Read Aramaic Peshita Ezra 4 Bible Online

Ezra 4 - Aramaic Peshita bible

Ezra 4

¹ܘܲܫ̣ܡܲܥܘ ܣܵܢܐܲܝ ܝܼܗܘܼܕܼܵܐ ܘܒܸܢܝܵܡܹܝܢ: ܕܲܒ̣ܢܲܝ̈ ܫܒ̣ܝܼܬ̣ܵܐ ܒܵܢܹܝܢ ܗܲܝܟ̇ܠܵܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

²ܘܲܩܪܸܒ̣ܘ ܠܘܵܬ̣ ܙܘܼܪܒܵܒܹܠ: ܘܲܠܘܵܬ̣ ܪܹܫܲܝ ܐܲܒ̣ܵـ̈ـܗܵܬ̣ܵܐ: ܘܐܵܡ̇ܪܝܼܢ ܠܗܘܿܢ: ܢܸܒ̣ܢܸܐ ܐܵܦ ܚܢܲܢ ܥܲܡܟ̣ܘܿܢ ܡܸܛܠ ܕܐܲܟ̣ܘܵܬ̣ܟ̣ܘܿܢ ܢܸܒ̣ܢܸܐ ܠܐܲܠܵܗܟ̣ܘܿܢ ܘܠܹܗ ܗ̄ܘ̣ ܕܵܒ̣ܚܝܼܢܲܢ ܗܵܪܟܵܐ: ܡ̣ܢ ܝܵܘ̈ܡܵܬܹܗ ܕܣܲܢܚܹܪܝܼܒ̣ ܡܲܠܟܵܐ ܕܐܵܬ̣ܘܿܪ: ܕܐܲܣܩܲܢ ܠܗܵܪܟܵܐ.

³ܘܐܸܡܲܪ ܠܗܘܿܢ ܙܘܼܒܵܒܹܠ ܘܝܼܫܘܿܥ: ܘܫܲܪܟܵܐ ܕܪܹ̈ܫܲܝ ܐܲܒ̣ܵـ̈ـܗܵܬ̣ܵܐ ܕܝܼܣܪܵܝܹܠ: ܕܠܵܐ ܠܟ̣ܘܿܢ ܘܠܲܢ ܠܡܸܒ̣ܢܵܐ ܒܲܝܬܵܐ ܠܐܲܠܵܗܲܢ. ܡܸܛܠ ܕܲܚܢܲܢ ܐܲܟ̣ܚ̄ܕܼܵܐ ܢܸܒ̣ܢܹܐ ܒܲܝܬܵܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܲܝܟܲܢܵܐ ܕܦܲܩ̣ܕܲܢ ܟܘܼܪܸܫ ܡܲܠܟܵܐ ܦܵܪܣܝܵܐ.

⁴ܘܲܗܘ̤ܵܘ ܥܲܡܡܹ̈ܐ ܡܲܪܦܹܝܢ ܐܝܼܕܲܝ̈ܗܘܿܢ ܕܥܲܡܵܐ ܕܲܝܗܘܼܕܼ. ܘܲܡܒܲܠܗܹܝܢ ܠܗܘܿܢ ܕܠܵܐ ܢܸܒ̣ܢܘܿܢ.

⁵ܘܐܵܓ̣ܪܝܼܢ ܥܠܲܝܗܘܿܢ ܡܥܵܘ̈ܟ̣ܵܢܹܐ ܕܲܢܒܲܛܠܘܼܢ ܡܸܠܟܲܝ̈ܗܘܿܢ: ܟܠ ܝܵܘ̈ܡܲܝ ܟܘܼܪܸܫ ܡܲܠܟܵܐ ܦܵܪܣܵܝܵܐ: ܥܕܲܡܵܐ ܠܡܲܠܟ̇ܘܼܬܹܗ ܕܕܼܵܪܝܵܘܵܫ ܡܲܠܟܵܐ ܕܦܵܪܹܣ.

⁶ܘܲܒ̣ܡܲܠܟ̇ܘܼܬ̣ ܐܲܚܫܝܼܪܸܫ ܡܲܠܟܵܐ: ܒܪܹܫ ܡܲܠܟ̇ܘܼܬܹܗ ܟܬܲܒ̣ܘ ܚܸܛܝܵܢܵܐ ܥܲܠ ܥܵܡ̇ܘܿܪܹ̈ܝܗ̇ ܕܲܝܗܘܼܕܼ ܘܕܼܐܘܿܪܸܫܠܸܡ.

⁷ܒܝܵܘ̈ܡܲܝ ܐܲܪܛܲܚܫܸܫܬ̇ ܟܬܲܒ̣ ܘܲܫܐܸܠ ܒܲܫܠܵܡ ܡܲܗܕܪܲܬ̇ ܘܲܛܒ̣ܵܐܝܹܠ: ܘܫܲܪܟܵܐ ܕܐܲܟ̣ܘܵܬܹܗ ܥܲܠ ܐܲܪܛܲܚܫܸܫܬ̇ ܡܲܠܟܵܐ ܕܦܵܪܹܣ ܘܲܟ̣ܬ̣ܵܒ̣ܵܐ ܕܐܸܓܲܪܬܵܐ ܟܬ̣ܝܼܒ̣ ܗ̄ܘ̣ܵܐ ܐܲܪܡܵܐܝܼܬ̣: ܘܡܸܬ̇ܬܲܪܓܲܡ ܐܲܪܡܵܐܝܼܬ̣.

⁸ܘܐܲܪܚܘܿܡ ܒܥܸܠ ܛܸܓ̣ܡܵܐ: ܘܲܫܡܸܫ ܣܵܦܪܵܐ: ܟܬܲܒ̣ܘ ܐܸܓܲܪܬܵܐ ܗܵܕܹܐ ܠܐܘܿܪܸܫܠܸܡ: ܠܐܲܪܛܲܚܫܸܫܬ̇ ܡܲܠܟܵܐ ܐܲܝܟ̣ ܢܵܡܘܿܣܵܐ.

⁹ܗܵܝܕܹ̇ܝܢ ܐܲܪܚܘܿܡ ܒܥܸܠ ܛܸܓ̣ܡܵܐ: ܘܲܫܡܸܫ ܣܵܦܪܵܐ: ܘܫܲܪܟܵܐ ܕܐܲܟ̣ܘܵܬ̣ܗܘܿܢ: ܕܝܼܢܵܝܹ̈ܐ: ܘܐܸܣܦܪ̈ܵܝܹܐ: ܘܛܲܪ̈ܦܠܵܝܹܐ: ܘܐܵܦܲܪ̈ܣܵܝܹܐ: ܐܲܪ̈ܒ̣ܵܝܹܐ: ܒܵܒ̣̈ܠܵܝܹܐ: ܫܘܼܫܲܢܟ̣ܵܝܹ̈ܐ: ܕܲܗܵܝܹ̈ܐ: ܥܝܼܠܵܡܵܝܹ̈ܐ.

¹⁰ܘܫܲܪܟܵܐ ܕܐܸܡܘܵܬ̣ܵܐ ܕܲܫܒ̣ܵܐ: ܐܸܣܦܹܝܪ ܪܲܒܵܐ ܘܝܲܩܝܼܪܵܐ: ܘܐܵܘܬܸ̇ܒ̣ ܐܸܢܘܿܢ ܒܩܘܼܪ̈ܝܵܐ ܕܫܵܡܪ̈ܵܝܹܐ ܕܲܥܒܲܪ ܢܲܗܪܵܐ ܘܐܲܟ̣ܥܢܸܬ̣.

¹¹ܘܗܵܢܵܐ ܦܲܪܫܲܓ̣ܢܵܐ ܕܐܸܓܲܪܬܵܐ ܕܫܲܕܲܪܘ ܥܠܵܘܗܝ ܠܘܵܬ̣ ܐܲܪܛܲܚܫܸܫܬ̇ ܡܲܠܟܵܐ. ܥܲܒ̣ܕܲܝ̈ܟ ܐ̄ܢܵܫܲܝ̈ ܥܒܲܪ ܢܲܗܪܵܐ ܘܐܲܟ̣ܢܥܸܬ̣.

¹²ܝܼܕܼܝܼܥ ܢܸܗܘܹܐ ܠܡܲܠܟܵܐ: ܕܲܝܗܘܼ̈ܕܼܵܝܹܐ ܕܲܣܠܸܩ̣ܘ ܡ̣ܢ ܠܘܵܬ̣ܵܟ̣ ܥܠܲܝܢ: ܘܐܸܬ̣ܵܘ ܠܐܘܿܪܸܫܠܸܡ: ܩܪܝܼܬ̣ܵܐ ܡܵܪܘܿܕ̇ܬܵܐ ܘܒ̣ܝܼܫܬܵܐ ܒܵܢܹ̇ܝܢ ܘܫܘܼܪܹ̈ܝܗ̇ ܫܲܟ̣ܠܸܠ̣ܘ: ܘܫܲܬ̣ܐܣܹܝ̈ܗ̇ ܚܲܛܘ.

¹³ܗܵܟܲܢܵܐ ܢܸܗܘܹܐ ܝܵܕܲܥ ܡܲܠܟܵܐ: ܕܐܸܢܗ̤ܘ ܕܲܩܪܝܼܬ̣ܵܐ ܗܵܕܹܐ ܬܸܬ̣ܒ̇ܢܹܐ: ܘܫܘܼܪܹ̈ܝܗ̇ ܢܸܫܬܲܟ̣ܠܠܘܼܢ. ܡܲܕܲܐܬ̣ܵܐ ܠܲܝܬ̇ ܠܵܟ̣. ܘܐܵܦ ܗ̤ܝ ܡܲܠܟ̇ܝܼ̈ܢ ܠܵܐ ܬܸܕܲܥ.

¹⁴ܘܡܸܟܹ̇ܝܠ ܕܡ̣̤ ܡܸܠܚܵܐ ܕܗܲܝܟ̇ܠܵܐ ܡܠܲܚܢܲܢ: ܨܲܥܪܵܐ ܠܡܲܠܟܵܐ ܠܵܐ ܘܵܠܹܐ ܠܲܢ ܠܡܸܚܙܵܐ. ܡܸܛܠ ܗܵܢܵܐ ܫܲܕܲܪ̄ܢ ܘܐܵܘܕܲܥ̄ܢ.

¹⁵ܕܬܸܩܪܸܐ ܟܬ̣ܵܒ̣ ܥܘܼܗܕܵܢܵܐ ܕܐܲܒ̣ܵܗܲܝ̈ܟ. ܘܬܸܫܟܲܚ ܒܲܣܦܲܪ ܥܘܼܗܕܵܢܹ̈ܐ: ܘܬܸܕܲܥ ܕܲܡܕܼܝܼܢ̄ܬܵܐ ܗܵܕܹܐ: ܡܕܼܝܼܢ̄ܬܵܐ ܗ̄ܝ̣ ܡܵܪܘܿܕ̇ܬܵܐ: ܘܡܲܗܪܲܬ̣ ܡܲܠܟܹ̈ܐ ܘܲܡܕܼܝܼ̈ܢܵܬ̣ܵܐ ܘܬܲܟ̣ܬ̇ܘܼܫܹ̈ܐ ܪܵܘ̱ܪ̈ܒܹܐ ܥܒ̣ܝܼܕܼܝܼܢ ܒܓ̣ܵܘܵܗ̇: ܡ̣ܢ ܝܵܘ̈ܡܵܬ̣ ܥܵܠܡܵܐ. ܡܸܛܠ ܗܵܢܵܐ ܡܕܼܝܼܢ̄ܬܵܐ ܗ̄ܝ̣ ܕܚܸܪܒܲܬ̤.

¹⁶ܡܵܘܕ̇ܥܝܼܢܲܢ ܠܡܲܠܟܵܐ ܕܐܸܢ ܗܵܝ̇ ܡܕܼܝܼܢ̄ܬܵܐ. ܬܸܬ̣ܒ̇ܢܹܐ: ܘܫܘܼܪܹ̈ܝܗ̇ ܢܸܬ̇ܬ̇ܪܝܼܡܘܼܢ: ܡܸܛܠ ܗܵܢܵܐ ܫܘܼܠܛܵܢܵܐ ܒܲܥܒܲܪ ܢܲܗܪܵܐ ܠܲܝܬ̇ ܠܵܟ.

¹⁷ܘܡܲܠܟܵܐ ܫܠܲܚ̣ ܦܸܬ̣ܓ̣ܵܡܵܐ: ܠܘܵܬ̣ ܐܲܪܚܘܿܡ ܒܥܸܠ ܛܸܓ̣ܡܵܐ: ܘܲܠܘܵܬ̣ ܫܡܸܫ ܣܵܦܪܵܐ: ܘܲܠܘܵܬ̣ ܫܲܪܟܵܐ ܕܐܲܟ̣ܘܵܬ̣ܗܘܿܢ: ܕܝܵܬ̣ܒ̇ܝܼܢ ܒܫܵܡܪܹܝܢ: ܘܫܲܪܟܵܐ ܕܝܵܬ̣ܒ̇ܝܼܢ ܒܲܥܒܲܪ ܢܲܗܪܵܐ ܫܠܵܡ.

¹⁸ܘܟܲܕܼ ܡܸܢܥܲܬ̣ ܐܸܓܲܪܬܵܐ ܕܫܲܕܲܪܬ̇ܘܿܢ ܠܘܵܬ̣ܝ: ܫܲܪܝܼܪܵܐܝܼܬ̣ ܩܪܵܘ ܩܕܼܵܡܲܝ. ܘܡ̣ܢ ܩܕܼܵܡܲܝ ܐܸܬ̇ܬ̇ܣܝܼܡ ܕܚܛܸܓ̣ܡܵܐ.

¹⁹ܘܲܩܪܵܘ ܘܐܸܫܟܲܚܘ: ܕܗܵܝ̇ ܡܕܼܝܼܢ̄ܬܵܐ ܡ̣ܢ ܝܵܘ̈ܡܵܬ̣ ܥܵܠܡܵܐ ܥܲܠ ܡܲܠ̈ܟܹ̇ܐ ܡܸܬ̇ܬ̇ܪܝܼܡܵܐ: ܘܡܵܪܕܵܐ. ܘܬܲܟ̣ܬ̇ܘܼܫܵܐ ܪܲܒܵܐ ܐܸܬ̣ܥ̱ܒܸܕܼ ܒܓ̣ܵܘܵܗ̇.

²⁰ܘܡܲܠ̈ܟܹ̇ܐ ܥܲܫܝܼܢܹ̈ܐ ܗܘ̤ܵܘ ܥܲܠ ܐܘܿܪܸܫܠܸܡ: ܘܫܲܠܝܼܛܝܼܢ ܒܟ̣ܠ ܥܒܲܪ ܢܲܗܪܵܐ. ܘܲܠܡܲܠ̈ܟܹ̇ܐ ܩܲܕܼܡܵܝܹ̈ܐ: ܒܡܸܕܸ̇ܡ ܠܵܐ ܚܫܲܒ̣ܘ ܐܸܢܘܿܢ.

²¹ܡܸܟܹ̇ܝܠ ܣܝܼܡܘ ܢܵܡܘܿܣܵܐ ܠܲܡܒܲܠܵܛܘܼ ܠܓܲܒ̣ܪܹ̈ܐ ܗܵܢܘܿܢ. ܘܲܩܪܝܼܬ̣ܵܐ ܗܵܝ̇ ܠܵܐ ܬܸܬ̣ܒ̇ܢܹܐ: ܥܕܲܡܵܐ ܕܡ̣ܢ ܩܕܼܵܡܲܝ ܢܸܗܘܹܐ ܦܘܼܩܕܵܢܵܐ.

²²ܘܲܗ̤ܘܲܝܬ̇ܘܿܢ ܙܗܝܼܪܝܼܢ ܥܲܠ ܥܒ̣ܝܼܕ̇ܬܵܐ ܗܵܕܹܐ: ܕܲܠܡܵܐ ܬܸܣܓܹ̇ܐ ܗܸܪܬ̣ܵܐ ܠܡܲܗܵܪܘܼ ܠܡܲܠ̈ܟܹ̇ܐ.

²³ܗܵܝܕܹ̇ܝܢ ܟܲܕܼ ܐܸܬ̣ܵܐ ܦܲܪܫܲܓܢܵܐ ܕܐܸܓܲܪܬܵܐ ܕܐܲܪܛܲܚܫܸܫܬ̇ ܡܲܠܟܵܐ: ܩܪܵܐܘܼܗܝ ܩܕܼܵܡ ܐܲܪܚܘܿܡ ܒܥܸܠ ܛܸܓ̣ܡܵܐ: ܘܲܫܡܸܫ ܣܵܦܪܵܐ: ܘܲܩܕܼܵܡ ܐܲܝܠܹܝܢ ܕܐܲܟ̣ܘܵܬ̣ܗܘܿܢ ܗܵܝܕܹ̇ܝܢ ܐܸܙܲܠܘ ܒܒܸܗܠܵܐ ܥܲܠ ܝܗ̄ܘܼܕܼܵܝܹ̈ܐ. ܠܐܘܿܪܸܫܠܸܡ ܘܒܲܛܸܠܘ ܐܸܢܘܿܢ ܒܚܲܝܠܵܐ ܥܲܫܝܼܢܵܐ.

²⁴ܗܵܝܕܹ̇ܝܢ ܒܸܛܠܲܬ̤ ܥܒ̣ܝܼܕ̇ܬܵܐ ܡ̣ܢ ܒܲܝܬܵܐ ܕܐܲܠܵܗܵܐ ܕܒ̣ܐܘܿܪܸܫܠܸܡ. ܘܲܗܘ̤ܵܬ̣ ܒܵܛܠܵܐ ܥܕܲܡܵܐ ܠܫܲܢ̄ܬܵܐ ܕܬܲܪܬܹ̇ܝܢ ܠܡܲܠܟ̇ܘܼܬܹܗ ܕܕܼܵܪܝܵܘܵܫ ܡܲܠܟܵܐ ܦܵܪܣܵܝܵܐ.