Read Aramaic Peshita Nehemiah 12 Bible Online

Nehemiah 12 - Aramaic Peshita bible

Nehemiah 12

¹ܘܗܵܠܹܝܢ ܟܘܼܡܪܹ̈ܐ ܘܠܹܘܵܝܹ̈ܐ ܕܲܣܠܸܩ̣ܘ ܥܲܡ ܙܘܼܒܵܒܹܠ ܒܲܪ ܫܸܠܬ̣ܐܹܝܠ: ܝܼܫܘܿܥ: ܣܪܲܒ̣ܝܵܐ: ܥܲܙܡܵܐ. ܥܲܙܪܵܐ.

²ܐܵܡܲܪܝܵܐ: ܡܠܘܿܟ݂: ܚܛܘܿܫ.

³ܫܟܲܢܝܵܐ: ܐܲܪܚܘܿܡ: ܡܲܪܡܘܿܬ̣.

⁴ܥܲܕܵܐ: ܥܲܙܬ̇ܝܼ: ܐܲܒ̣ܝܼܵܐ.

⁵ܒܸܢܝܵܡܹܝܢ: ܡܥܲܕ̇ܪܝܼܵܐ: ܒܠܲܓ̣ܝܵܐ.

⁶ܫܡܲܥܝܵܐ: ܢܕ݂ܘܿܥ: ܝܘܿܕܲܥܝܵܐ.

⁷ܣܠܘܿܝ: ܥܡܘܿܩ: ܚܹܠܲܩܝܵܐ: ܝܼܕܲܥܝܵܐ. ܗܵܠܹܝܢ ܪܹ̈ܫܹܐ ܕܟ݂ܘܼܡܪܹ̈ܐ ܘܐܲܚܲܝ̈ܗܘܿܢ: ܒܝܵܘ̈ܡܵܬܹܗ ܕܝܼܫܘܿܥ.

⁸ܘܠܹܘܵܝܹ̈ܐ: ܝܼܫܘܿܥ ܘܲܒ̣ܢܵܘ̈ܗܝ: ܩܲܕ݂ܡܝܼܵܐ: ܫܪܲܒ̣ܝܵܐ: ܝܑܼܗܘܼܕ݂ܵܐ: ܡܬܲܢܝܵܐ: ܗܘܼܕ݂ܝܼܬ̣: ܗ̤ܘ ܘܐܲܚܲܝ̈ܗܘܿܢ.

⁹ܘܒܲܩܒ̇ܘܼܩܵܐ: ܘܥܲܢܵܢܝܼ: ܘܐܲܚܲܝ̈ܗܘܿܢ ܠܘܼܩܒܲܠܗܘܿܢ ܒܡܲܛܲܪܬܵܐ.

¹⁰ܘܝܼܫܘܿܥ ܐܵܘܠܸܕ݂ ܠܝܘܿܝܵܩܝܼܡ: ܘܝܘܿܝܵܩܝܼܡ ܐܵܘܠܸܕ݂ ܠܐܹܠܝܼܫܵܒ̣: ܘܐܹܠܝܼܫܵܒ̣ ܐܵܘܠܸܕ݂ ܠܝܘܿܝܵܕ݂ܵܥ.

¹¹ܘܝܘܿܝܵܕ݂ܵܥ ܐܵܘܠܸܕ݂ ܠܝܘܿܢܵܬ̣ܵܢ: ܘܝܘܿܢܵܬ̣ܵܢ ܐܵܘܠܸܕ݂ ܠܝܵܕ݂ܘܿܥܵܐ.

¹²ܘܲܒ̣ܝܵܘ̈ܡܲܝ ܝܘܿܝܵܩܝܼܡ: ܗܘ̤ܵܘ ܟܘܼܡܪܹ̈ܐ ܪܹ̈ܫܲܝ ܐܲܒ̣ܵܗܹ̈ܐ: ܣܪܲܒ̣ܝܵܐ: ܐܵܡܲܪܝܵܐ: ܐܹܪܲܡܝܵܐ: ܚܲܢܲܢܝܵܐ.

¹³ܥܲܙܲܪܝܵܐ: ܡܲܫܠܘܿܡ: ܐܵܡܲܪܝܵܐ: ܝܘܿܚܲܢܵܢ.

¹⁴ܡܠܲܟ݂ܝܵܐ: ܝܘܿܢܵܬ̣ܵܢ: ܫܟܲܢܝܵܐ: ܝܵܘܣܸܦ.

¹⁵ܚܵܪܵܡ: ܥܲܪܝܼܵܐ: ܡܲܪܡܘܿܬ̣: ܠܲܚܡܝܼ.

¹⁶ܥܲܕ̇ܘܿ: ܙܟܲܪܝܵܐ: ܓܸܒ̣ܬ̇ܘܢ: ܡܲܫܠܲܡ.

¹⁷ܐܲܒ̣ܝܼܵܐ: ܙܲܟ݂ܪܝܼ: ܒܸܢܝܵܡܹܝܢ: ܡܘܼܕܲܥܝܵܐ: ܦܘܼܠܛܵܐ.

¹⁸ܒܲܠܓܵܐ: ܫܡܘܿܥ: ܫܡܲܥܝܵܐ: ܝܘܿܢܵܬ̣ܵܢ.

¹⁹ܝܘܿܝܵܕ݂ܵܥ: ܡܲܬ̣ܢܝܼ: ܝܼܕܲܥܝܵܐ: ܥܲܙܝܼ.

²⁰ܣܲܠܝܼ: ܩܲܠܝܼ: ܥܡܘܿܩ: ܥܒ̣ܝܼܕ݂.

²¹ܘܚܹܠܲܩܝܵܐ: ܚܫܲܒ̣ܝܵܐ: ܗܘܿܕ݂ܵܥ: ܢܲܬ̣ܢܝܼܐܹܝܠ.

²²ܠܹܘܵܝܹ̈ܐ ܒܝܵܘ̈ܡܵܬܹܗ ܕܐܹܠܝܼܫܵܒ̣: ܝܘܿܝܵܕ݂ܵܥ: ܘܝܘܿܚܲܢܵܢ: ܘܝܵܕ݂ܘܿܥ: ܟܬ̣ܝܼܒ̣ܝܼܢ ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ ܘܟ݂ܘܼܡܪܹ̈ܐ: ܥܲܠ: ܡܲܠܟ̇ܘܼܬ̣ ܕܵܪܝܵܘܵܫ ܦܵܪܣܵܝܵܐ.

²³ܒܢܲܝ̈ ܠܹܘܝܼ ܪܹ̈ܫܲܝ ܐܲܒ̣ܵܗܹ̈ܐ: ܟܬ̣ܝܼܒ̣ܝܼܢ ܥܲܠ ܟܬ̣ܵܒ̣ܵܐ ܕܦܸܬ̣ܓ̣ܵܡܹ̈ܐ ܕܝܵܘ̈ܡܵܬ̣ܵܐ: ܥܕܲܡܵܐ ܠܝܵܘ̈ܡܵܬܹܗ ܕܝܘܿܚܲܢܵܢ ܒܲܪ ܐܹܠܝܼܫܵܒ̣.

²⁴ܘܪܹ̈ܫܲܝ ܠܹܘܵܝܹ̈ܐ: ܫܒ̣ܝܠ: ܫܪܲܒ̣ܝܵܐ: ܘܝܼܫܘܿܥ: ܘܐܲܚܵܘ̈ܗܝ ܒܢܲܝ̈ ܩܲܕ݂ܡܵܐܹܝܠ: ܠܘܼܩܒܲܠܗܘܿܢ ܡܫܲܒ̇ܚܝܼܢ ܘܡܵܘܕܹ̇ܝܢ ܐܲܝܟ݂ ܦܘܼܩܕܵܢܵܘ̈ܗܝ ܕܕ݂ܵܘܝܼܕ݂ ܢܒ̣ܝܼܵܐ ܕܡܵܪܝܵܐ: ܡܲܛܲܪܬܵܐ ܠܘܼܩܒܲܠ ܡܲܛܲܪܬܵܐ.

²⁵ܡܬܲܢܝܵܐ: ܘܒܲܩܝܼ: ܘܥܘܿܒܲܕ݂ܝܵܐ: ܘܫܵܠܘܿܡ: ܘܐܲܛܠܵܡ: ܘܲܥܩܘܿܦ: ܢܵܛܪ̈ܲܝ ܬܲܪ̈ܥܹܐ.

²⁶ܗܵܠܹܝܢ ܒܝܵܘ̈ܡܲܝ ܝܘܿܝܵܩܝܼܡ ܒܲܪ ܝܼܫܘܿܥ: ܒܲܪ ܝܘܿܙܵܕ݂ܵܩ: ܘܲܒ̣ܝܵܘ̈ܡܲܝ ܢܲܚܡܵܐܹܝܠ ܪܹܫܵܐ: ܘܥܲܙܪܵܐ ܟܵܗܢܵܐ ܘܣܵܦܪܵܐ.

²⁷ܘܟܲܕ݂ ܓܡܲܪ ܫܘܼܪܵܐ ܕܐܘܿܪܸܫܠܸܡ: ܟܲܢܸܫ̣ܘ ܠܹܘܵܝܹ̈ܐ ܒܟ݂ܠܹܗ ܐܲܬ̣ܪ̱ܗܘܿܢ: ܠܡܲܝܬܵܝܘܼ ܐܸܢܘܿܢ ܠܐܘܿܪܸܫܠܸܡ: ܘܲܠܡܸܥܒܲܕ݂ ܒܘܼܣܵܡܵܐ ܘܚܲܕ݂ܘܼܬ̣ܵܐ: ܒܬ̣ܵܘܕ̇ܝܼܬ̣ܵܐ ܘܬܸܫܒ̇ـ̈ـܚܵܬ̣ܵܐ ܘܨܸܨ̈ܠܹܐ ܘܟܸܢܵܪܹ̈ܐ.

²⁸ܘܐܸܬ̣ܟܲܢܲܫܘ ܡܫܲܡ̈ܫܵܢܹܐ ܡ̣ܢ ܦܩܲܥܬ̣ܵܐ ܕܐܝܼܬ̣ ܚܕ݂ܵܪ̈ܲܝ ܐܘܿܪܸܫܠܸܡ: ܘܡ̣ܢ ܕܵܪܲܬ̣ ܢܛܵܦܵܐ.

²⁹ܘܡ̣ܢ ܒܹܝܬ̣ ܓܲܠܓܵܠܵܐ: ܘܡ̣ܢ ܢܲܚܠܵܐ ܕܲܓ̣ܒܲܥ: ܘܡ̣ܢ ܥܲܪܡܘܿܬ̣: ܡܸܛܠ ܕܕ݂ܵܪܹ̈ܐ ܒܢܵܘ ܠܗܘܿܢ ܡܫܲܡܫܵܢܹ̈ܐ ܚܕ݂ܵܪ̈ܲܝ ܐܘܿܪܸܫܠܸܡ.

³⁰ܘܐܸܬ̇ܕܲܟ̇ܝܼܘ ܟܘܼܡܪܹ̈ܐ ܘܠܹܘܵܝܹ̈ܐ: ܘܕܲܟ̇ܝܼܘ ܠܥܲܡܵܐ ܘܲܠܬܲܪ̈ܥܹܐ ܕܫܘܼܪܵܐ.

³¹ܘܐܲܣܸܩ̣ܘ ܠܪܹ̈ܫܹܐ ܕܲܝܗܘܼܕ݂ܵܐ ܠܥܸܠ ܡܢ ܫܘܼܪܵܐ. ܘܐܲܩܝܼܡ̣ܘ ܬܲܪܬܹ̇ܝܢ ܟܢ̈ܘܼܫܵܬ̣ܵܐ ܪܵܘ̱ܪ̈ܒ̣ܵܬ̣ܵܐ. ܘܗܲܠܸܟ݂ܘ ܠܥܸܠ ܡ̣ܢ ܫܘܼܪܵܐ: ܠܝܲܡܝܼܢܵܐ ܡ̣ܢ ܬܲܪܥܵܐ ܪܲܒܵܐ.

³²ܘܐܸܙܲܠ̣ܘ ܥܲܡܗܘܿܢ ܐܘܿܫܲܥܝܵܐ: ܘܦܸܠܓܵܐ ܕܪܹ̈ܫܹܐ ܕܲܝܗܘܼ̈ܕ݂ܵܝܹܐ.

³³ܘܥܲܙܪܵܐܹܝܠ: ܘܥܲܙܪܵܐ: ܘܡܲܫܠܘܿܡ.

³⁴ܘܲܝܗܘܼܕ݂ܵܐ: ܘܒܸܢܝܵܡܹܝܢ: ܘܲܫܡܲܥܝܵܐ: ܘܲܢܕܲܡܝܵܐ.

³⁵ܘܡ̣ܢ ܒܢܲܝ̈ ܟܘܼܡܪܹ̈ܐ ܒܩܲܪ̈ܢܵܬ̣ܵܐ: ܙܟܲܪܝܵܐ ܒܲܪ ܝܘܿܢܵܬ̣ܵܢ: ܒܲܪ ܫܡܲܥܝܵܐ: ܒܲܪ ܡܬܲܢܝܵܐ: ܒܲܪ ܡܲܠܟܵܐ: ܒܲܪ ܙܟ݂ܘܿܪ: ܒܲܪ ܐܵܣܵܦ.

³⁶ܘܐܲܚܵܘ̈ܗܝ ܫܡܲܥܝܵܐ: ܘܥܲܙܪܵܐܹܝܠ: ܡܠܵܠ: ܓܠܵܠ: ܥܛܵܪ: ܢܲܬ̣ܢܝܼܐܹܝܠ: ܚܢܵܢܝܼ: ܝܼܗܘܼܕ݂ܵܐ: ܒܡܵܐܢܹ̈ܐ ܕܬܸܫܒ̇ـ̈ـܚܵܬ̣ܵܐ ܕܕ݂ܵܘܝܼܕ݂ ܢܒ̣ܝܼܵܐ: ܥܲܒ̣ܕܵܐ ܕܡܵܪܝܵܐ. ܘܥܲܙܪܵܐ ܣܵܦܪܵܐ ܩܕ݂ܵܡܲܝܗܘܿܢ ܠܥܸܠ ܡ̣ܢ ܬܲܪܥܵܐ ܕܥܲܝܢܵܐ.

³⁷ܘܠܘܼܩܒܲܠܗܘܿܢ ܣܠܸܩ ܡ̣ܢ ܡܲܣܩܵܢܵܐ ܕܲܩܪܝܼܬ̣ܵܐ ܕܕ݂ܵܘܝܼܕ݂: ܒܡܲܣܩܵܢܵܐ ܕܫܘܼܪܵܐ ܡ̣ܢ ܠܥܸܠ ܠܒܹܝܬ̣ ܕܵܘܝܼܕ݂: ܥܲܠ ܬܲܪܥܵܐ ܪܲܒܵܐ ܡܲܕ݂ܢ̱ܚܵܝܵܐ.

³⁸ܘܐܵܘܕ̇ܝܼܘ ܘܲܣܠܸܩ ܡ̣ܢ ܠܥܸܠ ܘܐܸܢܵܐ ܒܵܬܲܪܗܘܿܢ. ܘܦܸܠܓܵܐ ܕܥܲܡܵܐ ܣܠܸܩ̣ܘ ܥܲܠ ܫܘܼܪܵܐ. ܘܩܵܡ̣ܘ ܥܲܠ ܡܲܓܕ̇ܠܵܐ ܪܲܒܵܐ: ܘܥܲܠ ܫܘܼܪܵܐ ܦܲܬ̣ܝܵܐ.

³⁹ܘܲܠܥܸܠ ܡ̣ܢ ܬܲܪܥܵܐ ܕܐܲܦܪܹܝܡ ܥܕܲܡܵܐ ܠܬܲܪܥܵܐ ܥܲܬ̇ܝܼܩܵܐ: ܘܲܥܕܲܡܵܐ ܠܬܲܪܥܵܐ ܕܨܲܝܵܕܹ̈ܐ: ܘܡ̣ܢ ܡܲܓܕ̇ܠܵܐ ܕܲܚܢܵܢܵܐܹܝܠ ܥܕܲܡܵܐ ܠܡܲܓܕ̇ܠܵܐ ܪܵܡܵܐ: ܘܲܥܕܲܡܵܐ ܠܬܲܪܥܵܐ ܕܥܵـ̈ـܢܵܐ. ܘܩܵܡ̣ܘ ܒܬܲܪܥܵܐ ܪܲܒܵܐ.

⁴⁰ܘܥܲܠ̣ܘ ܬܲܪܬܹ̇ܝܢ ܟܢܘܼ̈ܫܵܢ ܠܒܲܝܬܹ̇ܗ ܕܡܵܪܝܵܐ: ܘܐܸܢܵܐ ܘܦܸܠܓ̇ܗܘܿܢ ܕܪܹ̈ܫܵܢܹܐ ܕܐܝܼܬ̣ ܗ̄ܘ̣ܵܘ ܥܲܡܝܼ.

⁴¹ܘܟ݂ܘܼܡܪܹ̈ܐ ܐܹܠܝܵܩܝܼܡ: ܘܲܡܥܲܣܝܵܐ: ܡܲܠܚܝܼܢ: ܡܝܼܟ݂ܵܐ: ܘܐܹܠܝܼܗܘܼ: ܥܢܵܢܝ: ܘܙܲܟܪܝܵܐ: ܚܲܢܲܢܝܵܐ.

⁴²ܘܲܒ̣ܩܲܪ̈ܢܵܬ̣ܵܐ ܡܥܲܣܝܵܐ: ܘܲܫܡܲܥܝܵܐ: ܘܠܵܥܵܙܲܪ: ܘܥܲܙܝܼ: ܘܝܘܿܚܲܢܵܢ: ܘܲܡܠܲܟ݂ܝܵܐ: ܘܥܝܼܠܵܡ: ܘܥܵܕ݂ܘܿܪ: ܘܲܫܡܘܿܥ: ܡܫܲܡ̈ܫܵܢܹܐ. ܘܲܙܪܲܚܝܵܐ ܪܹܫܵܐ.

⁴³ܘܕܲܒܲܚܘ ܒܝܵܘܡܵܐ ܗܵܘ̇ ܕܸܒ̣ܚܹ̈ܐ ܪܵܘ̱ܪ̈ܒܹܐ ܘܲܚܕ݂ܝܼܘ. ܡܸܛܠ ܕܡܵܪܝܵܐ ܚܲܕ̇ܝܼ ܐܸܢܘܿܢ ܚܲܕ݂ܘܼܬ̣ܵܐ ܪܲܒ̇ܬ̣ܵܐ. ܘܐܵܦ ܢܸܫܹ̈ܐ ܘܲܛܠܵܝܹ̈ܐ ܚܕ݂ܝܼܘ ܘܐܹܫܬܲܡܥܲܬ̤ ܚܲܕ݂ܘܼܬ̣ܵܐ ܕܒ̣ܐܘܿܪܸܫܠܸܡ ܠܪܘܼܚܩܵܐ.

⁴⁴ܘܐܸܫܬܲܠܲܛܘ ܒܝܵܘܡܵܐ ܗܵܘ̇: ܓܲܒ̣ܪܹ̈ܐ ܐܲܝܠܹܝܢ ܕܝܵܗ̄ܒ̣ܝܼܢ ܗ̄ܘ̣ܵܘ ܡ̣ܢ ܐܵܘܨܪܹ̈ܐ ܕܡܲܠܟܵܐ ܒܵـ̈ـܬܹ̇ܐ ܠܲܡܩܲܦܵܣܘܼ ܒܗܘܿܢ ܪܹ̈ܫܝܵܬ̣ܵܐ: ܘܡܲܥܣܵܪܹ̈ܐ ܕܪܹ̈ܫܹܐ ܕܩܘܼܪ̈ܝܵܐ: ܐܲܝܟ݂ ܕܲܟ݂ܬ̣ܝܼܒ̣ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ: ܠܟ݂ܘܼܡܪܹ̈ܐ ܘܲܠܠܹܘܵܝܹ̈ܐ: ܡܸܛܠ ܕܚܲܕ݂ܘܼܬ̣ܵܐ ܕܲܝܗ̈ܘܼܕ݂ܵܝܹܐ: ܥܲܠ ܟܘܼܡܪܹ̈ܐ ܘܠܹܘܵܝܹ̈ܐ ܐܲܝܠܹܝܢ ܕܩܵܝ̇ܡܝܼܢ ܘܢܵܛ̇ܪܝܼܢ ܡܲܛܲܪܬܵܐ ܒܒܲܝܬܵܐ ܕܐܲܠܵܗܗܘܿܢ.

⁴⁵ܘܢܵܛܪ̈ܲܝ ܢܛܘܼܪܬܵܐ ܕܲܟ݂ܝܵܐܝܼܬ̣: ܘܲܡܫܲܡ̈ܫܵܢܹܐ ܘܬ̣ܵܪ̈ܥܹܐ: ܐܲܝܟ݂ ܦܘܼܩܕܵܢܵܐ ܕܕ݂ܵܘܝܼܕ݂ ܘܕܲܫܠܹܝܡܘܿܢ ܒܪܹܗ.

⁴⁶ܡܸܛܠ ܕܲܒ̣ܝܵܘ̈ܡܵܬ̣ܵܐ ܕܕ݂ܵܘܝܼܕ݂ ܗܘ̤ܵܐ ܐܵܣܵܦ ܘܩܵܡ̣ ܒܪܹܫܵܐ ܕܲܡܫܲܡ̈ܫܵܢܹܐ ܘܲܡܫܲܒܲܚ ܗ̄ܘ̣ܵܐ ܘܡܵܘܕܹ̇ܐ ܩܕ݂ܵܡ ܡܵܪܝܵܐ ܐܲܠܵܗܵܐ.

⁴⁷ܘܟ݂ܠܹܗ ܝܼܣܪܵܝܹܠ ܒܝܵܘܡܵܘ̈ܗܝ ܕܙܘܼܪܒܵܒܹܠ: ܘܲܒ̣ܝܵܘ̈ܡܵܬܹܗ: ܕܲܢܚܲܡܝܵܐ: ܝܵܗ̄ܒ̇ܝܼܢ ܡܵܘܗ̈ܒ̣ܵܬ̣ܵܐ ܠܲܡܫܲܡ̈ܫܵܢܹܐ. ܘܬ̣ܵܪ̈ܥܹܐ ܡܲܦܩܝܼܢ ܘܝܵܗ̄ܒ̇ܝܼܢ ܝܘܿܡ ܒܝܵܘܡܹܗ: ܘܲܡܩܲܕ̇ܫܝܼܢ ܠܠܹܘܵܝܹ̈ܐ. ܘܠܹܘܵܝܹ̈ܐ ܡܩܲܕ̇ܫܝܼܢ ܠܲܒ̣ܢܲܝ̈ ܐܲܗܪܘܿܢ.