Read Aramaic Peshita Nehemiah 2 Bible Online

Nehemiah 2 - Aramaic Peshita bible

Nehemiah 2

¹ܘܐܸܢܵܐ ܗܘܹ̇ܝܬ̣ ܫܵܩ̇ܝܵܐ ܠܡܲܠܟܵܐ. ܗܵܝܕܹ̇ܝܢ ܒܝܼܪܲܚ ܢܝܼܣܵܢ: ܒܲܫܢܲܬ̣ ܥܸܣܪܝܼܢ ܠܐܲܪܛܲܚܫܸܫܬ̇ ܡܲܠܟܵܐ: ܚܲܡܪܵܐ ܡܲܫܩܹܐ ܗ̄ܘܹ̇ܝܬ̣ ܩܕ݂ܵܡ ܡܲܠܟܵܐ. ܘܫܸܩܠܹ̇ܬ̣ ܚܲܡܪܵܐ ܘܝܸܗ̄ܒܹ̇ܬ̣ ܠܡܲܠܟܵܐ: ܘܠܵܐ ܗܘܹ̇ܝܬ̣ ܒܝܼܫ ܩܕ݂ܵܡܵܘܗܝ.

²ܘܐܸܡܲܪ ܠܝܼ ܡܲܠܟܵܐ: ܡܸܛܠ ܡܵܢܵܐ ܐܲܦܲܝ̈ܟ ܒܝܼ̈ܫܵܢ. ܘܐܲܢ̄ܬ̇ ܠܵܐ ܗ̄ܘܲܝܬ̇ ܟܪܝܼܗ. ܠܲܝܬ̇ ܗܵܢܵܐ: ܐܸܠܵܐ ܐܸܢ ܒܝܼܫܘܼܬ̣ ܠܸܒܵܐ. ܘܕܸܚܠܹ̇ܬ̣ ܣܲܓ̇ܝܼ ܛܵܒ̣.

³ܘܐܸܡ̇ܪܹܬ̣ ܠܡܲܠܟܵܐ: ܡܲܠܟܵܐ: ܠܥܵܠܲܡ ܚܝܝܼ. ܡܸܛܠ ܡܵܢܵܐ ܠܵܐ ܢܸܒ̣̈ܐ̱ܫܵܢ ܐܲܦܲܝ̈: ܕܲܡܕ݂ܝܼܢ̄ܬܵܐ ܕܒܹܝܬ̣ ܡܲܠܟ̇ܘܼܬ̣ ܐܒ̣ܵܗܲܝ ܚܲܪܒܵܐ. ܘܬܲܪ̈ܥܹܝܗ̇ ܡܵܘܩ̄ܕ݂ܝܼܢ ܒܢܘܼܪܵܐ.

⁴ܘܐܸܡܲܪ ܠܝܼ ܡܲܠܟܵܐ: ܡܸܛܠ ܡܵܢܵܐ ܒܥܲܝܬ̇: ܘܨܲܠܝܼܬ̇ ܩܕ݂ܵܡ ܐܲܠܵܗܵܐ ܕܲܫܡܲܝܵܐ.

⁵ܘܐܸܡ̇ܪܹܬ̣ ܠܡܲܠܟܵܐ: ܐܸܢ ܥܲܠ ܡܲܠܟܵܐ: ܛܵܒ̣. ܘܐܸܢ ܫܵܦܲܪ ܐ̄ܢܵܐ ܥܲܒ̣ܕܵܟ݂ ܩܕ݂ܵܡܲܝܟ: ܬܫܲܕ̇ܪܲܢܝ ܠܲܝܗܘܼܕ݂ ܡܕ݂ܝܼܢ̄ܬܵܐ: ܠܒܹܝܬ̣ ܩܒ̣ܘܼܪܵܐ ܕܐܲܒ̣ܵܗܲܝ̈: ܘܐܸܒ̣ܢܹܝܗ̇.

⁶ܘܐܸܡܲܪ ܠܝܼ ܡܲܠܟܵܐ: ܫܵܛܝܵܐ: ܥܲܕ݂ ܐܸܡܲܬ̣ܝ ܐܵܙܹ̇ܠ ܘܐܵܬܹܐ. ܘܲܫ̣ܦܲܪ ܩܕ݂ܵܡ ܡܲܠܟܵܐ: ܘܫܲܕ̇ܪܲܢܝ. ܘܝܲܗ̄ܒ̣ ܠܝܼ ܙܲܒ̣ܢܵܐ.

⁷ܘܐܸܡ̇ܪܹܬ̣ ܠܡܲܠܟܵܐ: ܐܸܢ ܥܲܠ ܡܲܠܟܵܐ ܫܲܦܝܼܪ: ܢܸܟ݂ܬ̇ܒ̣ܘܼܢ ܠܝܼ ܐܸܓܲܪܬܵܐ ܠܘܵܬ̣ ܫܲܠܝܼܛܵܐ ܕܒܲܥܒܲܪ ܢܲܗܪܵܐ: ܕܢܲܥܒ̇ܪܘܼܢܵܢܝ ܥܕܲܡܵܐ ܕܐܸܙܲܠ ܠܲܝܗܘܼܕ݂.

⁸ܘܐܸܓܲܪܬܵܐ ܠܘܵܬ̣ ܐܵܣܵܦ ܢܵܛܲܪ ܦܲܪܕܲܝܣܵܐ ܕܡܲܠܟܵܐ: ܘܢܸܬܸ̇ܠ ܠܝܼ ܩܲܝܣܹ̈ܐ ܠܡܸܥܒܲܕ݂ ܬܲܪ̈ܥܲܝ ܒܲܝܬܵܐ ܘܲܕ݂ܒ̣ܝܼܪܬܵܐ: ܘܫܘܼܪܹ̈ܝܗ̇ ܕܲܡܕ݂ܝܼܢ̄ܬܵܐ: ܘܲܠܒܲܝܬܵܐ ܕܥܵܐܹ̇ܠ ܐ̄ܢܵܐ ܠܹܗ: ܘܝܲܗ̄ܒ̣ ܠܝܼ ܡܲܠܟܵܐ ܐܲܝܟ݂ ܐܝܼܕܹܗ ܕܐܲܠܵܗܵܐ ܕܐܲܛ̱ܐܒܲܬ̤ ܠܝܼ.

⁹ܘܐܸܬܹܝܬ̣ ܠܘܵܬ̣ ܫܲܠܝܼܛܵܐ ܕܒܲܥܒܲܪ ܢܲܗܪܵܐ. ܘܝܸܗ̄ܒܹ̇ܬ̣ ܠܹܗ ܐܸܓܲܪܬܵܐ ܕܡܲܠܟܵܐ. ܘܫܲܕܲܪ ܥܲܡܝ ܡܲܠܟܵܐ ܪܲܒ̇ ܚܲܝܠܵܐ ܚܲܕ݂ ܕܦܲܪ̈ܵܫܹܐ.

¹⁰ܘܲܫܡܲܥ̣ ܣܲܡܒ̇ܠܵܛ ܚܵܘܪܵܢܵܝܵܐ ܘܛܘܿܒ̇ܝܼܵܐ ܥܲܒ̣ܕܹ̇ܐ ܕܥܲܡ̈ܘܿܢܵܝܹܐ. ܘܐܸܬ̣ܒܲܐܫܲܬ̤ ܠܗܘܿܢ ܒܝܼܫܵܐܝܼܬ̣ ܥܲܠ ܕܐܸܬ̣ܵܐ ܒܲܪܢܵܫܵܐ ܠܡܸܒ̣ܥܵܐ ܛܵܒ̣ܬ̣ܵܐ ܥܲܠ ܒܢܲܝ̈ ܝܼܣܪܵܝܹܠ.

¹¹ܘܐܸܬܹܝܬ̣ ܠܐܘܿܪܸܫܠܸܡ: ܘܲܗܘܹ̇ܝܬ̣ ܬܲܡܵܢ ܝܵܘ̈ܡܵܬ̣ܵܐ ܬܠܵܬ̣ܵܐ.

¹²ܘܩܵܡܹ̇ܬ̣ ܒܠܸܠܝܵܐ ܐܸܢܵܐ ܘܓܲܒ̣ܪܹ̈ܐ ܗܵܢ̇ܘܿܢ. ܕܐܸܬ̣ܵܘ ܗ̄ܘ̣ܵܘ ܥܲܡܝ. ܘܠܵܐ ܚܵܘܝܼܬ̣ ܠܐ̄ܢܵܫ ܒܡܸܕܸ̇ܡ ܕܐܲܪܡܝܼ ܐܲܠܵܗܵܐ ܒܠܹܒ̇ܝ ܠܡܸܥܒܲܕ݂ ܒܐܘܿܪܸܫܠܸܡ. ܘܲܒ̣ܥܝܼܪܵܐ ܠܲܝܬ̇ ܗ̄ܘ̣ܵܐ ܥܲܡܝ: ܐܸܠܵܐ ܐܸܢ ܒܥܝܼܪܵܐ ܕܲܪܟ݂ܝܼܒ̣ ܗ̄ܘܹ̇ܝܬ̣ ܥܠܹܝܗ̇.

¹³ܘܢܸܦܩܹ̇ܬ̣ ܥܲܠ ܬܲܪܥܵܐ ܕܢܲܚܠܵܐ ܒܠܸܠܝܵܐ: ܠܐܲܦܲܝ̈ ܥܹܝܢ ܬܸܠܠܝܼܢ: ܘܲܠܬܲܪܥܵܐ ܕܐܸܣܦܘܼܬ̣ ܘܲܗܘܹ̇ܝܬ̣ ܣܵܟܲܪ ܒܫܘܼܪܹ̈ܝܗ ܕܐܘܿܪܸܫܠܸܡ ܕܡܸܬ̇ܬܲܪܥܝܼܢ ܗ̄ܘ̣ܵܘ. ܘܬܲܪ̈ܥܹܐ ܝܲܩܝܼܕ݂ܝܼܢ ܗ̄ܘ̣ܵܘ ܒܢܘܼܪܵܐ.

¹⁴ܘܥܸܒ̣ܪܹܬ̣ ܥܲܠ ܬܲܪܥܵܐ ܕܢܲܚܠܵܐ ܘܠܵܐܓ̣ܡܵܐ ܕܡܲܠܟܵܐ. ܘܠܲܝܬ̇ ܗ̄ܘ̣ܵܐ ܐܲܬ̣ܪܵܐ ܠܲܒ̣ܥܝܼܪܵܐ: ܠܡܸܥܒܲܪ ܬܲܡܵܢ.

¹⁵ܘܲܗܘܹ̇ܝܬ̣ ܣܵܠܹܩ ܒܢܲܚܠܵܐ ܒܠܸܠܝܵܐ. ܘܲܗܘܹ̇ܝܬ̣ ܣܵܟܲܪ ܒܠܸܠܝܵܐ ܘܐܵܬܹ̇ܐ ܘܥܸܠܹ̇ܬ̣ ܒܲܬ̣ܪܲܥ ܢܲܚܠܵܐ ܘܗܸܦܟܹ̇ܬ̣.

¹⁶ܘܫܲܠܝܼܛܵܢܹ̈ܐ ܠܵܐ ܝܼܕܲܥܘ ܠܐܲܝܟܵܐ ܐܸܙܹ̇ܠ̄ܬ̣: ܘܡܵܢܵܐ ܥܵܒܹܕ݂ ܐ̄ܢܵܐ. ܘܠܲܝܗܘܼܕ݂ܵܝܹܐ: ܘܲܠܟ݂ܵܗ̈ܢܹܐ: ܘܲܠܫܲܠܝܼܛܵܢܹ̈ܐ: ܘܲܠܣܵܦܵܪܹ̈ܐ: ܘܲܠܫܲܪܟܵܐ ܕܥܵܒ̣ܕܲܝ̈: ܥܒ̣ܝܼܕ̇ܬܵܐ: ܥܕܲܡܵܐ ܠܗܵܫܵܐ ܠܵܐ ܚܵܘܝܼܬ̣.

¹⁷ܘܐܸܡ̇ܪܹܬ̣ ܠܗܘܿܢ: ܐܲܢ̄ܬ̇ܘܿܢ ܚܵܙܹ̇ܝܢ ܒܝܼܫܬܵܐ ܕܲܚܢܲܢ ܒܵܗ̇. ܕܗܵܐ ܐܘܿܪܸܫܠܸܡ ܚܲܪܒܵܐ. ܘܬܲܪ̈ܥܹܝܗ̇ ܝܲܩܝܼܕ݂ܝܼܢ ܒܢܘܼܪܵܐ. ܬܵܘ ܢܸܒ̣ܢܸܐ ܫܘܼܪܵܐ ܕܐܘܿܪܸܫܠܸܡ. ܘܠܵܐ ܢܸܗܘܹܐ ܡܸܟܹ̇ܝܠ ܚܸܣܕܵܐ.

¹⁸ܘܲܓ̣ܠܹ̇ܝܬ̣ ܠܗܘܿܢ ܐܝܼܕ݂ܵܐ ܕܐܲܠܵܗܵܐ ܕܲܗܘ̤ܵܬ̣ ܥܲܡܝ ܠܛܵܒ̣: ܘܐܵܦ ܡܸܠܲܝ ܡܲܠܟܵܐ ܕܐܸܬ̣ܐ̱ܡܲܪ ܠܝܼ: ܘܐܵܡ̇ܪܝܼܢ: ܩܵܝ̇ܡܝܼܢ ܚ̄ܢܲܢ: ܘܒ̣ܵܢܹ̇ܝܢ ܚ̄ܢܲܢ. ܘܐܲܥܫܸܢܘ ܐܝܼܕܲܝ̈ܗܘܿܢ ܠܡܸܥܒܲܕ݂ ܕܛܵܒ̣.

¹⁹ܘܲܫܡܲܥ ܣܲܡܒ̇ܠܵܛ ܚܵܘܪܵܢܵܝܵܐ: ܘܛܘܼܒ̇ܝܼܵܐ: ܓܲܒ̣ܪܹ̈ܐ ܥܲܡܘܿܢܵܝܹ̈ܐ: ܘܲܓ̣ܫܘܿܡ ܥܲܪܒ̣ܵܝܵܐ. ܘܲܓ̣ܚܸܟ݂ܘ ܥܠܲܝܢ ܘܡܲܝܸܩܘܒܲܢ. ܘܐܵܡ̇ܪܝܼܢ: ܡܵܢܲܐ ܗ̄ܝ̣ ܡܸܠܬ̣ܵܐ ܗܵܕܹܐ ܕܥܵܒ̣ܕ̇ܝܼܢ ܐ̄ܢܬ̇ܘܿܢ. ܕܲܠܡܵܐ ܥܲܠ ܡܲܠܟܵܐ ܡܵܪܕ̇ܝܼܢ ܐ̄ܢܬ̇ܘܿܢ.

²⁰ܘܐܲܬ̣ܝܼܒܹ̇ܬ̣ ܐܸܢܘܿܢ ܦܸܬ̣ܓ̣ܵܡܵܐ: ܘܐܸܡ̇ܪܹܬ̣ ܠܗܘܿܢ: ܐܲܠܵܗܵܐ ܗ̄ܘ̣ ܕܲܫܡܲܝܵܐ ܦܲܪܩܲܢ. ܘܲܚܢܲܢ ܥܵܒ̣ܕ̇ܝܼܢ ܘܩܵܝ̇ܡܝܼܢ ܘܒ̣ܵܢܹܝܢ. ܘܲܠܟ݂ܘܿܢ ܠܲܝܬ̇ ܠܟ݂ܘܿܢ ܙܸܕ݂ܩܵܐ ܘܕ݂ܘܼܟ݂ܪܵܢܵܐ ܘܲܡܢܵܬ̣ܵܐ ܒܐܘܿܪܸܫܠܸܡ.