Read Aramaic Peshita Ezra 3 Bible Online

Ezra 3 - Aramaic Peshita bible

Ezra 3

¹ܘܡܲܛܝܼ ܝܲܪܚܵܐ ܫܒ̣ܝܼܥܵܝܵܐ: ܘܲܒ̣ܢܲܝ̈ ܝܼܣܪܵܝܹܠ ܒܩܘܼܪ̈ܝܼܗܘܿܢ. ܘܐܸܬ̣ܟܲܢܲܫܘ ܥܲܡܵܐ ܐܲܝܟ ܓܲܒ̣ܪܵܐ ܚܲܕܼ: ܠܡܸܣܲܩ ܠܐܘܿܪܸܫܠܸܡ.

²ܘܩܵܡ̣ܘ ܝܼܫܘܿܥ ܒܲܪ ܝܘܿܙܵܕܼܵܩ ܘܐܲܚܵܘ̈ܗܝ ܟܘܼܡܪܹ̈ܐ: ܘܙܘܼܪܒܵܒܹܠ ܒܲܪ ܫܸܠܲܬ̣ܐܹܝܠ ܘܐܲܚܵܘ̈ܗܝ. ܘܲܒ̣ܢܵܘ ܡܲܕܼܒ̇ܚܵܐ ܠܐܲܠܵܗܵܐ ܕܝܼܣܪܵܝܹܠ ܠܡܲܣܵܩܘܼ ܥܠܵܘܗܝ ܥ̈ܠܵܘܵܬ̣ܵܐ: ܐܲܝܟܲܢܵܐ ܕܲܟ̣ܬ̣ܝܼܒ̣ ܒܢܵܡܘܿܣܵܐ ܕܡܘܼܫܹܐ ܢܒ̣ܝܼܵܐ ܕܐܲܠܵܗܵܐ.

³ܘܐܸܬ̇ܬܲܩܲܢ ܡܲܕܼܒ̇ܚܵܐ ܥܲܠ ܡܲܬ̣ܩܢܹܗ. ܡܸܛܠ ܕܕܸܚ̱ܠܬ̣ܵܐ ܪܲܒ̇ܬ̣ܵܐ ܗ̄ܘ̣ܵܬ̣ ܥܠܲܝܗܘܿܢ ܡ̣ܢ ܥܲܡܡܹ̈ܐ ܕܥܵܡ̇ܪܝܼܢ ܒܲܡܕܼܝܼ̈ܢܵܬ̣ܵܐ ܘܐܲܣܸܩ̣ܘ ܥܠܵܘܗܝ ܥ̈ܠܵܘܵܬ̣ܵܐ ܠܡܵܪܝܵܐ: ܥܠܵܬ̣ܵܐ ܠܨܲܦܪܵܐ ܘܲܠܪܲܡܫܵܐ.

⁴ܘܲܥܒܲܕܼܘ ܥܹܐܕܼܵܐ ܕܲܡܛܲܠ̈ܠܹܐ ܐܲܝܟ ܕܲܟ̣ܬ̣ܝܼܒ̣: ܘܲܥ̈ܠܵܘܵܬ̣ܵܐ ܝܘܿܡ ܒܝܘܿܡ ܒܡܸܢܝܵܢܵܐ ܐܲܝܟ̣ ܢܵܡܘܿܣܵܐ: ܚܘܼܫܒܵܢ ܝܘܿܡ ܒܝܵܘܡܹܗ.

⁵ܘܒ̣ܵܬܲܪܟܸ̇ܢ ܥܠܵܬ̣ܵܐ ܐܲܡܝܼܢܬܵܐ ܠܝܲܪ̈ܚܹܐ: ܘܲܠܟ̣ܠ ܥܲܕܼܥܹܕܼܵܘ̈ܗܝ ܕܡܵܪܝܵܐ ܡܩܲܕ̇ܫܹ̈ܐ: ܘܲܠܟ̣ܠ ܡܲܢ ܕܨܵܒܹ̇ܐ ܨܸܒ̣ܝܵܢܵܐ ܕܡܵܪܝܵܐ.

⁶ܡ̣ܢ ܚܲܕܼ ܒܝܲܪܚܵܐ ܫܒ̣ܝܼܥܵܝܵܐ: ܫܲܪܝܼܘ ܠܡܲܣܵܩܘܼ ܥܠܵܬ̣ܵܐ ܠܡܵܪܝܵܐ. ܘܗܲܝܟ̇ܠܵܐ ܕܡܵܪܝܵܐ ܥܕܲܡܵܐ ܠܗܵܫܵܐ ܠܵܐ ܐܸܬ̣ܓܲܡܲܪ.

⁷ܘܝܲܗ̄ܒ̣ܘ ܟܸܣܦܵܐ ܠܦܵܣܘܿܠܹܐ: ܘܲܠܢܲܓܵܪܹ̈ܐ: ܘܲܠܡܹܐܟ̣ܠܵܐ ܘܲܠܡܲܫܬ̇ܝܵܐ: ܘܡܸܫܚܵܐ ܠܨܘܿܪ̈ܵܝܹܐ ܘܲܠܨܲܝܕ̇ܢܵܝܹ̈ܐ: ܠܡܲܝܬܵܝܘܼ ܩܲܝܣܹ̈ܐ ܕܐܲܪ̈ܙܹܐ ܡ̣ܢ ܠܸܒ̣ܢܵܢ ܒܝܲܡܵܐ ܠܝܘܿܦܹܐ: ܐܲܝܟܲܢܵܐ ܕܲܟ̣ܬܲܒ̣ ܟܘܼܪܸܫ ܡܲܠܟܵܐ ܕܦܵܪܹܣ ܥܠܲܝܗܘܿܢ.

⁸ܒܫܲܢ̄ܬܵܐ ܕܬܲܪܬܹ̇ܝܢ ܟܲܕܼ ܥܲܠ̣ܘ ܠܒܲܝܬܹ̇ܗ ܕܡܵܪܝܵܐ ܕܒ̣ܐܘܿܪܸܫܠܸܡ: ܒܝܲܪܚܵܐ ܕܲܬ̣ܪܹܝܢ: ܫܲܕܲܪ ܙܘܼܒܵܒܹܠ ܒܲܪ ܫܠܲܬ̣ܐܹܝܠ ܘܝܼܫܘܿܥ ܒܲܪ ܝܘܼܙܵܕܼܵܩ ܘܫܲܪܟܵܐ ܕܐܲܚܲܝ̈ܗܘܿܢ: ܘܟ̣ܘܼܡܪܹ̈ܐ ܘܠܹܘܵܝܹ̈ܐ: ܘܟ̣ܠ ܕܥܲܠ̣ܘ ܡ̣ܢ ܫܒ̣ܝܼܬ̣ܵܐ ܠܐܘܿܪܸܫܠܸܡ. ܘܐܲܩܝܼܡܘ ܠܠܹܘܵܝܹ̈ܐ ܡ̣ܢ ܒܲܪ ܥܸܣܪܝܼܢ ܫܢ̈ܝܼܢ ܘܲܠܥܸܠ: ܠܡܸܗܘܵܐ ܒܝܵܘܡܵܐ ܥܲܠ ܥܒ̣ܝܼܕ̇ܬܵܐ ܕܒܲܝܬܵܐ ܕܡܵܪܝܵܐ.

⁹ܘܩܵܡ ܝܼܫܘܿܥ ܘܐܲܚܵܘ̈ܗܝ ܘܲܒ̣ܢܵܘ̈ܗܝ: ܘܩܲܕܼܡܝܼܵܐ ܘܲܒ̣ܢܵܘ̈ܗܝ: ܘܲܒ̣ܢܲܝ̈ ܗܘܼܕܝܼܵܐ ܐܲܟ̣ܚ̄ܕܼܵܐ: ܕܢܸܗܘܘܿܢ ܥܵܒ̣ܕ̇ܝܼܢ ܥܒ̣ܝܼ̈ܕܼܵܬ̣ܵܐ ܕܒܲܝܬܹ̇ܗ ܕܡܵܪܝܵܐ: ܒܢܲܝ̈ ܗܸܢܕܵܪ ܘܲܒ̣ܢܲܝ̈ܗܘܿܢ ܘܐܲܚܲܝ̈ܗܘܿܢ ܠܹܘܵܝܹ̈ܐ.

¹⁰ܘܐܲܪܡܝܼܘ ܫܲܬ̣ܐ̱ܣܬ̣ܵܐ ܕܒܸܢܝܵܢܵܐ ܕܗܲܝܟ̇ܠܹܗ ܕܡܵܪܝܵܐ. ܘܩܵܡ̣ܘ ܟܵܗ̈ܢܹܐ ܟܲܕܼ ܠܒ̣ܝܼܫܝܼܢ: ܘܐܲܚܝܼܕܼܝܼܢ ܩܲܪ̈ܢܬ̣ܵܐ ܕܕܸܟ̣ܪܹ̈ܐ: ܘܩܵܪܹܝܢ ܒܗܹܝܢ. ܘܠܹܘܵܝܹ̈ܐ ܒܢܲܝ̈ ܐܵܣܵܦ: ܒܫܝܼܦܘܿܪܹ̈ܐ ܠܲܡܫܲܒܵܚܘܼ ܠܡܵܪܝܵܐ: ܥܲܠ ܐܝܼܕܼܵܘ̈ܗܝ ܕܕܼܵܘܝܼܕܼ ܡܲܠܟܵܐ ܕܝܼܣܪܵܝܹܠ.

¹¹ܘܒܲܪܸܟ̣ܘ ܒܬ̣ܵܘܕ̇ܝܼܬ̣ܵܐ: ܘܲܒ̣ܬܸܫ̈ܒ̇ܚܵܬ̣ܵܐ ܠܡܵܪܝܵܐ: ܡܸܛܠ ܕܛܵܒ̣ ܗ̄ܘ̣ ܘܲܠܥܵܠܲܡ ܛܲܝܒ̇ܘܼܬܹܗ ܥܲܠ ܝܼܣܪܵܝܹܠ ܘܟ̣ܠܹܗ ܥܲܡܵܐ ܝܲܒܸ̇ܒ̣ܘ ܝܘܼܒܵܒ̣ܵܐ ܪܲܒܵܐ ܒܬܸܫܒ̇ܘܿܚܬܵܐ ܠܡܵܪܝܵܐ: ܥܲܠ ܫܘܼܟ̣ܠܵܠܵܐ ܕܒܲܝܬܹ̇ܗ ܕܡܵܪܝܵܐ.

¹²ܘܣܲܓ̇ܝܼ̈ܐܹܐ ܡ̣ܢ ܟܘܼܡܪܹ̈ܐ ܘܠܹܘܵܝܹ̈ܐ: ܘܪܹܫܲܝ ܐܲܒ̣ܵـ̈ـܗܹܐ ܩܲܫܝܼܫܹ̈ܐ: ܕܲܚܙܵܘ ܠܒܲܝܬܵܐ ܗܵܢܵܐ ܒܐܝܼܩܵܪܹܗ ܪܲܒܵܐ ܩܲܕܼܡܵܝܵܐ: ܟܲܕܼ ܓܡܲܪ ܒܲܝܬܵܐ ܗܵܢܵܐ: ܒܟ̣ܵܘ ܒܩܵܠܵܐ ܪܵܡܵܐ. ܘܣܲܓܝܼܐܝܼܢ ܕܲܡܪܝܼܡܝܼܢ ܗ̄ܘ̣ܵܘ ܩܵܠܲܝ̈ܗܘܿܢ: ܒܩܲܪ̈ܢܵܬ̣ܵܐ ܘܲܒ̣ܚܲܕܼܘܼܬ̣ܵܐ.

¹³ܘܠܲܝܬ̇ ܥܲܡܵܐ ܕܫܵܡܥܝܼܢ ܒܩܵܠܵܐ ܕܩܲܪ̈ܢܵܬ̣ܵܐ. ܡܸܛܠ ܕܥܲܡܵܐ ܩܵܪܹܝܢ ܗ̄ܘ̣ܵܘ ܒܩܲܪ̈ܢܵܬ̣ܵܐ ܒܩܵܠܵܐ ܪܵܡܵܐ. ܘܩܵܠܵܐ ܕܒܸܟ̣ܝܵܐ ܡܸܫܬ̇ܡܲܥ ܗ̄ܘ̣ܵܐ ܠܪܘܼܚܩܵܐ.