Read Aramaic Peshita Nehemiah 5 Bible Online

Nehemiah 5 - Aramaic Peshita bible

Nehemiah 5

¹ܘܗܵܝܕܹ̇ܝܢ ܐܲܝܠܸܠ̣ܘ ܥܲܡܵܐ ܘܢܸܫܲܝ̈ܗܘܿܢ ܝܑܼܠܲܠܬܵܐ ܪܲܒ̇ܬ̣ܵܐ: ܥܲܠ ܐܲܚܲܝ̈ܗܘܿܢ ܝܗ̄ܘܼ̈ܕ݂ܵܝܹܐ.

²ܘܐܝܼܬ̣ ܕܐܵܡ̇ܪܝܼܢ: ܒܢܲܝ̈ܢ ܘܲܒ̣̈ܢܵܬܲܢ ܘܐܲܚܲܝ̈ܢ: ܣܲܓ̇ܝܼܐܝܼܢ ܢܸܣܲܒ̣ ܥܒ̣ܘܼܪܵܐ: ܘܢܹܐܟ݂ܘܿܠ ܘܢܸܚܹܐ.

³ܘܐܝܼܬ̣ ܕܐܵܡ̇ܪܝܼܢ: ܚܲܩ̈ܠܵܬܲܢ ܘܒ̣ܵܬܲܝ̈ܢ ܘܟܲܪ̈ܡܲܝܢ ܡܙܲܒ̇ܢܝܼܢܲܢ ܘܢܵܣܒ̇ܝܼܢܲܢ ܥܒ̣ܘܼܪܵܐ ܒܟܲܦܢܵܐ: ܘܚܵܐܹ̇ܝܢܲܢ.

⁴ܘܐܝܼܬ̣ ܕܐܵܡ̇ܪܝܼܢ ܢܹܐܙܲܦ ܟܸܣܦܵܐ ܡ̣ܢ ܡܲܕܲܐܬ̣ܵܐ ܕܡܲܠܟܵܐ. ܘܢܸܦܠܘܿܚ ܚܲܩ̈ܠܵܬܲܢ ܘܟܲܪ̈ܡܲܝܢ: ܘܢܸܚܹܐ.

⁵ܘܐܝܼܬ̣ ܕܐܵܡ̇ܪܝܼܢ: ܡܸܟܹ̇ܝܠ ܐܲܝܟ݂ ܒܸܣܪܵܐ ܕܐܲܚܲܝ̈ܢ: ܗܵܟܲܢܵܐ ܐܵܦ ܒܸܣܪܲܢ. ܘܐܲܝܟ݂ ܒܢܲܝ̈ܗܘܿܢ: ܗܵܟܲܢܵܐ ܐܵܦ ܒܢܲܝ̈ܢ ܗܵܐ ܡܸܟܹ̇ܝܠ ܟܵܒ̣ܫܝܼܢ ܚ̄ܢܲܢ ܒܢܲܝ̈ܢ ܘܲܒ̣̈ܢܵܬܲܢ ܠܥܲܒ̣̈ܕ̇ܝܼܢ. ܘܐܝܼܬ̣ ܡ̣ܢ ܒ̈ܢܵܬܲܢ ܕܡܸܬ̣ܟܲܒ̣̈ܫܵܢ ܠܐܲܡ̈ܗܵܬ̣ܵܐ. ܘܠܵܐ ܡܪܝܼܡܝܼܢ ܩܕ݂ܵܡ ܐܲܠܵܗܵܐ ܐܝܼܕܲܝܗܘܿܢ. ܘܚܲܩ̈ܠܵܬܲܢ ܘܟܲܪ̈ܡܲܝܢ ܘܢܸܟ݂ܣܲܝ̈ܢ ܡܸܬ̣ܝܲܗ̄ܒ̇ܝܼܢ ܠܐܲܚܪ̈ܵܢܹܐ.

⁶ܘܟܸܪܝܲܬ̤ ܠܝܼ ܛܵܒ̣ ܟܲܕ݂ ܫܸܡ̇ܥܹܬ̣ ܝܑܼܠܲܠܬ̇ܗܘܿܢ ܘܡܸܠܹ̈ܐ ܗܵܠܹܝܢ.

⁷ܘܐܸܬ̇ܬ̇ܒܲܪ ܠܹܒ̇ܝ ܒܓ̣ܵܘܝ. ܘܐܲܓ̇ܪܹܬ̣ ܪܘܼܚܝ: ܘܡܲܠܠܹܬ̣ ܥܲܡ ܩܲܫܝܼܫܹ̈ܐ ܘܥܲܡ ܪܵܘ̱ܪ̈ܒ̣ܵܢܹܐ.

⁸ܘܐܸܡ̇ܪܹܬ̣ ܠܗܘܿܢ: ܕܲܚܢܲܢ ܩܢܲܝܢܲܢ ܠܐܲܚܲܝ̈ܢ ܝܗ̄ܘܼ̈ܕ݂ܵܝܹܐ: ܕܡܸܙܕܲܒ̇ܢܝܼܢ ܠܥܲܡܡܹ̈ܐ: ܗܸܢܘܿܢ ܘܲܒ̣ܢܲܝ̈ܗܘܿܢ ܓܲܒ̣ܪܵܐ ܠܐܲܚܘܼܗܝ ܫܵܩܠܝܼܢ ܐ̄ܢܬ̇ܘܿܢ ܡܸܛܠ ܗܵܢܵܐ ܝܸܗ̄ܒܹ̇ܬ̣ ܥܠܲܝܗܘܿܢ ܩܵܠܵܐ. ܘܐܸܡ̇ܪܹܬ̣ ܠܗܘܿܢ: ܐܵܦ ܐܲܢ̄ܬ̇ܘܿܢ ܬܙܲܒ̇ܢܘܼܢ ܠܐܲܚܲܝ̈ܟ̇ܘܿܢ ܘܲܫܬܸܩ̣ܘ: ܘܠܵܐ ܝܲܗ̄ܒ̣ܘ ܠܝܼ ܦܸܬ̣ܓ̣ܵܡ.

⁹ܘܐܸܡ̇ܪܹܬ̣ ܠܗܘܿܢ: ܠܵܐ ܫܲܦܝܼܪ ܦܸܬ̣ܓ̣ܵܡܵܐ ܕܐܲܢ̄ܬ̇ܘܿܢ ܥܵܒ̣ܕ̇ܝܼܢ. ܡܸܟܹ̇ܝܠ ܒܕܸܚ̱ܠܬ̣ܵܐ ܕܐܲܠܵܗܲܢ ܠܵܐ ܡܗܲܠܟ݂ܝܼܢ ܐ̄ܢܬ̇ܘܿܢ. ܡܸܛܠ ܕܥܵܒ̣ܕ̇ܝܼܢ ܐ̄ܢܬ̇ܘܿܢ ܐܲܝܟ݂ ܥܒ̣ܵܕܹ̈ܐ ܕܥܲܡܡܹ̈ܐ ܕܒܲܚܕ݂ܵܪ̈ܲܝܢ.

¹⁰ܘܐܵܦ ܐܸܢܵܐ ܘܲܒ̣ܢܲܝ̈ ܘܐܲܚܲܝ̈ ܢܸܣܲܒ̣ ܟܸܣܦܵܐ: ܘܢܸܙܒܲܢ ܥܒ̣ܘܼܪܵܐ: ܘܢܸܫܒ̇ܘܿܩ ܠܡܸܣܟܹ̇ܢܹ̈ܐ ܕܐܝܼܬ̣ ܒܥܲܡܲܢ.

¹¹ܘܢܲܦܢܸܐ ܠܗܘܿܢ ܒܝܵܘܡܵܐ ܗܵܢܵܐ: ܟܲܪ̈ܡܲܝܗܘܿܢ ܘܙܲܝܬܲܝ̈ܗܘܿܢ ܘܚܲܩ̈ܠܵܬ̣ܗܘܿܢ ܘܒ̣ܵܬܲܝ̈ܗܘܿܢ. ܘܟܸܣܦܵܐ ܘܲܥܒ̣ܘܿܪܵܐ ܘܚܲܡܪܵܐ ܘܡܸܫܚܵܐ ܢܸܫܒ̇ܘܿܩ ܠܫܲܪܟܵܐ ܕܥܲܡܵܐ.

¹²ܘܐܵܡ̇ܪܝܼܢ ܠܝܼ: ܗܵܟܲܢܵܐ ܢܸܥܒܸ̇ܕ݂: ܐܲܝܟ݂ ܕܐܲܢ̄ܬ̇ ܐܸܡܲܪܬ̇ ܘܲܩܪܹܝܬ̣ ܠܟ݂ܘܼܡܪܹ̈ܐ: ܘܐܸܡ̇ܪܹܬ̣ ܠܗܘܿܢ: ܕܗܵܟܲܢܵܐ ܘܵܠܹ̇ܐ ܠܡܸܥܒܲܕ݂. ܘܐܵܘܡ̇ܝܼܬ̣ ܐܸܢܘܿܢ ܠܡܸܥܒܲܕ݂ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ. ܘܐܵܦ ܠܲܛܠܵܝܹ̈ܐ ܕܲܩܕ̇ܩܹ̈ܐ.

¹³ܘܐܵܡ̇ܪܝܼܢܲܢ: ܕܗܵܟܲܢܵܐ ܢܙܝܼܥ ܐܲܠܵܗܵܐ ܠܟ݂ܠ ܓܒܲܪ ܕܠܵܐ ܢܩܝܼܡ ܥܲܠ ܡܸܠܬ̣ܵܐ ܗܵܕܹܐ: ܡ̣ܢ ܒܲܝܬܹ̇ܗ ܘܡ̣ܢ ܠܐܹܘܬܹܗ. ܗܵܟܲܢܵܐ ܢܸܗܘܹܐ ܡܙܵܥ ܘܝܲܪܩܵܢ. ܘܐܵܡ̇ܪܝܼܢ ܥܲܡܵܐ ܟܠܹܗ: ܐܵܡܹܝܢ. ܘܩܵܡ̣ܘ ܥܲܡܵܐ ܟܠܹܗ: ܘܫܲܒܲܚܘ ܠܡܵܪܝܵܐ. ܘܲܥܒܲܕ݂ܘ ܟܠܹܗ ܥܲܡܵܐ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ.

¹⁴ܘܐܵܦ ܡ̣ܢ ܝܵܘܡܵܐ ܕܦܲܩܕܲܢܝ ܠܡܸܗܘܵܐ ܫܲܠܝܼܛܵܐ ܒܐܲܪܥܵܐ ܕܲܝܗܘܼܕ݂: ܡ̣ܢ ܫܢܲܬ̣ ܥܸܣܪܝܼܢ: ܘܲܥܕܲܡܵܐ ܠܲܫܢܲܬ̣ ܬܠܵܬ̣ܝܼܢ ܘܬܲܪܬܹ̇ܝܢ ܠܐܲܪܛܲܚܫܸܫܬ̇ ܡܲܠܟܵܐ: ܫܢ̈ܝܼܢ ܬܲܪܬܲܥܸܣܪܹ̈ܐ ܐܸܢܵܐ ܘܐܲܚܲܝ̈ ܗܘܹ̇ܝܬ̣ ܠܗܘܿܢ ܪܹܫܵܐ. ܘܠܵܐ ܚܡܵܪܵܐ ܕܚܲܕ݂ ܡܸܢܗܘܿܢ ܕܸܒ̣ܪܹܬ̣: ܘܐܵܦܠܵܐ ܐܲܗܪܹܬ̣ ܠܐܢܵܫ ܡܸܢܗܘܿܢ.

¹⁵ܘܫܲܠܝܼܛܵܢܹ̈ܐ ܕܲܩܕ݂ܵܡܲܝ ܫܲܥܒ̇ܕ݂ܘܼܗܝ ܠܥܲܡܵܐ. ܘܲܢܣܲܒ̣ܘ ܡܸܢܗܘܿܢ ܚܲܡܪܵܐ: ܘܠܲܚܡܵܐ: ܘܟܸܣܦܵܐ ܣܲܓ̇ܝܼܵܐܐ ܠܡܲܕܲܐܬ̣ܵܐ: ܥܕܲܡܵܐ ܠܣܸܠ̈ܥܝܼܢ ܐܲܪܒ̇ܥܝܼܢ. ܐܵܦ ܥܲܒ̣ܕܲܝ̈ܗܘܿܢ ܐܲܫܠܸܛܘ ܥܲܠ ܥܲܡܵܐ. ܘܐܸܫܬܲܠܲܛܘ ܥܠܲܝ̈ܗܘܿܢ: ܘܐܸܫܬܲܢܲܕ݂ܘ ܒܗܘܿܢ. ܘܐܸܢܵܐ ܠܵܐ ܥܸܒ̣ܕܹ̇ܬ̣ ܗܵܟܲܢܵܐ: ܡ̣ܢ ܩܕ݂ܵܡ ܕܸܚ̱ܠܬܹܗ ܕܐܲܠܵܗܵܐ.

¹⁶ܐܵܦ ܒܲܥܒ̣ܵܕ݂ܵܐ ܕܫܘܼܪܵܐ ܗܵܢܵܐ: ܛܵܒ̣ ܐܸܬ̣ܥܲܫܢܹ̇ܬ̣ ܘܚܲܩ̈ܠܵܬ̣ܵܐ ܠܵܐ ܙܲܒ̇ܢܹ̇ܬ̣ ܘܟ݂ܠܗܘܿܢ ܛܠܵܝܹ̈ܐ ܒܢܲܝ̈ ܝܗ̄ܘܼܕ݂ܵܝܹ̈ܐ ܐܸܬ̣ܟܲܢܲܫܘ: ܘܩܵܡ̣ܘ ܬܲܡܵܢ ܥܲܠ ܥܒ̣ܵܕ݂ܵܐ.

¹⁷ܘܪܵܘ̱ܪ̈ܒ̣ܵܢܹܐ ܘܫܲܠܝܼܛܵܢܹ̈ܐ ܡܵܐܐ ܘܚܲܡܫܝܼܢ ܓܲܒ̣ܪ̈ܝܼܢ: ܘܕ݂ܵܐܬܹ̇ܝܢ ܠܘܵܬܲܢ ܡ̣ܢ ܥܲܡܡܹ̈ܐ ܕܲܚܕ݂ܵܪ̈ܲܝܢ: ܐܵܬܹ̇ܝܢ ܗ̄ܘ̣ܵܘ ܐ̄ܢܵܫ ܒܦܵܬ̣ܘܿܪܹܗ.

¹⁸ܘܓܲܒ̣ܪܵܐ ܕܥܵܒܹܕ݂ ܗ̄ܘ̣ܵܐ ܠܲܚܡܵܐ: ܡܲܝܬܹ̇ܐ ܗ̄ܘ̣ܵܐ ܠܥܲܒ̣̈ܕܹ̇ܐ ܕܥܵܒ̣ܕ̇ܝܼܢ: ܬܵܘܪܵܐ ܚܲܕܪ: ܘܥܵـ̈ـܢܵܐ ܫܸܬ̣ ܫܲܡ̈ܝܼܢܵܬ̣ܵܐ. ܘܨܸܦܪ̈ܵܝܹܐ ܐܸܬ̣ܥ̱ܒܸܕ݂ܘ ܠܲܢ. ܘܲܚܕ݂ܵܐ ܠܥܸܣܪܵܐ ܝܵܘ̈ܡܝܼܢ: ܚܲܡܪܵܐ ܣܲܓ̇ܝܼ ܘܥܲܡ ܗܵܕܹܐ: ܠܲܚܡܵܐ ܕܫܲܠܝܼܛܘܼܬ̣ܵܐ ܠܵܐ ܒܥܹ̇ܝܬ̣: ܡܸܛܠ ܕܲܥܫܸܢ ܥܒ̣ܵܕ݂ܵܐ ܥܲܠ ܥܲܡܵܐ ܗܵܢܵܐ.

¹⁹ܐܸܬ̇ܕܲܟ݂ܪ ܠܝܼ ܐܲܠܵܗܝ ܠܛܵܒ̣: ܟܠ ܡܸܕܸ̇ܡ ܕܥܸܒ̣ܕܹ̇ܬ̣ ܚܠܵܦ ܥܲܡܵܐ ܗܵܢܵܐ.