Read Aramaic Peshita Ezra 9 Bible Online

Ezra 9 - Aramaic Peshita bible

Ezra 9

¹ܘܟܲܕܼ ܫܠܸܡ ܗܵܠܹܝܢ ܟܠܗܹܝܢ: ܩܪܸܒ̣ܘ ܠܘܵܬ̣ܝ ܩܲܫܝܼ̈ܫܹܐ ܘܐܵܡ̇ܪܝܼܢ: ܠܵܐ ܐܸܬ̣ܦܪܸܫܘ ܥܲܡܵܐ ܕܝܼܣܪܵܝܹܠ: ܘܟ̣ܘܼܡܪܹ̈ܐ ܘܠܹܘܵܝܹ̈ܐ ܡܟܢ ܥܲܡܡܹ̈ܐ ܕܲܡܕܼܝܼ̈ܢܵܬ̣ܵܐ ܒܛܲܡܐܘܼܬ̣ܗܘܿܢ ܕܲܟ̣ܢܲܥܢܵܝܹ̈ܐ: ܘܚܹܬ̣ܵܝܹܐ: ܘܥܲܡ̈ܘܿܢܵܝܹܐ: ܘܦܲܪ̈ܙܵܝܹܐ: ܘܝܵܒ̣̈ܘܿܣܵܝܹܐ: ܘܡܸܨܪ̈ܵܝܹܐ: ܘܡܘܼܐܒ̣ܵܝܹ̈ܐ: ܘܐܵܡܘܿܪ̈ܵܝܹܐ.

²ܡܸܛܠ ܕܲܢܣܲܒ̣ܘ ܡ̣ܢ ܒܢܵܬ̣̈ܗܘܿܢ ܠܗܘܿܢ ܘܠܲܒ̣ܢܲܝ̈ܗܘܿܢ ܘܐܸܬ̣ܚܲܠܲܛ ܙܲܪܥܵܐ ܩܲܕ̇ܝܼܫܵܐ ܒܥܲܡܡܹ̈ܐ ܕܲܡܕܼܝܼ̈ܢܵܬ̣ܵܐ ܘܐܝܼܕܼܵܐ ܕܩܲܫܝܼ̈ܫܹܐ ܘܲܕܼܠܹܘܵܝܹ̈ܐ: ܒܥܵܘܼܠܵܐ ܗܵܢܵܐ ܩܲܕܼܡܵܝܑܼܬ̣.

³ܗܵܝܕܹ̇ܝܢ ܟܲܕܼ ܫܸܡܥܹ̇ܬ̣ ܡܸܠܬ̣ܵܐ ܗܵܕܹܐ: ܣܲܕ̇ܩܹܬ̣ ܢܲܚ̈ܬܲܝ ܘܲܟ̣ܠܵܡܝܼܕܼܝ: ܘܡܸܠܓܹ̇ܬ̣ ܣܲܥܪܵܐ ܕܪܹܫܝ ܘܲܕ̇ܕܲܩܢܝ. ܘܝܵܬܹܒ̣ ܗ̄ܘܹ̇ܝܬ̣ ܘܬܲܡܝܼܗ.

⁴ܘܐܸܬ̣ܟܲܢܲܫܘ ܠܘܵܬ̣ܝ ܟܠ ܐܲܝܠܹܝܢ ܕܲܒ̣ܛܝܼܠ ܗ̄ܘ̣ܵܘ ܠܗܘܿܢ ܥܲܠ ܡܸܠܬ̣ܵܐ ܕܐܲܠܵܗܵܐ ܕܝܼܣܪܵܝܹܠ: ܥܲܠ ܥܵܘܼܠܵܐ ܕܐܲܥܠܝܼܘ ܒܢܲܝ̈ ܫܒ̣ܝܼܬ̣ܵܐ. ܘܐܸܢܵܐ ܝܵܬܹܒ̣ ܗ̄ܘܹ̇ܝܬ̣ ܘܬܲܡܝܼܗ̇ ܥܕܲܡܵܐ ܠܲܬ̣ܫܲܥ ܫܵܥ̈ܝܼܢ.

⁵ܘܲܒ̣ܥܸܕܵܢܵܐ ܕܲܬ̣ܫܲܥ ܫܵܥ̈ܝܼܢ: ܩܵܡܹ̇ܬ̣ ܡ̣ܢ ܥܵܩܲܬ̣ܝ: ܘܡ̣ܢ ܣܘܼܕܵܩ ܢܲܚ̈ܬܲܝ. ܘܒܸܪܟܹ̇ܬ̣ ܥܲܠ ܒܘܼܪ̈ܟܲܝ. ܘܦܸܪܣܹܬ̣ ܐܝܼ̈ܕܲܝ ܒܲܨܠܘܿܬ̣ܵܐ: ܩܕܼܵܡ ܡܵܪܝܵܐ ܐܲܠܵܗܵܐ ܘܐܸܡ̇ܪܹܬ̣.

⁶ܐܲܠܵܗܝ: ܒܵܗܬ̇ܝܼܢܲܢ ܠܲܡܪܵܡܘܼ ܐܲܦܝܼ̈ܢ ܠܘܵܬ̣ܵܟ̣ ܐܲܠܵܗܲܢ: ܡܸܛܠ ܕܚܵܘ̈ܒܲܝܢ ܣܓ̣ܝܼܘ ܠܥܸܠ ܡ̣ܢ ܪܹܫܲܢ. ܘܲܚܛܵܗܲܝ̈ܢ ܪܵܘ̱ܪ̈ܒܹܐ ܣܠܸܩܘ ܥܕܲܡܵܐ ܠܲܫܡܲܝܵܐ.

⁷ܡ̣ܢ ܝܵܘ̈ܡܲܝ ܐܲܒ̣ܵـ̈ـܗܵܬܲܢ ܚܢܲܢ ܐܸܫܬ̇ܟܲܚ̄ܢ ܒܲܚܛܵܗܹ̈ܐ ܪܵܘ̱ܪ̈ܒܹܐ ܥܕܲܡܵܐ ܠܝܵܘܡܵܢܵܐ. ܡܸܛܠ ܕܐܲܣܓ̇ܝܼܢ ܠܡܸܚܛܐ ܚܢܲܢ ܘܐܲܒ̣ܵܗܲܝܢ ܘܡܲܠܟܲܝ̈ܢ ܘܟ̣ܘܼܡܪ̈ܲܝܢ. ܡܸܛܠ ܗܵܢܵܐ ܐܸܫܬ̇ܠܸܡ̄ܢ ܠܚܲܪܒܵܐ ܘܲܠܒܸܙܬ̣ܵܐ: ܘܲܠܫܸܒ̣ܝܵܐ: ܘܲܠܒܸܗܬ̇ܬ̣ܵܐ ܕܐܲܦܹ̈ܐ: ܒܐܝܼܕܼܵܐ ܕܡܲܠ̈ܟܹ̇ܐ ܕܲܡܕܼܝܼ̈ܢܵܬ̣ܵܐ: ܘܒ̣ܐܝܼܕܼܵܐ ܕܲܒ̣ܥܸܠܕ̇ܒ̣ܵܒܲܝ̈ܢ: ܐܲܝܟ ܕܝܵܘܡܵܢܵܐ.

⁸ܘܡܸܟܹ̇ܝܠ ܥܲܕܼ ܩܲܠܝܼܠ ܙܥܘܿܪ: ܗܘ̤ܵܘ ܪ̈ܲܚܡܝܼܢ ܡ̣ܢ ܩܕܼܵܡ ܐܲܠܵܗܲܢ. ܠܡܵܘܬܵܪܘܼ ܡܸܢܲܢ ܫܲܪܟܵܢܵܐ: ܘܲܠܡܸܬܲܠ ܠܲܢ ܕܘܼܟ̇ܬ̣ܵܐ ܒܐܲܬ̣ܪܵܐ ܕܩܘܼܕܼܫܹܗ. ܘܲܠܡܲܢܗܵܪܘܼ ܥܲܝܢܲܝ̈ܢ ܐܲܠܵܗܲܢ: ܘܲܠܡܸܬܲܠ ܚܲܝܹ̈ܐ ܩܲܠܝܼܠ ܒܥܲܒ̣ܕ̇ܘܼܬܲܢ.

⁹ܡܸܛܠ ܕܥܲܒ̣̈ܕܹ̇ܐ ܚܢܲܢ: ܘܲܒ̣ܥܲܒ̣ܕ̇ܘܼܬܲܢ ܠܵܐ ܐܸܫܬ̇ܒܸܩ̄ܢ ܡ̣ܢ ܐܲܠܵܗܲܢ. ܘܝܲܗ̄ܒܲܢ ܐܲܠܵܗܲܢ ܠܪ̈ܲܚܡܹܐ ܩܕܼܵܡ ܡܲܠ̈ܟܹ̇ܐ ܕܦܵܪܹܣ: ܕܝܲܗ̄ܒ̣ܘ ܠܲܢ ܦܘܼܪܢܵܣܲܢ ܕܝܵܘܡܵܐ. ܘܲܢܪܲܡܪܸܡ ܒܲܝܬܵܐ ܕܐܲܠܵܗܲܢ ܘܲܢܩܝܼܡ ܚܲܪ̈ܒ̣ܵܬܹܗ. ܘܢܸܬܸ̇ܠ ܠܲܢ ܣܝܵܓ̣ܵܐ ܒܲܝܗܘܼܕܼ ܘܒ̣ܐܘܿܪܸܫܠܸܡ.

¹⁰ܘܡܸܟܹ̇ܝܠ ܡܵܢܵܐ ܢܹܐܡܲܪ ܩܕܼܵܡܲܝܟ ܐܲܠܵܗܲܢ: ܒܵܬܲܪ ܗܵܠܹܝܢ ܟܠܗܹܝܢ: ܡܸܛܠ ܕܲܫܒܲܩ̄ܢ ܦܘܼܩ̈ܕܵܢܲܝܟ.

¹¹ܕܦܲܩܸܕ̇ܬܵܢ ܒܐܝܼܕܼܵܐ ܕܥܲܒ̣ܕܲܝ̈ܟ ܢܒ̣ܝܹ̈ܐ. ܘܐܸܡܲܪܬ̇ ܠܲܢ: ܐܲܪܥܵܐ ܕܥܵܐܠܝܼܢ ܐ̄ܢܬ̇ܘܿܢ ܠܵܗ̇ ܠܡܹܐܪܬܵܗ̇: ܛܲܡܵܐܐ ܗ̄ܘ̣ ܒܛܲܡܐܘܼܬ̣ܵܐ ܕܥܲܡܡܹ̈ܐ ܘܕܲܡܕܼܝܼ̈ܢܵܬ̣ܵܐ: ܒܛܲܡܐܘܼܬ̣ܗܘܿܢ ܕܲܡܠܵܐܘܼܗ̇ ܡ̣ܢ ܣܦܵܐ ܠܲܣܦܵܐ: ܘܲܥܒ̣ܵܕܲܝ̈ܗܘܿܢ ܣ̈ܢܲܝܵܐ ܡܠܵܐܘܼܗ̇.

¹²ܘܡܸܟܹ̇ܝܠ ܒܢܵܬ̣̈ܟ̣ܘܿܢ ܠܵܐ ܬܸܬ̇ܠܘܼܢ ܠܲܒ̣ܢܲܝ̈ܗܘܿܢ. ܘܲܒ̣ܢܵܬ̣̈ܗܘܿܢ ܠܵܐ ܬܸܣܒ̣ܘܼܢ ܠܲܒ̣ܢܲܝ̈ܟ̇ܘܿܢ ܘܠܵܐ ܬܸܬ̣ܪܲܥܘܿܢ ܠܲܫܠܵܡܗܘܿܢ ܘܲܠܛܵܒܲܬ̣ܗܘܿܢ ܥܕܲܡܵܐ ܠܥܵܠܲܡ ܡܸܛܠ ܕܬܸܬ̣ܥܲܫܢܘܼܢ ܘܬܹܐܟ̣ܠܘܿܢ ܛܵܒ̣ܵـ̈ـܬ̣ܵܗ̇ ܕܐܲܪܥܵܐ: ܘܬ̣ܵܘܬ̇ܪܘܼܢ ܠܲܒ̣ܢܲܝ̈ܟ̇ܘܿܢ. ܘܢܹܐܪܬ̇ܘܿܢ ܥܕܲܡܵܐ ܠܥܵܠܲܡ.

¹³ܘܒ̣ܵܬܲܪ ܗܵܠܹܝܢ ܟܠܗܹܝܢ ܕܐܸܬܲܝ̈ ܥܠܲܝܢ ܒܲܥܒ̣ܵܕܲܝܢ ܒܝܼ̈ܫܹܐ: ܘܒܲܚ̈ܛܵܗܲܝܢ ܪܵܘ̱ܪ̈ܒܹܐ: ܡܸܛܠ ܕܐܲܢ̄ܬ̇ ܐܲܠܵܗܲܢ ܐܸܬ̣ܚܲܫܲܒ̣ܬ̇ ܥܠܲܝܢ ܠܡܸܫܒܲܩ ܚܛܵܗܲܝ̈ܢ: ܘܬܸܬܸ̇ܠ ܠܲܢ ܫܲܪܟܵܢܵܐ ܒܥܵܠܡܵܐ.

¹⁴ܚܢܲܢ ܐܸܬ̣ܗܲܦܟ̣̄ܢ ܘܲܥܒܲܪ̄ܢ ܥܲܠ ܦܘܼ̈ܩܕܵܢܲܝܟ. ܘܐܸܙܲܠ̄ܢ ܕܒ̣ܩ̄ܢ ܒܗܵܠܹܝܢ ܥܲܡܡܹ̈ܐ ܛܲܡܹ̈ܐܐ. ܘܲܥܒܲܕ̄ܢ ܐܲܝܟ ܥܒ̣ܵܕܲܝ̈ܗܘܿܢ ܘܐܲܢ̄ܬ̇ ܪܸܚ̱ܡܬ̣ܵܢܵܐ ܐܲܢ̄ܬ̇ ܠܵܐ ܬܸܪܓܲܙ ܥܠܲܝܢ. ܫܒ̣ܘܿܩ ܠܚܵܘ̈ܒܲܝܢ ܡ̣ܢ ܩܕܼܵܡܲܝܢ: ܡܸܛܠ ܕܪܸܚ̱ܡܬ̣ܵܢܵܐ ܐܲܢ̄ܬ̇ ܫܒ̣ܘܿܩ ܠܲܢ ܬܵܘܬܵܪܹ̈ܐ ܒܥܵܠܡܵܐ: ܡܸܛܠ ܕܠܲܝܬ̇ ܐܲܟ̣ܘܵܬ̣ܵܟ̣: ܘܠܵܐ ܢܹܐܒܲܕܼ.

¹⁵ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܙܲܕ̇ܝܼܩ ܐܲܢ̄ܬ̇. ܡܸܛܠ ܕܲܫܒܲܩܬ̇ ܡܸܢܲܢ ܫܲܪܟܵܢܵܐ ܐܲܝܟ̣ ܕܝܵܘܡܵܢܵܐ ܗܵܐ ܩܵܝ̇ܡܝܼܢܲܢ ܘܡܵܘܕܹ̇ܝܢܲܢ ܩܕܼܵܡܲܝܟ ܥܲܠ ܚܛܵܗܲܝ̈ܢ. ܡܸܛܠ ܕܠܲܝܬ̇ ܠܡܹܐܡܲܪ ܩܕܼܵܡܲܝܟ ܡܸܠܵܐ ܥܲܠ ܗܵܕܹܐ.