Read Aramaic Peshita Nehemiah 4 Bible Online

Nehemiah 4 - Aramaic Peshita bible

Nehemiah 4

¹ܘܟܲܕ݂ ܫ̣ܡܲܥ ܣܲܡܒ̇ܠܵܛ ܕܒ̣ܵܥܹ̇ܝܢܲܢ ܫܘܼܪܵܐ: ܟܸܪܝܲܬ̤ ܠܹܗ: ܘܲܣܓ̣ܝܼ ܪܘܼܓ̣ܙܹܗ. ܘܡܲܝܸܩ̣ ܥܠܲܝܗܘܿܢ ܥܲܠ ܝܗ̄ܘܼ̈ܕ݂ܵܝܹܐ.

²ܘܐܸܡܲܪ ܠܐܲܚܵܘ̈ܗܝ ܘܲܠܚܲܝܠܵܐ ܕܫܵܡܪ̈ܵܝܹܐ: ܡܵܢܵܐ ܥܵܒ̣ܕ̇ܝܼܢ ܝܗ̄ܘܼ̈ܕ݂ܵܝܹܐ: ܘܡܸܫܬܲܒ̣ܗ̱ܪܝܼܢ. ܫܒ̣ܘܿܩܘ ܠܗܘܿܢ ܡܕܲܒ̇ܚܝܼܢ ܘܐܵܟ݂ܠܝܼܢ: ܒܝܵܘܡܵܐ ܕܐܲܩܝܼܡ̣ܘ ܟܹܐܦܹ̈ܐ ܗܵܠܹܝܢ: ܡ̣ܢ ܩܸܩ̱ܠܬܵܐ ܕܥܲܦܪܵܐ: ܘܝܲܩܝܼ̈ܕ݂ܵܢ ܐܸܢܹܝܢ.

³ܘܛܘܿܒ̇ܝܼܵܐ ܥܲܡܘܿܢܵܝܵܐ ܩܵܐܹ̇ܡ ܗ̄ܘ̣ܵܐ ܠܘܵܬܹܗ: ܘܐܵܡܲܪ: ܟܡܵܐ ܕܗܸܢܘܿܢ ܒܵܥܹ̇ܝܢ: ܝܵܕܲܥ ܐ̄ܢܵܐ ܕܣܵܠܹ̇ܩ ܬܲܥܠܵܐ: ܘܥܵܩܲܪ ܟܹܐܦܹ̈ܐ ܕܫܘܼܪܲܝܗܘܿܢ.

⁴ܫܡܲܥ ܐܲܠܵܗܵܐ ܡܸܛܠ ܕܲܗ̤ܘܲܝܢ ܓܘܼܚܟܵܐ. ܘܐܲܗܦܸܟ݂ ܨܲܥ̱ܪܗܘܿܢ ܒܪܹܫܗܘܿܢ ܘܗܲܒ̣ ܐܸܢܘܿܢ ܠܒܸܙܬ̣ܵܐ ܒܐܲܪܥܵܐ ܕܲܫܒ̣ܝܼܬ̣ܗܘܿܢ.

⁵ܠܵܐܬܸܫܒ̇ܘܿܩ ܚܵܘ̈ܒܲܝܗܘܿܢ. ܘܲܚܛܵܗܲܝ̈ܗܘܿܢ ܩܕ݂ܵܡܲܝܟ ܠܵܐ ܢܸܬ̣ܥ̱ܛܘܿܢ. ܡܸܛܠ ܕܲܪܓܸܙܘ ܝܘܼܩܒܲܠ ܒܸܢܝܵܢܵܐ ܕܒ̣ܵܥܹ̇ܝܢܲܢ.

⁶ܘܲܚܢܲܢ ܢܸܒ̣ܢܹܝܘܗܝ ܠܫܘܼܪܵܐ. ܘܲܒ̣ܢܵܐܘܼܗܝ ܘܲܓ̣ܡܲܪ ܫܘܼܪܵܐ ܥܕܲܡܵܐ ܠܦܸܠܓܹ̇ܗ. ܗܵܝܕ̇ܝܼܢ ܐܸܬ̣ܦܬܲܚ ܦܘܼܡܹܗ ܕܟ݂ܠܹܗ ܥܲܡܵܐ: ܠܡܸܥܒܲܕ݂.

⁷ܗܵܝܕܹ̇ܝܢ ܟܲܕ݂ ܫ̣ܡܲܥ ܣܲܡܒ̇ܠܵܛ: ܘܛܘܿܒܝܼܵܐ: ܘܥܲܪ̈ܒ̣ܵܝܹܐ: ܘܥܲܡܘܿܢܵܝܹ̈ܐ: ܘܐܲܫܕ̇ܘܿܕ݂ܵܝܹ̈ܐ: ܕܐܸܬ̣̱ܝܼܗܸܒ̣ ܙܲܒ̣ܢܵܐ ܠܫܘܼܪܵܐ ܕܐܘܿܪܸܫܠܸܡ ܠܡܸܬ̣ܒ̇ܢܵܝܘܼ: ܘܫܲܪ̈ܝܼ ܬܘܼܪ̈ܥܵܬ̣ܵܐ ܠܡܸܣܬܲܟܵܪܘܼ: ܟܸܪܝܲܬ̤ ܠܗܘܿܢ ܛܵܒ̣.

⁸ܘܐܸܬ̣ܚܲܫܲܒ̣ܘ ܟܠܗܘܿܢ ܐܲܟ݂ܚ̄ܕ݂ܵܐ: ܠܡܹܐܬ̣ܵܐ ܠܡܸܬ̣ܟܲܬܵܫܘܼ ܒܐܘܿܪܸܫܠܸܡ: ܘܲܠܡܸܥܒܲܕ݂ ܠܗܘܿܢ ܬܘܼܩ̱ܠܬ̣ܵܐ.

⁹ܘܨܲܠܝܼ ܩܕ݂ܵܡ ܐܲܠܵܗܲܢ ܕܲܢܩܝܼܡ ܥܠܲܝܢ ܢܵܛܘܿܪܹ̈ܐ ܒܐܝܼܡܵܡܵܐ ܘܲܒ̣ܠܸܠܝܵܐ ܡ̣ܢ ܩܕ݂ܵܡܲܝܗܘܿܢ.

¹⁰ܘܐܵܡ̇ܪܝܼܢ ܝܗ̄ܘܼ̈ܕ݂ܵܝܹܐ: ܒܨܲܪ ܠܹܗ ܚܲܝܠܲܢ ܡ̣ܢ ܩܘܿܦܵܝܹ̈ܐ ܘܥܲܦܪܵܐ ܣܲܓ̇ܝܼ ܛܵܒ̣. ܘܲܚܢܲܢ ܠܵܐ ܡܸܫܟ̇ܚܝܼܢܲܢ ܠܡܸܒ̣ܢܵܐ ܒܫܘܼܪܵܐ.

¹¹ܘܐܵܡ̇ܪܝܼܢ ܣܵܢ̈ܐܲܝܢ: ܕܠܵܐ ܢܸܕ̇ܥܘܼܢ: ܘܠܵܐ ܢܸܚܙܘܿܢ: ܥܕܲܡܵܐ ܕܢܸܦܸܠ ܥܠܲܝܗܘܿܢ ܘܲܢܩܲܛܸܠ ܐܸܢܘܿܢ: ܘܲܢܒܲܛܸܠ ܥܒ̣ܵܕ݂ܗܘܿܢ.

¹²ܘܐܸܬ̣ܵܘ ܝܼܗ̄ܘܼ̈ܕ݂ܵܝܹܐ ܕܝܵܬ̣ܒ̇ܝܼܢ ܠܘܵܬ̣ܗܘܿܢ: ܘܐܵܡ̇ܪܝܼܢ ܠܗܘܿܢ: ܗܵܐ ܡܸܟܹ̇ܝܠ ܥܣܲܪ ܙܲܒ̣ܢ̈ܝܼܢ ܐܸܬ̣ܵܘ ܠܡܸܬ̣ܟܲܬܵܫܘܼ ܥܲܡܟ݂ܘܿܢ: ܡ̣ܢ ܟܠܗܘܿܢ ܐܲܬ̣ܪ̈ܵܘܵܬ̣ܵܐ ܐܲܝܠܹܝܢ ܕܲܫܪܹܝܢ ܗ̄ܘ̣ܵܘ ܒܗܘܿܢ.

¹³ܘܐܸܬ̣ܵܘ ܘܩܵܡ̣ܘ ܡ̣ܢ ܒܸܣܬܲܪ ܫܘܼܪܵܐ: ܠܡܸܬ̣ܟܲܬܵܫܘܼ ܒܓܹܐܪ̈ܲܝܗܘܿܢ. ܘܦܲܠܓ̣ܘܼܗܝ ܠܚܲܝܠܵܐ ܠܛܘܿܗ̈ܡܹܐ ܥܲܡ ܣܲܝܦܲܝ̈ܗܘܿܢ: ܘܪ̈ܘܼܡܚܹܐ ܘܩܸܫ̈ܬܵܬ̣ܵܐ.

¹⁴ܘܕܸܚܠܹܬ̣ ܘܩܵܡܹ̇ܬ̣ ܘܐܸܡ̇ܪܹܬ̣ ܠܪܵܘ̱ܪ̈ܒ̣ܵܢܹܐ ܘܲܠܫܲܠܝܼܛܵܢܹ̈ܐ: ܘܲܠܫܲܪܟܵܐ ܕܥܲܡܵܐ: ܠܵܐ ܬܸܕ݂ܚ̄ܠܘܼܢ ܡ̣ܢ ܩܕ݂ܵܡܲܝܗܘܿܢ. ܠܡܵܪܝܵܐ ܪܲܒܵܐ ܘܲܕ݂ܚܝܼܠܵܐ ܐܸܬ̇ܕܲܟ݂ܪܘ ܘܐܸܬ̣ܟܲܬܲܫܘ ܥܲܠ ܐܲܦܲܝ̈ ܐܲܚܲܝ̈ܟ̇ܘܿܢ: ܘܥܲܠ ܐܲܦܲܝ̈ ܒܢܲܝ̈ܟ̇ܘܿܢ ܘܲܒ̣̈ܢܵܬ̣ܟ݂ܘܿܢ: ܐܵܦ ܡܸܛܠ ܢܸܫܲܝ̈ܟ̇ܘܿܢ ܘܒ̣ܵܬܲܝ̈ܟ̇ܘܿܢ.

¹⁵ܗܵܝܕܹܷ̇ܢ ܟܲܕ݂ ܫܡܲܥ̣ܘ ܒܥܸܠܕ̇ܒ̣ܵܒܲܝ̈ܢ ܕܐܸܬ̣ܝܲܕ݂ܥܲܬ̤ ܠܲܢ ܡܸܠܬ̣ܵܐ: ܘܒܲܛܸܠ ܡܵܪܝܵܐ ܡܘܼܠܟܵܢܲܝ̈ܗܘܿܢ: ܐܸܬ̣ܗ̱ܦܸܟ݂ܢ ܟܠܲܢ ܘܲܣܠܸܩ̄ܢ ܠܫܘܼܪܵܐ. ܘܥܵܒ̣ܕ̇ܝܼܢ ܗ̄ܘܲܝܢ ܟܠܲܢ ܓܒܲܪ ܒܲܥܒ̣ܵܕܹ̇ܗ.

¹⁶ܘܦܸܠܓܵܐ ܕܲܥܠܲܝܡܹ̈ܐ ܡ̣ܢ ܝܵܘܡܵܐ ܗܵܘܿ ܘܲܠܗܲܠ: ܦܸܠܓ̇ܗܘܿܢ ܕܥܲܡܵܐ ܥܵܒ̣ܕ̇ܝܼܢ ܥܵܒ̣ܕ݂ܵܐ. ܘܦܸܠܓ̇ܗܘܿܢ ܐܲܚܝܼܕ݂ܝܼܢ ܪ̈ܘܼܡܚܹܐ: ܘܣܲܟ̇ܪܹ̈ܐ: ܘܩܸܫ̈ܬܵܬ̣ܵܐ: ܘܫܸܪ̈ܝܵܢܹܐ. ܘܲܡܫܲܡ̈ܫܵܢܹܐ ܩܵܝ̇ܡܝܼܢ ܒܸܣܬܲܪ ܝܼܗ̄ܘܼܕܲܝܹ̈ܐ: ܘܒ̣ܵܢܹ̇ܝܢ ܫܘܼܪܹ̈ܐ.

¹⁷ܘܕܲܫܩܝܼܠܝܼܢ: ܒܩ̈ܘܿܦܹܐ ܫܩܝܼܠܝܼܢ: ܒܲܚܕ݂ܵܐ ܐܝܼܕܹܗ ܥܵܒܹܕ݂ ܥܒ̣ܵܕ݂ܵܐ. ܘܒܲܚܕ݂ܵܐ ܐܝܼܕܹܗ ܫܩܝܼܠ ܙܲܝܢܵܐ.

¹⁸ܘܐܲܪ̈ܕܸ̇ܟ݂ܠܹܐ: ܐܲܣܝܼܪ ܣܲܝܦܹܗ: ܘܩܵܐܹ̇ܡ ܘܒ̣ܵܢܹܐ. ܘܲܕ݂ܩܵܪܹܐ ܒܩܲܪܢܵܐ ܩܵܐܹ̇ܡ ܒܸܣܬ̇ܪܹܗ.

¹⁹ܘܐܸܡܪܹܬ̣ ܠܪܵܘ̱ܪ̈ܒ̣ܵܢܹܐ ܘܲܠܫܲܠܝܼܛܵܢܹ̈ܐ: ܘܲܠܫܲܪܟܵܐ ܕܥܲܡܵܐ: ܥܒ̣ܝܼܕ̇ܬܵܐ: ܣܲܓ̇ܝܼܵܐܐ ܘܲܪܘܝܼܚܵܐ. ܘܲܚܢܲܢ ܦܪܝܼܫܝܼܢܲܢ ܘܩܵܝܡܝܼܢܲܢ ܥܲܠ ܫܘܼܪܵܐ: ܘܦܲܪܝܼܩܝܼܢܲܢ ܓܒܲܪ ܡ̣ܢ ܐܲܚܘܼܗܝ.

²⁰ܒܕ݂ܘܼܟ̇ܬ̣ܵܐ ܕܹܝܢ ܕܫܵܡ̇ܥܝܼܢ ܐ̄ܢܬ̇ܘܿܢ ܩܵܠܵܐ ܕܩܲܪܢܵܐ: ܠܬܲܡܵܢ ܬܸܬ̣ܩܲܪܒ̣ܘܼܢ ܠܘܵܬܲܢ ܘܐܲܠܵܗܲܢ ܢܸܬ̣ܟܲܬܲܫ ܥܲܠ ܐܲܦܲܝ̈ܢ.

²¹ܘܲܚܢܲܢ ܢܸܗܘܹܐ ܥܵܒ̣ܕ̇ܝܼܢ ܒܲܥܒ̣ܵܕܲܢ. ܘܦܸܠܓܲܢ ܢܸܗܘܘܿܢ ܐܲܚܝܼܕ݂ܝܼܢ ܪ̈ܘܼܡܚܹܐ: ܡ̣ܢ ܡܲܣܵܩܲܝ ܫܲܦܪܵܐ: ܥܕܲܡܵܐ ܕܢܵܦܩܝܼܢ ܟܵܘ̈ܟ̇ܒܹܐ.

²²ܐܵܦ ܒܹܗ ܒܙܲܒ̣ܢܵܐ ܗܵܘ̇: ܐܸܡ̇ܪܹܬ̣ ܠܥܲܡܵܐ: ܕܓܲܒ̣ܪܵܐ ܘܛܲܠܝܹܗ ܢܸܗܘܘܿܢ ܒܵܝܬ̇ܝܼܢ ܒܓ̣ܵܘ ܫܘܼܩܹ̈ܐ ܕܐܘܿܪܸܫܠܸܡ ܘܢܸܗܘܘܿܢ ܢܵܛ̇ܪܝܼܢ ܠܵܗ̇ ܒܠܸܠܝܵܐ ܘܒ̣ܐܝܼܡܵܡܵܐ. ܘܢܸܗܘܘܿܢ ܥܵܒ̣ܕ̇ܝܼܢ ܥܒ̣ܵܕܹ̈ܐ.

²³ܘܐܸܢܵܐ ܘܐܲܚܲܝ̈ ܘܛܲܠܝܲܝ̈ ܘܐ̄ܢܵܫܵܐ ܢܵܛܘܿܪܹ̈ܐ ܕܒܲܝܬ̇ܝ: ܠܵܐ ܫܵܠܚܝܼܢܲܢ ܢܲܚ̈ܬܲܝܢ ܝܲܪܚܵܐ ܕܝܵܘ̈ܡܵܬ̣ܵܐ. ܐ̄ܢܵܫ ܕܡܵܛܹ̇ܐ ܠܹܗ.