Read Aramaic Peshita Ezra 7 Bible Online

Ezra 7 - Aramaic Peshita bible

Ezra 7

¹ܒܵܬܲܪ ܗܵܠܹܝܢ ܟܠܗܹܝܢ ܡܸܠܹ̈ܐ: ܒܡܲܠܟ̇ܘܼܬ̣ܵܐ ܕܐܲܪܛܲܚܫܸܫܬ̇ ܡܲܠܟܵܐ ܕܦܵܪܹܣ: ܥܲܙܪܵܐ ܒܲܪ ܣܲܪܝܼܵܐ: ܒܲܪ ܥܲܙܲܪܝܵܐ: ܒܲܪ ܚܹܠܲܩܝܵܐ.

²ܒܲܪ ܫܵܠܘܿܡ: ܒܲܪ ܨܵܕܼܘܿܩ: ܒܲܪ ܐܲܚܝܼܛܘܿܒ̣.

³ܒܲܪ ܐܵܡܲܪܝܵܐ: ܒܲܪ ܥܲܙܲܪܝܵܐ: ܒܲܪ ܡܲܪܝܘܿܬ̣.

⁴ܒܲܪ ܙܪܲܚܝܵܐ: ܒܲܪ ܓܲܕ̇ܝܼ: ܒܲܪ ܒܲܩܝܼ.

⁵ܒܲܪ ܐܲܒ̣ܝܼܫܘܿܥ: ܒܲܪ ܦܝܼܢܚܸܣ: ܒܲܪ ܐܹܠܝܼܥܵܙܲܪ: ܒܲܪ ܐܲܗܪܘܿܢ ܟܵܗܢܵܐ.

⁶ܪܹܫܵܐ ܗܘ̤ܵܐ ܥܲܙܪܵܐ: ܕܲܣܠܸܩ ܡ̣ܢ ܒܵܒܹܠ. ܗ̤ܘ ܗܘ̤ܵܐ ܣܵܦܪܵܐ ܚܲܟ̇ܝܼܡܵܐ ܒܢܵܡܘܿܣܵܐ ܕܡܘܼܫܹܐ: ܕܝܲܗ̄ܒ̣ ܠܹܗ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. ܘܝܲܗ̄ܒ̣ ܠܹܗ ܡܲܠܟܵܐ ܡܵܘܗܲܒ̣ܬ̣ܵܐ: ܕܐܲܝܟܲܢܵܐ ܕܨܵܒܹ̇ܐ ܢܗܲܠܸܟ ܒܢܵܡܘܿܣܹܗ ܕܡܵܪܝܵܐ.

⁷ܘܲܣܠܸܩܘ ܡ̣ܢ ܒܢܲܝ̈ ܝܼܣܪܵܝܹܠ: ܘܡ̣ܢ ܟܘܼܡܪܹ̈ܐ ܘܠܹܘܵܝܹ̈ܐ: ܗܵܢܘܿܢ ܡܫܲܡܫܵܢܹ̈ܐ: ܘܡ̣ܢ ܬܵܪ̈ܥܹܐ ܘܢܵܬ̣ܢܵܝܹ̈ܐ: ܘܡ̣ܢ ܐܲܝܠܹܝܢ ܕܲܣܠܸܩܘ ܠܐܘܿܪܸܫܠܸܡ: ܒܲܫܢܲܬ̣ ܫܒܲܥ ܠܐܲܪܛܲܚܫܸܫܬ̇ ܡܲܠܟܵܐ.

⁸ܘܐܸܬ̣ܵܘ ܠܐܘܿܪܸܫܠܸܡ ܒܝܲܪܚܵܐ ܕܚܲܡܫܵܐ. ܗ̤ܝ ܫܢܲܬ̣ ܫܒܲܥ ܠܡܲܠܟܵܐ.

⁹ܡܸܛܠ ܕܲܒ̣ܝܲܪܚܵܐ ܩܲܕܼܡܵܝܵܐ ܫܲܪܝܼܘ ܠܡܸܣܲܒ̣ ܡ̣ܢ ܒܵܒܹܠ. ܘܲܒ̣ܚܲܕܼ ܒܝܲܪܚܵܐ ܕܚܲܡܫܵܐ: ܐܸܬ̣ܵܘ ܠܐܘܿܪܸܫܠܸܡ: ܐܲܝܟ ܐܝܼܕܼܵܐ ܕܐܲܠܵܗܵܐ ܕܐܲܛܐ̱ܒܲܬ̤ ܠܗܘܿܢ.

¹⁰ܡܸܛܠ ܕܥܲܙܪܵܐ ܐܲܬ̣ܩܸܢ ܠܸܒܹ̇ܗ ܠܡܸܥܒܲܕܼ ܢܵܡܘܿܣܹܗ ܕܡܵܪܝܵܐ: ܘܲܠܡܸܥܒܲܕܼ ܘܲܠܡܲܠܵܦܘܼ ܒܝܼܣܪܵܝܹܠ ܢܵܡܘܿܣܹ̈ܐ ܘܕܼܝܼܢܹ̈ܐ.

¹¹ܘܗܵܢܵܐ ܦܲܪܫܲܓ̣ܢܵܐ ܕܐܸܓܲܪܬܵܐ ܕܝܲܗ̄ܒ̣ ܡܲܠܟܵܐ ܐܲܪܛܲܚܫܸܫܬ̇ ܠܥܲܙܪܵܐ ܟܘܼܡܪܵܐ: ܣܵܦܪܵܐ ܕܦܸܬ̣ܓ̣ܵܡܹ̈ܐ ܘܦܘܼܩܕܵܢܵܘ̈ܗܝ ܕܡܵܪܝܵܐ ܘܢܵܡ̈ܘܿܣܵܘܗܝ ܥܲܠ ܟܠܹܗ ܝܼܣܪܵܝܹܠ.

¹²ܐܲܪܛܲܚܫܸܫܬ̇ ܡܲܠܟܵܐ ܡܠܸܟ ܡܲܠ̈ܟܹ̇ܐ: ܠܥܲܙܪܵܐ ܟܘܼܡܪܵܐ ܘܣܵܦܪܵܐ: ܣܵܦܲܪ ܢܵܡܘܿܣܵܐ ܕܐܲܠܵܗ ܫܡܲܝܵܐ: ܫܠܵܡ.

¹³ܐܸܢܵܐ ܦܸܩܕܹ̇ܬ̣ ܘܣܵܡܹ̇ܬ̣ ܢܵܡܘܿܣܵܐ: ܕܟ̣ܠܡܲܢ ܕܨܵܒܹ̇ܐ ܒܡܲܠܟ̇ܘܼܬ̣ܝ ܡ̣ܢ ܥܲܡܵܐ ܕܝܼܣܪܵܝܹܠ: ܘܡ̣ܢ ܟܘܼܡܪܹ̈ܐ ܘܡ̣ܢ ܠܹܘܵܝܹ̈ܐ: ܕܢܹܐܙܠ̄ܘܼܢ ܥܲܡܵܟ: ܢܹܐܙܠ̄ܘܼܢ.

¹⁴ܐܸܢܵܐ ܦܸܩܕܹ̇ܬ̣ ܘܣܵܡܹ̇ܬ̣ ܢܵܡܘܿܣܵܐ: ܘܫܲܕ̇ܪܹܬ̣ ܡ̣ܢ ܩܲܪ̈ܝܼܒܲܝ ܠܲܡܫܲܐܵܠܘܼ ܥܲܠ ܝܼܗܘܼܕܼ ܘܥܲܠ ܐܘܿܪܸܫܠܸܡ: ܘܐܵܦ ܠܲܡܫܲܐܵܠܘܼ ܥܲܠ ܢܵܡܘܿܣܵܐ ܕܐܲܠܵܗܵܟ̣ ܕܒ̣ܐܝܼܕܲܝ̈ܟ.

¹⁵ܘܲܠܡܵܘܒܵܠܘܼ ܟܸܣܦܵܐ ܘܕܲܗܒ̣ܵܐ ܕܡܲܠܟܵܐ. ܕܐܸܢܵܐ ܡ̣ܢ ܨܒ̣ܘܼܬ̣ ܪܸܥܝܵܢܝ ܩܲܪܒܹ̇ܬ̣ ܠܒܲܝܬܵܐ ܕܡܵܪܝܵܐ: ܒܐܘܿܪܸܫܠܸܡ ܡܲܫܟ̇ܢܵܐܗ̄ܘ̣.

¹⁶ܟܠ ܟܸܣܦܵܐ ܘܕܲܗܒ̣ܵܐ ܕܬܸܫܟܲܚ ܒܟ̣ܠ ܡܕܼܝܼܢܲܬ̣ ܒܵܒܹܠ: ܥܲܡܵܟ̣ ܢܹܐܙܲܠ. ܘܟ̣ܘܼܡܪܹ̈ܐ ܘܠܹܘܵܝܹ̈ܐ: ܘܐܲܝܠܹܝܢ ܕܨܵܒ̇ܝܼܢ ܠܡܹܐܙܲܠ ܥܲܡܵܟ: ܢܹܐܙܠ̄ܘܼܢ ܠܒܲܝܬܵܐ ܕܐܲܠܵܗܵܐ ܕܒ̣ܐܘܿܪܸܫܠܸܡ.

¹⁷ܘܡܸܟܹ̇ܝܠ ܝܲܨܝܼܦܵܐܝܼܬ̣ ܬܸܙܒܸ̇ܢ ܒܟܸܣܦܵܐ ܗܵܢܵܐ: ܬܵܘܪܹ̈ܐ: ܘܕܸܟ̣ܪܹ̈ܐ: ܘܐܸܡܪܹ̈ܐ: ܩܘܼܪ̈ܒܵܢܲܝܗܘܿܢ ܘܢܘܼܩܵܝܗܘܿܢ ܘܲܬ̣ܩܲܪܸܒ̣ ܐܸܢܘܿܢ ܥܲܠ ܡܲܕܼܒ̇ܚܵܐ ܕܐܲܠܵܗܟ̣ܘܿܢ ܒܐܘܿܪܸܫܠܸܡ.

¹⁸ܘܡܸܕܸ̇ܡ ܕܫܵܦܲܪ ܠܵܟ ܘܠܲܐܚܲܝ̈ܟ: ܒܫܲܪܟܵܐ ܕܟܸܣܦܵܐ ܗܵܢܵܐ ܠܡܸܥܒܲܕܼ: ܐܲܝܟ ܨܸܒ̣ܝܵܢܹܗ ܕܐܲܠܵܗܵܟ̣: ܬܸܥܒ̇ܕܼܘܼܢ.

¹⁹ܘܡܵܐܢܹ̈ܐ ܕܡܸܬ̣ܝܲܗ̄ܒ̇ܝܼܢ ܠܵܟ ܠܦܘܼܠܚܵܢܵܐ ܕܒܲܝܬܹ̇ܗ ܕܐܲܠܵܗܵܟ: ܐܲܫܠܸܡ ܩܕܼܵܡ ܐܲܠܵܗܵܐ ܕܒ̣ܐܘܿܪܸܫܠܸܡ.

²⁰ܘܫܲܪܟܵܐ ܕܡܵܐܢܹ̈ܐ ܕܡܸܬ̣ܒ̇ܥܹܝܢ ܠܵܟ ܠܬܸܫܡܸܫܬܵܐ ܕܒܹܝܬ̣ ܐܲܠܵܗܵܟ ܬܸܣܲܒ̣ ܘܬܸܬܸ̇ܠ ܡ̣ܢ ܓܲܙܵܗ ܕܡܲܠܟܵܐ.

²¹ܐܸܢܵܐ ܐܲܪܛܲܚܫܸܫܬ̇ ܡܲܠܟܵܐ ܣܵܡܹ̇ܬ̣ ܢܵܡܘܿܣܵܐ ܠܟ̣ܠܗܘܿܢ ܓܹܙܲܒ̣ܪܹ̈ܐ ܕܐܝܼܬ̣ ܒܲܥܒܲܪ ܢܲܗܪܵܐ. ܕܟ̣ܠ ܡܸܕܸ̇ܡ ܕܢܸܫܐܲܠܟ̣ܘܿܢ ܥܲܙܪܵܐ ܟܘܼܡܪܵܐ: ܣܵܦܪܵܐ ܣܵܦܲܪ ܢܵܡܘܿܣܵܐ ܕܐܲܠܵܗ ܫܡܲܝܵܐ: ܚܦܝܼܛܵܐܝܼܬ̣ ܬܸܥܒ̇ܕܼܘܼܢ.

²²ܥܕܲܡܵܐ ܠܟܸܣܦܵܐ ܟܲܟ̇ܪܹ̈ܐ ܡܵܐܐ: ܥܕܲܡܵܐ ܠܚܸܛܹ̈ܐ ܟܘܼܡܪܹ̈ܐ ܡܵܐܐ: ܥܕܲܡܵܐ ܠܚܲܡܪܵܐ ܪܸ̈ܒ̣ܥܹܐ ܡܵܐܐ: ܥܕܲܡܵܐ ܠܡܸܫܚܵܐ ܪܸ̈ܒ̣ܥܹܐ ܡܵܐܐ: ܘܡܸܠܚܵܐ ܕܠܵܐ ܟܬ̣ܵܒ̣.

²³ܘܟ̣ܠ ܡܸܕܸ̇ܡ ܒܦܸܬ̣ܩܵܐ ܢܸܬ̣̱ܝܼܗܸܒ̣ ܘܗܲܒ̣ܘ ܠܹܗ ܐܲܝܟ ܢܵܡܘܿܣܵܐ ܕܐܲܠܵܗ ܫܡܝܵܐ. ܢܸܣܲܒ̣ ܘܢܸܥܒܸ̇ܕܼ ܘܠܵܐ ܢܸܗܘܹܐ ܪܘܼܓ̣ܙܵܐ ܥܲܠ ܡܲܠܟ̇ܘܼܬ̣ ܡܲܠܟܵܐ ܘܲܒ̣ܢܵܘ̈ܗܝ.

²⁴ܘܲܠܟ̣ܘܿܢ ܡܵܘܕ̇ܥܝܼܢܲܢ ܕܲܠܟ̣ܠ ܟܘܼܡܪܹ̈ܐ ܘܠܹܘܵܝܹ̈ܐ: ܘܩܵܪ̈ܝܲܝ ܒܩܲܪ̈ܢܵܬ̣ܵܐ: ܘܲܠܦܵܠܚܲܝ̈ ܒܹܝܬ̣ ܐܲܠܵܗܹ̈ܐ: ܠܵܐ ܫܲܠܝܼܛ ܠܟ̣ܘܿܢ ܠܡܹܐܡܲܪ ܠܗܘܿܢ ܡܸܕܸ̇ܡ.

²⁵ܘܐܲܢ̄ܬ̇ ܥܲܙܪܵܐ ܣܵܦܪܵܐ: ܐܲܝܟ̣ ܚܸܟ̣ܡ̱ܬ̣ܵܟ̣: ܕܐܲܠܵܗܵܟ ܝܲܗ̄ܒ̣ ܠܵܟ: ܥܒܸܕܼ ܪܵܘ̱ܪ̈ܒ̣ܵܢܝܼܢ ܘܕܼܵܝܢܝܼܢ. ܕܢܸܗܘܘܿܢ ܕܵܝܢܝܼܢ ܠܟ̣ܠܹܗ ܥܲܡܵܐ ܕܐܝܼܬ̣ ܒܲܥܒܲܪ ܢܲܗܪܵܐ: ܠܟ̣ܠ ܝܵܕܼܥܲܝ̈ ܢܵܡܘܿܣܵܐ ܕܐܲܠܵܗܵܟ̣ ܘܡܲܢ ܕܠܵܐ ܝܵܕܲܥ̇: ܬܵܘܕ̇ܥܝܼܘܗܝ.

²⁶ܘܟ̣ܠ ܕܠܵܐ ܢܸܗܘܹܐ ܥܵܒܹ̇ܕܼ ܢܵܡܘܿܣܵܐ ܕܐܲܠܵܗܵܟ̣: ܘܢܵܡܘܿܣܵܐ ܕܡܲܠܟܵܐ: ܣܲܨܝܼܦܵܐܝܼܬ̣ ܢܸܗܘܹܐ ܡܸܬ̣̱ܥܒܸܕܼ ܡܸܢܹܗ ܕܝܼܢܵܐ: ܐܸܢ ܠܡܵܘܬܵܐ ܘܐܸܢ ܠܚܲܝܹ̈ܐ: ܘܐܸܢ ܠܚܘܼܣܪܵܢܵܐ ܕܢܸܟ̣ܣܹ̈ܐ: ܘܐܸܢ ܠܒܹܝܬ̣ ܐܲܣܝܼܪܹ̈ܐ.

²⁷ܒܪܝܼܟ̣ ܐܲܢ̄ܬ̇ ܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܢ: ܕܝܲܗ̄ܒ̣ܬ̇ ܡܸܠܬ̣ܵܐ ܗܵܕܹܐ ܒܠܸܒܹ̇ܗ ܕܡܲܠܟܵܐ: ܠܲܡܫܲܒܵܚܘܼ ܒܲܝܬܵܐ ܕܡܵܪܝܵܐ ܒܐܘܿܪܸܫܠܸܡ.

²⁸ܘܲܥܠܲܝ ܐܲܪܡܝܼ ܚܸܣܕܼܵܐ ܩܕܼܵܡ ܡܲܠܟܵܐ: ܘܲܩܕܼܵܡ ܪܵܘ̱ܪ̈ܒ̣ܵܢܲܝ ܡܲܠܟܵܐ ܓܲܢ̄ܒܵܪܹ̈ܐ. ܘܐܸܢܵܐ ܐܸܬ̣ܥܲܫܢܹ̇ܬ̣ ܐܲܝܟܲܢܵܐ ܕܲܗܘ̤ܵܬ̣ ܥܠܲܝ ܪܘܼܚܹܗ ܕܡܵܪܝܵܐ ܐܲܠܵܗܝ. ܘܲܓ̣ܒܹܝܬ̣ ܡ̣ܢ ܝܼܣܪܵܝܹܠ ܐ̄ܢܵܫܵܐ ܪܹ̈ܫܹܐ ܕܢܸܣܩܘܼܢ ܥܲܡܝ.