Read Aramaic Peshita Nehemiah 13 Bible Online

Nehemiah 13 - Aramaic Peshita bible

Nehemiah 13

¹ܒܹܗ ܒܝܵܘܡܵܐ ܗܵܘ̇ ܐܸܬ̣ܩܪܝܼ ܟܬ̣ܵܒ̣ܵܐ ܕܢܵܡܘܿܣܵܐ ܕܡܘܼܫܹܐ ܒܐܸܕ݂ܢܲܝ̈ ܥܲܡܵܐ. ܘܐܸܫܬ̇ܟܲܚ ܕܲܟ݂ܬ̣ܝܼܒ̣ ܒܹܗ. ܠܵܐ ܢܸܥܠܘܼܢ ܥܲܡܘܿܢܵܝܹ̈ܐ ܘܡܘܼܐܒ̣ܵܝܹ̈ܐ ܠܲܟ݂ܢܘܼܫܬܹ̇ܗ ܕܡܵܪܝܵܐ: ܥܕܲܡܵܐ ܠܥܵܠܲܡ.

²ܡܸܛܠ ܕܠܵܐ ܐܲܪܲܥܘ ܠܲܒ̣ܢܲܝ̈ ܝܼܣܪܵܝܹܠ ܒܠܲܚܡܵܐ ܘܲܒ̣ܡܲـ̈ـܝܵܐ. ܘܐܲܓ̣ܪܘ ܠܗܘܿܢ ܠܒܸܠܥܵܡ ܠܲܡܠܵܛ ܐܸܢܘܿܢ. ܘܐܲܗ̣ܦܸܟ݂ ܐܲܠܵܗܵܐ ܠܵܘ̈ܛܵܬܹܗ ܠܒ̣ܘܼܪ̈ܟܵܬ̣ܵܐ.

³ܗܵܝܕܹ̇ܝܢ ܟܲܕ݂ ܫܡܲܥ̣ܘ ܡܸܠܹ̈ܐ ܕܢܵܡܘܿܣܵܐ: ܐܸܬ̣ܦܪܸܫܘ ܟܠܗܘܿܢ ܥܲܪ̈ܘܼܒܹܐ ܡ̣ܢ ܝܼܣܪܵܝܹܠ.

⁴ܘܐܸܬ̣ܵܐ ܐܹܠܝܼܫܵܒ̣ ܟܘܼܡܪܵܐ: ܘܲܒ̣ܢܵܐ ܠܹܗ ܬܲܡܵܢ ܕܵܪܬܵܐ ܚܕ݂ܵܐ ܪܲܒ̇ܬ̣ܵܐ.

⁵ܘܬܲܡܵܢ ܡ̣ܢ ܠܩܘܼܕ݂ܡܝܼܢ ܣܵܝܡܝܼܢ ܗ̄ܘ̣ܵܘ ܩܘܼܪ̈ܒܵܢܹܐ ܘܲܠܒ̣ܘܼܢ̄ܬܵܐ. ܘܡܵܐܢܹ̈ܐ ܕܡܲܥܣܵܪܹ̈ܐ ܕܲܥܒ̣ܘܼܪܵܐ ܘܲܕ݂ܚܲܡܪܵܐ ܘܲܕ݂ܡܸܫܚܵܐ ܘܲܒ̣ܩܘܼܪ̈ܝܵܐ ܕܠܹܘܵܝܹ̈ܐ ܘܲܡܫܲܡ̈ܫܵܢܹܐ: ܘܲܕ̇ܬ̣ܵܪ̈ܥܹܐ: ܪܹ̈ܫܝܵܬ̣ܵܐ ܕܟ݂ܵܗ̈ܢܹܐ.

⁶ܘܲܒ̣ܟ݂ܠܗܹܝܢ ܗܵܠܹܝܢ ܠܵܐ ܗܘܹ̇ܝܬ̣ ܒܐܘܿܪܸܫܠܸܡ: ܡܸܛܠ ܕܒܲܫܢܲܬ̣ ܬܠܵܬ̣ܝܼܢ ܘܬܲܪܬܹ̇ܝܢ ܠܐܲܪܛܲܚܫܸܫܬ̇ ܡܲܠܟܵܐ ܕܒ̣ܵܒܹܠ: ܐܸܬܹ̇ܝܬ̣ ܠܘܵܬ̣ ܡܲܠܟܵܐ ܒܚܲܪܬ̣ܵܐ ܕܝܵܘ̈ܡܵܬ̣ܵܐ ܐܸܫܬܲܐܠܹܬ̣ ܡ̣ܢ ܡܲܠܟܵܐ.

⁷ܘܐܸܬܹܝܬ̣ ܠܐܘܿܪܸܫܠܸܡ: ܘܐܸܣܬܲܟ̇ܠܹܬ̣ ܒܝܼܫܬܵܐ ܕܲܥܒܲܕ݂ ܐܹܠܝܼܫܵܒ̣ ܠܛܘܿܒ̇ܝܼܵܐ. ܕܲܥܒܲܕ݂ ܠܹܗ ܒܲܝܬܵܐ ܒܕ݂ܵܪܬܵܐ ܕܡܵܪܝܵܐ.

⁸ܘܐܸܬ̣ܒ̇ܐܸܫ ܠܝܼ ܛܵܒ̣: ܘܲܫܕܹܝܬ̣ ܟܠܗܘܿܢ ܡܵܐܢܹ̈ܐ ܕܒܲܝܬܹܗ ܕܛܘܼܒ̇ܝܼܵܐ: ܒܫܘܼܩܵܐ ܠܒܲܪ ܡ̣ܢ ܕܵܪܬܵܐ.

⁹ܘܐܸܡ̇ܪܹܬ̣ ܘܕܲܟ̇ܝܼܘ ܕܵܪܬܵܐ ܘܐܲܗܦܟܹ̇ܬ̣ ܠܬܲܡܵܢ ܡܵܐܢܲܝ̈ ܒܲܝܬܹ̇ܗ ܕܡܵܪܝܵܐ: ܘܩܘܼܪ̈ܒܵܢܹܐ ܘܲܠܒ̣ܘܼܢ̄ܬܵܐ.

¹⁰ܘܝܸܕ݂ܥܹ̇ܬ̣ ܕܲܡܢܵܬ̣ܵܐ ܕܠܹܘܵܝܹ̈ܐ ܠܵܐ ܡܸܬ̣ܝܲܗ̄ܒܵܐ. ܘܲܥܪܲܩ̣ܘ ܓܒܲܪ ܠܚܲܩܠܹܗ: ܠܹܘܵܝܹ̈ܐ ܘܲܡܫܲܡ̈ܫܵܢܹܐ ܘܥܵܒ̣ܕܲܝ̈ ܥܒ̣ܝܼ̈ܕ݂ܵܬ̣ܵܐ.

¹¹ܘܐܸܢܵܐ ܕܵܢܹ̇ܬ̣ ܥܲܡ ܪܹ̈ܫܹܐ: ܘܐܸܡ̇ܪܹܬ̣ ܠܗܘܿܢ: ܡܸܛܠ ܡܵܢܵܐ ܫܒ̣ܝܼܩ ܒܲܝܬܹ̇ܗ ܕܡܵܪܝܵܐ ܘܟܲܢܫܹ̇ܬ̣ ܐܸܢܘܿܢ: ܘܐܲܩܝܼܡܹ̇ܬ̣ ܐܸܢܘܿܢ ܥܲܠ ܩܝܵܡܲܝ̈ܗܘܿܢ.

¹²ܘܟ݂ܠ ܝܗ̄ܘܼ̈ܕ݂ܵܝܹܐ ܐܲܝܬ̇ܝܼܘ ܡܲܥܣܵܪܹ̈ܐ ܕܲܥܒ̣ܘܼܪܵܐ: ܘܲܕ݂ܚܲܡܪܵܐ: ܘܲܕ݂ܡܸܫܚܵܐ: ܠܐܵܘܨܪܹ̈ܐ.

¹³ܘܐܲܫ̱ܠܛܹ̇ܬ̣ ܥܲܠ ܐܵܘܨܪܹ̈ܐ ܠܲܫܠܲܡܝܵܐ ܟܘܼܡܪܵܐ: ܘܲܠܨܵܕ݂ܘܿܩ ܣܵܦܪܵܐ: ܘܠܲܦܪܵܝܵܐ ܒܲܪ ܠܹܘܵܝܹ̈ܐ: ܘܥܲܡܗܘܿܢ ܚܲܢܲܢ ܒܲܪ ܙܟ݂ܘܿܪ ܒܲܪ ܡܬܲܢܝܵܐ. ܡܸܛܠ ܕܫܲܪܝܼܪܹ̈ܐ ܐܸܬ̣ܚܲܫܲܒ̣ܘ: ܘܦܸܨܲܬ̣ܗܘܿܢ ܣܸܠܩܲܬ̤ ܠܡܸܗܘܵܐ ܪܹ̈ܫܹܐ ܠܐܲܚܲܝ̈ܗܘܿܢ.

¹⁴ܐܸܬ̇ܕܲܟ݂ܪ ܠܝܼ ܐܲܠܵܗܝ ܡܸܛܠ ܗܵܕܹܐ. ܘܠܵܐ ܬܲܥܒܲܪ ܛܲܝܒ̇ܘܼܬ̣ܝ ܕܥܸܒ̣ܕܹ̇ܬ̣ ܒܒܹܝܬ̣ ܐܲܠܵܗܝ ܘܒܲܢܛܘܼܪ̈ܵܬ̣ܵܟ݂.

¹⁵ܒܝܵܘ̈ܡܵܬ̣ܵܐ ܗܵܢܘܿܢ ܚܙܹ̇ܝܬ̣ ܒܲܝܗܘܼܕ݂ ܐܘܼܪ̈ܚܵܬ̣ܵܐ ܕܪ̈ܵܕ݂ܝܵܢ ܒܫܲܒ̇ܬ̣ܵܐ. ܘܡܲܝܬܹ̇ܝܢ ܛܲܥܢܹ̈ܐ: ܘܫܵܩܠܝܼܢ ܥܲܠ ܚܸܡܪ̈ܵܐ: ܘܐܵܦ ܚܲܡܪܵܐ: ܘܥܸܢܒܹ̈ܐ: ܘܬܹܐܢܹ̈ܐ. ܘܛܲܥܢܹ̈ܐ ܡܲܥܠܝܼܢ ܠܐܘܿܪܸܫܠܸܡ ܒܝܵܘܡܵܐ ܕܫܲܒ̇ܬ̣ܵܐ ܘܐܲܣ̱ܗ̇ܕܹܬ̣ ܒܗܘܿܢ: ܕܠܵܐ ܬܙܲܒ̇ܢܘܼܢ ܨܲܝܕܵܐ.

¹⁶ܘܠܵܐ ܬܲܝܬ̇ܘܼܢ ܢܘܼܢܹ̈ܐ. ܘܠܵܐ ܬܙܲܒ̇ܢܘܼܢ ܒܝܵܘܡܵܐ ܕܫܲܒ̇ܬ̣ܵܐ: ܠܲܒ̣ܢܲܝ̈ ܝܑܼܗܘܼܕ݂ܵܐ ܒܐܘܿܪܸܫܠܸܡ.

¹⁷ܘܕ݂ܵܢܹ̇ܬ̣ ܥܲܡ ܪܹ̈ܫܹܐ ܕܲܝܗܘܼܕ݂ܵܐ. ܘܐܸܡܪܹܬ̣ ܠܗܘܿܢ: ܡܸܛܠ ܡܵܢܵܐ ܦܸܬ̣ܓ̣ܵܡܵܐ ܗܵܢܵܐ ܒܝܼܫܵܐ ܥܵܒ̣ܕ̇ܝܼܢ ܐ̄ܢܬ̇ܘܿܢ ܘܡܲܚܠܝܼܢ ܐܢ̄ܬ̇ܘܿܢ ܝܵܘܡܵܐ ܕܫܲܒ̇ܬ̣ܵܐ.

¹⁸ܗܵܟܲܢܵܐ ܥܒܲܕ݂ܘ ܐܲܒ̣ܵܗܲܝ̈ܟ̇ܘܿܢ ܘܐܲܝܬܝܼ ܐܲܠܵܗܵܐ ܥܠܲܝܢ ܟܠܵܗ̇ ܒܝܼܫܬܵܐ ܗܵܕܹܐ: ܘܥܲܠ ܩܪܝܼܬ̣ܵܐ ܗܵܕܹܐ. ܘܐܲܢ̄ܬ̇ܘܿܢ ܡܵܘܣܦܝܼܢ ܚܸܡܬ̣ܵܐ ܘܪܘܼܓ̣ܙܵܐ ܥܲܠ ܝܼܣܪܵܝܹܠ: ܕܐܲܢ̄ܬ̇ܘܿܢ ܡܲܚܠܝܼܢ ܝܵܘܡܵܐ ܕܫܲܒ̇ܬ̣ܵܐ.

¹⁹ܗܵܝܕܹ̇ܝܢ ܟܲܕ݂ ܐܸܬ̣ܦܲܬܲܚܘ ܬܲܪ̈ܥܹܐ ܕܐܘܿܪܸܫܠܸܡ ܩܕ݂ܵܡ ܫܲܒ̇ܬ̣ܵܐ: ܐܸܡ̇ܪܹܬ̣ ܕܢܸܬ̇ܬܲܚܕ̇ܘܼܢ ܬܲܪ̈ܥܹܐ. ܘܐܸܡ̇ܪܹܬ̣ ܕܠܵܐ ܢܸܬ̣ܦܲܬ̣ܚܘܼܢ ܬܲܪ̈ܥܹܐ: ܥܕܲܡܵܐ ܠܒ̣ܵܬܲܪ ܫܲܒ̇ܬ̣ܵܐ ܘܡ̣ܢ ܛܲܠܝܲܝ̈ ܐܲܩܝܼܡܹ̇ܬ̣ ܥܲܠ ܬܲܪ̈ܥܹܐ: ܕܠܵܐ ܢܸܥܘܿܠ ܛܲܥܢܵܐ ܒܝܵܘܡܵܐ ܕܫܲܒ̇ܬ̣ܵܐ.

²⁰ܘܒ̣ܵܬܲܪ ܬܲܓܵܪܹ̈ܐ ܘܙܵܒ̣ܢܲܝ̈ ܙܸܒ̣ܢܵܐ ܠܒܲܪ ܡ̣ܢ ܐܘܿܪܸܫܠܸܡ: ܒܝܵܘܡܵܐ ܕܲܬ̣ܪܹܝܢ.

²¹ܘܣܲܗܕܹܬ̣ ܒܗܘܿܢ: ܘܐܸܡܪܹܬ̣ ܠܗܘܿܢ: ܡܸܛܠ ܡܵܢܵܐ ܐܲܢ̄ܬ̇ܘܿܢ ܠܵܐ ܥܵܐܠܝܼܢ ܐ̄ܢܬ̇ܘܿܢ ܥܲܕ݂ ܩܲܝܵܡ ܝܵܘܡܵܐ ܒܬܲܪܥܵܐ ܕܫܘܼܪܵܐ. ܐܸܢ ܬܲܣܠܘܿܢ ܡܸܠܬ̣ܵܐ ܗܵܕܹܐ: ܐܵܘܫܸܛ ܐܝܼܕ݂ܵܐ ܥܠܲܝܟ̇ܘܿܢ ܘܡܸܢܹܗ ܡ̣ܢ ܙܲܒ̣ܢܵܐ ܗܵܘ̇ ܠܵܐ ܥܲܠ̣ܘ ܒܫܲܒ̇ܬ̣ܵܐ.

²²ܘܐܸܡ̇ܪܹܬ̣ ܠܠܹܘܵܝܹ̈ܐ ܕܢܸܗܘܘܿܢ ܡܸܬ̇ܕܲܟܹ̇ܝܢ: ܘܥܵܐܠܝܼܢ ܢܵܛܘܿܪܹ̈ܐ ܘܬ̣ܵܪ̈ܥܹܐ ܠܲܡܩܲܕܵܫܘܼ ܠܝܵܘܡܵܐ ܕܫܲܒ̇ܬ̣ܵܐ ܐܵܦ ܗܵܕܹܐ ܐܲܬ̇ܕܲܟ݂ܪ ܠܝܼ ܐܲܠܵܗܝ: ܘܚܘܼܣ ܥܠܲܝ ܐܲܝܟ݂ ܣܘܿܓܲܐܬ̣ ܪ̈ܲܚܡܲܝܟ.

²³ܐܵܦ ܒܝܵܘ̈ܡܵܬ̣ܵܐ ܗܵܢܘܿܢ ܚܙܹܝܬ̣ ܝܗ̄ܘܼ̈ܕ݂ܵܝܹܐ ܕܐܵܘܬܸ̇ܒ̣ܘ ܢܸܫܹ̈ܐ ܢܘܼܟ݂ܪ̈ܵܝܵܬ̣ܵܐ: ܘܐܲܫܕ̇ܘܿܕ݂ܵܝܵـ̈ـܬ̣ܵܐ: ܐܵܦ ܥܲܡܘܿܢܵܝܵـ̈ـܬ̣ܵܐ: ܘܡܘܼܐ̈ܒ̣ܵܝܵܬ̣ܵܐ.

²⁴ܘܲܒ̣ܢܲܝ̈ܗܘܿܢ ܡܡܲܠܠܝܼܢ ܒܦܸܠܓܵܐ ܐܫܕ̇ܘܼܕ݂ܵܐܝܼܬ̣: ܘܲܒ̣ܦܸܠܓܵܐ ܠܵܐ ܚܵܟ݂ܡܝܼܢ ܠܲܡܡܲܠܵܠܘܼ ܝܗ̄ܘܼܕ݂ܵܐܝܼܬ̣: ܐܸܠܵܐ ܐܲܝܟ݂ ܠܸܫܵܢܵܐ ܕܥܲܡܡܹ̈ܐ.

²⁵ܘܕ݂ܵܢܹ̇ܬ̣ ܥܲܡܗܘܿܢ: ܘܠܵܛܹ̇ܬ̣ ܐܸܢܘܿܢ: ܘܩܸܛܠܹ̇ܬ̣ ܡܸܢܗܘܿܢ ܓܲܒ̣ܪܹ̈ܐ: ܘܛܸܡܪܹܬ̣ ܐܸܢܘܿܢ. ܘܐܵܘܡܝܼܬ̣ ܐܸܢܘܿܢ ܒܐܲܠܵܗܵܐ: ܘܠܵܐ ܬܸܬ̇ܠܘܼܢ ܒܢܵܬ̣̈ܟ݂ܘܿܢ ܠܲܒ̣ܢܲܝ̈ܗܘܿܢ: ܕܠܵܐ ܬܸܣܒ̣ܘܼܢ ܡ̣ܢ ܒܢܵܬ̣̈ܗܘܿܢ ܠܲܒ̣ܢܲܝ̈ܟ̇ܘܿܢ: ܐܵܘ ܠܟ݂ܘܿܢ.

²⁶ܡܸܛܠ ܗܵܠܹܝܢ ܗ̄ܘ̣ ܚܛܵܐ ܫܠܹܝܡܘܿܢ ܡܲܠܟܵܐ ܕܝܼܣܪܵܝܹܠ ܗܵܘ̇ ܕܲܒ̣ܥܲܡܡܹ̈ܐ ܣܲܓ̇ܝܼ̈ܐܹܐ ܠܵܐ ܗ̄ܘ̣ܵܐ ܡܲܠܟܵܐ ܐܲܟ݂ܘܵܬܹܗ. ܘܲܪܚܝܼܡ ܗ̄ܘ̣ܵܐ ܥܲܠ ܐܲܠܵܗܹܗ ܘܝܲܗ̄ܒܹ̇ܗ ܐܲܠܵܗܵܐ ܡܲܠܟܵܐ ܥܲܠ ܟܠܹܗ ܝܼܣܪܵܝܹܠ ܘܐܵܦ ܠܹܗ ܐܲܚܛ̈ܝܼ ܢܸܫܹ̈ܐ ܢܘܼܟ݂ܪ̈ܵܝܵܬ̣ܵܐ.

²⁷ܘܲܠܟ݂ܘܿܢ ܐܸܫܬ̇ܡܲܥ ܦܸܬ̣ܓ̣ܵܡܵܐ. ܘܲܥܒܲܕ̇ܬ̇ܘܿܢ ܗܵܕܹܐ ܒܝܼܫܬܵܐ ܪܲܒ̇ܬ̣ܵܐ: ܠܲܡܟܲܕܵܒ̣ܘ ܒܐܲܠܵܗܲܢ: ܘܲܠܡܵܘܬܵܒ̣ܘܼ ܢܸܫܹ̈ܐ ܢܘܼܟ݂ܪ̈ܵܝܵܬ̣ܵܐ.

²⁸ܘܡ̣ܢ ܒܢܲܝ̈ ܝܘܿܝܵܕ݂ܵܥ ܒܲܪ ܐܹܠܝܼܫܵܒ̣ ܟܘܼܡܪܵܐ ܪܲܒܵܐ: ܗܘ̤ܵܐ ܚܲܬ̣ܢܵܐ ܠܣܲܡܒ̇ܠܵܛ ܚܵܘܪܵܢܝܵܐ: ܘܐܲܦܪܸܩܬܹ̇ܗ ܡ̣ܢ ܠܘܵܬ̣ܝ.

²⁹ܐܸܬ̇ܕܲܟ݂ܪ ܠܝܼ ܐܲܠܵܗܝ: ܥܲܠ ܫܲܪܟܵܐ ܕܟ݂ܘܼܡܪܘܼܬ̣ܵܐ: ܘܥܲܠ ܫܲܪܟܵܐ ܕܟ݂ܘܼܡܪܹ̈ܐ: ܘܲܕ݂ܠܹܘܵܝܹ̈ܐ.

³⁰ܘܕܲܟ̇ܝܼܬ̣ ܐܸܢܘܿܢ ܡ̣ܢ ܟܠܗܘܿܢ ܥܲܡܡܹ̈ܐ: ܘܐܲܩܝܼܡܹ̇ܬ̣ ܐܸܢܘܿܢ ܒܲܢܛܘܼܪ̈ܵܬ̣ܗܘܿܢ: ܠܟ݂ܘܼܡܪܹ̈ܐ ܘܲܠܠܹܘܵܝܹ̈ܐ: ܐ̄ܢܵܫ ܒܲܥܒ̣ܵܕܹܗ.

³¹ܘܲܒ̣ܩܘܼܪ̈ܒܵܢܹܐ: ܘܲܠܩܘܼܕܫܹ̈ܐ ܒܙܲܒ̣ܢ̱ܗܘܿܢ: ܘܲܒ̣ܥܵܐܕܲܝ̈ܗܘܿܢ: ܘܲܒ̣ܒ̣ܘܼܟ݂ܪܹ̈ܐ. ܐܸܬ̣ܕܲܟ݂ܪ ܠܝܼ ܐܲܠܵܗܝ ܗܵܕܹܐ ܠܛܲܝܒ̇ܘܼܬ̣ܵܐ.