗܢܵܐ ܥܸܣܪܝܼܢ ܓܲܒ̣ܪ̈ܝܼܢ ܪܹ̈ܫܹܐ ܕܐܲܒ̣ܵـ̈ـܗܵܬ̣ܵܐ: ܠܒܹܝܬ̣ ܐܲܒ̣ܵܗܲܝ̈ܗܘܿܢ. ܘܟ̣ܠܗܘܿܢ ܒܲܫܡܵܗܹ̈ܐ ܐܸܬ̣ܩܪܝܼܘ. ܘܝܼܬܸܒ̣ܘ ܒܝܘܿܡ ܚܲܕܼ ܒܝܲܪܚܵܐ ܕܥܸܣܪܵܐ: ܠܡܸܬ̣ܒ̇ܥܹܗ ܠܦܸܬ̣ܓ̣ܵܡܵܐ.

¹⁷ܘܲܓ̣ܡܲܪܘ ܟܠܗܘܿܢ ܓܲܒ̣ܪܹ̈ܐ ܕܐܵܘܬܸ̇ܒ̣ܘ ܢܸܫܹ̈ܐ ܢܘܼܟ̣ܪ̈ܵܝܵܬ̣ܵܐ: ܥܕܲܡܵܐ ܠܝܘܿܡ ܚܲܕܼ ܒܝܲܪܚܵܐ ܩܲܕܼܡܵܝܵܐ.

¹⁸ܘܐܸܫܬ̇ܟܲܚ ܡ̣ܢ ܒܢܲܝ̈ ܟܘܼܡܪܹ̈ܐ ܕܐܵܘܬܸ̇ܒ̣ܘ ܢܸܫܹ̈ܐ ܢܘܼܟ̣ܪ̈ܵܝܵܬ̣ܵܐ: ܡ̣ܢ ܒܢܵܘ̈ܗܝ ܕܝܼܫܘܿܥ ܒܲܪ ܝܘܿܙܵܕܼܵܩ ܘܐܲܚܵܘ̈ܗܝ: ܡܥܲܣܝܵܐ: ܘܐܹܠܝܼܥܵܙܲܪ: ܘܝܘܿܢܵܕܼܵܒ̣: ܘܲܓ̣ܕܲܠܝܵܐ.

¹⁹ܘܐܸܬ̇ܛܦܝܼܣܘ ܐܵܦ ܗܸܢܘܿܢ ܕܢܲܦܩܘܼܢ ܢܸܫܲܝ̈ܗܘܿܢ. ܘܩܲܪܸܒ̣ܘ ܕܸܟ̣ܪܹ̈ܐ ܕܥܵـ̈ـܢܵܐ ܥܲܠ ܚܛܵܗܲܝ̈ܗܘܿܢ.

²⁰ܡ̣ܢ ܒܢܲܝ̈ ܐܵܡܝܼܪ: ܚܲܢܵܢܝܼ: ܘܲܙܟܲܪܝܵܐ.

²¹ܡ̣ܢ ܒܢܲܝ̈ ܚܵܪܵܡ: ܡܥܲܣܝܵܐ: ܘܐܹܠܝܼܵܐ: ܘܲܫܡܲܥܝܵܐ: ܘܲܚܢܵܢܐܹܝܠ: ܘܥܘܿܙܝܼܵܐ.

²²ܡ̣ܢ ܒܢܲܝ̈ ܦܸܫܚܘܿܪ ܐܸܠܝܵܢ: ܘܲܡܥܲܣܝܵܐ: ܘܐܝܼܫܡܲܥܐܹܝܠ: ܘܢܲܬ̣ܢܝܼܐܹܝܠ: ܘܝܘܼܙܵܒ̣ܵܪ: ܘܐܸܠܥܵܣܵܐ.

²³ܡ̣ܢ ܠܹܘܵܝܹ̈ܐ: ܟܘܼܙܒܲܪ: ܘܫܲܡܠܝܼ: ܘܩܸܠܙܵܐ: ܘܩܸܛܠܵܐ: ܘܲܦܬܲܚܝܵܐ: ܘܲܝܗܘܼܕܼܵܐ: ܘܐܹܠܝܼܥܵܙܲܪ.

²⁴ܡ̣ܢ ܡܫܲܡܫܵܢܹ̈ܐ: ܐܹܠܝܼܫܲܥ: ܘܡ̣ܢ ܬܵܪ̈ܥܹܐ: ܫܵܠܘܿܡ ܘܐܲܛܠܵܡ: ܘܐܘܼܕܼܝܼ.

²⁵ܡ̣ܢ ܝܼܣܪܵܝܹܠ: ܡ̣ܢ ܒܢܲܝ̈ ܦܲܪܥܵܫ: ܐܹܪܲܡܝܵܐ: ܝܼܙܲܢܝܵܐ: ܡܠܲܟ̣ܝܵܐ: ܒܸܢܝܵܡܹܝܢ: ܠܲܥܙܝܼܪ: ܡܠܲܟ̣ܝܵܐ: ܒܢܵܝܵܐ.

²⁶ܡ̣ܢ ܒܢܲܝ̈ ܥܝܼܠܵܡ: ܢܬܲܢܝܵܐ: ܙܟܲܪܝܵܐ: ܢܲܥܝܵܐܹܝܠ: ܥܲܒ̣ܕ̇ܝܼ: ܝܲܪܡܘܿܬ̣: ܐܹܠܝܼܗܘܼ.

²⁷ܡ̣ܢ ܒܢܲܝ̈ ܙܝܼܬ̣ܵܝܹ̈ܐ: ܐܹܠܝܼܚܢܲܝ: ܐܹܠܝܼܫܵܒ̣: ܢܬܲܢܝܵܐ: ܝܲܪܡܘܿܬ̣: ܙܒ̣ܘܿܪ: ܥܘܿܙܝܼܵܐ.

²⁸ܡ̣ܢ ܒܢܲܝ̈ ܒܲܒ̇ܝܼ: ܝܘܿܚܲܢܵܢ: ܚܲܢܲܢܝܵܐ: ܙܲܒ̇ܝܼ: ܥܲܬ̣ܠܝܼ.

²⁹ܡ̣ܢ ܒܢܲܝ̈ ܒܲܟ̇ܝܼ: ܡ̣ܢ ܬܲܫܠܘܼܡ: ܡܠܘܿܟ̣: ܥܘܿܙܝܼܵܐ: ܘܝܘܿܫܵܒ̣: ܘܫܵܐܘܿܠ: ܘܝܲܪܡܘܿܬ̣.

³⁰ܡ̣ܢ ܒܢܲܝ̈ ܫܘܼܠܛܵܢ: ܡܘܼܐܵܒ̣: ܓܕܲܠܝܵܐ: ܟܠܵܠ: ܒܢܵܝܵܐ: ܡܥܲܣܝܵܐ: ܡܬܲܢܝܵܐ: ܒܲܨܠܝܼܐܹܝܠ: ܘܲܒ̣ܢܵܘ̈ܗܝ.

³¹ܒܢܝ̈ ܡܢܲܫܹܐ: ܡ̣ܢ ܒܢܲܝ̈ ܚܵܪܵܡ: ܐܹܠܝܼܥܵܙܲܪ: ܡܠܲܟ̣ܝܵܐ: ܐܲܢܫܘܵܐ: ܫܡܲܥܝܵܐ: ܫܸܡܥܘܿܢ.

³²ܒܸܢܝܵܡܹܝܢ: ܡܠܘܿܟ: ܫܡܲܝܵܐ.

³³ܡ̣ܢ ܒܢܲܝ̈ ܚܫܘܿܡ: ܡܲܬ̣ܢܝܼ: ܡܲܬ̇ܝܼܬ̣ܵܐ ܙܵܟ̣ܵܪ: ܐܹܠܝܼܦܠܵܛ: ܘܟܲܪܡܝܼ: ܘܲܡܢܲܫܹܐ: ܘܫܲܡܥܝܼ.

³⁴ܡ̣ܢ ܒܢܲܝ̈ ܒܲܟ̇ܝܼ: ܡܘܼܥܕܲܝ: ܥܲܡܪܲܡ: ܘܝܘܼܐܹܝܠ.

³⁵ܘܲܒ̣ܢܵܝܵܐ ܒܲܪ ܟܠܝܼܗܘܼ.

³⁶ܘܲܢܗܵܐܹܝܠ: ܡܲܪܡܘܿܬ̣: ܐܹܠܝܼܫܵܒ̣.

³⁷ܡܬܲܢܝܵܐ: ܡܲܬ̣ܢܝܼ: ܥܘܼܬ̣ܝ.

³⁸ܘܲܒ̣ܢܲܝ̈ ܒܢܵܘ̈ܗܝ: ܫܲܡܥܝܼ.

³⁹ܘܲܫܠܲܡܝܵܐ: ܘܢܵܬ̣ܵܢ: ܘܥܲܙܲܪܝܵܐ.

⁴⁰ܘܲܡܟ̣ܝܼܙܵܒ̣: ܘܫܝܼܫܲܝ: ܘܣܲܪܲܝ.

⁴¹ܘܥܲܪܕܵܐܹܝܠ: ܘܲܫܡܲܪܝܵܐ.

⁴²ܘܫܵܠܘܿܡ: ܘܐܵܡܲܪܝܵܐ: ܘܝܵܘܣܸܦ.

⁴³ܡ̣ܢ ܒܢܲܝ̈ ܢܵܒ̣ܘܿ: ܢܒ̣ܘܼܐܹܝܠ: ܘܡܲܬ̇ܝܼܬ̣ܵܐ: ܘܙܵܟ̣ܘܿܪ: ܘܲܙܒ̣ܝܼܢܵܐ: ܘܝܘܿܐܹܝܠ: ܘܲܒ̣ܢܵܝܵܐ.

⁴⁴ܟܠܗܘܿܢ ܗܵܠܹܝܢ ܢܣܲܒ̣ܘ ܢܸܫܹ̈ܐ ܢܘܼܟ̣ܪ̈ܵܝܵܬ̣ܵܐ ܐܝܼܬ̣ ܕܹܝܢ ܡܸܢܗܘܿܢ ܐ̄ܢܵܫܵܐ ܕܐܵܘܠܸܕܼܘ ܒܢܲـ̈ـܝܵܐ.