Read Aramaic Peshita Nehemiah 3 Bible Online

Nehemiah 3 - Aramaic Peshita bible

Nehemiah 3

¹ܘܩܵܡ ܐܹܠܝܼܫܵܒ̣ ܟܘܼܡܪܵܐ ܪܲܒܵܐ: ܘܐܲܚܵܘ̈ܗܝ ܟܘܼܡܪܹ̈ܐ: ܘܲܒ̣ܢܵܘ̈ܗܝ: ܥܲܠ ܬܲܪܥܵܐ ܕܥܵܢܵܐ. ܘܐܲܩܝܼܡܘ ܬܲܪ̈ܥܵܘܗܝ: ܘܩܘܼܕ݂ܫܵܘ̈ܗܝ: ܘܲܥܕܲܡܵܐ ܠܡܲܓ̣ܕܲܠ ܡܵܐܐ. ܗܸܢܘܿܢ ܩܲܕ̇ܫܘܼܗܝ ܥܕܲܡܵܐ ܠܡܲܓ̣ܕ̇ܠܵܐ ܕܲܚܢܵܢܵܐܹܝܠ.

²ܘܲܥܕܲܡܵܐ ܠܲܬ̣ܚܘܼܡܵܐ ܕܐ̄ܢܵܫܵܐ ܕܐܝܼܪܝܼܚܘܿ: ܘܲܥܕܲܡܵܐ ܠܲܬ̣ܚܘܼܡܵܐ ܕܲܒ̣ܢܲܝ̈ ܙܲܟ̇ܘܼܪ: ܒܢܲܝ̈ ܐܲܡܪܝܼ.

³ܘܬܲܪܥܵܐ ܕܨܲܝܵܕܹ̈ܐ: ܒܢܵܐܘܼܗܝ ܒܢܲܝ̈ ܣܵܢ̇ܐܵܐ. ܘܗܸܢܘܿܢ ܐܲܬ̣ܩ̄ܢܘܼܗܝ: ܘܐܲܩܝܼܡܘ ܬܲܪ̈ܥܵܘܗܝ ܘܣܘܼܟ̇ܪ̈ܵܘܗܝ ܘܡܘܼܟ݂ܠܵܘ̈ܗܝ.

⁴ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦ ܡܲܪܡܘܿܬ̣ ܒܲܪ ܐܘܿܪܝܼܵܐ: ܒܲܪ ܐܵܩܘܿܨ. ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦ ܡܲܫܠܸܡ ܒܲܪ ܟܢܵܝܵܐ: ܒܲܪ ܡܝܼܙܟܵܠ. ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦ ܙܵܕ݂ܘܿܩ ܒܲܪ ܒܥܢܵܐ.

⁵ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦܘ ܬܩܘܿܥܵܝܹ̈ܐ ܘܫܲܠܝܼܛܵܢܲܝ̈ܗܘܿܢ. ܘܠܵܐ ܐܲܥܸܠܘ ܨܵܘܪ̈ܲܝܗܘܿܢ ܒܦܘܼܠܚܵܢܵܐ ܕܡܵܪ̈ܲܝܗܘܿܢ.

⁶ܘܬܲܪܥܵܐ ܕܲܬ̣ܪܹܝܢ ܬܲܩܸܦ ܝܘܿܝܵܕ݂ܵܥ ܒܲܪ ܦܨܲܚ: ܘܡܲܫܠܲܡ ܒܲܪ ܒܣܲܪܝܵܐ. ܘܗܸܢܘܿܢ ܐܲܬ̣ܩ̄ܢܘܼܗܝ: ܘܐܲܩܝܼܡܘ ܬܲܪ̈ܥܵܘܗܝ ܘܣܘܼܟ̇ܪ̈ܵܘܗܝ ܘܡܘܼܟ݂ܠܵܘ̈ܗܝ.

⁷ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦ ܡܠܲܛܝܵܐ ܓܸܒ̣ܥܘܿܢܵܝܵܐ: ܘܢܹܪܘܿܢ ܡܲܪܬܵܝܵܐ. ܘܐ̄ܢܵܫܵܐ ܕܓܸܒ̣ܥܘܿܢ ܘܲܕ݂ܡܲܨܦܝܵܐ: ܥܒܲܕ݂ܘ ܟܘܼܪܣܝܵܐ ܠܫܲܠܝܼܛ ܥܒܲܪ ܢܲܗܪܵܐ.

⁸ܘܲܬ̣ܚܘܼܡܵܐ ܬܲܩܸܦ: ܥܙܵܐܹܝܠ ܒܲܪ ܚܲܕܵܝܵܐ ܒܲܪ ܨܪܲܦܝܵܐ. ܘܲܬ̣ܚܘܼܡܵܐ ܬܲܩܸܦ: ܚܲܢܲܢܝܵܐ ܒܲܪ ܩܪܲܚܝܵܐ. ܘܲܫܒܲܩܘ ܐܘܿܪܸܫܠܸܡ ܟܲܕ݂ ܫܘܼܪܵܗ̇ ܪܘܝܼܚ.

⁹ܘܲܬ̣ܚܘܼܡܵܐ ܬܲܩܸܦ̣: ܐܹܪܲܡܝܵܐ ܒܲܪ ܚܘܿܪ ܫܲܠܝܼܛܵܐ ܕܐܘܿܪܸܫܠܸܡ.

¹⁰ܘܲܬ̣ܚܘܼܡܵܐ ܬܲܩܸܦ̣: ܢܝܼܪܝܼܵܐ ܒܲܪ ܚܕ݂ܘܼܡܦܝܼ: ܘܪܲܒܵܐ ܕܒܲܝܬܹ̇ܗ ܘܲܬ̣ܚܘܼܡܵܐ ܬܲܩܸܦ̣: ܚܛܘܿܫ ܒܲܪ ܚܫܲܒ̣ܢܵܝܵܐ.

¹¹ܘܲܡܫܘܼܚܬ̣ܵܐ ܕܬܲܪܬܹ̇ܝܢ ܬܲܩܸܦ ܡܠܲܟ݂ܝܵܐ ܒܲܪ ܚܵܪܵܡ: ܘܲܚܫܘܿܡ ܒܲܪ ܪܲܒܵܐ ܕܡܘܼܐܵܒ̣.

¹²ܘܡܲܓ̣ܕ̇ܠܵܐ ܕܐܸܫܬ̇ܚܲܪ ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦ ܫܵܠܘܿܡ ܒܲܪ ܚܛܘܿܫ ܫܲܠܝܼܛܵܐ ܕܐܘܿܪܸܫܠܸܡ: ܗ̤ܘ ܘܲܒ̣ܢܵܘ̈ܗܝ.

¹³ܘܬܲܪܥܵܐ ܕܲܦܩܲܥܬ̣ܵܐ ܬܲܩܸܦ̣: ܚܲܢܘܿܢ ܘܥܵܡܘܿܪܹ̈ܐ ܘܙܝܼܘܿܚ ܗܸܢܘܿܢ ܒܢܵܐܘܼܗܝ: ܘܐܲܩܝܼܡܘ ܬܲܪ̈ܥܵܘܗܝ ܘܣܘܼܟ̇ܪ̈ܵܘܗܝ ܘܡܘܼܟ݂ܠܵܘܗܝ ܘܐܵܠܹܦ ܐܲܡܝܼܢ ܗܵܘܹ̇ܐ ܒܫܘܼܪܵܐ ܥܕܲܡܵܐ ܠܬܲܪܥܵܐ ܕܐܲܣܦܘܿܬ̣.

¹⁴ܘܬܲܪܥܵܐ ܕܐܲܣܦܘܿܬ̣ ܬܲܩܸܦ ܡܠܲܟ݂ܝܵܐ ܒܲܪ ܪܵܟ݂ܵܒ̣: ܫܲܠܝܼܛܵܐ ܕܒܹܝܬ̣ ܟܲܪܡܵܐ: ܗܸܢܘܿܢ ܒܢܵܐܘܼܗܝ: ܘܐܲܩܝܼܡܘ ܬܲܪ̈ܥܵܘܗܝ ܘܣܘܼܟ̇ܪ̈ܵܘܗܝ ܘܡܘܼܟ݂ܠܵܘܗܝ.

¹⁵ܘܬܲܪܥܵܐ ܕܥܲܝܢܵܐ ܬܲܩܸܦ̣ ܫܵܠܘܿܡ ܒܲܪ ܟܸܠܚܵܙܹܐ ܫܲܠܝܼܛܵܐ ܕܡܲܨܦܝܵܐ. ܘܗܸܢܘܿܢ ܒܢܵܐܘܼܗܝ ܘܛܲܠܠܘܼܗܝ: ܘܐܲܩܝܼܡܘ ܬܲܪ̈ܥܵܘܗܝ ܘܣܘܼܟ̇ܪ̈ܵܘܗܝ ܘܡܘܼܟ݂ܠܵܘܗܝ. ܘܫܘܼܪܵܐ ܕܦܸܣܩܝܼܢ ܕܡܲܦܩܵܐ ܡܲܝܵܐ ܠܓܲܢܲܬ̣ ܡܲܠܟܵܐ: ܘܲܥܕܲܡܵܐ ܠܡܲܣܲܩܬܵܐ ܕܢܵܚܬܵܐ ܡ̣ܢ ܩܪܝܼܬܹܗ ܕܕ݂ܵܘܝܼܕ݂.

¹⁶ܒܵܬ̣ܪܹܗ ܬܲܩܸܦ ܢܚܲܡܝܵܐ ܒܲܪ ܥܲܙܒ̇ܘܿܩ ܫܲܠܝܼܛܵܐ ܕܒܹܝܬ̣ ܨܘܿܪ: ܥܕܲܡܵܐ ܠܲܫܒ̣ܝܼܠܵܐ ܕܩܲܒ̣ܪܹܗ ܕܕ݂ܵܘܝܼܕ݂: ܘܲܥܕܲܡܵܐ ܠܦܸܣܩܝܼܢ ܕܲܥܒ̣ܝܼܕ݂ܵܐ: ܘܲܥܕܲܡܵܐ ܠܒܹܝܬ̣ ܓܲܢ̄ܒܵܪܹ̈ܐ.

¹⁷ܒܵܬ̣ܪܹܗ ܥܲܫܸܢܘ ܠܹܘܵܝܹ̈ܐ: ܐܲܪܚܘܿܡ ܒܲܪ ܒܲܢܝܼ: ܥܕܲܡܵܐ ܠܲܬ̣ܚܘܼܡܵܐ ܕܲܚܫܲܒ̣ܝܵܐ ܫܲܠܝܼܛܵܐ ܕܲܩܥܝܼܠܵܐ.

¹⁸ܒܵܬ̣ܪܹܗ ܐܲܥܫܸܢ̣ܘ ܐܲܚܲܝ̈ܗܘܿܢ ܒܲܢܘܝܼ ܒܲܪ ܢܲܚܕܵܪ ܫܲܠܝܼܛܵܐ ܕܲܩܠܝܼܠܵܐ.

¹⁹ܘܥܲܫܸܢ ܥܕܲܡܵܐ ܠܲܬ̣ܚܘܼܡܵܐ ܕܥܵܙܵܪ: ܒܲܪ ܝܼܫܘܿܥ ܫܲܠܝܼܛܵܐ ܕܡܲܨܦܝܵܐ: ܡܫܘܼܚܬ̣ܵܐ ܕܬܲܪܬܹ̇ܝܢ ܡ̣ܢ ܠܘܼܩܒܲܠ ܡܣܲܩܬܵܐ ܕܐܵܙܵܠ̄ܐ ܠܩܲܡܨܘܿܥ.

²⁰ܡ̣ܢ ܒܵܬ̣ܪܹܗ ܐܸܚܲܕ݂ ܘܥܲܫܸܢ ܒܵܪܘܿܟ ܒܲܪ ܙܲܟ̇ܝܼ: ܡܫܘܼܚܬ̣ܵܐ ܕܬܲܪܬܹ̇ܝܢ: ܥܕܲܡܵܐ ܠܩܲܡܨܘܿܥ: ܘܲܥܕܲܡܵܐ ܠܬܲܪܥܵܐ ܕܒܹܝܬ̣ ܐܹܠܝܼܫܲܥ ܟܵܗܢܵܐ ܪܲܒܵܐ.

²¹ܒܵܬ̣ܪܹܗ ܥܲܫܸܢ ܡܵܪܡܘܿܬ̣: ܒܲܪ ܐܘܿܪܝܼܵܐ: ܒܲܪ ܐܲܡܘܿܟ݂: ܡܫܘܚܬ̣ܵܐ ܕܬܲܪܬܹ̇ܝܢ: ܡ̣ܢ ܬܲܪܥܵܐ ܕܒܹܝܬ̣ ܐܹܠܝܼܫܲܥ: ܘܲܥܕܲܡܵܐ ܠܣܵܘܦܵܐ ܕܒܹܝܬ̣ ܐܹܠܝܼܫܲܥ.

²²ܒܵܬ̣ܪܹܗ ܥܲܫܸܢܘ ܟܵܗ̈ܢܹܐ ܐ̄ܢܵܫܵܐ ܕܲܦܩܲܥܬ̣ܵܐ.

²³ܒܵܬ̣ܪܹܗ ܐܲܥܫܸܢ ܒܸܢܝܵܡܹܝܢ: ܘܝܼܫܘܿܥ ܪܲܒܵܐ ܕܒܲܝܬܹ̇ܗ. ܒܵܬ̣ܪܹܗ ܐܲܥܫܸܢ ܥܘܿܙܝܼܵܐ: ܒܲܪ ܡܥܲܣܝܵܐ: ܒܲܪ ܥܢܲܢܝܵܐ ܒܸܣܬܲܪ ܒܲܝܬܹ̇ܗ.

²⁴ܒܵܬ̣ܪܹܗ ܐܲܥܫܸܢ ܒܲܢܘܝܼ ܒܲܪ ܢܲܚܕܵܪ: ܡܫܘܼܚܬ̣ܵܐ ܕܬܲܪܬܹ̇ܝܢ: ܡ̣ܢ ܒܹܝܬ̣ ܥܲܙܲܪܝܵܐ: ܥܕܲܡܵܐ ܠܩܲܡܨܘܿܥ: ܘܲܥܕܲܡܵܐ ܠܲܦܢܝܼܬ̣ܵܐ.

²⁵ܕܦܵܠܵܠ ܒܲܪ ܐܲܙܝܼ ܡ̣ܢ ܠܘܼܩܒܲܠ ܩܲܡܨܘܥ: ܘܲܥܕܲܡܵܐ ܠܡܲܓܕ̇ܠܵܐ ܕܲܦܩܲܥܬ̣ܵܐ ܕܢܵܦܹ̇ܩ ܡ̣ܢ ܒܹܝܬ̣ ܡܲܠܟܵܐ ܥܸܠܵܝܵܐ: ܘܲܥܕܲܡܵܐ ܠܕ݂ܵܪܬܵܐ ܕܒܹܝܬ̣ ܐܲܣܝܼܪܹ̈ܐ. ܒܵܬ̣ܪܹܗ ܦܵܪܝܵܐ ܒܲܪ ܦܲܪܫܵܥ.

²⁶ܘܢܵܬ̣̈ܢܵܝܹܐ ܕܲܗܘ̤ܵܘ ܝܵܬ̣ܒ̇ܝܼܢ ܒܦܵܥܵܠ: ܥܕܲܡܵܐ ܠܬܲܪܥܵܐ ܕܡܲـ̈ـܝܵܐ: ܠܡܲܕ݂ܢ̱ܚܵܐ: ܘܡܲܓ̣ܕ̇ܠܵܐ ܕܡܲܦܩܵܢܵܐ.

²⁷ܒܵܬ̣ܪܹܗ ܥܲܫܸܢܘ ܬܩܘܿܥܵܝܹ̈ܐ: ܡܫܘܼܚܬ̣ܵܐ ܕܬܲܪܬܹ̇ܝܢ ܡ̣ܢ ܠܘܼܩܒܲܠ ܡܲܓ̣ܕ̇ܠܵܐ ܪܲܒܵܐ ܕܡܲܦܩܵܢܵܐ: ܘܲܥܕܲܡܵܐ ܠܫܘܼܪܵܐ ܥܲܫܝܼܢܵܐ.

²⁸ܡ̣ܢ ܡܲܥܠܵܢܵܐ ܕܬܲܪܥܵܐ ܕܪ̈ܲܟ݂ܫܵܐ: ܐܲܥܫܸܢܘ ܟܵܗ̈ܢܹܐ ܐ̄ܢܵܫ ܠܘܼܩܒܲܠ ܒܲܝܬܹ̇ܗ.

²⁹ܒܵܬܲܪܗܘܿܢ ܐܲܥܫܸܢ ܨܵܕ݂ܘܿܩ ܒܲܪ ܐܵܡܝܼ ܠܘܼܩܒܲܠ ܒܲܝܬܹ̇ܗ ܒܵܬ̣ܪܹܗ ܐܲܥܫܸܢ ܫܡܲܥܝܵܐ ܒܲܪ ܫܟܲܢܝܵܐ ܢܵܛܲܪ ܬܲܪܥܵܐ ܡܲܕ݂ܢ̱ܚܵܝܵܐ.

³⁰ܒܵܬ̣ܪܹܗ ܐܲܥܫܸܢ ܚܲܢܲܢܝܵܐ ܒܲܪ ܫܠܲܡܝܵܐ: ܘܚܲܢܘܿܢ ܒܲܪ ܨܵܠܵܦ ܫܬ̇ܝܼܬ̣ܵܝܵܐ: ܡܫܘܼܚܬ̣ܵܐ ܕܬܲܪܬܹ̇ܝܢ ܒܵܬ̣ܪܹܗ ܐܲܥܫܸܢ ܡܲܫܠܘܿܡ ܒܲܪ ܒܪܲܟ݂ܝܵܐ: ܠܘܼܩܒܲܠ ܒܲܝܬܹ̇ܗ. ܒܵܬ̣ܪܹܗ ܐܲܥܫܸܢ ܒܲܢܘܼܢ ܒܲܪ ܢܲܚܕܵܪ: ܡܫܘܼܚܬ̣ܵܐ ܕܬܲܪܬܹ̇ܝܢ.

³¹ܒܵܬ̣ܪܹܗ ܐܲܥܫܸܢ ܡܠܲܟ݂ܝܵܐ ܒܲܪ ܨܦܲܢܝܵܐ: ܥܕܲܡܵܐ ܠܒܹܝܬ̣ ܢܵܬ̣ܢܵܝܹ̈ܐ ܘܪܸ̈ܓ̣ܠܵܝܹܐ.

³²ܠܘܼܩܒܲܠ ܬܲܪܥܵܐ ܕܡܲܦܩܵܢܵܐ: ܘܲܥܕܲܡܵܐ ܠܡܲܣܩܵܢܵܐ: ܕܲܦܢܝܼܬ̣ܵܐ ܕܡܲܣܲܩܬܵܐ ܕܦܵܢܝܵܐ ܠܬܲܪܥܵܐ ܕܥܵـ̈ـܢܵܐ: ܥܲܫܢܘ ܨܵܪ̈ܦܵܝܹܐ ܘܪܸ̈ܟ݂ܠܵܝܹܐ.