Read Aramaic Peshita Nehemiah 1 Bible Online

Nehemiah 1 - Aramaic Peshita bible

Nehemiah 1

¹ܦܸܬ̣ܓ̣ܵܡܲܝ̈ ܢܚܲܡܝܵܐ ܒܲܪ ܚܹܠܲܩܝܵܐ. ܘܲܗܘ̤ܵܐ ܒܝܼܪܲܚ ܟܵܢܘܿܢ: ܒܲܫܢܲܬ̣ ܥܸܣܪܝܼܢ ܐܸܢܵܐ ܩܵܐܹ̇ܡ ܗ̄ܘܹ̇ܝܬ̣ ܒܫܘܿܫܲܢ ܒܝܼܪܬܵܐ.

²ܘܐܸܬ̣ܵܐ ܚܲܢܲܢ ܚܲܕ݂ ܡ̣ܢ ܐܲܚܲܝ̈: ܗ̤ܘ ܘܓܲܒ̣ܪܹ̈ܐ ܝܗ̄ܘܼ̈ܕ݂ܵܝܹܐ. ܘܫܸܐܠܲܬ̣ ܐܸܢܘܿܢ ܥܲܠ ܝܗ̄ܘܼܕ݂ܵܝܹܐ ܐܲܝܠܹܝܢ ܕܝܼܬ̇ܪܘ ܡ̣ܢ ܫܸܒ̣ܝܵܐ: ܘܐܵܦ ܥܲܠ ܐܘܿܪܸܫܠܸܡ ܡܕ݂ܝܼܢ̄ܬܵܐ.

³ܘܐܵܡ̇ܪܝܼܢ ܠܝܼ ܗܵܠܹܝܢ ܐ̄ܢܵܫܵܐ ܕܫܸܐܠܹ̇ܬ̣ ܐܸܢܘܿܢ: ܗܵܢܘܿܢ ܐ̄ܢܵܫܵܐ ܐܲܝܠܹܝܢ ܕܲܦܠܲܛ̣ܘ ܡ̣ܢ ܫܸܒ̣ܝܵܐ: ܗܵܐ ܬܲܡܵܢ ܐܸܢܘܿܢ ܒܲܡܕ݂ܝܼܢ̄ܬܵܐ: ܒܒ̣ܝܼܫܬܵܐ ܪܲܒ̇ܬ̣ܵܐ ܫܪܹܝܢ: ܘܲܒ̣ܚܸܣܕܵܐ ܣܲܓܝܼܵܐܐ. ܘܗܵܐ ܫܘܼܪܵܗ̇ ܕܐܘܿܪܸܫܠܸܡ ܬܪܝܼܥ: ܘܬܲܪ̈ܥܹܝܗ̇ ܝܲܩܝܼܕ݂ܝܼܢ ܒܢܘܿܪܵܐ.

⁴ܗܵܝܕܹ̇ܝܢ ܟܲܕ݂ ܫܸܡܥܹ̇ܬ̣ ܡܸܠܹ̈ܐ ܗܵܠܹܝܢ: ܝܵܬܹܒ̣ ܗ̄ܘܹ̇ܝܬ̣ ܘܒ̣ܵܟܹ̇ܐ. ܘܡܸܬ̣̱ܐܒܸܠ ܗ̄ܘܹ̇ܝܬ̣ ܝܵܘ̈ܡܵܬ̣ܵܐ ܣܲܓ̇ܝܹ̈ܐܐ. ܘܲܗܘܹ̇ܝܬ̣ ܨܵܐܹ̇ܡ: ܘܲܡܨܲܠܸܐ ܩܕ݂ܵܡ ܐܲܠܵܗܵܐ ܕܲܫܡܲܝܵܐ.

⁵ܘܐܵܡܲܪ ܗ̄ܘܹ̇ܝܬ̣: ܒܵܥܹ̇ܐ ܐ̄ܢܵܐ ܡ̣ܢ ܩܕ݂ܵܡܲܝܟ: ܡܵܪܝܵܐ ܐܲܠܵܗܵܐ ܓܲܢ̄ܒܵܪܵܐ ܪܲܒܵܐ ܘܲܕ݂ܚܝܼܠܵܐ: ܢܵܛܲܪ ܫܪܵܪܵܐ ܘܛܲܝܒ̇ܘܼܬ̣ܵܐ ܠܪ̈ܵܚܡܵܘܗܝ: ܘܲܠܢܵܛܪ̈ܲܝ ܦܘܼܩܕܵܢܵܘ̈ܗܝ.

⁶ܢܸܗ̱ܘ̈ܝܵܢ ܡܸܟܹ̇ܝܠ ܥܲܝܢܲܝ̈ܟ ܦܬ̣ܝܼ̈ܚܵܢ: ܘܐܸܕ݂ܢܲܝ̈ܟ ܨܵܝ̈ܬܵܢ: ܠܡܸܫܡܲܥ ܨܠܘܿܬ̣ܵܐ: ܕܐܸܢܵܐ ܥܲܒ̣ܕܵܟ݂ ܡܨܲܠܹܐ ܩܕ݂ܵܡܲܝܟ: ܒܐܝܼܡܵܡܵܐ ܘܲܒ̣ܠܸܠܝܵܐ: ܥܲܠ ܒܢܲܝ̈ ܝܼܣܪܵܝܹܠ ܥܲܒ̣ܕܲܝ̈ܟ. ܘܐܸܢܵܐ ܡܵܘܕܹ̇ܐ ܐ̄ܢܵܐ ܥܲܠ ܚܛܵܗܹ̈ܐ ܕܲܒ̣ܢܲܝ̈ ܝܼܣܪܵܝܹܠ ܕܲܚܛܵܘ ܠܵܟ݂ ܘܐܸܢܵܐ ܘܒܹܝܬ̣ ܐܵܒ̣ܝ ܚܛܲܝܢܲܢ ܩܕ݂ܵܡܲܝܟ.

⁷ܘܠܵܐ ܢ̣ܛܲܪܢ ܦܘܼܩ̈ܕܵܢܹܐ ܘܢܵܡܘܿܣܹ̈ܐ ܕܦܲܩܸܕ̇ܬ̇ ܠܡܘܼܫܹܐ ܥܲܒ̣ܕܵܟ݂.

⁸ܐܸܬ̇ܕܲܟ݂ܪ ܠܟ݂ܠ ܦܘܼܩ̈ܕܵܢܹܐ ܕܦܲܩܸܕ̇ܬ̇ ܠܡܘܼܫܹܐ ܥܲܒ̣ܕܵܟ݂: ܘܐܸܡܲܪܬ̇ ܠܹܗ: ܕܐܲܢ̄ܬܘܿܢ ܬܟܲܕ̇ܒ̣ܘܼܢ ܒܝܼ: ܘܐܸܢܵܐ ܐܹܒܲܕܲܪܟ݂ܘܿܢ ܒܹܝܬ̣ ܥܲܡܡܹ̈ܐ.

⁹ܘܬܸܗܦ̄ܟ݂ܘܿܢ ܠܘܵܬ̣ܝ. ܘܬܸܛܪܘܼܢ ܢܵܡܘܿܣܲܝ̈: ܘܬܸܥܒ̇ܕ݂ܘܼܢ ܐܸܢܘܿܢ. ܘܐܸܢ ܢܸܗܘܘܿܢ ܡܒܲܕ̇ܪ̈ܲܝܟ̇ܘܿܢ ܒܣܵܘ̈ܦܲܝ ܫܡܲܝܵܐ: ܡ̣ܢ ܬܲܡܵܢ ܐܹܩܲܪܸܒ̣ܟ݂ܘܿܢ ܘܐܲܝܬܹ̇ܝܟ݂ܘܿܢ ܠܐܲܬ̣ܪܵܐ ܕܲܓ̣ܒܹ̇ܝܬ̣ ܠܡܲܫܪܵܝܘܼ ܫܹܡܝ ܬܲܡܵܢ.

¹⁰ܘܗܸܢܘܿܢ ܥܲܒ̣ܕ̇ܝ̈ܟ ܘܥܲܡܵܟ݂ ܕܲܦܪܲܩ̣ܬ̇ ܒܚܲܝܠܵܟ݂ ܪܲܒܵܐ: ܘܒ̣ܐܝܼܕ݂ܵܟ݂ ܬܲܩܝܼܦܬܵܐ.

¹¹ܒܒ̣ܵܥܘܼ ܡ̣ܢ ܩܕ݂ܵܡܲܝܟ ܡܵܪܝܵܐ: ܬܸܗܘܹܐ ܐܸܕ݂ܢܵܟ݂ ܨܵܝ̇ܬܵܐ ܠܲܨܠܘܿܬܹܗ ܕܥܲܒ̣ܕܵܟ݂: ܘܠܲܨܠܘܿܬ̣ܵܐ ܕܐܲܝܠܹܝܢ ܕܨܵܒܹ̇ܝܢ ܠܡܸܕ݂ܚܲܠ ܠܲܫܡܵܟ݂: ܘܲܦܪܘܿܩܲܝܗܝ ܠܥܲܒ̣ܕܵܟ݂ ܝܵܘܡܵܢܵܐ. ܘܗܲܒܲܝܗܝ ܒܪ̈ܲܚܡܹܐ ܩܕ݂ܵܡ ܓܲܒ̣ܪܵܐ ܗܵܢܵܐ.